អាជីវកម្មថៃកំពុងជួបបញ្ហាធំហើយ! ប្រទេសចិនដែលជាអតិថិជននាំចេញផលិតផលស្ករដ៏ធំបំផុតរបស់ថៃ បានសម្រេចបិទឈប់ទទួលយកនិងផ្អាកការនាំចូលនូវរាល់ផលិតផលធ្វើពីសារធាតុស្ករទាំងអស់របស់ថៃ ក្រោយអគ្គរដ្ឋបាលគយចិន បានពិនិត្យឃើញទឹកសុីរ៉ូ និង ផលិតផលម្សៅផ្សេងៗទៀតរបស់ប្រទេសនេះ មិនមានសុវត្ថិភាពត្រឹមត្រូវតាមស្តង់ដាដែលបានកំណត់។ នេះបើតាមការចុះផ្សាយរបស់សារព័ត៌មាន បាងកកប៉ុស្តិ៍ នៅថ្ងៃទី៦ ខែវិច្ឆិកា ឆ្នាំ២០២៥។

យោងតាមរបាយការណ៍ក្នុងស្រុករបស់ថៃបានឲ្យដឹងថា ប្រទេសចិនបានប្រកាសផ្អាកការនាំចូលផលិតផលទឹកសុីរ៉ូ និងម្សៅលាយជាមុនពីប្រទេសថៃ ដែលជាប្រទេសនាំចេញស្ករធំជាងគេទីពីររបស់ពិភពលោក ក្នុងខែធ្នូ ដោយសារមន្ត្រីគយចិនបានរកឃើញថារោងចក្រថៃជាច្រើនមិនបានត្រួតពិនិត្យពាក់ព័ន្ធអនាម័យ សុខភាព និងសុវត្ថិភាព ឲ្យបានត្រឹមត្រូវតាមស្ដង់ដាឡើយ។

ការសម្រេចចិត្តនេះ បានធ្វើឲ្យប៉ះពាល់ដល់ម្ចាស់អាជីវកម្មរបស់ថៃភ្លាមៗ ដោយពួកគេប្រឈមនឹងការខាតបង់រហូតដល់ជាង ១ ពាន់លានបាត (២៩.៥ លានដុល្លារអាមេរិក) បន្ទាប់ពីការបិទមិនឲ្យនាំចូលរបស់ប្រទេសចិនទៅលើផលិតផលទាំងនេះ។

លោក Todsaporn Ruangpattanont ប្រធានសមាគមផលិតផលស្កររបស់ថៃ បាននិយាយថា លោកបានសរសេរលិខិតមួយទៅកាន់រដ្ឋាភិបាលថៃ ដើម្បីពន្លឿនការចរចាជាមួយអាជ្ញាធរចិន ដោយសារតែក្រុមហ៊ុនកំពុងបង់ប្រាក់ពិន័យជារៀងរាល់ថ្ងៃ ចាប់តាំងពីស្ករជាប់គាំងនៅក្នុងកំពង់ផែចិន។

គួរបញ្ជាក់ថា ប្រទេសថៃគឺជាប្រទេសផ្គត់ផ្គង់ស្កររាវ និងម្សៅល្បាយដែលមានជាតិស្ករធំជាងគេបង្អស់របស់ប្រទេសចិន ហើយការបាត់បង់សិទ្ធិចូលទៅកាន់ទីផ្សារចិនភ្លាមៗបែបនេះ បានបង្កឱ្យមានការខាតបង់តាមការប៉ាន់ស្មានថាអាចមានចំនួនរហូតរាប់សិបលានដុល្លារ និងផ្ដល់ហានិភ័យខ្ពស់នៃការបិទរោងចក្រផលិតជាច្រើន។

