ប្រទេសចិន ៖ ចិនបានផ្អាកបញ្ចាំងភាពយន្តជប៉ុននៅទូទាំងប្រទេសស្របពេលទំនាក់ទំនងការទូតរវាងប្រទេសទាំងពីរធ្លាក់ចុះដោយសារនាយករដ្ឋមន្ត្រីជប៉ុន លោកស្រី Sanae Takaichi បង្ហាញគោលជំហរគាំទ្រតៃវ៉ាន់ ដោយការបញ្ជូនកងទ័ពជប៉ុនទៅការពារតៃវ៉ាន់ពីបរទេសឈ្លានពា.ន ។ ចិនចាត់ទុកជាកំហុសដ៏ធ្ងន់ធ្ងរ និងប្រាប់ឱ្យនាយករដ្ឋមន្ត្រីស្រីជប៉ុនដកពាក្យសម្តីវិញជាបន្ទាន់ បើមិនដូច្នោះទេ ចិននឹងចាត់វិធានការឆ្លើយតប ។ នេះបើតាមការចុះផ្សាយរបស់សារព័ត៌មានបរទេសកាលពីថ្ងៃទី១៨ ខែវិច្ឆិកា ឆ្នាំ២០២៥ ។

ចិនផ្អាកការបញ្ចាំងភាពយន្តជប៉ុនយ៉ាងហោចណាស់ចំនួន២រឿង បន្ទាប់ពីរដ្ឋាភិបាលចិនទើបតែហាមឃាត់ពលរដ្ឋកុំធ្វើដំណើរទៅជប៉ុន ។ ស្ថានីយទូរទស្សន៍រដ្ឋាភិបាលចិន CCTV បញ្ជាក់ថា ការឈប់បញ្ចាំងភាពយន្តជប៉ុន គឺជាការសម្រេចចិត្តដោយប្រុងប្រយ័ត្នក្រោយពីអ្នកទស្សនាភាពយន្តនៅប្រទេសចិនមិនពេញចិត្តនឹងពាក្យសម្តីរបស់នាយករដ្ឋមន្ត្រីស្រីជប៉ុន និងធ្វើពហិការភាពយន្តជប៉ុន ។ ភាពយន្តជប៉ុនជាច្រើនរឿង រួមទាំងភាពយន្តតុក្កតាផងដែរ ដែលគ្រោងចាក់បញ្ចាំងនៅចិនពេលនេះ មិនត្រូវបានអនុញ្ញាតឱ្យបញ្ចាំងឡើយ ។

នាយករដ្ឋមន្ត្រីស្រីជប៉ុនបាននិយាយមកកាន់រដ្ឋសភាកាលពីថ្ងៃទី១៣ ខែវិច្ឆិកា ថា បើចិនវាយប្រហារតៃវ៉ាន់ គឺនឹងគំរាមកំហែងជប៉ុនដែរ ជប៉ុនអាចបញ្ជូនកងទ័ពទៅជួយតៃវ៉ាន់ ។ បន្ទាប់ពីនាយករដ្ឋមន្ត្រីជប៉ុនរួច ចិនបានកោះហៅមន្ត្រីទូតជប៉ុនមកបំភ្លឺ និងបង្ហាញការបារម្ភយ៉ាងខ្លាំងទៅលើគោលជំហរសន្តិសុខរបស់រដ្ឋាភិបាលជប៉ុនចំពោះតៃវ៉ាន់ ខណៈចិនចាត់ទុកតៃវ៉ាន់ជាទឹកដីរបស់ខ្លួន ។ កាលពីពាក់កណ្តាលខែវិច្ឆិកា ឆ្នាំ២០២៥ ចិនបានបញ្ជូននាវាចូលប្រជុំកោះសេនកាគុ ជាដែនទឹកជប៉ុន ដែលធ្វើឱ្យជប៉ុនមិនសប្បាយចិត្ត និងចាត់ទុកល្មើសច្បាប់អន្តរជាតិ ហើយជប៉ុនអំពាវនាវឱ្យរដ្ឋាភិបាលចិនចរចាការទូតដើម្បីកាត់បន្ថយស្ថានការណ៍តានតឹង ។

