បរទេស៖ ជនជាតិស្វីសវ័យក្មេងពីរនាក់ បានបង្ហាញនូវភាពភ្ញាក់ផ្អើល ដោយបានជីកកកាយយកនូវគំរូរថយន្ត តូចពីសម័យបុរាណកាលពីទសវត្សរ៍ ឆ្នាំ ១៩៥០ មកកែប្រែវាឡើងវិញ ក្លាយជារថភ្លើងអគ្គិសនីខ្នាតតូច ថ្មីសម្រាប់ផលិតចូលទៅក្នុងនិន្នាការនៃទីផ្សាររថយន្តពិភពលោក។

កាលពីពេលថ្មីៗកន្លងទៅនេះមានបងប្អូនជនជាតិស្វីសដែលមានឈ្មោះថា Oliver និង Merlin Uboter ដោយអ្នកទាំងពីរបានបង្ហាញនូវភាពអស្ចារ្យ ក្រោយពីបានបង្កើតគម្រោងរថយន្តអគ្គិសនីខ្នាតតូច ផលិតក្រោមឈ្មោះក្រុមហ៊ុន Microlino AG ។

ពួកគេបានមានគំនិតកែសម្រួលរថយន្តពីម៉ូដែលរថយន្តខ្នាតតូចបុរាណកាលពីទសវត្សរ៍ឆ្នាំ១៩៥០ ដោយដាក់ម៉ាស៊ីនឡានអគ្គិសនីចូលក្នុងនោះ។

ក្នុងនោះគំរូដើមនៃរថយន្តពីបុរាណ Microcar ដែលមានមូលដ្ឋានលើវាគឺ BMW Isetta ដែលមានរហស្សនាមថា “Bubble car” ដែលជាយានជំនិះមានរាងពងក្រពើ មានកង់ត្រឹមតែបី ប៉ុន្តែនៅពេលដែលបងប្អូន Uboter សម្របវាពួកគេបានបន្ថែមកង់មួយទៀតវាបានក្លាយជាយានជំនិះតូចមានកង់បួនដែល មានឈ្មោះថា Microlino 2.0។

ជាមួយគ្នានោះរថយន្តខ្នាតតូច Microlino 2.0 ​នេះនឹងប្រើម៉ូទ័រអេឡិចត្រិច ១២.៥ kW ជំនួសឱ្យម៉ាស៊ីនសាំងចាស់ ដែលមានចម្ងាយរត់អតិបរមា ២៣០ គីឡូម៉ែត្រ និងល្បឿនអតិបរមា ៩០ គីឡូម៉ែត្រក្នុងមួយម៉ោង។

បន្ថែមពីនោះវាក៏ជាយានជំនិះដែលមានទម្ងន់ស្រាលបំផុតត្រឹមតែ ៤៦៩ គីឡូក្រាម និងមានប្រវែង ២.៥ ម៉ែត្រ អាចផ្ទុកមនុស្សមាន២នាក់  ហើយវាអាចជួយកាត់បន្ថយផលប៉ះពាល់បរិស្ថាននៃដំណើរការផលិត និងធ្វើឱ្យងាយស្រួលក្នុង ធ្វើដំណើរ និងការចតរថយន្ត នៅពេលដែលកន្លែងចតរថយន្តមានកំណត់។

បើតាមការឱ្យដឹងពីប្រធានផ្នែកទីផ្សារនៃក្រុមហ៊ុន Microlino AG បន្ថែមថា ដោយសារតែរថយន្ត Microlino 2.0 ជារថយន្តតូចជាងរថយន្តធម្មតា ដោយវាប្រើសម្ភារៈតិចក្នុងការផលិត ហើយថ្មរបស់វាតូចជាង ដែលមានន័យថាវាស៊ីភ្លើងតិច ដូច្នេះវាមានដានអេកូឡូស៊ី (បរិមាណនៃផលប៉ះពាល់បរិស្ថានដែលបណ្តាលមកពីសកម្មភាព) គឺត្រឹមតែ ១ភាគ៣ នៃការប្រើប្រាស់រថយន្តធម្មតាទៅទៀត។

