ប្រទេសហ្វីលីពីន៖ មនុស្សយ៉ាងហោចណាស់ 2នាក់ បានបាត់បង់ជីវិត និងជាង 1លាននាក់ ត្រូវបង្ខំចិត្តចាកចោលផ្ទះសម្បែងទៅរកទីទួលសុវត្ថិភាព បន្ទាប់ពីព្យុះបិសា.ច ហ្វុង-វុង បានវាយប្រ.ហារលើភាគខាងជើង ប្រទេសហ្វីលីពីន ដោយបង្កផលប៉ះពាល់យ៉ាងដំណមដល់ហេដ្ឋារចនាសម្ព័ន្ធ និងការរស់នៅរបស់ប្រជាជន។ នេះបើតាមសេចក្ដីរាយការណ៍របស់ទីភ្នាក់ងារ Reuters នៅថ្ងៃចន្ទនេះ។

ត្រឹមរយៈពេលតែមួយយប់ ឥទ្ធិពលរបស់ខ្យល់ព្យុះ ហ្វុង-វុង បានគ្របដណ្ដប់ទៅលើទីក្រុងឌីណាឡុងហ្គានភាគខាងកើតនៃខេត្តអូរ៉ូរ៉ា ប្រទេសហ្វីលីពីន ដែលនាំមកនូវខ្យល់បក់ខ្លាំង ផ្គរ រន្ទះ និងភ្លៀងធ្លាក់ខ្លាំងពេញមួយយប់ បណ្ដាលឲ្យបា.ក់រលំដើមឈើ ការរអិលបា.ក់ដី និងជំនន់ទឹកភ្លៀងកើនឡើងបានកាត់ផ្ដា.ច់ផ្លូវធ្វើដំណើរជាដើម។

យោងតាមរបាយការណ៍ដំបូងពីការិយាល័យការពារជនស៊ីវិលហ្វីលីពីន យ៉ាងហោចណាស់មានមនុស្សពីរនាក់បានស្លា.ប់ និងពីរនាក់ទៀតរងរបួស ដោយសារព្យុះទីហ្វុងដ៏កំណាចមួយនេះ។ លោក Patrick Alexis Angara អភិបាលរងខេត្ត Aurora បាននិយាយថា ពេលនេះទីក្រុងធំៗចំនួនបីត្រូវរងការខូចខាតយ៉ាងដំណមមិនអាចធ្វើដំណើរចូលបានឡើយ ដោយសារតែមានការបាក់ដី និងស្រុតផ្លូវ។

ទីភ្នាក់ងារអាកាសធាតុរដ្ឋបាននិយាយថា ឥឡូវនេះព្យុះទីហ្វុងនេះកំពុងធ្វើដំណើរឆ្លងកាត់សមុទ្រចិនខាងត្បូង និងត្រូវបានគេព្យាករណ៍ថា វានឹងផ្លាស់ប្តូរទៅទិសឦសានហើយធ្វើដំណើរឆ្ពោះទៅកាន់តៃវ៉ាន់វិញម្ដង។

សេចក្ដីរាយការណ៍នេះបន្តព្រមានថា ទោះជាយ៉ាងណា ផ្នែកធំនៃប្រទេសហ្វីលីពីននឹងនៅតែប្រឈមមុខនឹងភ្លៀងធ្លាក់ខ្លាំង និងខ្យល់បក់ខ្លាំង រួមជាមួយនឹងរលកព្យុះនៅតំបន់ឆ្នេរសមុទ្រផងដែរ។ អ្នកត្រួតពិនិត្យអាកាសចរណ៍ស៊ីវិលបាននិយាយថា មកទល់ពេលនេះ មានជើងហោះហើរសរុបជាង 400 ហើយដែលត្រូវបានលុបចោលរាប់ចាប់តាំងពីថ្ងៃអាទិត្យមក។

សូមជម្រាបថា ព្យុះទីហ្វុង Fung-wong គឺជាព្យុះទី 21 ដែលបានវាយប្រហារប្រទេសហ្វីលីពីននៅឆ្នាំនេះ។ វាបានកើតឡើងភ្លាមៗបន្ទាប់ពីព្យុះទីហ្វុង Kalmaegi កាលពីសប្តាហ៍មុនដែលបានសម្លា.ប់មនុស្ស 224 នាក់នៅក្នុងប្រទេស និង 5 នាក់ទៀតនៅក្នុងប្រទេសវៀតណាម៕

