មូស្គូ៖ វិមានក្រឹមឡាំង នៅថ្ងៃព្រហស្បតិ៍សប្ដាហ៍នេះ បាននិយាយថាការសម្រេចចិត្តតែងតាំងប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ជាបុគ្គលប្រចាំឆ្នាំ២០២២ ឬ Person of the Year ដោយទស្សនាវដ្ដីអាមេរិក Time គឺជាការឆ្លុះបញ្ចាំងពីគំនិតស្អប់រុស្ស៉ីនៅក្នុងបណ្ដាប្រទេសលោកខាងលិច។ នេះ បើតាមការដកស្រង់ចេញផ្សាយពីទីភ្នាក់ងារសារព័ត៌មាន AFP នៅថ្ងៃសុក្រ ទី៩ ខែធ្នូ ឆ្នាំ២០២២។

ប្រតិកម្មរបស់វិមានក្រឹមឡាំង កើតមានឡើងបន្ទាប់ពីទស្សនាវដ្ដី Time បានជ្រើសរើសលោក ហ្សេលេនស្គី ជា «បុគ្គលប្រចាំឆ្នាំ» កាលពីថ្ងៃពុធសប្ដាហ៍នេះ ហើយនៅថ្ងៃព្រហស្បតិ៍ ប្រធានាធិបតីអ៊ុយក្រែនរូបនេះក៏ត្រូវបានតែងតាំងជា «បុគ្គលមានឥទ្ធិពលខ្លាំងបំផុត» នៅក្នុងតំបន់អឺរ៉ុប ដោយសារព័ត៌មាន Politico ផងដែរ។ ទស្សនាវដ្ដី Time បានអះអាងថាការជ្រើសរើសរបស់ខ្លួន គឺធ្វើឡើងតាមស្ថានភាពជាក់ស្ដែងជាការសាទរដល់ភាពក្លាហានរបស់លោក ហ្សេលេនស្គី ដែលមិនបានចាកចេញពីទីក្រុងកៀវ ហើយតស៊ូដឹកនាំប្រទេស ប្រយុទ្ធតតាំងនឹងការឈ្លានពានពីសំណាក់រុស្ស៉ី។

ក៏ប៉ុន្តែ នៅក្នុងសន្និសីទសារព័ត៌មានខ្លីមួយ អ្នកនាំពាក្យវិមានក្រឹមឡាំង លោក ឌីមីទ្រី ប៉េសកូវ បាននិយាយថាការសម្រេចចិត្តជ្រើសរើសលោក ហ្សេលេនស្គី ជាបុគ្គលប្រចាំឆ្នាំធ្វើឡើងតែនៅក្នុងចង្កោមបណ្ដាសារព័ត៌មានលោកខាងលិចប៉ុណ្ណោះ និងឆ្លុះបញ្ចាំងពីគំនិតប្រឆាំង និងស្អប់រុស្ស៉ី។

គួរបញ្ជាក់ថា ប្រធានាធិបតីរុស្ស៉ី លោក វ្ល៉ាឌីមៀ ពូទីន ក៏ធ្លាប់ត្រូវបានទស្សនាវដី្ដ Time ជ្រើសរើសជា «បុគ្គលប្រចាំឆ្នាំ» ផងដែរកាលពីឆ្នាំ២០០៧​ ៕

រដ្ឋធានីកៀវ៖ រហូតមកដល់ពេលនេះ បើទោះជាលោករដ្ឋមន្រ្ដីក្រសួងការបរទេស សហរដ្ឋអាមេរិក បានអះអាង ថា ក្រុងវ៉ាស៊ីនតោន មានជាប់ពាក់ព័ន្ធនឹងការវាយប្រហារ ដោយមីស៊ីលរបស់អ៊ុយក្រែន ប្រឆាំងនឹងមូលដ្ឋានកងទ័ពអាកាស ចំនួន៣កន្លែង ចូលជ្រៅទៅក្នុងប្រទេសរុស្ស៊ី កាលពីថ្ងៃទី៥ និង ទី៦ ខែធ្នូ យ៉ាងណាក្ដី ប៉ុន្ដែប្រភពព័ត៌មាននានា ចេញពីក្រុមមន្រ្ដីយោធារបស់អង្គការសន្ធិសញ្ញាអាត្លង់ទិកខាងជើង ហៅកាត់ NATO ក៏ដូចជា ក្រុមអ្នកស៊ើបអង្កេតយោធារបស់រុស្ស៊ី បានច្រានចោលនូវការអះអាងរបស់ប្រមុខការទូតរូបនេះ។

