ប្រទេសថៃ ៖ កាលពីថ្ងៃទី៦ ខែវិច្ឆិកា ឆ្នាំ២០២៥ កងទ័ពថៃបានប្រកាសដោះលែងកងទ័ពកម្ពុជាទាំង១៨រូបនៅថ្ងៃទី១២ ខែវិច្ឆិកា ខាងមុខ ប៉ុន្តែប៉ុន្មានម៉ោងបន្ទាប់ ស្រាប់តែអ្នកនាំពាក្យកងទ័ពថៃបែរជាកែប្រែពាក្យសម្តីវិញថា ការដោះលែងស្ថិតក្រោមការពិចារណានៅឡើយ ដោយថៃរង់ចាំកម្ពុជាអនុវត្តលក្ខខណ្ឌ២ចំណុចឱ្យបានជាមុនសិន រួមមាន ៖ ការដកអាវុ.ធធុនធ្ងន់ និងគ្មានការរារាំងការដោះមីនតាមព្រំដែន ។ តាមប្រភពពីមន្ត្រីជាន់ខ្ពស់ក្រសួងការពារជាតិថៃ មូលហេតុដែលថៃបម្រុងដោះលែងកងទ័ពកម្ពុជាទាំងអស់ ដោយសារអាមេរិកយកអត្រាពន្ធទំនិញមកដាក់សម្ពាធ ។

យោងតាមប្រភពពីមន្ត្រីជាន់ខ្ពស់ក្រសួងការពារជាតិថៃ គឺមន្ត្រីអាមេរិកបានដាក់សម្ពាធថៃយ៉ាងខ្លាំងឱ្យយល់ព្រមដោះលែងកងទ័ពកម្ពុជាទាំង១៨រូបត្រឡប់មកប្រទេសវិញ ដោយមន្ត្រីអាមេរិកយកអត្រាពន្ធទំនិញថៃដែលនាំចូលអាមេរិកមកដាក់សម្ពាធម្តងហើយម្តងទៀត ។

ក្រោយពីសារព័ត៌មាននានារបស់ថៃចុះផ្សាយកាលពីថ្ងៃទី៦ ខែវិច្ឆិកា ថា កងទ័ពថៃបានទំនាក់ទំនងទៅកាន់កងកម្លាំងការពារព្រំដែនខេត្តចន្ទបុរី និងខេត្តត្រាត ឱ្យត្រៀមទីកន្លែងស្នាក់នៅសម្រាប់កងទ័ពកម្ពុជាទាំង១៨រូប ដែលត្រៀមដោះលែងនៅច្រកព្រំដែនបានផាកកាត ស្រុកប៉ូងណាមរ៉ន ខេត្តចន្ទបុរី (ទល់មុខខេត្តប៉ៃលិន) នៅថ្ងៃទី១២ ខែវិច្ឆិកា សារព័ត៌មាន PPTV ក៏បានសួរនាំមន្ត្រីជាន់ខ្ពស់ក្រសួងការពារជាតិថៃ និងទទួលបានចម្លើយថា ជាព័ត៌មានពិត ។

មន្ត្រីជាន់ខ្ពស់ក្រសួងការពារជាតិថៃបញ្ជាក់ថា មូលហេតុដែលថៃយល់ព្រមដោះលែងកងទ័ពកម្ពុជាទាំង១៨រូប ដោយសារអាមេរិកយកអត្រាពន្ធទំនិញមកដាក់សម្ពាធថៃយ៉ាងខ្លាំង ទើបថៃយល់ព្រមដោះលែងកងទ័ពកម្ពុជាដើម្បីកុំឱ្យផលប៉ះពាល់ដោយសារអត្រាពន្ធទំនិញធ្លាក់មកលើពលរដ្ឋ និងប្រទេសថៃ ។ ម្យ៉ាងទៀត ការឃុំខ្លួនកងទ័ពកម្ពុជារយៈពេលយូរអាចមានបញ្ហារឿងអនុសញ្ញា ឬប៉ះពាល់ច្បាប់អន្តរជាតិ ។

