ក្រសួងការបរទេសអាល្លឺម៉ង់បានលើកឡើងពីការចុះហត្ថលេខាលើសេចក្តីថ្លែងការណ៍រួម (Joint Declaration) នៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី២៦ ខែតុលា ឆ្នាំ២០២៥ ដែលមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ចូលរួមចុះហត្ថលេខាជាសាក្សី ហើយប្រធានាធិបតីអាមេរិកចាត់ទុកជាកិច្ចព្រមព្រៀងសន្តិភាព ។ អាល្លឺម៉ង់ថា នេះជាការបោះជំហ៊ានដ៏សំខាន់ឆ្ពោះទៅរកសន្តិភាព និងសូមគាំទ្រប្រទេសទាំងពីរបើកព្រំដែនឡើងវិញដើម្បីស្តារទំនាក់ទំនងពាណិជ្ជកម្ម ។ នេះបើតាមការចុះផ្សាយរបស់សារព័ត៌មានថៃ Khaosod នៅថ្ងៃទី២៧ ខែតុលា ។

នៅថ្ងៃទី២៧ ខែតុលា ក្រសួងការបរទេសអាល្លឺម៉ង់បានចេញសេចក្តីថ្លែងការណ៍ពាក់ព័ន្ធនឹងការចុះហត្ថលេខាលើសេចក្តីថ្លែងការណ៍រួមដោយនាយករដ្ឋមន្ត្រីកម្ពុជា-ថៃក្រៅកិច្ចប្រជុំកំពូលអាស៊ាន នៅទីក្រុងកូឡាឡាំពួរ ប្រទេសម៉ាឡេស៊ី ថា នេះជាជំហ៊ានដ៏សំខាន់ឆ្ពោះទៅរកសន្តិភាព និងស្ថិរភាពក្នុងតំបន់អាស៊ាន ។ ហេតុនេះ អាល្លឺម៉ង់គាំទ្រឱ្យប្រទេសទាំងពីរធ្វើការចរចា និងពង្រឹងកិច្ចសហប្រតិបត្តិការបន្ថែម រហូតដល់មានការច្រកព្រំដែនឡើងវិញដើម្បីស្តារទំនាក់ទំនងពាណិជ្ជកម្មរវាងគ្នាម្តងទៀត ។

ដោយឡែក នាយករដ្ឋមន្ត្រីថៃ លោក Anutin Charnvirakul បានផ្តល់សម្ភាសន៍ជាមួយសារព័ត៌មាននៅថ្ងៃទី២៧ ខែតុលា ថា ការបើកព្រំដែនឡើងវិញ លុះត្រាតែកម្ពុជាអនុវត្តតាមលក្ខខណ្ឌ៤ចំណុចជាមុនសិន ដោយមានក្រុមអ្នកសង្កេតការណ៍អាស៊ាន AOT ចូលរួមសង្កេតការណ៍ការអនុវត្តរបស់កម្ពុជា ។ លក្ខខណ្ឌ៤ចំណុច រួមមាន ៖ ១-ដកអាវុធធុនធ្ងន់ចេញពីតំបន់ព្រំដែន ២-ដោះមីន ៣-បង្ក្រាបការឆបោកអនឡាញ និង៤-គ្រប់គ្រងតំបន់ព្រំដែនរួមគ្នា ជាពិសេស នៅភូមិណងចាន់ និងភូមិណងយ៉ាកែវ (ទល់មុខភូមិជោគជ័យ និងភូមិព្រៃចាន់) គឺកម្ពុជាត្រូវអនុវត្តលក្ខខណ្ឌទាំងនេះឱ្យថៃឃើញជាមុន ។