សារព័ត៌មាន Asian Times បានចេញផ្សាយ កាលពីថ្ងៃព្រហស្បតិ៍ ទី៨ ខែធ្នូ ថា ប្រភពព័ត៌មានជាច្រើន ចេញពីអង្គការណាតូ ក៏ដូចជា ប្រភពព័ត៌មាននានា ពីទាហានរុស្ស៊ី បានទាត់ចោលការអះអាងកាលពីថ្ងៃអង្គាររបស់លោក អេនតូនី ប្ល៊ីនខេន (Antony Blinken) រដ្ឋមន្រ្ដី ក្រសួងការបរទេសសហរដ្ឋអាមេរិក បានលើកឡើង ថា សហរដ្ឋអាមេរិក មិនមានអ្វីត្រូវធ្វើជាមួយនឹងមីស៊ីលរបស់អ៊ុយក្រែន វាយប្រហារផ្ទួនៗគ្នា ប្រឆាំងនឹងមូលដ្ឋានកងទ័ពអាកាសរបស់រុស្ស៊ី ចំនួន៣កន្លែង ដែលមានចម្ងាយ រាប់រយគីឡីម៉ែត្រ ចូលជ្រៅទៅក្នុងប្រទេសរុស្ស៊ី កាលពីដើមសប្ដាហ៍នេះឡើយ។

លោកប្រមុខការទូតសហរដ្ឋអាមេរិក បានថ្លែងទៅកាន់ក្រុមអ្នកកាសែត នៅក្នុងអំឡុងកិច្ចប្រជុំជាមួយនឹងលោក ឡយ អូស្ទីន (Lloyd Austin) រដ្ឋមន្រ្ដី ក្រសួងការពារជាតិសហរដ្ឋអាមេរិក និង ក្រុមមន្រ្ដីរបស់អូស្ដ្រាលី ថា «យើងមិនបានលើកទឹកចិត្ត ឬ ក៏ជំរុញឲ្យកងទ័ពការពារទឹកដីរបស់អ៊ុយក្រែន វាយប្រហារ ចូលជ្រៅទៅលើទឹកដីរបស់រុស្ស៊ី នោះឡើយ»។

ដោយឡែក ប្រភពព័ត៌មានជាច្រើន បានលេចចេញពីកងទ័ព នៃប្រទេសជាសមាជិករបស់អង្គការណាតូ ក៏ដូចជា រុស្ស៊ី បានប្រឆាំងនឹងការអះអាងរបស់គាត់ ដោយពួកគេបានលើកឡើង ថា យន្តហោះគ្មានមនុស្សបើក ឬ ដ្រូន ប្រភេទទូ-១៤១ (Tu-141) ដែលជាដ្រូនឈ្លបយកការណ៍ ផលិត នៅក្នុងសម័យអតីតសហភាពសូវៀត ត្រូវបានកែលម្អឡើងវិញ ហើយត្រូវបានកងទ័ពអ៊ុយក្រែន បាញ់បង្ហោះ ទៅវាយប្រហារ ប្រឆាំងនឹងមូលដ្ឋានទ័ពអាកាសរុស្ស៊ី ដោយភ្ជាប់ជាមួយនឹងទិន្នន័យប្រព័ន្ធ GPS ផ្កាយរណបរបស់សហរដ្ឋអាមេរិក សម្រាប់ការវាយប្រហារ លើគោលដៅ ដែលពួកគេបានកំណត់។

ប្រភពព័ត៌មានផ្សេងៗទៀត បានអះអាង ថា យន្ដហោះគ្មានមនុស្សបើក ឬ ដ្រូនឈ្លបយកការណ៍បុរាណ ផលិតដោយអតីតសហភាពសូវៀត នាទសវត្សរ៍ ១៩៧០ ត្រូវបានកែច្នៃឲ្យទៅជាមីស៊ីលគ្រូស បំពាក់ដោយប្រព័ន្ធនាំផ្លូវថ្មី និង បង្ហាញផ្លូវ ដោយផ្កាយរណបរបស់សហរដ្ឋអាមេរិក។ ជាមួយគ្នានេះដែរ ប្រភពព័ត៌មានទាំងនោះ ក៏បានលើកឡើង ថា អ៊ុយក្រែន ប្រហែលជាមិនមានសមត្ថភាព បង្កើតកាំជ្រួចនាំផ្លូវ ដោយខ្លួនឯងនោះឡើយ។

