ប្រទេសថៃ ៖ នាយករដ្ឋមន្ត្រីថៃ លោក Anutin Charnvirakul បានរងការស្តីបន្ទោសពីប្រធានគណបក្សប្រជាជន ឬគណបក្សប្រឆាំងកាលពីថ្ងៃទី១៤ ខែវិច្ឆិកា ឆ្នាំ២០២៥ ក្រោយសម្រេចចិត្តផ្អាកកិច្ចព្រមព្រៀងសន្តិភាពជាមួយកម្ពុជាជាឯកតោភាគី ដោយចោទប្រកាន់កម្ពុជាបង្កប់មីនថ្មីធ្វើឱ្យកងទ័ពថៃរងរបួស៣នាក់ និងដាច់ជើងស្តាំម្នាក់នៅតំបន់ព្រំដែនខេត្តស៊ីសាកេត ។ ប្រធានគណបក្សប្រឆាំងថា ថៃមិនគោរពកិច្ចព្រមព្រៀងសន្តិភាព គឺចាញ់ប្រៀបកម្ពុជាយ៉ាងខ្លាំង ពីព្រោះនាយករដ្ឋមន្ត្រីថៃគិតតែរឿងជាតិនិយមជ្រុលចង់ឱ្យពលរដ្ឋគាំទ្របន្តតំណែងនាយករដ្ឋមន្ត្រីនៅឆ្នាំ២០២៦ ។

តាមការចុះផ្សាយរបស់សារព័ត៌មាន The Better កាលពីថ្ងៃទី១៤ ខែវិច្ឆិកា ឆ្នាំ២០២៥ លោក Natthaphong Ruengpanyawut ប្រធានគណបក្សប្រជាជន ឬគណបក្សប្រឆាំងនៅប្រទេសថៃ បានរិះគន់លោកនាយករដ្ឋមន្ត្រី Anutin ក្រោយពីថៃប្រឌិតរឿងកម្ពុជាបង្កប់មីនថ្មីនៅព្រំដែនខេត្តស៊ីសាកេត ធ្វើឱ្យកងទ័ពថៃរងរបួស៣នាក់ និងដាច់ជើងស្តាំម្នាក់ ថាហេតុការណ៍នេះធ្វើឱ្យថៃប្រកាសផ្អាកកិច្ចព្រមព្រៀងសន្តិភាពជាឯកតោគី និងចាញ់ប្រៀបកម្ពុជាយ៉ាងខ្លាំងនៅលើពិភពលោក ។

ប្រធានគណបក្សប្រឆាំង លោក Natthaphong បានបង្ហាញការសោកស្តាយចំពោះកងទ័ពថៃដែលរងរបួសដោយសារការផ្ទុះមីនកាលពីថ្ងៃទី១០ ខែវិច្ឆិកា ព្រមទាំងចោទប្រកាន់កម្ពុជាបង្កប់មីនថ្មីធ្វើឱ្យថៃពុំអាចទទួលយកបាន ប៉ុន្តែលោករិះគន់នាយករដ្ឋមន្ត្រីថៃធ្វើឱ្យប្រទេសថៃបាត់បង់ឱកាសទាក់ទាញប្រទេសនានាឱ្យដាក់សម្ពាធកម្ពុជា ។ លោកថា ហេតុការណ៍ផ្ទុះមីនលើកចុងក្រោយ នាយករដ្ឋមន្ត្រីថៃគួរចាត់ការដោយមានហេតុផល និងអនុវត្តការទូត ដូចជា ៖ រាយការណ៍ទៅអាមេរិក និងម៉ាឡេស៊ី ក្នុងឋានៈប្រទេសទាំងពីរជាសាក្សីក្នុងពិធីចុះហត្ថលេខាលើកិច្ចព្រមព្រៀងសន្តិភាពកម្ពុជា-ថៃ នៅទីក្រុងគូឡាឡាំពួរ ។

