ប្រទេសថៃ ៖ អតីតមេបញ្ជាការយោធភូមិភាគ២ លោក ប៊ុនស៊ីន ផាកក្លាង ដែលបានចូលនិវត្តន៍ពីការងារកងទ័ពកាលពីថ្ងៃទី៣០ ខែកញ្ញា ឆ្នាំ២០២៥ និងត្រូវបានស្តេចថៃប្រគល់តំណែងថ្មីធ្វើជាអង្គរក្សពិសេស ពេលនេះ លោកបានទទួលតំណែងមួយទៀតហើយ គឺទីប្រឹក្សាមេបញ្ជាការកងទ័ពជើងគោក ដែលមានតួនាទីណែនាំពីយុទ្ធសាស្ត្រការពារប្រទេស និងផ្តល់នូវបទពិសោធន៍ពង្រឹងសន្តិសុខរបស់កងទ័ព ។ នេះបើតាមការចុះផ្សាយរបស់សារព័ត៌មាន TNN នៅថ្ងៃទី៣ ខែតុលា ឆ្នាំ២០២៥ ។

កាលពីថ្ងៃទី១ ខែតុលា កងទ័ពជើងគោកថៃបានចេញលិខិតតែងតាំងលោក ប៊ុនស៊ីន មន្ត្រីកងទ័ពចូលនិវត្តន៍ ឱ្យកាន់តំណែងជាទីប្រឹក្សាមេបញ្ជាការកងទ័ពជើងគោក ដែលលិខិតនេះចុះហត្ថលេខាដោយលោក ផាណា ឃ្លេវផ្លតថុក មេបញ្ជាការកងទ័ពជើងគោក ។ លោក ប៊ុនស៊ីន មានតួនាទីចម្បង គឺផ្តល់ការណែនាំពីយុទ្ធសាស្ត្រផ្នែកសន្តិសុខ និងយុទ្ធសាស្ត្រការពារប្រទេស ។

ការតែងតាំងនេះមានគោលបំណងប្រើប្រាស់ធនធានមនុស្សរបស់កងទ័ពឱ្យមានប្រយោជន៍បំផុត ដោយកងទ័ពជើងគោកថៃចាត់ទុកលោក ប៊ុនស៊ីន គឺជាមេដឹកនាំកងទ័ពដែលមានចំណេះដឹង សមត្ថភាព ការលះបង់ និងបទពិសោធន៍ក្នុងការបំពេញតួនាទី ជាពិសេស ពេលសង្គ្រាមនៅព្រំដែនកម្ពុជា-ថៃ ។ លោក ប៊ុនស៊ីន បានរក្សាអធិបតេយ្យភាព និងការពារសុវត្ថិភាពពលរដ្ឋ ។

ទីប្រឹក្សាមេបញ្ជាការកងទ័ពជើងគោកមានតួនាទីចម្បង គឺផ្តល់ការប្រឹក្សា ណែនាំ និងណែនាំពីយុទ្ធសាស្ត្រសន្តិសុខ យុទ្ធសាស្ត្រការពារជាតិ រួមទាំងគាំទ្រភារកិច្ចរបស់មេបញ្ជាការកងទ័ពជើងគោក ។ ការតែងតាំងនេះឆ្លុះបញ្ចាំងពីការប្តេជ្ញាចិត្តរបស់កងទ័ពជើងគោកក្នុងការយកបទពិសោធន៍របស់លោក ប៊ុនស៊ីន មកប្រើប្រាស់នាពេលបច្ចុប្បន្ន ។

គួរបញ្ជាក់ថា លោក ប៊ុនស៊ីន គឺជាបុគ្គលបង្កជម្លោះ និយាយមូលបង្កាច់ និងចោទប្រកាន់កម្ពុជា រហូតទទួលបានការលើកតម្កើងពីពលរដ្ឋថៃនៅទូទាំងប្រទេសចង់ឱ្យលោកធ្វើជានាយករដ្ឋមន្ត្រី ថែមទាំងធ្វើរូបសំណាកគោរពទៀតផង ។ ដូចគ្នានេះ ស្តេចថៃបានចេញព្រះរាជក្រឹត្យតែងតាំងមេទ័ពឈ្លានពានរូបនេះធ្វើជាអង្គរក្សពិសេស ដោយសារលោក ប៊ុនស៊ីន បានបំពេញភារកិច្ចតាមការបញ្ជារបស់ស្តេចថៃ ។