នាយករដ្ឋមន្ត្រីថៃបានទទួលព័ត៌មានកម្ពុជាចាប់ផ្តើមកែសម្រួលយុទ្ធោបករណ៍ និងអាវុធធុនធ្ងន់មួយផ្នែកនៃជំហ៊ានទី១ ជានិមិត្តរូបរបស់កងទ័ពកម្ពុជា-ថៃ ក្រោមការសង្កេតការណ៍របស់ក្រុមអ្នកសង្កេតការណ៍អាស៊ាន AOT កាលពីយប់ថ្ងៃទី២៦ ខែតុលា ហើយថៃនឹងរង់ចាំឱ្យកម្ពុជាអនុវត្តលក្ខខណ្ឌផ្សេងៗរហូតដល់ដំណាក់កាលចុងក្រោយ ទើបមានការបើកព្រំដែនប្រក្រតី ។

គួរបញ្ជាក់ថា កាលពីថ្ងៃទី២៦ ខែតុលា ឆ្នាំ២០២៥ តបតាមការអញ្ជើញរបស់លោក Anwar Ibrahim នាយករដ្ឋមន្ត្រីម៉ាឡេស៊ី និងជាប្រធានអាស៊ានឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា រួមទាំងលោក Anutin Charnvirakul នាយករដ្ឋមន្ត្រីថៃ បានអញ្ជើញចូលរួមក្នុងពិធីចុះហត្ថលេខាលើសេចក្តីថ្លែងការណ៍រួមទីក្រុងកូឡាឡាំពួរ ប្រទេសម៉ាឡេស៊ី ។ ពិធីនេះក៏មានការចូលរួមធ្វើជាសាក្សីពីលោក Donald Trump ប្រធានាធិបតីអាមេរិក និងលោក Anwar Ibrahim នាយករដ្ឋមន្ត្រីម៉ាឡេស៊ីផងដែរ ។

នៅថ្ងៃទី២៦ ខែតុលា នេះ ត្រូវបានកត់ត្រាជាព្រឹត្តិការណ៍ប្រវត្តិសាស្ត្រដ៏មានសារៈសំខាន់សម្រាប់កម្ពុជា និងថៃ ដែលបានបញ្ជាក់ឡើងវិញនូវការជឿជាក់រួមគ្នានៃប្រទេសទាំងពីរថា សន្តិភាពនៅតែអាចមានដរាបណាប្រទេសជាតិនានាមានសេចក្តីក្លាហាន និងសុភវិនិច្ឆ័យក្នុងការបន្តស្វែងរកសន្តិភាពជាមួយគ្នា ៕

ប្រទេសថៃ ៖ កងទ័ពភូមិភាគទី១ថៃបានបដិសេធព័ត៌មានកងទ័ពត្រៀមបើកព្រំដែនកម្ពុជា-ថៃឡើងវិញនៅថ្ងៃទី១ ខែវិច្ឆិកា ឆ្នាំ២០២៥ ដោយលោក វរ៉ាយ៉ត លឿងសុវណ្ណ មេបញ្ជាការកងទ័ពភូមិភាគទី១ និយាយថា គ្មានការបញ្ជាឱ្យបើកព្រំដែនជាមួយកម្ពុជានៅខេត្តស្រះកែវទេ ។ កងទ័ពថៃនៅតែអនុវត្តតាមគោលនយោបាយចាស់ គឺបិទព្រំដែនបន្តទៀត បើទោះជាប្រទេសទាំងពីរបានចុះហត្ថលេខាលើសេចក្តីថ្លែងការណ៍រួមនៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី២៦ ខែតុលា ក្តី ។