មូលហេតុមួយទៀតដែលថៃយល់ព្រមដោះលែង ដោយសារកម្ពុជាបានអនុវត្តតាមលក្ខខណ្ឌ៤ចំណុចរបស់ថៃ រួមមាន ៖ ១-ការដកអាវុធធុនធ្ងន់ ២-ដោះមីន ៣-បង្ក្រាបឧក្រិដ្ឋកម្មឆ្លងដែន និងការឆបោកអនឡាញ និង៤-ដោះស្រាយបញ្ហានៅតំបន់ព្រំដែនខេត្តស្រះកែវ ។ ហេតុនេះ ថៃក៏យល់ព្រមដោះលែងកងទ័ពកម្ពុជាទាំង១៨រូប ចាប់ពីថ្ងៃទី១១ ដល់ថ្ងៃទី១២ ខែវិច្ឆិកា នេះ ។ រីឯការបើកព្រំដែនឡើងវិញ គឺថៃនឹងពុំបើកព្រំដែននាពេលនេះទេ ។

គួរបញ្ជាក់ថា បើទោះជាមានការដាក់សម្ពាធពីអាមេរិកឱ្យថៃដោះលែងកងទ័ពកម្ពុជាទាំង១៨រូបក្តី ប៉ុន្តែអ្នកនាំពាក្យកងទ័ពថៃបែរជាកែប្រែពាក្យសម្តីវិញថា ការដោះលែងស្ថិតក្រោមការពិចារណានៅឡើយ ដោយថៃរង់ចាំកម្ពុជាអនុវត្តលក្ខខណ្ឌចំនួន២ចំណុចឱ្យបានជាមុនសិន រួមមាន ៖ ការដកអាវុ.ធធុនធ្ងន់ និងគ្មានការរារាំងការដោះមីនតាមព្រំដែន ។

ក្នុងពិធីចុះហត្ថលេខាលើកិច្ចព្រមព្រៀងសន្តិភាពនៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី២៦ ខែតុលា កន្លងមក ប្រធានាធិបតីអាមេរិក លោក Donald Trump ប្រកាសថា កិច្ចព្រមព្រៀងប្រវត្តិសាស្ត្រនេះនឹងឈានដល់ការដោះលែងកងទ័ពកម្ពុជាទាំង១៨រូបភ្លាមៗដើម្បីបញ្ជាក់ពីគោលជំហរសន្តិភាព ។

គិតត្រឹមថ្ងៃទី៧ ខែវិច្ឆិកា ឆ្នាំ២០២៥ វីរកងទ័ពកម្ពុជាចំនួន១៨រូបដែលត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់កងទ័ពថៃមានរយៈពេល ១០១ថ្ងៃហើយ ។ កម្ពុជាសូមអំពាវនាវឱ្យភាគីថៃដោះលែងពួកគាត់ត្រឡប់មកវិញឱ្យបានឆាប់រហ័សជាទីបំផុត ដើម្បីឱ្យពួកគាត់អាចវិលត្រឡប់មកជួបជុំក្រុមគ្រួសារប្រកបដោយសុខសុវត្ថិភាព ស្របតាមច្បាប់មនុស្សធម៌អន្តរជាតិ ៕

ប្រទេសថៃ ៖ ក្រោយពីអ្នកនយោបាយ កងទ័ព និងពលរដ្ឋថៃ ទាមទារយកទឹកដីតំបន់ព្រំដែនខេត្តស្រះកែវ និងជំរុញឱ្យរដ្ឋាភិបាលថៃយកប្រាសាទតាក្របីរបស់កម្ពុជា ដែលមិនស្របតាមស្មារតី និងខឹ្លមសារនៃសេចក្តីថ្លែងការណ៍រួមទីក្រុងកូឡាឡាំពួរ មកធ្វើជាលក្ខខណ្ឌថ្មីៗបន្ថែមទៀតដើម្បីដាក់សម្ពាធលើកម្ពុជា នាយករដ្ឋមន្ត្រីថៃ លោក Anutin Charnvirakul បានបញ្ជាក់ពីគោលជំហរបញ្ចប់សង្គ្រា.មក្រោយការចុះហត្ថលេខាលើកិច្ចព្រមព្រៀងសន្តិភាពនៅម៉ាឡេស៊ី ។ លោកមិនចង់ឃើញថៃមានសង្គ្រា.មអូសបន្លាយទេ ខណៈពលរដ្ឋចោទប្រកាន់ថៃបាត់បង់អធិបតេយ្យដោយសារកិច្ចព្រមព្រៀងសន្តិភាព ។