បើតាមប្រភពព័ត៌មាន ពីទាហានរុស្ស៊ី បានឲ្យដឹងថា ក្រសួងការពារជាតិរុស្ស៊ី បានបង្ហាញអាវុធមួយប្រភេទ ជា ដ្រូនទូប៉ូឡែវ ទូ-១៤១ (Tupolev Tu-141) មានការពាក់ព័ន្ធនៅក្នុងការវាយប្រហារ កាលពីថ្ងៃទី៦ ខែធ្នូ ប្រឆាំងនឹងមូលដ្ឋានកងទ័ពអាកាសឃើស (Kursk) ដែលមានចម្ងាយប្រហែល ១០០គីឡម៉ែត្រ ចេញពីព្រំដែន ពុះចែក រវាងប្រទេសរុស្ស៊ី និង អ៊ុយក្រែន។ ទាហានរុស្ស៊ី បានស្គាល់យន្ដហោះគ្មានមនុស្សបើក ឬ ដ្រូនទូ-១៤១ (Tu-141) នេះ ដោយសារតែបំណែករបស់វា ត្រូវបានរកឃើញ ក្រោយការវាយប្រហារ ប្រឆាំងនឹងមូលដ្ឋានកងទ័ពអាកាសឌីយ៉ាហ្គីឡែវ៉ូ (Dyagilevo) មានចម្ងាយត្រឹមតែ៣គីឡូម៉ែត្រ នាភាគខាងលិច ទីក្រុងរីយ៉ាន់ហ្សាន់ (Ryazan) ដែលមានចម្ងាយ ប្រហែល២០០គីឡូម៉ែត្រ ពីរដ្ឋធានីមូស្គូ និង ការវាយប្រហារ ប្រឆាំងនឹងមូលដ្ឋានកងទ័ពអាកាសអេហ្គែលស៍ (Engels) ស្ថិតក្នុងតំបន់សារ៉ាតូវ ដែលមានចម្ងាយ ប្រហែល៥០០ម៉ៃល៍ ឬស្មើនឹងប្រហែល៨០០គីឡូម៉ែត្រ ពីរដ្ឋធានីរបស់ប្រទេសរុស្ស៊ី។

ប្រភពព័ត៌មានជាច្រើនទៀត បានអះអាង ថា ប្រសិនបើវាផ្ទុយពីការបដិសេធរបស់ប្រមុខការទូត លោក Blinken នោះ សហរដ្ឋអាមេរិក បានផ្ដល់ប្រព័ន្ធនាំផ្លូវ សម្រាប់ការវាយប្រហារដោយមីស៊ីល ប្រឆាំងនឹងមូលដ្ឋានកងទ័ពអាកាសរបស់រុស្ស៊ី កាលពីប៉ុន្មានថ្ងៃមុននេះ។ ដូច្នេះ ក្រុងវ៉ាស៊ីនតោន ប្រាកដជាដឹងច្បាស់ ថា សកម្មភាពបែបនេះ នឹងនាំឲ្យកងទ័ពរបស់អង្គការណាតូ ចូលទៅរកច្រាំងជម្លោះ ពាក់ព័ន្ធដោយផ្ទាល់នឹងសង្គ្រាម នៅអ៊ុយក្រែន។ ជាមួយគ្នានេះ រដ្ឋបាលរបស់ប្រធានាធិបតីសហរដ្ឋអាមេរិក លោក ចូ បៃដិន (Joe Biden) ត្រូវតែត្រៀមខ្លួន សម្រាប់ការគ្រប់គ្រងនូវហានិភ័យនេះ។

