ប្រទេសថៃ ៖ ក្រោយពីនាយករដ្ឋមន្ត្រីថៃ លោក Anutin Charnvirakul ប្រកាសកាលពីថ្ងៃទី១១ ខែវិច្ឆិកា ឆ្នាំ២០២៥ ថា កិច្ចព្រមព្រៀងសន្តិភាពកម្ពុជា-ថៃ ដែលចុះហត្ថលេខានៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី២៦ ខែតុលា ក្រោមវត្តមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ដល់ទីបញ្ចប់ហើយ ដោយចោទប្រកាន់កម្ពុជាបង្កប់មីនថ្មីធ្វើឱ្យកងទ័ពខ្លួនរងរបួសនៅខេត្តស៊ីសាកេត គណបក្សប្រជាជន (គណបក្សប្រឆាំង) បានចេញសេចក្តីថ្លែងការណ៍ណែនាំឱ្យរដ្ឋាភិបាលថៃអនុវត្តការទូត គឺនាយករដ្ឋមន្ត្រីថៃត្រូវទូរស័ព្ទទៅលោក Trump និងលោក Anwar ដើម្បីទម្លាក់កំហុសលើកម្ពុជាបំពានកិច្ចព្រមព្រៀងសន្តិភាព រួមទាំងផ្ញើលិខិតទៅអាមេរិកឱ្យបញ្ឈប់កិច្ចសហការកងទ័ពជាមួយកម្ពុជា ។

គណបក្សប្រជាជនបានបង្ហោះសេចក្តីថ្លែងការណ៍ក្នុងហ្វេសប៊ុកក្រោមចំណងជើងថា «សំណើបន្ទាន់ករណីជម្លោះកម្ពុជា-ថៃ រដ្ឋាភិបាលថៃត្រូវតែប្រញាប់អនុវត្តការទូតដើម្បីមានប្រៀបលើកម្ពុជា» ។ ការចេញសេចក្តីថ្លែងការណ៍របស់គណបក្សនេះ ក្រោយពីកងថៃប្រឌិតរឿងកងទ័ពខ្លួន២នាក់ ជាន់មីនរងរបួសនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត (ទល់មុខប្រាសាទព្រះវិហារ) និងចោទប្រកាន់កម្ពុជាបង្កប់មីនថ្មី ហើយធ្វើឱ្យលោកនាយករដ្ឋមន្ត្រី Anutin ប្រកាសឈប់អនុវត្តកិច្ចព្រមព្រៀងសន្តិភាពជាមួយកម្ពុជាដែលចុះហត្ថលេខាកាលពីថ្ងៃទី២៦ ខែតុលា ។

គណបក្សប្រជាជនបានណែនាំវិធានការការទូតដល់រដ្ឋាភិបាលថៃដើម្បីមានប្រៀបលើកម្ពុជា ក្រោយពីថៃប្រកាសឈប់អនុវត្តកិច្ចព្រមព្រៀងសន្តិភាពជាឯកតោភាគី ក្រោមហេតុផលកងទ័ពខ្លួនជាន់មីន ដោយឱ្យលោកនាយករដ្ឋមន្ត្រី Anutin ទូរស័ព្ទជជែកជាមួយប្រធានាធិបតីអាមេរិក លោក Trump និងនាយករដ្ឋមន្ត្រីម៉ាឡេស៊ី លោក Anwar ជាបន្ទាន់ ក្នុងឋានៈបុគ្គលទាំង២រូបបានធ្វើសាក្សីក្នុងពិធីចុះហត្ថលេខាលើកិច្ចព្រមព្រៀងសន្តិភាព ដោយបញ្ជាក់ពីគោលជំហរថា ថៃចង់គោរពកិច្ចព្រមព្រៀងសន្តិភាព ថៃបានអនុវត្តកិច្ចព្រមព្រៀងរហូតមក និងទម្លាក់កំហុសលើកម្ពុជាល្មើសកិច្ចព្រមព្រៀង ។ ថៃត្រូវប្រាប់អាមេរិកថា ចង់ឱ្យកម្ពុជាទទួលខុសត្រូវចំពោះហេតុការណ៍ផ្ទុះមីន ថៃនឹងប្រើប្រាស់សិទ្ធិការពារខ្លួន បើកម្ពុជាបំផ្លាញសន្តិភាព ។

