ប្រទេសជប៉ុន ៖ ការផ្តល់ភាពសំខាន់នៃតំបន់អាស៊ីអាគ្នេយ៍បានអភិវឌ្ឍន៍រីកចម្រើន ដែលធ្វើឱ្យគម្រោងថ្មីៗវិនិយោគដោយជប៉ុន ផ្តោតលើការអភិវឌ្ឍហេដ្ឋារចនាសម្ព័ន្ធស្តង់ដារ សុខភាព សេដ្ឋកិច្ចឌីជីថល ការលើកកម្ពស់ហិរញ្ញវត្ថុ និងការវិនិយោគផ្អែកលើគំនិតផ្តួចផ្តើមការផ្លាស់ប្តូរថាមពលអាស៊ី ក្នុងគោលបំណងសម្រេចបាននូវកំណើនប្រកបដោយចីរភាព និងអព្យាក្រឹតនៅអាស៊ី ។

ជប៉ុនជាអ្នកគាំទ្រដ៏សំខាន់ក្នុងការអភិវឌ្ឍហេដ្ឋារចនាសម្ព័ន្ធនៃតំបន់អាស៊ីអាគ្នេយ៍ តាំងពីសម័យសង្គ្រាមត្រជាក់ មិនថាស្ពាន Nhat Tan នៅប្រទេសវៀតណាម រហូតដល់អាកាសយានដ្ឋានអន្តរជាតិ Bohol នៅហ្វីលីពីន និងកំពង់ផែសមុទ្រជ្រៅ Patimban នៅឥណ្ឌូណេស៊ី ។ ជប៉ុនជាវិនិយោគិនធំបំផុតក្នុងភូមិភាគនេះ ដោយក្រុមហ៊ុនជប៉ុនបានរួមចំណែកក្នុងគម្រោងហេដ្ឋារចនាសម្ព័ន្ធផ្សេងៗ ។

អ្នកវិភាគនិយាយថា «ឥទ្ធិពលផ្នែកសេដ្ឋកិច្ច និងសង្គម» ដែលកើនឡើងរបស់ចិនក្នុងតំបន់អាស៊ីអាគ្នេយ៍ គឺជាកត្តាជំរុញនៅពីក្រោយនៃការគាំទ្រគម្រោងធំៗរបស់ជប៉ុន ។ ទោះយ៉ាងណា ការជួយផ្នែកហេដ្ឋារចនាសម្ព័ន្ធរបស់ជប៉ុន មិនគ្រាន់តែទប់ទល់នឹងឥទ្ធិពលចិននៅអាស៊ីអាគ្នេយ៍ប៉ុណ្ណោះទេ ប៉ុន្តែវាអាចជួយបើកទីផ្សារថ្មីៗឱ្យអាជីវកម្មរបស់ជប៉ុនផងដែរ ហើយការវិនិយោគហេដ្ឋារចនាសម្ព័ន្ធទាំងនេះត្រូវបានចាត់ទុកជាតួនាទីសំខាន់ក្នុងគោលគំនិត Free and Open Indo-Pacific របស់ជប៉ុន ។

ការវិនិយោគអាចឱ្យជប៉ុនរក្សាឥទ្ធិពលនយោបាយ ការទូត និងសេដ្ឋកិច្ចនៅអាស៊ីអាគ្នេយ៍ ខណៈប្រទេសក្នុងតំបន់រកវិធីប្រឆាំងនឹងប្រទេសមហាអំណាច ។ ធនាគារសហប្រតិបត្តិការអន្តរជាតិជប៉ុន (JBIC) បានផ្តល់ប្រាក់កម្ចី៤ម៉ឺនលានយេនសម្រាប់៣០គម្រោងក្នុងតំបន់អាស៊ីអាគ្នេយ៍ ។ ជំនួយនេះបង្ហាញឱ្យឃើញពីភាពជាអ្នកដឹកនាំរបស់ជប៉ុន ក្នុងការជួយអភិវឌ្ឍន៍ហេដ្ឋារចនាសម្ព័ន្ធ ។

