ប្រទេសថៃ៖ ក្នុងនាមជាប្រទេសជិតខាងប្រជាពលរដ្ឋខ្មែរគួរមានការប្រុងប្រយ័ត្ន បន្ទាប់ពីនាយកដ្ឋានឧតុនិយមនៃប្រទេសថៃបានបង្ហាញថាខ្យល់ត្រជាក់ សាយភាយគ្របលើប្រទេសថៃ ដែលធ្វើឱ្យអាកាសធាតុត្រជាក់ខ្លាំងនៅតំបន់ភាគខាងជើងនៃប្រទេសនាពេលព្រឹកជាមួយនឹងសីតុណ្ហភាពធ្លាក់ចុះដល់ ៤-២ អង្សាសេ។ ដោយឡែកសម្រាប់ភាគខាងត្បូងនឹងមានភ្លៀងធ្លាក់និងខ្យល់បក់បោកខ្លាំងរហូរដល់កម្រិតកម្ពស់ទឹកសមុទ្រឡើងដល់៤ម៉ែត្រ។

នាថ្ងៃទី៧ ខែមករា ឆ្នាំ ២០២៣ នាយកដ្ឋានឧតុនិយមការព្យាករណ៍អាកាសធាតុទូទៅសម្រាប់ ២៤ ម៉ោងក្នុងប្រទេសថៃ បានឱ្យដឹងថាតំបន់ដែលមានសម្ពាធខ្ពស់ ឬម៉ាសខ្យល់ត្រជាក់ខ្លាំង បានរីករាលដាលគ្របដណ្តប់ប្រទេសថៃផ្នែកខាងលើ និងសមុទ្រចិនខាងត្បូង។ ប្រការនេះធ្វើឱ្យអាកាសធាតុត្រជាក់ នៅភាគខាងជើង និង ភាគឦសានប្រទេសថៃសម្រាប់ពេលព្រឹក ដែលសីតុណ្ហភាពនឹងធ្លាក់ចុះពី ៤-២ អង្សាសេ។

ជាមួយគ្នានោះផងដែរ សម្រាប់តំបន់ភាគខាងត្បូងវិញ នឹងមានខ្យល់មូសុងដែលមានកម្លាំងខ្លាំងបោកបក់លើឈូងសមុទ្រថៃ ដែលវានឹងកង្កើនសម្ពាធទាប គ្របដណ្តប់លើសមុទ្រចិនខាងត្បូងផ្នែកខាងក្រោម ហើយនឹងមានការផ្លាស់ទីទៅជិតចុងឧបទ្វីប Yuan ។

ឥទ្ធិពលខាងលើវានឹងបង្កឱ្យមានភ្លៀងធ្លាក់ច្រើន និង ភ្លៀងធ្លាក់ខ្លាំងនៅតំបន់ខ្លះនៅភាគខាងត្បូង ជាមួយនឹងរលកខ្យល់នៅឈូងសមុទ្រខាងក្រោមនៃប្រទេសថៃមានកម្លាំងខ្លាំងដែលបណ្ដាលឱ្យមាន រលកសមុទ្រមានកម្ពស់ពី ២ ទៅ ៤ ម៉ែត្រ និងមានផ្គររន្ទះខ្លាំង។

ទោះជាយ៉ាងណាអាជ្ញាធរក្នុងតំបន់ក៏បានព្រមានអ្នកបើកទូកនៅឈូងសមុទ្រថៃ ដោយស្នើឱ្យធ្វើដំណើរឱ្យមានការប្រុងប្រយ័ត្ន ហើយចៀសវាងការជិះទូកនៅតំបន់ដែលមានខ្យល់ព្យុះផ្គររន្ទះ លើសពីនេះចំពោះទូកតូចៗនៅតំបន់នោះ ត្រូវផ្អាកការចាកចេញពីច្រាំងរហូតដល់ថ្ងៃទី ៨ ខែមករា ឆ្នាំ២០២៣ ក៏ដូចជាត្រូវប្រុងប្រយ័ត្នចំពោះគ្រោះថ្នាក់នៃខ្យល់បក់បោកមកច្រាំងទន្លេក្នុងអំឡុងពេលនេះផងដែរ។