គណបក្សនេះថែមទាំងណែនាំឱ្យរដ្ឋាភិបាលថៃប្រញាប់អនុវត្តការទូតជាមួយអន្តរជាតិ មុនពេលសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ទូរស័ព្ទទៅប្រធានាធិបតីអាមេរិក លោក Trump និងនាយករដ្ឋមន្ត្រីម៉ាឡេស៊ី លោក Anwar ពីព្រោះគណបក្សយល់ថា ការជជែកផ្ទាល់ជាមួយមេដឹកនាំពិភពលោក ដើម្បីឱ្យថៃមានប្រៀបប្រាប់ពីគោលជំហរ និងរាយការណ៍ស្ថានការណ៍លម្អិត ។ លើសពីនេះ ត្រូវនិយាយថា ថៃចង់រក្សាកិច្ចព្រមព្រៀងសន្តិភាព និងទម្លាក់កំហុសលើកម្ពុជាបំពានកិច្ចព្រមព្រៀងសន្តិភាពដើម្បីកុំឱ្យថៃរងការស្ទីបន្ទោសពីអន្តរជាតិ ។

គណបក្សណែនាំឱ្យរដ្ឋាភិបាលថៃផ្ញើលិខិតជាផ្លូវការអំពាវនាវឱ្យអាមេរិកបញ្ឈប់កិច្ចសហការកងទ័ពជាមួយកម្ពុជា ហើយរដ្ឋាភិបាលថៃត្រូវរាយការណ៍ទៅអាមេរិកដោយទម្លាក់កំហុសលើកម្ពុជាថា បំផ្លាញកិច្ចព្រមព្រៀងសន្តិភាពដែលជាបំណងប្រាថ្នារបស់លោក Trump ។ ក្រៅពីនេះ ត្រូវលាបពណ៌កម្ពុជាជាប្រទេសឆបោកអនឡាញ និងកន្លែងលាយលុយកខ្វក់ ដោយថៃត្រូវសុំកិច្ចសហការពីពិភពលោកចាត់ការបញ្ហានេះ បើទោះជាថៃជាប្រទេសឆបោកអនឡាញដ៏ធំលើពិភពលោកក្តី ។ គណបក្សនេះជំរុញឱ្យរដ្ឋាភិបាលថៃអនុវត្តការទូតដើម្បីមានប្រៀបជាមួយអន្តរជាតិ រួមទាំងអាចទម្លាក់កំហុសលើកម្ពុជា ថាជាភាគីបំពានកិច្ចព្រមព្រៀងសន្តិភាព ព្រមទាំអត្រូវពន្យល់ប្រាប់ពិភពលោកពីថៃប្រើប្រាស់កម្លាំងទ័ពនៅព្រំដែន គឺដើម្បីការពារខ្លួន ។

គួរបញ្ជាក់ថា ហេតុការណ៍ផ្ទុះមីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត គ្រាន់តែជាការសម្តែងបំភាន់ភ្នែករបស់ថៃប៉ុណ្ណោះ ដើម្បីកុំឱ្យអាមេរិកដាក់សម្ពាធឱ្យថៃដោះលែងវីរកងទ័ពកម្ពុជាទាំង១៨រូប ព្រមទាំងជាលេសលុបចោលកិច្ចព្រមព្រៀងសន្តិភាពនៅទីក្រុងកូឡាឡាំពួរ ដែលប្រធានាធិបតីអាមេរិកព្យាយាមឱ្យកម្ពុជា-ថៃទទួលបានសន្តិភាពពេញលេញ ។ ថៃមិនសប្បាយចិត្តយ៉ាងខ្លាំងដែលអាមេរិកមានទំនាក់ទំនងល្អ និងមានកិច្ចសហការកងទ័ពជាមួយកម្ពុជា ទើបព្យាយាមរកល្បិចឱ្យអាមេរិកលុបចោលកិច្ចសហការកងទ័ពជាមួយកម្ពុជា ដោយចោទប្រកាន់កម្ពុជាបង្កប់មីន ។

