អន្តរជាំតិ៖ យន្តហោះដឹកអ្នកដំណើរ១គ្រឿង របស់ក្រុមហ៊ុនអាកាសចរណ៍ Jetstar បានធ្វើការចុះចតបន្ទាន់នៅឯអាកាសយានដ្ឋានមួយកន្លែង ក្នុងទីក្រុងណាហ្កោយ៉ា (Nagoya) ភាគកណ្តាលប្រទេសជប៉ុន នាថ្ងៃសៅរ៍នេះ បន្ទាប់ពីទទួលបានការគំរាមអំពីគ្រាប់បែក។ នេះបើតាមការ​ចេញផ្សាយដោយ សារព័ត៌មានជប៉ុន NHK នៅថ្ងៃសៅរ៍ ទី៧ ខែមករា ឆ្នាំ២០២៣។

ការគំរាមអំពីគ្រាប់បែកនោះ ត្រូវបានធ្វើឡើងតាមខ្សែទូរស័ព្ទអន្តរជាតិមួយ ចេញពីប្រទេសអាល្លឺម៉ង់ និងជាភាសាអង់គ្លេស ដោយនិយាយថា មានគ្រឿងផ្ទុះទម្ងន់ប្រហែល១០០គីឡូក្រាម ត្រូវបានបង្កៃនៅកន្លែងផ្ទុកទំនិញរបស់យន្តហោះ។ រូបភាពនិងឃ្លីបវីដេអូពីសារព័ត៌មាន NHK បានបង្ហាញឱ្យឃើញអ្នកដំណើររាប់សិបនាក់ ឈរត្រៀបត្រានៅលើផ្លូវរត់របស់យន្តហោះ ក្រោយពួកគេប្រញាប់ប្រញាល់ចាកចេញពីក្នុងយន្តហោះ។

គួរបញ្ជាក់ថា បើតាម NHK ហេតុការណ៍នេះ មិនបានបង្កឱ្យមានមនុស្សរងគ្រោះថ្នាក់ធ្ងន់ធ្ងរឡើយ ខណៈអ្នកដំណើរគឺមានចំនួនប្រហែល១៤០នាក់។ ជើងហោះហើរខាងលើ មានគោលដៅធ្វើដំណើរ ចេញពីអាកាសយានដ្ឋានណារីតា (Narita Airport) ក្បែរទីក្រុងតូក្យូ ឆ្ពោះទៅកាន់ទីក្រុងហ្វូគូអូកា (Fukuoka)។ នៅពេលនេះផ្ទាល់ ការចុះចតនិងហោះចាកចេញ នៅឯអាកាសយានដ្ឋានឈូប៊ូ (Chubu Airport) ក្នុងខេត្តអៃឈិ (Aichi) ត្រូវផ្អាកជាបណ្តោះអាសន្ន ដោយសារ​ស្ថានការណ៍វិវត្តន៍ខាងលើ៕

អន្តរជាតិ៖​ ទាហាន​១០​នាក់​និង​ឧក្រិដ្ឋជន១៩នាក់​ត្រូវបាន​សម្លាប់​នៅក្នុង​ប្រតិបត្តិការ​មួយ​ដើម្បី​ចាប់ខ្លួន​កូនប្រុស​របស់​ស្តេចត្រាញ់​ជួញដូរ​គ្រឿងញៀន​ជាប់គុក ចាវ​គីន “​អែល​ឆា​ប៉ូ​” ហ្គូស្មាន់ (Joaquin “El Chapo” Guzman) ជាមួយ​នឹង​ការបាញ់ប្រហារ​ដ៏​សាហាវ​នៅ​អាកាសយានដ្ឋាន​មួយ​។​ នេះបេីយោង​តាមការបញ្ជាក់ពី​រដ្ឋាភិបាល​ម៉ិចស៊ិក​ ដែលបាន​និយាយ​កាលពី​ថ្ងៃ​សុក្រ​ទី​៦​មករា​។

