តាមការចុះផ្សាយរបស់សារព័ត៌មាន Thai PBS នៅថ្ងៃទី១០ ខែតុលា ឆ្នាំ២០២៥ ឱ្យដឹងថា នៅថ្ងៃនេះ (ថ្ងៃទី១០ ខែតុលា) គឺជាថ្ងៃដែលពលរដ្ឋថៃ ជាពិសេស ពលរដ្ឋនៅខេត្តស្រះកែវ រង់ចាំតាមដានគោលជំហររបស់កងទ័ព និងរដ្ឋាភិបាលថៃ រួមទាំងតាមដានគោលជំហររបស់កម្ពុជា ថាតើនឹងចាត់វិធានការបែបណានៅតំបន់ព្រំដែនខេត្តស្រះកែវ? តើកម្ពុជានឹងអនុវត្តតាមការដាក់លក្ខខណ្ឌរបស់កងទ័ពភូមិភាគ១ថៃដែរឬទេ ដែលកងទ័ពថៃអះអាងខ្លួនធ្វើតាមលទ្ធផលកិច្ចប្រជុំ GBC ។

ចំណែកភាគីថៃបានត្រៀមកម្លាំងទ័ពរួចអស់ហើយ ថៃនឹងចាត់វិធានការនៅតំបន់ព្រំដែនខេត្តស្រះកែវពីកម្រិតស្រាលទៅធ្ងន់ រួមទាំងអនុវត្តតាមគោលការណ៍អន្តរជាតិដែលពិភពលោកទទួលស្គាល់ ។ ទូរកុងតឺន័ររបស់ Influencer ថៃ លោក កាន់ ចមផ្លាំង ចំនួន៦០គ្រឿងយកពីខេត្តឈុនបុរី ក៏ត្រៀមបញ្ជូនមកកាន់ខេត្តស្រះកែវផងដែរ ដើម្បីយកមកតម្រៀបជារបងនៅព្រំដែនកម្ពុជា-ថៃ ត្រង់តំបន់ភូមិណងចាន់ (ថៃ) ទល់មុខនឹងតំបន់ភូមិជោគជ័យ (កម្ពុជា) ដើម្បីជាជំនួយដល់កងទ័ពភូមិភាគទី១ថៃដណ្តើមយកទឹកដីនៅតំបន់ព្រំដែនខេត្តស្រះកែវថ្ងៃទី១០ ខែតុលានេះ ។

កាលពីរសៀលថ្ងៃទី៩ ខែតុលា ពលរដ្ឋថៃនៅភូមិណងយ៉ាកែវ ទល់មុខភូមិព្រៃចាន់ (កម្ពុជា) បានប្រមូលផ្តុំគ្នាប្រមាណ១០០នាក់នៅតំបន់ព្រំដែនកម្ពុជា-ថៃ ។ ពលរដ្ឋថៃនៅភូមិណងយ៉ាកែវ ត្រៀមខ្លួនធ្វើសកម្មភាពប្រសិនបើកងទ័ពបញ្ជាមក និងត្រៀមរបស់របរប្រើប្រាស់ចាំបាច់ជម្លៀសចេញពីភូមិភ្លាមៗពេលមានការប៉ះទង្គិច ។

ដោយឡែក ពលរដ្ឋថៃនៅភូមិណងចាន់ ត្រង់បង្គោលព្រំដែនលេខ៤៨ ដល់លេខ៤៩ បាននាំកងកម្លាំងស្រុកអារញ្ញប្រាថេត ខេត្តស្រះកែវ មកពិនិត្យមើលភូមិរបស់ខ្លួន ដោយចោទប្រកាន់ពលរដ្ឋខ្មែរល្មើសអធិបតេយ្យ ។ ពួកគេជំរុញឱ្យបណ្តេញពលរដ្ឋខ្មែរចេញជាបន្ទាន់ និងគាំទ្រកងទ័ពថៃដណ្តើមយកទឹកដីនៅតំបន់ព្រំដែនខេត្តស្រះកែវ ។

