នៅថ្ងៃទី១៣ ខែវិច្ឆិកា ក្រុមហ៊ុនកម្សាន្តដែលបង្កើតឡើងដោយតារាសម្តែង Huang Xiaoming បានប្រកាសថាខ្លួនបានចុះកិច្ចសន្យាគ្រប់គ្រងជាមួយតារាសម្តែងស្រី Bai Yiru ។ ព័ត៌មាន និងរូបថតរបស់ Yiru បានក្លាយជាប្រធានបទស្វែងរកយ៉ាងក្តៅគគុកលើបណ្ដាញសង្គម Weibo ។ អ្នកខ្លះថែមទាំងនិយាយថា Bai Yiru ស្រដៀងនឹង Angelababy ដែលជាអតីតភរិយា និង Ye Ke ដែលជាអតីតគូស្នេហ៍។

Bai Yiru កើតក្នុងឆ្នាំ២០០៣ នៅទីក្រុង Xinjiang ហើយបច្ចុប្បន្នកំពុងសិក្សាផ្នែកសម្តែងនៅ Beijing Film Academy ។ ទស្សនិកជនបានបញ្ចេញមតិថា Yiru លេចធ្លោជាមួយនឹងភ្នែកធំៗ។ នាងមានកម្ពស់ ១. ៧២ ម៉ែត្រ មានរាងខ្ពស់ជើងវែង ហើយមានសក្ដានុពលទាំងក្នុងការបង្ហាញម៉ូត និងភាពយន្ត។

មុខរបស់ Bai Yiru មានរូបរាងស្លូតបូត ភ្លឺថ្លា មានសម្រស់ផ្អែមល្ហែមបែបជប៉ុន-កូរ៉េ ភ្នែកមូលធំៗ និងស្នាមញញឹមពិសេស ដែលងាយស្រួលបង្កើតក្តីអាណិត។ Bai Yiru បានបង្ហាញខ្លួនជាលើកដំបូងក្នុងឆ្នាំ២០២២ ជាមួយនឹងរឿងភាគខ្លីចិនបុរាណ។ ថ្វីដ្បិតតែសកម្មរយៈពេល ៣ ឆ្នាំក៏ដោយ ប៉ុន្តែ Bai Yiru បានសាកល្បងដៃរបស់នាងក្នុងប្រភេទជាច្រើនដូចជាប្រភេទ មនោសញ្ចេតនាបុរាណ មនោសញ្ចេតនាសម័យទំនើប និង ឧក្រិដ្ឋកម្ម ។

គួរឱ្យដឹងថាក្រៅពីអាជីពសម្តែង Huang Xiaoming អតីតស្វាមី Angelababy បានបង្កើតក្រុមហ៊ុនកម្សាន្តមួយក្នុងឆ្នាំ ២០០៧ ដោយប្រតិបត្តិការក្នុងវិស័យផលិតភាពយន្ត កម្មវិធីទូរទស្សន៍ និងការគ្រប់គ្រងសិល្បករ។

Huang Xiaoming បានកត់សម្គាល់ Bai Yiru ក្នុងឆ្នាំ២០២៣ បន្ទាប់ពីបានមើលរឿងខ្លីដែលនាងបានសម្ដែង។ បន្ទាប់មកលោកបានជួយនាងឱ្យទទួលបានឱកាសសម្ដែងក្នុងរឿងភាគទូរទស្សន៍ជាច្រើន។ ក្នុងឆ្នាំ ២០១២ Xiaoming គឺជាតារាចិនដែលរកចំណូលបានខ្ពស់បំផុត ជាមួយនឹងប្រាក់ចំណូលប្រហែលជាង ៥៤ លានដុល្លារអាម៉េរិក។ លោកបានវិនិយោគលើវិស័យកម្សាន្ត វីដេអូហ្គេម និងភោជនីយដ្ឋាន។ បច្ចុប្បន្នក្រុមហ៊ុនរបស់ តារាសម្តែងវ័យ៤៨ឆ្នាំរូបនេះបានចុះកុងត្រាជាមួយតារាសម្ដែងជិត២០នាក់ហើយ ប៉ុន្តែស្ទើរតែគ្មានមុខល្បី។ Bai Yiru ត្រូវបានគេចាត់ទុកថាជាក្តីសង្ឃឹមថ្មីសម្រាប់ Huang Xiaoming ក្នុងការលើកកម្ពស់មុខមាត់ក្រុមហ៊ុនរបស់លោកក្នុងគ្រាលំបាក៕