​​រដ្ឋាភិបាល​ម៉ិចស៊ិក​ បាននិយាយបន្ថែមថា​ ទាហាន​រាប់ពាន់​នាក់​បាន​ដណ្តើម​យក​មក​វិញ​នូវ​ទីតាំង​រឹងមាំ​របស់​ក្រុម​ជួញដូរ​គ្រឿងញៀន Sinaloa គឺ​ទីក្រុង​គូលី​យ៉ា​កាន (Culiacan) ដែល​ស្រដៀង​នឹង​តំបន់​សង្គ្រាម​បន្ទាប់​ពី​ខ្មាន់កាំភ្លើង​​ខឹងសម្បា​បាន​បន្ត​ការវាយលុក​ដើម្បី​ព្យាយាម​រំដោះ​មេ​របស់​ពួកគេ​។​

​សូមជម្រាបថា​ អូ​វី​ឌី​អូ ហ្កូស្មាន់ (Ovidio Guzman) ត្រូវបាន​ចាប់ខ្លួន​នៅ​ទីក្រុង​ភាគ​ពាយព្យ​នេះ​កាលពី​ថ្ងៃ​ព្រហស្បតិ៍ ហើយ​បាន​ដឹក​តាម​យន្តហោះ​ទៅ​កាន់​ទីក្រុង​ម៉ិចស៊ីកូមុន​ពេល​ផ្ទេរ​ទៅកាន់​ពន្ធនាគារ​​អាល់​ធី​ប្លាណូ (Altiplano) ដែល​មាន​សន្តិសុខ​ខ្ពស់​នៅ​កណ្តាល​ប្រទេស​ម៉ិចស៊ិក ជា​កន្លែង​ដែល “​អែល​ឆា​ប៉ូ​” ធ្លាប់​រត់គេចខ្លួន​បានសម្រេច​។​

​បុរស​អាយុ ៣២ ឆ្នាំ​ដែល​មាន​រហស្សនាម​ថា El Raton (​អា​កណ្តុរ​) បាន​ជួយ​គ្រប់គ្រង​ប្រតិបត្តិ​ការជួញដូរ​គ្រឿង​ញៀន​របស់​ឪពុក ចាប់តាំងពី​អតីត​មេក្រុម​ជួញដូរ​គ្រឿងញៀន Sinaloa​រូប​នេះ​ត្រូវ​​បាន​ធ្វើ​បត្យាប័ន​ទៅ​សហរដ្ឋ​អាម៉េរិក​ក្នុង​ឆ្នាំ ២០១៧​។​

​លោក ល្វីស ក្រេសិ​ន​ស្យូ សានដូ​វ៉ាល់ (Luis Cresencio Sandoval) រដ្ឋមន្ត្រី​ការពារជាតិ បាន​ប្រាប់​អ្នកយក​ព័ត៌មាន​ថា៖​វរសេនីយ៍ឯក​ម្នាក់​ដែល​បញ្ជា​កងវរសេនាតូច​ថ្មើរជើង​គឺ​ស្ថិត​ក្នុង​ចំ​​ណោម​អ្នកស្លាប់ បន្ទាប់​ពី​ក្រុម​របស់​គាត់​រង​ការ​វាយឆ្មក់ ក្រោយពី​ការចាប់ខ្លួន​នេះ​។​

​ជាមួយគ្នានោះ​ ទាហាន​៣៥​នាក់​ផ្សេងទៀត​ បាន​រងរបួស​ដោ​យ​គ្រាប់កាំភ្លើង ហើយ​ត្រូវបាន​បញ្ជូន​ទៅ​មន្ទីរពេទ្យ ខណៈ​ខ្មាន់កាំភ្លើង​២១​នាក់​ត្រូវ​ចាប់ខ្លួន​។​

​លោក​រដ្ឋមន្ត្រី​ការពារជាតិ បាន​និយាយថា យន្តហោះ​ស៊ីវិល​មួយ​គ្រឿង​ដែល​ហៀបនឹង​ហោះ​ចេញពី​អាកាសយានដ្ឋាន​អន្តរជាតិ​គូលី​យ៉ា​កានក៏​ដូចជា​យន្តហោះរ​បស់​ក​ង​ទ័ព​អាកាសម៉ិចស៊ិក​ពីរ​គ្រឿង​ត្រូវ​បាន​វាយ​​ប្រហារ​ដោយ​ការបាញ់ប្រហារ​ដោយ​កាំភ្លើង ខណៈ​ដែលពួក​ជួញដូរ​គ្រឿងញៀន​បាន​ព្យាយាម​រំដោះ អូ​វី​ឌី​អូ គូ​ស្មាន់​។​