អាស្រ័យហេតុនេះក្នុងនាមយើងជាប្រទេសជិតខាង សូមបងប្អូនមានការប្រុងប្រយ័ត្នឱ្យបានខ្ពល់ ព្រោះថាឥទ្ធិពលនេះនឹងសាយភាយមកកាន់ប្រទេសកម្ពុជាយើងជាក់ជាមិនខាន ជាពិសេសបងប្អូនដែលរស់នៅតំបន់ជាប់សមុទ្រ និងបងប្អូនអ្នកនេសាទតាមដងសមុទ្រជាដើម គួរតែយកចិត្តទុកដាក់ពីសុវត្តិភាពឱ្យបានខ្ពស់៕ ប្រភព៖ Thairath

ប្រទេសថៃ ៖ តាមប្រព័ន្ធផ្សព្វផ្សាយពិភពលោក Forbes ឱ្យដឹងថា ថៃបានជាប់លំដាប់ទី៩ ជាប្រទេសគួរឱ្យចង់រស់នៅពេលចូលនិវត្តន៍ប្រចាំឆ្នាំ២០២៣ ចំណែកប្រទេសលំដាប់លេខ១ គឺព័រទុយហ្គាល់ ។

ក្នុងរយៈពេល៦ឆ្នាំកន្លងមកនេះ Forbes បានចាត់ចំណាត់ថ្នាក់ប្រទេសដែលចំណាយថោកបំផុតក្នុងការរស់នៅ ដោយនៅឆ្នាំ២០២៣ អ្នកជំនាញរបស់ International Living បានបង្ហាញពីទីកន្លែងទាំង១០ ដែលគួរឱ្យរស់នៅពេលចូលនិវត្តន៍ ឬអ្នកដែលត្រូវការមានជីវិតល្អប្រសើរ ដោយផ្អែកតាមការវិភាគកត្តាផ្សេងៗដូចជា ការចំណាយក្នុងការរស់នៅ អាកាសធាតុ ទិដ្ឋាការ កន្លែងរស់នៅ និងការព្យាបាលសុខភាពជាដើម ។

ប្រទេសគួរឱ្យចង់រស់នៅលំដាប់លេខ១ គឺព័រទុយហ្គាល់ ដោយសារប្រាក់ដុល្លារអាមេរិកថ្លៃជាងធ្វើឱ្យការចាយវាយប្រាក់យូរ៉ូក្នុងប្រទេសនេះចុះថោក ហើយគេអាចស្នើសុំទិដ្ឋាការដោយងាយស្រួលដើម្បីរស់នៅក្នុងរយៈពេលយូរ ។ រីឯការចាយវាយផ្សេងៗសម្រាប់មនុស្ស២នាក់ស្មើប្រមាណ២.៨០០ដុល្លារអាមេរិកក្នុង១ខែ បើរស់នៅម្នាក់ឯង ការចាយវាយស្មើប្រមាណ២.០០០ដុល្លារអាមេរិកក្នុង១ខែ ហើយបើរស់នៅក្នុងទីក្រុងតូចៗ ការចាយវាយនឹងថោកជាងនេះទៀត ។

ចំណែកប្រទេសថៃស្ថិតក្នុងលំដាប់ទី៩ ដូចគ្នានឹងប្រទេសអ៊ីតាលី ចំណុចខ្លាំងគឺថៃមានសីតុណ្ហភាពក្តៅល្មម មានធម្មជាតិ និងវប្បធម៌ដ៏ស្រស់ស្អាត ហើយការចំណាយលើការរស់នៅសមរម្យ ធ្វើឱ្យថៃជាប់ក្នុងលំដាប់ប្រទេសដែលគេចង់មករស់នៅបន្ទាប់ពីចូលនិវត្តន៍ ។

អ្នកសារព័ត៌មានរបស់ International Living ឱ្យដឹងថា ជនបរទេសអាចទិញខុនដូបានដោយងាយនៅប្រទេសថៃ ដោយតម្លៃខុនដូមានបន្ទប់គេង២ អាចក្រោម៣ម៉ឺនដុល្លារអាមេរិក ហើយបើជួលវិញក្នុងតម្លៃ១៨០ដុល្លារអាមេរិកក្នុង១ខែ បើរស់នៅ២នាក់អាចចំណាយប្រាក់ត្រឹម១.៥៩៦ដុល្លារអាមេរិកក្នុង១ខែ ។

ចំណែកប្រទេសផ្សេងទៀតដែលជាប់លំដាប់ដូចគ្នា គឺលំដាប់លេខ២ ប្រទេសម៉ិកស៊ិក, លេខ៣ ប៉ាណាម៉ា, លេខ៤ អេក្វាឌ័រ, លេខ៥ កូស្តារីកា, លេខ៦ អេស្ប៉ាញ, លេខ៧ ក្រិក និងលេខ៨ បារាំង ។ អ្នកចាត់ចំណាត់ថ្នាក់នេះបានពិចារណាទិន្នន័យ ប៉ុន្តែមិនមែនមានន័យថា វាជាទិន្នន័យការស្ទង់មតិបែបវិទ្យាសាស្ត្រទេ ព្រោះពួកគេចាត់ឡើងដោយសាកសួរការយល់ឃើញ និងព័ត៌មានពីអ្នករស់នៅទីកន្លែងផ្សេងៗ ។

ទោះយ៉ាងណា ប្រទេសមួយចំនួនមានចំណាត់ថ្នាក់ធ្លាក់ចុះ គឺវៀតណាម និងម៉ាឡេស៊ី ទោះបីប្រទេសទាំងពីរមានអាកាសធាតុក្តៅល្មម មនុស្សម្នារួសរាយ ការចាយវាយក្នុងការរស់នៅថោក ប៉ុន្តែបញ្ហាទិដ្ឋាការធ្វើឱ្យពិបាករស់នៅយូរអង្វែង ៕

អន្តរជាតិ៖ ក្រុមតាលីបង់​ដែល​កំពុង​គ្រប់គ្រងប្រទេស​អាហ្វហ្គានីស្ថាន បាន​ចុះ​ហត្ថលេខា​លើ​កិច្ចព្រម​ព្រៀង​ជា​អន្តរជាតិ​ទី​ ១​ របស់​ខ្លួន​ជាមួយ​ក្រុមហ៊ុន​ប្រេង​ឥន្ធនៈ​របស់ចិនកាល​ពី​ថ្ងៃ​ព្រហស្បតិ៍ម្សិលមិញ​ ដើម្បី​ឃួង​យក​ប្រេងនិង​អភិវឌ្ឍអាង​ប្រេង​បម្រុង​នៅ​ភាគ​ខាង​ជើង​របស់​ប្រទេស​នេះ។​

ក្រុម​មន្ត្រីជាន់ខ្ពស់​តាលីបង់​ និង​ឯកអគ្គរដ្ឋទូត​ចិន​ប្រចាំ​រដ្ឋធានី​កាប៊ុល​ប្រទេស​អាហ្វហ្គានីស្ថាន​ លោក​ វ៉ាង យី (Wang Yi)​ បាន​ចូល​រួមក្នុង​ពិធី​ចុះហត្ថលេខា​ ដែល​មាន​ការ​ផ្សាយ​បន្តផ្ទាល់​តាម​ទូរទស្សន៍នៅ​ក្នុង​រដ្ឋធានី​កាប៊ុល​របស់​ប្រទេស​អាហ្វហ្គានីស្ថាន​ផង​ដែរ។

រដ្ឋមន្ត្រីក្រសួង​រ៉ែ​អាហ្វហ្គានីស្ថាន​ លោក សាហាប៊ូឌីន ឌីឡាវ៉ាំ (Shahabuddin Dilawar) បានថ្លែងក្នុង​ពិធី​ចុះ​ហត្ថលេខា​នោះ​ថា ការ​ចុះ​កិច្ចព្រមព្រៀង​ជាមួយ​ក្រុមហ៊ុន​ចិន​ ស៊ីនជីង សេនត្រល់ អាស៊ី ផេត្រូលីម អែន ហ្គាស ស៊ីអូ (Xinjiang Central Asia Petroleum and Gas Co) (CAPEIC) ​និង​មាន​ការ​បណ្តាក់​ទុនពី​ចិន​ប្រមាណ​ ១៥០​ លាន​ដុល្លារ​អាមេរិក​ក្នុង​មួយ​ឆ្នាំៗ ក្នុង​ការឃួង​ប្រេង​ពី​តំបន់​អាងស្តុក​ទឹក​នៃទន្លេ អាមូរ (Amu) ក្នុង​ប្រទេស​អាហ្វហ្គានីស្ថាន។

លោក​បាន​បន្ថែម​ទៀត​ថា​ កិច្ចព្រមព្រៀង​នោះ​នឹង​គ្រប​ដណ្តប់​លើ​ផ្ទៃដី​ប្រមាណ ៤.៥០០ ​គីឡូម៉ែត្រ​ក្រឡា​ជា​រួម​ នៅ​ក្នុង​តំបន់ សារីប៉ុល (Saripol) ខាង​ជើង​ ក្នុង​ខេត្ត ចោវស្យូន (Jowzjan) និង​ខេត្ត ហ្វារីយ៉ាប (Faryab) របស់​អាហ្វហ្គានីស្ថាន ដោយ​បង្កើត​ការងារ​ដល់​ពលរដ្ឋ​អាហ្វហ្គានីស្ថាន​ ចំនួន​ប្រមាណ​ ៣ ពាន់នាក់​ផង​ដែរ។

រដ្ឋមន្ត្រី​ក្រសួង​រ៉ែ​អាហ្វហ្គានីស្ថាន​រូប​នេះ បាន​លើក​ឡើងទៀត​ថា​ ការ​វិនិយោគ​របស់​ចិន ត្រូវ​គេ​រំពឹង​ថា​នឹង​កើន​ឡើងប្រមាណ ​៥៤០ ​លាន​ដុល្លារ​អាមេរិក​ ក្នុង​រយៈពេល​បី​ឆ្នាំ​ នៅ​ក្នុង​កិច្ចសន្យា​ដែលមានរយៈពេល​ ២៥ ​ឆ្នាំ​នោះ។ លោក​បន្ត​ទៀត​ថា​ រដ្ឋបាល​តាលីបង់​ នឹង​មាន​ចំណែកក្នុង​ភាព​ជា​ដៃគូ​ប្រមាណ​ ២០%​ នៅ​ក្នុង​គម្រោង​នោះ​ ​ដោយក្នុង​កិច្ចសន្យា​នោះមាន​ «ខ»​ មួយ​ចែង​ថា​ នឹង​បង្កើន​រហូត​ដល់​ ៧៥% ​ផង​ដែរ។

ឯកអគ្គរដ្ឋទូត​ចិន​ក៏​បាន​ជំរុញ​ដល់​ក្រុម​ហ៊ុន​ចិន​ ឱ្យ​អនុវត្ត​ឱ្យ​បាន​ត្រឹមត្រូវទៅ​លើច្បាប់របស់​អាហ្វហ្គានីស្ថាន​ ​ជាមួយ​នឹង​ការ​បំពេញ​ការងារ​ដោយ​ការ​ទទួល​ខុសត្រូវ​ និងកាតព្វកិច្ចនានា​ ដែល​បាន​ចែង​ក្នុង​កិច្ចសន្យា​នោះ ៕

អាមេរិក-អាល្លឺម៉ង់ ៖ សហរដ្ឋអាមេរិក និងអាល្លឺម៉ង់បានប្រកាសរួមគ្នាថា នឹងបញ្ជូនរថក្រោះបំពាក់អាវុធទៅជួយប្រទេសអ៊ុយក្រែន បន្ទាប់ពីប្រទេសបារាំងទើបប្រកាសថា នឹងបញ្ជូនរថក្រោះទំហំតូចដល់អ៊ុយក្រែនផងដែរ ។

កាលពីថ្ងៃទី៥ ខែមករា កន្លងមក ប្រធានាធិបតីអាមេរិក លោក Joe Biden បានជជែកគ្នាតាមទូរស័ព្ទជាមួយនាយករដ្ឋមន្ត្រីអាល្លឺម៉ង់ លោក Olaf Scholz ដើម្បីបញ្ជូនរថក្រោះចម្បាំងបំពាក់អាវុធបច្ចេកវិទ្យាខ្ពស់ទៅឱ្យអ៊ុយក្រែន ។ ជាមួយគ្នានេះ ប្រទេសអាល្លឺម៉ង់នឹងបញ្ជូនប្រព័ន្ធមីស៊ីល Patriot ទៅអ៊ុយក្រែនបន្ថែមទៀត បន្ទាប់ពីអាមេរិកប្រកាសបញ្ជូនប្រព័ន្ធមីស៊ីល Patriot ទៅឱ្យអ៊ុយក្រែនទប់ទល់ជាមួយទាហានរុស្ស៊ី ។

តាមការឱ្យដឹងពីលោក Joe Biden និងលោកនាយករដ្ឋមន្ត្រីអាល្លឺម៉ង់ថា អាមេរិកនឹងបញ្ជូនរថក្រោះ Bradley ដោយដំឡើងកាំភ្លើងជាស្វ័យប្រវត្តិទំហំ២៥មីល្លីម៉ែត្រ និងរ៉ុក្កែតប្រឆាំងរថក្រោះ រីឯអាល្លឺម៉ង់នឹងបញ្ជូនរថក្រោះ Marder ។
ក្រៅពីនេះ អាមេរិក និងអាល្លឺម៉ង់នឹងជួយអប់រំបំប៉នពីរបៀបប្រើប្រាស់រថក្រោះ និងអាវុធពាក់ព័ន្ធផ្សេងទៀត ហើយប្រទេសទាំងពីរនឹងរួមដៃគ្នាបន្តទៀតជាមួយអ៊ុយក្រែន និងពលរដ្ឋអ៊ុយក្រែន

ក្រសួងការពារជាតិ និងក្រសួងការបរទេសអាមេរិកបញ្ជាក់ថា រថក្រោះនេះនឹងជាផ្នែកមួយជួយសង្គ្រោះកងទ័ពអ៊ុយក្រែន ហើយនឹងប្រកាសជាផ្លូវការនាពេលឆាប់ៗ ។ រថក្រោះ Bradley នឹងជួយអ៊ុយក្រែនមានប្រៀបក្នុងសមរភូមិ រីឯប្រព័ន្ធមីស៊ីល Patriot អាមេរិកនឹងអប់រំឱ្យទាហានអ៊ុយក្រែនរៀនសូត្រពីវិធីប្រើនៅអាមេរិក ឬអាចនឹងទៅហ្វឹកហាត់នៅប្រទេសផ្សេងទៀត ។

អ្នកនាំពាក្យក្រសួងការបរទេសអាមេរិក លោក Ned Price បង្ហើបថា ការបញ្ជូនរថយន្តនេះបានអនុម័តទាក់ទងនឹងបញ្ហាទំនាស់រវាងរុស្ស៊ីនិងអ៊ុយក្រែន ហេតុនេះ អាមេរិកពិចារណាតាមភាពជាក់ស្តែងដើម្បីឱ្យអ៊ុយក្រែនការពារខ្លួនឯង ។
ការប្រកាសបញ្ជូនរថក្រោះ និងប្រព័ន្ធមីស៊ីល Patriot ទៅជួយអ៊ុយក្រែនរបស់អាមេរិកនិងអាល្លឺម៉ង់ បន្ទាប់ពីបារាំងបានប្រកាសបញ្ជូនរថក្រោះទំហំតូចប្រភេទ AMX-10 ប្រើកង់កៅស៊ូ ប៉ុន្តែមានកាំភ្លើងធំដូចគ្នានឹងរថក្រោះប្រយុទ្ធទៅអ៊ុយក្រែន ។ មុននេះ ក្រុមប្រទេសលោកខាងលិចស្ទាក់ស្ទើរក្នុងការបញ្ជូនអាវុធធុនធ្ងន់ជួយអ៊ុយក្រែន ព្រោះមិនចង់ពាក់ព័ន្ធនឹងសង្គ្រាម ៕

ប្រភព ៖ TNN World

បរទេស៖ កសិករដាំទុរេនក្នុងប្រទេសហ្វីលីពីនទាំងអស់មានក្ដីរំភើប និង រីករាយនៅពេលដែលផលិតផលក្នុងស្រុក នឹងត្រូវបាននាំចេញទៅកាន់ប្រទេសចិន ដែលជាទីផ្សារអ្នកប្រើប្រាស់ដ៏ធំបំផុតរបស់ពិភពលោកសម្រាប់ទុរេន។