យោងតាមប្រព័ន្ធផ្សព្វផ្សាយរបស់ប្រទេសចិនថ្មីៗនេះ ក្រុមហ៊ុន Galaxy Cool Entertainment ដែលជាអតីតក្រុមហ៊ុនគ្រប់គ្រងរបស់តារាសម្តែងស្រី Zhao Lusi មានការផ្លាស់ប្តូរដ៏ធំនៅក្នុងដើមទុនអាជីវកម្ម និងបុគ្គលិក។

តាមប្រព័ន្ធផ្សព្វផ្សាយបានបង្ហាញថាវិនិយោគិន៥នាក់បានដកខ្លួនចេញពីបញ្ជីម្ចាស់ភាគហ៊ុនរបស់ក្រុមហ៊ុន។ ទន្ទឹមនឹងនេះ បុគ្គលិកសំខាន់ៗក៏បានផ្លាស់ប្តូរដែរ ខណៈនាយកជាច្រើនបានលាលែងពីតំណែង។ ភាគហ៊ុនរបស់ក្រុមហ៊ុន Beijing Happy Culture Media នៅក្នុង Galaxy Cool បានកើនឡើងពី ២០% ទៅ ៤៨% ក្លាយជាម្ចាស់ភាគហ៊ុនធំជាងគេ និងស្ទើរតែគ្រប់គ្រងក្រុមហ៊ុន។

Galaxy Cool Entertainment ត្រូវបានបង្កើតឡើងក្នុងខែសីហា ឆ្នាំ២០១៥ មានដើមទុនធម្មនុញ្ញគឺប្រហែល ៣៧.៦ លានយ័ន។ វិសាលភាពនៃអាជីវកម្មរួមមានការធ្វើផែនការផលិតកម្មភាពយន្ត សេវាកម្មគ្រប់គ្រងសិល្បករ សកម្មភាពផ្សាយពាណិជ្ជកម្ម…។ Zhao Lusi បានចូលរួមជាមួយ Galaxy Cool ភ្លាមៗបន្ទាប់ពីក្រុមហ៊ុនត្រូវបានបង្កើតឡើង ហើយកិច្ចសន្យាមានរយៈពេលប្រហែល ១០ ឆ្នាំ។ ជាមួយនឹងកេរ្តិ៍ឈ្មោះរបស់នាង Zhao Lusi បានក្លាយជាតារាដ៏សំខាន់នៅក្នុងក្រុមហ៊ុន។ បន្ទាប់ពីជម្លោះរយៈពេល ៣ ខែ Zhao Lusi បានចាកចេញដោយជោគជ័យ ខណៈដែលក្រុមហ៊ុនគ្រប់គ្រងចាស់មានបញ្ហាដោយសារតែអ្នកវិនិយោគដកដើមទុន។

នៅថ្ងៃទី៨ ខែវិច្ឆិកា នៅឯការប្រគំតន្ត្រីអបអរថ្ងៃកំណើត Zhao Lusi បានប្រកាសថានាងបានចាកចេញពី Galaxy Cool ហើយចាប់ផ្តើមដំណើរថ្មី។ នៅថ្ងៃដដែលនោះ គណនីស្ទូឌីយ៉ូ Weibo របស់ Zhao Lusi ក៏សកម្មម្តងទៀតដោយព័ត៌មានអំពី Galaxy Cool ត្រូវបានដកចេញ៕

កាលពីថ្ងៃទី១៣ ខែវិច្ឆិកានៅលើគណនី Instagram តារាចម្រៀងអាម៉េរិក Billie Eilish វ័យ២៤ឆ្នាំបានធ្វើឱ្យសាធារណជនមានការចាប់អារម្មណ៍នៅពេលនាងបានហៅលោក Elon Musk ថាជា «មនុស្សកំសាក» គួរតែប្រើទ្រព្យសម្បត្តិរបស់ខ្លួនដើម្បីជួយជនរងគ្រោះដោយទុរ្ភិក្ស និងដោះស្រាយបញ្ហាអន្តរជាតិ។