លើសពីនេះ ជប៉ុនមានគម្រោងរថភ្លើងក្រោមដីនៅទីក្រុងម៉ានីល ប្រទេសហ្វីលីពីន, កំពង់ផែកុងតឺន័រថ្មីនៅក្រុងព្រះសីហនុ ប្រទេសកម្ពុជា និងគម្រោងតភ្ជាប់ប្រទេសវៀតណាម ឡាវ កម្ពុជា ថៃ និងមីយ៉ាន់ម៉ា ដើម្បីកម្ពស់ពាណិជ្ជកម្ម ការវិនិយោគដោយផ្ទាល់ពីបរទេស និងការអភិវឌ្ឍសេដ្ឋកិច្ចក្នុងមហាអនុតំបន់ទន្លេមេគង្គ ។ នៅខែវិច្ឆិកា ឆ្នាំ២០២២ ជប៉ុនក៏បានផ្តល់ប្រាក់កម្ចីចំនួន១៣ម៉ឺនលានយេនដល់ប្រទេសឥណ្ឌូណេស៊ី សម្រាប់គម្រោងរថភ្លើងក្រោមដីនៅក្រុងហ្សាកាតា និងជាផ្លូវតភ្ជាប់រវាងកំពង់ផែ Patimba ជាមួយក្រុងហ្សាកាតា ។

ជប៉ុនមានគោលបំណងបញ្ឈប់ឥទ្ធិលរបស់ចិនក្នុងការអភិវឌ្ឍហេដ្ឋារចនាសម្ព័ន្ធនៅអាស៊ីអាគ្នេយ៍ ហើយដើម្បីសម្រេចបំណងនេះ ជប៉ុនបានចេញយន្តការ និងគំនិតផ្តួចផ្តើមថ្មីៗ រួមទាំងក្រុមហ៊ុនវិនិយោគហេដ្ឋារចនាសម្ព័ន្ធក្រៅប្រទេស ដើម្បីអភិវឌ្ឍន៍ការដឹកជញ្ជូន និងអភិវឌ្ឍន៍ទីក្រុងនៅឆ្នាំ២០១៤ ។

ការវិនិយោគផ្សេងៗក្នុងរយៈពេល១០ឆ្នាំមកនេះ មិនត្រឹមតែជួយបង្កើតទំនាក់ទំនងសេដ្ឋកិច្ចរយៈពេលយូរជាមួយប្រទេសផ្សេងៗក្នុងតំបន់ប៉ុណ្ណោះទេ ប៉ុន្តែបានជួយរៀបចំការវិនិយោគហេដ្ឋារចនាសម្ព័ន្ធពីជប៉ុនសម្រាប់គម្រោងផ្សេងៗដែរ ដូចជា គម្រោងស្ពានអ្នកលឿង ប្រទេសកម្ពុជា និងរថភ្លើងក្រោមដីនៅក្រុងហូជីមិញ ប្រទេសវៀតណាម ។

ជប៉ុនមានប្រៀបជាងប្រទេសផ្សេងៗ បើទោះជាជប៉ុនមានងាយនឹងរងគ្រោះពីធម្មជាតិ ដូចជា រំជួយដី ភ្លៀង និងព្រិលធ្លាក់ខ្លាំង ។ បណ្តាក្រុមហ៊ុនជប៉ុនមានជំនាញ និងបច្ចេកវិទ្យាទំនើបទាក់ទងនឹងហេដ្ឋារចនាសម្ព័ន្ធ និងអាចប្រើប្រាស់បច្ចេកវិទ្យាទាំងនេះក្នុងភូមិសាស្ត្រខុសៗគ្នា ។ លើសពីនេះ ជប៉ុនបានទទួលប្រយោជន៍ខាងសេដ្ឋកិច្ចពីក្រុមហ៊ុនជប៉ុនក្នុងតំបន់អាស៊ីអាគ្នេយ៍ ដូច្នេះ គេចាត់ទុកជាគោលដៅទី១ នៃការវិនិយោគដោយផ្ទាល់របស់ជប៉ុន ។