គួរបញ្ជាក់ថា កងទ័ពភូមិភាគ១ថៃ និងអភិបាលខេត្តស្រះកែវ បានដាក់លក្ខខណ្ឌឱ្យកម្ពុជាជម្លៀសពលរដ្ឋចេញពីតំបន់ភូមិណងចាន់ និងតំបន់ភូមិណងយ៉ាកែវ មុនថ្ងៃទី១០ ខែតុលា បើមិនដូច្នោះទេ ភាគីថៃនឹងបញ្ឈប់ការចរចាជាមួយកម្ពុជា ។

នាយករដ្ឋមន្ត្រីថៃ លោក អនុថីន ឆាន់វីរៈគូន បានគាំទ្រការដាក់លក្ខខណ្ឌនេះ ហើយលោកប្រាប់ប្រធានាធិបតីអាមេរិក លោក Donald Trump ថា លុះត្រាតែកម្ពុជាយល់ព្រមដកថយអាវុធធុនធ្ងន់ ដោះមីន បង្ក្រាបបទល្មើសតាមប្រព័ន្ធអនឡាញ និងគ្រប់គ្រងតំបន់ព្រំដែនដោយស្របច្បាប់ ទើបថៃចុះកិច្ចព្រមព្រៀងសន្តិភាពជាមួយកម្ពុជានៅក្រៅកិច្ចប្រជុំកំពូលអាស៊ាន ប្រទេសម៉ាឡេស៊ី នាចុងខែតុលា ។

យោងតាមសេចក្តីថ្លែងការណ៍របស់អ្នកនាំពាក្យរាជរដ្ឋាភិបាលកម្ពុជា គឺរាជរដ្ឋាភិបាលកម្ពុជានៅតែរក្សាគោលជំហរដោះស្រាយបញ្ហាព្រំដែនដោយសន្តិវិធីឈរលើយន្តការបច្ចេកទេសនិងច្បាប់អន្តរជាតិ ហើយចាត់ទុកថា ការប្រើប្រាស់កម្លាំងយោធាមិនអាចដោះស្រាយបញ្ហាព្រំដែនបានឡើយ ៕

ប្រទេសថៃ ៖ ក្រោយពីប្រធានាធិបតីអាមេរិកដាក់លក្ខខណ្ឌឱ្យកម្ពុជា-ថៃចុះហត្ថលេខាលើកិច្ចព្រមព្រៀងសន្តិភាព ក្នុងពិធីពិសេសមួយនៅក្រៅកិច្ចប្រជុំកំពូលអាស៊ានក្នុងទីក្រុងកូឡាឡាំពួរ ប្រទេសម៉ាឡេស៊ី នាយករដ្ឋមន្ត្រីថៃបានបញ្ជាក់ពីគោលជំហររបស់ខ្លួនចង់បានសន្តិភាពយូរអង្វែង ប៉ុន្តែកម្ពុជាត្រូវសហការអនុវត្តតាមកិច្ចព្រមព្រៀងដែលមានស្រាប់ ជាពិសេស ការដកថយអាវុធធុនធ្ងន់ ការដោះមីន ការបង្ក្រាបបទល្មើសតាមប្រព័ន្ធអនឡាញ និងគ្រប់គ្រងតំបន់ព្រំដែនដោយស្របច្បាប់ ។

តាមការចុះផ្សាយរបស់សារព័ត៌មាន The Better News ឱ្យដឹងថា នៅថ្ងៃទី៩ ខែតុលា ឆ្នាំ២០២៥ នាយករដ្ឋមន្ត្រីថៃ លោក អនុថីន ឆាន់វីរៈគូន បានបញ្ជាទៅក្រសួងការបរទេសរបស់ខ្លួនដោះស្រាយជម្លោះព្រំដែនជាមួយកម្ពុជា ដោយប្រកាន់នូវគោលការណ៍សន្តិភាព និងរក្សាអធិបតេយ្យ ។ រដ្ឋាភិបាលថៃនឹងចាត់វិធានការទាំងអស់ក្នុងក្របខ័ណ្ឌច្បាប់ គោលការណ៍អន្តរជាតិដើម្បីរក្សាសេចក្តីថ្លៃថ្នូរ និងអធិបតេយ្យជាតិ ។

