មើលឃើញសាច់គេល្អជាងសាច់ឯង! មេដឹកនាំកូរ៉េខាងជើងលោក គីម ជុងអ៊ុន បានធ្វើការប្រកាសប្ដេជ្ញាថានឹងផ្តល់ការគាំទ្រដ៏រឹងមាំជាអមតៈចំពោះរុស្ស៊ី ស្របពេលដែលនៅជ្រុងម្ខាងទៀតមេដឹកនាំដ៏មានឥទ្ធិពលរូបនេះបានចាត់ទុក កូរ៉េខាងត្បូងដែលជាប់ឈា.មជ័រតែមួយថាជាសត្រូវលេខ១ របស់កូរ៉េខាងជើង។ ការប្រកាសទាំងពីរនេះត្រូវបានផ្សព្វផ្សាយដោយសារព័ត៌មានរដ្ឋកូរ៉េខាងជើង KCNA។

នៅក្នុងសេចក្តីថ្លែងការណ៍ថ្មីៗនេះ លោកគីម ជុងអ៊ុន បាននិយាយថា រដ្ឋាភិបាលរបស់លោកនឹងបន្តប្រកាន់ជំហររឹងរូសចំពោះកូរ៉េខាងត្បូង ដោយចាត់ទុកប្រទេសនេះជារដ្ឋសត្រូវដ៏អាក្រ.ក់បំផុតរបស់កូរ៉េខាងជើង ដែលជាសញ្ញាបង្ហាញពីការធ្លាក់ចុះបន្ថែមទៀតនៃទំនាក់ទំនងរវាងប្រទេសជិតខាងទាំងពីរ។ ការកត់សម្គាល់នេះកើតឡើងចំពេលមានភាពតានតឹងកើនឡើងនៅលើឧបទ្វីបកូរ៉េ និងការបង្ហាញជំហរយោធាជាបន្តបន្ទាប់ដោយភាគីទាំងពីរ។

ក្រៅពីប្រកាសហៅកូរ៉េខាងត្បូងថាជាសត្រូវ លោកគីម ជុងអ៊ុន បានប្តេជ្ញាពង្រឹងកម្លាំងនុយក្លេអ៊ែររបស់ខ្លួនឱ្យកាន់តែខ្លាំងក្លាថែមទៀត ដោយសង្កត់ធ្ងន់ថាការសម្រេចចិត្តនេះគឺជាកត្តាចាំបាច់បំផុតសម្រាប់សន្តិសុខជាតិ និងស្ថិរភាពក្នុងតំបន់។

ក្នុងពេលជាមួយគ្នានេះ លោកគីម បែរជាបានសន្យាគាំទ្ររុស្ស៊ីដែលជាសម្ព័ន្ធមិត្ត ដោយប្ដេជ្ញាពង្រីកកិច្ចសហប្រតិបត្តិការនយោបាយ សេដ្ឋកិច្ច និងយោធាដែលមានសក្តានុពល។ តាមការបញ្ជាក់របស់លោក គីម «ឥឡូវនេះកូរ៉េខាងជើងនិងរុស្ស៉ីកំពុងសហការគ្នាយ៉ាងជិតស្និទ្ធ ដើម្បីការពារអធិបតេយ្យរបស់ប្រទេសទាំងពីរ។ ទីក្រុងព្យុងយ៉ាងនឹងនៅជាមួយទីក្រុងមូស្គូជានិច្ច ហើយនេះគឺជាជម្រើសនិងឆន្ទៈដែលមិនរង្គោះរង្គើរបស់យើង»។

តាមសម្ដីអ្នកវិភាគ សារពីររបស់កូរ៉េខាងជើងដូចខាងលើនេះបានឆ្លុះបញ្ចាំងពីយុទ្ធសាស្ត្រទូលំទូលាយរបស់ខ្លួនក្នុងការប្រឈមមុខនឹងគូប្រជែងក្នុងតំបន់ ខណៈដែលកំពុងព្យាយាមចូលកាន់តែជិតស្និទ្ធជាមួយដៃគូយុទ្ធសាស្ត្រ។ ការផ្លាស់ប្តូរនេះ បានបង្ហាញពីតថភាពសន្តិសុខដែលកំពុងផ្លាស់ប្តូរ ដោយសម្ព័ន្ធភាព និងការប្រជែងគ្នានៅតែបន្តវិវឌ្ឍក្នុងចំណោមភាពមិនប្រាកដប្រជាជាសកល។