បើទោះជាជប៉ុនមានប្រៀបជាងក្តី ប៉ុន្តែនៅតែប្រឈមនឹងការប្រជែងជាមួយចិន ដោយសារជប៉ុនមិនអាចប្រជែងហិរញ្ញប្បទានជាមួយចិនបានទេ ។ ប៉ុន្តែជប៉ុនបានផ្តល់ប្រាក់កម្ចីរយៈពេលវែង និងអត្រាការប្រាក់ទាប បើទោះជាតម្លៃសាងសង់របស់ជប៉ុនត្រូវចំណាយខ្ពស់ក្តី ប៉ុន្តែសំណង់ជប៉ុនមានគុណភាពស្តង់ដារខ្ពស់ ។

ជប៉ុនជាប្រទេសឈានមុខគេជាមួយហេដ្ឋារចនាសម្ព័ន្ធគុណភាពខ្ពស់ កាលពីខែមិថុនា ជប៉ុនបានសហការជាមួយក្រុមប្រទេសឧស្សាហកម្ម៧ប្រទេស ដោយសន្យាផ្តល់មូលនិធិចំនួន៦០ម៉ឺនលានដុល្លារអាមេរិក ដើម្បីវិនិយោគគម្រោងផ្សេងៗក្នុងប្រទេសកំពុងអភិវឌ្ឍទូទាំងពិភពលោក ក្នុងរយៈពេល៥ឆ្នាំខាងមុខ ។ គេរំពឹងថា ការខិតខំរបស់ជប៉ុននឹងធ្វើឱ្យគេចាប់អារម្មណ៍ និងជាឱកាសរបស់ក្រុមហ៊ុនសំណង់ជប៉ុនកាន់តែច្រើន ៕

ប្រភព ៖ AEC Connect

តុលាការក្នុងប្រទេសថៃបានកាត់ទោសសកម្មជននយោបាយអាយុ២៧ឆ្នាំម្នាក់ឱ្យជាប់គុក ២៨ឆ្នាំកាលពីថ្ងៃព្រហស្បតិ៍កន្លងទៅ ក្រោយពីរូបគេបង្ហោះសារនៅលើហ្វេសប៊ុក “បរិហារកេរ្តិ៍រាជាធិបតេយ្យទៅកាន់ព្រះមហាក្សត្រថៃ”។

បុរសរូបនេះមានឈ្មោះ មង្គល ទីរ៉ាកុត (Mongkol Tirakote) អាយុ២៧ឆ្នាំ  ត្រូវបានតុលាការនៅទីក្រុងឆៀងរ៉ាយ (Chiang Rai) ភាគខាងជើងប្រទេសថៃ រកឃើញថាពិតជាមានទោស ក្នុងបទល្មើសប្រមាថព្រះមហាក្សត្រ ចំនួន២ករណី។

លោក មង្គល ទីរ៉ាកុត (Mongkol Tirakote) គ្រោងប្តឹងឧទ្ធរណ៍ប្រឆាំងនឹងសាលក្រមនេះ ខណៈតុលាការបានអនុញ្ញាតឱ្យរូបលោក អាចនៅក្រៅឃុំជាបណ្តោះអាសន្ន ជាមួយថវិកាតម្កល់ ៣០០,០០០បាត ឬស្មើនឹងជិត១០,០០០ដុល្លារ។

មិនតែប៉ុណ្ណោះ លោក មង្គល ក៏ប្រឈមនឹងបទចោទប្រកាន់ទី៣ ដាច់ដោយឡែកមួយទៀតផងដែរ ពាក់ព័ន្ធការប្រមាថព្រះមហាក្សត្រ ជុំវិញការបង្ហោះសារអនឡាញ កាលពីឆ្នាំមុន ហើយនឹងត្រឡប់ទៅបង្ហាញវត្តមានក្នុងតុលាការ សាជាថ្មីនៅខែមីនា៕