លោក Natthaphong ពុំគាំទ្រឱ្យនាយករដ្ឋមន្ត្រីថៃផ្អាកកិច្ចព្រមព្រៀងសន្តិភាពជាមួយកម្ពុជាទេ ពីព្រោះធ្វើឱ្យប្រទេសនានាបន្ទោស និងសួរមកកាន់ថៃ ហេតុអ្វីផ្អាកកិច្ចព្រមព្រៀងសន្តិភាព? ប្រធានគណបក្សប្រឆាំងបានសួរសំណួរទៅកាន់នាយករដ្ឋមន្ត្រីថៃថា តើកំពុងយករឿងជាតិនិយមជ្រុលដើម្បីឱ្យពលរដ្ឋបោះឆ្នោតគាំទ្របន្តតំណែងជានាយករដ្ឋមន្ត្រី មែនទេ?

ទន្ទឹមនឹងនេះ ប្រធានគណបក្សប្រឆាំងបានកំណត់វិធានការបន្ទាន់ទៅកាន់នាយករដ្ឋមន្ត្រីថៃក្នុងស្ថានការណ៍នេះ គឺជជែកផ្ទាល់ជាមួយប្រធានាធិបតីអាមេរិក លោក Donald Trump និងមេដឹកនាំចិន ដើម្បីឱ្យប្រទេសមហាអំណាចទាំង២ឈប់គាំទ្រកម្ពុជា ។ បច្ចុប្បន្ន ប្រទេសថៃកំពុងធ្វើសង្គ្រាមព័ត៌មាន និងត្រូវការនាយករដ្ឋមន្ត្រីចេះគិតពិចារណាវែងឆ្ងាយ ដោយមិនត្រូវការនាយករដ្ឋមន្ត្រីប្រើប្រាស់កងទ័ពជាលេសដើម្បីចៀសវាងការទទួលខុសត្រូវនោះទេ ។

ការបណ្តោយឱ្យកងទ័ពសម្រេចចិត្តជំនួសនាយករដ្ឋមន្ត្រី គ្មានលទ្ធផលឡើយ វាអាចបំផ្លាញទាំងសន្តិភាព និងស្ថិរភាពក្នុងប្រទេស ។ ប្រសិនបើមានការប៉ះទង្គិចដោយអាវុធម្តងទៀតនឹងធ្វើឱ្យកិច្ចព្រមព្រៀងសន្តិភាពកម្ពុជា-ថៃត្រូវលុបចោលជារៀងរហូត ហើយថៃនឹងទទួលបានលទ្ធផលមិននឹកស្មានដល់ ហេតុនេះ ប្រធានគណបក្សប្រឆាំងបានអំពាវនាវឱ្យនាយករដ្ឋមន្ត្រីថៃងាកមកប្រកាន់យកគោលការណ៍អន្តរជាតិ បោះបង់គំនិតជាតិនិយមជ្រុល និងអនុវត្តការទូតដាក់សម្ពាធឱ្យកម្ពុជាចរចាឆ្ពោះទៅរកសន្តិភាពយូរអង្វែង ។