មន្ត្រីនៅកូរ៉េខាងត្បូងបានថ្កោលទោសការកត់សម្គាល់នេះ ដោយព្រមានថា វោហាសាស្ត្ររបស់លោក គីម ជុងអ៊ុន បានបង្កើនភាពតានតឹង និងធ្វើឱ្យខូចដល់ការរំពឹងទុកសម្រាប់ការសន្ទនា។ ទន្ទឹមនឹងនេះ មេដឹកនាំពិភពលោកក៏កំពុងតែតាមដានស្ថានការណ៍យ៉ាងដិតដល់ផងដែរ ព្រោះចំណងមិត្តភាពដ៏ស្អិតរមួយរវាងកូរ៉េខាងជើង និងប្រទេសរុស្ស៊ី អាចនាំមកនូវផលប៉ះពាល់ខាងភូមិសាស្ត្រនយោបាយកាន់តែទូលំទូលាយ៕

ប្រធានាធិបតីបេឡារុស លោក Alexander Lukashenko បានធ្វើដំណើរទស្សនកិច្ចជាផ្លូវការលើកដំបូងនៅប្រទេសកូរ៉េខាងជើងកាលពីថ្ងៃទី២៥ ខែមីនា ឆ្នាំ២០២៦ តាមការអញ្ជើញរបស់មេដឹកនាំកូរ៉េខាងជើង លោក Kim Jong Un ក្នុងគោលបំណងពង្រឹងកិច្ចសហប្រតិបត្តិការជិតស្និទ្ធ រួមទាំងប្រឆាំងជាមួយក្រុមប្រទេសលោកខាងលិច ។ ដំណើរទស្សនកិច្ចនេះត្រូវបានអន្តរជាតិឃ្លាំមើល ពីព្រោះប្រទេសទាំងពីរសុទ្ធតែគាំទ្ររុស្ស៊ីធ្វើសង្គ្រា.មឈ្លានពានអ៊ុយក្រែន និងស្ថិតក្រោមការដាក់ទណ្ឌកម្មសេដ្ឋកិច្ចពីអន្តរជាតិដូចគ្នា ។

សារព័ត៌មានបេឡារុស Belta រាយការណ៍ថា ប្រធានាធិបតីបេឡារុស លោក Lukashenko ធ្វើដំណើរទស្សនកិច្ចនៅប្រទេសកូរ៉េខាងជើង ចំនួន២ថ្ងៃ ក្នុងគោលបំណងពង្រឹងទំនាក់ទំនង ដោយមេដឹកនាំទាំងពីរនឹងលើកយកប្រធានបទដែលភាគីទាំងពីរផ្តល់ភាពសំខាន់មកពិភាក្សា ព្រមទាំងពិភាក្សាពីគម្រោងមានសក្តានុពល និងលទ្ធភាពអភិវឌ្ឍន៍គម្រោងឱ្យទទួលបានលទ្ធផលរួមគ្នា ។

តាមការអះអាងរបស់អ្នកវិភាគ គឺបេឡារុស និងកូរ៉េខាងជើង គឺជាសម្ព័ន្ធមិត្តដ៏សំខាន់ដែលគាំទ្ររុស្ស៊ីធ្វើសង្គ្រាមឈ្លានពានអ៊ុយក្រែន ។ កូរ៉េខាងជើងបានបញ្ជូនសព្វាវុធ និងកម្លាំងទ័ពរាប់ពាន់នាក់ទៅកាន់សមរភូមិ ខណៈបេឡារុសបានអនុញ្ញាតឱ្យរុស្ស៊ីប្រើប្រាស់ទឹកដីរបស់ខ្លួនជាទីតាំងវាយប្រហារអ៊ុយក្រែនកាលពីឆ្នាំ២០២២ ។

លោក Kim បានអញ្ជើញប្រធានាធិបតីបេឡារុស លោក Lukashenko ឱ្យបំពេញទស្សនកិច្ចនៅកូរ៉េខាងជើង ក្នុងពេលមេដឹកនាំទាំង២រូបជួបគ្នានៅទីលានធៀនអាន់មេន ទីក្រុងប៉េកាំង ប្រទេសចិន កាលពីខែកញ្ញា ឆ្នាំ២០២៥ ។ លោក Kim បានផ្ញើលិខិតអញ្ជើញលោក Lukashenko ដើម្បីបង្ហាញពីការតាំងចិត្តលើកកម្ពស់ទំនាក់ទំនងរវាងប្រទេសទាំងពីរឱ្យកាន់តែជិតស្និទ្ធបន្ថែមទៀត ។