រដ្ឋធានីកៀវ៖ ក្រោយពេលប្រធានាធិបតីសហរដ្ឋអាមេរិក បានប្រកាស កាលពីថ្ងៃពុធ អំពីការផ្គត់ផ្គង់រថក្រោះប្រយុទ្ធធុនធ្ងន់ ប្រភេទ M1 Abrams ចំនួន៣១គ្រឿងនោះមក ក៏មានប្រទេសចំនួន១២ បានសម្រេចផ្ដល់រថក្រោះ Leopard 2 ផលិតដោយអាល្លឺម៉ង់ ចំនួន១០០គ្រឿង បញ្ជូនទៅកាន់ជួយដល់ប្រទេសអ៊ុយក្រែន ប៉ុន្ដែឥឡូវនេះ ក្រុមអ្នកជំនាញរុស្ស៊ី បានបញ្ចេញនូវភៅណែនាំមួយ អំពីវិធីសាស្រ្ដកម្ទេចរថក្រោះទំនើបរបស់សហរដ្ឋអាមេរិក។

សារព័ត៌មាន The Eurasia Times បានចេញផ្សាយ កាលពីរសៀល ថ្ងៃសុក្រ ទី២៧ ខែមករា ថា នៅមុនការទៅដល់ នៃរថក្រោះប្រយុទ្ធធុនធ្ងន់ដ៏ទំនើបរបស់សហរដ្ឋអាមេរិក ប្រភេទ M1 Abram និង រថក្រោះរបស់អាល្លឺម៉ង់ ប្រភេទ Leopard 2 នោះ មានរូបភាពមួយ បានលេចចេញជាថ្មី នៅលើបណ្ដាញផ្សព្វផ្សាយសង្គម ដោយបានបង្ហាញ អំពីភាពងាយរងគ្រោះ នៃការកម្ទេចរថក្រោះ M1 Abrams ផលិតនៅសហរដ្ឋអាមេរិក ជាមួយនឹងការណែនាំ អំពីកន្លែងដែលត្រូវវាយប្រហារ និង ប្រភេទអាវុធ ដែលត្រូវប្រើប្រាស់។

លោក ចូ បៃដិន (Joe Biden) ប្រធានាធិបតីសហរដ្ឋអាមេរិក កាលពីថ្ងៃទី២៥ ខែមករា បានសន្យា ផ្ដល់រថក្រោះ Abrams (អេប្រាមស៍) ចំនួន៣១គ្រឿង បញ្ជូនទៅកាន់ប្រទេសអ៊ុយក្រែន។ សកម្មភាពនេះ ទំនងជាបង្ហាញ អំពីការជំរុញ ឬ ដាក់សម្ពាធ ទៅដល់អធិការបតីអាល្លឺម៉ង់ លោក អូឡាហ្វ សូលហ្ស៍ (Olaf Scholz) ឲ្យផ្គត់ផ្គង់រថក្រោះ Leopard 2 ជាច្រើនគ្រឿង បញ្ជូនទៅកាន់ប្រទេសដែលកំពុងតែហែកហួរ ដោយសារសង្គ្រាម នៅក្នុងតំបន់អឺរ៉ុបខាងកើតមួយនេះ។

លោកប្រធានាធិបតីសហរដ្ឋអាមេរិក បានបញ្ជាក់ នៅចំពោះមុខ លោក ឡយ អូស្ទីន (Lloyd Austin) រដ្ឋមន្រ្ដីក្រសួងការពារជាតិ និង លោក អេនតូនី ប៊ីលនខែន (Anthony Blinken) រដ្ឋមន្រ្ដីក្រសួងការបរទេសរបស់គាត់ ថា «ថ្ងៃនេះ ខ្ញុំកំពុងតែប្រកាស ថា សហរដ្ឋអាមេរិក នឹងបញ្ជូនរថក្រោះ Abrams ចំនួន៣១គ្រឿង ស្មើនឹងមួយកងពលតូចរថក្រោះ ទៅកាន់ប្រទេសអ៊ុយក្រែន។ រថក្រោះទាំងនេះ នឹងអាចទប់ទល់ ហើយការពារប្រជាជន និង ទឹកដីរបស់អ៊ុយក្រែន បាន»។