សម្រាប់ប្រទេសចិន ការហាមឃាត់នេះអាចឆ្លុះបញ្ចាំងពីចេតនាលើកស្ទួយអ្នកផលិតស្ករក្នុងស្រុករបស់ខ្លួន និងការរឹតបន្តឹងគុណភាពកាន់តែខ្លាំងឡើងលើទំនិញនាំចូល។ ផ្ទុយពីនេះសម្រាប់ប្រទេសថៃ និងអ្នកនាំចេញផ្សេងទៀត ការអនុវត្តវិធានការនេះ បានជំរុញឲ្យមានការលើកឡើងនូវសំណួរបន្ទាន់ជាច្រើន អំពីការធ្វើពិពិធកម្មទីផ្សារ និងការអនុលោមតាមស្តង់ដារនាំចេញ ដែលអាចឈានទៅដល់ការផ្លាស់ប្តូរខ្សែសង្វាក់ផ្គត់ផ្គង់ស្ករជាសកល និងប៉ះពាល់ដល់តម្លៃស្ករក្នុងតំបន់រយៈពេលវែង៕

ប្រទេសវៀតណាម ៖ តាមការចុះផ្សាយរបស់សារព័ត៌មានវៀតណាមកាលពីថ្ងៃទី៦ ខែវិច្ឆិកា ឆ្នាំ២០២៥ ខ្យល់ព្យុះទីហ្វុង Kalmaegi បានបោកបក់មកលើភាគកណ្តាល និងខាងត្បូងប្រទេសវៀតណាម ដែលធ្វើឱ្យប៉ះពាល់ដល់អាកាសយានដ្ឋានក្នុងស្រុកចំនួន៨កន្លែង និងប៉ះពាល់ជើងហោះហើររហូតដល់ជាង៥០ជើង ។ ក្រុមហ៊ុនអាកាសចរណ៍វៀតណាមបានផ្លាស់ប្តូរពេលវេលាហោះហើរដើម្បីសុវត្ថិភាពអ្នកដំណើរដោយសារភ្លៀងធ្លាក់ខ្លាំង ។

យោងតាមអាកាសចរណ៍ស៊ីវិលវៀតណាម អាកាសយានដ្ឋានទាំង៨កន្លែង រួមមាន ៖ អាកាសយានដ្ឋាន Da Nang, Phu Bai, Lien Khuong, Chu Lai, Phu Cat, Tuy Hoa, Pleiku និង អាកាសយានដ្ឋាន Buon Ma Thuot ។ អាកាសចរណ៍ស៊ីវិលវៀតណាមបានណែនាំឱ្យអាកាសយានដ្ឋាននានាបង្កើនការប្រុងប្រយ័ត្នរយៈពេល២៤ម៉ោង និងអនុវត្តតាមវិធានការទប់ទល់ខ្យល់ព្យុះយ៉ាងម៉ឺងម៉ាត់ ។

ក្រុមហ៊ុនអាកាសចរណ៍ Vietnam Airlines បានប្រកាសពីជើងហោះហើររបស់ខ្លួនដែលកំណត់ការហោះហើរចាប់ពីថ្ងៃទី៦ ដល់ថ្ងៃទី៧ ខែវិច្ឆិកា ឆ្នាំ២០២៥ ស្មើជាង៥០ជើងរងផលប៉ះពាល់ដោយសារខ្យល់ព្យុះទីហ្វុង Kalmaegi ហើយជើងហោះហើរទាំងនេះបានផ្លាស់ប្តូរពេលហោះហើរដើម្បីសុវត្ថិភាពអ្នកដំណើរ ។

ឥទ្ធិពលខ្យល់ព្យុះទីហ្វុង Kalmaegi កាលពីថ្ងៃទី៦ ខែវិច្ឆិកា ធ្វើឱ្យភាគកណ្តាលប្រទេសវៀតណាមមានភ្លៀងធ្លាក់យ៉ាងខ្លាំង ពលរដ្ឋវៀតណាមបានជម្លៀសចេញពីលំនៅឋានជិត៣សែននាក់ ក្រោយពីខ្យល់ព្យុះនេះទើបតែបោកបក់មកលើប្រទេសហ្វីលីពីនបណ្តាលឱ្យពលរដ្ឋហ្វីលីពីនបាត់បង់ជីវិតយ៉ាងហោចណាស់១៨៨នាក់ ។ ក្រៅពីប៉ះពាល់អាកាសយានដ្ឋាន និងជើងហោះហើរជាច្រើន ដើមឈើនៅតាមផ្លូវបានបាក់រលំ លនៅឋានខូចខាត និងដាច់ចរន្តអគ្គិសនី មុនពេលវាថមថយកម្លាំងវិញ ។

