ស្របពេលប្រទេសអ៊ីស្រាអែលកំពុងតែប្រឡូកក្នុងសង្គ្រា.មជ្ឈិមបូព៌ា ស្រាប់តែពលរដ្ឋនៅទីក្រុង Tel Aviv ប្រទះឃើញហ្វូងសត្វក្អែករាប់ពាន់ក្បាលហោះលើទីក្រុងកាលពីថ្ងៃទី២៥ ខែមីនា ឆ្នាំ២០២៦ ក៏ថតរូបបង្ហោះក្នុងបណ្តាញសង្គមចែកចាយពេញពិភពលោក ។ បន្ទាប់ពីចែកចាយរូបភាពក្នុងរយៈពេលខ្លី បានធ្វើផ្ទុះការចាប់អារម្មណ៍ក្នុងបណ្តាញសង្គមពិភពលោក មនុស្សភាគច្រើនគិតថា វាអាចជាប្រផ្នូលប្រាប់ពីហេតុការណ៍មិនល្អនឹងកើតឡើង ប៉ុន្តែអ្នកជំនាញគិតខុសពីនេះ ដោយសារបច្ចុប្បន្ន គឺជាសម័យបច្ចេកវិទ្យា AI មានការបង្កើតរូបភាពក្លែងក្លាយច្រើន ។

កាលពីថ្ងៃទី២៥ ខែមីនា ហ្វូងក្អែករាប់ពាន់ក្បាលបានហើរលើទីក្រុង Tel Aviv ប្រទេសអ៊ីស្រាអែល និងស្រែកលាន់ឮពេញមេឃ ដែលធ្វើឱ្យពលរដ្ឋអ៊ីស្រាអែល និងអ្នកប្រើប្រាស់បណ្តាញសង្គមលើពិភពលោកចាប់អារម្មណ៍យ៉ាងខ្លាំង រហូតដល់បង្ហោះរូបភាពក្នុងបណ្តាញសង្គម ។ មនុស្សជាច្រើនគិតថា គឺជាប្រផ្នូលអាក្រក់ពាក់ព័ន្ធនឹងការកើតឡើងនូវគ្រោះមហន្តរាយធំៗ ពីព្រោះកម្រឃើញហ្វូងក្អែកជាច្រើនក្បាលបង្ហាញខ្លួនបែបនេះណាស់ ស្របពេលស្ថានការណ៍តានតឹងនៅមជ្ឈិមបូព៌ា ។

មនុស្សមួយចំនួនបានលើកឡើងនូវពាក្យទំនាយពីការបង្ហាញខ្លួនរបស់សត្វក្អែក គឺជាសញ្ញាប្រាប់ពីប្រទេសកើតសង្គ្រាម និងរងការបំផ្លិចបំផ្លាញនាពេលឆាប់ៗ ហើយការលើកឡើងបែបនេះត្រូវបានមនុស្សភាគច្រើនយល់ស្រប ដោយសារស្ថានការណ៍តានតឹងនៅមជ្ឈិមបូព៌ាដែលបង្កឡើងដោយអ៊ីស្រាអែល និងអាមេរិក មិនទាន់បញ្ចប់ ។

ក្រោយមានការចាប់អារម្មណ៍ខ្លាំង អ្នកជំនាញបានលើកឡើងពីហ្វូងក្អែកហើរលើមេឃ គឺកើតឡើងតាមធម្មជាតិ ពីព្រោះទីក្រុង Tel Aviv គឺជាផ្លូវដែលពួកវាត្រូវជម្លៀសខ្លួនពេលផ្លាស់ប្តូររដូវកាល ហើយក្អែកជាសត្វដែលប្រទះឃើញជាទូទៅនៅប្រទេសអ៊ីស្រាអែល ។