នាយករដ្ឋមន្ត្រីថៃ លោក អនុថីន បាននិយាយក្រោយពីប្រជុំជាមួយមន្ត្រីជាន់ខ្ពស់ក្រសួងការបរទេសថា វាជាកិច្ចប្រជុំ Working Meeting ដើម្បីត្រៀមខ្លួនចរចាជាមួយកម្ពុជា ព្រមទាំងឆ្លើយតបលិខិតរបស់ប្រធានាធិបតីអាមេរិក លោក Donald Trump ដែលបារម្ភពីស្ថានការណ៍ព្រំដែនកម្ពុជា-ថៃ ។ រដ្ឋាភិបាលថៃបានឆ្លើយតបទៅប្រធានាធិបតីអាមេរិកវិញ ដោយបញ្ជាក់នូវគោលជំហរថៃចង់បានសន្តិភាពយូរអង្វែង ហើយប្រទេសទាំងពីរត្រូវសហការអនុវត្តតាមកិច្ចព្រមព្រៀងដែលមានស្រាប់ ជាពិសេស ការដកថយអាវុធធុនធ្ងន់ ការដោះមីន ការបង្ក្រាបបទល្មើសតាមប្រព័ន្ធអនឡាញ និងគ្រប់គ្រងតំបន់ព្រំដែនដោយស្របច្បាប់ ។

ក្រៅពីនេះ នាយករដ្ឋមន្ត្រីថៃបាននិយាយពីឯកអគ្គរដ្ឋទូតចិនប្រចាំប្រទេសកម្ពុជា លោក Wang Wenbin បង្ហាញគោលជំហរគាំទ្រកម្ពុជាក្នុងការរក្សាអធិបតេយ្យ ថាជាសិទ្ធិរបស់ប្រទេសនីមួយៗ ប៉ុន្តែថៃចាត់ទុកជម្លោះព្រំដែន គឺជាបញ្ហាផ្ទៃក្នុងរវាងកម្ពុជា-ថៃ ។ លោក អនុថីន ជឿជាក់ថា គ្រប់ប្រទេសចង់ឃើញភាពស្ងប់ស្ងាត់ គ្មានអំពើហិង្សា ហើយរដ្ឋាភិបាលថៃនឹងចាត់វិធានការទាំងអស់ក្នុងក្របខ័ណ្ឌច្បាប់ គោលការណ៍អន្តរជាតិដើម្បីរក្សាសេចក្តីថ្លៃថ្នូរ និងអធិបតេយ្យជាតិ ។

ក្រសួងការបរទេសថៃមានអំណាចពេញលេញក្នុងការចរចាការទូតដើម្បីផ្តល់ប្រយោជន៍ខ្ពស់បំផុតដល់ប្រទេសថៃ ខណៈកងទ័ពថៃមានតួនាទីគ្រប់គ្រងតំបន់ព្រំដែន ។ បញ្ហាសំខាន់បំផុត គឺសុវត្ថិភាពពលរដ្ឋ និងរក្សាអធិបតេយ្យជាតិ ដោយការអនុវត្តវិធានការទាំងអស់ត្រូវតែគោរពគោលការណ៍មនុស្សធម៌ សិទ្ធិមនុស្ស និងច្បាប់អន្តរជាតិ ដើម្បីឱ្យស្ថានការណ៍ព្រំដែនធូរស្រាលឡើងវិញ ។

