ប្រទេសថៃ ៖ ស្ថានការណ៍ទឹកជំនន់នៅស្រុកហាតយៃ ខេត្តសុងក្លារបស់ថៃពុំទាន់ធូរស្រាលទេ ដោយសារកម្ពស់ទឹកកើនឡើងខ្លាំងមិនឈប់ឈរធ្វើឱ្យពលរដ្ឋថៃជាប់លើដំបូលផ្ទះជាច្រើនថ្ងៃ គ្មានអាហារ គ្មានទឹកផឹក ខណៈខ្លះទៀតជាប់ក្នុងអគារចេញមិនរួច បានត្រឹមតែរង់ចាំការជួយសង្គ្រោះ ។ ទឹកជំនន់បានវាយប្រ.ហារខេត្តសុងក្លាភ្លាមៗបន្ទាប់ពីភ្លៀងធ្លាក់ខ្លាំងជាច្រើនថ្ងៃ ជាពិសេស ស្រុកហាតយៃលិចធ្ងន់ធ្ងរ ទឹកហក់ឡើងដល់ដំបូលអគារ រីឯតំបន់ខ្លះលិចដល់អគារជាន់ទី២ ។ នៅថ្ងៃទី២៥ ខែវិច្ឆិកា មានហេតុការណ៍ភ្លើងឆេះអគារពាណិជ្ជកម្មជាន់លើមួយកន្លែងនៅស្រុកហាតយៃ ខណៈជាន់ក្រោមកំពុងលិចទឹកជំនន់ ។

នាវេលាម៉ោង៩និង៤៥នាទីព្រឹក ថ្ងៃទី២៥ ខែវិច្ឆិកា ឆ្នាំ២០២៥ ហ្វេសប៊ុកផេកឈ្មោះ «Fire & Rescue Thailand» បានបង្ហោះរូបភាពភ្លើងឆេះអគារពាណិជ្ជកម្មជាន់លើមួយកន្លែងនៅស្រុកហាតយៃ ខេត្តសុងក្លា ខណៈជាន់ក្រោមកំពុងលិចទឹកជំនន់ និងអំពាវនាវសុំការជួយសង្គ្រោះជាបន្ទាន់ ដែលអគារនេះស្ថិតនៅម្តុំផ្លូវបំបែកជា៤ ។ ជំហ៊ានដំបូង ភ្នាក់ងារពន្លត់ភ្លើងជាច្រើនក្រុមបានជួយពន្លត់ភ្លើង និងជម្លៀសពលរដ្ឋដែលជាប់ក្នុងអគារក្បែរនោះ ។

តាមការចុះផ្សាយរបស់សារព័ត៌មាន Khaosod នៅថ្ងៃទី២៥ ខែវិច្ឆិកា អគារពាណិជ្ជកម្មដែលត្រូវភ្លើងឆេះជាន់លើ និងជាន់ក្រោមកំពុងលិចទឹក គឺស្ថិតនៅទីរួមស្រុកហាតយៃ ដែលជាទីប្រជុំជន និងតំបន់សេដ្ឋកិច្ចដ៏សំខាន់នៅខេត្តសុងក្លា ។ ហេតុការណ៍នេះធ្វើឱ្យអាជ្ញាធរ និងពលរដ្ឋក្បែរនោះភ័យស្លន់ស្លោយ៉ាងខ្លាំង ដោយស្រែកឱ្យភ្នាក់ងារពាក់ព័ន្ធមកជួយសង្គ្រោះជាបន្ទាន់ កុំឱ្យភ្លើងឆេះរាលដាលខ្លាំងជាងនេះ ។

ជាន់ក្រោមនៃអគារពាណិជ្ជកម្មបានលិចទឹកជំនន់ជាច្រើនថ្ងៃហើយ ស្រាប់តែនៅព្រឹកថ្ងៃទី២៥ ខែវិច្ឆិកា ក៏មានភ្លើងឆេះជាន់លើបន្ថែមទៀត ។ ភ្លើងឆេះអគារយ៉ាងឆាប់រហ័សធ្វើឱ្យភ្នាក់ងារពន្លត់ភ្លើងពិបាកជួយអន្តរាគមន៍ ស្របពេលកម្ពស់ទឹកហក់ឡើងខ្លាំង ដែលត្រូវបង្កើនការប្រុងប្រយ័ត្នខ្ពស់បំផុត ។ ទោះយ៉ាងណា ភ្នាក់ងារពន្លត់ភ្លើងបានព្យាយាមពន្លត់ភ្លើងយ៉ាងលំបាកដើម្បីគ្រប់គ្រងស្ថានការណ៍ភ្លាមៗ ។