យ៉ាងណាមិញរថយន្តប្រភេទថ្មី Microlino 2.0 ឥឡូវនេះបានទទួលការកក់ច្រើនជាង ៣៥,០០០ ហើយរថយន្តនេះនឹងត្រូវបានសាងសង់នៅក្នុងប្រទេសអ៊ីតាលី ប៉ុន្តែទីស្នាក់ការកណ្តាលនៅតែស្ថិតនៅក្នុង Kusnacht  ប្រទេសស្វីស ហើយសម្រាប់តម្លៃលក់អតិបរមា ១៥,០០០ ហ្វ្រង់ស្វីស ឬប្រហែល ១៥,១១៩ដុល្លារ៕ ប្រភព៖ Dailynews

រដ្ឋធានីកៀវ៖ ប្រធានាធិបតីអ៊ុយក្រែន បានធ្វើដំណើរទៅលើកទឹកចិត្ត ដល់កងទ័ពការពារទឹកដីរបស់ក្រុងកៀវ កំពុងតែប្រឈមមុខនឹងការវាយប្រហារពីកម្លាំងទាហានរុស្ស៊ី នៅទីក្រុងបាឃ្មូត (Bakhmut) នាភាគខាងកើត ប្រទេស ដែលជាសមរភូមិក្ដៅបំផុត វាយប្រយុទ្ធគ្នាយ៉ាងខ្លាំង ហើយសកម្មភាពបែបនេះ បានបង្ហាញ អំពីភាពខុសគ្នាដាច់ស្រឡះ ជាមួយនឹងប្រធានាធិបតី លោក វ៉្លាឌីមៀ ពូទីន (Vladimir Putin) បានត្រឹមតែបញ្ជា ចេញពីវិមានក្រឹមឡាំង ដែលហ៊ុមព័ទ្ធទៅដោយខែលការពារ។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃពុធ ទី២១ ខែធ្នូ ថា លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានធ្វើដំណើរ ទៅកាន់ទីក្រុង Bakhmut ដែលជាសមរភូមិក្ដៅបំផុត វាយប្រយុទ្ធគ្នា រវាងកងទ័ពការពារទឹកដីអ៊ុយក្រែន និង កម្លាំងទាហានរុស្ស៊ី អស់រយៈពេលជាច្រើនខែកន្លងមកនេះ។

ការិយាល័យរបស់ប្រធានាធិបតីអ៊ុយក្រែន បានប្រកាស កាលពីថ្ងៃអង្គារ ថា នៅក្នុងការដំណើរទៅលើកទឹកចិត្តកងទ័ពរបស់ប្រធានាធិបតី ដោយមិនបានប្រកាសឲ្យដឹងជាមុននោះ លោក ហ្សេឡែនស្គី បានជួបនិយាយគ្នាជាមួយនឹងកម្លាំងការពារទឹកដីរបស់អ៊ុយក្រែន នៅលើសមរភូមិជួរមុខ នៃទីក្រុងនេះ ហើយគាត់ថែមទាំង បានប្រគល់រង្វាន់លើកទឹកចិត្ត ដល់កងទ័ពអ៊ុយក្រែន ថែមទៀតផង។

ទោះជាយ៉ាងណា នៅក្នុងសង្គ្រាម អស់រយៈពេល៣០១ថ្ងៃ (គិតត្រឹម ថ្ងៃទី២១ ខែធ្នូ ឆ្នាំ២០២២)នេះ ទីក្រុង Bakhmut នៅតែស្ថិតក្រោមការគ្រប់គ្រងរបស់អ៊ុយក្រែន ដដែល។ ប៉ុន្ដែភាពអង់អាចក្លាហានរបស់កងទ័ពការពារទឹកដីក្រុងកៀវ ប្រយុទ្ធ នៅក្នុងសមរភូមិនេះ បានរារាំងដល់មហិច្ឆតារបស់ក្រុងម៉ូស្គូ នៅក្នុងការដណ្តើមកាន់កាប់តំបន់ដូណែតស្ក៍ (Donetsk) និង ដុនបាស (Donbas) ទាំងមូល។ តំបន់បះបោររបស់ឧទ្ទាម នៅក្នុងប្រទេសអ៊ុយក្រែន នេះ បានផ្ទុះឡើង ដោយមានការគាំទ្រ ពីប្រទេសរុស្ស៊ី តាំងពីឆ្នាំ២០១៤ ស្របគ្នានឹងក្រុងមូស្គូ បានរឹបអូសយកឧបទ្វីបគ្រីមៀ ពីប្រទេសអ៊ុយក្រែន។