នាយករដ្ឋមន្ត្រីថៃ លោក Anutin បានបញ្ជាក់ពីគោលជំហរជាថ្មីកាលពីថ្ងៃទី៥ ខែវិច្ឆិកា ឆ្នាំ២០២៥ ថា មូលហេតុដែលលោកសម្រេចចិត្តចុះហត្ថលេខាលើកិច្ចព្រមព្រៀងសន្តិភាពជាមួយកម្ពុជា ដែលមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ជាសាក្សី គឺលោកមានបំណងបញ្ចប់សង្គ្រាម ក្នុងឋានៈជាអ្នកដឹកនាំប្រទេស លោកមិនអាចបណ្តោយឱ្យប្រទេសថៃមានសង្គ្រាមរហូតទេ ។

លោក Anutin បានផ្តល់សម្ភាសន៍ជាមួយសារព័ត៌មានថា ៖ «ខ្ញុំធ្វើដំណើរទៅក្រុងកូឡាឡាំពួរ ប្រទេសម៉ាឡេស៊ី គឺមានបំណងចុះហត្ថលេខាលើកិច្ចព្រមព្រៀងសន្តិភាពដើម្បីបញ្ចប់សង្គ្រាម ពុំបណ្តោយឱ្យប្រទេសថៃមានសង្គ្រាមរហូតទេ ។ ខ្ញុំសូមជម្រាបទៅពលរដ្ឋថា ការចុះហត្ថលេខាលើសេចក្តីថ្លែងការណ៍រួម (Joint Declaration) ដែលអាមេរិកហៅថា «កិច្ចព្រមព្រៀងសន្តិភាព» គឺខ្ញុំពេញចិត្តនឹងការចុះហត្ថលេខា ពីព្រោះវាដល់ពេលវេលាដែលកម្ពុជា-ថៃត្រូវស្វែងរកសន្តិភាព» ។

តួនាទីរបស់នាយករដ្ឋមន្ត្រី គឺធ្វើឱ្យប្រទេសថៃមានសុខសន្តិភាព ទោះជាប្រទេសនានាជ្រើសយកសង្គ្រាម ប៉ុន្តែសម្រាប់ថៃកុំមានសង្គ្រាមល្អជាង ។ ការចុះហត្ថលេខាលើកិច្ចព្រមព្រៀងសន្តិភាព គឺថៃមិនបាត់បង់ទឹកដី គ្មានថ្ងៃបាត់បង់អធិបតេយ្យ ខ្ញុំចុះហត្ថលេខាដើម្បីផ្តល់សុវត្ថិភាព និងការពារការខូចខាតទ្រព្យសម្បត្តិរបស់ពលរដ្ឋ ។ ម្យ៉ាងទៀត ការចុះហត្ថលេខានេះដើម្បីកុំឱ្យប្រទេសជិតខាងមានគំនិតឈ្លានពាន ហើយថៃក៏បានកំណត់លក្ខខណ្ឌច្បាស់លាស់ចំនួន៤ រួមមាន ៖ ១-ដកអាវុធធុនធ្ងន់ចេញពីតំបន់ព្រំដែន ២-ដោះមីន ៣-បង្ក្រាបឧក្រិដ្ឋកម្មឆ្លងដែន និងការឆបោកអនឡាញ និង៤-ដោះស្រាយបញ្ហានៅតំបន់ព្រំដែនខេត្តស្រះកែវ (ទល់មុខភូមិជោគជ័យ និងភូមិព្រៃចាន់) ។

វត្តមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ជាសាក្សីក្នុងពិធីចុះហត្ថលេខាលើកិច្ចព្រមព្រៀងសន្តិភាពកាលពីថ្ងៃទី២៦ ខែតុលា ឆ្នាំ២០២៦ គឺតំណាងឱ្យការចូលរួមរបស់សហគមន៍អន្តរជាតិ ។ កិច្ចព្រមព្រៀងនេះធ្វើឱ្យមានទំនុកចិត្តថា ប្រទេសថៃនឹងគ្មានសង្គ្រាម បើមានការអនុវត្តតាម៤លក្ខខណ្ឌដែលកំណត់ ។ នេះបើតាមការលើកឡើងរបស់នាយករដ្ឋមន្ត្រីថៃ ។

ករណី Influencer និងពលរដ្ឋខេត្តសុរិន្ទទាមទារឱ្យកងទ័ពថៃវាយយកប្រាសាទតាក្របីរបស់កម្ពុជា គឺនាយករដ្ឋមន្ត្រីថៃថា ពលរដ្ឋថៃមានសិទ្ធិ ឬអាចបង្ហាញការស្នេហាជាតិបាន ប៉ុន្តែត្រូវតែស្វែងរកដំណោះស្រាយតាមរយៈកិច្ចប្រជុំ JBC លោកមិនគាំទ្រឱ្យពលរដ្ឋថៃប្រព្រឹត្តខុសច្បាប់ថៃ និងច្បាប់អន្តរជាតិនោះទេ ។