អាជ្ញាធរមីនកម្ពុជាសោកស្តាយចំពោះសារព័ត៌មានថៃមួយចំនួនដែលបានផ្សព្វផ្សាយក្នុងចេតនាចោទប្រកាន់ និងបង្ខូចកេរ្តិ៍ឈ្មោះកម្ពុជា ប្រើប្រាស់ និងដាក់មីនថ្មី ខណៈកម្ពុជាកំពុងខិតខំប្រឹងប្រែងលុបបំបាត់គ្រាប់មីន និងទុក្ខវេទនារបស់សហគមន៍ ដែលបង្កឡើងដោយមីន និងសំណល់ជាតិផ្ទុះពីសង្គ្រាម ព្រមទាំងទទួលបានការវាយតម្លៃខ្ពស់ពីសហគមន៍អន្តរជាតិ ថាជាប្រទេសគំរូ និងឈានមុខក្នុងវិស័យសកម្មភាពមីនសាកល ។ ការចោទប្រកាន់គ្មានមូលដ្ឋាននេះ ប៉ះពាល់ដល់កិច្ចខិតខំប្រឹងប្រែងនៃក្រុមការងារសម្របសម្រួលរួម (JCTF) ដែលបានបង្កើតឡើងដោយប្រទេសទាំងពីរ ដើម្បីជំរុញដល់ការបោសសម្អាតមីនមនុស្សធម៌ និងបង្កើនទំនុកចិត្តរវាងគ្នានៅតាមបណ្តោយព្រំដែន ៕

ប្រទេសថៃ៖ លោក អនុទីន ឆានវីរៈគុល នាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានហែកចោលសេចក្ដីថ្លែងការណ៍រួម និងធ្វើការប្រកាសក្នុងឯកសណ្ឋានជាយោធាថា «សន្តិភាពត្រូវបានបញ្ចប់ហើយ» ក្នុងនាមថៃជាប្រទេសឯករាជ្យ ការសម្រេចចិត្តនេះនឹងមិនចាំបាច់ត្រូវរាយការណ៍ ឬពិភាក្សាជាមួយភាគីណាមួយឡើយ។ នេះបើយោងតាមការចុះផ្សាយរបស់សារព័ត៌មាន Khaosod ។

នៅរសៀល ថ្ងៃទី 11 ខែវិច្ឆិកា ឆ្នាំ 2025 លោក អនុទីន ក្នុងឱកាសចុះត្រួតពិនិត្យនៅមូលដ្ឋានប្រតិបត្តិការឥន្ទ្រាម៉ាន់ (ភូម៉ាក់ឃួ) ស្រុកកន្ទាឡាក់ ខេត្តស៊ីសាកេត បានប្រកាសថា ចំណុចទាំង៤ ដែលកន្លងមកបានឯកភាពគ្នាជាមួយកម្ពុជានៅក្នុងកិច្ចព្រមព្រៀងសន្តិភាពនោះ នឹងមិនត្រូវបានថៃអនុវត្តបន្តទៀតទេ ពោលគឺរដ្ឋាភិបាលថៃនឹងប្រគល់សិទ្ធិអំណាចទៅឲ្យកងទ័ពក្នុងការដោះស្រាយបញ្ហាព្រំដែន។

លោក អនុទីន បានបន្ថែមថា ការសម្រេចបញ្ចប់កិច្ចព្រមព្រៀងសន្តិភាពជាផ្លូវការជាមួយកម្ពុជា នឹងត្រូវធ្វើឡើងចាប់ពីពេលប្រកាសនេះទៅតែម្ដង ដោយមិនត្រូវការរាយការណ៍ទៅកាន់លោក ដូណាល់ ត្រាំ ឬភាគីណាមួយឡើយ។ លោកបានគូសបញ្ជាក់ថា «ក្នុងនាមថៃ គឺជាប្រទេសប្រជាធិបតេយ្យមួយ និងឯករាជ្យ ដូច្នេះលោកមិនចាំបាច់រាយការណ៍ទៅកាន់នរណាម្នាក់ទៀតឡើយ។ ចាប់ពីពេលនេះតទៅ លោកនឹងធ្វើអ្វីដែលមានប្រយោជន៍សម្រាប់ប្រទេសថៃតែប៉ុណ្ណោះ ប្រសិនបើយើងត្រូវឆ្លើយតប យើងនឹងឆ្លើយតបភ្លាមៗតែម្ដង ដោយមិនចាំបាច់មានការពិភាក្សា ការពិគ្រោះយោបល់ ឬការអនុញ្ញាតពីភាគីណាមួយឡើយ។