គួរបញ្ជាក់ថា ប្រធានាធិបតីអាមេរិក លោក Donald Trump បានដាក់លក្ខខណ្ឌឱ្យកម្ពុជា-ថៃចុះហត្ថលេខាលើកិច្ចព្រមព្រៀងសន្តិភាព ក្នុងពិធីពិសេសមួយនៅក្រៅកិច្ចប្រជុំកំពូលអាស៊ានក្នុងទីក្រុងកូឡាឡាំពួរ ប្រទេសម៉ាឡេស៊ី ដែលរៀបចំចាប់ពីថ្ងៃទី២៦ ដល់ថ្ងៃទី២៨ ខែតុលា ឆ្នាំ២០២៥ ។ លោក Trump បានក្លាយជាប្រធានាធិបតីសន្តិភាពក្រោយពីបញ្ចប់សង្គ្រាមជាច្រើនប្រទេស រួមទាំងសង្គ្រាមកម្ពុជា-ថៃ លោកចង់ឃើញថៃគោរពច្បាប់អន្តរជាតិ មិនបំពានប្រទេសជិតខាងដែលមានពលរដ្ឋតិចជាងខ្លួន ៕

សហរដ្ឋអាមេរិក ៖ ពលរដ្ឋប្រទេសនានាតែងតែជឿថា ពិតជាមានខ្មោ.ចមែនដោយសារពួកគេបានជួបហេតុការណ៍ដោយផ្ទាល់នៅក្នុងព្រៃស្ងាត់ អគារបាក់បែក លំនៅឋានគ្មានមនុស្សរស់នៅ និងសណ្ឋាគារ ។ លើសពីនេះ ទីកន្លែងគួរឱ្យខ្លា.ចមួយចំនួនបានប្រកាសឱ្យអ្នកដែលមិនជឿរឿងខ្មោ.ចលង មកសាកល្បងរកការពិតដោយខ្លួនឯង ដូចជា សណ្ឋាគារចាស់មួយនៅអាមេរិកបានប្រកាសផ្តល់ប្រាក់រង្វាន់ឱ្យអ្នកក្លាហានហ៊ានចាប់ខ្មោ.ច ប៉ុន្តែត្រូវតែមានភស្តុតាងជារូបភាព ឬវីដេអូ ។

El Cortez គឺជាសណ្ឋាគារ និងកាស៊ីណូដ៏ចំណាស់មួយដែលល្បីល្បាញថា សម្បូរខ្មោចលងខ្លាំងបំផុតនៅទីក្រុងឡាសវេហ្គាស រដ្ឋណេវ៉ាដា សហរដ្ឋអាមេរិក បានប្រកាសផ្តល់ប្រាក់រង្វាន់ចំនួន៥,០០០ដុល្លារ ឱ្យអ្នកដែលហ៊ានចាប់ខ្មោចក្នុងសណ្ឋាគារនេះ ។ មុននឹងទទួលបានប្រាក់រង្វាន់ គឺតម្រូវឱ្យដើរពិនិត្យរកខ្មោចពេលយប់ និងហ៊ានប្រឈមមុខជាមួយការភ័យខ្លា.ចផ្សេងៗក្នុងបរិវេណសណ្ឋាគារនាចុងសប្តាហ៍ ។

សណ្ឋាគារ El Cortez ស្ថិតនៅតាមបណ្តោយផ្លូវព្រីម៉ន ទីក្រុងឡាសវេហ្គាស ដែលបានបើកដំណើរការតាំងពីឆ្នាំ១៩៤១ មកម៉្លេះ ។ ភ្ញៀវមកស្នាក់នៅក្នុងសណ្ឋាគារនេះមានគ្រប់ប្រភេទ តាំងពីក្រុមម៉ាហ្វៀរ និងឧក្រិដ្ឋជន ក្រោយមក ភ្ញៀវមកស្នាក់នៅផ្សេងទៀតតែងជួបហេតុការណ៍ប្លែកៗគួរឱ្យព្រឺសម្បុរជាញឹកញាប់ ទាំងឮសំឡេងខ្មោច និងស្រមោលខ្មៅ រហូតមកដល់បច្ចុប្បន្ន សណ្ឋាគារមានអាយុកាល៨៤ឆ្នាំហើយ ។