គួរបញ្ជាក់ថា នាយករដ្ឋមន្ត្រីថៃបានបញ្ជាក់ពីគោលជំហរបញ្ចប់សង្គ្រា.មជាមួយកម្ពុជាក្រោយការចុះហត្ថលេខាលើកិច្ចព្រមព្រៀងសន្តិភាពនេះ គឺក្រោយពីសង្គមថៃចោទប្រកាន់ថា កិច្ចព្រមព្រៀងសន្តិភាពធ្វើឱ្យថៃបាត់បង់អធិបតេយ្យ និងបាត់បង់ប្រាសាទតាក្របី ។ អ្នកនយោបាយ កងទ័ព និងពលរដ្ឋថៃ បានស្តីបន្ទោសនាយករដ្ឋមន្ត្រីរបស់ខ្លួនដែលជ្រើសយកសន្តិភាព មិនជ្រើសយកសង្គ្រាម ដោយសារពួកគេមិនទាន់ទទួលបានប្រាសាទ និងទឹកដីនៅតំបន់ព្រំដែនខេត្តស្រះកែវ ៕

ប្រទេសថៃ៖ ក្រោយទើបបញ្ជាក់ថានឹងមានការដោះលែងយោធាកម្ពុជាទាំង ១៨រូប ឲ្យធ្វើមាតុភូមិនិវត្តន៍នៅថ្ងៃទី១២ វិច្ឆិកា ខាងមុខ ស្រាប់តែបានប៉ុន្មានម៉ោងបន្ទាប់ អ្នកនាំពាក្យកងទ័ពថៃបែរជាចេញមកកែប្រែពាក្យសំដីវិញថា ការដោះលែងនៅតែស្ថិតក្រោមការពិចារណានៅឡើយ ខណៈថៃនៅរង់ចាំកម្ពុជាអនុវត្តលក្ខខណ្ឌធំៗចំនួន ២ឲ្យបានជាមុនសិន។

យោងតាមការចុះផ្សាយរបស់សារព័ត៌មាន Khaosod បានឲ្យដឹងនៅយប់ថ្ងៃព្រហស្បត្តិ៍ ទី៦ ខែវិច្ឆិកា ឆ្នាំ២០២៥ នៅទីបញ្ជាការកងទ័ពភូមិន្ទថៃ (RTA HQ) ដោយលោក Winthai Suvaree អ្នកនាំពាក្យកងទ័ពភូមិន្ទថៃ បានថ្លែងថា ការធ្វើមាតុភូមិនិវត្តន៍ទាហានកម្ពុជាចំនួន ១៨នាក់ នៅតែស្ថិតក្នុងដំណាក់កាលនៃការពិចារណា និងការរៀបចំ មិនទាន់អាចកំណត់ពេលឲ្យជាក់ច្បាស់បាននោះទេ។

អ្នកនាំពាក្យរូបនេះបញ្ជាក់ថា ការដោះលែងអាចធ្វើទៅបានលុះត្រាតែលក្ខខណ្ឌចំនួន ២ចំណុច ដែលរួមមានការដកអាវុធធុនធ្ងន់ និងគ្មានការរារាំងការដោះមីនតាមព្រំដែន ត្រូវបានអនុវត្តប្រកបដោយប្រសិទ្ធិភាពពីសំណាក់ភាគីកម្ពុជា។

គួររំលឹកថា កាលពីរសៀលថ្ងៃទី៦ ខែវិច្ឆិកា សារព័ត៌មានថៃបានចុះផ្សាយព្រោងព្រាតពីការសម្រេចរបស់យោធា ថានឹងដោះលែងទាហានកម្ពុជាទាំង១៨នាក់ ដែលខ្លួនបានចាប់ឃុំខ្លួនដោយខុសច្បាប់ នៅថ្ងៃទី១២ ខែវិច្ឆិកា តាមច្រកអន្តរជាតិបានផាកាត ខេត្តចន្ទបុរីរបស់ថៃ ត្រូវនឹងច្រកព្រំ ក្នុងខេត្តប៉ៃលិន របស់កម្ពុជា។