ជាមួយនឹងការប្រកាសគេបានកត់សម្គាល់ឃើញថា ប្រទេសថៃកំពុងតែត្រៀមបញ្ជូនអាវុ.ធ និងកងទ័ពមកកាន់ព្រំដែនវិញផងដែរ។ ជុំវិញសកម្មភាពនេះ លោក ណាត់ថាផន ណាក់ផានិត បានបដិសេធសុំមិនពន្យល់លម្អិតទៅកាន់អ្នកកាសែត ដោយលើកឡើងត្រឹមថា ប្រទេសថៃមាននីតិវិធីរួចជាស្រេចសម្រាប់ការប្រើប្រាស់កម្លាំងយោធា។

យ៉ាងណាមិញ ក្រោយបានឃើញពីការប្រកាសខាងលើរបស់ថៃ មេបញ្ជាការកងកម្លាំងការពារជាតិម៉ាឡេស៊ី ឧត្តមសេនីយ៍ Tan Sri Mohd Nizam Jaffar បានប្រាប់ទៅកាន់ថៃចំៗថា ថៃត្រូវតែបន្ត «កិច្ចព្រមព្រៀងសន្តិភាព» និងគ្មានការរំខានណាមួយឡើយ ព្រោះការពន្យារពេលណាមួយអាចប្រឈមនឹងហានិភ័យនៃការវិលត្រឡប់ទៅរកជម្លោះតានតឹងដូចកាលពីមុនវិញ។

ដូចគ្នានេះដែរ រាជរដ្ឋាភិបាលកម្ពុជា ក៏បានបង្ហាញសញ្ញាព្រួយបារម្ភយ៉ាងខ្លាំងផងដែរចំពោះ ការសម្រេចចិត្តដោយឯកតោភាគីរបស់ភាគីថៃ ប៉ុន្តែកម្ពុជា នឹងនៅតែបន្តប្តេជ្ញាចិត្តក្នុងការធ្វើការឱ្យបានជិតស្និទ្ធជាមួយភាគីថៃ ក្នុងការលើកកម្ពស់សន្តិភាព និងស្ថិរភាពរវាងប្រទេសទាំងពីរ ជាពិសេសធានាដល់សន្តិសុខ និងសុវត្ថិភាពរបស់ប្រជាជនស៊ីវិល ស្របតាមសេចក្តីថ្លែងការណ៍រួមស្តីពីសន្តិភាពរវាងកម្ពុជានិងថៃ ដែលត្រូវបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥៕

ប្រទេសថៃ ៖ បន្ទាប់ពីកម្ពុជា-ថៃអនុវត្តតាមកិច្ចព្រមព្រៀងសន្តិភាពមិនយូរប៉ុន្មាន ភាគីថៃក៏ប្រឌិតរឿងកងទ័ពខ្លួនជាន់មីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ដើម្បីយកលេសឈប់អនុវត្តកិច្ចព្រមព្រៀងសន្តិភាព និងចាប់ផ្តើមបង្កជម្លោះ លាបពណ៌កម្ពុជាជាថ្មី ។ នៅថ្ងៃទី១១ ខែវិច្ឆិកា ឆ្នាំ២០២៥ នាយករដ្ឋមន្ត្រីថៃ លោក Anutin Charnvirakul បានបញ្ជាឱ្យក្រសួងការពារជាតិ និងក្រសួងការបរទេសឈប់អនុវត្តកិច្ចព្រមព្រៀងសន្តិភាព បញ្ឈប់ការចរចា និងបើកដៃឱ្យកងទ័ពចាត់ការរឿងព្រំដែន ។