លោក Zelenskyy បានថ្លែង កាលពីដើមខែនេះ ថា «កិច្ចខិតខំប្រឹងប្រែងរបស់រុស្ស៊ី នៅក្នុងការដណ្តើមយកទីក្រុងនេះ ដែលមុខសង្គ្រាម មានប្រជាជន ចន្លោះពី៧ម៉ឹនទៅ៨ម៉ឹននាក់។ ប៉ុន្ដែឥឡូវនេះ ដោយសារតែការវាយប្រយុទ្ធគ្នាយ៉ាងខ្លាំង ធ្វើឲ្យប្រជាជន ថយចុះ មកនៅត្រឹមតែមិនដល់១ម៉ឺនាក់ផង ខណៈហេដ្ឋារចនាសម្ព័ន្ធ ត្រូវបានបំផ្លិចបំផ្លាញអស់។ វាជាការពិតណាស់ ទាហានឈ្លានពាន បានបង្កវិនាសកម្មយ៉ាងធ្ងន់ធ្ងរ នៅក្នុងទីក្រុង Bakhmut, ទីក្រុង Donbas និង ទីក្រុងផ្សេងៗទៀត នៅក្នុងប្រទេសអ៊ុយក្រែន»។

ការដណ្ដើមកាន់កាប់ទីក្រុង Bakhmut នឹងធ្វើឱ្យខូចខាត ដល់ខ្សែសង្វាក់ផ្គត់ផ្គង់របស់អ៊ុយក្រែន ហើយវានឹងបើកផ្លូវ សម្រាប់កម្លាំងទាហានរុស្ស៊ី ធ្វើដំណើរឆ្ពោះទៅកាន់ទីក្រុងក្រាម៉ាតូស (Kramatorsk) និង ស្លូវៀនស្ក៍ (Sloviansk) ដែលជាតំបន់គ្រប់គ្រងដ៏រឹងមាំរបស់កងទ័ពការពារទឹកដីអ៊ុយក្រែន នៅក្នុងតំបន់។

ដោយឡែក លោក វ៉្លាឌីមៀ ពូទីន ប្រធានាធិបតីរុស្ស៊ី វិញ កាលពីប៉ុន្មានថ្ងៃមុន បានបញ្ជាក្រុមទាហានផ្នែកតន្រ្ដី ឲ្យទៅប្រគំ លើកទឹកចិត្តកម្លាំងទាហានរុស្ស៊ី ដែលកំពុងតែធ្វើសង្គ្រាម នៅក្នុងប្រទេសអ៊ុយក្រែន ខណៈគាត់ទំនងខ្លាច ឬ មិនហ៊ានទៅសួរសុខទុក្ខ ដោយផ្ទាល់ ដើម្បីលើកទឹកចិត្តកងទ័ព នៅក្នុងសមរភូមិប្រយុទ្ធ នៃសង្គ្រាមរបស់គាត់៕

បរទេស៖ សហរដ្ឋអាមេរិក និង ចក្រភពអង់គ្លេសរិះគន់រដ្ឋាភិបាលតាលីបង់ចំពោះការហាមប្រាមស្ត្រីមិនឱ្យចូលរៀននៅសាកលវិទ្យាល័យបន្ត ដោយសារអះអាងថា ចង់រក្សាដើម្បីផលប្រយោជន៍ជាតិ និងគោរពសេចក្តីថ្លៃថ្នូររបស់ស្ត្រី។

កាលពីពេលថ្មីៗកន្លងទៅនេះ ក្រសួងអប់រំជាន់ខ្ពស់ក្នុងរដ្ឋាភិបាលតាលីបង់អាហ្វហ្គានីស្ថាន បានបញ្ជាក់យ៉ាងច្បាស់ថាស្ត្រីទាំងអស់នៅក្នុងប្រទេសនឹងមិនត្រូវបានអនុញ្ញាតឱ្យសិក្សានៅសាកលវិទ្យាល័យរបស់ប្រទេសនោះទេ។ ក្នុងនោះសាកលវិទ្យាល័យរដ្ឋ និងឯកជនទាំងអស់នឹងត្រូវតែបញ្ឈប់ការបង្រៀនទៅកាន់ស្ត្រីជាបន្ទាន់ បន្ទាប់ពីកិច្ចប្រជុំរបស់ក្រុមប្រឹក្សាតាលីបង់បានធ្វើការសម្រេចចិត្ត ក្រោមហេតុផល ចង់រក្សាដើម្បីផលប្រយោជន៍ជាតិ និងគោរពសេចក្តីថ្លៃថ្នូររបស់ស្ត្រីក្នុងអាហ្វហ្គានីស្ថាន។

