ប្រទេសថៃ ៖ អតីតអ្នកនយោបាយថៃ បុគ្គល វីរៈ ស៊ុមក្វាមឃិត កើតទុក្ខមិនសុខចិត្តជាមួយលទ្ធផលកិច្ចប្រជុំពេញអង្គគណៈកម្មការចម្រុះខណ្ឌសីមាព្រំដែនគោកកម្ពុជា-ថៃ (JBC) នៅខេត្តចន្ទបុរី ប្រទេសថៃ ចាប់ពីថ្ងៃទី២១ ដល់ថ្ងៃទី២២ ខែតុលា ឆ្នាំ២០២៥ ដោយបុគ្គលនេះថា ថៃចាញ់ប្រៀបកម្ពុជាក្នុងកិច្ចប្រជុំ JBC ។ ហេតុនេះ ក៏ប្រកាសប្រមូលពលរដ្ឋថៃទៅដណ្តើមយក និងវាយកំទេ.ចលំនៅឋានពលរដ្ឋខ្មែរនៅភូមិជោគជ័យ (ភូមិណងចាន់) និងភូមិព្រៃចាន់ (ភូមិណងយ៉ាកែវ) នាថ្ងៃទី៣១ ខែតុលា ឆ្នាំ២០២៥ ។

នៅថ្ងៃទី២៣ ខែតុលា បុគ្គល វីរៈ ស៊ុមក្វាមឃិត បានបង្ហោះសារក្នុងហ្វេសប៊ុករបស់ខ្លួននិយាយពីកិច្ចប្រជុំ JBC កម្ពុជា-ថៃ នៅខេត្តចន្ទបុរី ថា ថៃចាញ់ប្រៀបកិច្ចប្រជុំនេះ ឬថៃមានចេតនាលក់ជាតិឱ្យកម្ពុជាម្តងទៀត ទើបធ្វើឱ្យការបណ្តេញពលរដ្ឋខ្មែរចេញពីភូមិជោគជ័យ និងភូមិព្រៃចាន់ ត្រូវអូសបន្លាយពេលយូរ ។ លើសពីនេះ ថៃប្រឈមនឹងការគ្មានសិទ្ធិកាន់កាប់ទឹកដីនៅទីនេះជារៀងរហូត ។

ដូច្នេះ សូមពលរដ្ឋថៃដែលស្រឡាញ់ជាតិទាំងអស់ទៅបំពេញតួនាទីជាជនជាតិថៃ ការពារអធិបតេយ្យភាព និងរក្សាផលប្រយោជន៍ជាតិ តាមច្បាប់មាត្រា៥០ នៃរដ្ឋធម្មនុញ្ញបច្ចុប្បន្ន ។ ពលរដ្ឋថៃដែលស្នេហាជាតិនឹងចូលទៅវាយកំទេចចោលលំនៅឋានរបស់កងទ័ព និងពលរដ្ឋខ្មែរទាំងអស់នៅភូមិជោគជ័យ (ភូមិណងចាន់) ឱ្យខ្ទេចគ្មានសល់ ។ ជួបគ្នានៅភូមិណងចាន់ ឃុំណូនម៉ាកម៉ុន ស្រុកខូកស៊ូង ខេត្តស្រះកែវ នៅថ្ងៃសុក្រ ទី៣១ ខែតុលា ឆ្នាំ២០២៥ នាវេលាម៉ោង១រសៀល ។ សូមពលរដ្ឋទៅជួយគ្នាបំពេញតួនាទីជាជនជាតិថៃ ។

កាលពីខែសីហាកន្លងមក វីរៈ ស៊ុមក្វាមឃិត បានដាក់ពាក្យប្តឹងឱ្យចាប់មេបញ្ជាការយោធភូមិភាគ១ ពីបទពុំបណ្តេញពលរដ្ឋខ្មែរចេញពីភូមិជោគជ័យ និងភូមិព្រៃចាន់ ព្រមទាំងប្តឹងចាប់អភិបាលខេត្តស្រះកែវ ក្រោយពីផ្តល់សម្ភាសន៍និយាយការពិតថា តំបន់ដែលកងទ័ពថៃរាយបន្លាលួសជាទឹកដីរបស់កម្ពុជា ថៃគ្មានឯកសារកាន់កាប់ដីធ្លី ដែលធ្វើឱ្យពលរដ្ឋថៃខឹងសម្បារទូទាំងប្រទេស ។