អ្នកនាំពាក្យក្រសួងការបរទេសចិន លោក Lin Jian ចាត់ទុកពាក្យសម្តីរបស់នាយករដ្ឋមន្ត្រីជប៉ុនខ្វះការទទួលខុសត្រូវ និងបង្កគ្រោះថ្នាក់យ៉ាងខ្លាំង បើជប៉ុនមិនសិក្សាពីប្រវត្តិសាស្ត្រ និងបញ្ជូនកងទ័ពមកជ្រៀតជ្រែតរឿងតៃវ៉ាន់ ជប៉ុននឹងបរាជ័យមិនខាន ដោយចិនចាត់ទុកការបញ្ជូនកងទ័ពជប៉ុនមកចូលរួមក្នុងជម្លោះតៃវ៉ាន់ជាការឈ្លានពាន និងបង្កើនជម្លោះការទូត ។ ចិននឹងការពារអធិបតេយ្យនៅក្រោមច្បាប់អន្តរជាតិ ដោយប្រឆាំងដាច់ខាតចំពោះពាក្យសម្តីនេះ បញ្ហាតៃវ៉ាន់ជាកិច្ចការផ្ទៃក្នុងរបស់ចិន ជប៉ុនមិនគួរជ្រៀតជ្រែក ពីព្រោះនឹងធ្វើឱ្យទំនាក់ទំនងការទូតចិន-ជប៉ុនធ្លាក់ចុះ ។

រដ្ឋាភិបាលចិនបានហាមឃាត់ពលរដ្ឋកុំឱ្យធ្វើដំណើរទៅជប៉ុន ខណៈនាយករដ្ឋមន្ត្រីចិនបដិសេធជួបមេដឹកនាំជប៉ុននៅក្រៅកិច្ចប្រជុំក្រុមប្រទេស G20 នៅអាហ្វ្រិកខាងត្បូងនាខែវិច្ឆិកានេះ ។ កាលពីថ្ងៃទី១៧ ខែវិច្ឆិកា ក្រុមហ៊ុនជប៉ុនធំៗបានចូលជួបលោកស្រី Sanae Takaichi ដើម្បីជំរុញឱ្យចរចាជាមួយចិនដោះស្រាយស្ថានការណ៍ការទូតតានតឹងកុំឱ្យប៉ះពាល់សេដ្ឋកិច្ចជប៉ុន ។

គួរបញ្ជាក់ថា ជប៉ុនបានបញ្ជូនលោក ខាណាអិ ម៉ាសាអាគិ ប្រធានការិយាល័យកិច្ចការអាស៊ីក្រសួងការបរទេសទៅទីក្រុងប៉េកាំង ដើម្បីចរចាកាត់បន្ថយស្ថានការណ៍តានតឹងជាមួយចិន ។ លោកបានជួបលោក Liu Jinsong ប្រធានការិយាល័យកិច្ចការអាស៊ីក្រសួងការបរទេសចិន និងបកស្រាយពីពាក្យសម្តីនាយករដ្ឋមន្ត្រីជប៉ុនពាក់ព័ន្ធនឹងតៃវ៉ាន់ ព្រមទាំងបញ្ជាក់ពីគោលជំហររបស់រដ្ឋាភិបាលជប៉ុនចំពោះតៃវ៉ាន់ គឺមិនផ្លាស់ប្តូរឡើយ ៕

ប្រទេសថៃ៖ មាត់ថាមិនខ្វល់ ប៉ុន្តែជាក់ស្ដែងដេកភ័យមិនស្ទើ! ពេលនេះនាយករដ្ឋមន្រ្ទីថៃ អនុទីន ឆាន់វិរៈគុល បានទម្លាក់ឥរិយាបថក្រអឺតក្រទមរបស់ខ្លួនលើបញ្ហាជាមួយប្រទេសកម្ពុជានៅចំពោះមុខសហរដ្ឋអាមេរិក និងបន្ទាប់មកបានអះអាងនៅចំពោះមុខអ្នកកាសែតថា ខ្លួនបានសន្ទនាតាមទូរស័ព្ទជាមួយលោក ត្រាំ រួចហើយ ដោយលោកត្រាំ សន្យាថានឹងបន្ថយពន្ធលើប្រទេសថៃបន្ថែមទៀត ប្រសិនបើថៃពន្លឿនការសហការជាមួយកម្ពុជា ក្នុងការបោសសម្អាតមីនតាមព្រំដែន។