អ្នកជំនាញថា វាអាចជាវីដេអូបង្កើតឡើងដោយបច្ចេកវិទ្យា AI ឬជាការយករូបភាពនៅកន្លែងផ្សេងមកផ្សព្វផ្សាយដើម្បីឱ្យផ្ទុះការចាប់អារម្មណ៍ ។ ហេតុនេះ ពេលប្រទេសកំពុងកើតសង្គ្រាម ត្រូវត្រួតពិនិត្យព័ត៌មានឱ្យបានច្បាស់លាស់មុននឹងជឿ ដើម្បីកុំឱ្យជឿព័ត៌មានក្លែងក្លាយ ៕

រដ្ឋាភិបាលអូស្ត្រាលីបានប្រកាសហាមឃាត់ភ្ញៀវទេសចរអ៊ីរ៉ង់ចូលប្រទេសអូស្ត្រាលីរយៈពេល៦ខែ គិតចាប់ពីថ្ងៃទី២៦ ខែមីនា ឆ្នាំ២០២៦ ទោះជាមានទិដ្ឋាការស្របច្បាប់ក៏ដោយ លើកលែងតែជ.នជាតិអ៊ីរ៉ង់ណារៀបការជាមួយជ.នជាតិអូស្ត្រាលី ក្រោមហេតុផលដើម្បីសន្តិសុខជាតិ និងបារម្ភពីភ្ញៀវទេសចរអ៊ីរ៉ង់មិនព្រមត្រឡប់ទៅប្រទេសខ្លួនវិញ ។ វិធានការនេះរងនូវការរិះគ.ន់ជាច្រើនពីក្រុមសិទ្ធិមនុស្ស និងអ្នកនយោបាយថា រដ្ឋាភិបាលអូស្ត្រាលីអនុវត្តមិនដូចអ្វីដែលនិយាយ ។

តាមការចុះផ្សាយរបស់សារព័ត៌មានបរទេស រដ្ឋាភិបាលអូស្ត្រាលីបានប្រកាសមិនអនុញ្ញាតឱ្យភ្ញៀវទេសចរអ៊ីរ៉ង់ចូលប្រទេសអូស្ត្រាលីរយៈពេល៦ខែ ទោះជាមានទិដ្ឋាការទេសចរណ៍ស្របច្បាប់ក្តី ក្រោមហេតុផលដើម្បីសន្តិសុខជាតិ និងការពារអ្នកស្វែងរកសិទ្ធិជ្រកកោន ។ ក្រុមសិទ្ធិមនុស្ស និងសមាជិកសភាមកពីគណបក្សប្រឆាំងរិះគន់ថា គឺជាការប្រឆាំងជនជាតិអ៊ីរ៉ង់ និងបរាជ័យផ្នែកសីលធម៌គួរឱ្យភ្ញាក់ផ្អើល ។

រដ្ឋាភិបាលអូស្ត្រាលីក្រោមការដឹកនាំរបស់គណបក្សការងារ បានប្រកាសអនុវត្តវិធានការធ្វើឱ្យពិភពលោកភ្ញាក់ផ្អើល ដោយមិនអនុញ្ញាតឱ្យជនជាតិអ៊ីរ៉ង់ដែលមានទិដ្ឋាការទេសចរណ៍ស្របច្បាប់ធ្វើដំណើរចូលអូស្ត្រាលីរយៈពេល៦ខែ ហើយវិធានការនេះអនុវត្តចាប់ពីថ្ងៃទី២៦ ខែមីនា ដោយសារបារម្ភពីភ្ញៀវទេសចរអ៊ីរ៉ង់មិនព្រមត្រឡប់ទៅប្រទេសរបស់ខ្លួនវិញបន្ទាប់ពីទិដ្ឋាការផុតសុពលភាព ស្របពេលស្ថានការណ៍ពិភពលោកផ្លាស់ប្តូរយ៉ាងឆាប់រហ័ស ។