គួរបញ្ជាក់ថា ខេត្តភាគខាងត្បូងជាច្រើនរបស់ថៃបានលិចលង់យ៉ាងខ្លាំងរហូតដល់ដំបូលអគារ ដែលពុំធ្លាប់កើតឡើងក្នុងប្រវត្តិសាស្ត្រ ដូចជា ៖ ខេត្តសុងក្លា ប៉ាត់តានី សាទូន និងយ៉ាឡា ដោយសារបម្រែបម្រួលអាកាសធាតុបណ្តាលឱ្យភ្លៀងធ្លាក់ជាច្រើនថ្ងៃ និងនៅតែបន្តធ្លាក់ រហូតដល់ឈានទៅប្រកាសអាសន្នកាលពីថ្ងៃទី២៤ ខែវិច្ឆិកា ឱ្យពលរដ្ឋក្នុងខេត្តទាំងនេះជម្លៀសចេញជាបន្ទាន់ ពីព្រោះកម្ពស់ទឹកនឹងកើនឡើងខ្លាំងជាងមុនទ្វេដង ។

គ្រោះធម្មជាតិដ៏ធ្ងន់ធ្ងរនេះធ្វើឱ្យរដ្ឋាភិបាលថៃឈឺក្បាលយ៉ាងខ្លាំង ខណៈមានបញ្ហាប្រឈមជាច្រើនដោះស្រាយមិនចេញ ។ នាយករដ្ឋមន្ត្រីថៃ លោក Anutin Charnvirakul បាននាំកម្លាំងមកពិនិត្យមើលទឹកជំនន់នៅខេត្តសុងក្លា និងចែកអំណោយឱ្យពលរដ្ឋរងគ្រោះ ប៉ុន្តែពលរដ្ឋខេត្តសុងក្លាសុំឱ្យនាយករដ្ឋមន្ត្រីប្រញាប់ជម្លៀសពួកគេចេញពីតំបន់គ្រោះថ្នាក់ មិនមែនគ្រាន់តែមកសួរសុខទុក្ខ និងថតរូបបង្ហោះទេ ។ ពួកគេបន្ទោសថា រដ្ឋាភិបាលទុកពលរដ្ឋចោលឱ្យប៉ាន់ស្មានស្ថានការណ៍ទឹកជំនន់ដោយខ្លួនឯង ពេលនេះ ពលរដ្ឋកំពុងប្រឈមនឹងកាលៈទេសៈស្លាប់រស់ ប៉ុន្តែបែរជារដ្ឋាភិបាលស្ងៀមស្ងាត់ និងពន្យារពេល ។

ស្ថានការណ៍ទឹកជំនន់ដែលបន្តកើនឡើងមិនឈប់ឈរ និងភាពយឺតយ៉ាវក្នុងការរកដំណោះស្រាយជួយសង្គ្រោះពលរដ្ឋ ក៏ដូចជាវិធានការរំដោះទឹក បានជំរុញឱ្យពលរដ្ឋថៃខកចិត្តនឹងរដ្ឋាភិបាលរបស់ខ្លួនគ្មានបានការ បានត្រឹមតែមកថតរូបសេលហ្វីបង្ហោះក្នុងបណ្តាញសង្គម និងផ្ដល់អំណោយបន្តិចបន្តួច រួចក៏ជិះឧទ្ធម្ភាគចក្រត្រឡប់ទៅទីក្រុងបាងកកវិញ ខណៈពលរដ្ឋទាំងអស់នៅតែរងទុក្ខវេទនាស្ទើរស្លាប់ ៕