ប្រទេសថៃ ៖ ដូចការសន្និដ្ឋានមិនខុស ថៃបានលើកយកករណីកងទ័ពខ្លួន២នាក់ជាន់មីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត (ទល់មុខប្រាសាទព្រះវិហារ) នៅព្រឹកថ្ងៃទី១០ ខែវិច្ឆិកា ឆ្នាំ២០២៥ បណ្តាលឱ្យដាច់ជើងនិងរងរបួស មកធ្វើជាហេតុផលមិនដោះលែងវីរកងទ័ពកម្ពុជាទាំង១៨រូបត្រឡប់មកប្រទេសវិញ បើទោះជាកម្ពុជាបានអនុវត្តតាមលក្ខខណ្ឌនានារបស់ថៃក៏ដោយ ។ រដ្ឋមន្ត្រីក្រសួងការបរទេសថៃប្រកាសពន្យារពេលដោះលែងវីរកងទ័ពកម្ពុជាក្រោយពីកងទ័ពខ្លួនជាន់មីននៅខេត្តស៊ីសាកេត និងបញ្ជាឱ្យត្រួតពិនិត្យជាមីនចាស់ឬថ្មី ។

តាមការចុះផ្សាយរបស់សារព័ត៌មាន Khaosod នៅថ្ងៃទី១០ ខែវិច្ឆិកា រដ្ឋមន្ត្រីក្រសួងការពារជាតិ លោក Natthaphon Narkphanit បានប្រកាសពន្យារពេលដោះលែងវីរកងទ័ពកម្ពុជាទាំង១៨រូប ។ លោកបញ្ជាឱ្យផ្ញើលិខិតតវ៉ាពីការផ្ទុះមីនបណ្តាលឱ្យកងទ័ពខ្លួនដាច់ជើងនិងរងរបួស ទៅកាន់ក្រុមអ្នកសង្កេតការណ៍អន្តរកាល (IOT) និងបញ្ជាទៅកាន់មេបញ្ជាការកងទ័ពភូមិភាគទី២ ឱ្យត្រួតពិនិត្យ តើជាមីនចាស់ឬថ្មី ។ ជំហ៊ានដំបូង មេបញ្ជាការកងទ័ពភូមិភាគទី២ សន្និដ្ឋានថា ជាមីនថ្មី ។

រដ្ឋមន្ត្រីក្រសួងការពារជាតិ លោក Natthaphon និយាយថា កងទ័ពថៃ២រូបបានជាន់មីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ពេលកំពុងយាមល្បាតបណ្តាលឱ្យម្នាក់ដាច់ជើងស្តាំ និងម្នាក់ទៀតរងរបួស ដែលហេតុការណ៍នេះកើតឡើងនៅតំបន់ប្រាសាទព្រះវិហារ និងភ្នំទ្រព្យ ដែលថៃកំពុងបណ្តេញកងទ័ពកម្ពុជាឱ្យចាកចេញ ។ លោកបានបញ្ជាឱ្យមេបញ្ជាការកងទ័ពភូមិភាគទី២ ត្រួតពិនិត្យតើជាមីនចាស់ឬថ្មី? បើតាមសន្និដ្ឋានថា ជាមីនថ្មី ។ រីឯវីរកងទ័ពកម្ពុជាទាំង១៨រូបដែលត្រៀមដោះលែង គឺត្រូវពន្យារពេលសិនដោយសារកងទ័ពថៃជាន់មីន ។ យើងនឹងជជែកលម្អិតរឿងនេះ បើរកឃើញថា កម្ពុជាមានចេតនាធ្វើឱ្យកងទ័ពថៃរងរបួស នឹងមានបញ្ហាខ្លាំងជាងនេះមិនខាន ។

នៅថ្ងៃដដែល លោក Siripong Angkasakulkiat អ្នកនាំពាក្យរដ្ឋាភិបាលថៃថា លោកនាយករដ្ឋមន្ត្រី Anutin Charnvirakul បានបញ្ជាឱ្យក្រសួងការពារជាតិ និងក្រសួងការបរទេសថៃតវ៉ាទៅកាន់ក្រុមអ្នកសង្កេតការណ៍អន្តរកាល (IOT) អំពីកងទ័ពថៃជាន់មីនពេលដើរល្បាតនៅព្រំដែន ដើម្បីចាត់វិធានការ, ជួយសង្គ្រោះ និងរាយការណ៍ពីហេតុការណ៍ជាន់មីនជាបន្តបន្ទាប់ ។