វិទ្យាស្ថានកូរ៉េសម្រាប់ការវិភាគផ្នែកការពារជាតិ (KIDA) បានបង្ហាញការយល់ឃើញពីដំណើរទស្សនកិច្ចរបស់ប្រធានាធិបតីបេឡារុសទៅកូរ៉េខាងជើង គឺក្នុងគោលដៅជំរុញឱ្យក្រុមប្រទេសដែលប្រឆាំងនឹងក្រុមប្រទេសលោកខាងលិច រួមកម្លាំងសាមគ្គីគ្នាឱ្យរឹងមាំ ។

ក្រុមប្រទេសលោកខាងលិចបានដាក់ទណ្ឌកម្មសេដ្ឋកិច្ចកូរ៉េខាងជើងជាច្រើនឆ្នាំមកនេះ ដោយសារការផលិតអាវុធនុយក្លេអ៊ែរ សាងល្បងមីស៊ីល និងគាំទ្ររុស្ស៊ីធ្វើសង្គ្រាមឈ្លានពានអ៊ុយក្រែន ។ រដ្ឋាភិបាលកូរ៉េខាងជើងបានបញ្ជូនកម្លាំងទ័ពរាប់ពាន់នាក់ និងសព្វាវុធជាច្រើនទៅឱ្យរុស្ស៊ី ដូចជា ៖ គ្រាប់កាំភ្លើងធំ និងមីស៊ីល ហើយកងទ័ពកូរ៉េខាងជើងបានស្លាប់ក្នុងសមរភូមិប្រមាណ២,០០០នាក់ និងរងរបួសរាប់ពាន់នាក់ ។

ការជួយគាំទ្រនេះធ្វើឱ្យកូរ៉េខាងជើងទទួលបានផលប្រយោជន៍ពីរុស្ស៊ីទាំងថវិកា បច្ចេកវិទ្យាកងទ័ព ស្បៀងអាហារ និងថាមពល ។ កូរ៉េខាងជើង និងរុស្ស៊ី មានទំនាក់ទំនងជិតស្និទ្ធខ្លាំងឡើង បន្ទាប់ពីប្រធានាធិបតីរុស្ស៊ី លោក Vladimir Putin ធ្វើដំណើរទៅកូរ៉េខាងជើងកាលពីឆ្នាំ២០២៤ ដែលជំរុញឱ្យកូរ៉េខាងជើងកាត់បន្ថយការពឹងផ្អែកចិនដែលជាសម្ព័ន្ធមិត្តយូរឆ្នាំ ៕

តើស្ថានភាពនៅមជ្ឈិមបូព៌ានឹងវិវឌ្ឍទៅជាយ៉ាងណាបើអ៊ីរ៉ង់បន្តអះអាងបែបនេះ? តាមប្រព័ន្ធផ្សព្វផ្សាយរដ្ឋរបស់អ៊ីរ៉ង់ បានរាយការណ៍សម្តីអ្នកនាំពាក្យយោធាអ៊ីរ៉ង់ថា សហរដ្ឋអាមេរិក កំពុងតែចរចាជាមួយខ្លួនឯងតែម្នាក់ឯង បន្ទាប់ពីប្រធានាធិបតីអាមេរិក លោក ដូណាល់ ត្រាំ បានបន្តអះអាងថា កិច្ចចរចារវាងប្រទេសទាំងពីរ សំដៅបិទបញ្ចប់សង្រ្គាមនៅមជ្ឈិមបូព៌ា កំពុងតែប្រព្រឹត្តទៅ។

យោងតាមរបាយការណ៍ដែលចុះផ្សាយដោយទីភ្នាក់ងារសារព័ត៌មាន Reuters នាថ្ងៃពុធនេះ លោក Ebrahim Zolfaqari អ្នកនាំពាក្យទីបញ្ជាការកណ្តាលរបស់កងកម្លាំងប្រដាប់អាវុធអ៉ីរ៉ង់ បានចោទសួរលក្ខណៈឌឺដងទៅកាន់សហរដ្ឋអាមេរិកយ៉ាងដូច្នេះថា «តើកម្រិតនៃការតស៊ូរបស់អ្នកឯង បានឈានដល់ដំណាក់កាលនិយាយចរចាតែជាមួយខ្លួនឯងហើយឬ? មនុស្សដូចជាពួកយើង គឺគ្មានថ្ងៃអាចត្រូវរ៉ូវជាមួយមនុស្សដូចជាពួកអ្នកឡើយ»។ លោក Zolfaqari បានបន្ថែមថា តម្លៃថាមពល និងសណ្តាប់ធ្នាប់មុនសង្រ្គាម គឺនឹងមិនអាចវិលត្រឡប់ដូចដើមជាដាច់ខាត ដរាបណាទីក្រុងវ៉ាស៉ីនតោន មិនទទួលស្គាល់ថា ស្ថិរភាពតំបន់ ត្រូវបានធានាដោយកងកម្លាំងប្រដាប់អាវុធអ៉ីរ៉ង់។