​រដ្ឋមន្ត្រី​ការពារជាតិ លោក​សានដូ​វ៉ាល់​ បាន​និយាយបន្ថែមថា យន្តហោះ​យោធា “​ត្រូវ​ចុះចត​ជាបន្ទាន់​” បន្ទាប់​ពី​រង​ការបាញ់ប្រហារ​ជា​ច្រើន​គ្រាប់​។​ ប៉ុន្តែមិន​មាន​អ្នករង​របួស​ណាមួយ​ពី​ការវាយប្រហារ​លើ​យន្តហោះ​នោះទេ ហើយកាលពី​ថ្ងៃ​សុក្រ​ទី០៦​ ខែមករា​អាកាសយានដ្ឋាន​គូលី​យ៉ា​កាន​ ក៏បាន​ដំណើរការ​ឡើងវិញ​​ផងដែរ ៕

សហរដ្ឋអាមេរិក ៖ ហេតុការណ៍នឹកស្មានមិនដល់មួយបានកើតឡើងក្នុងសាលារៀនបឋមសិក្សារបស់អាមេរិក គឺមានក្មេងប្រុសអាយុត្រឹមតែ៦ឆ្នាំម្នាក់បានប្រើអាវុធបាញ់គ្រូអាយុជាង៣០ឆ្នាំរបស់ខ្លួន បណ្តាលឱ្យរងរបួសធ្ងន់ ដោយសារគេមិនពេញចិត្តនឹងគ្រូស្តីបន្ទោស ។

ក្រោយមក ក្មេងប្រុសអាយុ៦ឆ្នាំជាអ្នកបង្កហេតុនេះត្រូវបានប៉ូលិសចាប់ឃុំខ្លួនហើយ ដោយស្ថិតក្នុងការស៊ើបអង្កេតតាមដំណាក់កាលរបស់ច្បាប់ ហើយត្រូវមានផ្នែកពាក់ព័ន្ធមកការពារសិទ្ធិរបស់គេ សាកសួរពីមូលហេតុនៃការបាញ់នេះ ព្រមទាំងសួរនាំរឿងតើគេបានអាវុធពីណា ។ តាមការបញ្ជាក់ដំបូងថា វាជាទង្វើរបស់ក្មេងនេះតែម្នាក់ឯង ក្មេងដទៃទៀតមិនពាក់ព័ន្ធទេ ។

តាមភ្នាក់ងារ CNN រាយការណ៍ថា ហេតុការណ៍ខាងលើកើតឡើងនៅសាលារៀនបឋមសិក្សា Richneck ក្នុងទីក្រុង Newport News រដ្ឋ Virginia របស់អាមេរិក ។ កាលពីរសៀលថ្ងៃទី៦ ខែមករា កន្លងមក ក្មេងខាងលើបានបាញ់១គ្រាប់ទៅអ្នកគ្រូរហូតរងរបួសធ្ងន់ ក្រោយពីអ្នកគ្រូរូបនេះមានជម្លោះ និងប្រើសំឡេងខ្លាំងជាមួយខ្លួន ហើយគេបានបញ្ជូនអ្នកគ្រូទៅមន្ទីរពេទ្យ និងស្ថិតក្រោមការថែទាំពីគ្រូពេទ្យយ៉ាងដិតដល់ ។ ក្រោយកើតហេតុ ខាងសាលារៀនបឋមសិក្សា Richneck បានបិទទ្វារជាបណ្តោះអាសន្ន ដើម្បីឱ្យប៉ូលិសចូលទៅប្រមូលភស្តុតាងនៅកន្លែងកើតហេតុ ។

លោក George Parker នាយកសាលាឱ្យដឹងថា ខ្លួនលោកនៅតែមានអារម្មណ៍តក់ស្លុត និងសោកស្តាយជាមួយហេតុការណ៍ដែលបានកើតឡើងនេះ ប៉ុន្តែលោកប្តេជ្ញាផ្តល់ការអប់រំល្អដល់ក្មេងៗ រួមទាំងមើលថែពីសុវត្ថិភាពរបស់ពួកគេគ្រប់គ្នា ហើយលោកសង្ឃឹមថា សហគមន៍នឹងរួមគ្នាប្រយុទ្ធប្រឆាំងនឹងអាវុធ និងមិនឱ្យក្មេងប្រើប្រាស់អាវុធបែបនេះទៀត ៕