ខេត្តសុងក្លា៖ ពលរដ្ឋម្នាក់នៅខេត្តសុងក្លាបានសរសេរលិខិតមួយផ្ញើទៅកាន់នាយករដ្ឋមន្ត្រី អនុទីន ដោយនិយាយថា ពួកគេត្រូវការជម្លៀសចេញជាបន្ទាន់ មិនមែនគ្រាន់តែមកសួរសុខទុក្ខ ហើយឆ្លៀតឱកាសថតរូបបង្ហោះនោះទេ។ ពលរដ្ឋរូបនេះសង្កត់ធ្ងន់ថា ការមកឲ្យតែបានឃើញមុខដូចនោះ មិនបានជួយមនុស្សដែលកំពុងរង់ចាំការជួយសង្គ្រោះនៅលើដំបូលផ្ទះរបស់ពួកគេឡើយ។

ពលរដ្ឋម្នាក់ដែលមានឈ្មោះថា Faozee Lateh ជាអ្នកស្រុក Chana ខេត្តសុងក្លា បានបង្ហោះសារមួយលើទំព័រហ្វេសប៊ុកផ្ញើទៅកាន់នាយករដ្ឋមន្ត្រី Anutin Charnvirakul និងប្រព័ន្ធផ្សព្វផ្សាយថៃថា៖ “បច្ចុប្បន្ននេះ ស្ថានភាពទឹកជំនន់នៅក្នុងខេត្តជាច្រើននៅភាគខាងត្បូងបានឈានដល់ចំណុចប្រកាសអាសន្នយឮ។ មនុស្សជាច្រើនជាប់នៅក្នុងផ្ទះរបស់ពួកគេ ខណៈដែលកម្រិតទឹកបន្តកើនឡើងយ៉ាងឆាប់រហ័ស។
ខណៈអគ្គិសនី ទឹកស្អាត និងប្រព័ន្ធទូរស័ព្ទត្រូវបានកាត់ផ្ដាច់ មនុស្សរាប់មុឺននាក់ត្រូវរស់នៅក្នុងភាពងងឹត ការភ័យខ្លាច និងភាពមិនប្រាកដប្រជា រដ្ឋាភិបាលនៅតែមិនទាន់មានវិធានការច្បាស់លាស់ រឹងមាំ ឬមានប្រសិទ្ធភាព សម្រាប់ជួយសង្រ្គោះប្រជាជននៅឡើយ។»

ពលរដ្ឋរូបនេះបន្ថែមទៀតថា ក្នុងនាមជានាយកដរដ្ឋមន្រ្តី គឺត្រូវតែប្រើសិទ្ធិអំណាចក្នុងការបញ្ជាឱ្យមានវិធានការសង្គ្រោះបន្ទាន់ជាប្រព័ន្ធ និងរហ័ស មិនមែនគ្រាន់តែចុះមកមើលស្ថានភាព ដើរជុំវិញ ហើយថតរូបបង្ហោះនោះទេ។ ពលរដ្ឋមិនត្រូវការរូបថតអនុស្សាវរីយ៍ឡើយ ពួកគេត្រូវការជំនួយជាបន្ទាន់ក្នុងពេលឥឡូវនេះ មិនមែនបន្ទាប់ពីសន្និសីទសារព័ត៌មាន មិនមែនបន្ទាប់ពីការប្រជុំ និងការវាយតម្លៃម្តងហើយម្តងទៀតទេ។

បន្ថែមលើនោះ ពលរដ្ឋខាងលើបានស្ដីបន្ទោសលោកអនុទីនថា រដ្ឋាភិបាលត្រូវតែឈប់ទុកឲ្យប្រជាជន «ទាយដោយខ្លួនឯង» ថាតំបន់ណាមានសុវត្ថិភាព ឬមិនមានសុវត្ថិភាព។ ប្រជាជនរាប់មិនអស់កំពុងប្រឈមមុខនឹងកាលៈទេសៈស្លាប់រស់ ប៉ុន្តែអ្វីដែលពួកគេទទួលបានគឺភាពស្ងៀមស្ងាត់ ការពន្យារពេល និងការរំពឹងទុកថាអាជ្ញាធរមូលដ្ឋាននឹងដោះស្រាយអ្វីៗបានដោយខ្លួនឯងក្នុងពេលឆាប់ៗប៉ុណ្ណោះ។