លោក Anutin បានទទួលសេចក្តីរាយការណ៍ពីកងទ័ពជើងគោករឿងកងទ័ពថៃជាន់មីននៅតំបន់ហួយតាម៉ារៀ បណ្តាលឱ្យដាច់ជើងនិងរងរបួស គឺលោកមិនសប្បាយចិត្តយ៉ាងខ្លាំងដោយប្រកាសផ្អាកកិច្ចព្រមព្រៀងផ្សេងៗជាមួយកម្ពុជា និងឱ្យក្រសួងការពារជាតិ និងក្រសួងការបរទេសរាយការណ៍ប្រាប់ក្រុមអ្នកសង្កេតការណ៍អន្តរកាល (IOT) ចាត់វិធានការយ៉ាងឆាប់បំផុត ។ នាយករដ្ឋមន្ត្រីថៃបានណែនាំកងទ័ព និងស្ថាប័នពាក់ព័ន្ធឱ្យយកចិត្តទុកដាក់ក្នុងការព្យាបាលកងទ័ពរងរបួស ព្រមទាំងរាយការណ៍ពីស្ថានការណ៍ ។

មុននេះ កងទ័ពថៃបានប្រកាសត្រៀមដោះលែងវីរកងទ័ពកម្ពុជាទាំង១៨រូបត្រឡប់មកប្រទេសវិញនៅថ្ងៃទី១២ ខែវិច្ឆិកា ខាងមុខ ក្រោយពីកម្ពុជាអនុវត្តតាមលក្ខខណ្ឌនានារបស់ខ្លួន និងថាការដោះលែង គ្មានសម្ពាធពីអាមេរិក និងម៉ាឡេស៊ីទេ ។ ប៉ុន្តែក្រោយពីមានព័ត៌មានរឿងកងទ័ពថៃជាន់មីននៅខេត្តស៊ីសាកេត ថៃក៏កែប្រែពាក្យសម្តីរបស់ខ្លួនវិញ គឺគ្មានការដោះលែងវីរកងទ័ពកម្ពុជានាពេលឆាប់ៗទេ ។

គួរបញ្ជាក់ថា ថៃតែងតែប្រើល្បិចចាស់ និងរៀបចំឆាកល្ខោនរឿងគ្រាប់មីនដើម្បីទម្លាក់កំហុសលើកម្ពុជាម្តងហើយម្តងទៀត ដោយយកលេសការផ្ទុះមីននៅថ្ងៃទី១០ ខែវិច្ឆិកានេះ មកធ្វើជាហេតុផលមិនដោះលែងវីរកងទ័ពកម្ពុជា ។ ម្យ៉ាងទៀត ថៃនឹងមានហេតុផលប្រាប់អាមេរិកពីការមិនដោះលែងវីរកងទ័ពកម្ពុជា ខណៈប្រធានាធិបតីអាមេរិកប្រាប់ឱ្យថៃដោះលែងតាំងពីប្រទេសទាំងពីរចុះហត្ថលេខាលើកិច្ចព្រមព្រៀងសន្តិភាពនៅទីក្រុងកូឡាឡាំពួរ ៕

ប្រទេសថៃ ៖ កងទ័ពថៃតែងប្រើល្បិចចាស់ដដែលៗរឿងជាន់មីនដើម្បីទម្លាក់កំហុស និងចោទប្រកាន់កម្ពុជា ជាពិសេស ពេលស្ថានការណ៍នៅតំបន់ព្រំដែនស្ងប់ស្ងាត់ សារព័ត៌មាននានារបស់ថៃក៏ផ្សាយថា កងទ័ពថៃជាន់មីន បើទោះជាកម្ពុជាបានបញ្ជាក់ម្តងហើយម្តងទៀតថា វាជាមីនចាស់បន្សល់តាំងពីសម័យសង្គ្រាមក្តី ។ ដូចទម្លាប់រាល់ដង នៅថ្ងៃទី១០ ខែវិច្ឆិកា ឆ្នាំ២០២៥នេះ គ្រប់សារព័ត៌មានថៃរាយការណ៍ថា កងទ័ពថៃ២នាក់ដើរជាន់មីនពេលកំពុងល្បាតនៅតំបន់ហួយតាម៉ារៀ ខេត្តស៊ីសាកេត ដែលព័ត៌មាននេះធ្វើឱ្យសង្គមថៃទម្លាក់កំហុសមកលើកម្ពុជា ។