ចំណែកលក្ខខណ្ឌប្រកួត គឺត្រូវស្នាក់នៅ និងដើរពិនិត្យមើលក្នុងសណ្ឋាគារពេលយប់ជាមួយឧបករណ៍ជាច្រើនសម្រាប់ចាប់ខ្មោចដែលខាងសណ្ឋាគារផ្តល់ឱ្យ រួមមាន ៖ ឧបករណ៍វាស់មេដែក, ឧបករណ៍ថតសំឡេង និងឧបករណ៍ចាប់កំដៅ ដើម្បីចាប់សកម្មភាពខុសប្លែករបស់ក្រុមខ្មោច ។ អ្នកប្រកួតនឹងបញ្ជាក់ថា តើពាក្យចចាមអារ៉ាមសណ្ឋាគារសម្បូរខ្មោចលងជាការពិតដែរឬទេ ។

គេហទំព័រ Casino.org បានសរសេរពីលក្ខខណ្ឌដើម្បីទទួលបានប្រាក់រង្វាន់ គឺតម្រូវឱ្យស្នាក់នៅក្នុងសណ្ឋាគារនាចុងសប្តាហ៍ ដើរពិនិត្យមើលបរិវេណមុខបន្ទប់ស្នាក់នៅ និងចូលទៅកន្លែងកាស៊ីណូដើម្បីស្វែងរកវិញ្ញាណខ្មោចជាច្រើន ។

អ្វីកាន់តែធ្វើឱ្យព្រឺសម្បុរថែមទៀត គឺឆ្អឹងរបស់អតីតបុគ្គលិកសណ្ឋាគារដែលស្លាប់គ្មានសាច់ញាតិ ត្រូវបានប្រមូលទុកនៅជាន់ក្រោមដី ។ ។ រីឯពេលវេលាប្រកួតចាប់ខ្មោច គឺចាប់ពីថ្ងៃទី៦ ដល់ថ្ងៃទី៣១ ខែតុលា ឆ្នាំ២០២៥ បើអ្នកមកប្រកួតបានឃើញអ្វីគួរឱ្យខ្លាច ត្រូវថតរូបភាព និងថតវីដេអូទុកជាភស្តុតាង ព្រមទាំងសរសេរពីហេតុការណ៍ដែលខ្លួនជួបប្រទះសង្ខេបខ្លីៗ ៕

Influencer ថៃឈ្មោះ កាន់ ចមផ្លាំង ដែលល្បីល្បាញរឿងយករថយន្តដឹកលា.មក មកបា.ញ់ស្រោចលើពលរដ្ឋខ្មែរហ៊ានតវ៉ាជាមួយកងទ័ពឈ្លា.នពានថៃនៅតំបន់ព្រំដែនខេត្តស្រះកែវ និងចេញមុខចា.ប់ពលរដ្ឋខ្មែរធ្វើការខុសច្បាប់នៅទីក្រុងបាងកក ពេលនេះ បានប្រកាសក្នុងហ្វេសប៊ុកថា នឹងយកទូរកុងទឺន័រចំនួន៦០គ្រឿង មកតម្រៀបជារបងនៅព្រំដែនភូមិណងចាន់ ខេត្តស្រះកែវ នៅថ្ងៃទី១០ ខែតុលា ។

បុគ្គល កាន់ ចមផ្លាំង បានចេញមុខឈ្លានពានទឹកដីកម្ពុជារហូតមក តាមរយៈការធ្វើសកម្មភាពផ្សេងៗ ដូចជា ៖ រៃអង្គាសប្រាក់ឧបត្ថម្ភកងទ័ពឈ្លានពានថៃ, ជីករណ្តៅ និងតម្រៀបកង់ឡានក្បែរប្រាសាទនៅព្រំដែន និងបញ្ជូនលាមក មកស្រោចលើពលរដ្ឋខ្មែរឱ្យចេញពីទឹកដីកម្ពុជា ប៉ុន្តែរងការរិះគន់ពីមតិនានាថា ការប្រើប្រាស់លាមកនឹងធ្វើឱ្យថៃបាត់បង់កេរ្តិ៍ឈ្មោះ ហើយពិភពលោកអាចថ្កោលទោសថៃដែលប្រើប្រាស់ទង្វើដ៏ស្មោគគ្រោកបំផុត ។