គួរជម្រាបថា ក្នុងពេលបច្ចុប្បន្នខេត្តភាគខាងត្បូងរបស់ថៃមួយចំនួនកំពុងជួបប្រទះនឹងគ្រោះទឹកជំនន់ដ៏ធ្ងន់ធ្ងរបំផុតមិនធ្លាប់មានក្នុងរយៈពេលរាប់ទសវត្សន៍មកហើយ។ ជាក់ស្ដែងខេត្តសុងក្លា ជាកន្លែងរងគ្រោះខ្លាំងជាងគេ ជាពិសេសស្រុក Hat Yai ដែលប្រជាពលរដ្ឋកំពុងរងទុក្ខ អ្នកខ្លះជាប់ក្នុងផ្ទះស្រែកសុំឲ្យគេជួយ ប៉ុន្តែគ្មាននរណាអើពើ សូម្បីក្រុមសង្គ្រោះក៏មិនអាចជួយបានព្រោះតែស្ថានភាពធ្ងន់ធ្ងរពេក។

ស្ថានភាពទឹកជំនន់ដែលបន្តកើនឡើងមិនថមថយ និងភាពយឺតយ៉ាងក្នុងការរកដំណោះស្រាយជួយសង្គ្រោះប្រជាជន ក៏ដូចជាដើម្បីរំដោះទឹកដូចខាងលើនេះ បានជំរុញឲ្យប្រជាពលរដ្ឋនាំគ្នាស្ដីបន្ទោសថា រដ្ឋភិបាលរបស់ខ្លួនសព្វថ្ងៃគ្មានបានការ ដោយសារអស់រយៈពេលរាប់ខែមកហើយបានត្រឹមតែមកថតរូបសេលហ្វ៊ី ផ្ដល់អំណោយបន្តិចបន្តួច រួចក៏ជិះឧទ្ធម្ភាគចក្រត្រឡប់ទៅវិញ ខណៈមនុស្សរាប់លាននាក់នៅតែរងទុក្ខវេទនាទាំងយប់ទាំងថ្ងៃ៕

ប្រទេសថៃ ៖ នាយករដ្ឋមន្ត្រីថៃ លោក Anutin Charnvirakul បាននិយាយកាលពីថ្ងៃទី២៤ ខែវិច្ឆិកា ឆ្នាំ២០២៥ ថា ជម្លោះព្រំដែនរវាងកម្ពុជា-ថៃត្រូវតែបញ្ចប់ក្នុងរយៈពេល៤ឆ្នាំ ពីព្រោះគ្មានផលល្អសម្រាប់ប្រទេសទាំងពីរទេ ជម្លោះធ្វើឱ្យប្រទេសថៃរងផលប៉ះពាល់ ហើយលោកកំណត់គោលដៅបង្កើនទំនាក់ទំនងការទូតល្អជាមួយប្រទេសជិតខាងទាំងអស់ ។ នេះបើតាមការចុះផ្សាយរបស់សារព័ត៌មាន Amarin News នៅថ្ងៃទី២៥ ខែវិច្ឆិកា ។

កាលពីថ្ងៃទី២៤ ខែវិច្ឆិកា នៅមជ្ឈមណ្ឌលសន្និបាតជាតិក្នុងតំបន់ឃ្លងតឺយ ទីក្រុងបាងកក លោក Anutin Charnvirakul នាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ ព្រមទាំងភរិយា បានចូលរួមកម្មវិធី Dinner Talk ស្តីពីប្រធានបទ «Thailand The Next 4 Year» ហើយលោកនិយាយថា ជម្លោះព្រំដែនកម្ពុជា-ថៃត្រូវតែបញ្ចប់ក្នុងរយៈពេល៤ឆ្នាំ ពីព្រោះគ្មានផលល្អសម្រាប់ប្រទេសទាំងពីរ ។ លោកនឹងធ្វើឱ្យស្ថានការណ៍ត្រឡប់មករកភាពប្រក្រតីវិញ ដោយមេដឹកនាំកម្ពុជា-ថៃគួរតែដោះស្រាយរកប្រភពបញ្ហា និងផ្តោតលើមូលហេតុ ហើយពេលដំណើរការត្រូវបានបញ្ជាក់ដោយវិទ្យាសាស្ត្រ ភាគីទាំងសងខាងនឹងព្រមទទួលយក ។