បុគ្គលនេះតែងតែធ្វើសកម្មភាពអុកឡុក និងចោទប្រកាន់មន្ត្រីរដ្ឋាភិបាលថៃ រហូតធ្វើឱ្យលោកនាយករដ្ឋមន្ត្រី អនុថីន ឆាន់វីរៈគូន មិនពេញចិត្ត ។ លោក អនុថីន និយាយកន្លងមកថា បុគ្គល វីរៈ ស៊ុមក្វាមឃិត មិនធ្លាប់ធ្វើអ្វីជួយជាប្រយោជន៍ដល់ជាតិទេ គឺបានតែស្រែកបង្ករឿងប៉ុណ្ណោះ ។

គួរបញ្ជាក់ថា វីរៈ ស៊ុមក្វាមឃិត បានចំណាយពេលរហូតដល់១៥ឆ្នាំ ដើម្បីឱ្យពលរដ្ឋថៃទូទាំងប្រទេសព្រមទទួលស្គាល់ និងជឿថា ភូមិជោគជ័យ និងភូមិព្រៃចាន់ គឺជាទឹកដីថៃ ។ កន្លងមក បុគ្គលនេះ និងមិត្តភក្តិ៨នាក់ ត្រូវបានកម្ពុជាចាប់ដាក់ពន្ធនាគារចំនួន៣ឆ្នាំ ៦ខែ និង៣ថ្ងៃ ពីបទដើរចូលទឹកដីកម្ពុជាខុសច្បាប់ ទើបបុគ្គលនេះគុំគួន និងសូមឱ្យថៃគ្រប់គ្រងភូមិទាំងពីរឱ្យបាន១០០% ។

រដ្ឋាភិបាល និងកងទ័ពថៃពេលនោះ (នៅឆ្នាំ២០១០) ប្រាប់ឱ្យបុគ្គលនេះព្រមទទួលទទួលកំហុសដើម្បីឱ្យកម្ពុជាដោះលែងពីពន្ធនាគារ ប៉ុន្តែនៅតែពុំទទួលស្គាល់កំហុសរបស់ខ្លួន ។ រហូតមកដល់ពេលនេះ មានរយៈពេល១៥ឆ្នាំហើយ ដែល វីរៈ ស៊ុមក្វាមឃិត ប្រឹងប្រែងធ្វើឱ្យពលរដ្ឋថៃជឿថា ខ្លួនធ្វើសកម្មភាពមានប្រយោជន៍សម្រាប់ជាតិ ប៉ុន្តែថៃបណ្តោយឱ្យពលរដ្ឋខ្មែរចូលមកតំបន់ព្រំដែនខេត្តស្រះកែវ ដូច្នេះ ត្រូវតែបណ្តេញពលរដ្ឋខ្មែរចេញពីលំនៅឋានដើម្បីឱ្យពលរដ្ឋថៃចូលមករស់នៅ ៕

ប្រទេសម៉ាឡេស៊ី ៖ រដ្ឋាភិបាលម៉ាឡេស៊ីបានអនុម័តថវិកាប្រមាណ១ពាន់៥រយលានរីងហ្គីត (ឬជាង៣២០លានដុល្លារ) ដើម្បីសាងសង់របងនៅតាមបណ្តោយព្រំដែនរដ្ឋ Kelantan ជាមួយប្រទេសថៃ ដោយម៉ាឡេស៊ីរំពឹងថា របងព្រំដែនម៉ាឡេស៊ី-ថៃនឹងជួយទប់ស្កាត់ការជួ.ញដូរមនុស្ស លួចឆ្លងដែនខុសច្បាប់ ជួញដូរថ្នាំញៀន និងជារបងការពារទឹកជំនន់ ។ នេះបើតាមការចុះផ្សាយរបស់សារព័ត៌មាន Thairath កាលពីថ្ងៃទី២១ ខែតុលា ឆ្នាំ២០២៥ ។