Influence រូបនេះ ក៏បានប្រកាសតាមហ្វេសប៊ុកឱ្យពលរដ្ឋថៃជួយផ្តល់ទូរកុងទឺន័រមកឱ្យខ្លួនបន្ថែមទៀតដើម្បីយកមកតម្រៀបជារបងនៅតំបន់ព្រំដែនខេត្តស្រះកែវឱ្យទាន់ថ្ងៃកំណត់ ហើយខ្លួនបានធ្វើដំណើរទៅពិនិត្យមើលទូរកុងទឺន័រទាំងអស់មុននឹងបញ្ជូនមកកាន់តំបន់ព្រំដែន ។ ក្រៅពីនេះ បានប្រកាសឱ្យពលរដ្ឋថៃ ឬអ្នកគាំទ្ររួមគ្នាសរសេរអក្សរលើទូរកុងទឺន័រនៅថ្ងៃទី១១ ខែតុលា ដើម្បីផ្តល់កម្លាំងចិត្តដល់កងទ័ពថៃឈ្លានពានទឹកដីកម្ពុជា ។

កាន់ ចមផ្លាំង និយាយថា ទូរកុងទឺន័រដែលខ្លួនត្រៀមបញ្ជូនមកកាន់តំបន់ព្រំដែនខេត្តស្រះកែវនៅថ្ងៃទី១០ ខែតុលា ដើម្បីតម្រៀបជារបងនោះមានភាពរឹងមាំជាងរបងថ្មទៅទៀត ។ ការបញ្ជូនទូរកុងទឺន័រមកព្រំដែនកម្ពុជា-ថៃ គឺខ្លួនធ្វើដើម្បីការពារសន្តិសុខប្រទេសថៃ និងផ្តល់កម្លាំងចិត្តឱ្យកងទ័ពថៃប្រចាំការនៅព្រំដែន ។

គួរបញ្ជាក់ថា កន្លងមក បុគ្គល កាន់ ចមផ្លាំង បានបញ្ជូនរថយន្តដឹកលាមក ចំនួន១៤គ្រឿង មកកាន់តំបន់ព្រំដែនភូមិណងចាន់ ខេត្តស្រះកែវ ទល់មុខភូមិសាស្ត្រច្រកអូរបីជាន់ ខេត្តបន្ទាយមានជ័យ ដើម្បីបាញ់លាមកស្រោចលើពលរដ្ឋខ្មែរ ។ បុគ្គលនេះបានតាំងខ្លួនឯងជាអ្នកស្នេហាជាតិ ការពារទឹកដី តាមរយៈការប្រើប្រាស់លាមក ប៉ុន្តែបែរជាធ្វើឱ្យថៃស្អុយអាសោចកេរ្តិ៍ឈ្មោះនៅលើពិភពលោក ដែលប្រព្រឹត្តទង្វើបាតផ្សារមកលើពលរដ្ឋប្រទេសជិតខាង ។

ពេលនោះ នាយករដ្ឋមន្ត្រីស្តីទីថៃ លោក ភូមិថាំ វីឆាយ៉ាឆៃ ពុំគាំទ្របុគ្គលនេះទេ និងប្រាប់កុំឱ្យធ្វើបែបនេះដើម្បីកុំឱ្យពិភពលោកថ្កោលទោសថៃ និងបារម្ភខ្លាចកម្ពុជាប្តឹងថៃទៅកាន់តុលាការយុត្តិធម៌អន្តរជាតិ (ICJ) នាំឱ្យថៃមានបញ្ហាកាន់តែខ្លាំង ៕