លោក ប៊ុនស៊ីន បានបង្កសង្គ្រាមជាមួយកម្ពុជាដើម្បីកសាងប្រជាប្រិយភាពរបស់ខ្លួន ដោយលោកនិយាយនាពេលកន្លងមកថា ស្តេចថៃបានយកព្រះទ័យទុកដាក់ខ្លាំងលើស្ថានការណ៍ព្រំដែនជាមួយកម្ពុជា រាល់ការវិវឌ្ឍន៍ស្ថានការណ៍ព្រំដែន លោកត្រូវតែរាយការណ៍ផ្ទាល់ថ្វាយឱ្យព្រះអង្គជ្រាប ៕

បងប្អូនខ្មែរយើងគិតយ៉ាងម៉េចដែរ? នាយករដ្ឋមន្រ្តីថៃ លោក Anutin Charnvirakul បានព្រមានថា ប្រទេសថៃបានត្រៀមខ្លួនរួចរាល់ក្នុងបិទព្រំដែនបន្តជាមួយកម្ពុជាដោយគ្មានការកំណត់ ប្រសិនបើភាពតានតឹងលើជម្លោះព្រំដែននៅតែបន្តកើនឡើង។ នេះបើតាមការចុះផ្សាយដោយសារព័ត៌មាន The Nation របស់ថៃ។

ថ្លែងទៅកាន់អ្នកសារព័ត៌មានកាលពីថ្ងៃទី2 ខែតុលា ឆ្នាំ2025 លោក Anutin Charnvirakul បាននិយាយថា រដ្ឋាភិបាលថៃនឹងផ្តល់អាទិភាពដល់សន្តិសុខជាតិ និងសុវត្ថិភាពរបស់ពលរដ្ឋថៃលើសពីអ្វីៗទាំងអស់។ លោកបានកត់សម្គាល់ថា ប្រទេសថៃនឹងមិនស្ទាក់ស្ទើរក្នុងការចាត់វិធានការតឹងរ៉ឹងណាមួយឡើយ ប្រសិនបើស្ថានការណ៍នៅតាមព្រំដែនកាន់តែមានភាពតានតឹង។

លោកបញ្ជាក់ថា បញ្ហាសំខាន់ចំនួនបីត្រូវបានពិចារណា ហើយជាគោលការណ៍ ក្របខណ្ឌនៃការសាងសង់របងព្រំដែនកម្ពុជា-ថៃ ត្រូវបានអនុម័ត។ ព័ត៌មានលម្អិតនៃគម្រោងនេះនឹងត្រូវគ្រប់គ្រងដោយកងទ័ពភូមិន្ទថៃ ដោយការសាងសង់របងនឹងប្រែប្រួលទៅតាមស្ថានភាពដី និងភាពងាយស្រួលរបស់ប្រជាជនក្នុងតំបន់។

នៅពេលសួរអំពីគោលនយោបាយស្តីពីការបណ្ដេញពលរដ្ឋខ្មែរ នៅតំបន់ភូមិជោគជ័យ និង ភូមិព្រៃចាន់ ដែលយោធាថៃបានកំណត់កាលបរិច្ឆេទឲ្យពលរដ្ឋខ្មែររើចេញនៅថ្ងៃទី 10 ខែតុលានោះ លោក Anutinបានបញ្ជាក់ថា នីតិវិធីច្បាប់នេះគឺត្រូវតែអនុវត្ត រដ្ឋាភិបាលនឹងបណ្តេញជនជាតិខ្មែរចេញពីតំបន់នេះឲ្យអស់នៅពេលដ៏សមស្រប ដែលមិនចាំបាច់ដល់ថ្ងៃទី 10 ខែតុលាទេ។

ការលើកឡើងនេះបានកើតឡើងចំពេលដែលកម្ពុជានិងថៃកំពុងមានការប៉ះទង្គិចគ្នាលើការគ្រប់គ្រងព្រំដែន និងសន្តិសុខ ដែលបង្កឱ្យមានការព្រួយបារម្ភក្នុងចំណោមសហគមន៍ដែលរស់នៅក្នុងតំបន់រងផលប៉ះពាល់។ លើសពីនេះ ពាណិជ្ជកម្មក្នុងស្រុក និងការធ្វើដំណើរចេញ-ចូលនានាត្រូវបានរំខានយ៉ាងដុនដាបនៅក្នុងខេត្តមួយចំនួន។