អាជ្ញាធរវៀតណាមបានជូនដំណឹងនឹងមានភ្លៀងធ្លាក់ខ្លាំងនៅបណ្តាខេត្តភាគកណ្តាលប្រទេស ព្រមទាំងមានទឹកជំនន់ប៉ះពាល់ដល់ផ្ទៃដីកសិកម្មនៅភាគកណ្តាលដែលជាតំបន់ដាំដំណាំកាហ្វេច្រើនបំផុត ។ នៅថ្ងៃទី៧ ខែវិច្ឆិកា ពលរដ្ឋវៀតណាមជាង២៦ម៉ឺននាក់នៅខេត្តសាឡាយ បានជម្លៀសទៅកាន់ទីទួលសុវត្ថិភាព ខណៈអាជ្ញាធរបញ្ជូនភ្នាក់ងារសង្គ្រោះជាង២៦ម៉ឺន៨ពាន់នាក់មកជួយអន្តរាគមន៍ ។

គួរបញ្ជាក់ថា Kalmaegi គឺជាខ្យល់ព្យុះទី១៣ ដែលបានបោកបក់មកលើប្រទេសវៀតណាម ចាប់ពីខែមករា ដល់ដើមខែវិច្ឆិកា ឆ្នាំ២០២៥ និងជាខ្យល់ព្យុះមួយក្នុងចំណោមខ្យល់ព្យុះមានកម្លាំងខ្លាំងបំផុត ។ ប៉ុន្តែគ្មានការបញ្ជាក់ច្បាស់លាស់ពីចំនួនពលរដ្ឋវៀតណាមស្លាប់ជាផ្លូវការដោយសារខ្យល់ព្យុះនេះទេ ៕

ប្រទេសថៃ៖ លោកនាយករដ្ឋមន្ត្រី អនុទីន ឆានវីរៈគុល បានបដិសេធមិនផ្ដល់បទសម្ភាសន៍ដល់អ្នកសារព័ត៌មាន ដែលលើកជាសំណួរពាក់ព័ន្ធការដោះលែងយោធាកម្ពុជាទាំង ១៨នាក់ ដោយលោកបង្ហាញត្រឹមជាសញ្ញាកាយវិការឆ្លើយតបដោយខ្លីថា លោកមិនមានពេលវេលាគ្រប់គ្រាន់។ នេះបើតាមការចុះផ្សាយរបស់សារព័ត៌មាន The Nation។

នៅវេលាថ្ងៃត្រង់ ថ្ងៃទី៧ ខែកក្កដា ឆ្នាំ២០២៥ អំឡុងពេលមកដល់អាកាសយានដ្ឋានដុនមឿង ដើម្បីធ្វើដំណើរទៅពិភាក្សាការងារនៅប្រទេសសិង្ហបុរី លោក អនុទីន ត្រូវបានអ្នកសារព័ត៌មានស្នើសុំឲ្យផ្ដល់បទសម្ភាសន៍ខ្លះៗទាក់ទងនឹងការពិភាក្សាដែលកំពុងបន្ត អំពីការដោះលែងយោធិនកម្ពុជាចំនួន ១៨ នាក់។

តាមរយៈការរាយការណ៍បានបង្ហាញថា លោក អនុទីន បាននៅតែបន្តដើរទៅមុខដោយមិននិយាយអ្វីទាំងអស់។ ទោះជាយ៉ាងណា លោកក៏បានឆ្លើយតបត្រឹមជាសញ្ញាកាយវិការដោយចង្អុលទៅនាឡិកាដៃរបស់លោក ដើម្បីជាការបង្ហាញថា លោកដល់ពេលត្រូវចាកចេញហើយ មិនអាចឆ្លើយតបទៅនឹងសំណួរណាមួយឡើយ។