តាមការលើកឡើងរបស់មេបញ្ជាការប៉ូលិសរដ្ឋ Kelantan គម្រោងសាងសង់របងព្រំដែនម៉ាឡេស៊ី-ថៃ គឺមានការអនុម័តពីក្រុមប្រឹក្សាសន្តិសុខជាតិ ដែលបច្ចុប្បន្ន គម្រោងសាងសង់របងព្រំដែននេះស្ថិតក្នុងដំណាក់កាលដេញថ្លៃ និងរៀបចំកិច្ចសន្យា ។ របងព្រំដែននឹងចាប់ផ្តើមសាងសង់ចាប់ពីតំបន់ទុមផាត រហូតដល់តំបន់តាន់ម៉ារ៉ក ។

កាលពីថ្ងៃទី១៣ ខែតុលា កន្លងមក មេបញ្ជាការប៉ូលិសរដ្ឋ Kelantan និយាយថា ការសាងសង់របងនៅតាមមាត់ទន្លេហ្គោលក ក្នុងតំបន់រ៉ាន់តៅប៉ាន់យាំង និងតំបន់ប៉ាស៊ីម៉ាស គឺមានភាពចាំបាច់ជាយុទ្ធសាស្ត្រ មិនមែនគ្រាន់តែជាជម្រើសទៀតទេ ដោយសារទីតាំងភូមិសាស្ត្រទន្លេហ្គោលក មានសភាពតូចចង្អៀតនិងទឹករាក់ ទើបធ្វើឱ្យពិបាកគ្រប់គ្រងសុវត្ថិភាព ។ ជាមួយគ្នានេះ របងព្រំដែននឹងជួយទប់ស្កាត់ការលួចដឹកទំនិញខុសច្បាប់ ឧក្រិដ្ឋកម្មឆ្លងដែន និងជួយការពារទឹកជំនន់ ។

គម្រោងសាងសង់របងព្រំដែនម៉ាឡេស៊ី-ថៃ គឺស្ថិតក្នុងផែនការពង្រឹងសន្តិសុខព្រំដែនដ៏ធំបំផុតរបស់ប្រទេសម៉ាឡេស៊ីកាលពីចុងឆ្នាំ២០២៤ កន្លងមក ក្រោយពីម៉ាឡេស៊ីមានបញ្ហាការលួចលក់ទំនិញខុសច្បាប់ ជួញដូរថ្នាំញៀន និងលួចឆ្លងដែនខុសច្បាប់តាមព្រំដែនម៉ាឡេស៊ី-ថៃជាបន្តបន្ទាប់ ។

គួរបញ្ជាក់ថា ម៉ាឡេស៊ីមានគម្រោងសាងសង់របងព្រំដែនជាមួយថៃ ដោយសារការលួចដឹកទំនិញខុសច្បាប់កើនឡើងខ្លាំង ដូចជា ប្រេងឥន្ធនៈ ថ្នាំញៀន និងជួញដូរមនុស្ស ហើយរបងនេះនឹងទប់ស្កាត់ក្រុមធ្វើសកម្មភាពបះបោរនៅថៃ ដែលតែងតែឆ្លងដែនទៅម៉ាឡេស៊ីរកកន្លែងសុវត្ថិភាព ។ ការជួញដូរមនុស្ស រត់ពន្ធថ្នាំញៀន និងអាវុធ គឺជាបទឧក្រិដ្ឋដែលកើតឡើងនៅតាមបណ្តោយព្រំដែនម៉ាឡេស៊ី-ថៃជាយូរមកហើយ ៕