នៅថ្ងៃទី២៧ ខែតុលា ហ្វេសប៊ុកផេករបស់កងទ័ពភូមិភាគទី១ថៃបានបង្ហោះសារថា មានការផ្សព្វផ្សាយព័ត៌មានកងទ័ពថៃត្រៀមបើកព្រំដែនកម្ពុជា-ថៃនៅច្រកព្រំដែនបានខៅឌិន ស្ថិតនៅឃុំឃ្លងហាត ស្រុកឃ្លងហាត ខេត្តស្រះកែវ (ទល់មុខច្រកទ្វារព្រំដែនអន្តរជាតិភ្នំដី ស្រុកសំពៅលូន ខេត្តបាត់ដំបង) នៅថ្ងៃទី១ ខែវិច្ឆិកា ឆ្នាំ២០២៥ គឺកងទ័ពភូមិភាគទី១ សូមបញ្ជាក់ថា កងទ័ពថៃពុំបានទទួលបញ្ជាពីថ្នាក់លើឱ្យបើកព្រំដែនកម្ពុជា-ថៃនៅខេត្តស្រះកែវទេ ដែលជាការមើលខុសត្រូវរបស់កងទ័ពបូព៌ា (ឬកងកម្លាំងបូរ៉ាផា) ។ កងទ័ពភូមិភាគទី១ នៅតែអនុវត្តតាមគោលនយោបាយបិទព្រំដែនកម្ពុជា-ថៃក្នុងតំបន់ទទួលខុសត្រូវដូចមុន ។

ការបដិសេធរបស់កងទ័ពថៃពាក់ព័ន្ធនឹងការបើកព្រំដែនបានខៅឌិន (ឬច្រកទ្វារព្រំដែនអន្តរជាតិភ្នំដី) គឺក្រោយពីពលរដ្ឋថៃបង្ហាញការមិនពេញចិត្តក្នុងបណ្តាញសង្គមថា ទោះជាកម្ពុជា-ថៃបានចុះហត្ថលេខាលើសេចក្តីថ្លែងការណ៍រួមនៅទីក្រុងកូឡាឡាំពួរ ប្រទេសម៉ាឡេស៊ី ដើម្បីស្តារទំនាក់ទំនងឱ្យត្រឡប់មកប្រក្រតីក្តី ប៉ុន្តែពលរដ្ឋថៃមិនគាំទ្រការបើកព្រំដែនឡើងវិញឡើយ ពួកគេសំណូមពរឱ្យរដ្ឋាភិបាលថៃបិទព្រំដែនបន្តទៀតដើម្បីទប់ស្កាត់ការបញ្ជូនទំនិញថៃមកកម្ពុជាតាមរយៈផ្លូវគោក ។

ព័ត៌មានបើកព្រំដែនកម្ពុជា-ថៃនៅថ្ងៃទី១ ខែវិច្ឆិកានេះ បន្ទាប់ពីអតីតអ្នកនយោបាយថៃ បុគ្គល វីរៈ ស៊ុមក្វាមឃិត ដែលមិនពេញចិត្តជាមួយលទ្ធផលកិច្ចប្រជុំពេញអង្គគណៈកម្មការចម្រុះខណ្ឌសីមាព្រំដែនគោកកម្ពុជា-ថៃ (JBC) នៅខេត្តចន្ទបុរី ប្រទេសថៃ ចាប់ពីថ្ងៃទី២១ ដល់ថ្ងៃទី២២ ខែតុលា ឆ្នាំ២០២៥ ថា ថៃចាញ់ប្រៀបកម្ពុជាក្នុងកិច្ចប្រជុំ JBC លើកឡើងថា កងទ័ពថៃត្រៀមបើកព្រំដែនបានខៅឌិន នៅថ្ងៃទី១ ខែវិច្ឆិកា ។