យោងតាមការចុះផ្សាយរបស់សារព័ត៌មាន Khaosod បានឲ្យដឹងថា ចាប់តាំងពីមានការរិះគន់យ៉ាងខ្លាំងចំពោះឥរិយាបថជាតិនិយមជ្រុលរបស់លោក អនុទីន ថាអាចធ្វើឱ្យប៉ះពាល់ដល់ការចរចាពាណិជ្ជកម្មជាមួយសហរដ្ឋអាមេរិក នៅថ្ងៃទី18 ខែវិច្ឆិកា ឆ្នាំ2025 លោក អនុទីន បានធ្វើការអត្ថធិប្បាយជាលើកដំបូងតាមប្រព័ន្ធផ្សព្វផ្សាយថា ក្នុងអំឡុងពេលសម្រាករបស់លោកបន្ទាប់ពីធ្វើដំណើរមកពីប្រទេសចិន លោកបានជួបសន្ទនាតាមទូរស័ព្ទជាមួយប្រធានាធិបតីអាមេរិក និងនាយករដ្ឋមន្រ្តីម៉ាឡេសុី ពាក់ព័ន្ធនឹងចំណុចជាច្រើន។

លោក អនុទីន បានថ្លែងប្រាប់អ្នកកាសែតថា សហរដ្ឋអាមេរិកមានការព្រួយបារម្ភយ៉ាងខ្លាំងអំពីបញ្ហាមីននៅតាមបណ្ដាយព្រំដែនរវាងថៃ និងកម្ពុជា និងបានបញ្ជាក់ថា អាមេរិកចង់ឃើញការបោសសម្អាតមីនទាំងនោះឲ្យបានឆាប់រហ័សពីសំណាក់ភាគីទាំងពីរ។

នាយករដ្ឋមន្រ្តីថៃរូបនេះបានបន្ថែមថា សហរដ្ឋអាមេរិកបានសន្យានឹងបញ្ចុះពន្ធទំនិញនាំចូលសម្រាប់ប្រទេសថៃបន្ថែមទៀត ប្រសិនបើថៃបង្ហាញការចូលរួមយ៉ាងសកម្មជាមួយកម្ពុជាឡើងវិញ ដើម្បីពន្លឿនប្រតិបត្តិការបោសសម្អាតមីនតាមបណ្ដោយព្រំដែន។ ប៉ុន្តែលោក អនុទីន បាននិយាយយកល្អថា ការចូលរួមឬមិនចូលរួម គឺជាការសម្រេចចិត្តរបស់ថៃ ប៉ុន្តែយើងជ្រើសរើសថានឹងធ្វើវាក្រោមលក្ខខណ្ឌមនុស្សធម៌ និងដោយសារមានការស្នើសុំពីកម្ពុជា។

ជុំវិញការប្រកាសនេះ លោក អនុទីន បានប្រាប់ទៅកាន់សាធារណជនថាវាពាក់ព័ន្ធតែជាមួយបញ្ហាមីនមួយប៉ុណ្ណោះ ខណៈប្រទេសថៃនឹងនៅតែប្រកាន់ជំហររឹងមាំ មិនអនុវត្តតាមសេចក្ដីថ្លែងការណ៍រួមឡើងវិញទាំងស្រុងនោះទេ ដោយត្រូវរង់ចាំលិខិតសុំទោសផ្លូវការពីភាគីកម្ពុជាជាមុនសិន។

គួររម្លឹកថា កន្លងមកថៃតែងតែប្រកាសក្ដែងៗថាខ្លួនមិនខ្វល់ខ្វាយជាមួយនឹងប្រទេសដទៃណាទាំងអស់ក្នុងការបង្កកកិច្ចព្រមព្រៀងសន្តិភាពជាមួយកម្ពុជា។ ក្រោយមកមិនបានប៉ុន្មាន នៅពេលដែលសហរដ្ឋអាមេរិក និយាយថានឹងផ្អាកការចរចាពីបញ្ហាពន្ធគយ រដ្ឋាភិបាលថៃក៏ត្រូវបានសមាជិកសភា និងមហាជនរិះគន់យ៉ាងខ្លាំងចំពោះការប្រកាសដោយគ្មានការគិតពិចារណាបែបនេះ។