តាមការលើកឡើងរបស់រដ្ឋមន្ត្រីក្រសួងមហាផ្ទៃ លោក Tony Berg គឺរដ្ឋាភិបាលអូស្ត្រាលីនឹងពិចារណាល្អិតល្អន់មុននឹងអនុញ្ញាតឱ្យជនបរទេសស្នាក់នៅអូស្ត្រាលីអចិន្ត្រៃយ៍ ។ ភ្ញៀវទេសចរអ៊ីរ៉ង់ដែលទិញសំបុត្រយន្តហោះមកដើរកម្សាន្តនៅអូស្ត្រាលី ហើយមិនព្រមត្រឡប់ទៅវិញនោះ រដ្ឋាភិបាលមិនអនុញ្ញាតឱ្យស្នាក់នៅរហូតទេ ដែលវិធានការនេះជួយឱ្យរដ្ឋាភិបាលមានពេលវេលាវាយតម្លៃស្ថានការណ៍ពិភពលោកដែលកំពុងតានតឹង ។ ប៉ុន្តែនឹងលើកលែងដល់ជនជាតិអ៊ីរ៉ង់ណាដែលបានរៀបការជាមួយជនជាតិអូស្ត្រាលី និងលើកលែងដល់កូនៗរបស់ពួកគេផងដែរ ។

វាធ្វើឱ្យមានការរិះគន់យ៉ាងខ្លាំងពីក្រុមអ្នកសិទ្ធិមនុស្ស និងអ្នកនយោបាយជាច្រើន ក្នុងនោះក្រុមការពារសិទ្ធិមនុស្ស Asylum Seeker Resource Centre ថា គឺជាការប្រឆាំងជនជាតិអ៊ីរ៉ង់ និងបរាជ័យផ្នែកសីលធម៌គួរឱ្យភ្ញាក់ផ្អើល ស្របពេលជនជាតិអ៊ីរ៉ង់ត្រូវការសុវត្ថិភាព បែរជារដ្ឋាភិបាលអូស្ត្រាលីបិទទ្វារមិនទទួលពួកគេ ។

សមាជិករដ្ឋសភាឯករាជ្យដាស់តឿនថា ការលុបចោលទិដ្ឋាការជនជាតិអ៊ីរ៉ង់ដែលអូស្ត្រាលីផ្តល់ឱ្យដោយស្របច្បាប់ គឺជាការបំផ្លាញទំនុកចិត្តលើប្រព័ន្ធអន្តោប្រវេសន៍ និងបង្កើតបទដ្ឋានគ្រោះថ្នាក់ ។ រីឯគណបក្សនយោបាយអូស្ត្រាលីរិះគន់ថា នេះជាការបង្ហាញពីធាតុពិតរបស់រដ្ឋាភិបាលអូស្ត្រាលីដែលតែងតែនិយាយថា គាំទ្រពលរដ្ឋអ៊ីរ៉ង់ ប៉ុន្តែបែរជាបដិសេធការសុំសិទ្ធិជ្រកកោន ។

គួរបញ្ជាក់ថា វិធានការហាមឃាត់ភ្ញៀវទេសចរអ៊ីរ៉ង់ បន្ទាប់ពីអូស្ត្រាលីទើបតែផ្ដល់ទិដ្ឋាការមនុស្សធម៌ដល់សមាជិកក្រុមបាល់ទាត់ជម្រើសជាតិស្រីអ៊ីរ៉ង់ចំនួន៧នាក់ កាលពីដើមខែមីនា ឆ្នាំ២០២៦ ។ បច្ចុប្បន្ន វិធានការនេះនឹងប៉ះពាល់ដល់ជនជាតិអ៊ីរ៉ង់ដែលកាន់ទិដ្ឋាការប្រមាណ៦,៨០០នាក់ ហើយសំខាន់ គឺអនុវត្តចំពោះតែជនជាតិអ៊ីរ៉ង់ប៉ុណ្ណោះ ៕