សូមរំលឹកថា បើតាមបណ្ដាញសារព័ត៌មានថៃ កាលពីថ្ងៃព្រហស្បត្តិ៍ ទី៦ ខែវិច្ឆិការ បានចុះផ្សាយអំពីការសម្រេចចិត្តរបស់យោធាថៃថា នឹងមានការដោះលែងទាហានកម្ពុជា ដែលពួកគេបានចាប់ឃុំខ្លួនអស់រយៈពេល ១០០ថ្ងៃ នៅថ្ងៃទី១២ ខែវិច្ឆិកា ខាងមុខ ប៉ុន្តែមិនយូរប៉ុន្មាននៅល្ងាចថ្ងៃដដែល ស្រាប់តែអ្នកនាំពាក្យកងទ័ពភូមិន្ទថៃបានចេញមកកែប្រែសេចក្ដីថ្លែងការណ៍វិញថា ការធ្វើមាតុភូមិនិវត្តន៍របស់ទាហានខ្មែរទាំង ១៨នាក់ នៅតែស្ថិតនៅក្រោមការពិចារណារបស់ថៃនៅឡើយ ដោយមិនអាចកំណត់ពេលច្បាស់លាស់បាននោះទេ ព្រោះថៃត្រូវរង់ចាំមើលការអនុវត្តរបស់កម្ពុជាលើលក្ខខណ្ឌធំៗចំនួន ២ចំណុចដែលរួមមាន ដកអាវុធធុនធ្ងន់ និងប្រតិបត្តិការបោសសម្អាតមីនឲ្យបានជាមុនសិន។

ការណ៍នេះ បានធ្វើឲ្យកម្ពុជាមានការខកចិត្តជាខ្លាំង ព្រោះបន្ទាប់ពីសេចក្ដីប្រកាសរបស់ថៃ ពលរដ្ឋកម្ពុជាទាំងអស់មានក្ដីរំពឹងថានឹងមានការដោះលែងវរកងទ័ពទាំង ១៨នាក់មកវិញឆាប់ៗយ៉ាងពិតប្រាកដ។ បើតាមការកត់សម្គាល់របស់អ្នកនាំពាក្យរាជរដ្ឋាភិបាលកម្ពុជា សកម្មភាពរបស់ភាគីថៃ គឺជាការមិនគោរពដល់ខ្លឹមសារនៃសេចក្តីថ្លែងការណ៍រួម ដោយអស់រយៈពេល ១០ថ្ងៃជាងមកហើយ ភាគីថៃនៅតែមិនទាន់បានដោះលែងយោធិនកម្ពុជា ១៨រូប ទៅតាមស្មារតីនៃសេចក្តីថ្លែងការណ៍រួម ដែលរំពឹងថានឹង ត្រូវបានដោះលែងភ្លាមៗ ស្របតាមស្មារតីនៃការអនុវត្តតាមកាតព្វកិច្ចនៃច្បាប់មនុស្សធម៌អន្តរជាតិ។

កត្តាទាំងអស់នេះហើយ បានជំរុញឲ្យមានការជជែកដេញដោលពីការប្ដេជ្ញាចិត្ត និងភាពស្មោះត្រង់របស់ថៃ ចំពោះកិច្ចព្រមព្រៀងសន្តិភាពដែលបានចុះហត្ថលេខានៅម៉ាឡេសុី។ ភាពមិនប្រាកដប្រជានេះ ក៏បានក្លាយជាប្រធានបទសំខាន់សម្រាប់អ្នកយកព័ត៌មាននៅក្នុងប្រទេសថៃសួរនាំទៅកាន់ថ្នាក់ដឹកនាំរបស់ខ្លួនផងដែរ ប៉ុន្តែអ្វីដែលពួកគេទទួលបានមកវិញ គឺត្រឹមការបដិសេធមិនធ្វើការឆ្លើយតបតែប៉ុណ្ណោះ៕