ដោយឡែក រុស្ស៊ី បានប្រតិកម្មយ៉ាងខ្លាំង ចំពោះការសម្រេចចិត្តរបស់សហរដ្ឋអាមេរិក នៅក្នុងការបញ្ជូនរថក្រោះទាំងនោះ ទៅជួយដល់ប្រទេសអ៊ុយក្រែន ដោយចាត់ទុក ថា នេះជាសកម្មភាព បង្កឲ្យប្រជាជន នៅក្នុងប្រទេសនេះ រងទុក្ខកាន់តែធ្ងន់ទៅវិញទេ។ ចំណែកមេដឹកនាំរុស្ស៊ី ក៏កំពុងតែបង្ហាញទំនុកចិត្ត ថា រថក្រោះ Abrams ទាំងនេះ នឹងមិនមែន ជាការគំរាមកំហែងជាយុទ្ធសាស្រ្ដដ៏សំខាន់នោះឡើយ។

ក្រុមអ្នកនិយមលេងអ៊ីនធើរណេតរបស់រុស្ស៊ី បានបង្ហោះរូបភាពរថក្រោះ Abrams នៅតាមបណ្ដាញសង្គម ដោយពណ៌នា អំពីផ្នែកងាយរងគ្រោះរបស់វា ហើយថែមទាំងណែនាំ អំពីរបៀបកម្ទេចរថក្រោះ ប្រភេទនេះ។ រូបភាពដែលបានឃើញនេះ ពិតជារូបចាស់ ហើយវាមានភាពល្បីល្បាញ នៅក្នុងប្លុករុស្ស៊ី អមដោយការសរសេរលម្អិត អំពីរបៀបបំផ្លាញ ឬ បំផ្លាញតួ Abrams ។

នៅក្នុងដ្យាក្រាមនោះ មានការណែនាំជាច្រើន រួមមាន ទី១-ណែនាំឱ្យវាយប្រហារទៅលើប្រព័ន្ធកាំភ្លើងធំរបស់រថក្រោះ ជាមួយនឹងអាវុធធុនតូច ឬ កាំភ្លើងយន្ត។ ទី២-ណែនាំ ឲ្យវាយលុកត្រង់ចន្លោះគម្លាតរវាងប៉មរថក្រោះ និងទី៣- ណែនាំឲ្យវាយប្រហារបំបុកសងខាង ដែលអាចទម្លុះ សូម្បីតែប្រើគ្រាប់បែកដៃចាស់ៗ សម្រាប់ជាឧបករណ៍បាញ់គ្រាប់បែក RPG-7 រួមមាន PG-7 និង PG-7V, PG-7 VM …ជាដើម។ ការណែនាំឲ្យវាយប្រហារទាំងនេះ ទំនងជាផ្អែកលើការវាយតម្លៃ លើក្រោះ M1 Abrams ក៏ដូចជា រថក្រោះ M1A1 និង M1A2 ត្រូវបានការពារយ៉ាងរឹងមាំ នៅផ្នែកខាងមុខ។

សេចក្ដីរាយការណ៍ ជាភាសារុស្សី បានណែនាំឲ្យវាយប្រហារបំបុក ទៅលើធុងសាំងរបស់រថក្រោះ ដែលមានទីតាំង នៅផ្នែកខាងមុខ ទាំងសងខាងរបស់អ្នកបើកបរ។ ឥន្ធនៈដែលឆេះនោះ ត្រូវបានគេរំពឹង ថា នឹងធ្លាក់ចូលក្នុងបន្ទប់ម៉ាស៊ីន ហើយវាបណ្តាលឱ្យម៉ាស៊ីនឆេះ និងផ្ទុះឡើង។ ប៉ុន្ដែទោះជាយ៉ាងណាក៏ដោយ ចំពោះស្ថានភាពបែបនេះ គឺរថក្រោះ M1 Abrams មានប្រព័ន្ធពន្លត់អគ្គិភ័យ សម្រាប់បន្ទប់ម៉ាស៊ីន ហើយត្រូវគេរាយការណ៍ ថា មានដបចំនួនពីរ និង បំពង់ពន្លត់អគ្គិភ័យចល័តមួយចំនួនផងដែរ។