មើលឃើញសាច់គេល្អជាងសាច់ឯង! មេដឹកនាំកូរ៉េខាងជើងលោក គីម ជុងអ៊ុន បានធ្វើការប្រកាសប្ដេជ្ញាថានឹងផ្តល់ការគាំទ្រដ៏រឹងមាំជាអមតៈចំពោះរុស្ស៊ី ស្របពេលដែលនៅជ្រុងម្ខាងទៀតមេដឹកនាំដ៏មានឥទ្ធិពលរូបនេះបានចាត់ទុក កូរ៉េខាងត្បូងដែលជាប់ឈា.មជ័រតែមួយថាជាសត្រូវលេខ១ របស់កូរ៉េខាងជើង។ ការប្រកាសទាំងពីរនេះត្រូវបានផ្សព្វផ្សាយដោយសារព័ត៌មានរដ្ឋកូរ៉េខាងជើង KCNA។

នៅក្នុងសេចក្តីថ្លែងការណ៍ថ្មីៗនេះ លោកគីម ជុងអ៊ុន បាននិយាយថា រដ្ឋាភិបាលរបស់លោកនឹងបន្តប្រកាន់ជំហររឹងរូសចំពោះកូរ៉េខាងត្បូង ដោយចាត់ទុកប្រទេសនេះជារដ្ឋសត្រូវដ៏អាក្រ.ក់បំផុតរបស់កូរ៉េខាងជើង ដែលជាសញ្ញាបង្ហាញពីការធ្លាក់ចុះបន្ថែមទៀតនៃទំនាក់ទំនងរវាងប្រទេសជិតខាងទាំងពីរ។ ការកត់សម្គាល់នេះកើតឡើងចំពេលមានភាពតានតឹងកើនឡើងនៅលើឧបទ្វីបកូរ៉េ និងការបង្ហាញជំហរយោធាជាបន្តបន្ទាប់ដោយភាគីទាំងពីរ។

ក្រៅពីប្រកាសហៅកូរ៉េខាងត្បូងថាជាសត្រូវ លោកគីម ជុងអ៊ុន បានប្តេជ្ញាពង្រឹងកម្លាំងនុយក្លេអ៊ែររបស់ខ្លួនឱ្យកាន់តែខ្លាំងក្លាថែមទៀត ដោយសង្កត់ធ្ងន់ថាការសម្រេចចិត្តនេះគឺជាកត្តាចាំបាច់បំផុតសម្រាប់សន្តិសុខជាតិ និងស្ថិរភាពក្នុងតំបន់។

ក្នុងពេលជាមួយគ្នានេះ លោកគីម បែរជាបានសន្យាគាំទ្ររុស្ស៊ីដែលជាសម្ព័ន្ធមិត្ត ដោយប្ដេជ្ញាពង្រីកកិច្ចសហប្រតិបត្តិការនយោបាយ សេដ្ឋកិច្ច និងយោធាដែលមានសក្តានុពល។ តាមការបញ្ជាក់របស់លោក គីម «ឥឡូវនេះកូរ៉េខាងជើងនិងរុស្ស៉ីកំពុងសហការគ្នាយ៉ាងជិតស្និទ្ធ ដើម្បីការពារអធិបតេយ្យរបស់ប្រទេសទាំងពីរ។ ទីក្រុងព្យុងយ៉ាងនឹងនៅជាមួយទីក្រុងមូស្គូជានិច្ច ហើយនេះគឺជាជម្រើសនិងឆន្ទៈដែលមិនរង្គោះរង្គើរបស់យើង»។

តាមសម្ដីអ្នកវិភាគ សារពីររបស់កូរ៉េខាងជើងដូចខាងលើនេះបានឆ្លុះបញ្ចាំងពីយុទ្ធសាស្ត្រទូលំទូលាយរបស់ខ្លួនក្នុងការប្រឈមមុខនឹងគូប្រជែងក្នុងតំបន់ ខណៈដែលកំពុងព្យាយាមចូលកាន់តែជិតស្និទ្ធជាមួយដៃគូយុទ្ធសាស្ត្រ។ ការផ្លាស់ប្តូរនេះ បានបង្ហាញពីតថភាពសន្តិសុខដែលកំពុងផ្លាស់ប្តូរ ដោយសម្ព័ន្ធភាព និងការប្រជែងគ្នានៅតែបន្តវិវឌ្ឍក្នុងចំណោមភាពមិនប្រាកដប្រជាជាសកល។