ទីក្រុងវ៉ាសុីនតោន៖ សហរដ្ឋអាមេរិកនៅថ្ងៃព្រហស្បតិ៍នេះបានលុបចោលបម្រាមលក់អាវុ.ធការពារជាតិជាមួយកម្ពុជាជាផ្លូវការ ដែលបានន័យថា កម្ពុជាមានសិទ្ធិគ្រប់គ្រាន់ក្នុងការស្នើទិញសព្វាវុ.ធ ឬឧបករណ៍យោធានានាពីសហរដ្ឋអាមេរិកសម្រាប់ការពារជាតិ ទៅតាមតម្រូវការនៃករណីនីមួយៗ។ នេះបើតាមការចុះផ្សាយរបស់ទីភ្នាក់ងារ Reuters ។

បន្ទាប់ពីកិច្ចព្រមព្រៀងឈប់បាញ់រវាងកម្ពុជា និងថៃ ត្រូវបានសម្របសម្រួលដោយប្រធានាធិបតីអាមេរិក ដូណាល់ ត្រាំ ឲ្យធ្វើឡើងដោយជោគជ័យនៅទីក្រុងគូឡាឡាំពួ ប្រទេសម៉ាឡេសុី កាលពីចុងខែតុលាកន្លងទៅ មេដឹកនាំកម្ពុជា និងសហរដ្ឋអាមេរិក ក៏បានពិភាក្សាគ្នាលើចំណុចមួយចំនួនរហូតឈានដល់ការឯកភាពគ្នាទៅវិញទៅមក។ ក្នុងនោះ ទីក្រុងវ៉ាសុីនតោន បានសម្រេចលុបចោលការហាមឃាត់លក់អាវុធរបស់ខ្លួនលើប្រទេសកម្ពុជា ក្រោយដាក់ចេញនូវបម្រាមនេះអស់រយៈពេល ៤ឆ្នាំមកហើយ។

ការប្តេជ្ញាចិត្តរបស់សហរដ្ឋអាមេរិកបែបនេះ បានកើតឡើងបន្ទាប់ពីរដ្ឋមន្ត្រីនៃអគ្គនាយកដ្ឋានសង្រ្គាមរបស់អាមេរិក លោក Pete Hegseth បានជួបពិភាក្សាការងារជាមួយរដ្ឋមន្ត្រីក្រសួងការពារជាតិកម្ពុជា លោក ទៀ សីហា នៅប្រទេសម៉ាឡេស៊ីកាលពីថ្ងៃសុក្រមុន ហើយភាគីទាំងពីរក៏បានយល់ព្រមចាប់ផ្តើម«សមយុទ្ធយោធាទ្វេភាគី»ដ៏សំខាន់រួមគ្នាឡើងវិញក្នុងពេលឆាប់ផងដែរ។

ការដកចេញនូវបម្រាម ហាមឃា.ត់ការលក់សព្វាវុធរបស់អាមេរិក មកលើប្រទេសកម្ពុជាដូចខាងលើនេះ គឺជាសម្រេចចិត្តក្រោមគោលនយោបាយថ្មីរបស់អាមេរិក ដោយលោក Marco Rubio គូសបញ្ជាក់ថា ការលើកលែងនេះ គឺផ្អែកលើការស្វែងរកសន្តិភាព និងការខិតខំរបស់ប្រទេសកម្ពុជា រួមទាំងតាមរយៈការចូលរួមឡើងវិញជាមួយសហរដ្ឋអាម៉េរិកលើកិច្ចសហប្រតិបត្តិការការពារជាតិ និងប្រយុទ្ធប្រឆាំងនឹងឧក្រិដ្ឋកម្មឆ្លងដែន ហើយការលក់សព្វាវុធនឹងត្រូវបានអនុញ្ញាតលើមូលដ្ឋានករណីនីមួយៗផ្សេងៗគ្នា។