អ៊ុយក្រែន បានវាយប្រហារ ប្រឆាំងនឹងមូលដ្ឋានកងទ័ពអាកាសរបស់រុស្ស៊ី ចំនួន៣កន្លែង កាលពីថ្ងៃទី៥ និង ទី៦ ខែធ្នូ បានបង្កឲ្យមានការខូចខាតតិចតួចតែប៉ុណ្ណោះ បើប្រៀបធៀបនឹងហានិភ័យយុទ្ធសាស្ត្រ ដែលសហរដ្ឋអាមេរិក បានណែនាំ នៅក្នុងជម្លោះនេះ។ បញ្ហានេះ មិនខុសពីអ្វីដែលលោកឧត្ដមសេនីយ៍ ម៉ាក់ មីលឡេ (Mark Milley) នាយអគ្គសេនាធិការចម្រុះរបស់កងទ័ពសហរដ្ឋអាមេរិក បានព្រមាន កាលពីថ្ងៃទី៩ ខែវិច្ឆិកា ឆ្នាំ២០២២ កន្លងទៅ ថា មិនមានជ័យជម្នះខាងយោធា នៅក្នុងចក្ខុវិស័យ សម្រាប់សង្គ្រាម នៅអ៊ុយក្រែន នោះឡើយ។

ដោយឡែក លោក ជេមស៍ ដាវីស (James Davis) ជាអ្នកវិភាគបញ្ហារុស្ស៊ី បានសរសេរ ចុះផ្សាយ នៅលើ The Global Polarity Monitor កាលពីថ្ងៃទី៧ ខែធ្នូ ដោយរៀបរាប់ អំពីការជាប់គាំងខាងយោធា ថា រុស្ស៊ី បន្តអនុវត្តយុទ្ធសាស្ត្រការពារ នៅក្នុងសង្គ្រាម នៅលើទឹកដីរបស់អ៊ុយក្រែន ដើម្បីពង្រឹងខ្សែការពារ ហើយលើកតម្លៃ ដល់ប្រតិបត្តិការយោធា នៅក្នុងប្រទេសអឺរ៉ុបខាងកើតមួយនេះ… ។ ជាមួយគ្នានេះ ក្រុងមូស្គូ ក៏នៅតែមានទំនុកចិត្ត ថា ការកើនឡើង នៃការចំណាយរបស់បណ្ដាប្រទេសលោកខាងលិច សម្រាប់ទ្រទ្រង់ដល់ប្រទេសអ៊ុយក្រែន នឹងជំរុញឱ្យបណ្ដាមេដឹកនាំបស្ចិមលោក រួមទាំង ប្រធានាធិបតីសហរដ្ឋអាមេរិក លោក ចូ បៃដិន អាចស្វែងរកលទ្ធភាព សម្រាប់ដោះស្រាយជម្លោះ ដោយសន្តិវិធី។ ស្របគ្នានេះដែរ ក្រុងមូស្គូ នៅតែមានជំនឿ ថា ការគ្រប់គ្រងខ្សែការពារឲ្យរឹងមាំ នឹងបង្ហាញ ថា ការចំណាយ លើការគាំទ្រដល់អ៊ុយក្រែន សម្រប់ជាការសម្រេចបាននូវការបង្វែរគោលដៅរបស់រុស្ស៊ី ទាំងស្រុង នៅក្នុងប្រទេសអ៊ុយក្រែន ដោយរួមទាំង តំបន់គ្រីមៀ (Crimea) ផងដែរ។

លោកឧត្ដមសេនីយ៍ Mark Milley នាយអគ្គសេនាធិការចម្រុះ របស់កងទ័ពសហរដ្ឋអាមេរិក បានបង្ហាញពីទស្សនៈរបស់គាត់ ថា ការបើកទ្វារ សម្រាប់កិច្ចចរចាសន្តិភាព នៅក្នុងអំឡុងការផ្អាកការប្រយុទ្ធគ្នា នារដូវរងា បានបង្កឱ្យមានការធុញថប់អារម្មណ៍ នៅក្នុងចំណោមក្រុមមមន្ត្រីសហរដ្ឋអាមេរិក ដោយចង់ទទួលបានជ័យជម្នះ គ្រប់ការចំណាយទាំងអស់។ ជាមួយគ្នានេះ លោក Milley និង មេដឹកនាំយោធាសហរដ្ឋអាមេរិក ជឿ ថា ផ្លូវតែមួយគត់ អាចដកថយចេញពីសង្រ្គាម មានតែការចរចាជាមួយនឹងរុស្ស៊ី។ ចំណែក ក្រសួងការបរទេសសហរដ្ឋអាមេរិក និង ក្រុមប្រឹក្សាសន្តិសុខជាតិរបស់ប្រទេសមហាអំណាចកំពូល ទាំងយោធា និង សេដ្ឋកិច្ចនេះ បានប្តេជ្ញាចិត្ត ដើម្បីសម្រេចបានជ័យជម្នះខាងយោធា លើប្រទេសរុស្ស៊ី តាមមធ្យោបាយណាមួយ ដែលចាំបាច់។