អ្នកវិភាគក្នុងតំបន់បានព្រមានថា ការបិទព្រំដែនរយៈពេលយូរអាចហុចផលវិបាកផ្នែកសេដ្ឋកិច្ចទៅកាន់ប្រទេសទាំងសងខាង ជាពិសេសសម្រាប់ពាណិជ្ជកម្មតាមព្រំដែន ដែលបម្រើជាខ្សែជីវិតដ៏សំខាន់សម្រាប់សហគមន៍ជាច្រើននៅភាគីទាំងពីរ។

ទោះជាយ៉ាងណាគេកត់សម្គាល់ឃើញថា កម្ពុជាពុំសូវទទួលរងផលប៉ះពាល់ខ្លាំងពីការបិទនេះទេ ដោយបើសម្លឹងទៅមើលទំហំទឹកប្រាក់នៃការនាំចូលទៅវិញទៅមករបស់ប្រទេសទាំងពីរ ថៃមានទំនិញនាំចូលមកកម្ពុជាមានចំនួនច្រើនជាងកម្ពុជារាប់សិបដង ដែលកត្តានេះឆ្លុះបញ្ចាំងថាថៃគឺជាអ្នកខាតបង់ខ្លាំងនៅពេលសកម្មភាពនាំចេញត្រូវបានកាត់ផ្ដាច់។

បន្ថែមពីនេះ ដើម្បីយកចិត្តពលរដ្ឋជ្រុលនិយមថៃ រដ្ឋាភិបាលថៃមាននាយករដ្ឋមន្រ្តីថ្មីគឺលោក Anutin នេះ សុខចិត្តប្ដេជ្ញាចិត្តបន្តបិទព្រំដែនជាមួយកម្ពុជា ទោះជាដឹងថាកម្ពុជានឹងមិនដាច់ពោះស្លា.ប់ដោយសារថៃបិទព្រំដែនឡើយ។ ផ្ទុយទៅវិញ ការអនុវត្តតាមការទាមទាររបស់ប្រជាជនដោយមិនគិតគូរពីផលប៉ះពាល់ជាក់ស្ដែងនេះ បន្តិចទៀតរដ្ឋាភិបាលថៃមុខជាត្រូវដោះស្រាយបញ្ហាបំណុលរបស់ពលរដ្ឋ បាត់បង់ទីផ្សារនាំចេញទំនិញ និងខាតបង់ផ្នែកសេដ្ឋកិច្ចធ្ងនធ្ងរជាក់ជាមិនខាន៕

ប្រទេសថៃ ៖ តាមការប្រកាសក្នុងហ្វេសប៊ុកផេកផ្លូវការរបស់ក្រសួងការពារជាតិកម្ពុជាកាលពីថ្ងៃទី៣០ ខែកញ្ញា ឆ្នាំ២០២៥ ថា កិច្ចប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៥ របស់កម្ពុជា និងកងទ័ពភូមិភាគទី១ថៃ គ្រោងនឹងធ្វើនៅអំឡុងខែតុលានេះ ។ យោធភូមិភាគទី៥កម្ពុជាបានបញ្ជូនលិខិតទៅកងទ័ពភូមិភាគទី១ថៃ ដើម្បីជួបប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) ចាប់ពីថ្ងៃទី១០ ដល់ថ្ងៃទី១២ ខែតុលា ឆ្នាំ២០២៥ នៅខេត្តបន្ទាយមានជ័យ ។

ក្រោយពីកម្ពុជាអញ្ជើញកងទ័ពភូមិភាគទី១ថៃមកចូលរួមប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) នៅខេត្តបន្ទាយមានជ័យ ដែលកម្ពុជាធ្វើជាម្ចាស់ផ្ទះ មេបញ្ជាការកងទ័ពភូមិភាគទី១ថៃ លោក វរ៉ាយ៉ត លឿងសុវណ្ណ ដែលទើបឡើងកាន់តំណែងថ្មីបានបដិសេធមិនចូលរួមកិច្ចប្រជុំ RBC ជាមួយកម្ពុជាដាច់ខាត ប្រសិនបើកម្ពុជាគ្មានរបៀបវារៈបណ្តេញពលរដ្ឋខ្មែរចេញពីតំបន់ព្រំដែនជាប់ភូមិណងចាន់ និងភូមិណងញ៉ាកែវ ទេនោះ ។