អ្នកនាំពាក្យរដ្ឋាភិបាលថៃ លោក Siripong Angkasakulkiat និយាយនៅថ្ងៃទី១១ ខែវិច្ឆិកាថា លោកនាយករដ្ឋមន្ត្រី Anutin សោកស្តាយយ៉ាងខ្លាំងចំពោះហេតុការណ៍កងទ័ពថៃជាន់មីនរងរបួសនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ។ លោកបញ្ជាឱ្យក្រសួងការពារជាតិ និងក្រសួងការបរទេសឈប់អនុវត្តកិច្ចព្រមព្រៀងសន្តិភាពដែលចុះហត្ថលេខានៅទីក្រុងកូឡាឡាំពួរ ហើយងាកមកបង្កើនវិធានការសន្តិសុខតាមព្រំដែន និងការពារសុវត្ថិភាពពលរដ្ឋ ។

លោក Siripong បាននិយាយពីលទ្ធផលកិច្ចប្រជុំក្រុមប្រឹក្សាសន្តិសុខជាតិកាលពីព្រឹកថ្ងៃទី១១ ខែវិច្ឆិកា ដែលដឹកនាំដោយនាយករដ្ឋមន្ត្រីថៃ ថា ក្រុមប្រឹក្សាសន្តិសុខជាតិសម្រេចឱ្យស្ថាប័នពាក់ព័ន្ធ រួមមាន ៖ ក្រសួងការពារជាតិ និងក្រសួងការបរទេសឈប់អនុវត្តតាមសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាព (Joint Declaration) ដែលចុះហត្ថលេខានៅទីក្រុងកូឡាឡាំពួរ ប្រទេសម៉ាឡេស៊ី រហូតដល់ស្ថានការណ៍ធូរស្រាល ។ នាយករដ្ឋមន្ត្រីថៃបានបញ្ជាឱ្យក្រសួងការពារជាតិរឹតបន្តឹងវិធានការកងទ័ពដើម្បីការពារអធិបតេយ្យ និងសុវត្ថិភាពពលរដ្ឋនៅព្រំដែន ។

ក្រៅពីនេះ នាយករដ្ឋមន្ត្រីថៃបញ្ជាឱ្យក្រសួងការបរទេសចាត់វិធានការការទូតឱ្យពិភពលោកយល់ពីមូលហេតុដែលថៃឈប់អនុវត្តកិច្ចព្រមព្រៀងសន្តិភាព ជាពិសេស បណ្តាប្រទេសសង្កេតការណ៍ ព្រមទាំងបញ្ជាឱ្យក្រសួងមហាផ្ទៃជូនដំណឹងទៅពលរដ្ឋនៅខេត្តជាប់ព្រំដែនទាំង៧ ត្រៀមខ្លួនពេលកើតហេតុការណ៍បន្ទាន់ ខណៈក្រសួងអប់រំត្រូវបង្ហាត់កូនសិស្សឱ្យត្រៀមខ្លួន ។ រីឯក្រសួងសុខាភិបាលក៏ត្រៀមខ្លួនដែរ ករណីពលរដ្ឋនៅខេត្តជាប់ព្រំដែនមានបញ្ហា គឺត្រៀមគ្រូពេទ្យ និងការពារមន្ទីរពេទ្យឱ្យរងផលប៉ះពាល់តិចតួចបំផុត ជាពិសេស ការជម្លៀសអ្នកជំងឺ ។

គួរបញ្ជាក់ថា ថៃបានសម្តែងល្ខោនរឿងកងទ័ពជាន់មីនដើម្បីទម្លាក់កំហុស និងលាបពណ៌កម្ពុជាពេលស្ថានការណ៍ស្ងប់ស្ងាត់ ដែលការសម្តែងល្ខោននេះដើម្បីយកលេសមិនដោះលែងវីរកងទ័ពកម្ពុជាទាំង១៨រូប ដែលកងទ័ពថៃចាប់ខ្លួនដោយខុសច្បាប់ និងឈប់អនុវត្តកិច្ចព្រមព្រៀងសន្តិភាព ជាការផ្តួចផ្តើមគំនិតដោយប្រធានាធិបតីអាមេរិក លោក Donald Trump ។ ពលរដ្ឋថៃបន្ទោសនាយករដ្ឋមន្ត្រីរបស់ខ្លួនដែលចុះកិច្ចព្រមព្រៀងសន្តិភាពជាមួយកម្ពុជា ទាំងដែលកងទ័ពថៃពុំទាន់ដណ្តើមបានទឹកដីកម្ពុជានៅឡើយ ហើយការឈប់អនុវត្តកិច្ចព្រមព្រៀងសន្តិភាពទទួលបានការសាទរយ៉ាងខ្លាំងពីសង្គមថៃ ។