ប្រភព ៖ Thairath

បរទេស៖ យន្តហោះពាណិជ្ជកម្ម “Jetstar Japan” ដែលកំពុងប្រតិបត្តិការក្នុងប្រទេសជប៉ុន បានធ្វើការចុះចតបន្ទាន់នៅអាកាសយានដ្ឋានក្នុងទីក្រុង Nagoya  បន្ទាប់ពីអ្នកបើកយន្តហោះត្រូវបានជូនដំណឹងអំពី “ការគំរាមកំហែងគ្រាប់បែក”។

ទីភ្នាក់ងារសារព័ត៌មានបរទេសរាយការណ៍ពីទីក្រុងតូក្យូ ប្រទេសជប៉ុន កាលពីថ្ងៃទី ៧ មករា ឆ្នាំ២០២៣នេះ ដោយដកស្រង់ព័ត៌មានពីប្រព័ន្ធផ្សព្វផ្សាយក្នុងស្រុកជប៉ុន ថាជើងហោះហើររបស់អ្នកដំណើររបស់ក្រុមហ៊ុន Jetstar Japan Airlines Flight GK501 ជាមួយនឹងអ្នកដំណើរ ១៣៦ នាក់ និងសមាជិកនាវិក ៦ នាក់ផ្សេងទៀត គ្រោងនឹងចាកចេញពីអាកាសយានដ្ឋានអន្តរជាតិណារីតា ជាយក្រុងតូក្យូ ទៅអាកាសយានដ្ឋានអន្តរជាតិ Fukuoka នៅព្រឹកថ្ងៃសៅរ៍ ម៉ោងក្នុងស្រុក។

ទោះបីជាយ៉ាងណា យន្តហោះត្រូវបានធ្វើការចុះចតជាបន្ទាន់នៅអាកាសយានដ្ឋានអន្តរជាតិ Chubu  ជាយក្រុងណាហ្គោយ៉ា កណ្តាលនៃប្រទេស « ដើម្បីឲ្យអាជ្ញាធរពាក់ព័ន្ធចាត់វិធានការទប់ស្កាត់ » រួមទាំងការជម្លៀសអ្នកដំណើរទាំងអស់ទៅកាន់តំបន់សុវត្ថិភាព ក្រោយពីអ្នកបើកយន្តហោះត្រូវបានជូនដំណឹងអំពី “ការគំរាមកំហែងគ្រាប់បែក”។

ជាមួយគ្នានោះប្រភពនៅអាកាសយានដ្ឋាន Chubu និងទីភ្នាក់ងារប៉ូលីសទីក្រុង Nagoya ក៏បានធ្វើការចែករំលែកព័ត៌មានភ្លាមៗ ព្រមទាំងបានបញ្ជាក់ថា អ្នកបើកយន្តហោះបានស្នើសុំចុះចតជាបន្ទាន់ បន្ទាប់ពីមានការគំរាមកំហែងតាមរយៈការហៅចូលទូរស័ព្ទពីជើងហោះហើរ GK501 ដោយសំឡេងក្នុង ទូរសព្ទជាសំឡេងមនុស្សប្រុស ហើយប្រើលេខការហៅទូរស័ព្ចចូលពីបរទេស។

ទោះជាយ៉ាងណាការចុះចតទទួលបានជោគជ័យ និងមិនមានបង្កឱ្យមានអ្នកដំណើរមានបញ្ហាអ្វីនោះឡើយ។

យ៉ាងណាមិញប្រភពព័ត៌មានបានបញ្ជាក់បន្ថែមយ៉ាង ដូច្នេះថា លទ្ធផលនៃការស្រាវជ្រាវគ្រប់ជ្រុងនៃយន្តហោះដោយអ្នកជំនាញ រកមិនឃើញមានជាតិផ្ទុះ និងវត្ថុគួរឱ្យសង្ស័យឡើយ ប៉ុន្តែមន្ទីរពាក់ព័ន្ធ នឹងបន្តស៊ើបអង្កេតឲ្យបានហ្មត់ចត់បន្ថែម៕ ប្រភព៖ Dailynews