គួរបញ្ជាក់ថា លោកនាយករដ្ឋមន្ត្រី Anutin ធ្លាប់រងការរិះគន់យ៉ាងខ្លាំងពីសង្គមថៃ ក្រោយពីថា ពលរដ្ឋថៃល្មើសអធិបតេយ្យកម្ពុជានៅតំបន់ព្រំដែនខេត្តស្រះកែវ និងសំណូមពរឱ្យពលរដ្ឋថៃចាកចេញពីទឹកដីកម្ពុជា រដ្ឋាភិបាលថៃនឹងស្វែងរកទីលំនៅថ្មីឱ្យរស់នៅ ។ ពលរដ្ឋថៃខឹងសម្បារនាយករដ្ឋមន្ត្រីរបស់ខ្លួន និងគំរាមធ្វើបាតុកម្មទម្លាក់ពីតំណែង ឬបណ្តេញចេញពីប្រទេសថៃ បើហ៊ាននិយាយការពិត ឬបើកព្រំដែនឡើងវិញ ក្រោយមក លោកនាយករដ្ឋមន្ត្រី Anutin ក៏បានសុំទោស និងសន្យាគាំទ្រពលរដ្ឋ ។ ការផ្អាកកិច្ចព្រមព្រៀងសន្តិភាព គឺនាយករដ្ឋមន្ត្រីថៃមានបំណងឱ្យពលរដ្ឋបោះឆ្នោតគាំទ្រដើម្បីបន្តតំណែងនៅឆ្នាំ២០២៦ និងព្យាយាមបង្ហាញគំនិតជាតិនិយម ខ្លាំងជាងផលប្រយោជន៍ប្រទេស ៕

វ៉ាសុីនតោន៖ ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃសុក្រថា ស្ថានភាពរបស់កម្ពុជា និងថៃ «នឹងល្អប្រសើរឡើងវិញ» បន្ទាប់ពីបានជួបសន្ទនាតាមទូរស័ព្ទជាមួយមេដឹកនាំនៃប្រទេសទាំងពីរ ដើម្បីជួយសម្របសម្រួលការស្ថានការណ៍តានតឹងដែលទើបផ្ទុះឡើងម្ដងទៀតនាពេលថ្មីៗនេះ។ នេះបើតាមការចុះផ្សាយរបស់កាសែត Reuters។

នៅថ្ងៃទី១៤ ខែវិច្ឆិកា ឆ្នាំ២០២៥ លោក ដូណាល់ត្រាំ បានថ្លែងប្រាប់ទីភ្នាក់ងារ Reuters បន្ទាប់ពីបានជួបពីភាក្សាតាមទូរស័ព្ទជាមួយនាយករដ្ឋមន្រ្តីកម្ពុជា និង ថៃ រួចថា លោកបានជជែកជាមួយនាយករដ្ឋមន្ត្រីនៃប្រទេសទាំង២ ហើយពួកគេកំពុងធ្វើបានល្អណាស់។ ខ្ញុំគិតថាពួកគេនឹងមានភាពល្អប្រសើរនឹងគ្នាឡើងវិញ»។

នៅក្នុងសេចក្ដីថ្លែងការណ៍មួយរបស់សេតវិមាន កាលពីថ្ងៃសុក្រក៏បានឱ្យដឹងផងដែរថាថា «លោកប្រធានាធិបតី ត្រាំ បានបើកកិច្ចពិភាក្សាតាមទូរស័ព្ទជាមួយភាគីកម្ពុជា និងថៃ ក្នុងកិច្ចប្រឹងប្រែងដើម្បី សម្របសម្រួលជម្លោះដែលបានផ្ទុះឡើងថ្មីៗនេះ»។ សេតវិមានបន្ថែមថាលោក ត្រាំក៏បានបើកកិច្ចសន្ទនាតាមទូរស័ព្ទជាមួយម៉ាឡេស៊ីផងដែរ។

បើតាមសេចក្ដីរាយការណ៍របស់ Reuters ដដែលបានគូសបញ្ជាក់ថា ប្រទេសថៃបានផ្អាកកិច្ចព្រមព្រៀងសន្តិភាពដែលសម្របសម្រួលដោយសហរដ្ឋអាមេរិក ហើយទាមទារឱ្យមានការសុំទោសពីកម្ពុជា ដោយចោទប្រកាន់ថាបានដាក់មីនថ្មី ខណៈកម្ពុជាបានបដិសេធយ៉ាងដាច់អហង្ការ។