សារព័ត៌មានថៃនានារាយការណ៍ថា នៅព្រឹកថ្ងៃទី១០ ខែវិច្ឆិកា ឆ្នាំ២០២៥ កងទ័ពថៃចំនួន២នាក់ បានដើរជាន់មីននៅតំបន់ហួយតាម៉ារៀ ស្ថិតក្នុងស្រុកកាន់ថាឡាក់ ខេត្តស៊ីសាកេត (ទល់មុខប្រាសាទព្រះវិហារ) បណ្តាលឱ្យដាច់ជើងខាងស្តាំម្នាក់ និងម្នាក់ទៀតណែនទ្រូង ។ ក្រោយហេតុការណ៍នេះ កងទ័ពថៃទាំង២រូបត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យកាន់ថាឡាក់ ហើយសារព័ត៌មានកំពុងរង់ចាំព័ត៌មានលម្អិត ។

កាលពីវេលាម៉ោង៩និង៣០នាទីព្រឹក ថ្ងៃទី១០ ខែវិច្ឆិកា កងទ័ពជើងគោកថៃបានទទួលសេចក្តីរាយការណ៍ពីកងកម្លាំងស៊ុណារីថា កងទ័ពថៃ២នាក់ដើរជាន់មីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ក្នុងអំឡុងពេលកំពុងដើរល្បាត រួមមាន ១-ឈ្មោះ ថេតសាក់ សាម៉ាផុង ដាច់ជើងស្តាំ និង២-ឈ្មោះ វ៉ាឈិរ៉ាក់ ផាន់ថាណា ណែនទ្រូង ។

នេះគ្រាន់តែជាល្បិចចាស់របស់កងទ័ពថៃដើម្បីទម្លាក់កំហុសលើកម្ពុជា ជាពិសេស នៅពេលតំបន់ព្រំដែនកម្ពុជា-ថៃមានស្ថានការណ៍ស្ងប់ស្ងាត់ គ្មានជម្លោះ ស្រាប់តែមានព័ត៌មានជាន់មីន ។ តើថៃមានចេតនាអ្វីឱ្យប្រាកដដែលចោទប្រកាន់រឿងមីន ស្របពេលប្រទេសទាំងពីរបានចុះហត្ថលេខាលើកិច្ចព្រមព្រៀងសន្តិភាពនៅទីក្រុងកូឡាឡាំពួរ ប្រទេសម៉ាឡេស៊ីរួចហើយ ។

គួរបញ្ជាក់ថា បច្ចុប្បន្ន ក្រុមការងារនៃមជ្ឈមណ្ឌលសកម្មភាពកម្ចាត់មីនកម្ពុជា (CMAC) និងក្រុមការងារនៃមជ្ឈមណ្ឌលសកម្មភាពកម្ចាត់មីនថៃ (TMAC) បានពិភាក្សាលម្អិតពីការដោះមីនតំបន់សាកល្បងក្នុងតំបន់អាទិភាពនៅព្រំដែនកម្ពុជា-ថៃ ស្របតាមការសម្រេចរបស់ក្រុមការងារសម្របសម្រួលចម្រុះ (JCTF) ក្នុងកិច្ចប្រជុំកាលពីថ្ងៃទី៣១ ខែតុលា ឆ្នាំ២០២៥ ។

កន្លងមក ក្រសួងការពារជាតិកម្ពុជាបានច្រានចោលទាំងស្រុងចំពោះការចោទប្រកាន់ដោយគ្មានមូលដ្ឋានច្បាស់លាស់របស់ថៃពាក់ព័ន្ធនឹងការបង្កប់មីនថ្មី ដោយកម្ពុជានៅតែរក្សាជំហរយ៉ាងម៉ឺងម៉ាត់ គឺគ្មានការប្រើប្រាស់ និងមិនប្រើប្រាស់មីនថ្មីដាច់ខាត ។ កម្ពុជា ជារដ្ឋភាគីនៃអនុសញ្ញាហាមប្រាមការប្រើប្រាស់មីនប្រឆាំងមនុស្ស ដែលកម្ពុជាបានផ្តល់សច្ចាប័នក្នុងឆ្នាំ១៩៩៩ ក៏ត្រូវបានទទួលស្គាល់ជាអន្តរជាតិចំពោះសមិទ្ធផលនៃការបោសសម្អាតមីន និងគ្មានការប្រើប្រាស់មីនប្រឆាំងមនុស្សឡើយ ៕