បរទេស៖ ប្រទេសឡាវបានបើកបណ្តាញខ្សែបញ្ជូន ៥០០គីឡូវ៉ាត់ (500 kV) តភ្ជាប់ស្ថានីយរង នៅភូមិមួយក្នុងចំប៉ាសាក់ ភាគខាងត្បូងនៃប្រទេស ជាមួយតំបន់ព្រំដែនកម្ពុជា។

នាថ្ងៃទី ៧ ខែមករា ឆ្នាំ២០២៣ ទីភ្នាក់ងារព័ត៌មានស៊ីនហួរ បានរាយការណ៍ពីទីក្រុងវៀងច័ន្ទ ប្រទេសឡាវ ថាលោកថុងផាត់ អ៊ីនធឿង ជំនួយការរដ្ឋមន្ត្រីក្រសួងថាមពល និងរ៉ែឡាវ បាននិយាយអំពី គម្រោងមួយនេះថាវានឹងដើរតួយ៉ាងសំខាន់ក្នុងការអភិវឌ្ឍន៍វិស័យថាមពលក្នុងប្រទេសឡាវ ជាពិសេសសក្តានុពលនៃការចែកចាយអគ្គិសនីដល់ប្រជាពលរដ្ឋក្នុងមូលដ្ឋាន និងរួមចំណែកដល់ការអភិវឌ្ឍន៍សេដ្ឋកិច្ចបន្ថែម។

ជាមួយគ្នានោះនាយកគ្រប់គ្រងអគ្គិសនីឡាវ (EDL) លោក Chanthboon Sukalun បានមានប្រសាសន៍ថា បណ្តាញបញ្ជូន និងស្ថានីយ៍រងគឺជាផ្នែកមួយនៃគម្រោងជាតិ ដែលប្រើប្រាស់បច្ចេកទេសទំនើប ជាមួយនឹងតម្លៃវិនិយោគខ្ពស់។ ហើយនេះជាព្រឹត្តិការណ៍សំខាន់មួយក្នុងយុទ្ធសាស្ត្រនាំចេញអគ្គិសនីទៅប្រទេសជិតខាងរបស់ឡាវ ជាពិសេសគឺប្រទេសកម្ពុជា។

ដោយបណ្តាញបញ្ជូនថាមពលនេះផងដែរមានប្រវែងជាង ២០០ គីឡូម៉ែត្រ និង រត់កាត់តំបន់ទន្លេមេគង្គនៃ ខេត្ត ចំប៉ាសាក់ រួមទាំងស្រុក Sanamxay និង Phu Vong ក្នុងខេត្ត Attapeu ។

គួរបញ្ជាក់ផងដែរថា នាពេលបច្ចុប្បន្នប្រទេសឡាវមានប្រភពថាមពលចំនួន ៩០ ដែលមានសមត្ថភាពដំឡើងសរុបជិត ១១,០០០ មេហ្គាវ៉ាត់ត្រឹមឆ្នាំ ២០២២ ដែលក្នុងនោះមានរោងចក្រវារីអគ្គិសនីចំនួន ៧៧ កន្លែង រោងចក្រថាមពលពន្លឺព្រះអាទិត្យចំនួន ៨ រោងចក្រថាមពលជីវម៉ាសចំនួនចំនួន៤ និងរោងចក្រថាមពលធ្យូងថ្មចំនួន ១។

លើសពីនេះ ប្រទេសឡាវគ្រោងនឹងផលិតថាមពលបន្ថែម ១.៨០៧ មេហ្គាវ៉ាត់ នៅចន្លោះឆ្នាំ ២០២១ ដល់ឆ្នាំ ២០២៥ ដោយបែងចែកជាវារីអគ្គិសនី ៥៧ ភាគរយ ដោយថាមពលធ្យូងថ្ម ១៩ភាគរយ និងថាមពលពន្លឺព្រះអាទិត្យ ២៤ភាគ និង ៧៧.៥៩ភាគរយពីវារីអគ្គិសនី។