មន្ត្រីនៅកូរ៉េខាងត្បូងបានថ្កោលទោសការកត់សម្គាល់នេះ ដោយព្រមានថា វោហាសាស្ត្ររបស់លោក គីម ជុងអ៊ុន បានបង្កើនភាពតានតឹង និងធ្វើឱ្យខូចដល់ការរំពឹងទុកសម្រាប់ការសន្ទនា។ ទន្ទឹមនឹងនេះ មេដឹកនាំពិភពលោកក៏កំពុងតែតាមដានស្ថានការណ៍យ៉ាងដិតដល់ផងដែរ ព្រោះចំណងមិត្តភាពដ៏ស្អិតរមួយរវាងកូរ៉េខាងជើង និងប្រទេសរុស្ស៊ី អាចនាំមកនូវផលប៉ះពាល់ខាងភូមិសាស្ត្រនយោបាយកាន់តែទូលំទូលាយ៕

ប្រធានាធិបតីបេឡារុស លោក Alexander Lukashenko បានធ្វើដំណើរទស្សនកិច្ចជាផ្លូវការលើកដំបូងនៅប្រទេសកូរ៉េខាងជើងកាលពីថ្ងៃទី២៥ ខែមីនា ឆ្នាំ២០២៦ តាមការអញ្ជើញរបស់មេដឹកនាំកូរ៉េខាងជើង លោក Kim Jong Un ក្នុងគោលបំណងពង្រឹងកិច្ចសហប្រតិបត្តិការជិតស្និទ្ធ រួមទាំងប្រឆាំងជាមួយក្រុមប្រទេសលោកខាងលិច ។ ដំណើរទស្សនកិច្ចនេះត្រូវបានអន្តរជាតិឃ្លាំមើល ពីព្រោះប្រទេសទាំងពីរសុទ្ធតែគាំទ្ររុស្ស៊ីធ្វើសង្គ្រា.មឈ្លានពានអ៊ុយក្រែន និងស្ថិតក្រោមការដាក់ទណ្ឌកម្មសេដ្ឋកិច្ចពីអន្តរជាតិដូចគ្នា ។

សារព័ត៌មានបេឡារុស Belta រាយការណ៍ថា ប្រធានាធិបតីបេឡារុស លោក Lukashenko ធ្វើដំណើរទស្សនកិច្ចនៅប្រទេសកូរ៉េខាងជើង ចំនួន២ថ្ងៃ ក្នុងគោលបំណងពង្រឹងទំនាក់ទំនង ដោយមេដឹកនាំទាំងពីរនឹងលើកយកប្រធានបទដែលភាគីទាំងពីរផ្តល់ភាពសំខាន់មកពិភាក្សា ព្រមទាំងពិភាក្សាពីគម្រោងមានសក្តានុពល និងលទ្ធភាពអភិវឌ្ឍន៍គម្រោងឱ្យទទួលបានលទ្ធផលរួមគ្នា ។

តាមការអះអាងរបស់អ្នកវិភាគ គឺបេឡារុស និងកូរ៉េខាងជើង គឺជាសម្ព័ន្ធមិត្តដ៏សំខាន់ដែលគាំទ្ររុស្ស៊ីធ្វើសង្គ្រាមឈ្លានពានអ៊ុយក្រែន ។ កូរ៉េខាងជើងបានបញ្ជូនសព្វាវុធ និងកម្លាំងទ័ពរាប់ពាន់នាក់ទៅកាន់សមរភូមិ ខណៈបេឡារុសបានអនុញ្ញាតឱ្យរុស្ស៊ីប្រើប្រាស់ទឹកដីរបស់ខ្លួនជាទីតាំងវាយប្រហារអ៊ុយក្រែនកាលពីឆ្នាំ២០២២ ។