នៅថ្ងៃទី៣ ខែតុលា ឆ្នាំ២០២៥ ប្រភពព័ត៌មានពីកងទ័ពភូមិភាគទី១ថៃឱ្យដឹងថា កម្ពុជាបានបញ្ជូនលិខិតអញ្ជើញកងទ័ពភូមិភាគទី១ ចូលរួមកិច្ចប្រជុំ RBC ចាប់ពីថ្ងៃទី១០ ដល់ថ្ងៃទី១២ ខែតុលា នៅខេត្តបន្ទាយមានជ័យ ដើម្បីជំរុញការបន្តអនុវត្តបទឈប់បាញ់រវាងកម្ពុជា-ថៃឱ្យបានពេញលេញ ប្រកបដោយប្រសិទ្ធភាព ដែលរបៀបវារៈកិច្ចប្រជុំ រួមមាន ៖ បង្ក្រាប Scammer ដោះមីន និងរៀបចំសណ្តាប់ធ្នាប់ព្រំដែន ។

មេបញ្ជាការកងទ័ពភូមិភាគទី១ លោក វរ៉ាយ៉ត លឿងសុវណ្ណ បានឱ្យកងទ័ពភូមិភាគទី១ បញ្ជូនលិខិតមកកម្ពុជាវិញដែលមានខ្លឹមសារថា បើកិច្ចប្រជុំ RBC ចាប់ពីថ្ងៃទី១០ ដល់ថ្ងៃទី១២ ខែតុលា គ្មានរបៀបវារៈពិភាក្សាពីការបណ្តេញពលរដ្ឋខ្មែរចេញពីតំបន់ព្រំដែនជាប់ភូមិណងចាន់ និងភូមិណងញ៉ាកែវ ទេនោះ គឺត្រូវពន្យារពេលកិច្ចប្រជុំ រហូតដល់កម្ពុជាពិភាក្សាពីការបណ្តេញពលរដ្ឋខ្មែរ ។

បើកងទ័ពភូមិភាគទី១ ពុំបានចូលរួមកិច្ចប្រជុំ RBC ទេ គឺកងទ័ពភូមិភាគទី២ និងកងកម្លាំងការពារព្រំដែនខេត្តចាន់បុរី និងខេត្តត្រាត ក៏ពុំចូលរួមកិច្ចប្រជុំ RBC ដូចគ្នា លុះត្រាតែកងទ័ពភូមិភាគទី១ រៀបចំសណ្តាប់ធ្នាប់រួចរាល់ ។ រីឯកិច្ចប្រជុំ GBC រវាងឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា និងលោក ណាត់ថាផុង ណាកផានិច រដ្ឋមន្ត្រីក្រសួងការពារជាតិថៃ ក៏ពុំអាចប្រជុំបានដែរ ដោយសារកិច្ចប្រជុំ RBC នៅតំបន់ព្រំដែនទាំង៣ ពុំទាន់បញ្ចប់ ។

គួរបញ្ជាក់ថា កម្ពុជាធ្វើជាម្ចាស់ផ្ទះកិច្ចប្រជុំ RBC ចាប់ពីថ្ងៃទី១០ ដល់ថ្ងៃទី១២ ខែតុលា ឆ្នាំ២០២៥ នៅខេត្តបន្ទាយមានជ័យ គឺមានគោលបំណងជំរុញការបន្តអនុវត្តបទឈប់បាញ់រវាងកម្ពុជា-ថៃឱ្យបានពេញលេញ និងប្រកបដោយប្រសិទ្ធភាព ព្រមទាំងស្វែងរកកិច្ចសហប្រតិបត្តិការជាក់ស្តែងសំដៅលើកកម្ពស់សន្តិភាព និងស្ថិរភាពរវាងប្រទេសទាំងពីរ ក៏ដូចជាការវិលត្រឡប់ទៅរកប្រក្រតីភាពឡើងវិញ ៕