យ៉ាងណាមិញ ជុំវិញការលើកឡើងថាអាមេរិកបានធ្វើការនឹងបញ្ចុះពន្ធបន្ថែមលើទំនិញនាំចូលរបស់ថៃនោះ ដូចការអះអាងរបស់លោក អនុទីន យើងមិនទាន់ឃើញមានការបញ្ជាក់ពីខាងសេតវិមាន ឬមានការលើកឡើងដោយប្រព័ន្ធផ្សព្វផ្សាយអន្តរជាតិណាមួយ ក្រៅពីប្រព័ន្ធផ្សព្វផ្សាយថៃឡើយ។ ដូច្នេះមានតែរង់ចាំមើលបន្តថា តើវាគឺជាការពិតឬមួយយ៉ាងណា៕

ប្រទេសជប៉ុន ៖ ចាប់តាំងពីខែមេសា ឆ្នាំ២០២៥ ប្រទេសជប៉ុនមានហេតុការណ៍ខ្លាឃ្មុំវាយប្រ.ហារពលរដ្ឋរហូតដល់២២០លើក និងមានពលរដ្ឋបាត់បង់ជីវិ.តដោយសារខ្លាឃ្មុំ ចំនួន១៣នាក់ ក្នុងនោះ៧នាក់បាត់បង់ជីវិ.តកាលពីខែតុលា ដែលជាពេលខ្លាឃ្មុំដើររកចំណីស៊ីច្រើនមុនត្រឡប់ចូលព្រៃវិញ ។ អាជ្ញាធរជប៉ុនបានព្យាយាមរកវិធីផ្សេងៗការពារពលរដ្ឋពីការវាយប្រ.ហាររបស់ខ្លាឃ្មុំ ហើយវិធីចុងក្រោយ គឺប្រើប្រាស់ដ្រូនបណ្តេញខ្លាឃ្មុំ ។

នៅផ្នែកខាងក្រោមរបស់ដ្រូនបំពាក់ដោយឧបករណ៍បំពងសំឡេងយ៉ាងធំដើម្បីបើកសំឡេងឆ្កែព្រុស ខណៈផ្នែកចំហៀងបំពាក់ឧបករណ៍បាញ់បណ្តេញខ្លាឃ្មុំ ។ ខ្លាឃ្មុំចូលចិត្តវាយប្រហារពលរដ្ឋជប៉ុនដែលរស់នៅតំបន់ឆ្ងាយៗពុំសូវមានភ្ញៀវទេសចរ ប៉ុន្តែកាលពីពេលថ្មីៗនេះ មានហេតុការណ៍កូនខ្លាឃ្មុំខាំភ្ញៀវទេសចរជនជាតិអេស្ប៉ាញនៅភូមិបុរាណឈិរ៉ាខាវ៉ាកុ ដែលជាភូមិទេសចរណ៍ដ៏ល្បីល្បាញ និងត្រូវបានអង្គការយូណេស្កូចុះក្នុងបញ្ជីបេតិកភណ្ឌពិភពលោក ។

តាមការចុះផ្សាយរបស់សារព័ត៌មានបរទេសកាលពីថ្ងៃទី១៨ ខែវិច្ឆិកា ឆ្នាំ២០២៥ ប្រទេសជប៉ុននៅតែប្រឈមនឹងបញ្ហាខ្លាឃ្មុំវាយប្រហារពលរដ្ឋ និងភ្ញៀវទេសចរ ដែលធ្វើឱ្យអាជ្ញាធរជប៉ុនប្រើប្រាស់ដ្រូនបណ្តេញខ្លាឃ្មុំ បន្ទាប់ពីប្រើប្រាស់វិធីជាច្រើន ។ ដ្រូននេះផលិតដោយក្រុមហ៊ុន Aero Japan ហើយក្រុមហ៊ុនបានសាកល្បងប្រើប្រាស់ដ្រូននៅចម្ការផ្លែឈើក្នុងទីក្រុងហ៊ិតាក់ ខេត្តគីហ្វុ ភាគកណ្តាលប្រទេសដើម្បីការពារកុំឱ្យខ្លាឃ្មុំលួចផ្លែឈើ ។