ប្រទេសថៃ៖ លែងលាក់បាំងហើយ! អតីតមេបញ្ជាការកងទ័ពភូមិភាគ២ថៃ លោក ប៊ុនសុីន ផាតក្លាង កាលពីថ្ងៃសៅរិ៍ បានសារភាពពីទង្វើមិនគោរពកោតខ្លាចច្បាប់អន្តរជាតិរបស់ខ្លួនដោយបើកចំហរថា លោកបានប្រឆាំងនឹងរដ្ឋាភិបាលថៃដែលបញ្ជាឲ្យឈប់បា.ញ់ក្នុងអំឡុងពេលធ្វើសង្គ្រា.មជាមួយកម្ពុជាកាលពីខែកក្កដាកន្លងទៅ ដោយសារតែលោកចង់ដណ្តើមយកមកទីតាំងដែលកម្ពុជាបានវា.យបណ្ដេញកងទ័ពថៃមកកាន់កាប់ឡើងវិញ។

យោងតាមសារព័ត៌មាន The Nation នាយប់ថ្ងៃអាទិត្យទី៩ ខែវិច្ឆិកា ឆ្នាំ២០២៥ បានចុះផ្សាយពីពាក្យសំដីរបស់លោក ប៊ុនសុីន ផាតក្លាង អនុប្រធានកងទ័ពជើងគោកបច្ចុប្បន្ន ដែលបានថ្លែងដោយបើកចំហរចំពោះមុខអ្នកសារព័ត៌មាន នៅក្នុងកម្មវិធីជួបជុំសាធារណមួយថា លោកទទួលស្គាល់ថាលោកបានល្មើសនឹងបទបញ្ជារបស់រដ្ឋាភិបាលអណត្តិមុនរបស់ថៃ ក្នុងការបញ្ជាឲ្យមានការឈប់បា.ញ់ប្រហារភ្លាមៗត្រឹមតែ ៦ម៉ោងប៉ុណ្ណោះ បន្ទាប់ពីការប៉ះទង្គិចគ្នាតាមព្រំដែនបានផ្ទុះឡើង។

លោកអះអាងថា ការសម្រេចចិត្តរបស់លោក គឺផ្អែកលើតម្រូវការចាំបាច់ ក្នុងការការពារទាហានថៃដែលឈរជើងនៅជិតតំបន់ជម្លោះ។ លោកបន្ថែមថា ដោយសារតែពេលវេលាប្រថុចញ៉ុច ហើយការរង់ចាំដំណោះស្រាយពីរដ្ឋាភិបាលត្រូវចំណាយពេលយូរ ដូច្នេះកាតព្វកិច្ចដំបូងរបស់ខ្ញុំគឺការពារកងទ័ពរបស់យើង” ខណៈពេលដែលសង្កត់ធ្ងន់ថាសកម្មភាពរបស់លោកត្រូវបានធ្វើឡើងសម្រាប់តែគោលបំណងការពារខ្លួនប៉ុណ្ណោះ។

ទោះជាយ៉ាងណាក៏ដោយ ជុំវិញការទទួលស្គាល់របស់លោក ប៊ុនសុីន ពេលនេះបានបង្កឱ្យមានការជជែកវែកញែកយ៉ាងច្រើននៅក្នុងរង្វង់អ្នកនយោបាយ ដោយអ្នកតាក់តែងច្បាប់មួយចំនួនអំពាវនាវឱ្យមានការស៊ើបអង្កេតទៅលើរឿងនេះថាតើសកម្មភាពរបស់លោកបានរំលោ.ភលើខ្សែសង្វាក់បញ្ជាដែរឬអត់។

គួរជម្រាបថា ក្រោយរយៈពេល៦ម៉ោងបន្ទាប់ជម្លោះប្រដាប់អាវុធបានផ្ទុះឡើង រដ្ឋាភិបាលអណត្តិមុនរបស់ថៃបានចេញបញ្ជាឲ្យកងទ័ពខ្លួនបញ្ឈប់ការបា.ញ់ភ្លាមៗ ដើម្បីទប់ស្កាត់អំពើហិង្សាបន្ថែមទៀត និងបើកផ្លូវសម្រាប់ការចរចាការទូត។ ប៉ុន្តែបទបញ្ជានោះ គ្មានឥទ្ធិពលអ្វីទៅលើមេទ័ពភូមិភាគ២នៅពេលនោះឡើយ។