លោក Kim បានអញ្ជើញប្រធានាធិបតីបេឡារុស លោក Lukashenko ឱ្យបំពេញទស្សនកិច្ចនៅកូរ៉េខាងជើង ក្នុងពេលមេដឹកនាំទាំង២រូបជួបគ្នានៅទីលានធៀនអាន់មេន ទីក្រុងប៉េកាំង ប្រទេសចិន កាលពីខែកញ្ញា ឆ្នាំ២០២៥ ។ លោក Kim បានផ្ញើលិខិតអញ្ជើញលោក Lukashenko ដើម្បីបង្ហាញពីការតាំងចិត្តលើកកម្ពស់ទំនាក់ទំនងរវាងប្រទេសទាំងពីរឱ្យកាន់តែជិតស្និទ្ធបន្ថែមទៀត ។

វិទ្យាស្ថានកូរ៉េសម្រាប់ការវិភាគផ្នែកការពារជាតិ (KIDA) បានបង្ហាញការយល់ឃើញពីដំណើរទស្សនកិច្ចរបស់ប្រធានាធិបតីបេឡារុសទៅកូរ៉េខាងជើង គឺក្នុងគោលដៅជំរុញឱ្យក្រុមប្រទេសដែលប្រឆាំងនឹងក្រុមប្រទេសលោកខាងលិច រួមកម្លាំងសាមគ្គីគ្នាឱ្យរឹងមាំ ។

ក្រុមប្រទេសលោកខាងលិចបានដាក់ទណ្ឌកម្មសេដ្ឋកិច្ចកូរ៉េខាងជើងជាច្រើនឆ្នាំមកនេះ ដោយសារការផលិតអាវុធនុយក្លេអ៊ែរ សាងល្បងមីស៊ីល និងគាំទ្ររុស្ស៊ីធ្វើសង្គ្រាមឈ្លានពានអ៊ុយក្រែន ។ រដ្ឋាភិបាលកូរ៉េខាងជើងបានបញ្ជូនកម្លាំងទ័ពរាប់ពាន់នាក់ និងសព្វាវុធជាច្រើនទៅឱ្យរុស្ស៊ី ដូចជា ៖ គ្រាប់កាំភ្លើងធំ និងមីស៊ីល ហើយកងទ័ពកូរ៉េខាងជើងបានស្លាប់ក្នុងសមរភូមិប្រមាណ២,០០០នាក់ និងរងរបួសរាប់ពាន់នាក់ ។

ការជួយគាំទ្រនេះធ្វើឱ្យកូរ៉េខាងជើងទទួលបានផលប្រយោជន៍ពីរុស្ស៊ីទាំងថវិកា បច្ចេកវិទ្យាកងទ័ព ស្បៀងអាហារ និងថាមពល ។ កូរ៉េខាងជើង និងរុស្ស៊ី មានទំនាក់ទំនងជិតស្និទ្ធខ្លាំងឡើង បន្ទាប់ពីប្រធានាធិបតីរុស្ស៊ី លោក Vladimir Putin ធ្វើដំណើរទៅកូរ៉េខាងជើងកាលពីឆ្នាំ២០២៤ ដែលជំរុញឱ្យកូរ៉េខាងជើងកាត់បន្ថយការពឹងផ្អែកចិនដែលជាសម្ព័ន្ធមិត្តយូរឆ្នាំ ៕

តើស្ថានភាពនៅមជ្ឈិមបូព៌ានឹងវិវឌ្ឍទៅជាយ៉ាងណាបើអ៊ីរ៉ង់បន្តអះអាងបែបនេះ? តាមប្រព័ន្ធផ្សព្វផ្សាយរដ្ឋរបស់អ៊ីរ៉ង់ បានរាយការណ៍សម្តីអ្នកនាំពាក្យយោធាអ៊ីរ៉ង់ថា សហរដ្ឋអាមេរិក កំពុងតែចរចាជាមួយខ្លួនឯងតែម្នាក់ឯង បន្ទាប់ពីប្រធានាធិបតីអាមេរិក លោក ដូណាល់ ត្រាំ បានបន្តអះអាងថា កិច្ចចរចារវាងប្រទេសទាំងពីរ សំដៅបិទបញ្ចប់សង្រ្គាមនៅមជ្ឈិមបូព៌ា កំពុងតែប្រព្រឹត្តទៅ។