នាថ្ងៃពុធនេះ កងកម្លាំងឆ្មាំបដិវត្តន៍អ៉ីរ៉ង់ (IRGC) ក៏បានប្រកាសដែរថា ខ្លួនបានបើកការវាយប្រហារមីស៉ីលជុំថ្មីទី៨០ ប្រឆាំងអ៉ីស្រាអែល និងមូលដ្ឋានយោធាអាមេរិក នៅក្នុងតំបន់។ IRGC បាននិយាយថា ខ្លួនបានកំណត់គោលដៅលើទីក្រុង Safad, Kiryat Shmona, Bnei Brak និង Tel Aviv របស់ប្រទេសអ៉ីស្រាអែល ព្រមទាំងមូលដ្ឋានទ័ពអាមេរិក នៅប្រទេសកូវ៉ែត ហ៊្សកដានី និងបារ៉ែន។

គួរបញ្ជាក់ថា កាលពីថ្ងៃអាទិត្យចុងសប្តាហ៍មុន លោក ត្រាំ បានអះអាងថា ភាគីទាំងពីរបានចរចាគ្នា ដោយទីក្រុងតេហេរ៉ង់ ចង់ស្វែងរកកិច្ចព្រមព្រៀង ដើម្បីបញ្ចប់សង្រ្គាម។ ប៉ុន្តែភ្លាមៗនោះ អ៉ីរ៉ង់បានចេញមុខច្រានចោលម្តងរួចមកហើយថា វាជារឿងមិនពិត។ ទោះជាបែបនេះក្តី កាលពីថ្ងៃអង្គារ លោក ត្រាំ បានបន្តអះអាងជាថ្មីថា អាមេរិកកំពុងធ្វើឱ្យមានភាពរីកចម្រើនក្នុងកិច្ចប្រឹងប្រែងចរចាជាមួយអ៉ីរ៉ង់។ ទន្ទឹមគ្នានោះ កាលពីថ្ងៃអង្គារ មានសេចក្តីរាយការណ៍ព័ត៌មានថា ផែនការ១៥ចំណុចមួយ ដើម្បីបញ្ចប់ជម្លោះ ដែលព្រាងឡើងដោយទីក្រុងវ៉ាស៉ីនតោន ត្រូវបានបញ្ជូនឱ្យទីក្រុងតេហរ៉ង់៕

ខណៈដែលសង្រ្គា.មនៅអ៊ីរ៉ង់បានឈានចូលដល់សប្តាហ៍ទី៤ ការប្រយុទ្ធគ្នាក៏កាន់តែសា.ហាវឡើងៗ ក្នុងនោះអ៊ីស្រាអែលដែលពោពេញទៅដោយកំហឹ.ងនិងការសងសឹក បានបញ្ចេញនូវអាវុ.ធផ្លោងធុនធ្ងន់បា.ញ់តម្រង់ទៅមូលដ្ឋានក្រុមហេសបូឡាគាំទ្រដោយរដ្ឋាភិបាលអ៊ីរ៉ង់ ប៉ុន្តែកំណត់គោលដៅមិនចំសត្រូវបែរជាត្រូវចំប្រជាជនខ្លួនឯងដែលនៅក្បែរនោះឲ្យរងគ្រោះស្លា.ប់និងរបួសទៅវិញ។

យោងតាមសេចក្តីថ្លែងការណ៍យោធាដំបូង ហេតុការណ៍នេះបានកើតឡើងក្នុងអំឡុងពេលប្រតិបត្តិការនៅតំបន់ព្រំដែនមួយ ដែលកងកម្លាំងអ៊ីស្រាអែល បានសារភាពថា យោធារបស់ខ្លួនបានបាញ់កាំភ្លើងធំខុសគោលដៅចូលក្នុងទឹកដីរបស់ខ្លួន បណ្តាលឱ្យកសិករអ៊ីស្រាអែលម្នាក់ស្លាប់ នៅជិតព្រំដែនលីបង់កាលពីថ្ងៃចន្ទ។

