កញ្ញា សារុន វីរ:ធីតា ហៅ Feng yuu បានធ្វើឱ្យទស្សនិកជនមានការចាប់អារម្មណ៍នៅពេលនាងបានទម្លាយប្រាប់ទស្សនិកជនមានគេឈរសម្លក់នាងនៅក្នុងកំឡុងពេលប្រកួត Face of Asia 2025 ដែលប្រព្រឹត្តទៅនៅប្រទេសកូរ៉េខាងត្បូងកាលពីកន្លងមកនេះ។
Top 10 face of Asia 2025 បានរៀបរាប់នៅក្នុងវីដេអូថា «នៅពេលនាងស្លៀកឈុតប្រពៃណីក្នុងពេលប្រកួតគឺ នាងបានជួបរឿងមួយធ្វើឱ្យអារម្មណ៍អត់ល្អ គឺមានគេឈរសម្លក់នាងពេលស្លៀកឈុតប្រពៃណីខ្មែរ។ ធីតា បានបន្តទៀតថា «មានមនុស្សប៉ុន្មាននាក់គឺឈរសម្លក់នាងតែម្តងធ្វើឱ្យនាងកើតជាចម្ងល់ថានាងធ្វើអ្វីខុសឬយ៉ាងណា»។ ទោះជាយ៉ាងនេះក្តី Feng yuu ថាពេលនាងដឹងគឺលែងឆ្ងល់ទៀតហើយគឺនាងដើរទៅជិតឈរស្តាប់ពួកគេនិយាយទើបនាងលែងប្រកាន់។ Face of Cambodia 2025 បាននិយាយទៀតថានាងមានរឿងជាច្រើនទៀតប៉ុន្តែមិនមែនមានរឿងជាមួយក្រុមការងារឬបេក្ខភាពដទៃទៀតនោះទេ។
ទោះបីជាតារាម៉ូដែលនេះមិនបានបញ្ជាក់ចំៗក្តីប៉ុន្តែអ្នកទស្សនាជាច្រើនជឿថាអ្នកដែលឈរសម្លក់ ធីតា ពេលបង្ហាញឈុតស្បៃខ្មែរនោះគឺទំនងជាជនជាតិថៃ ខណៈប្រទេសនេះក៏បានចូលរួមប្រកួតផងដែរ។
គួរបញ្ជាក់ផងដែរថា កាលពីចុងខែតុលា សារុន វីរ:ធីតា បានតំណាងកម្ពុជាចូលរួមប្រកួតក្នុងកម្មវិធី face of Asia 2025 ដោយបានឈានដល់ TOP នៃការប្រកួតនេះដែលមាន១៦ប្រទេសចូលរួម និង បេក្ខភាពប្រកួតប្រជែង ៥៩នាក់។ តារាម៉ូដែលអាយុ១៧ឆ្នាំនិងមានកម្ពស់១.៧៧រូបនេះបានបំបែកកំត្រាកម្ពុជាចូល Top 10 លើកដំបូងក្នុងកម្មវិធីដែលបានប្រព្រឹត្តទៅនៅកូរ៉េខាងត្បូង៕