ទន្ទឹមនឹងនេះ សម្ដេចធិបតី ហ៊ុន ម៉ាណែត ក៏បានបញ្ជាក់ទៅកាន់លោក ដូណាល់ ត្រាំ ក្នុងអំឡុងពេលសន្ទនាតាមទូរស័ព្ទជាមួយគ្នាដែរថា រាជរដ្ឋាភិបាលកម្ពុជា នឹងប្រកាន់ខ្ជាប់យ៉ាងម៉ឺងម៉ាត់បំផុតក្នុងការបន្តអនុវត្តតាមស្មារតីសេចក្ដីថ្លែងការណ៍រួមទីក្រុងគូឡាឡាំពួ និងសង្ឃឹមថាភាគីទាំងពីរ នឹងបន្តធ្វើការជាមួយគ្នាស្របតាមគោលការណ៍ និងយន្តការទ្វេភាគីដែលបានឯកភាពគ្នា។ កម្ពុជានឹងបន្តរក្សាជំហរក្នុងការដោះស្រាយបញ្ហាព្រំដែនដោយសន្តិវិធី ដោយអនុលោមតាមគោលការណ៍ និងយន្តការ ដែលបានឯកភាពគ្នាកន្លងមក ដេីម្បីដោះស្រាយបញ្ហាព្រំដែនកម្ពុជា-ថៃ និងកសាងសន្តិភាពយូរអង្វែងរវាងប្រទេសទាំងពីរ៕

ថៃតែងតែប្រើល្បិចទម្លាក់កំហុស លាបពណ៌ និងយកគ្រាប់មីនមកចោទប្រកាន់កម្ពុជាមិនឈប់ឈរតាំងពីមុនពេល និងក្រោយពេលចុះហត្ថលេខាលើកិច្ចព្រមព្រៀងសន្តិភាពនៅទីក្រុងគូឡាឡាំពួរ ប្រទេសម៉ាឡេស៊ី ដើម្បីឱ្យពិភពលោកដាក់សម្ពាធលើកម្ពុជា ។ ល្បិចចាស់ដដែលៗនេះត្រូវបានថៃប្រើប្រាស់រហូតមក ជាពិសេស ពេលស្ថានការណ៍ព្រំដែនស្ងប់ស្ងាត់ ថៃក៏ប្រឌិតរឿងមីនមកចោទប្រកាន់កម្ពុជាជាថ្មីធ្វើឱ្យស្ថានការណ៍តានតឹងឡើងវិញ ។

កាលពីថ្ងៃទី១៤ ខែវិច្ឆិកា ឆ្នាំ២០២៥ កងទ័ពថៃបានបន្តចោទប្រកាន់ថា កម្ពុជាបង្កប់មីនថ្មីប្រភេទ PMN-2 នៅតំបន់ច្រកអានសេះ ក្នុងគោលបំណងឱ្យកងទ័ពថៃរងរបួសពេលយាមល្បាតនៅតំបន់ព្រំដែន ដែលថៃចាត់ទុកជាការល្មើសអនុសញ្ញាអូតាវ៉ា ។ ការចោទប្រកាន់លើកចុងក្រោយនេះ គឺក្រោយពីកងទ័ពថៃចោទប្រកាន់កម្ពុជាបង្កប់មីនថ្មីនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត បណ្តាលឱ្យកងទ័ពថៃជាន់មីនរងរបួសកាលពីថ្ងៃទី១០ ខែវិច្ឆិកា ឆ្នាំ២០២៥ និងយកគ្រាប់មីនមកធ្វើជាលេសផ្អាកកិច្ចព្រមព្រៀងសន្តិភាពជាមួយកម្ពុជាជាឯកតោភាគី ។