ការប្រើប្រាស់ដ្រូនបណ្តេញខ្លាឃ្មុំ គឺជាវិធីថ្មីដែលអាជ្ញាធរជប៉ុនប្រើប្រាស់ដើម្បីផ្តល់សុវត្ថិភាពដល់ពលរដ្ឋ និងភ្ញៀវទេសចរ ក្រោយពីមានហេតុការណ៍ខ្លាឃ្មុំវាយប្រហារមនុស្សជាញឹកញាប់នៅឆ្នាំ២០២៥ ជាពិសេស ខេត្តភាគខាងជើង ។ តាមទិន្នន័យ គឺចាប់ពីខែមេសា មានហេតុការណ៍ខ្លាឃ្មុំវាយប្រហារមនុស្សរហូតដល់២២០លើក និងមានមនុស្សបាត់បង់ជីវិត១៣នាក់ ក្នុងនោះ៧នាក់បាត់បង់ជីវិតកាលពីខែតុលា ដែលជាពេលខ្លាឃ្មុំដើររកចំណីស៊ីច្រើនមុនត្រឡប់ចូលព្រៃវិញ ។

ក្រៅពីនេះ អាជ្ញាធរជប៉ុនបានដាក់ស្លាកសញ្ញាដាស់តឿន «ប្រយ័ត្នខ្លាឃ្មុំធ្វើបាប» នៅតំបន់ទេសចរណ៍ ព្រមទាំងណែនាំឱ្យភ្ញៀវទេសចរដើរកម្សាន្តជាក្រុម និងហាមទៅតំបន់មួយចំនួនពេលព្រលប់ ។ កាលពីដើមខែវិច្ឆិកា កងទ័ពជប៉ុនបានជួយចាប់ខ្លាឃ្មុំជាមួយអាជ្ញាធរ ខណៈរដ្ឋាភិបាលបន្ធូរបន្ថយច្បាប់ដោយអនុញ្ញាតឱ្យអ្នកបរបាញ់សត្វអាចបាញ់ខ្លាឃ្មុំ ក្រោយពីអាមេរិក ចិន និងអង់គ្លេស ដាស់តឿនពលរដ្ឋខ្លួនឱ្យប្រយ័ត្នសុវត្ថិភាព និងគេចពីខ្លាឃ្មុំពេលទៅលេងជប៉ុន ។ កាលពីថ្ងៃទី១៦ ខែវិច្ឆិកា ស្ត្រីជប៉ុនម្នាក់បានស្លាប់ក្នុងស្រែនៅខេត្តអាគិតាក់ ភាគខាងជើងប្រទេស ហើយសមត្ថកិច្ចសន្និដ្ឋានថា ស្លាប់ដោយសារខ្លាឃ្មុំ ។

គួរបញ្ជាក់ថា ខ្លាឃ្មុំពណ៌ខ្មៅនៅតំបន់អាស៊ីត្រូវបានចាត់ទុកជាសត្វជិតផុតពូជលើពិភពលោក ប៉ុន្តែខ្លាឃ្មុំប្រភេទនេះនៅជប៉ុនបានកើនឡើងរហូតដល់៣ដងតាំងពីឆ្នាំ២០១២ ដោយសារការបាញ់ខ្លាឃ្មុំធ្លាក់ចុះ ។ តាមអ្នកជំនាញ គឺបម្រែបម្រួលអាកាសធាតុធ្វើឱ្យរុក្ខជាតិក្នុងព្រៃជាចំណីរបស់ខ្លាឃ្មុំធ្លាក់ចុះ ព្រមទាំងចំនួនពលរដ្ឋជប៉ុនរស់នៅជនបទតិចតួច ខណៈកសិដ្ឋាននានាត្រូវបោះបង់ចោលកាន់តែច្រើន ជាមូលហេតុធ្វើឱ្យខ្លាឃ្មុំជាច្រើនក្បាលចេញមករកចំណីជិតភូមិ ៕

