តើធ្លាប់សង្កេតឬអត់ ហេតុអ្វីកៅអីអ្នកដំណើរក្នុងយន្តហោះភាគច្រើនមានពណ៌ខៀវ? អ្នកជិះយន្តហោះមួយចំនួនថា ពណ៌ខៀវអាចការពារភាពកខ្វក់ ឬបិទបាំងភាពកខ្វក់ បើធៀបនឹងពណ៌ផ្សេងៗ ប៉ុន្តែបើតាមអ្នកជំនាញទេសចរណ៍បានប្រាប់ពីមូលហេតុដែលកៅអីក្នុងយន្តហោះភាគច្រើនពណ៌ខៀវ គឺមិនមែនគ្រាន់តែសម្រាប់ការពារភាពកខ្វក់នោះទេ ប៉ុន្តែជាការតាំងចិត្តរបស់ក្រុមហ៊ុនអាកាសចរណ៍ និងក្រុមហ៊ុនផលិតយន្តហោះ ដើម្បីឱ្យអ្នកដំណើរមានអារម្មណ៍ស្រស់ស្រាយ ឬស្ងប់ស្ងាត់ ។.png)
មនុស្សភាគច្រើនដែលធ្វើដំណើរទៅក្រៅប្រទេសញឹកញាប់អាចសង្ស័យថា ហេតុអ្វីកៅអីអ្នកដំណើរក្នុងយន្តហោះភាគច្រើនពណ៌ខៀវ? មនុស្សមួយចំនួនយល់ថា ពណ៌ខៀវអាចការពារភាពកខ្វក់បានល្អជាងពណ៌ផ្សេងៗ វាក៏ទាក់ទាញភ្នែកផងដែរ ។ ប៉ុន្តែការពិត កៅអីពណ៌ខៀវ គឺជាការរចនាម៉ូតយ៉ាងហ្មត់ចត់របស់ក្រុមហ៊ុនអាកាសចរណ៍ និងក្រុមហ៊ុនផលិតយន្តហោះ ដែលពាក់ព័ន្ធនឹងចិត្តវិទ្យានៃពណ៌ និងអារម្មណ៍របស់អ្នកដំណើរ ដើម្បីបង្កើតបរិយាកាសស្រស់ស្រាយដល់អ្នកដំណើរ ។
តាមទិន្នន័យរបស់ BOEING គឺជាក្រុមហ៊ុនផលិតយន្តហោះដ៏ល្បីល្បាញលំដាប់ពិភពលោក ដែលបានផលិតយន្តហោះដឹកអ្នកដំណើររាប់រយគ្រឿងលក់ឱ្យក្រុមហ៊ុនអាកាសចរណ៍នានាជារៀងរាល់ឆ្នាំ ហើយបច្ចុប្បន្ន មានយន្តហោះ BOEING ហោះហើររហូតដល់ជាង១ម៉ឺន៤ពាន់គ្រឿង ឱ្យដឹងថា រាល់ការរចនាម៉ូដផ្នែកខាងក្នុង និងខាងក្រៅរបស់យន្តហោះ គឺផ្តោតលើបទពិសោធន៍របស់អ្នកដំណើរ ។ ពណ៌កៅអីមានសារៈសំខាន់បំផុត ដោយក្រុមរចនាម៉ូដផ្តោតពីផលប៉ះពាល់ផ្លូវចិត្តអ្នកដំណើរដោយសារកៅអីអង្គុយមានពណ៌ផ្សេងគ្នា ។.png)
ពណ៌ខៀវ និងពណ៌បៃតង គឺជាពណ៌ស្ងប់ស្ងាត់ សុវត្ថិភាព និងជួយឱ្យអារម្មណ៍ស្រស់ស្រាយដូចការសម្រាកលំហែ ខណៈពណ៌ស្វាយបង្ហាញពីភាពឆើតឆាយ និងជឿជាក់ ។ ហេតុនេះ ក្រុមហ៊ុនអាកាសចរណ៍នានាតែងតែជ្រើសរើសកៅអីពណ៌ខៀវ ដើម្បីជួយកាត់បន្ថយអារម្មណ៍ស្ត្រេសរបស់អ្នកដំណើរក្នុងអំឡុងពេលជិះយន្តហោះ ។.png)
អ្នកជំនាញទេសចរណ៍ឱ្យដឹងថា ទោះជាការធ្វើដំណើរតាមយន្តហោះមានសុវត្ថិភាពក្តី ប៉ុន្តែអ្នកដំណើរភាគច្រើនតែងតែព្រួយបារម្ភពីការធ្វើដំណើរតាមផ្លូវអាកាស ទើបក្រុមហ៊ុនអាកាសចរណ៍ជ្រើសយកកៅអីពណ៌ខៀវដើម្បីឱ្យពួកគេមានអារម្មណ៍ស្ងប់ ។
ចំណែកអ្នករចនាម៉ូដកៅអីយន្តហោះថា ក្រុមហ៊ុនអាកាសចរណ៍ខ្លះបានជ្រើសយកកៅអីពណ៌ផ្ទៃមេឃស្រាលអាស្រ័យលើទីផ្សារ និងម៉ាក ខណៈក្រុមហ៊ុនអាកាសចរណ៍តម្លៃទាបប្រើប្រាស់កៅអីពណ៌ស្រស់ជាង ។ រីឯក្រុមហ៊ុនអាកាសចរណ៍ចាស់ៗបានជ្រើសយកកៅអីពណ៌ខៀវស្រាលដើម្បីបង្កើតបរិយាកាសស្រស់ស្រាយ ឬឱ្យអ្នកដំណើរមានភាពកក់ក្តៅដូចសម្រាកនៅផ្ទះ ហើយពណ៌ខៀវតំណាងឱ្យសុវត្ថិភាព និងទំនុកចិត្ត ។
ក្រៅពីនេះ កៅអីពណ៌ខៀវស្រាល ធ្វើឱ្យទីធ្លាក្នុងយន្តហោះមានភាពធំទូលាយ ដែលខុសគ្នាពីពណ៌ចាស់ ធ្វើឱ្យអ្នកដំណើរមានអារម្មណ៍ចង្អៀត ហើយពណ៌កៅអីថែមទាំងពាក់ព័ន្ធនឹងការទទួលបានសីតុណ្ហភាព សំណើម និងក្លិនផងដែរ ៕