Billie Eilish បានបង្ហោះអត្ថបទជាបន្តបន្ទាប់ដោយអង្គការស្ត្រីនិយមអឺរ៉ុប My Voice, My Choice អំពីលោក Elon Musk ។ អត្ថបទនេះបាននិយាយថា អ្នកជំនួញបានក្លាយជាមហាសេដ្ឋីដំបូងគេរបស់ពិភពលោក ដោយបានបង្ហាញពីវិធី៥យ៉ាងដែលលោកអាចជួយមនុស្សជាមួយនឹងទ្រព្យសម្បត្តិផ្ទាល់ខ្លួន។ នាងបានចែករំលែកសំណើចំនួន៣ដែលអង្គការស្ត្រីនិយមបានដាក់ចេញដែល Elon Musk អាចចំណាយ ៤០ ពាន់លានដុល្លារក្នុងមួយឆ្នាំដើម្បីបញ្ចប់ភាពអត់ឃ្លានជាសកលនៅឆ្នាំ ២០៣០។ ១-២ ពាន់លានដុល្លារជារៀងរាល់ឆ្នាំដើម្បីជួយសង្គ្រោះប្រភេទសត្វដែលជិតផុតពូជ និងរាប់សិបពាន់លានដុល្លារដើម្បីបង្កើតតំបន់ដែលហែកហួរដោយសង្រ្គាមឡើងវិញ។ នៅក្នុងសំណេរចុងក្រោយ តារាចម្រៀងរូបនេះបានពណ៌នា Elon Muskថាជា «មនុស្សកំសាកដ៏គួរឱ្យអាណិត» ប៉ុន្តែនាងមិនបានបញ្ជាក់លម្អិតអំពីមូលហេតុដែលនាងរិះគន់មហាសេដ្ឋីពិភពលោករូបនេះនោះទេ។

Billie Eilish បានបង្ហោះអត្ថបទដែលបង្ហាញពីទ្រព្យសម្បត្តិរបស់ Elon Musk មានតម្លៃដល់ទៅ ៤៦៦.៦ ពាន់លានដុល្លារអាម៉េរិក ដែលបច្ចុប្បន្នជាអ្នកមានបំផុតនៅលើពិភពលោក។ ដូច្នេះព័ត៌មានរបស់ My Voice, My Choice អំពីគាត់ក្លាយជាមហាសេដ្ឋីពាន់លានដុល្លារមិនត្រឹមត្រូវទេ។ ទោះជាយ៉ាងណាក៏ដោយ Forbes ជឿជាក់ថាអង្គការនេះប្រហែលជាសំដៅទៅលើ កញ្ចប់សំណង របស់ Elon Musk ចំនួន ១,០០០ ពាន់លានដុល្លារ ដែលម្ចាស់ភាគហ៊ុនរបស់ក្រុមហ៊ុន Tesla បានអនុម័តនាពេលថ្មីៗនេះ។ យោងតាមគេហទំព័រព័ត៌មាន ប្រសិនបើពាណិជ្ជករបំពេញតាមគោលដៅរបស់ក្រុមហ៊ុន នោះលោកនឹងមានប្រាក់ពាន់ពាន់លានដុល្លារក្នុងរយៈពេល ១០ ឆ្នាំខាងមុខ។ Elon Musk មិនទាន់ឆ្លើយតបនឹងការរិះគន់របស់ Billie Eilish នៅឡើយទេ។

នេះមិនមែនជាលើកទីមួយទេដែលតារាចម្រៀង Billie Eilish បានអំពាវនាវដល់អ្នកមានមហាសេដ្ឋីឱ្យបរិច្ចាគដល់អង្គការសប្បុរសធម៌។ នៅក្នុងកម្មវិធី Innovator Awards នៅថ្ងៃទី ២៩ ខែតុលា តារាចម្រៀងរូបនេះបានជំរុញឱ្យមហាសេដ្ឋី បរិច្ចាគ ប្រាក់បន្ថែមទៀត។ នាងបាននិយាយថា ពិភពលោកស្ថិតនៅក្នុង «ពេលវេលាដ៏អាក្រក់ និងងងឹត» ជាពិសេសនៅក្នុងសហរដ្ឋអាម៉េរិក ហើយសង្ឃឹមថា អ្នកដែលមានមធ្យោបាយនឹងប្រើប្រាស់ប្រាក់របស់ពួកគេសម្រាប់ហេតុផលល្អ។