ប៉ុន្តែគ្រប់យ៉ាងមិនងាយស្រួលដូចការរំពឹងទុក ដោយនៅប៉ុន្មានម៉ោងក្រោយពីការប្រកាសខាងលើ អ្នកនាំពាក្យកងទ័ពថៃបានក្រឡាសសំដីថា ការដោះលែងកំពុងស្ថិតក្រោមការពិចារណាទៅវិញ ដែលជំរុញឲ្យមានការខកចិត្តយ៉ាងខ្លាំងពីសាធារណជនកម្ពុជា។

ជាការកត់សម្គាល់របស់ពលរដ្ឋកម្ពុជាទូទៅ បានចាត់ទុកការប្រកាសផ្សេងៗ រួមទាំងការចុះផ្សាយព័ត៌មានភាគច្រើនដែលមានប្រភពមកពីថៃថា មិនគួរឲ្យជឿជាក់ និងមិនអាចទុកចិត្តបាន ខណៈកន្លងមកមិនថាជាទំព័រផ្លូវការ ឬបណ្ដាញព័ត៌មានធំៗនោះទេ តែងចុះផ្សាយបំភ្លៃ ឬក្រឡាសពាក្យសំដីរបស់ខ្លួន ដដែលជាដដែល ជាក់ស្ដែងដូចជាផ្សាយអំពីការដោះលែងយោធាកម្ពុជានេះជាដើម៕

ប្រទេសថៃ ៖ ទោះជាកម្ពុជា-ថៃបានចុះកិច្ចព្រមព្រៀងសន្តិភាពដោយមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ជាសាក្សីកាលពីថ្ងៃទី២៦ ខែតុលា ឆ្នាំ២០២៥ នៅទីក្រុងកូឡាឡាំពួរ ប្រទេសម៉ាឡេស៊ី ប៉ុន្តែអ្នកនយោបាយ និងពលរដ្ឋថៃនៅព្រំដែនមិនពេញចិត្តនឹងកិច្ចព្រមព្រៀងសន្តិភាពនេះ និងទាមទារយកប្រាសាទតាក្របីរបស់កម្ពុជាដោយប្រើប្រាស់កម្លាំងទ័ព ។ ពេលពលរដ្ឋថៃចង់បានប្រាសាទតាក្របីខ្លាំង មេបញ្ជាការយោធភូមិភាគ២ និយាយបំភ្លៃថា ប្រាសាទតាក្របីជារបស់ថៃ កងទ័ពថៃមានផែនការដណ្តើមយកប្រាសាទ ។

ពេលប្រគល់សម្ភារៈធ្វើផ្លូវ និងរបងតាមបណ្តោយព្រំដែនកម្ពុជា-ថៃកាលពីថ្ងៃទី៦ ខែវិច្ឆិកា ឆ្នាំ២០២៥ មេបញ្ជាការយោធភូមិភាគ២ លោក Weerayut Raksin និយាយបំភ្លៃថា ប្រាសាទតាក្របីជារបស់ថៃ កងទ័ពថៃបានរៀបចំផែនការរួចហើយដើម្បីយកប្រាសាទនេះពីកម្ពុជា ។ ការលើកឡើងរបស់មេបញ្ជាការយោធភូមិភាគ២ថៃ ស្របពេលសង្គមថៃទាមទារឱ្យរដ្ឋាភិបាលរបស់លោកនាយករដ្ឋមន្ត្រី Anutin Charnvirakul និងកងទ័ពយកប្រាសាទតាក្របីរបស់កម្ពុជាទោះប្រើប្រាស់វិធីណាក៏ដោយ ។

នារសៀលថ្ងៃទី៦ ខែវិច្ឆិកា មេបញ្ជាការយោធភូមិភាគ២ លោក Weerayut Raksin រួមទាំងកងទ័ពមួយចំនួនបានធ្វើដំណើរតាមឧទ្ធម្ភាគចក្រមកកាន់វត្តប៉ាណងស៊ែង ស្ថិតនៅឃុំណងបួបាន ស្រុកណងវួសរ ខេត្តឧដនថានី ដើម្បីមកសំពះសុំពរព្រះសង្ឃថៃ១អង្គព្រះជន្ម៩០វស្សា ព្រមទាំងប្រគល់សម្ភារៈមួយចំនួន និងត្រាក់ទ័រចំនួន៣គ្រឿងសម្រាប់ការងារធ្វើផ្លូវ និងរបងតាមបណ្តោយព្រំដែនកម្ពុជា-ថៃ ។