ដើម្បីប្រឈមមុខនឹងគ្រាប់មីនបង្កប់ នៅក្នុងដីនោះ រថក្រោះ M1 Abrams ក៏បានបំពាក់ទៅដោយឧបករណ៍ សម្រាប់រុញគ្រាប់មីនឲ្យឃ្លាតចេញពីផ្លូវ ដើម្បីជួយដល់រថពាសដែកផ្សេងៗទៀត បើកបរតាមពីក្រោយវា ប្រកបដោយមានសុវត្ថិភាព ផងដែរ។ ដោយឡែក ការលើកឡើងទាំងអស់នេះ គេមិនដឹង ថា វាមានប្រសិទ្ធភាព នៅក្នុងការកម្ទេចរថក្រោះដ៏ទំនើបរបស់អាមេរិក ដល់កម្រិតណានោះដែរ។ រថក្រោះស៊េរីនេះ ធ្លាប់ចូលប្រឡូក នៅក្នុងសមរភូមិធំៗជាច្រើន រួមមាន អាហ្វហ្កានីស្ថាន និង អ៊ីរ៉ាក់…ជាដើម។ ដោយឡែក ទាហានថ្មើរជើងរបស់រុស្ស៊ី មិនបានបំពាក់រថក្រោះប្រយុទ្ធដ៏ទំនើបធុនធ្ងន់បែបឡើយ ទើបធ្វើឲ្យខាតបង់រថក្រោះយ៉ាងច្រើន នៅក្នុងការប្រយុទ្ធជាមួយនឹងកងទ័ពអ៊ុយក្រែន៕

សហរដ្ឋអាមេរិក ៖ ការិយាល័យសុវត្ថិភាព និងសុខភាពការងារ The Occupational Safety and Health Administration (OSHA) ស្ថិតក្រោមក្រសួងការងាររបស់អាមេរិក បញ្ជាក់ថា Amazon មិនបានគិតពីសុវត្ថិភាព និងសុខភាពបុគ្គលិកផ្នែកឃ្លាំងទំនិញរបស់ខ្លួនទេ ។

ការិយាល័យសុវត្ថិភាព និងសុខភាពការងារបានបញ្ជាក់នៅក្នុងលិខិតដែលផ្ញើទៅកាន់ Amazon ថា បុគ្គលិកដែលបំពេញតួនាទីលើកដាក់ទំនិញក្នុងឃ្លាំងប្រចាំទីក្រុងឌេលថូណា រដ្ឋផ្លរីដា, ទីក្រុងវ៉ាគីហ្គិន រដ្ឋអ៊ីលីណយ និងទីក្រុងនីវវិនឌ័រ រដ្ឋញូវយ៉ក មានគ្រោះថ្នាក់ដោយសារឈឺចាប់ពេលការបំពេញការងារ ជាពិសេស បរិវេណខ្នង និងជំងឺផ្សេងទៀតដែលពាក់ព័ន្ធនឹងឆ្អឹងខ្នង ដោយសារតែការងារតម្រូវឱ្យពួកគេធ្វើឱ្យបានរហ័ស ជាជាងគិតពីសុវត្ថិភាព ។ មូលហេតុដែលបណ្តាលឱ្យបុគ្គលិកឈឺចុកចាប់នេះ គឺដោយសារការលើកដាក់ទំនិញធ្ងន់ និងរយៈពេលបំពេញការងារ ។

លោក Doug Park មន្ត្រីការិយាល័យសុវត្ថិភាព និងសុខភាពការងារ ចង្អុលបង្ហាញថា បើទោះជា Amazon តម្រូវឱ្យការបញ្ជូនទំនិញទៅកាន់អតិថិជនបានឆាប់រហ័ស និងមានប្រសិទ្ធភាពក្តី ប៉ុន្តែ Amazon បែរជាមិនចាប់អារម្មណ៍ពីសុវត្ថិភាព និងសុខភាពរបស់បុគ្គលិក ។ ការិយាល័យសុវត្ថិភាពបញ្ជាក់ថា បានស្នើឱ្យមានការផាកពិន័យ Amazon ក្នុងទឹកប្រាក់ជាង៦ម៉ឺនដុល្លារអាមេរិកសម្រាប់ការមិនគោរពសិទ្ធបុគ្គលិក ។