ថៃមិនដោះលែងវីរកងទ័ពកម្ពុជា យើងគួរទុកឱ្យសហគមន៍អន្តរជាតិជួយតាមដានទង្វើរបស់ថៃ ពីព្រោះថៃកែប្រែពាក្យសម្តីរហូតមក ម្តងថាដោះលែង ម្តងមិនដោះលែង ថៃដាក់លក្ខខណ្ឌអស់ពីមួយ ចូលលក្ខខណ្ឌមួយទៀត ពេលកម្ពុជាអនុវត្តតាមលក្ខខណ្ឌ ថៃក៏ប្រឌិតរឿងកងទ័ពជាន់មីន ដោយពួកគេបានប្រើគ្រប់ល្បិច ។ យើងត្រូវរួមគ្នាអំពាវនាវឱ្យសហគមន៍អន្តរជាតិដឹងឮ ជាពិសេស ប្រធានាធិបតីអាមេរិក លោក Donald Trump ដើម្បីជួយអន្តរាគមន៍ឱ្យថៃដោះលែងវីរកងទ័ពកម្ពុជាជាបន្ទាន់ និងឱ្យថៃគោរពកិច្ចព្រមព្រៀងសន្តិភាព ៕

ប្រទេសថៃ៖ អនុរដ្ឋមន្រ្តីក្រសួងការពារជាតិថៃ លោក ណាត់ថានផន ណាក់ផានិត បាននិយាយបន្ទាប់ពីកិច្ចប្រជុំដ៏តានតឹងជាមួយរដ្ឋមន្រ្តីនៅមុននេះបន្តិចថា ប្រទេសថៃនឹងបើកភ្លើងខៀវដល់យោធាក្នុងការដោះស្រាយស្ថានការណ៍ព្រំដែនកម្ពុជា-ថៃ ទៅតាមការចាំបាច់ ដោយនឹងមិនចរចាអ្វីទៀតនោះទេប្រសិនបើកម្ពុជាមិនទទួលខុសត្រូវចំពោះទាហានថៃដែលរងរបួសដោយសារគ្រាប់មីន។ នេះបើតាមសារព័ត៌មាន Khaosod ។

បន្ទាប់ពីសម្រេចផ្អាកការអនុវត្តសេចក្ដីថ្លែងការណ៍រួមរវាងកម្ពុជា-ថៃ ដែលបានចុះហត្ថលេខាកាលពីចុងខែតុលាកន្លងមក ពេលនេះក្រុមប្រឹក្សាសន្តិសុខជាតិរបស់ថៃបានប្រជុំសម្រេចថានឹងផ្ដល់សិទ្ធិដល់យោធា ក្នុងការចាត់វិធានការចាំបាច់ដើម្បីដោះស្រាយបញ្ហាព្រំដែនជាមួយកម្ពុជា។ លោក ណាត់ថានផន ណាក់ផានិត បាននិយាយថា ប្រទេសថៃមាននីតិវិធីសម្រាប់ការប្រើប្រាស់កម្លាំង រួមទាំងការព្រមាន និងការបាញ់ប្រហារចាប់ពីអាវុ.ធធុនស្រាល រហូតដល់អាវុធធ្ងន់ ប៉ុន្តែលោកបានបដិសេធសុំមិនពន្យល់លម្អិត។