បន្ទាប់មក លោកបានផ្តល់សម្ភាសន៍ពីស្ថានការណ៍ព្រំដែនកម្ពុជា-ថៃថា តាំងពីប្រទេសទាំងពីរដកអាវុធធុនធ្ងន់ចេញពីព្រំដែន គឺគ្មានភាពតានតឹងរវាងកងទ័ពទាំងសងខាងទេ ដោយសារអនុវត្តតាមការព្រមព្រៀង ។ កងទ័ពភូមិភាគទី២ថៃបានត្រៀមខ្លួនគ្រប់ពេលវេលា បើកម្ពុជាមិនអនុវត្តតាមការព្រមព្រៀង ដោយលោកបានបញ្ជូនលិខិតទៅកម្ពុជាដែលថា ថៃត្រៀមប្រើប្រាស់កម្លាំងដណ្តើមប្រាសាទតាក្របី ថៃមិនប្រើប្រាស់កម្លាំងកងទ័ពទេ កងទ័ពថៃបានរៀបចំផែនការរួចហើយដើម្បីយកប្រាសាទនេះ ។ រីឯការដណ្តើមយកប្រាសាទតាក្របីតាមវិធីណា គឺជារឿងសម្ងាត់របស់កងទ័ពថៃ ។ លោកក៏អរគុណពលរដ្ឋផងដែរ ដែលប្រមូលគ្នាទាមទារយកប្រាសាទតាក្របីរបស់កម្ពុជា ប៉ុន្តែត្រូវគិតពីសុវត្ថិភាព ។

ដោយឡែក កាលពីថ្ងៃទី៦ ខែវិច្ឆិកា រដ្ឋមន្ត្រីក្រសួងការពារជាតិថៃ លោក Natthaphon Narkphanit ក៏បាននិយាយបំភ្លៃដែរថា ប្រាសាទតាក្របីជារបស់ថៃ ថៃនឹងអនុវត្តការចរចាដោយសន្តិវិធីជាមុន ដូចជា ៖ ការដោះស្រាយបញ្ហាតាមរយៈយន្តការទ្វេភាគី ឬកិច្ចប្រជុំ JBC រីឯការប្រើប្រាស់កម្លាំងទ័ពជាវិធីចុងក្រោយ ។

កាលពីថ្ងៃទី៥ ខែវិច្ឆិកា អ្នកនាំពាក្យរាជរដ្ឋាភិបាលកម្ពុជាបានចេញសេចក្តីថ្លែងការណ៍បញ្ជាក់ពីគោលជំហររបស់កម្ពុជាក្នុងការគោរពយ៉ាងម៉ឺងម៉ាត់សេចក្តីថ្លែងការណ៍រួម ស្តីពីកិច្ចព្រមព្រៀងសន្តិភាពទីក្រុងគូឡាឡាំពួរ និងអំពាវនាវឱ្យភាគីថៃគោរពដូចគ្នាដែរ ដោយសាររយៈពេលប៉ុន្មានថ្ងៃចុងក្រោយនេះ មន្ត្រីថ្នាក់ដឹកនាំថៃ ទាំងរដ្ឋាភិបាល ស៊ីវិល និងយោធា បានចេញសេចក្តីអត្ថាធិប្បាយជាបន្តបន្ទាប់មិនស្របតាមស្មារតី និងខឹ្លមសារនៃសេចក្តីថ្លែងការណ៍រួមទីក្រុងកូឡាឡាំពួរ គឺមន្ត្រីថៃបានអត្ថាធិប្បាយយកចំណុចមិនបានព្រមព្រៀងគ្នាក្នុងសេចក្តីថ្លែងការណ៍រួម មកធ្វើជាលក្ខខណ្ឌថ្មីៗបន្ថែមទៀត ដូចជា ៖ ទាមទារប្រាសាទតាក្របី ដោយព្រមានប្រើប្រាស់កម្លាំងយោធាដណ្តើមយក ។