ចំណែកក្រុមហ៊ុន Amazon បានសម្តែងការមិនយល់ស្របនឹងការចោទប្រកាន់ខាងលើ ហើយនិយាយថា ក្រុមហ៊ុនព្រមរួមសហការ ប៉ុន្តែការចោទប្រកាន់នេះមិនមែនជាការពិតទេ ពាក់ព័ន្ធនឹងសុវត្ថិភាពបុគ្គលិកធ្វើការក្នុងឃ្លាំងទំនិញ ។ Amazon និយាយថា ក្រុមហ៊ុនបានកាត់បន្ថយអត្រារងរបួសរបស់បុគ្គលិកជិត១៥%ហើយ ក្នុងចន្លោះពីឆ្នាំ២០១៩ ដល់ឆ្នាំ២០២១ ។ លើសពីនេះ ក្រុមហ៊ុនបានប្រើវិធីសាស្ត្រកាត់បន្ថយហានិភ័យនានាផងដែរ និងដាស់តឿនឱ្យបុគ្គលិកឈប់សម្រាក និងផ្លាស់ប្តូរគ្នាធ្វើការ ។

ទោះយ៉ាងណា ពេលមុននេះ បុគ្គលិករបស់ Amazon ធ្លាប់បានផ្តល់បទសម្ភាសន៍ថា ក្រុមហ៊ុនប្រើឱ្យពួកគេធ្វើការធ្ងន់ ហើយតាមដានការងារគ្រប់ពេលផងដែរ ៕

ប្រភព ៖ beartai BRIEF

រដ្ឋធានីជេរូសាឡឹម៖ ស្របពេលស្ថានការណ៍ កាន់តែមានភាពតានតឹងខ្លាំងឡើង នៅតំបន់មជ្ឈិមបូព៌ានោះ កងទ័ពសហរដ្ឋអាមេរិក និង អ៊ីស្រាអែល បានបញ្ចេញយន្ដហោះប្រយុទ្ធ យន្ដហោះទម្លាក់គ្រាប់បែកនុយក្លេអ៊ែរ យន្ដហោះគ្មានមនុស្សបើកឬដ្រូន និង នាវាមុជទឹកដ៏ធំសម្បើម បង្ហាញសាច់ដុំដ៏ខ្លាំងក្លា មានគោលដៅគំរាមកំហែង ទៅលើប្រទេសអ៊ីរ៉ង់ និង គូប្រជែងរបស់ខ្លួន។

សារព័ត៌មាន The Eurasia Times បានផ្សាយ ថា ក្រសួងការពារជាតិអ៊ីស្រាអែល និង បញ្ជាការកណ្ដាលរបស់សហរដ្ឋអាមេរិក ហៅកាត់ CENTCOM បានចាប់ផ្ដើមធ្វើសមយុទ្ធយោធារួមគ្នាដ៏ធំមួយ អស់រយៈពេលជាច្រើនថ្ងៃកន្លងមកនេះ នៅលើដែនអាកាសរបស់ប្រទេសអ៊ីស្រាអែល និង នៅភាគខាងកើត សមុទ្រមេឌីទែររ៉ាណេ (Mediterranea)។ សមយុទ្ធយោធានេះ នឹងត្រូវបញ្ចប់ នៅថ្ងៃទី២៧ ខែមករា ដោយមានការចូលរួម ពីយន្ដហោះចម្បាំង ចំនួន១៤០គ្រឿង នាវាចម្បាំងចំនួន១២គ្រឿង និង ប្រព័ន្ធកាំភ្លើងធំរាប់សិបគ្រឿងរបស់កងទ័ព នៃប្រទេសទាំង២។