គួរជម្រាបថា ការដាក់សម្ពាធលើកម្ពុជាតាមរយៈការបិទបាំងមិនលក់សព្វាវុ.ធមកឲ្យប្រទេសកម្ពុជារបស់សហរដ្ឋអាមេរិក ត្រូវបានបានដាក់ចេញកាលពីឆ្នាំ ២០២១ ក្រោមរដ្ឋបាលលោក Joe Biden ដែលកាលនោះបានលើកឡើងពីបញ្ហាសិទ្ធិមនុស្ស អំពើពុករលួយ និងឥទ្ធិពលរបស់យោធាចិននៅកម្ពុជា។

យ៉ាងណាក៏ដោយ អ្នកវិភាគជាច្រើនបានយល់ឃើញថា ការលើកលែងបម្រាមនេះ នឹងផ្តល់ឱកាសឱ្យប្រទេសកម្ពុជាធ្វើពិពិធកម្មភាពជាដៃគូការពារជាតិរបស់ខ្លួនកាន់តែសកម្ម និងកសាងទំនុកចិត្តឡើងវិញជាមួយសហរដ្ឋអាមេរិក៕

ប្រទេសថៃ ៖ កាលពីថ្ងៃទី៦ ខែវិច្ឆិកា ឆ្នាំ២០២៥ កងទ័ពថៃបានប្រកាសដោះលែងកងទ័ពកម្ពុជាទាំង១៨រូបនៅថ្ងៃទី១២ ខែវិច្ឆិកា ខាងមុខ ប៉ុន្តែប៉ុន្មានម៉ោងបន្ទាប់ ស្រាប់តែអ្នកនាំពាក្យកងទ័ពថៃបែរជាកែប្រែពាក្យសម្តីវិញថា ការដោះលែងស្ថិតក្រោមការពិចារណានៅឡើយ ដោយថៃរង់ចាំកម្ពុជាអនុវត្តលក្ខខណ្ឌ២ចំណុចឱ្យបានជាមុនសិន រួមមាន ៖ ការដកអាវុ.ធធុនធ្ងន់ និងគ្មានការរារាំងការដោះមីនតាមព្រំដែន ។ តាមប្រភពពីមន្ត្រីជាន់ខ្ពស់ក្រសួងការពារជាតិថៃ មូលហេតុដែលថៃបម្រុងដោះលែងកងទ័ពកម្ពុជាទាំងអស់ ដោយសារអាមេរិកយកអត្រាពន្ធទំនិញមកដាក់សម្ពាធ ។

យោងតាមប្រភពពីមន្ត្រីជាន់ខ្ពស់ក្រសួងការពារជាតិថៃ គឺមន្ត្រីអាមេរិកបានដាក់សម្ពាធថៃយ៉ាងខ្លាំងឱ្យយល់ព្រមដោះលែងកងទ័ពកម្ពុជាទាំង១៨រូបត្រឡប់មកប្រទេសវិញ ដោយមន្ត្រីអាមេរិកយកអត្រាពន្ធទំនិញថៃដែលនាំចូលអាមេរិកមកដាក់សម្ពាធម្តងហើយម្តងទៀត ។

ក្រោយពីសារព័ត៌មាននានារបស់ថៃចុះផ្សាយកាលពីថ្ងៃទី៦ ខែវិច្ឆិកា ថា កងទ័ពថៃបានទំនាក់ទំនងទៅកាន់កងកម្លាំងការពារព្រំដែនខេត្តចន្ទបុរី និងខេត្តត្រាត ឱ្យត្រៀមទីកន្លែងស្នាក់នៅសម្រាប់កងទ័ពកម្ពុជាទាំង១៨រូប ដែលត្រៀមដោះលែងនៅច្រកព្រំដែនបានផាកកាត ស្រុកប៉ូងណាមរ៉ន ខេត្តចន្ទបុរី (ទល់មុខខេត្តប៉ៃលិន) នៅថ្ងៃទី១២ ខែវិច្ឆិកា សារព័ត៌មាន PPTV ក៏បានសួរនាំមន្ត្រីជាន់ខ្ពស់ក្រសួងការពារជាតិថៃ និងទទួលបានចម្លើយថា ជាព័ត៌មានពិត ។