អ្នកនាំពាក្យរាជរដ្ឋាភិបាលកម្ពុជាបានអំពាវនាវឱ្យភាគីថៃគោរព និងអនុវត្តឱ្យម៉ឺងម៉ាត់បំផុតនូវរាល់ខ្លឹមសារដែលមានចែងក្នុងសេចក្តីថ្លែងការណ៍រួម ដោយមិនត្រូវធ្វើអត្ថាធិប្បាយណាមួយនាំឱ្យមានភាពតានតឹង និងបាត់បង់ទំនុកចិត្តរវាងគ្នាដែលមិនអំណោយផលដល់ការសន្ទនាដោយសន្តិវិធី ។ កម្ពុជាសូមអំពាវនាវដល់ថៃបញ្ឈប់ការដាក់លក្ខខណ្ឌផ្សេងៗដែលមិនស្របតាមស្មារតីនៃសេចក្តីថ្លែងការណ៍រួម និងការឯកភាពគ្នាក្នុងកិច្ចប្រជុំនានាក្នុងពេលកន្លងមក ៕

ប្រទេសថៃ ៖ បន្ទាប់ពីកម្ពុជា និងថៃចាប់ផ្តើមកែសម្រួលអាវុ.ធ និងយុទ្ធោបករណ៍ធុនធ្ងន់ចេញពីតំបន់ព្រំដែនដំណាក់កាលទី១ ក្រោមការសង្កេតការណ៍ និងផ្ទៀងផ្ទាត់ដោយក្រុមអ្នកសង្កេតការណ៍អាស៊ាន (AOT) ក៏មានមតិមួយចំនួននៅប្រទេសថៃចោទប្រកាន់ថា កងទ័ពកម្ពុជាដឹកអាវុ.ធត្រឡប់ទៅព្រំដែនវិញបន្ទាប់ពីទើបដកចេញ ដែលធ្វើឱ្យមានការបារម្ភពីការបាត់បង់អធិបតេយ្យ ។ លើសពីនេះ សារព័ត៌មានថៃចោទប្រកាន់កងទ័ពកម្ពុជារារាំងក្រុមអ្នកសង្កេតការណ៍អាស៊ាន (AOT) ពិនិត្យមើលមជ្ឈមណ្ឌលជាតិកម្ចាត់មីន (TMAC) ដោះមីននៅតំបន់ច្រកដោះដូរទំនិញ សាយតាគូ ស្រុកបានក្រួត ខេត្តបុរីរាំ ។

បន្ទាប់ពីមានការចោទប្រកាន់កងទ័ពកម្ពុជារារាំងក្រុម AOT ពិនិត្យមើលការដោះមីននៅតំបន់ច្រកដោះដូរទំនិញ សាយតាគូ ស្រុកបានក្រួត ខេត្តបុរីរាំ (ទល់មុខច្រកព្រំដែនជប់គគី ស្រុកបន្ទាយអំពិល ខេត្តឧត្តរមានជ័យ) នៅថ្ងៃទី៣ ខែវិច្ឆិកា ឆ្នាំ២០២៥ នាយករដ្ឋមន្ត្រីថៃ លោក Anutin Charnvirakul ប្រាប់ឱ្យពលរដ្ឋជឿជាក់លើកងទ័ពអាចការពារអធិបតេយ្យភាព និងកុំប្រើពាក្យថា «កម្ពុជារារាំងការដោះមីន» ដោយលោកសង្កត់ធ្ងន់លើការបំពេញតាមលក្ខខណ្ឌ៤ចំណុច ។

នាវេលាម៉ោង១១ព្រឹកថ្ងៃទី៣ ខែវិច្ឆិកា លោក Anutin នាយករដ្ឋមន្ត្រីថៃបានផ្តល់សម្ភាសន៍ជាមួយសារព័ត៌មានក្រោយមានព័ត៌មានថា កងទ័ពកម្ពុជារារាំងមិនឱ្យក្រុម AOT ចូលសង្កេតការណ៍ការដោះមីននៅតំបន់ច្រកដោះដូរទំនិញ សាយតាគូ ថា កុំទាន់ប្រើប្រាស់ពាក្យ «កម្ពុជារារាំងការដោះមីន» ដោយសារកម្ពុជាបានប្រជុំជាមួយថៃរហូតមក ។ តាមរបាយការណ៍ពីអគ្គមេបញ្ជាការ គឺថៃកំពុងដំណើរការដកថយកម្លាំងទ័ពចេញពីព្រំដែន និងដោះមីន គឺការពិភាក្សាកំពុងបន្តទោះមិនរលូនក្តី ប៉ុន្តែបានកំណត់គោលដៅច្បាស់លាស់ដើម្បីទទួលសន្តិភាព ។