ទីបញ្ជាការកណ្ដាលរបស់កងទ័ពសហរដ្ឋអាមេរិក បានបញ្ជាក់ នៅក្នុងសេចក្ដីថ្លែងការណ៍មួយ ថា នៅក្នុងចំណោមយន្ដហោះទាំង១៤០គ្រឿងនោះ ដែលយន្ដហោះ ចំនួន១០០គ្រឿង រាប់បញ្ចូលទាំង យន្ដហោះទម្លាក់គ្រាប់បែកយុទ្ធសាស្រ្ដហោះចម្ងាយឆ្ងាយ ប្រភេទ B-52 ចំនួន៤គ្រឿង យន្ដហោះបំបាំងកាយដ៏ទំនើប ប្រភេទ F-35 ចំនួន៤គ្រឿង យន្ដហោះប្រដេញ ប្រភេទ F/A-18 ចំនួន៤៥គ្រឿង និង យន្ដហោះគ្មានមនុស្សបើក ឬ ដ្រូនដ៏ទំនើបហោះហើរចម្ងាយឆ្ងាយ ប្រភេទ MQ-9 Reaper ចំនួន២គ្រឿង ដែលមកពីកងទ័ពរបស់សហរដ្ឋអាមេរិក។ ក្រៅពីនេះ ក៏មានយន្ដហោះប្រយុទ្ធ ឬ ប្រដេញ ប្រភេទ F-15, F-16 យន្ដហោះដឹកជញ្ជូនយោធា ប្រភេទ AC-130 ឧទ្ធម្ភាគចក្រ ប្រភេទ Apache (អាប៉ាជេ) យន្ដហោះសង្គ្រោះ និង យន្ដហោះចាក់ប្រេងឥន្ធនៈ ចូលរួមផងដែរ។

បើតាមមន្រ្ដីជាន់ខ្ពស់មួយរូបរបស់ក្រសួងការពារជាតិសហរដ្ឋអាមេរិក បានអះអាង ថា ការធ្វើសមយុទ្ធយោធាដ៏ធំសម្បើមមួយនេះ មានន័យ ចង់ផ្ញើសារដ៏សំខាន់មួយ ទៅកាន់ប្រទេសអ៊ីរ៉ង់ និង ដៃគូប្រជែងផ្សេងៗទៀត ថា ក្រុងវ៉ាស៊ីនតោន មិនបានរវល់ខ្វាយច្រើនខ្លាំងពេក ជាមួយនឹងការលុកលុយរបស់រុស្ស៊ី ទៅលើប្រទេសអ៊ុយក្រែន ក៏ដូចជា ការគំរាមកំហែងរបស់ចិន នៅក្នុងការប្រមូលផ្តុំកម្លាំងយោធា ដែលមានទំហំប៉ុនណានោះឡើយ។

ទីបញ្ជាការកណ្ដាលរបស់កងទ័ពសហរដ្ឋអាមេរិក បានសង្កត់ធ្ងន់ ថា ការធ្វើសមយុទ្ធយោធាដ៏ធំមួយនេះ មានគោលបំណងបង្កើននូវការត្រៀមខ្លួនរួចជាស្រេច សម្រាប់កងទ័ពសហរដ្ឋអាមេរិក និង អ៊ីស្រាអែល ទាំងមូល ហើយក៏ជាបង្ហាញនូវសមត្ថភាពរបស់ពួកគេ ដើម្បីធ្វើកិច្ចសហប្រតិបត្ដិការ និង បង្កើនស្ថិរភាព នៅក្នុងតំបន់។

លោកឧត្ដមសេនីយ៍ មីឆែល គូរីលឡា (Michael Kurilla) មេបញ្ជាការ CENTCOM បានកត់សម្គាល់ ថា សមយុទ្ធនេះ ពង្រឹងសមត្ថភាពរបស់កងទ័ព នៃប្រទេសទាំងពីរ នៅក្នុងការឆ្លើយតបទៅនឹងភាពអាសន្ន និង បង្ហាញ អំពីការប្តេជ្ញាចិត្តរបស់ពួកគេ សម្រាប់តំបន់មជ្ឈិមបូព៌ា។ កងទ័ពទាំងនេះ នឹងអនុវត្តនូវបទបញ្ជា និង ការគ្រប់គ្រងរួមគ្នា ទាំងប្រតិបត្តិការតាមផ្លូវអាកាស នៅក្នុងសង្គ្រាមលើផ្ទៃសមុទ្រ ការស្វែងរក និងការជួយសង្គ្រោះ នៅក្នុងការប្រយុទ្ធ ការវាយប្រហារតាមប្រព័ន្ធអេឡិកត្រូនិក ការបង្ក្រាបទៅលើកិច្ចការពារដែនអាកាសរបស់សត្រូវ ការសម្របសម្រួល និង ការឈ្លបយកការណ៍ ក៏ដូចជា ការរារាំងតាមផ្លូវអាកាស ផងដែរ៕