ប្រទេសថៃ ៖ នាយករដ្ឋមន្ត្រីថៃ លោក Anutin Charnvirakul បាននិយាយកាលពីថ្ងៃទី១៨ ខែវិច្ឆិកា ឆ្នាំ២០២៥ ពីការបង្កើនទំនាក់ទំនងជិតស្និទ្ធជាមួយចិនផ្នែកពាណិជ្ជកម្ម ទេសចរណ៍ និងកសិកម្ម ដោយសមាគមទេសចរណ៍ថៃនឹងជំរុញវិធានការទាក់ទាញភ្ញៀវទេសចរចិន រួមទាំងសហការបង្ក្រាបការឆបោ.កអនឡាញនៅប្រទេសថៃ ។ ការបង្កើនទំនាក់ទំនងជិតស្និទ្ធថៃ-ចិន ស្របពេលអាមេរិកផ្អាកចរចាពន្ធទំនិញជាមួយថៃ រហូតដល់ថៃអនុវត្តឱ្យបានពេញលេញតាមកិច្ចព្រមព្រៀងសន្តិភាពជាមួយកម្ពុជា ដែលបានចុះហត្ថលេខារួមគ្នានៅទីក្រុងគូឡាឡាំពួរ ប្រទេសម៉ាឡេស៊ី ។

អ្នកនាំពាក្យរដ្ឋាភិបាលថៃ លោក Siripong Angkasakulkiat បាននិយាយកាលពីថ្ងៃទី១៨ ខែវិច្ឆិកា នៅវិមានរដ្ឋាភិបាលថា លោក គិតទិផុង តេរតនាឆ័យ នាយកសមាគមពាណិជ្ជកម្មថៃ-ចិន បាននាំសមាជិកសមាគមមកជួបពិភាក្សាជាមួយលោកនាយករដ្ឋមន្ត្រី Anutin អំពីគោលនយោបាយការនាំចូល និងនាំចេញទំនិញថៃទៅក្រៅប្រទេស ព្រមទាំងពិភាក្សាពីការបង្កើនទំនាក់ទំនងជិតស្និទ្ធជាមួយចិន ។ សមាជិកសមាគមដែលមកជួបពិភាក្សានេះ គឺមកពីក្រុមហ៊ុនជាច្រើនទាំងផ្នែកសណ្ឋាគារ អចលនទ្រព្យ ម្ហូបអាហារ និងក្រុមហ៊ុនផលិតសម្ភារៈអគ្គិសនី ។

លោកនាយករដ្ឋមន្ត្រី Anutin បាននិយាយទៅកាន់សមាជិកសមាគមពាណិជ្ជកម្មថៃ-ចិនថា ថៃមានទំនាក់ទំនងជិតស្និទ្ធជាមួយចិនរហូតមក ហើយក្នុងកិច្ចប្រជុំ APEC កន្លងមក លោកមានឱកាសជជែកជាមួយប្រធានាធិបតីចិន លោក Xin Jinping និងបានបញ្ជាក់ពីការប្តេជ្ញាចិត្តរបស់រដ្ឋាភិបាលថៃកំណត់គោលនយោបាយជំរុញសេដ្ឋកិច្ចតាមរយៈកាស៊ីណូ ។ ក្រៅពីនេះ លោកបញ្ជាក់ពីថៃមានសុវត្ថិភាពសម្រាប់ភ្ញៀវទេសចរចិន ខណៈលោក Xi សន្យាជំរុញឱ្យភ្ញៀវទេសចរចិនមកកម្សាន្តនៅប្រទេសថៃ ។

នាយករដ្ឋមន្ត្រីថៃក៏បាននិយាយពីព្រះមហាក្សត្រថៃ និងព្រះមហាក្សត្រីយាងទៅទីក្រុងប៉េកាំង ដោយព្រះអង្គបានពិភាក្សាជាមួយប្រធានាធិបតីចិន លោក Xi និងនាយករដ្ឋមន្ត្រីចិន ។ ការពិភាក្សានេះបន្តពីការពិភាក្សាក្នុងកិច្ចប្រជុំ APEC ជាពិសេស ជំរុញឱ្យចិនជួយទិញទិន្នផលកសិកម្មថៃ ខណៈចិនថា នឹងជួយទិញញអង្ករថៃចំនួន៥សែនតោន ព្រះមហាក្សត្រថៃក៏បានអញ្ជើញប្រធានាធិបតីចិនធ្វើដំណើរទស្សនកិច្ចមកកាន់ប្រទេសថៃផងដែរ ។