នៅថ្ងៃទី២៧ ខែតុលា នាយករដ្ឋមន្ត្រីថៃ លោក Anutin Charnvirakul ក៏បានច្រានចានព័ត៌មានបើកព្រំដែនកម្ពុជា-ថៃនៅថ្ងៃទី១ ខែវិច្ឆិកា ដែរ លុះត្រាតែកម្ពុជាអនុវត្តតាមលក្ខខណ្ឌ៤ចំណុចជាមុនសិន ដោយមានក្រុមអ្នកសង្កេតការណ៍អាស៊ាន AOT ចូលរួមសង្កេតការណ៍ការអនុវត្តរបស់កម្ពុជា ហើយថៃមិនចាញ់ប្រៀប ។ លក្ខខណ្ឌ៤ចំណុច រួមមាន ៖ ១-ដកអាវុធធុនធ្ងន់ចេញពីតំបន់ព្រំដែន ២-ដោះមីន ៣-បង្ក្រាបការឆបោកអនឡាញ និង៤-គ្រប់គ្រងតំបន់ព្រំដែនរួមគ្នា ជាពិសេស នៅភូមិណងចាន់ និងភូមិណងយ៉ាកែវ (ទល់មុខភូមិជោគជ័យ និងភូមិព្រៃចាន់) គឺកម្ពុជាត្រូវអនុវត្តលក្ខខណ្ឌទាំងនេះឱ្យថៃឃើញជាមុន ។

លោកនាយករដ្ឋមន្ត្រីថៃបានទទួលព័ត៌មានកម្ពុជាចាប់ផ្តើមកែសម្រួលយុទ្ធោបករណ៍ និងអាវុធធុនធ្ងន់មួយផ្នែកនៃជំហ៊ានទី១ ជានិមិត្តរូបរបស់កងទ័ពកម្ពុជា-ថៃ ក្រោមការសង្កេតការណ៍របស់ក្រុមអ្នកសង្កេតការណ៍អាស៊ាន AOT កាលពីយប់ថ្ងៃទី២៦ ខែតុលា ហើយថៃនឹងរង់ចាំឱ្យកម្ពុជាអនុវត្តតាមលក្ខខណ្ឌផ្សេងៗ ទើបថៃដោះលែងកងទ័ពកម្ពុជាទាំង១៨នាក់ ។ ហេតុនេះ គ្មានការបើកព្រំដែននៅថ្ងៃទី១ ខែវិច្ឆិកា តាមពាក្យចចាមអារ៉ាមឡើយ ការបើកព្រំដែននឹងធ្វើឡើងនៅដំណាក់កាលចុងក្រោយនៃការអនុវត្តលក្ខខណ្ឌ ៕

ចាប់តាំងពីមានទំនាស់ព្រំដែនជាមួយគ្នាចន្លោះពាក់កណ្ដាលឆ្នាំ២០២៥នេះមក ប្រទេសថៃបានជ្រើសរើសបិទ IP អ្នកទស្សនានៅកម្ពុជាមិនឲ្យចូលមើលផេក ឬគេហទំព័រព័ត៌មានរបស់ខ្លួន និងបណ្ដាញព័ត៌មានខ្លះបានបិទមុខងារបញ្ចេញមតិរបស់ពួកគេ ក្នុងគោលបំណងដើម្បីរារាំងពលរដ្ឋកម្ពុជាដែលឃើញពីការផ្សាយព័ត៌មានរបស់ពួកគេរួចបានត្រឹមមើល មិនអាចខម្មិនអ្វីបាន។

សកម្មភាពបិទ IP អ្នកប្រើប្រាស់បណ្ដាញសង្គមនៅកម្ពុជានេះ ត្រូវបានគេសម្លឹងឃើញថា គឺជាយុទ្ធសាស្រ្តប្រកួតប្រជែងមួយរបស់ថៃ ក្នុងការយកប្រៀបលើកម្ពុជាតាមរយៈប្រព័ន្ធផ្សព្វផ្សាយ ដោយពួកគេមានបំណងមិនឲ្យពលរដ្ឋកម្ពុជាបានដឹង ឬមើលឃើញថាភាគីថៃកំពុងមានផែនការអ្វី ឬស្ថានការណ៍នៅប្រទេសថៃវិវត្តដល់ណា និងជាពិសេសគឺដើម្បីមានភាពងាយស្រួលក្នុងការបំភ្លៃព័ត៌មាន ដោយគ្មានប្រតិកម្មឆ្លើយតបពីសំណាក់អ្នកប្រើប្រាស់ប្រព័ន្ធបណ្ដាញសង្គមនៅកម្ពុជា។