ទីក្រុងសេអ៊ូល៖ កូរ៉េខាងត្បូងបានដាក់បម្រាមកម្រិតខ្ពស់ចំពោះការធ្វើដំណើររបស់ពលរដ្ឋកូរ៉េមកកាន់ប្រទេសកម្ពុជា ក្រោមហេតុផលក្តីបារម្ភពីការធ្លាក់ក្នុងអន្ទាក់នៃក្រុមឧក្រិដ្ឋជនអនឡាញ ដោយបានកំណត់គោលដៅមួយចំនួនថាជាតំបន់គ្រោះថ្នាក់ និងព្រ.មានបើពលរដ្ឋកូរ៉េណាម្នាក់ដែលហ៊ានល្មើសបម្រាមនេះនឹងត្រូវប្រឈមការផ្តន្ទាទោសតាមច្បាប់។

យោងតាមប្រព័ន្ធផ្សព្វផ្សាយរបស់កូរ៉េខាងត្បូងកាលពីសប្ដាហ៍មុនបានប្រកាសថា ការកំណត់កូដខ្មៅ (code-black) គឺផ្តោតលើតំបន់ជាក់លាក់មួយចំនួន រួមមានក្រុងព្រះសីហនុ ភ្នំបូកគោក្នុងខេត្តកំពត ក្រុងបាវិតក្នុងខេត្តស្វាយរៀង និងក្រុងប៉ោយប៉ែត ក្នុងខេត្តបន្ទាយមានជ័យ ថាជាសម្បុកឧក្រិដ្ឋកម្មដ៏គ្រោះថ្នាក់ ដែលពលរដ្ឋត្រូវតែជៀសវាងការធ្វើដំណើរទៅជាដាច់ខាត។

បន្ថែមពីលើបម្រាមនេះ រដ្ឋមន្ត្រីក្រសួងការបរទេសកូរ៉េខាងត្បូងបានព្រមានពលរដ្ឋខ្លួនថា ប្រសិនបើមាននរណាម្នាក់ព្យាយាមធ្វើដំណើរ ឬស្នាក់នៅតំបន់ដែលបានហាមឃាត់ នោះពួកគេនឹងត្រូវប្រឈមមុខនឹងការផ្តន្ទាទោសតាមច្បាប់ និងបទប្បញ្ញត្តិផ្សេងៗទៀត។ គួរបញ្ជាក់ថា ចំណាត់ការរបស់អជ្ញាធរកូរ៉េខាងត្បូងទាំងនេះធ្វើឡើង ក្រោយមានរបាយការណ៍ស្លា.ប់និស្សិតម្នាក់នៅលើភ្នំបូកគោក្នុងខេត្តកំពតដែលបណ្តាលមកពីការធ្វើទារុណកម្មធ្ងន់ធ្ងរពីសំណាក់ក្រុមឧក្រិដ្ឋជនអនឡាញ ជាជនជាតិចិន។

ដូចគ្នានេះដែរ ក្រសួងការបរទេសកូរ៉េខាងត្បូង ក៏បានណែនាំប្រជាជនកូរ៉េខាងត្បូងឱ្យមានការប្រុងប្រយ័ត្នខ្ពស់នៅពេលធ្វើដំណើរទៅកាន់តំបន់ផ្សេងទៀតនៃអាស៊ី ជាពិសេស ថៃ ឡាវ និងហ្វីលីពីន ខណៈបញ្ហាស្រដៀងគ្នានេះ កំពុងមានការកើនឡើងខ្លាំងនៅក្នុងតំបន់អាសុីអាគ្នេយ៍។

យ៉ាងណាក៏ដោយ ក្រោយជំនួបពិភាក្សាការងាររវាង លោកជំទាវ Kim Jin-ah អនុរដ្ឋមន្ត្រីទី២ នៃក្រសួងការបរទេសកូរ៉េខាងត្បូង និងឯកឧត្តម ស សុខា ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃកម្ពុជា ប្រទេសទាំងពីរបានឈានដល់កិច្ចព្រមព្រៀងនឹងបង្កើតក្រុមការងារ Task Force មួយ ដើម្បីជំរុញសន្ទុះការងារ ការបង្ការ ទប់ស្កាត់ និងបង្ក្រាបអំពើឆបោកតាមប្រព័ន្ធអនឡាញ។