ក្រៅពីនេះ នាយករដ្ឋមន្ត្រីថៃបានសង្កត់ធ្ងន់ពីលក្ខខណ្ឌ៤ចំណុច រួមមាន ៖ ១-ដកអាវុធចេញពីតំបន់ព្រំដែន ២-ដោះមីន ៣-បង្ក្រាបឧក្រិដ្ឋកម្មឆ្លងដែន-ការឆបោកអនឡាញ និង៤-ដោះស្រាយបញ្ហានៅតំបន់ព្រំដែនខេត្តស្រះកែវ (ទល់មុខភូមិជោគជ័យ និងភូមិព្រៃចាន់) ដោយភាគីទាំងពីរត្រូវអនុវត្តតាមលក្ខខណ្ឌទាំង៤ ទើបកងទ័ពថៃដោះលែងកងទ័ពកម្ពុជាចំនួន១៨រូប និងជជែកពីការកំណត់ព្រំដែន និងរឿងផ្សេងៗ ដោយបច្ចុប្បន្ន ស្ថិតក្នុងដំណាក់កាលអនុវត្តលក្ខខណ្ឌទាំងនេះ ។

ចំណែកពាក្យចចាមអារ៉ាមថា កងទ័ពកម្ពុជាដឹកអាវុ.ធត្រឡប់ទៅព្រំដែនវិញបន្ទាប់ពីទើបដកចេញ គឺលោក Anutin បញ្ជាក់ថា ភាគីទាំងពីរបានដកអាវុធចេញពីតំបន់ព្រំដែនហើយ តើសារព័ត៌មានថៃបានព័ត៌មាននេះពីណា? កម្ពុជាមិនបានដឹកអាវុធត្រឡប់ទៅព្រំដែនវិញទេ ពីព្រោះកិច្ចព្រមព្រៀងកំណត់ឱ្យភាគីទាំងពីរដកអាវុធរៀងៗខ្លួន បើកម្ពុជាដឹកអាវុធទៅព្រំដែនវិញ មានន័យថា បំពានកិច្ចព្រមព្រៀង ហើយថៃនឹងមានវិធានការ ។ នាយករដ្ឋមន្ត្រីថៃបានជជែកជាមួយអគ្គមេបញ្ជាការកងទ័ពពីពលរដ្ឋថៃបារម្ភរឿងការដកអាវុធចេញពីព្រំដែនអាចដឹកមកវិញមិនទាន់ ប្រសិនបើកម្ពុជាមិនអនុវត្តតាមកិច្ចព្រមព្រៀង អគ្គមេបញ្ជាការកងទ័ពថៃបានត្រៀមខ្លួនការពារអធិបតេយ្យ សូមជឿជាក់លើកងទ័ពអាចការពារអធិបតេយ្យ ។

គួរបញ្ជាក់ថា កម្ពុជាបានកែសម្រួលអាវុ.ធ និងយុទ្ធោបករណ៍ធុនធ្ងន់ចេញពីតំបន់ព្រំដែនដំណាក់កាលទី១ ជាការបង្ហាញពីការប្តេជ្ញាចិត្តក្នុងការគោរព និងអនុវត្តនូវអ្វីដេលបានឯកភាពគ្នាក្នុងសេចក្តីថ្លែងការណ៍រួមនៅទីក្រុងកូឡាឡាំពួរ ស្តីពីកិច្ចព្រមព្រៀងសន្តិភាពកម្ពុជា-ថៃ ដែលបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ ព្រមទាំងស្មារតីនៃកិច្ចប្រជុំពិសេសលើកទី២ នៃគណៈកម្មាធិការព្រំដែនទូទៅ កម្ពុជា-ថៃ (GBC) ដែលប្រព្រឹត្តទៅនៅប្រទេសម៉ាឡេស៊ី កាលពីថ្ងៃទី២៣ ខែតុលា ឆ្នាំ២០២៥ ។

ការកែសម្រួលអាវុធ និងយុទ្ធោបករណ៍បំផ្លិចបំផ្លាញធុនធ្ងន់ក្នុងដំណាក់កាលទី១របស់កម្ពុជា គឺបានប្រព្រឹត្តទៅនៅទីតាំងចំនួន២ រួមមាន ៖ នៅស្រុកជាំក្សាន្ត ខេត្តព្រះវិហារ និងស្រុករវៀង ខេត្តព្រះវិហារ ។ រីឯភាគីថៃក៏កែសម្រួលអាវុធ និងយុទ្ធោបករណ៍បំផ្លិចបំផ្លាញធុនធ្ងន់ក្នុងដំណាក់កាលទី១ ដែរ ៕