ជាក់ស្ដែងដូចជាសារព័ត៌មាន Khaosod English និង Khaosod ភាសាថៃ គិតត្រឹមថ្ងៃទី២៦ ខែតុលាកាលពីម្សិលមិញនេះ បានសម្រេចបិទការចូលមើលពីអ្នកតាមដាននៅកម្ពុជា បន្ទាប់ពីសារព័ត៌មានធំៗរួមមាន Amarin TV, Bangkok Post, Thai PBS និងផេកជាច្រើនផ្សេងទៀត បានបិទអ្នកទស្សនានៅកម្ពុជាចាប់តាំងពីការប៉ះទង្គិចបានផ្ទះឡើង។

ដោយឡែក ចំពោះសារព័ត៌មាន The Nation ដែលក៏ជាសារព័ត៌មានភាសាអង់គ្លេសរបស់ថៃដែរនោះ ដ្បិតថាមិនបិទIP កម្ពុជា ប៉ុន្តែពួកគេបានបិទមុខងារបញ្ចេញមតិយោបល់ ដើម្បីរារាំងការចូលទៅខម្មិនរបស់បងប្អូនប្រជាពលរដ្ឋខ្មែរនៅលើការបង្ហោះរបស់ពួកគេ បើទោះជាបានឃើញប៉ុន្តែមិនអាចនិយាយអ្វីនៅលើព័ត៌មាននោះបានឡើយ។

យ៉ាងណាក៏ដោយ ការបំបិទមិនឲ្យមើលឃើញភាគច្រើន ផ្ដោតសំខានទៅលើបណ្ដាញសង្គមហ្វេសប៊ុក ខណៈបណ្ដាញសារព័ត៌មានមួយចំនួនរបស់ថៃនៅតែអនុញ្ញាតឲ្យអ្នកទស្សនានៅកម្ពុជាចូលមើលកាចុះផ្សាយរបស់ពួកគេនៅក្នុងគេហទំព័រ ឬវេបសាយបានធម្មតា។

ជាមួយគ្នានេះ អ្នកប្រើប្រាស់បណ្ដាញសង្គម និងអ្នកអត្ថាធិប្បាយឯករាជ្យជាច្រើនអះអាងថា ការរឹតត្បិតនេះអាចទាក់ទងនឹងការរិះគន់កាន់តែខ្លាំងឡើងពីអ្នកទស្សនានៅកម្ពុជា ដែលតែងលើកឡើងពីស្ថាប័នព័ត៌មានថៃមួយចំនួនថា បានពណ៌នាលាបពណ៌មកលើកម្ពុជា ឬរាយការណ៍មិនពិតអំពីបញ្ហាក្នុងតំបន់រសើប។ បន្ថែមពីនេះពលរដ្ឋកម្ពុជាជាច្រើនបានបញ្ជាក់ថា ការផ្សាយព័ត៌មាននៅក្នុងប្រព័ន្ធផ្សព្វផ្សាយថៃជាទូទៅ តែងមានខ្លឹមសារផ្ទុយពីអ្វីដែលពួកគេមើលឃើញថាជា “រឿងពិត” ដែលនាំឱ្យមានការឈ្លោះតទល់គ្នាទៅវិញទៅមកយ៉ាងក្តៅគគុក រវាងអ្នកលេងបណ្ដាញសង្គមរបស់ប្រទេសទាំងពីរ នៅក្នុងផ្នែកបញ្ចេញមតិ៕