យ៉ាងណាក៏ដោយ សកម្មភាពរបស់ ប៊ុនសុីន ផាតក្លាង ដែលហ៊ានចេញមុខទទួលស្គាល់ពីទង្វើរបស់ខ្លួនដូចខាងលើនេះ បានជំរុញឲ្យមានការជជែកដេញដោលយ៉ាងទូលំទូលាយ ដោយមនុស្សមួយចំនួន ចាត់ទុកលោកជាវិរៈបុរស ឯការសម្រេចចិត្តរបស់លោក គឺត្រឹមត្រូវបំផុត ខណៈដែលមនុស្សជាច្រើនផ្សេងទៀតព្រួយបារម្ភថា សកម្មភាពនេះកំពុងលាតត្រដាងពីការគ្រប់គ្រងដែលគ្មានប្រសិទ្ធភាពរវាងរដ្ឋាភិបាល និងយោធាថៃ៕

ប្រទេសថៃ ៖ ថ្មីៗនេះ សារព័ត៌មានថៃបានចុះផ្សាយពីកងទ័ពថៃត្រៀមដោះលែងវីរកងទ័ពកម្ពុជាទាំង១៨រូបតាមច្រកព្រំដែនបានផាកកាត ស្រុកប៉ូងណាមរ៉ន ខេត្តចន្ទបុរី (ទល់មុខខេត្តប៉ៃលិន) នាថ្ងៃទី១២ ខែវិច្ឆិកា ឆ្នាំ២០២៥ ដោយសារអាមេរិកយកអត្រាពន្ធទំនិញថៃមកដាក់សម្ពាធម្តងហើយម្តងទៀត ទើបថៃយល់ព្រមដោះលែងកងទ័ពកម្ពុជាដើម្បីកុំឱ្យផលប៉ះពាល់ដោយសារអត្រាពន្ធទំនិញធ្លាក់លើពលរដ្ឋ និងប្រទេសថៃ ហើយការឃុំខ្លួនវីរកងទ័ពកម្ពុជាយូរអាចប៉ះពាល់អនុសញ្ញា និងច្បាប់អន្តរជាតិ ។ ប៉ុន្តែបើតាមអនុរដ្ឋមន្ត្រីការពារជាតិថៃ ការដោះលែងនេះ ដោយសារកម្ពុជាអនុវត្តគ្រប់លក្ខខណ្ឌ មិនមែនមកពីថៃរងសម្ពាធបរទេសទេ ។

អនុរដ្ឋមន្ត្រីក្រសួងការពារជាតិថៃ លោក Adul Boonthamcharoen បាននិយាយកាលពីថ្ងៃទី៩ ខែវិច្ឆិកា ថា ថៃត្រៀមដោះលែងវីរកងទ័ពកម្ពុជាទាំង១៨រូបត្រឡប់ទៅប្រទេសវិញ ពីព្រោះកម្ពុជាបានអនុវត្តតាម៤លក្ខខណ្ឌរបស់ថៃ ដែលការដោះលែងនេះគ្មានការដាក់សម្ពាធពីអាមេរិក និងម៉ាឡេស៊ីទេ ។

កាលពីថ្ងៃទី៩ ខែវិច្ឆិកា អនុរដ្ឋមន្ត្រីការពារជាតិថៃ លោក Adul ផ្តល់សម្ភាសន៍ជាមួយសារព័ត៌មានថា កម្ពុជា-ថៃបានចុះហត្ថលេខាលើកិច្ចព្រមព្រៀងសន្តិភាពនៅទីក្រុងកូឡាឡាំពួរ ប្រទេសម៉ាឡេស៊ី បច្ចុប្បន្ន ប្រទេសទាំងពីរស្ថិតក្នុងដំណាក់កាលអនុវត្តតាម៤លក្ខខណ្ឌ ។ ចាប់ពីឆ្នាំ២០១០ ថៃកំណត់អធិបតេយ្យរបស់ខ្លួនតាមផែនទី 1:50,000 រីឯប្រាសាទតាក្របី គឺអនុវត្តតាមលទ្ធផលនៃកិច្ចព្រមព្រៀងសន្តិភាព នៅពេលបញ្ចប់សង្គ្រាម ប្រទេសណាគ្រប់គ្រងតំបន់ណា នឹងគ្រប់គ្រងតំបន់នោះបន្ត ។