រដ្ឋាភិបាលថៃនឹងមិនទម្លាក់ចោលជម្លោះទុកឱ្យក្មេងជំនាន់ក្រោយដោះស្រាយ ឬក្លាយជាបញ្ហាដែលត្រូវដោះស្រាយនាពេលឆាប់ៗទេ ។ លោកបានកំណត់គោលដៅសម្រាប់រយៈពេល៤ឆ្នាំទៀត គឺថៃត្រូវតែមានទំនាក់ទំនងការទូតល្អជាមួយប្រទេសជិតខាងទាំងអស់ ប្រសិនបើរដ្ឋាភិបាលថៃអនុវត្តគោលនយោបាយការបរទេសដូចពេលបច្ចុប្បន្ននេះ គឺទំនាក់ទំនងជាមួយប្រទេសជិតខាងនឹងល្អមិនខាន ដោយមិនទុកឱ្យជម្លោះទាំងនេះរារាំងដល់ការរីកចម្រើនរបស់ប្រទេសថៃទេ ។

ក្រៅពីនេះ លោកនាយករដ្ឋមន្ត្រី Anutin ក៏បាននិយាយពីការរលាយសភាមុនពេលកំណត់ថា លោកអាចនឹងរំលាយសភាមុនថ្ងៃទី៣១ ខែមករា ឆ្នាំ២០២៦ បើគណបក្សប្រជាជនពុំអាចរង់ចាំ ដោយសារបច្ចុប្បន្ន រដ្ឋាភិបាលថៃមានបញ្ហាប្រឈមច្រើន ។ លោកនឹងប្រគល់អំណាចឱ្យពលរដ្ឋជាអ្នកសម្រេចចិត្តបោះឆ្នោតជ្រើសរើសនាយករដ្ឋមន្ត្រីថ្មី ដើម្បីឱ្យប្រទេសថៃបន្តដំណើរទៅមុខទៀត ។ បើរំលាយសភាមុនថ្ងៃទី៣១ ខែមករា ឆ្នាំ២០២៦ គួរត្រៀមធ្វើវិសោធនកម្មរដ្ឋធម្មនុញ្ញ និងធ្វើសេចក្តីព្រាងរដ្ឋធម្មនុញ្ញថ្មី លោកនឹងព្យាយាមធ្វើវា ពីព្រោះគណបក្សប្រជាជនជ្រើសរើសលោកជារដ្ឋមន្ត្រី ។

ទំនងជានឿយហត់ជាមួយបញ្ហាជុំទិសនៅប្រទេសថៃដែលដោះស្រាយមិនចេញផង និងក្រពុលមុខនឹងការទាមទាររបស់គណបក្សប្រជាជន (ឬគណបក្សប្រឆាំង) ផង លោកនាយករដ្ឋមន្ត្រី Anutin បានបោះពាក្យសម្តីនាពេលកន្លងមកថា កុំបន្ទោសលោកឱ្យសោះ បើនៅសល់បញ្ហាជាច្រើនមិនទាន់ដោះស្រាយក្រោយពេលរំលាយសភា ។ ការលើកឡើងនេះធ្វើឱ្យសង្គមថៃយល់ថា នាយករដ្ឋមន្ត្រីថៃរូបនេះកំពុងត្រៀមរៀបចំបង្វិចរត់ចោលរដ្ឋាភិបាលហើយ ។

លោក Anutin រងនូវការស្តីបន្ទោសពីអ្នកនយោបាយជាច្រើនដោយសារការបញ្ចប់កិច្ចព្រមព្រៀងសន្តិភាពជាមួយកម្ពុជា ដែលចុះហត្ថលេខារួមគ្នានៅទីក្រុងគូឡាឡាំពួរ ក្រោមវត្តមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim កាលពីថ្ងៃទី២៦ ខែតុលា កន្លងមក ទើបធ្វើឱ្យអាមេរិកផ្អាកចរចាពន្ធទំនិញ ។ លើសពីនេះ លោកក៏រងការស្តីបន្ទោសរឿងការបង្ក្រាបឧក្រិដ្ឋកម្មឆ្លងដែន និងការឆបោកអនឡាញដែលកំពុងកើនឡើងនៅថៃ ក៏ដូចជាជួយសង្គ្រោះពលរដ្ឋរងគ្រោះដោយសារទឹកជំនន់នៅភាគខាងត្បូងយឺតយ៉ាវ ។