មន្ត្រីជាន់ខ្ពស់ក្រសួងការពារជាតិថៃបញ្ជាក់ថា មូលហេតុដែលថៃយល់ព្រមដោះលែងកងទ័ពកម្ពុជាទាំង១៨រូប ដោយសារអាមេរិកយកអត្រាពន្ធទំនិញមកដាក់សម្ពាធថៃយ៉ាងខ្លាំង ទើបថៃយល់ព្រមដោះលែងកងទ័ពកម្ពុជាដើម្បីកុំឱ្យផលប៉ះពាល់ដោយសារអត្រាពន្ធទំនិញធ្លាក់មកលើពលរដ្ឋ និងប្រទេសថៃ ។ ម្យ៉ាងទៀត ការឃុំខ្លួនកងទ័ពកម្ពុជារយៈពេលយូរអាចមានបញ្ហារឿងអនុសញ្ញា ឬប៉ះពាល់ច្បាប់អន្តរជាតិ ។

មូលហេតុមួយទៀតដែលថៃយល់ព្រមដោះលែង ដោយសារកម្ពុជាបានអនុវត្តតាមលក្ខខណ្ឌ៤ចំណុចរបស់ថៃ រួមមាន ៖ ១-ការដកអាវុធធុនធ្ងន់ ២-ដោះមីន ៣-បង្ក្រាបឧក្រិដ្ឋកម្មឆ្លងដែន និងការឆបោកអនឡាញ និង៤-ដោះស្រាយបញ្ហានៅតំបន់ព្រំដែនខេត្តស្រះកែវ ។ ហេតុនេះ ថៃក៏យល់ព្រមដោះលែងកងទ័ពកម្ពុជាទាំង១៨រូប ចាប់ពីថ្ងៃទី១១ ដល់ថ្ងៃទី១២ ខែវិច្ឆិកា នេះ ។ រីឯការបើកព្រំដែនឡើងវិញ គឺថៃនឹងពុំបើកព្រំដែននាពេលនេះទេ ។

គួរបញ្ជាក់ថា បើទោះជាមានការដាក់សម្ពាធពីអាមេរិកឱ្យថៃដោះលែងកងទ័ពកម្ពុជាទាំង១៨រូបក្តី ប៉ុន្តែអ្នកនាំពាក្យកងទ័ពថៃបែរជាកែប្រែពាក្យសម្តីវិញថា ការដោះលែងស្ថិតក្រោមការពិចារណានៅឡើយ ដោយថៃរង់ចាំកម្ពុជាអនុវត្តលក្ខខណ្ឌចំនួន២ចំណុចឱ្យបានជាមុនសិន រួមមាន ៖ ការដកអាវុ.ធធុនធ្ងន់ និងគ្មានការរារាំងការដោះមីនតាមព្រំដែន ។

ក្នុងពិធីចុះហត្ថលេខាលើកិច្ចព្រមព្រៀងសន្តិភាពនៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី២៦ ខែតុលា កន្លងមក ប្រធានាធិបតីអាមេរិក លោក Donald Trump ប្រកាសថា កិច្ចព្រមព្រៀងប្រវត្តិសាស្ត្រនេះនឹងឈានដល់ការដោះលែងកងទ័ពកម្ពុជាទាំង១៨រូបភ្លាមៗដើម្បីបញ្ជាក់ពីគោលជំហរសន្តិភាព ។

គិតត្រឹមថ្ងៃទី៧ ខែវិច្ឆិកា ឆ្នាំ២០២៥ វីរកងទ័ពកម្ពុជាចំនួន១៨រូបដែលត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់កងទ័ពថៃមានរយៈពេល ១០១ថ្ងៃហើយ ។ កម្ពុជាសូមអំពាវនាវឱ្យភាគីថៃដោះលែងពួកគាត់ត្រឡប់មកវិញឱ្យបានឆាប់រហ័សជាទីបំផុត ដើម្បីឱ្យពួកគាត់អាចវិលត្រឡប់មកជួបជុំក្រុមគ្រួសារប្រកបដោយសុខសុវត្ថិភាព ស្របតាមច្បាប់មនុស្សធម៌អន្តរជាតិ ៕