រដ្ឋាភិបាលថៃមើលឃើញការចាប់អារម្មណ៍របស់ចិន ហើយរដ្ឋាភិបាលថៃនឹងបង្កើនទំនាក់ទំនងជាមួយចិនលើគ្រប់វិស័យឱ្យកាន់តែស្អិតរមួត ទាំងសេដ្ឋកិច្ច ទេសចរណ៍ សន្តិសុខ និងការផ្លាស់ប្តូរវប្បធម៌ ។ ថៃនិងចិនមានទំនាក់ទំនងជិតស្និទ្ធដូចបងប្អូន វានឹងធ្វើឱ្យកិច្ចសហការរវាងប្រទេសទាំងពីរកាន់តែរឹងមាំដើម្បីផលប្រយោជន៍រួមគ្នារបស់ពលរដ្ឋថៃ-ចិន ។

ចំណែកសមាគមពាណិជ្ជកម្មថៃ-ចិនបាននិយាយពីការជំរុញពាណិជ្ជកម្ម និងវិនិយោគរវាងប្រទេសទាំងពីរ ព្រមទាំងជំរុញឱ្យរដ្ឋាភិបាលថៃបង្ក្រាបការឆបោកអនឡាញនៅប្រទេសថៃ ដោយធ្វើវិសោធនកម្មច្បាប់ដើម្បីកំណត់វិធានការតឹងរ៉ឹង និងដាក់ទោសក្រុមឆបោកអនឡាញ ។ សមាគមក៏បានជំរុញឱ្យផ្តល់ភាពងាយស្រួលដល់ភ្ញៀវទេសចរចិន តាមរយៈការទូទាត់ប្រាក់ឌីជីថល ដូចជា ៖ Alipay និង WeChat Pay ខណៈនាយករដ្ឋមន្ត្រីថៃយល់ព្រមតាមសំណូមពររបស់សមាគម និងប្តេជ្ញាជំរុញកិច្ចសហការជាមួយចិនឱ្យទទួលបានលទ្ធផលផ្លែផ្កា ដើម្បីផលប្រយោជន៍យូរអង្វែងរបស់ប្រទេសទាំងពីរ ។

គួរបញ្ជាក់ថា ថៃបង្កើនទំនាក់ទំនងជិតស្និទ្ធជាមួយចិនលើគ្រប់វិស័យនេះ ស្របពេលអាមេរិកផ្អាកការចរចាពន្ធទំនិញជាមួយថៃ រហូតដល់ថៃអនុវត្តឱ្យបានពេញលេញតាមកិច្ចព្រមព្រៀងសន្តិភាពជាមួយកម្ពុជា ដែលបានចុះហត្ថលេខារួមគ្នានៅទីក្រុងគូឡាឡាំពួរ ប្រទេសម៉ាឡេស៊ី ។ លោកប្រធានាធិបតី Trump ជំរុញឱ្យរដ្ឋាភិបាលថៃងាកមកគោរពកិច្ចព្រមព្រៀងសន្តិភាពឡើងវិញ បញ្ឈប់ការឈ្លានពានកម្ពុជា ក្រោយពីនាយករដ្ឋមន្ត្រីថៃបញ្ចប់កិច្ចព្រមព្រៀងសន្តិភាពដោយចោទប្រកាន់កម្ពុជាបង្កប់មីនថ្មី និងទាមទារឱ្យកម្ពុជាសូមទោស ទាំងដែលកម្ពុជាពុំបានបង្កប់មីនថ្មីដូចការចោទប្រកាន់ឡើយ ។

អ្នកវិភាគថៃមើលឃើញថា ព្រះមហាក្សត្រ និងរដ្ឋាភិបាលថៃបានយកចិនជាខ្នងបង្អែកតាមរយៈការបង្កើនទំនាក់ទំនងជិតស្និទ្ធជាមួយចិន ខណៈចិនចាត់ទុកថៃជាបងប្អូន ។ ការបង្កើនទំនាក់ទំនងជិតស្និទ្ធរវាងប្រទេសទាំងពីរ ក្រោយពីថៃមើលឃើញមេដឹកនាំអាមេរិកមានជំហរគាំទ្រកម្ពុជា និងជំរុញសន្តិភាពកម្ពុជា-ថៃ ៕