លិខិតនេះត្រូវបានបញ្ជាក់ដោយហត្ថលេខារបស់រដ្ឋមន្ត្រីឧត្តមសិក្សា នីដា ម៉ូហាម៉ែត ណាឌីម(Neda Mohammad Nadeem) កាលពីថ្ងៃអង្គារកន្លងទៅ​ ស្របពេលដែលការសម្រេចចិត្តរបស់រដ្ឋាភិបាលតាលីមួយនេះបង់កើតឡើងចំពេលដែល សាកលវិទ្យាល័យជាច្រើនក្នុងប្រទេសកំពុងរៀបចំការប្រឡងចុងក្រោយ។

ទោះជាយ៉ាងណាអ្នកនាំពាក្យអង្គការសហប្រជាជាតិ លោក ស្ទេហ្វាន់ ឌូចារិក(Stefan Dujarric) បានប្រាប់ថានេះជាបញ្ហាដ៏ធំ ដោយរដ្ឋាភិបាលតាលីបង់កំពុងតែបំពានកិច្ចសន្យាដែលបានព្រមព្រៀងគ្នាជាមួយអង្គការសហប្រជាជាតិ ចាប់តាំងពីរដ្ឋាភិបាលតាលីបង់ឡើងកាន់អំណាចថាមិនបំពាន់សិទ្ធស្ត្រី  ប៉ុន្តែមកទល់ពេលនេះមិនត្រឹមតែក្នុងវិស័យអប់រំប៉ុណ្ណោះទេ សូម្បីការចូលទៅកាន់ទីធ្លាសាធារណៈក៏ត្រូវបានរឹតត្បិតផងដែរ។

ដូច្នេះវាពិតជាពិបាកក្នុងការស្រមៃមើលថាប្រទេសកំពុងអភិវឌ្ឍន៍អាចរីកចម្រើនទៅបានទេ បើសិនជាមានការលុបបំបាត់ គ្មានការសហការពីស្ត្រីដែលមិនបានទទួលការអប់រំបន្ថែមបែបនេះ។

យ៉ាងណាមិញការសម្រេចចិត្តបិទសាកលវិទ្យាល័យរបស់ស្ត្រីនៅអាហ្វហ្គា​នីស្ថានមួយនេះ បានធ្វើឱ្យក្រុមប្រឹក្សាសន្តិសុខអង្គការសហប្រជាជាតិបានជួបប្រជុំគ្នានៅទីក្រុងញូវយ៉ក ហើយឯកអគ្គរដ្ឋទូតសហរដ្ឋអាមេរិក និងចក្រភពអង់គ្លេសប្រចាំអង្គការសហប្រជាជាតិ បានរួមគ្នាធ្វើការថ្កោលទោសចំពោះសកម្មភាពរបស់រដ្ឋាភិបាលតាលីបង់យ៉ាងខ្លាំង។

បន្ថែមពីលើនោះអង្គការសហប្រជាជាតិបានសង្កត់ធ្ងន់ថា រដ្ឋាភិបាលតាលីបង់នឹងមិនអាចរំពឹងថាទទួលបានឋានៈ ជាសមាជិកជាមួយនឹងកិច្ចសហប្រតិបត្តិការណាមួយឡើយជាមួយអន្តរជាតិ ដរាបណារដ្ឋាភិបាលនៅតែបំពានសិទ្ធិរបស់ប្រជាជនអាហ្វហ្គានីស្ថាន ជាពិសេសសិទ្ធិមនុស្ស និងសេរីភាពជាមូលដ្ឋានរបស់ស្ត្រី និងកុមារីបន្ត៕ ប្រភព៖ pptvhd36

អន្តរជាតិ៖ កំពូលមហាសេដ្ឋីអាមេរិក លោក Elon Musk នៅថ្ងៃអង្គារសប្ដាហ៍នេះបាននិយាយថាលោកនឹងលាលែងពីតំណែងជានាយកប្រតិបត្តិ CEO នៃក្រុមហ៊ុន Twitter នៅក្រោយពេលដែលរកបានអ្នកជំនួសរូបលោក។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃពុធ ទី២១ ខែធ្នូ ឆ្នាំ២០២២។