ការដោះលែងវីរកងទ័ពកម្ពុជាទាំង១៨រូប នាថ្ងៃទី១២ ខែវិច្ឆិកា នឹងមានការវាយតម្លៃពីក្រុមអ្នកសង្កេតការណ៍អាស៊ាន (AOT) រួមទាំងរដ្ឋាភិបាលកម្ពុជា-ថៃ ប្រសិនបើអនុវត្តតាមលក្ខខណ្ឌកំណត់ គឺថៃត្រូវតែដោះលែងវីរកងទ័ពកម្ពុជា គ្មានហេតុផលអ្វីត្រូវដែលឃុំខ្លួនពួកគេបន្តទេ ។ វីរកងទ័ពកម្ពុជាមួយចំនួនបានសុំព្យាបាលធ្មេញនៅថៃមុនពេលត្រឡប់ទៅវិញ ប៉ុន្តែកងទ័ពថៃប្រាប់ឱ្យពួកគេទៅព្យាបាលធ្មេញនៅកម្ពុជា ។

យើង​ត្រូវចរចាគ្នាបន្តទៀត ប៉ុន្តែបច្ចុប្បន្នឃើញថា កម្ពុជាបានអនុវត្តតាមលក្ខខណ្ឌកំណត់ដោយរលូន ប៉ុន្តែការដោះលែងនេះគ្មានការដាក់សម្ពាធពីអាមេរិក និងម៉ាឡេស៊ីទេ ។ មុនពេលដោះលែង នឹងមានសារព័ត៌មានសម្ភាសន៍វីរកងទ័ពកម្ពុជាពីការរស់នៅបែបណា តើថៃបានល្មើសច្បាប់អង្គការសហប្រជាជាតិដែរឬទេ? នេះបើតាមការលើកឡើងរបស់អនុរដ្ឋមន្ត្រីការពារជាតិថៃ ។

គួរបញ្ជាក់ថា នៅថ្ងៃទី១០ ខែវិច្ឆិកា ឆ្នាំ២០២៥ គឺជាថ្ងៃទី១០៤ហើយ ដែលវីរកងទ័ពកម្បុជាចំនួន១៨រូប ត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់កងទ័ពថៃ ។ កម្ពុជាសូមអំពាវនាវឱ្យថៃដោះលែងពួកគាត់ត្រឡប់មកវិញឱ្យបានឆាប់រហ័សជាទីបំផុត ដើម្បីអាចវិលត្រឡប់មកជួបជុំក្រុមគ្រួសារប្រកបដោយសុខសុវត្ថិភាព ស្របតាមច្បាប់មនុស្សធម៌អន្តរជាតិ ។ រាជរដ្ឋាភិបាលកម្ពុជាបាននិងកំពុងធ្វើការយ៉ាងសស្រាក់សស្រាំឥតឈប់ឈរនូវគ្រប់យន្តការដោះស្រាយលើករណីនេះដើម្បីឱ្យថៃដោះលែងកងកម្លាំងកម្ពុជាទាំងអស់ ៕

សហរដ្ឋអាមេរិក ៖ សេតវិមានអាមេរិកបានជូនដំណឹងទៅស្ថានទូតអាមេរិកនានានៅទូទាំងពិភពលោកពីច្បាប់ថ្មីរបស់អាមេរិកមិនផ្តល់ទិដ្ឋាការស្នាក់នៅអចិន្ត្រៃយ៍ (Immigrant Visa) ឱ្យជនបរទេសដែលកើតជំងឺទឹកនោមផ្អែម ធាត់ និងបេះដូង ដើម្បីកាត់បន្ថយការចំណាយប្រាក់បង់ពន្ធរបស់ពលរដ្ឋអាមេរិកក្នុងការព្យាបាលជំងឺជនបរទេស ។ ប៉ុន្តែក្រុមការពារសិទ្ធិជនអន្តោប្រវេសន៍បានរិះគ.ន់ច្បាប់ថ្មីរបស់រដ្ឋាភិបាលលោក Donald Trump ដែលបដិសេធការផ្តល់ទិដ្ឋាការឱ្យជនបរទេសមានជំងឺ ។