លោកបន្ថែមថា ប្រតិបត្តិការយោធាថៃ នឹងធ្វើឡើងនៅក្នុងដែនអធិបតេយ្យភាពរបស់ថៃ ដោយយោធាថៃ នឹងអនុវត្តទៅតាមស្ថានភាពជាក់ស្តែង ហើយកិច្ចពិភាក្សាអន្តរជាតិ នឹងត្រូវធ្វើឡើងទៅតាមនីតិវិធី នៃច្បាប់អន្តរជាតិ។

ជាមួយគ្នានេះផងដែរ ក្រសួងការបរទេសថៃ ក៏កំពុងរៀបចំពាក្យបណ្តឹង ដើម្បីប្តឹងកម្ពុជា ដោយជំរុញឱ្យកម្ពុជាទទួលខុសត្រូវ និងសុំទោសទាហានថៃដែលរងរបួស ប្រសិនបើកម្ពុជាចង់វិលត្រឡប់ទៅរកសភាពដើមឡើងវិញ ដោយជំហរអនាគតរបស់ថៃម្តងនេះ អាស្រ័យលើគោលជំហររបស់កម្ពុជាហើយ ពោលគឺស្ថានការណ៍នឹងធូរស្រាល ឬកាន់តែតានតឹង គឺថៃនឹងរង់ចាំមើលទង្វើរបស់កម្ពុជា។

បន្ថែមលើនោះ លោក ស៊ីហាសាក់ ភួងកេតកែវ រដ្ឋមន្ត្រីក្រសួងការបរទេសថៃ បានថ្លែងថា ប្រទេសថៃ បានផ្អាកជាផ្លូវការហើយ ដោយថៃនឹងមិនអនុវត្តទៅតាម “កិច្ចព្រមព្រៀងសន្តិភាព” ដែលបានចុះហត្ថលេខារួមគ្នា នៅប្រទេសម៉ាឡេស៊ីនោះឡើយ ដើម្បីបញ្ឈប់នូវការបញ្ជូនកងទ័ពកម្ពុជាទាំង ១៨រូបត្រឡប់មកកម្ពុជាវិញ»។

យ៉ាងណាមិញ តាមសេចក្ដីថ្លែងការណ៍របស់រាជរដ្ឋាភិបាលកម្ពុជា បានគូសបញ្ជាក់យ៉ាងច្បាស់ថា កម្ពុជាសូមបដិសេធយ៉ាងដាច់អហង្ការចំពោះរាល់ការចោទប្រកាន់របស់ប្រទេសថៃ ដែលថាកម្ពុជាបានដាក់មីនថ្មីនៅតាមព្រំដែនជាមួយប្រទេសថៃ។ ចាប់តាំងពីក្លាយជារដ្ឋភាគីនៃអនុសញ្ញាអូតាវ៉ា កម្ពុជាតែងតែប្រកាន់ខ្ជាប់នូវគោលការណ៍ និងកាតព្វកិច្ចរបស់ខ្លួននៅក្រោមច្បាប់អន្តរជាតិ ដោយមិនដែលដាក់មីនថ្មីដែលគំរាមកំហែងដល់សន្តិសុខ និងសុវត្ថិភាពរបស់មនុស្សជាតិនោះឡើយ។

រាជរដ្ឋាភិបាលកម្ពុជា ក៏បានបង្ហាញការព្រួយបារម្ភយ៉ាងខ្លាំងផងដែរចំពោះ ការសម្រេចចិត្តដោយឯកតោភាគីរបស់ភាគីថៃ ក្នុងការផ្អាកការអនុវត្តសេចក្តីថ្លែងការណ៍រួម ប៉ុន្តែកម្ពុជា នឹងនៅតែបន្តប្តេជ្ញាចិត្តក្នុងការធ្វើការឱ្យបានជិតស្និទ្ធជាមួយភាគីថៃ ក្នុងការលើកកម្ពស់សន្តិភាព និងស្ថិរភាពរវាងប្រទេសទាំងពីរ ជាពិសេសធានាដល់សន្តិសុខ និងសុវត្ថិភាពរបស់ប្រជាជនស៊ីវិល ស្របតាមសេចក្តីថ្លែងការណ៍រួមស្តីពីសន្តិភាពរវាងកម្ពុជានិងថៃ ដែលត្រូវបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥៕