មិនបានបង្ហាញរូបភាពគូនិងឃ្លាតឆ្ងាយពីគ្នា ទំនាក់ទំនងរវាង អ៊ិន លក្ខិណា និង ប៊ី សុធារី ត្រូវបានមនុស្សមួយចំនួនសង្ស័យថាមានសញ្ញាមិនល្អ។ ទោះយ៉ាងណា Miss Cosmo Cambodia 2024 បានចេញមកស្រាយចង្ងល់ទស្សនិកជនចំពោះសម្ព័ន្ធភាពនាងនិង ប៊ី សុធារី។
.png)
នៅថ្ងៃទី៦ ខែមករា អ៊ិន លក្ខិណា បានចេញមករៀបរាប់ថា គ្រាន់តែនាងនិង ប៊ី សុធារី មិនបានដើរលេងជាមួយគ្នាត្រូវបានមនុស្សមួយចំនួនលើកឡើងថាពួកគេឈ្លោះគ្នា ប៉ុន្តែពួកគេទាំងពីរមិនសម្បូរពេលឈ្លោះគ្នានោះទេ។ លក្ខិណា ថាពួកគេទាំងពីរនាក់មិនដែលឈ្លោះគ្នានោះទេប៉ុន្តែធ្លាប់មានការអន់ចិត្តចំពោះគ្នាមែន។ Miss Cosmo Cambodia 2024 បន្តទៀតថា មួយរយៈចុងក្រោយនេះអ្នកទាំងពីរគឺមានការរវល់រៀងៗខ្លួនទាំងការទៅរៀន និងបំពេញការងារផ្សេងៗទើបមិនបាននៅជាមួយគ្នាប៉ុន្តែពួកគេនៅបន្តទំនាក់ទំនងតាមឆាត។ 
អ៊ិន លក្ខិណា បាននិយាយនៅក្នុងវីដេអូទៀតថា នាងមិនចង់ឱ្យអ្នកមួយចំនួនគិតអ្វីដែលអវិជ្ជមាននោះទេ។ ជាមួយនឹងការបដិសេធមិនមានជម្លោះជាមួយនឹង ប៊ី សុធារី អ៊ិន លក្ខិណា ក៏បានបង្ហាញវីដេអូពីដំណើរកម្សាន្តរបស់ពួកគេប្រកបដោយក្តីរីករាយនៅឯមាត់សមុទ្រផងដែរ។
គួរបញ្ជាក់ផងដែរថា អ៊ិន លក្ខិណា និង ប៊ី សុធារី ជាបវរកញ្ញាដែលមានភាពល្បីល្បាញនៅក្នុងវិស័យសម្រស់ដោយក្រសោបបានទាំងអ្នកគាំទ្រជាតិនិងអន្តរជាតិ។ លក្ខិណា គឺទទួលបានការស្រលាញ់ចូលចិត្តយ៉ាងច្រើនពីអ្នកគាំទ្រវៀតណាម និងមានទំនាក់ទំនងល្អជាច្រើនខណៈនាងក៏មានការងារនៅទីនោះផងដែរ។ ងាកមកកាន់ ប៊ី សុធារី វិញនាងទទួលបានការស្រលាញ់ចូលចិត្តច្រើនពីអ្នកគាំទ្រមីយ៉ាន់ម៉ាបន្ទាប់ពីបានរួមការងារនិងមានទំនាក់ទំនងល្អជាមួយនឹងបវរកញ្ញា Thae Su Nyein៕