ក្រុមយោធាបានពិពណ៌នាអំពីហេតុការណ៍នេះថាជាកំហុសដ៏សោកសៅមួយ ហើយបាននិយាយថា ការស៊ើបអង្កេតជាផ្លូវការមួយត្រូវបានចាប់ផ្តើមឡើង ដើម្បីកំណត់ថាតើមានអ្វីខុសប្រក្រតី ទើបបណ្ដាលឲ្យកើតមានឧប្បត្តិហេតុនេះ។

បន្ថែមលើនេះ កងកម្លាំងការពារអ៊ីស្រាអែលបានសម្តែងការចូលរួមរំលែកទុក្ខដល់ក្រុមគ្រួសារជនរងគ្រោះ និងបានសង្កត់ធ្ងន់លើការប្តេជ្ញាចិត្តរបស់ខ្លួនក្នុងការទប់ស្កាត់គ្រោះថ្នាក់ចៃដន្យដែលស្រដៀងគ្នានេះកើតឡើងម្ដងទៀតនាពេលអនាគត។

គួរជម្រាបថា ករណីបែបនេះ ដែលជារឿយៗត្រូវបានគេហៅថាជា “ការបាញ់ប្រហារដោយមិត្តភាព” ឬការវាយប្រហារដោយចៃដន្យ បានបង្ហាញពីហានិភ័យដែលពាក់ព័ន្ធនឹងប្រតិបត្តិការយោធា ជាពិសេសនៅក្នុងតំបន់ព្រំដែនដ៏តានតឹង ដែលជនស៊ីវិល និងកងកម្លាំងប្រដាប់អាវុធអាចនៅជិតគ្នា។

គេសង្កេតឃើញថា តំបន់ព្រំដែនរវាងអ៊ីស្រាអែល និងលីបង់បានបង្ហាញឲ្យឃើញពីភាពតានតឹងកើនឡើងក្នុងរយៈពេលប៉ុន្មានខែថ្មីៗនេះ ដែលបង្កើនលទ្ធភាពនៃការគណនាខុស និងផលវិបាកដែលមិនបានគិតទុកជាមុន។ ទោះជាយ៉ាងណា អាជ្ញាធរមិនទាន់បានចេញផ្សាយព័ត៌មានលម្អិតបន្ថែមអំពីជនរងគ្រោះដែលបានរបួស ឬបាត់បង់ជីវិតនៅឡើយទេ ដោយរង់ចាំលទ្ធផលនៃការស៊ើបអង្កេតបន្ថែមទៀតសិន៕

គណៈកម្មាធិការព្រឹទ្ធសភាថៃ កាលពីថ្ងៃទី២៤ ខែមីនា ឆ្នាំ២០២៦ បានផ្តល់អនុសាសន៍ឱ្យរដ្ឋាភិបាលលុបចោលកិច្ចព្រមព្រៀងនៃអនុស្សរណៈយោគយល់ (MOU) ឆ្នាំ២០០០ ជាមួយកម្ពុជា ដើម្បីឱ្យប្រទេសថៃទទួលបានអត្ថប្រយោជន៍ផ្សេងៗ និងមិនចាញ់ប្រៀបកម្ពុជា ដោយគណៈកម្មាធិការនេះថា បើទោះជាគ្មាន MOU ឆ្នាំ២០០០ ក៏ប្រទេសថៃនៅតែប្តេជ្ញាចិត្តក្នុងការចរចាព្រំដែនផ្លូវគោកអចិន្ត្រៃយ៍ជាមួយកម្ពុជាដោយសន្តិវិធីបន្តទៀត ។

គណៈកម្មាធិការព្រឹទ្ធសភាថៃត្រៀមបញ្ជូនឯកសារទៅកាន់រដ្ឋាភិបាលក្រោមការដឹកនាំរបស់លោកនាយករដ្ឋមន្ត្រី Anutin Charnvirakul ចាត់វិធានការបន្តទៀត ដោយការលុបចោល MOU ឆ្នាំ២០០០ ក្នុងគោលបំណងកុំឱ្យថៃចាញ់ប្រៀបកម្ពុជា ។ នេះបើតាមការចុះផ្សាយរបស់សារព័ត៌មាន The Nation កាលពីថ្ងៃទី២៤ ខែមីនា ។