អង្គការណាតូ បានបែងចែក អំពីរបៀបដោះស្រាយជម្លោះ នៅក្នុងប្រទេសអ៊ុយក្រែន។ រីឯប្រធានាធិបតីបារាំង លោក អែមម៉ាញ៉ែល ម៉ាក្រុង (Emmanuel Macro) និង អធិការបតីអាល្លឺម៉ង់ លោក អូឡាហ្វ សូលហ្ស៍ (Olaf Scholz) កំពុងតែធ្វើឲ្យគំនិតផ្ដួចផ្ដើម ផ្តល់ការធានាសន្តិសុខ សម្រាប់ប្រទេសរុស្ស៊ី ឲ្យរស់ឡើងវិញ រួមទាំង ការប្រកាន់នូវអព្យាក្រឹតភាពរបស់អ៊ុយក្រែន ឲ្យនៅដដែល។

លោកស្រី វីកតូរៀ នូឡង់ដ៍ (Victoria Nuland) អនុរដ្ឋមន្រ្ដី ក្រសួងការបរទេសសហរដ្ឋអាមេរិក បានទៅបំពេញទស្សនកិច្ច នៅក្នុងរដ្ឋធានីកៀវ កាលពីថ្ងៃទី៣ ខែធ្នូ ដោយបានអះអាង ប្រាប់ដល់ប្រជាជាតិអ៊ុយក្រែន ថា សហរដ្ឋអាមេរិក ជឿ ថា «ប្រធានាធិបតីរុស្ស៊ី លោក វ៉្លាឌីមៀ ពូទីន មិនមានភាពស្មោះត្រង់ នៅក្នុងសំណើចរចានោះឡើយ ហើយក្រុងវ៉ាស៊ីនតោន ក៏មិនទាន់ត្រៀមខ្លួនឲ្យរួចរាល់ សម្រាប់បញ្ហានេះដែរ»។

ការវាយប្រហារ ប្រឆាំងនឹងមូលដ្ឋានកងទ័ពអាកាសរបស់រុស្សី អាចមានចេតនា ជំរុញឲ្យមានការឆ្លើយតប ពីក្រុងមូស្គូ ហើយវាជាការបង្ហាញ អំពីភាពត្រឹមត្រូវ សម្រាប់ការដាក់ពង្រាយទ័ពជើងគោករបស់អង្គការណាតូ នៅលើទឹកដីរបស់អ៊ុយក្រែន ផងដែរ។

លោក វ្ល៉ាឌីមៀ យ៉ឺម៉ាកូវ (Vladimir Yermakov) មន្រ្ដីក្រសួងការបរទេសរុស្ស៊ី បានបញ្ជាក់ កាលពីថ្ងៃទី៣០ ខែវិច្ឆិកា កន្លងទៅ ថា ផ្កាយរណបរបស់សហរដ្ឋអាមេរិក ត្រូវបានប្រើប្រាស់ សម្រាប់នាំផ្លូវមីស៊ីល វាយប្រហារចូលជ្រៅ ទៅលើដែនដីរបស់រុស្ស៊ី ដោយអាចត្រូវកំណត់លើការបំផ្លិចបំផ្លាញ ចំពោះគោលដៅនានារបស់យោធា។ រីឯការវាយប្រហាររបស់រុស្ស៊ី ប្រឆាំងនឹងផ្កាយរណបរបស់សហរដ្ឋអាមេរិក ក៏នឹងអាចអូសទាញសហរដ្ឋអាមេរិក ឲ្យហក់ចូលទៅក្នុងសង្គ្រាម ដោយផ្ទាល់ ប្រឆាំងជាមួយនឹងរុស្ស៊ី ៕

បរទេស៖ ប្រទេសឥណ្ឌូនេស៊ីកំពុងតែព្រួយបារម្ភជាមួយនឹងសេដ្ឋកិច្ច ក្រោយពីខ្លួនបានចេញច្បាប់ថ្មី “ហាមរស់នៅជាមួយគ្នា ឬរួមភេទមុនរៀបការ” ដែលវាអាចធ្វើឱ្យអ្នកទេសចរអូស្ត្រាលី ដែលជាក្រុមគោលដៅសំខាន់របស់ឥណ្ឌូនេស៊ី ងាកធ្វើដំណើរទៅកាន់ប្រទេសផ្សេង។