ក្រោយពីលោក Anutin ចង់រំលាយសភានៅថ្ងៃទី១២ ខែធ្នូ ឆ្នាំ២០២៥ គណបក្សប្រជាជនថា វាគ្មានផលល្អសម្រាប់លោក Anutin ទេ ពីព្រោះចង់យករួចខ្លួន គឺដូចគ្នានឹងមេការសំណង់ដែលយល់ព្រមសាងសង់អគារហើយ ប៉ុន្តែទម្លាក់ការងារចោល ។ យើងនឹងរង់ចាំមើលបន្តទៀតថា តើលោក Anutin អាចកាន់តំណែងជានាយករដ្ឋមន្ត្រីយូរប៉ុនណា ឬថៃនឹងមាននាយករដ្ឋមន្ត្រីថ្មី ៕

ប្រទេសចិន ៖ កាលពីថ្ងៃទី២៤ ខែវិច្ឆិកា ឆ្នាំ២០២៥ អ្នកនាំពាក្យក្រសួងការបរទេសចិនបានហៅគម្រោងរបស់ជប៉ុនដែលដាក់ពង្រាយមីស៊ីលនៅលើកោះក្បែរតៃវ៉ាន់ គឺជាការព្យាយាមបង្កភាពតានតឹងក្នុងតំបន់ និងញុះញង់ឱ្យកងទ័ពប្រឈមមុខគ្នា ស្របពេលជម្លោះការទូតរវាងប្រទេសទាំងពីរកាន់តែក្តៅគគុកខ្លាំងឡើង ។ ជម្លោះការទូតចិន-ជប៉ុនកាន់តែឡើងកំដៅខ្លាំងក្នុងរយៈពេលប៉ុន្មានថ្ងៃមកនេះ បន្ទាប់ពីនាយករដ្ឋមន្ត្រីជប៉ុននិយាយកាលពីពាក់កណ្តាលខែវិច្ឆិកាថា នឹងបញ្ជូនកងទ័ពជប៉ុនទៅជួយការពារតៃវ៉ាន់ ប្រសិនបើរងការវាយប្រ.ហារពីចិន ។

អ្នកនាំពាក្យក្រសួងការបរទេសចិន អ្នកស្រី Mao Ning បាននិយាយក្នុងពេលរាយការណ៍ព័ត៌មានប្រចាំថ្ងៃកាលពីថ្ងៃទី២៤ ខែវិច្ឆិកា ថា ៖ «កងកម្លាំងស្តាំនិយមនៅជប៉ុនកំពុងតែនាំប្រទេសរបស់ខ្លួន និងតំបន់ឆ្ពោះទៅរកគ្រោះមហន្តរាយ ខណៈទីក្រុងប៉េកាំងប្តេជ្ញាចិត្តការពារអធិបតេយ្យរបស់ខ្លួន ។ ការដាក់ពង្រាយមីស៊ីលរបស់ជប៉ុននៅក្បែរតៃវ៉ាន់ គឺជាគ្រោះថ្នាក់យ៉ាងខ្លាំង និងធ្វើឱ្យប្រទេសផ្សេងៗនៅក្បែរនោះ ក៏ដូចជាសហគមន៍អន្តរជាតិបារម្ភ ជាពិសេស ពាក្យសម្តីរបស់នាយករដ្ឋមន្ត្រីជប៉ុន លោកស្រី Sanae Takaichi» ។

ការលើកឡើងរបស់អ្នកនាំពាក្យក្រសួងការបរទេសចិន ក្រោយពីរដ្ឋមន្ត្រីក្រសួងការពារជាតិជប៉ុន លោក Shinjiro Koizumi បាននិយាយកាលពីថ្ងៃទី២៣ ខែវិច្ឆិកា ថា ជប៉ុនត្រៀមអនុវត្តគម្រោងពង្រាយមីស៊ីលបាញ់ទៅលើអាកាសនៅមូលដ្ឋានទ័ពលើកោះយ៉ូណាគូមិ ឆ្ងាយពីឆ្នេរសមុទ្រភាគខាងកើតតៃវ៉ាន់ ប្រមាណ១១០គីឡូម៉ែត្រ ។ ការពង្រាយមីស៊ីលនេះក្នុងគោលដៅការពារមូលដ្ឋានទ័ព និងកុំឱ្យជប៉ុនរងការវាយប្រហារដោយកងកម្លាំងប្រដាប់អាវុធ ។