ប្រទេសថៃ ៖ កាលពីថ្ងៃទី២៦ ខែតុលា ឆ្នាំ២០២៥ នាយករដ្ឋមន្ត្រីថៃបានចុះហត្ថលេខាលើសេចក្តីថ្លែងការណ៍រួម (Joint Declaration) ជាមួយកម្ពុជា ក្រៅកិច្ចប្រជុំកំពូលអាស៊ាន លើកទី៤៧ នៅទីក្រុងកូឡាឡាំពួរ ប្រទេសម៉ាឡេស៊ី ដោយមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ជាសាក្សី ។ នៅថ្ងៃដដែលនេះ នាយករដ្ឋមន្ត្រីថៃក៏បានចុះហត្ថលេខាលើអនុស្សរណៈនៃការយោគយល់គ្នា (MOU) ស្តីពីរ៉ែកម្រជាមួយអាមេរិកផងដែរ ប៉ុន្តែបែរជារងការស្តីបន្ទោសពីសង្គមថៃទៅវិញ ជាពិសេស សមាជិកសភាគណបក្សប្រជាជន បន្ទោសរដ្ឋាភិបាលថៃមានកំហុសធ្ងន់ធ្ងរដោយសារចាញ់ប្រៀបអាមេរិក ។

លោក Phattarapong Leelaphat សមាជិកសភាគណបក្សប្រជាជនប្រចាំខេត្តឈៀងម៉ៃ បានបង្ហោះសារក្នុងហ្វេសប៊ុកនៅថ្ងៃទី២៧ ខែតុលា ឆ្នាំ២០២៥ ក្រោយពីនាយករដ្ឋមន្ត្រីថៃ លោក Anutin Charnvirakul បានចុះហត្ថលេខាលើអនុស្សរណៈនៃការយោគយល់គ្នា (MOU) ស្តីពីរ៉ែកម្រជាមួយអាមេរិកថា វាធ្វើឱ្យថៃចាញ់ប្រៀបយ៉ាងខ្លាំង និងត្រូវបានអាមេរិករឹតបន្តឹងគ្រប់ផ្នែក ។ លោកបានសួរទៅកាន់នាយករដ្ឋមន្ត្រីថា តើការចុះហត្ថលេខានេះចាំបាច់ដែរឬទេ?

សមាជិកសភារូបនេះយល់ថា ថៃមិនចាំបាច់ចុះហត្ថលេខាលើ MOU ជាមួយអាមេរិកទេ ពីព្រោះខ្លឹមសារ MOU គ្មានបញ្ជាក់ពីវិធានការការពារបរិស្ថានដោយសារដំណើរការធ្វើអណ្តូងរ៉ែកម្រ ។ បច្ចុប្បន្ន ភាគខាងជើងប្រទេសថៃកំពុងប្រឈមជាមួយបញ្ហាទឹកយ៉ាងខ្លាំងដោយសារការធ្វើអណ្តូងរ៉ែនៅប្រទេសជិតខាង ហើយការចុះហត្ថលេខាលើកនេះជាមួយអាមេរិក គឺជាការបង្កើតបញ្ហាថ្មីថែមទៀត ខណៈបញ្ហាចាស់ពុំទាន់ដោះស្រាយ ។

ហេតុអ្វីរដ្ឋាភិបាលថៃចុះហត្ថលេខាលើ MOU ស្តីពីរ៉ែកម្រជាមួយអាមេរិកស្របពេលជាមួយការចុះហត្ថលេខាលើសេចក្តីថ្លែងការណ៍រួមជាមួយកម្ពុជានៅទីក្រុងកូឡាឡាំពួរ ទាំងដែលការចុះហត្ថលេខាទាំង២ច្បាប់គ្មានអ្វីពាក់ព័ន្ធគ្នា ។ ក្រៅពីនេះ លោកនាយករដ្ឋមន្ត្រី Anutin ប្រាប់ថា ការចុះហត្ថលេខារ៉ែកម្រជាមួយអាមេរិកបានឆ្លងកាត់កិច្ចប្រជុំគណៈរដ្ឋមន្ត្រីកាលពីថ្ងៃទី២១ ខែតុលា កន្លងមក និងឆ្លងកាត់នាយកដ្ឋានរ៉ែរួចហើយ ប៉ុន្តែពេលពិនិត្យលទ្ធផលកិច្ចប្រជុំគណៈរដ្ឋមន្ត្រី បែរជាមិនឃើញបញ្ជាក់ពីរ៉ែកម្រ ។