កាលពីថ្ងៃទី ៦ ខែមករា ឆ្នាំ២០២៣ ទីភ្នាក់ងារសារព័ត៌មាន Xinhua News បានរាយការណ៍ពីទីក្រុងម៉ានីល នៃប្រទេសហ្វីលីពីន ថាចិនបានអនុញ្ញាតឲ្យនាំចូលទុរេនពីប្រទេសហ្វីលីពីន កាលពីថ្ងៃពុធកន្លងទៅ នេះ ដែលជាជំហានមួយទៀតក្នុងការពង្រីកកិច្ចសហប្រតិបត្តិការកសិកម្មរវាងប្រទេសទាំងពីរ។

ដែលវាមានន័យថានេះជាឱកាសមាសសម្រាប់កសិករនៅទូទាំងនៃប្រទេសហ្វីលីពីន ដែលស្មើនឹងជិត ៨០ ភាគរយនៃផលិតកម្មទុរេនសរុបនៅក្នុងប្រទេស។

ពិតណាស់ទុរេន គឺជាផ្លែឈើមួយប្រភេទដែលរកលុយបានល្អបំផុត ហើយវាកំពុងពេញនិយមក្នុងចំណោមអ្នកប្រើប្រាស់ចិន។ ដូច្នេះការផ្តល់សិទ្ធិចូលទៅកាន់ទីផ្សារចិនដ៏ធំសម្បើមនេះ វាបានក្លាយ ជា កំណប់ទ្រព្យសម្រាប់កសិករទុរេនក្នុងប្រទេសហ្វីលីពីន។ ដោយរដូវធុរេននៃទីក្រុង Davao ក្នុងអំឡុងខែកក្កដា ដល់ខែតុលា ជារៀងរាល់ឆ្នាំ ពូជទុរេន Davao ដែលពេញនិយមជាងគេគឺពូជ Puyat និង D101 ដែលធន់នឹងសត្វល្អិត និងផ្តល់ផលច្រើនជាងពូជល្បីដទៃទៀត។

ទាក់ទងនឹងឱកាសមាសខាងលើ ប្រសិនបើគ្រួសារនីមួយៗមានដីស្រែ ចំការ ១ ហិកតាមានដើមឈើ ហូបផ្លែ ១០០ ដើមប្រាក់ចំណូលរបស់ពួកគេនឹងកើនឡើងប្រហែល ២៨០០ ដុល្លារ ពីប្រាក់ដើមដែលធ្លាប់លក់កន្លងមក បន្ទាប់ពីទទួលបានទីផ្សារចិន។

ជាមួយគ្នានោះផងដែរបើយោងតាមការស្រង់សំដីរបស់ប្រជាកសិករ និងអ្នកដែលបានធ្វើការនៅរោងចក្រកែច្នៃទុរេនក្នុងទីក្រុង Davao បានបង្ហាញនូវអារម្មណ៍រីករាយជាមួយនឹងដំណឹងថ្មីនេះ ហើយសង្ឃឹមថាកិច្ចព្រមព្រៀងនាំចូលបែបនេះ វានឹងបង្កើនប្រាក់ចំណូលរបស់កសិករ និងគ្រប់វិស័យពាក់ព័ន្ធ។ ក្រៅពីលើការជួយឱ្យហ្វីលីពីននាំចេញទុរេនបានច្រើនហើយនោះ វាក៏រួមចំណែកជួយឱ្យជន បរទេសទទួលស្គាល់ពីសក្ដានុពលនិងស្វែងយល់បន្ថែមអំពីទុរេនហ្វីលីពីនផងដែរ។

យ៉ាងណាមិញនាពេលបច្ចុប្បន្ននេះ ទិន្នផលទុរេនរបស់ទីក្រុង Davao មានប្រហែល ៥០,០០០ តោនក្នុងមួយឆ្នាំ ដោយមានអ្នកដាំដុះជាង ៣,០០០ នាក់ និងមានរោងចក្រកែច្នៃជាង ៥កន្លែងនៅទូទាំងប្រទេស៕ ប្រភព៖ Dailynews