បើតាមការឲ្យដឹងរបស់ឯកឧត្តម ស សុខា បានគូសបញ្ជាក់ថា ភាគីកូរ៉េ នឹងរៀបចំផ្ដល់បញ្ជីមុខសញ្ញាឧក្រិដ្ឋជន រួមទាំងជនបរទេសជាមេខ្លោង នៃអំពើឆបោកតាមប្រព័ន្ធអនឡាញ ជូនក្រសួងមហាផ្ទៃកម្ពុជា ដើម្បីកម្ពុជា ពិនិត្យទិដ្ឋភាពច្បាប់ដាក់ក្នុងបញ្ជីខ្មៅហាមប្រាមមិនចូលប្រទេស។

លើសពីនេះ ប្រទេសទាំងពីរ ក៏បានឯកភាពគ្នាបង្កើនសកម្មភាពផ្សព្វផ្សាយអប់រំដល់ប្រជាពលរដ្ឋរៀងៗខ្លួនបន្ថែមទៀត អំពីគ្រោះថ្នាក់ នៃអំពើឆបោកតាមប្រព័ន្ធអនឡាញ ព្រមទាំងជំរុញឱ្យបណ្ដាប្រទេសផ្សេងទៀត រួមគ្នាធ្វើការងារនេះឱ្យបានសកម្ម និងគ្មានទីបញ្ចប់ផងដែរ៕

ប្រទេសថៃ ៖ តាមការចុះផ្សាយរបស់សារព័ត៌មាន Khaosod នៅថ្ងៃទី២៣ ខែតុលា ឆ្នាំ២០២៥នេះ នាយករដ្ឋមន្ត្រីថៃ លោក អនុថីន ឆាន់វីរៈគូន បានកោះប្រជុំរដ្ឋមន្ត្រីសំខាន់ៗដើម្បីត្រៀមខ្លួនចូលរួមកិច្ចប្រជុំកំពូលអាស៊ាន និង APEC នាពេលខាងមុខ ប៉ុន្តែលោកមិនបានឆ្លើយសំណួរអ្នកសារព័ត៌មានដែលសួរពីការចុះហត្ថលេខាលើកិច្ចព្រមព្រៀងសន្តិភាពជាមួយកម្ពុជានៅម៉ាឡេស៊ីទេ ។

នាវេលាម៉ោង៨និង៤០នាទីព្រឹក ថ្ងៃទី២៣ ខែតុលា លោក អនុថីន ឆាន់វីរៈគូន នាយករដ្ឋមន្ត្រីថៃ និងជារដ្ឋមន្ត្រីក្រសួងមហាផ្ទៃ បានផ្តល់សម្ភាសន៍ជាមួយសារព័ត៌មាននៅទីលានរូបសំណាក់ព្រះមហាក្សត្រថៃជិះសេះក្នុងតំបន់ឌុស៊ីត ទីក្រុងបាងកក ថា ថ្ងៃនេះ (ថ្ងៃទី២៣ ខែតុលា) លោកបានកោះប្រជុំរដ្ឋមន្ត្រីសំខាន់ៗដើម្បីពិនិត្យមើលការងារឡើងវិញមុនធ្វើដំណើរទៅចូលរួមកិច្ចប្រជុំកំពូលអាស៊ាននៅម៉ាឡេស៊ី និងកិច្ចប្រជុំមេដឹកនាំតំបន់សេដ្ឋកិច្ច APEC នៅកូរ៉េខាងត្បូង ថាតើនឹងត្រូវចុះហត្ថលេខា ឬឯកភាពអ្វីខ្លះ ឬមានអ្វីរាំងស្ទះ ។