ម្ចាស់បទ « BIRDS OF A FEATHER» បានថ្លែងសុន្ទរកថានៅចំពោះមុខភ្ញៀវដែលមានទ្រព្យសម្បត្តិជាច្រើនដូចជាមហាសេដ្ឋី Mark Zuckerberg និងភរិយារបស់លោក អ្នកដឹកនាំរឿង George Lucas ដែលជាអ្នកមានបំផុតទីពីរនៅហូលីវូដដែលមានទ្រព្យសម្បត្តិ ៥.១ ពាន់លានដុល្លារ។ យោងតាម People អ្នកចូលរួមមួយចំនួនបានបង្ហាញថា CEO Mark Zuckerberg មិនបានអបអរសាទរសុន្ទរកថារបស់នាងទេ។ ក្នុងកម្មវិធីនោះផងដែរ ពិធីករបានប្រកាសថា Billie Eilish បានបរិច្ចាគថវិកាចំនួន ១១.៥លានដុល្លារអាម៉េរិក ដល់សកម្មភាព ម្ហូបអាហារ ការការពារអាកាសធាតុ និងការកាត់បន្ថយការបំពុលកាបូន៕

ក្នុងព្រឹត្តិការណ៍បញ្ចាំងភាពយន្តថ្មី Wicked: For Good នៅប្រទេសសិង្ហបុរី កាលពីយប់ថ្ងៃទី១៣ ខែវិច្ឆិកា បានធ្វើឱ្យមានការភ្ញាក់ផ្អើលយ៉ាងខ្លាំងនៅពេលអ្នកគាំទ្រជាបុរសម្នាក់ស្រាប់តែរត់ទៅរក Ariana Grande ដាក់ដៃជុំវិញនាងដោយទាញនាងមកជិតខ្លួនខណៈនាងព្យាយាមចេញឆ្ងាយ។ បុរសរូបនេះត្រូវបានគេដឹងថាបានធ្វើទង្វើរំខានចូលមកជិតសិល្បករល្បីៗជាច្រើន។

ក្នុងវីដេអូដែលមានការរីករាលដាលចាប់តាំងពីនោះមក បង្ហាញពីបុរសម្នាក់បានលោតរបាំងរត់ទៅលើ Ariana Grande ដែលធ្វើឱ្យហ្វូងមនុស្សមានភាពចលាចល និងស្រែកគំហក។ មិនត្រឹមតែសន្តិសុខប៉ុណ្ណោះទេដែលជួយ Ariana Grande តារាសម្តែង Cynthia Erivo ក៏បានជួយការពារនាងពីអ្នកគាំទ្រនេះដែរ។ ពិរុទ្ធជននេះត្រូវបានកំណត់អត្តសញ្ញាណថាជាជនជាតិអូស្ត្រាលី មានអាយុ២៥ ឆ្នាំ មានឈ្មោះថា Johnson Wen និងមានគណនី Instagram @pyjamamann ។

Johnson មិនត្រឹមតែធ្វើឱ្យព្រឹត្តិការណ៍សម្ពោធភាពយន្តមានភាពចលាចលនិងធ្វើឱ្យ Ariana Grande ភ័យស្លេកមុខប៉ុណ្ណោះទេប៉ុន្តែបុគ្គលនេះធ្លាប់បានរំខានដល់សិល្បករជាច្រើនទៀតដូចជាព្រឹត្តិការណ៍ប្រគំតន្ត្រីនៅស៊ីដនីរបស់ Katy Perry ។ កម្មវិធីរបស់តារាចម្រៀង The Weeknd នៅ Melbourne និងសូម្បីតែការប្រកួតរត់ចម្ងាយ ១០០ ម៉ែត្ររបស់បុរសនៅឯព្រឹត្តិការណ៍អូឡាំពិកទីក្រុងប៉ារីសឆ្នាំ ២០២៤ ។

អ្នកគាំទ្ររូបនេះមានមោទនភាពក្នុងការចងក្រងរឿងរបស់ខ្លួនតាមអ៊ីនធឺណិត និងបានប្រកាសថា «Ariana Grande គឺជាមហាក្សត្រី»។ សកម្មភាពថ្មីៗនេះ បានធ្វើឱ្យអ្នកលេងអ៊ីនធឺណិតខឹងសម្បា។ ជនជាតិសិង្ហបុរីមួយចំនួនថែមទាំងព្រួយបារម្ភថាឧបទ្ទវហេតុនេះអាចបំភ័យ Ariana Grande មិនឱ្យត្រឡប់ទៅសិង្ហបុរីម្តងទៀត៕