ជាមួយគ្នានេះ នាយកដ្ឋានរ៉ែក៏ខ្វះខាតជំនាញយ៉ាងខ្លាំងផ្នែករ៉ែកម្រ ទើបមន្ត្រីនាយកដ្ឋានរ៉ែពុំអាចបកស្រាយពីដំណោះរការធ្វើអណ្តូងរ៉ែបែប In-Situ Leeching នៅប្រទេសជិតខាង ។ ដូច្នេះ រដ្ឋាភិបាលថៃមិនគួរចុះហត្ថលេខាលើ MOU ស្តីពីរ៉ែកម្រជាមួយអាមេរិកដែលធ្វើឱ្យថៃចាញ់ប្រៀប ខណៈថៃពុំទាន់ត្រៀមខ្លួន ។ ថៃថែមទាំងរងសម្ពាធខ្លាំងក្រោយការចុះហត្ថលេខាលើ MOU ដោយសារវាផ្តល់ផលប្រយោជន៍ដល់អាមេរិក និងធ្វើឱ្យការគ្រប់គ្រងធនធានធម្មជាតិរបស់ថៃមានកំណត់ ។

សមាជិកសភាថៃ លោក Phattarapong បន្តថា ធនធានធម្មជាតិនៅប្រទេសថៃមិនគួរយកទៅចរចាដើម្បីផលប្រយោជន៍សម្ងាត់ ហើយការលុបចោល MOU ជាមួយប្រទេសមហាអំណាចមិនងាយស្រួលឡើយ ពីព្រោះសហរដ្ឋអាមេរិកអាចដាក់សម្ពាធលើថៃគ្រប់វិធី ។ លោកមិនយល់ស្របជាមួយរដ្ឋាភិបាលក្នុងការចុះ MOU ច្បាប់នេះទេ ទោះជាបានបញ្ជាក់ពីភាពស្មើគ្នារវាងប្រទេសទាំងពីរ ប៉ុន្តែខ្លឹមសារ MOU សុទ្ធតែបញ្ជាក់ពីផលប្រយោជន៍របស់អាមេរិកជាចម្បង រីឯថៃវិញស្ទើរគ្មានឱកាសទៅវិនិយោគរ៉ែកម្រនៅអាមេរិកដែលត្រូវចំណាយដើមទុនខ្ពស់ជាង ។

ក្នុងឋានៈរដ្ឋាភិបាលគណបក្សភូមិចៃថៃដឹកនាំប្រទេសបណ្តោះអាសន្ន សមាជិកសភាថៃបានអំពាវនាវឱ្យរដ្ឋាភិបាលមិនពិចារណាពីការជីកយករ៉ែកម្រនៅប្រទេសថៃ និងហាមអនុញ្ញាតឱ្យអាមេរិកប្រើប្រាស់ MOU នេះមកដាក់សម្ពាធថៃត្រូវតែធ្វើអណ្តូងរ៉ែកម្រសម្រាប់អាមេរិក ។ ក្រៅពីនេះ រដ្ឋាភិបាលត្រូវប្រញាប់ធ្វើ Domestic Law តាម MOU ឱ្យតឹងរ៉ឹង ដោយបង្កើតច្បាប់យោងតាមកិច្ចប្រជុំគណៈរដ្ឋមន្ត្រីស្តីពីរ៉ែកម្រដើម្បីការពារការប៉ះពាល់បរិស្ថាន ពីព្រោះរដ្ឋាភិបាលថៃបានក្លាយជាកូនអុកក្នុងសង្គ្រាមរ៉ែកម្ររវាងសហរដ្ឋអាមេរិក និងចិន ៕