កាលពីថ្ងៃទី៦ ខែធ្នូ ឆ្នាំ២០២២ កន្លងទៅនេះ សភាឥណ្ឌូនេស៊ីបានអនុម័តសេចក្តីព្រាងនៃក្រមព្រហ្មទណ្ឌថ្មី  គឺច្បាប់មួយក្នុងចំណោមច្បាប់ដែលនឹងត្រូវអនុវត្ត ដោយប្រជាជនក្នុងវ័យបន្តពូជទាំងអស់ត្រូវបានហាមឃាត់មិនឱ្យរួមភេទមុនពេលរៀបការ ក៏ដូចជាហាមរស់នៅជាប្ដីប្រពន្ធ បើមិនទាន់បានរៀបការស្របច្បាប់។

ជាមួយគ្នានោះ គូស្នេហ៍ដែលមិនទាន់រៀបការអាចប្រឈមនឹងការជាប់ពន្ធនាគារដល់ទៅមួយឆ្នាំ ប្រសិនបើ ពួកគេ រាយការណ៍ថា មានការរួមភេទ បន្ថែមពីនោះប្រសិនបើរស់នៅជាមួយគ្នាដោយមិន រៀបការ នោះពួកគេអាចប្រឈមនឹងការជាប់ពន្ធនាគារដល់ទៅ ៦ ខែ។

ក្នុងនោះគេរំពឹងថាច្បាប់នេះនឹងចូលជាធរមានក្នុងរយៈពេល ៣ ឆ្នាំខាងមុខ ប៉ុន្តែបញ្ហាសំខាន់គឺ ច្បាប់ ថ្មីនេះប៉ះពាល់មិនត្រឹមតែពលរដ្ឋឥណ្ឌូណេស៊ីប៉ុណ្ណោះទេ ប៉ុន្តែក៏មាន ជនបរទេសក្នុងប្រទេស និងអ្នកទេសចរដែលមកលេងប្រទេសឥណ្ឌូនេស៊ីផងដែរ។

ដោយប្រទេសខ្លួនបានពឹងផ្អែកផ្នែកសេដ្ឋកិច្ចមកពីក្រុមទេសចរណ៍សំខាន់មកពី អូស្ត្រាលី ដែលពួកគេតែងតែ មកលេងឥណ្ឌូនេស៊ីច្រើនជាងគេ ដោយមានចំនួនភ្ញៀវទេសចរអូស្ត្រាលីរាប់លាននាក់បានមកលេងកោះបាលី។

ទោះជាយ៉ាងណាក្រោយពីមានព័ត៌មានច្បាប់ថ្មីចេញមក  កត្តានេះបានធ្វើឲ្យភ្ញៀវទេសចរអូស្ត្រាលីមួយ ចំនួនព្រួយបារម្ភថាតើពួកគេគួរទៅលេងប្រទេសឥណ្ឌូនេស៊ី ឬក៏អត់។ ខណៈពេលដែលអ្នកខ្លះនិយាយថាបន្ទាប់ពីនេះពួកគេនឹងធ្វើដំណើរជាមួយសំបុត្រអាពាហ៍ពិពាហ៍របស់ពួកគេ។ ខណៈ អ្នកខ្លះដែល មានមិត្តប្រុស ឬ ដៃគូដែលជាស្ត្រីនៅទីនោះហើយមិនទាន់រៀបការបាននិយាយថា ពួកគេនឹងធ្វើដំណើរទៅប្រទេសផ្សេងជំនួសវិញ ប្រសិនបើច្បាប់ចែងថា ពួកគេមិនត្រូវបានអនុញ្ញាតឱ្យស្នាក់នៅក្នុងសណ្ឋាគារជាមួយដៃគូរបស់ពួកគេ។

ទោះជាយ៉ាងណាអ្នកនាំពាក្យក្រសួងយុត្តិធម៌ឥណ្ឌូនេស៊ី លោក Albert Ares បានព្យាយាមបន្ធូរបន្ថយកង្វល់របស់ពួកគេ ដោយនិយាយដូច្នេះថា អ្នកទេសចរ មិនសូវងាយរងការកាត់ទោសទេ  ដោយភ្ញៀវទេសចរអន្តរជាតិមិនបាច់ព្រួយបារម្ភពេកទេ ព្រោះពួកគេនឹងត្រូវចាប់ខ្លួនយកមកផ្ដន្ទាទោស លុះត្រាតែឪពុក ម្តាយ ប្តី ប្រពន្ធ ឬ កូនរបស់ ភាគីណាមួយប្តឹងតែប៉ុណ្ណោះ៕ ប្រភព៖ pptvhd36