ចិនបានឆ្លើយតបនឹងពាក្យសម្តីនាយករដ្ឋមន្ត្រីជប៉ុន ដោយរិះគន់យ៉ាងខ្លាំងក្នុងប្រព័ន្ធផ្សព្វផ្សាយរបស់រដ្ឋ ព្រមទាំងផ្អាកការនាំចូលអាហារសមុទ្រជប៉ុន, ផ្អាកបញ្ចាំងភាពយន្តជប៉ុន និងហាមពលរដ្ឋកុំធ្វើដំណើរទៅប្រទេសជប៉ុន ។ កាលពីខែពាក់កណ្តាលខែវិច្ឆិកា ក្រសួងការពារជាតិចិនបានព្រមានកម្ចាត់កងទ័ពជប៉ុនឱ្យខ្ចាត់ខ្ចាយ បើជប៉ុនហ៊ានបញ្ជូនកងទ័ពមកការពារតៃវ៉ាន់ ដែលចិនថាជាការជ្រៀតជ្រែកកិច្ចការផ្ទៃក្នុង ។

រដ្ឋាភិបាលចិនចាត់ទុកតៃវ៉ាន់ជាទឹកដីរបស់ខ្លួន ហើយចិនអាចនឹងប្រើប្រាស់កម្លាំងទ័ពដើម្បីបង្រួបបង្រួមតៃវ៉ាន់ បើទោះជារដ្ឋាភិបាលតៃវ៉ាន់បដិសេធការលើកឡើងនេះ និងប្រាប់ថា មានតែពលរដ្ឋតៃវ៉ាន់ប៉ុណ្ណោះដែលមានសិទ្ធិសម្រេចអនាគតរបស់ខ្លួន ។ កាលពីថ្ងៃទី២៤ ខែវិច្ឆិកា អនុរដ្ឋមន្ត្រីក្រសួងការបរទេសតៃវ៉ាន់ លោក Wu Chih-Chung បាននិយាយមកកាន់សមាជិករដ្ឋសភាថា ជប៉ុនមានសិទ្ធិអនុវត្តវិធានការផ្សេងៗដើម្បីការពារអធិបតេយ្យ ហើយកោះយ៉ូណាគូមិ នៅក្បែរតៃវ៉ាន់បំផុត ។

គួរបញ្ជាក់ថា អ្នកវិភាគនយោបាយនៅអាស៊ីមើលឃើញជម្លោះការទូតចិន-ជប៉ុនពេលនេះ គឺចិនបង្ហាញការមិនពេញចិត្តយ៉ាងខ្លាំង និងចាត់វិធានការជាច្រើនដើម្បីឱ្យសេដ្ឋកិច្ចជប៉ុនធ្លាក់ចុះ ដូចជា ៖ ហាមពលរដ្ឋធ្វើដំណើរទៅជប៉ុន និងឈប់ទិញអាហារសមុទ្រជប៉ុន ។ ចិនថែមទាំងមិនចូលរួមកម្មវិធីវប្បធម៌ជាច្រើន និងលុបចោលជំនួបរវាងនាយករដ្ឋមន្ត្រីចិន លោក Li Qiang ជាមួយរដ្ឋមន្ត្រីជប៉ុន នៅក្រៅកិច្ចប្រជុំមេដឹកនាំប្រទេស G20 នៅអាហ្រ្វិកខាងត្បូងនាសប្តាហ៍ទី៣ ខែវិច្ឆិកា ។

ដូចគ្នានេះ អ្នកវិភាគផ្សេងទៀតបានប្រៀបធៀបជម្លោះការទូតពេលនេះ គឺដូចគ្នានឹងជម្លោះរវាងចិន-ជប៉ុនកាលពីឆ្នាំ២០១២ ពាក់ព័ន្ធនឹងការគ្រប់គ្រងប្រជុំកោះ ។ ពេលនោះ នៅប្រទេសចិនបានធ្វើបាតុកម្មប្រឆាំងជប៉ុន ដែលធ្វើឱ្យមេដឹកនាំប្រទេសទាំងពីរមិនជជែកគ្នាអស់រយៈពេលជាង២ឆ្នាំ ខណៈជម្លោះការទូតលើកនេះកើតឡើងដោយសារនាយករដ្ឋមន្ត្រីថ្មីជប៉ុនបង្ហាញគោលជំហរគាំទ្រតៃវ៉ាន់ ៕