ការប្រកាសខាងលើលោក Elon Musk ធ្វើឡើងនៅក្នុងសារបង្ហោះលើ Twitter និងក្រោយការស្ទង់មតិមួយបង្ហាញថាមិតភាគច្រើនចង់ឱ្យលោកលាលែង ពីតំណែង។ កំពូលមហាសេដ្ឋីអាមេរិក បានគូសបញ្ជាក់យ៉ាងខ្លីដូច្នេះថា «ខ្ញុំនឹងលាលែងពីតំណែងជា CEO ឆាប់ៗនេះ ខណៈខ្ញុំកំពុងស្វែងរកមនុស្ស កាន់តំណែងបន្ត ហើយបន្ទាប់ពីនោះ ខ្ញុំនឹងដឹកនាំក្រុមការងារ software និង servers»។

គួរបញ្ជាក់ថា តាមរយៈការស្ទង់មតិរបស់កំពូលមហាសេដ្ឋីលោក Elon Musk នៅលើ Twitter កាលពីល្ងាចថ្ងៃសៅរិ៍សប្ដា៍មុន មានប្រតិកម្មប្រឆាំងនឹង ការកាន់កាប់តំណែងនៅ Twitter របស់លោកយ៉ាងច្រើន ដោយក្នុងនោះមានមតិអ្នកប្រើប្រាស់ប្រមាណ ៥៧.៥ភាគរយបានបោះឆ្នោតឱ្យ Musk ចុះចេញពីតំណែងជានាយកប្រតិបត្តិ៕

អន្តរជាតិ៖ អ្នកនាំពាក្យរដ្ឋាភិបាលថៃបានឱ្យដឹងថា ខុទ្ទកាល័យគណៈរដ្ឋមន្ត្រីថៃកាលពីថ្ងៃអង្គារបានអនុម័តវិធានការពន្ធដើម្បីជួយជំរុញការប្រើប្រាស់សាធារណៈដែលចាប់ផ្តើមក្នុងខែមករាឆ្នាំក្រោយ ដើម្បីគាំទ្រសេដ្ឋកិច្ចនៅពេលដែលចាប់ផ្តើមស្ទុះងើបឡើងវិញ។

ទីភ្នាក់ងារព័ត៌មានរ៉យទ័របានរាយការណ៍ដោយស្រង់សម្ដីរបស់លោកស្រី Traisuree Traisoranakul អ្នកនាំពាក្យរងរដ្ឋាភិបាលថៃថា រដ្ឋាភិបាលថៃនឹងផ្តល់ការកាត់បន្ថយពន្ធចំនួន ៤ម៉ឺនបាត (១ ១៤៩ដុល្លារអាមេរិក) សម្រាប់អ្នកទិញទំនិញចំពោះការទិញទំនិញចាប់ពីថ្ងៃទី១ ខែមករាទៅ។

ការបន្ធូរបន្ថយពន្ធនេះធ្វើឡើងបន្ទាប់ពីមានវិធានការជំរុញសេដ្ឋកិច្ចនានាដែលបានដាក់ចេញនាពេលកន្លងមកក្នុងគោលបំណងគាំទ្រដល់សេដ្ឋកិច្ចធំទីពីររបស់អាស៊ីអាគ្នេយ៍មួយនេះ ដែលមានកំណើនយឺតយ៉ាវជាងប្រទេសផ្សេងទៀតនៅក្នុងតំបន់ ដោយវិស័យទេសចរណ៍ដ៏សំខាន់របស់ប្រទេសនេះទើបតែចាប់ផ្តើមងើបឡើងវិញនៅឆ្នាំនេះ។

កំណើនសេដ្ឋកិច្ចថៃកាលពីឆ្នាំមុន មានអត្រា ១,៥ភាគរយ ដែលស្ថិតក្នុងចំណោមអត្រាទាបបំផុតនៅក្នុងតំបន់។

ធនាគារកណ្តាលថៃបានឱ្យដឹងកាលពីថ្ងៃចន្ទថា សេដ្ឋកិច្ចត្រូវបានរំពឹងថានឹងងើបឡើងវិញពេញលេញនៅក្នុងឆមាសទីពីរ ឆ្នាំ២០២៣។ ធនាគារនេះបានព្យាករថា សេដ្ឋកិច្ចថៃនឹងកើនឡើង ៣,២ភាគរយនៅឆ្នាំនេះ ៣,៧ភាគរយនៅឆ្នាំ២០២៣ និង ៣,៩ភាគរយនៅឆ្នាំ២០២៤។ នេះបើយោងតាមទីភ្នាក់ងារព័ត៌មានរ៉យទ័រ៕