តាមការចុះផ្សាយរបស់សារព័ត៌មាន Khaosod កាលពីថ្ងៃទី១៤ ខែវិច្ឆិកា អ្នកនាំពាក្យកងទ័ពជើងគោកថៃ លោក Winthai Suvaree និយាយថា កងទ័ពថៃបានរកឃើញមីនថ្មីនៅតំបន់ព្រំដែនកម្ពុជា-ថៃជាបន្តបន្ទាប់ និងចោទប្រកាន់កម្ពុជាបង្កប់មីនថ្មី ។ លោកបញ្ជាក់ថា នៅថ្ងៃទី១៤ ខែវិច្ឆិកា កងទ័ពថៃរកឃើញមីនចំនួន២គ្រាប់ នៅតំបន់ភ្នំ៦៧៧ ច្រកអានសេះ ស្ថិតក្នុងឃុំសូង ស្រុកណាមយឺន ខេត្តឧប៊ុនរ៉ាជធានី បើតាមការត្រួតពិនិត្យរបស់ភ្នាក់ងាររាវមីន គឺវាជាមីនប្រឆាំងបុគ្គល ប្រភេទ PMN-2 ទើបបង្កប់ថ្មី ។ ដូច្នេះ ខាងថៃក៏បានដោះមីនទាំងនេះ និងប្រមូលភស្តុតាងរាយការណ៍ប្រាប់ក្រុមអ្នកសង្កេតការណ៍អាស៊ាន (AOT) ។

អ្នកនាំពាក្យកងទ័ពជើងគោកថៃ លោក Winthai បន្តថា មីនដែលកងទ័ពថៃរកឃើញទាំង២គ្រាប់ត្រូវបានបង្កប់ឆ្ងាយពីគ្នាប្រមាណ៥០ម៉ែត្រ និងសន្និដ្ឋានថា កងទ័ពកម្ពុជាបង្កប់ដើម្បីឱ្យកងទ័ពថៃដើរជាន់រងរបួសពេលយាមល្បាតនៅព្រំដែន ។ លោកបានចោទប្រកាន់កម្ពុជាល្មើសអធិបតេយ្យថៃ និងមានចេតនាធ្វើបាបកងទ័ពថៃ ដែលថៃចាត់ទុកជាការល្មើសអនុញ្ញាអូតាវ៉ាហាមប្រើប្រាស់មីនប្រឆាំងមនុស្ស ។ ហេតុនេះ ថៃនឹងបោសសម្អាតមីនក្នុងទឹកដីរបស់ខ្លួនបន្តទៀតដើម្បីផ្តល់សុវត្ថិភាពដល់កងទ័ព និងពលរដ្ឋ ។

គួរបញ្ជាក់ថា កងទ័ពថៃតែងតែចោទប្រកាន់កម្ពុជាបង្កប់មីនលើទឹកដីរបស់ខ្លួន និងយកលេសគ្រាប់មីនបើកឆាកសង្គ្រាមបាញ់ប្រហារមុនមកលើកម្ពុជារយៈពេល៥ថ្ងៃ ចាប់ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥ ។ ថ្មីៗនេះ កងទ័ពថៃក៏បានចោទប្រកាន់កម្ពុជាតាមទម្លាប់ថា បង្កប់មីនថ្មីនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត បណ្តាលឱ្យកងទ័ពខ្លួនរងរបួស៣នាក់ និងបាក់ជើងស្តាំម្នាក់ រួចហើយថៃក៏ផ្អាកកិច្ចព្រមព្រៀងសន្តិភាពភ្លាមៗ និងបញ្ជូនកម្លាំងទ័ព អាវុធ និងរថគ្រោះជាច្រើនគ្រឿងមកតំបន់ព្រំដែន ។

ទោះជាក្រសួងការពារជាតិកម្ពុជាបញ្ជាក់ម្តងហើយម្តងទៀតថា វាជាមីនចាស់បន្សល់ទុកពីសង្គ្រាមស៊ីវិលរបស់កម្ពុជា និងបដិសេធការចោទប្រកាន់របស់ភាគីថៃមកលើកម្ពុជា ពីព្រោះតាំងពីក្លាយជារដ្ឋភាគីនៃអនុសញ្ញាអូតាវ៉ា កម្ពុជាប្រកាន់ខ្ជាប់នូវគោលការណ៍ និងកាតព្វកិច្ចរបស់ខ្លួននៅក្រោមច្បាប់អន្តរជាតិ ដោយមិនដែលដាក់មីនថ្មីគំរាមកំហែងដល់សន្តិសុខ និងសុវត្ថិភាពរបស់មនុស្សជាតិឡើយ ប៉ុន្តែថៃនៅតែមិនស្តាប់ និងបន្តលាបពណ៌កម្ពុជាមិនឈប់ឈរ ។