លោក Noppadol Inna សមាជិកព្រឹទ្ធសភា និងជាប្រធានគណៈកម្មាធិការព្រឹទ្ធសភា ដែលបំពេញតួនាទីសិក្សាពីគុណសម្បត្តិ និងគុណវិបត្តិនៃការលុបចោល MOU ឆ្នាំ២០០០ និងឆ្នាំ២០០១ ជាមួយកម្ពុជា កាលពីថ្ងៃទី២៤ ខែមីនា និយាយថា គណៈកម្មាធិការបានប្រជុំពិភាក្សាគ្នាពីការលុបចោល MOU ចំនួន២០ដង, ចុះសិក្សានៅខេត្តចំនួន៧ ដែលមានព្រំដែនជាប់កម្ពុជា, ស្តាប់របាយការណ៍លម្អិតរបស់ទីភ្នាក់ងារសន្តិសុខ និងក្រសួងការបរទេសថៃ ។

ការសិក្សារបស់គណៈកម្មាធិការបានបែងចែកជា២ផ្នែក គឺ MOU ឆ្នាំ២០០០ និង MOU ឆ្នាំ២០០១ ក្នុងនោះ MOU ឆ្នាំ២០០១ គឺគណៈកម្មាធិការបានផ្ដល់អនុសាសន៍ជាឯកច្ឆ័ន្ទឱ្យលុបចោល និងប្រកាសពីការលុបចោលតាំងពីខែធ្នូ ឆ្នាំ២០២៥ ។ រីឯ MOU ឆ្នាំ២០០០ គណៈកម្មាធិការសម្រេចថា គួរតែលុបចោល បើទោះជាគ្មាន MOU ឆ្នាំ២០០០ ក៏ប្រទេសថៃនៅតែប្តេជ្ញាចិត្តក្នុងការចរចាព្រំដែនផ្លូវគោកអចិន្ត្រៃយ៍ជាមួយកម្ពុជាដោយសន្តិវិធីបន្តទៀត ដើម្បីឱ្យប្រទេសថៃទទួលបានអត្ថប្រយោជន៍ផ្សេងៗ ។

បើតាមការលោក Noppadol Inna ជំហ៊ានបន្ទាប់ នឹងបញ្ចូលការលុបចោល MOU ឆ្នាំ២០០០ ទៅក្នុងរបៀបវារៈកិច្ចប្រជុំព្រឹទ្ធសភាដើម្បីបោះឆ្នោតអនុម័ត បន្ទាប់មក ព្រឹទ្ធសភានឹងបញ្ជូនឯកសាររបស់គណៈកម្មាធិការទៅឱ្យគណៈរដ្ឋមន្ត្រីចាត់វិធានការបន្ត ។ លោករំពឹងថា ឯកសារលុបចោល MOU ឆ្នាំ២០០០ នឹងបញ្ជូនទៅកាន់កិច្ចប្រជុំព្រឹទ្ធសភានៅខែមេសា និងថា ថៃអាចលុបចោល MOU ឆ្នាំ២០០០ ជាឯកតោភាគីបានដោយយោងតាមអនុសញ្ញាទីក្រុងវីយែនស្តីពីច្បាប់សន្ធិសញ្ញា ។

គួរបញ្ជាក់ថា អនុស្សរណៈនៃការយោគយល់គ្នា ចុះថ្ងៃទី១៤ ខែមិថុនា ឆ្នាំ២០០០ ស្តីពីការវាស់វែង និងខណ្ឌសីមាព្រំដែនគោករវាងរាជរដ្ឋាភិបាលកម្ពុជា និងរាជរដ្ឋាភិបាលថៃ (ហៅកាត់ថា MOU ឆ្នាំ២០០០) ។

MOU ឆ្នាំ២០០០ មានខ្លឹមសារពង្រឹងថែមទៀតនូវចំណងមិត្តភាពរវាងប្រទេសទាំងពីរ ដោយមានជំនឿទុកចិត្តថា ការខ័ណ្ឌព្រំសីមាព្រំដែនគោករវាងកម្ពុជា-ថៃ គឺជាប្រការមួយអាចជួយរារាំង និងដោះស្រាយនូវជម្លោះព្រំដែនដែលកើតឡើងតាមបណ្តោយព្រំដែន ព្រមទាំងសម្រួលដល់ការធ្វើដំណើរ និងសហប្រតិបត្តិការរវាងពលរដ្ឋនៅតាមបណ្តោយព្រំដែន ៕