យោងតាមរបាយការណ៍ដែលចុះផ្សាយដោយទីភ្នាក់ងារសារព័ត៌មាន Reuters នាថ្ងៃពុធនេះ លោក Ebrahim Zolfaqari អ្នកនាំពាក្យទីបញ្ជាការកណ្តាលរបស់កងកម្លាំងប្រដាប់អាវុធអ៉ីរ៉ង់ បានចោទសួរលក្ខណៈឌឺដងទៅកាន់សហរដ្ឋអាមេរិកយ៉ាងដូច្នេះថា «តើកម្រិតនៃការតស៊ូរបស់អ្នកឯង បានឈានដល់ដំណាក់កាលនិយាយចរចាតែជាមួយខ្លួនឯងហើយឬ? មនុស្សដូចជាពួកយើង គឺគ្មានថ្ងៃអាចត្រូវរ៉ូវជាមួយមនុស្សដូចជាពួកអ្នកឡើយ»។ លោក Zolfaqari បានបន្ថែមថា តម្លៃថាមពល និងសណ្តាប់ធ្នាប់មុនសង្រ្គាម គឺនឹងមិនអាចវិលត្រឡប់ដូចដើមជាដាច់ខាត ដរាបណាទីក្រុងវ៉ាស៉ីនតោន មិនទទួលស្គាល់ថា ស្ថិរភាពតំបន់ ត្រូវបានធានាដោយកងកម្លាំងប្រដាប់អាវុធអ៉ីរ៉ង់។

នាថ្ងៃពុធនេះ កងកម្លាំងឆ្មាំបដិវត្តន៍អ៉ីរ៉ង់ (IRGC) ក៏បានប្រកាសដែរថា ខ្លួនបានបើកការវាយប្រហារមីស៉ីលជុំថ្មីទី៨០ ប្រឆាំងអ៉ីស្រាអែល និងមូលដ្ឋានយោធាអាមេរិក នៅក្នុងតំបន់។ IRGC បាននិយាយថា ខ្លួនបានកំណត់គោលដៅលើទីក្រុង Safad, Kiryat Shmona, Bnei Brak និង Tel Aviv របស់ប្រទេសអ៉ីស្រាអែល ព្រមទាំងមូលដ្ឋានទ័ពអាមេរិក នៅប្រទេសកូវ៉ែត ហ៊្សកដានី និងបារ៉ែន។

គួរបញ្ជាក់ថា កាលពីថ្ងៃអាទិត្យចុងសប្តាហ៍មុន លោក ត្រាំ បានអះអាងថា ភាគីទាំងពីរបានចរចាគ្នា ដោយទីក្រុងតេហេរ៉ង់ ចង់ស្វែងរកកិច្ចព្រមព្រៀង ដើម្បីបញ្ចប់សង្រ្គាម។ ប៉ុន្តែភ្លាមៗនោះ អ៉ីរ៉ង់បានចេញមុខច្រានចោលម្តងរួចមកហើយថា វាជារឿងមិនពិត។ ទោះជាបែបនេះក្តី កាលពីថ្ងៃអង្គារ លោក ត្រាំ បានបន្តអះអាងជាថ្មីថា អាមេរិកកំពុងធ្វើឱ្យមានភាពរីកចម្រើនក្នុងកិច្ចប្រឹងប្រែងចរចាជាមួយអ៉ីរ៉ង់។ ទន្ទឹមគ្នានោះ កាលពីថ្ងៃអង្គារ មានសេចក្តីរាយការណ៍ព័ត៌មានថា ផែនការ១៥ចំណុចមួយ ដើម្បីបញ្ចប់ជម្លោះ ដែលព្រាងឡើងដោយទីក្រុងវ៉ាស៉ីនតោន ត្រូវបានបញ្ជូនឱ្យទីក្រុងតេហរ៉ង់៕