យ៉ាងណាមិញប្រទេសឡាវមានគំនិតសាងសង់វារីអគ្គិសនីជាច្រើននេះឡើងមក គឺសម្រាប់ជាផ្នែកមួយនៃយុទ្ធសាស្ត្រប្រែក្លាយប្រទេសទៅជា “វារីអគ្គិសនី” នៃអាស៊ីអាគ្នេយ៍៕ ប្រភព៖ Dailynews

ប្រទេសន័រវេស និងអាល្លឺម៉ង់ ៖ ប្រទេសន័រវេស និងអាល្លឺម៉ង់ បានចុះហត្ថលេខាលើកិច្ចព្រមព្រៀងរួមគ្នាមួយដើម្បីបង្កើនការផលិតថាមពលកកើតឡើងវិញ និងអភិវឌ្ឍន៍ឧស្សាហកម្មពណ៌បៃតង ។ ការសហការគ្នានេះមានគោលដៅកាត់បន្ថយការបញ្ចេញកាបូនម៉ូណូអុកស៊ីត ឬឧស្ម័នបង្កកំដៅផែនដី និងកាត់បន្ថយការពឹងផ្អែកលើឧស្ម័នធម្មជាតិពីរុស្ស៊ីផងដែរ ។

ការប្រកាសសហការគ្នា ថ្លែងដោយនាយករដ្ឋមន្ត្រីន័រវេស លោក Jonas Gahr Store និងរដ្ឋមន្ត្រីក្រសួងសេដ្ឋកិច្ចអាល្លឺម៉ង់ លោក Robert Habeck ។ ខ្លឹមសារនៃកិច្ចព្រមព្រៀងមានផែនការសហការលើផ្នែកអ៊ីដ្រូសែន បច្ចេកវិទ្យាថ្ម ថាមពលខ្យល់នៅជាយសមុទ្រ ការចាប់យកកាបូន និងការផ្ទុក ។

Equinor ក្រុមហ៊ុនប្រេងរបស់រដ្ឋាភិបាលន័រវេស និងក្រុមហ៊ុនថាមពលរបស់អាល្លឺម៉ង់ Real World Evidence (RWE) បានប្រកាសផែនការរួមគ្នាអភិវឌ្ឍន៍ផ្នែកផលិត និងការប្រើប្រាស់អ៊ីដ្រូសែនកាបូនទាប ដើម្បីជួយឱ្យអាល្លឺម៉ង់កាត់បន្ថយការពឹងផ្អែកថាមពលធ្យូងថ្ម និងកាត់បន្ថយការបំភាយឧស្ម័នផ្ទះកញ្ចក់នាថ្ងៃអនាគត ។

ប្រទេសន័រវេសបានយកឈ្នះរុស្ស៊ី ខណៈរុស្ស៊ីជាប្រទេសអ្នកនាំចេញឧស្ម័នធម្មជាតិធំជាងគេនៅអឺរ៉ុបតាំងពីឆ្នាំមុន ។ ក្រុមហ៊ុន Equinor ជាអ្នកនាំចេញថាមពលធំជំនួសក្រុមហ៊ុនថាមពលរុស្ស៊ី ខណៈអាល្លឺម៉ង់កំពុងជំរុញការអភិវឌ្ឍសេដ្ឋកិច្ចពណ៌បៃតង (មិនប៉ះពាល់បរិស្ថាន) ជាមួយការស្វែងរកថាមពលជំនួស និងចេញឆ្ងាយពីឧស្ម័នធម្មជាតិរបស់រុស្ស៊ី ។ អាល្លឺម៉ង់ និងសហភាពអឺរ៉ុប (EU) បានប្រើវិធានការមិនជួញដូរឧស្ម័នជាមួយរុស្ស៊ី ដើម្បីបង្ខំឱ្យរុស្ស៊ីបញ្ឈប់ប្រតិបត្តិការកងទ័ពរបស់ខ្លួនជាមួយអ៊ុយក្រែន ហើយត្រូវរុស្ស៊ីតបតវិញដោយប្រើវិធានការតឹងតែង គឺមិននាំចេញឧស្ម័នទៅឱ្យប្រទេសណាដែលមិនមែនជាមិត្តភក្តិរុស្ស៊ី ឬមិនជួញដូរជាមួយរុស្ស៊ី ៕

ប្រភព ៖ TNN World