ហូជីមិញ៖ ហាងកាហ្វេ Café Amazon ដែលជាយីហោហាងកាហ្វេដ៏ធំជាងគេនៅប្រទេសថៃ បានបិទសាខាទាំងអស់របស់ខ្លួននៅក្នុងប្រទេសវៀតណាម ដោយសារប្រជែងមិនឈ្នះយីហោកាហ្វេក្នុងស្រុក ក្រោយដំណើរកាអស់រយៈពេល 5ឆ្នាំ។ នេះបើតាមការចុះផ្សាយរបស់សារព័ត៌មាន VNExpress កាលពីថ្ងៃទី21 ខែវិច្ឆិកា ឆ្នាំ2025។

បើតាមអ្នកគ្រប់គ្រងជាន់ខ្ពស់ម្នាក់របស់ Café Amazon បានឲ្យដឹងថា ហាងរបស់ខ្លួនទាំង12 សាខាបានបញ្ឈប់ការបម្រើអតិថិជនអស់ហើយនៅសប្តាហ៍នេះ។ ជាមួយគ្នានេះ សាខា Café Amazon ទាំងអស់នៅទីក្រុងហូជីមិញ បានចាប់ផ្ដើមរុះរើដកផ្លាកសញ្ញាចេញ ដើម្បីប្រគល់កន្លែងជួល និងនៅទីតាំងទៅឲ្យអ្នកជួលបន្តថ្មីរួចរាល់។

នៅក្នុងការជូនដំណឹងដែលបានដាក់ជូនទៅផ្សារហ៊ុនថៃនៅដើមខែតុលា ក្រុមហ៊ុន Central Plaza Hotel Public Company Ltd (Centel) បានប្រកាសពីការរំលាយក្រុមហ៊ុន ORC Coffee Passion Group (ORCG) ដែលជាអង្គភាពប្រតិបត្តិការហាង Café Amazon នៅក្នុងប្រទេសវៀតណាម។

ក្រុមហ៊ុន Centel បាននិយាយថា ខ្លួនកំពុងដកខ្លួនចេញពីប្រទេសវៀតណាម ដើម្បី «ផ្តោតអាទិភាពអាជីវកម្មឡើងវិញ» និងសម្របខ្លួនទៅនឹងបញ្ហាប្រឈមនៃទីផ្សារ។ ដូច្នេះតាមពិតទៅ ការចាកចេញពីប្រទេសវៀតណាមរបស់ហាង Café Amazon ត្រូវបានគេរំពឹងទុកជាយូរមកហើយ។

សូមជម្រាបថា ហាងកាហ្វេ Amazon បានចូលទៅកាន់ប្រទេសវៀតណាមកាលពីខែវិច្ឆិកា ឆ្នាំ 2020 ជាមួយនឹងហាងដំបូងរបស់ខ្លួននៅទីក្រុងហូជីមិញ។ ដើម្បីឱ្យសមស្របទៅនឹងចំណង់ចំណូលចិត្តក្នុងស្រុក ម៉ឺនុយភេសជ្ជៈមួយចំនួនត្រូវបានកែសម្រួល ព្រោះប្រជាជនវៀតណាមមានរសនិយមខុសពីប្រជាជនថៃ។

តែទោះជាយ៉ាងណា ចំនួនហាងដែលទាបជាងគោលដៅ ហើយនៅតែមានកម្រិតមធ្យមបើប្រៀបធៀបទៅនឹងខ្សែសង្វាក់កាហ្វេឈានមុខគេរបស់វៀតណាម គួបផ្សុំនឹងការគាំទ្រតែម៉ាកយីហោក្នុងស្រុក បានធ្វើឲ្យខ្សែសង្វាក់កាហ្វេធំជាងគេរបស់ប្រទេសថៃមួយនេះ បានប្រឈមមុខនឹងការប្រកួតប្រជែងខ្លាំងនៅក្នុងប្រទេសវៀតណាម និងអន្តរជាតិលេចធ្លោមួយចំនួន៕