ប៉ុន្តែនាយករដ្ឋមន្ត្រីថៃមិនបានឆ្លើយសំណួររបស់អ្នកសារព័ត៌មានពាក់ព័ន្ធនឹងការចុះហត្ថលេខាលើកិច្ចព្រមព្រៀងសន្តិភាពជាមួយកម្ពុជានៅម៉ាឡេស៊ី ដោយមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ជាសាក្សីទេ ។ នាវេលាម៉ោង៩និង១០នាទី លោក អនុថីន ក៏បានចាកចេញពីទីលានរូបសំណាក់ព្រះមមហាក្សត្រថៃជិះសេះក្នុងតំបន់ឌុស៊ីត និងធ្វើដំណើរទៅអគារថៃឃូហ្វានៅវិមានរដ្ឋាភិបាល ដើម្បីប្រជុំជាមួយរដ្ឋមន្ត្រីសំខាន់ៗជជែកពីការត្រៀមខ្លួនចូលរួមកិច្ចប្រជុំកំពូលអាស៊ាននៅម៉ាឡេស៊ី និងកិច្ចប្រជុំមេដឹកនាំតំបន់សេដ្ឋកិច្ច APEC នៅកូរ៉េខាងត្បូង ។

ចំណែករដ្ឋមន្ត្រីសំខាន់ៗដែលមកចូលរួមប្រជុំជាមួយនាយករដ្ឋមន្ត្រី រួមមាន ៖ រដ្ឋមន្ត្រីធនធានធម្មជាតិ និងបរិស្ថាន, រដ្ឋមន្ត្រីកសិកម្ម, រដ្ឋមន្ត្រីការបរទេស, រដ្ឋមន្ត្រីពាណិជ្ជកម្ម និងរដ្ឋមន្ត្រីជាច្រើនរូបទៀត ដែលកិច្ចប្រជុំនេះមានរយៈពេលប្រមាណ៥០នាទី ។

នាយករដ្ឋមន្ត្រីថៃបដិសេធមិននិយាយពីការចុះហត្ថលេខាលើកិច្ចព្រមព្រៀងសន្តិភាពជាមួយកម្ពុជានៅម៉ាឡេស៊ី ធ្វើឱ្យមហាជនមានចម្ងល់យ៉ាងខ្លាំងទៅលើគោលជំហររបស់មេដឹកនាំថៃ ថាតើលោកមានផែនការ ឬអាថ៌កំបាំងអ្វីពាក់ព័ន្ធនឹងការចុះហត្ថលេខា ។ បើតាមរដ្ឋមន្ត្រីការបរទេសថៃ លោក សីហស័ក្តិ ពួងកេតកែវ និយាយនៅថ្ងៃទី២៣ ខែតុលា ថា លោកមានទំនុកចិត្តកម្ពុជា-ថៃនឹងចុះហត្ថលេខាលើកិច្ចព្រមព្រៀងសន្តិភាពនៅម៉ាឡេស៊ី ដើម្បីស្តារទំនាក់ទំនងប្រទេសទាំងពីរឈានទៅរកភាពប្រក្រតីឡើងវិញ ក្រោយបញ្ចប់កិច្ចប្រជុំ GBC និង JBC ។

មតិខ្លះថា រដ្ឋាភិបាលថៃហាក់បន្ទន់ឥរិយាបថរបស់ខ្លួនចំពោះស្ថានការណ៍ជម្លោះព្រំដែនជាមួយកម្ពុជា ក្រោយពីថៃខាតបង់ប្រាក់រហូតដល់ជាង៤៥០លានដុល្លារក្នុង១ខែ ដោយសារការបិទព្រំដែនធ្វើឱ្យប៉ះពាល់ដល់ពាណិជ្ជកម្មរវាងប្រទេសទាំងពីរ ។ ពេលទើបឡើងកាន់តំណែងថ្មីៗ នាយករដ្ឋមន្ត្រីថៃចង់បើកព្រំដែនឡើងវិញ និងថាមិនអាចឱ្យជម្លោះជាមួយប្រទេសជិតខាងអូសបន្លាយបែបនេះទេ ប៉ុន្តែត្រូវបានពលរដ្ឋថៃប្រឆាំង ៕