អន្តរជាតិ៖ រុស្ស៊ីបានវាយឆ្មក់ឃ្លាំងផ្ទុកអាវុធរបស់អ៊ុយក្រែនបណ្តាលឱ្យក្រុងកៀវបាត់បង់កាំជ្រួចចំមីស៊ីលចំនួន ៧០ ដើម ប្រភេទ ហ៊ីម៉ារ (HIMARS)។ ទីក្រុងមូស្គូបានបញ្ជូនរថភ្លើងពាសដែក ដើម្បីចូលរួមក្នុងប្រតិបត្តិការពិសេសនេះ។
យោងតាមសារព័ត៌មានតាស​ (TASS) កាលពីថ្ងៃទី ៧ ខែធ្នូ បានផ្សាយថា ក្រសួងការពារជាតិរុស្ស៊ីបាននិយាយថា ខ្លួនបានប្រើប្រាស់អាវុធដែលមានភាពជាក់លាក់ខ្ពស់ក្នុងការវាយឆ្មក់ឃ្លាំងអាវុធនៅតំបន់គ្រីវូរ៉ស (Krivoi Rog) ដែលបណ្តាលឱ្យអ៊ុយក្រែនបាត់បង់កាំជ្រួចមីស៊ីលជាច្រើន។

ទីភ្នាក់ងារព័ត៌មាន AFP នៅថ្ងៃទី៨ ខែធ្នូ ឆ្នាំ២០២២ បានផ្សាយថា ដោយផ្អែកលើសម្តីរបស់មន្រ្តីជាន់ខ្ពស់អ៊ុយក្រែនម្នាក់ កាលពីថ្ងៃពុធសប្តាហ៍នេះ ប្រព័ន្ធផ្សព្វផ្សាយអ៊ុយក្រែន អ៊ិនធើហេ្វគ អ៊ុយក្រែន (Interfax-Ukraine) បានរាយការណ៍ថា កងកម្លាំងរបស់រុស្ស៉ីបានបាញ់មីស៉ីល និងរ៉ុក្កែតសរុបលើសពី១,០០០គ្រាប់មកលើបណ្តាញថាមពលអគ្គិសនីរបស់អ៊ុយក្រែន។

លោក វ៉ូឡូឌីមៀរ គូឌ្រីតស្គី (Volodymyr Kudrytsky) អគ្គនាយកក្រុមហ៊ុន យ៊ូក្រេណឺហ្កូ (Ukrenergo) ដែលជាប្រតិបត្តិករបណ្តាញថាមពលអគ្គិសនីនៅអ៊ុយក្រែនបាននិយាយប្រាប់ដូចខាងលើ ក្នុងអំឡុងកិច្ចប្រជុំមួយដែលរៀបចំឡើងដោយធនាគារអឺរ៉ុបសម្រាប់ការអភិវឌ្ឍនិងការស្ថាបនាឡើងវិញ ។ លោក គូឌ្រីតស្គី បានបន្ថែមថា ក្រុមមន្រ្តីរបស់លោកកំពុងស្វះស្វែងរកបរិក្ខារសំខាន់ៗនៅជុំវិញពិភពលោកដែលចាំបាច់សម្រាប់ការជួសជុល។

បើតាមលោក គូឌ្រីតស្គី ការបាញ់ស្រោចមីស៉ីល និងគ្រាប់រ៉ុក្កែត៨លើកចុងក្រោយរបស់រុស្ស៉ី ទៅលើហេដ្ឋារចនាសម្ព័ន្ធសំខាន់ៗ បានបង្កការខូចខាតយ៉ាងធ្ងន់ធ្ងរ ចំពោះបណ្តាញថាមពល និងបាននាំឱ្យមានការដាច់និងផ្តាច់ចរន្តអគ្គិសនីនៅពាសពេញប្រទេស ប៉ុន្តែប្រព័ន្ធបណ្តាញថាមពលនៅអាចដំណើរការបាន។