កន្លងមក រាជរដ្ឋាភិបាលកម្ពុជាធ្លាប់បានបញ្ជាក់ជាច្រើនលើកថា ប្រទេសកម្ពុជាក្នុងនាមជារដ្ឋភាគីនៃអនុសញ្ញាអូតាវ៉ា ស្ដីពីការហាមឃាត់ការប្រើប្រាស់មីនប្រឆាំងមនុស្ស បានព្យាយាមបោសសម្អាត និងកម្ទេចចោលនូវសំណល់ជាតិផ្ទុះរាប់លានគ្រាប់មកហើយ ។ ជាមួយគ្នានេះ រាជរដ្ឋាភិបាលកម្ពុជាបានប្ដេជ្ញាចិត្តយ៉ាងមុតមាំ គោរពតាមច្បាប់មនុស្សធម៌អន្តរជាតិ ដោយមិនប្រើប្រាស់មីនថ្មីជាដាច់ខាត ៕

យោងតាមហ្វេសប៊ុកផេករបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបង្ហោះសារនៅថ្ងៃទី១៥ ខែវិច្ឆិកា ឆ្នាំ២០២៥ ថា កាលពីយប់ថ្ងៃទី១៤ ខែវិច្ឆិកា សម្តេចបានជួបពិភាក្សាតាមទូរស័ព្ទជាមួយលោក Donald Trump ប្រធានាធិបតីអាមេរិក ដើម្បីពិភាក្សាអំពីការវិវត្តសភាពការណ៍តាមបណ្តោយព្រំដែនកម្ពុជា-ថៃ ក្នុងគោលបំណងបន្តជំរុញការអនុវត្តកិច្ចព្រមព្រៀងសន្តិភាពរវាងកម្ពុជា និងថៃ ។

តាងនាមពលរដ្ឋកម្ពុជា សម្តេចបានថ្លែងអំណរគុណលោកប្រធានាធិបតី Trump ដែលបានផ្តួចផ្តើមនិងសម្របសម្រួលឱ្យមានបទឈប់បាញ់រវាងកម្ពុជា-ថៃកន្លងមក និងសម្រេចបាននូវសេចក្ដីថ្លែងការណ៍រួមទីក្រុងគូឡាឡាំពួរ ដើម្បីស្វែងរកសន្តិភាពយូរអង្វែងសម្រាប់កម្ពុជា និងថៃ។ សម្តេចក៏បានបញ្ជាក់ជាថ្មីពីការប្រកាន់ខ្ជាប់យ៉ាងម៉ឺងម៉ាត់របស់កម្ពុជា ក្នុងការបន្តអនុវត្តតាមស្មារតីសេចក្ដីថ្លែងការណ៍រួមទីក្រុងគូឡាឡាំពួរ និងសង្ឃឹមថា ភាគីទាំងពីរនឹងបន្តធ្វើការជាមួយគ្នាស្របតាមគោលការណ៍ និងយន្តការទ្វេភាគីដែលបានឯកភាពគ្នា ។

លោកប្រធានាធិបតី Trump បានគូសបញ្ជាក់ជំហរយ៉ាងច្បាស់លាស់ថា លោកចង់ឃើញសន្តិភាពស្ថិតស្ថេររវាងកម្ពុជា និងថៃ ។ លោកនឹងបន្តតាមដានកិច្ចការនេះដោយយកចិត្តទុកដាក់ ដើម្បីធានាមិនឱ្យមានការផ្ទុះអាវុធឡើងវិញនៅតាមបណ្តោយព្រំដែនកម្ពុជា-ថៃ ។