បទបញ្ជារបស់រដ្ឋាភិបាលអាមេរិកកាលពីថ្ងៃទី៦ ខែវិច្ឆិកា ឆ្នាំ២០២៥ ជនបរទេសដែលស្នើសុំទិដ្ឋាការស្នាក់នៅអចិន្ត្រៃយ៍ (Immigrant Visa) ដើម្បីមករស់នៅអាមេរិក គឺអាចត្រូវបដិសេធបើមានបញ្ហាសុខភាព ដូចជា ៖ កើតជំងឺទឹកនោមផ្អែម ធាត់ បេះដូង សរសៃឈាម និងជំងឺរ៉ាំរ៉ៃ ។ ក្រសួងការបរទេសអាមេរិកបានជូនដំណឹងទៅកាន់ស្ថានទូត និងកុងស៊ុលអាមេរិកនៅទូទាំងពិភពលោក ដើម្បីឱ្យមន្ត្រីអាមេរិកទទួលខុសត្រូវផ្នែកផ្តល់ទិដ្ឋាការលើកពីហេតុផលបន្ថែមទៀតដើម្បីបដិសេធទិដ្ឋាការជនបរទេស ដូចជា អាយុ ក្នុងគោលបំណងកុំឱ្យពួកគេប្រើប្រាស់ថវិកាសុខាភិបាលអាមេរិក និងក្លាយជាបន្ទុកនាថ្ងៃអនាគត ។

ទោះយ៉ាងណា ច្បាប់ថ្មីរបស់រដ្ឋាភិបាលលោក Donald Trump មិនអនុវត្តចំពោះទិដ្ឋាការទេសចរណ៍ទេ ប៉ុន្តែរងការរិះគន់ពីមជ្ឈដ្ឋាននានា ជាពិសេស ក្រុមការពារសិទ្ធិជនអន្តោប្រវេសន៍និយាយថា វាមិនយុត្តិធម៌ដែលអាមេរិកបិទសិទ្ធិការស្នើសុំទិដ្ឋាការរបស់ជនបរទេសមានបញ្ហាសុខភាព ។ ក្រុមការពារសិទ្ធិជនអន្តោប្រវេសន៍ហៅច្បាប់ថ្មីជាគោលនយោបាយបំបិទសិទ្ធិ ខណៈក្រសួងការបរទេសអាមេរិកថា ដើម្បីកាត់បន្ថយការចំណាយប្រាក់បានពីការបង់ពន្ធរបស់ពលរដ្ឋអាមេរិក ។

តាមការលើកឡើងរបស់ក្រុមការពារសិទ្ធិជនអន្តោប្រវេសន៍ ការហាមឃាត់នេះបញ្ជាក់យ៉ាងច្បាស់ពីរដ្ឋាភិបាលអាមេរិកព្យាយាមប្រាប់ពិភពលោកថា កុំមករស់នៅអាមេរិក ពីព្រោះជនបរទេសកើតជំងឺបេះដូង ផ្លូវដង្ហើម មហារីក ទឹកនោមផ្អែម និងជំងឺផ្សេងៗ ត្រូវចំណាយប្រាក់រាប់សែនដុល្លារក្នុងការព្យាបាលនៅអាមេរិក ។

មនុស្សលើពិភពលោកប្រមាណ១០% កើតជំងឺទឹកនោមផ្អែម និងបេះដូង ដែលជំងឺទាំងពីរនេះបានសម្លាប់ជីវិតមនុស្សច្រើនបំផុត ទើបមន្ត្រីទិដ្ឋាការអាមេរិកត្រូវពិចារណាថា តើជនបរទេសដែលស្នើសុំទិដ្ឋាការស្នាក់នៅអចិន្ត្រៃយ៍ (Immigrant Visa) មានប្រាក់គ្រប់គ្រាន់សម្រាប់ចាយវាយលើថ្លៃព្យាបាលដោយខ្លួនឯងដែរឬទេ ដោយពុំចាំបាច់សុំជំនួយពីរដ្ឋាភិបាលអាមេរិក ។

លើសពីនេះ មន្ត្រីទិដ្ឋាការអាមេរិកនឹងពិចារណាពីបញ្ហាសុខភាពរបស់សមាជិកគ្រួសារជនបរទេសផងដែរ ដូចជា កូនៗ និងឪពុក-ម្តាយ ពីព្រោះជនពិការ និងអ្នកមានជំងឺរ៉ាំរ៉ៃ ឬចាំបាច់ត្រូវទទួលការព្យាបាលជំងឺ ពួកគេមិនអាចធ្វើការបានទេ ។ ជនបរទេសស្នើសុំទិដ្ឋាការស្នាក់នៅអចិន្ត្រៃយ៍ ត្រូវតែពិនិត្យសុខភាពដោយគ្រូពេទ្យ និងស្ថានទូតអាមេរិកយល់ព្រមជាមុន ៕