ប្រទេសថៃ ៖ ក្រោយពីថៃមានគ្រោះធម្មជាតិខ្យល់ព្យុះ ទឹកជំនន់ និងការបាក់ដីជាញឹកញាប់ ថៃក៏មានអគ្គិភ័យឆាបឆេះអគារ លំនៅឋាន និងហាងលក់ទំនិញផងដែរ ដែលបានបំផ្លា.ញទ្រព្យសម្បត្តិអស់ជាច្រើន ។ តាមការចុះផ្សាយរបស់សារព័ត៌មានថៃ គឺហាងលក់សម្ភារៈសំណង់ និងប្រេងម៉ាស៊ីនមួយកន្លែងនៅកណ្តាលខេត្តរ៉ាក់យ៉ង មានអគ្គិភ័យឆេះយ៉ាងសន្ធោសន្ធៅ ហុយផ្សែងខ្មៅយ៉ាងខ្លាំងឡើងលើបង្កការភ័យតក់ស្លុ.តដល់អ្នកធ្វើដំណើរក្បែរនោះ ។

សារព័ត៌មាន Bangkok Biz News រាយការណ៍ថា នាវេលាម៉ោង៦និង៣០នាទីព្រឹក ថ្ងៃទី៣ ខែតុលា ឆ្នាំ២០២៥ អគ្គិភ័យបានឆាបឆេះហាងលក់សម្ភារៈសំណង់ និងប្រេងម៉ាស៊ីន នៅឃុំណឺនព្រះ ស្រុកមឿង ខេត្តរ៉ាក់យ៉ង យ៉ាងសន្ធោសន្ធៅ ដែលហាងនេះស្ថិតនៅក្បែរស្ថានីយប្រេងឥន្ធនៈ ត្រង់ផ្លូវបំបែកជា៤ តំបន់ខាមិអូ តាមបណ្តោយផ្លូវសុខុមវីត ។ ការិយាល័យកាត់បន្ថយគ្រោះមហន្តរាយប្រចាំខេត្តរ៉ាក់យ៉ងបានបញ្ជូនរថយន្តភ្លាមៗមកពន្លត់ភ្លើងកំពុងឆេះខ្លាំង ដើម្បីកុំឱ្យឆេះរាលដាលដល់ស្ថានីយប្រេងឥន្ធនៈ និងអគារជុំវិញ ។

ភ្លើងបានឆាបឆេះយ៉ាងឆាប់រហ័សដោយសារក្នុងហាងសុទ្ធតែជាសម្ភារៈងាយឆេះ ក្នុងនោះមានប្រេងម៉ាស៊ីនជាង២ម៉ឺនលីត្រ ដែលហេតុការណ៍នេះបណ្តាលឱ្យមានផ្សែងខ្មៅហុយឡើងលើយ៉ាងច្រើនគួរឱ្យតក់ស្លុត ។ ភ្នាក់ងារពន្លត់ភ្លើងបានព្យាយាមគ្រប់គ្រងស្ថានការណ៍ និងពុំទាន់ដឹងពីទំហំខូចខាតដោយសារភ្លើងឆេះនៅឡើយទេ ។

សមត្ថកិច្ចបានបិទផ្លូវនៅជុំវិញហាងលក់សម្ភារៈសំណង់ដែលត្រូវភ្លើងឆេះមិនឱ្យធ្វើចរាចរណ៍ដើម្បីសុវត្ថិភាព ប៉ុន្តែសមត្ថកិច្ចពុំទាន់ជ្រាបមូលហេតុបណ្តាលឱ្យភ្លើងឆេះហាង និងគ្មានសេចក្តីរាយការណ៍ពីចំនួនអ្នករងរបួស ឬស្លាប់ ដោយត្រូវរង់ចាំការពិនិត្យមើលការខូចខាតយ៉ាងលម្អិតបន្តទៀត ។

អាជ្ញាធរបានជូនដំណឹងឱ្យពលរដ្ឋចៀសវាងការធ្វើដំណើរតាមផ្លូវបំបែកជា៤ តំបន់ខាមិអូ តាមបណ្តោយផ្លូវសុខុមវីត ដើម្បីសុវត្ថិភាព និងពុំបង្កការរាំងស្ទះដល់ភ្នាក់ងារពន្លត់ភ្លើង ៕