សម្តេចបានជម្រាបទៅលោកប្រធានាធិបតី Trump ថា កម្ពុជាបន្តរក្សាជំហរក្នុងការដោះស្រាយបញ្ហាព្រំដែនដោយសន្តិវិធី ដោយអនុលោមតាមគោលការណ៍ និងយន្តការដែលបានឯកភាពគ្នាកន្លងមក ដើម្បីដោះស្រាយបញ្ហាព្រំដែនកម្ពុជា-ថៃ និងកសាងសន្តិភាពយូរអង្វែងរវាងប្រទេសទាំងពីរ ។

គួរបញ្ជាក់ថា ស្ថានការណ៍តាមបណ្តោយព្រំដែនកម្ពុជា-ថៃបានតានតឹងឡើងវិញ ក្រោយពីថៃចោទប្រកាន់កម្ពុជាបង្កប់មីនថ្មីនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត (ទល់មុខប្រាសាទព្រះវិហារ) បណ្តាលឱ្យកងទ័ពថៃជាន់មីនរងរបួសកាលពីថ្ងៃទី១០ ខែវិច្ឆិកា និងយកលេសគ្រាប់មីនដើម្បីផ្អាកកិច្ចព្រមព្រៀងសន្តិភាពជាមួយកម្ពុជាជាឯកតោភាគី ។

នាយករដ្ឋមន្ត្រីថៃបានផ្អាកកិច្ចព្រមព្រៀងសន្តិភាពដែលបានចុះហត្ថលេខារួមគ្នាជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅទីក្រុងគូឡាឡាំពួរ កាលពីថ្ងៃទី២៦ ខែតុលា ឆ្នាំ២០២៥ ក្រោមវត្តមានលោកប្រធានាធិបតី Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ដោយនាយករដ្ឋមន្ត្រីថៃចោទប្រកាន់កម្ពុជាបង្កប់មីនថ្មីនៅព្រំដែនខេត្តស៊ីសាកេត បណ្តាលឱ្យកងទ័ពថៃរងរបួស៣នាក់ និងបាក់ជើងស្តាំម្នាក់ ។

តាមការចុះផ្សាយរបស់សារព័ត៌មានបរទេសនៅថ្ងៃទី១៥ ខែវិច្ឆិកា លោកប្រធានាធិបតី Trump បានទូរស័ព្ទមកកាន់នាយករដ្ឋមន្ត្រីថៃ លោក Anutin Charnvirakul ដើម្បីសម្របសម្រួលបញ្ហារវាងកម្ពុជា-ថៃ និងពិភាក្សាជាមួយនាយករដ្ឋមន្ត្រីម៉ាឡេស៊ី លោក Anwar Ibrahim ផងដែរ ដើម្បីបញ្ឈប់ស្ថានការណ៍តានតឹងនាពេលនេះ ។

ស្ថានការណ៍ព្រំដែនកម្ពុជា-ថៃតានតឹងធ្វើឱ្យប្រទេសនានាបារម្ភថា ថៃអាចនឹងបើកការវាយប្រហារកម្ពុជាម្តងទៀត បន្ទាប់ពីថៃបាញ់ប្រហារមុនមកលើកម្ពុជារយៈពេល៥ថ្ងៃ ចាប់ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥ ។ នាយករដ្ឋមន្ត្រីថៃបានប្រគល់អំណាចពេញលេញឱ្យកងទ័ពសម្រេចចិត្តរឿងព្រំដែន ដែលពេលនេះ អាវុធ រថក្រោះ និងកម្លាំងទ័ពថៃ ត្រូវបានបញ្ជូនមកកាន់ព្រំដែនរួចរាល់ហើយ ៕