បច្ចុប្បន្នអ៊ុយក្រែនកំពុងប្រឈមនឹងបញ្ហាខ្វះខាតខ្លាំងនូវសមត្ថភាពផលិតថាមពល បើទោះបីជាការប្រើប្រាស់បានថយចុះក្នុងអត្រា២៥-៣០ភាគរយ បើធៀបនឹងកាលពីពេលមុនមានសង្រ្គាមក៏ដោយ។ កាលពីសប្តាហ៍មុន ក្រុមហ៊ុន អ៊ុយក្រែននឺហ្គោ (Ukrenergo) បានប្រាប់ថា ខ្លួនធានាបានកម្ចីទំហំ៣០០លានអឺរ៉ូ (៣១៥លានដុល្លារ) ពីធនាគារ អ៊ីប្រ៊េដ (EBRD) ដើម្បីស្តារហេដ្ឋារចនាសម្ពន្ធថាមពល ដែលបានរងការបំផ្លិចបំផ្លាញក្នុងការវាយប្រហាររបស់រុស្ស៉ី និងដើម្បីធ្វើឱ្យប្រសើរឡើងនូវស្ថិរភាពផ្នែកហិរញ្ញវត្ថុ ៕

អន្តរជាតិ៖ រដ្ឋបាលចំណីអាហារ និងឱសថ កំពុងណែនាំប្រជាជនក្នុងរដ្ឋចំនួន១៣ មិនឱ្យបរិភោគ អយស្ទ័រឆៅមួយចំនួនពីប្រទេសកូរ៉េខាងត្បូង បន្ទាប់ពីយ៉ាងហោចណាស់មនុស្សម្នាក់ នៅទីក្រុង Las Vegas បានឈឺដោយមេរោគដែលអាចបណ្តាលឱ្យរាគ និងក្អួត។

FDA បាននិយាយថា មណ្ឌលសុខភាព Southern Nevada បានជូនដំណឹងដល់មន្ត្រីអំពីជំងឺពីរក្រុម ពីភោជនីយដ្ឋានមួយនៅ Las Vegas  ក្រោយយ៉ាងហោចណាស់មនុស្សម្នាក់ត្រូវបានគេបញ្ជាក់ថា មានជំងឺ sapovirus ហើយ៩នាក់ផ្សេងទៀតអាចមានជម្ងឺដូចគ្នា ខណៈអយស្ទ័រត្រូវបានលក់​ នៅភោជនីយដ្ឋាន នៅថ្ងៃទី ២៨ ខែតុលានិងថ្ងៃទី ៥ ខែវិច្ឆិកា។

យោងតាមការចេញផ្សាយព័ត៌មានរបស់ FDA មេរោគ sapoviruses បណ្តាលឱ្យមានជំងឺរលាក ក្រពះពោះវៀនធំ ហើយរោគសញ្ញាទូទៅបំផុតគឺរាគ ក្អួត ចង្អោរ និងឈឺក្រពះ។

FDA បាននិយាយថារោគសញ្ញាជាធម្មតាលេចឡើងក្នុងរយៈពេល ៤៨ ម៉ោង។ មន្ត្រីបាននិយាយថា អ្នកប្រើប្រាស់ ជាពិសេសអ្នកដែលមានផ្ទៃពោះ ឬអ្នកមានគំរោងមានផ្ទៃពោះ មនុស្សចាស់ និងអ្នកដែលមានប្រព័ន្ធភាពស៊ាំចុះខ្សោយ ដែលថ្មីៗនេះបានទទួលទានអយស្ទ័រឆៅនៅក្នុង១៣រដ្ឋ ហើយសង្ស័យថាពួកគេបានពុលអាហារ ដែលគួរតែស្វែងរកការព្យាបាលជាបន្ទាន់។

បន្ថែមពីលើរដ្ឋ Nevada ការណែនាំរបស់ FDA បានអនុវត្តចំពោះអ្នកប្រើប្រាស់ និងអ្នកលក់នៅក្នុងរដ្ឋ Alabama រដ្ឋ California រដ្ឋ Florida រដ្ឋ Georgia រដ្ឋ Maryland ទីក្រុង New York រដ្ឋ New Jersey រដ្ឋ North Carolina រដ្ឋ Pennsylvania រដ្ឋ South Carolina រដ្ឋ Tennessee និងរដ្ឋ Virginia ៕