អ្នកទេសចរនៅទីក្រុងបាងកក កំពុងចាប់អារម្មណ៍ផ្លូវរូងក្រោមដីថ្មីចំនួនពីរ ទៅកាន់កន្លែងទាក់ទាញប្រវត្តិសាស្ត្រដូចជា Grand Palace, Wat Phra Kaew , ទីសក្ការៈបូជាក្រុង និងទីសក្ការបូជា Sanam Luang ។

ផ្លូវរូងក្រោមដី ដោយមានបំពាក់ម៉ាស៊ីនត្រជាក់ត្រូវបានបើកដំណើរការ កាលពីថ្ងៃទី១ ខែមករា ក្នុងសង្កាត់ Old Town នៃ Phra Nakhon ដើម្បីផ្តល់ជូនប្រជាពលរដ្ឋ និងភ្ញៀវទេសចរ នូវជម្រើសដ៏ងាយស្រួល និងសុវត្ថិភាពសម្រាប់ផ្លូវខាងលើ។

ការសាងសង់ផ្លូវរូងក្រោមដីនេះត្រូវបានផ្តួចផ្តើមឡើងនៅក្នុងខែកក្កដា ឆ្នាំ ២០២០ ដោយអតីតអភិបាលក្រុងបាងកក លោក Aswin Kwanmuang ក្នុងតម្លៃ ១.១ ពាន់លានបាត។ ផ្លូវក្រោមដីទាំងពីរនេះ អាចផ្ទុកអ្នកថ្មើរជើងបានជាង ៣៥០០០ នាក់ក្នុងមួយថ្ងៃ៕

ប្រទេសបារាំង ៖ មនុស្ស២នាក់បានបាញ់ថ្នាំពណ៌ដាក់ទ្វារចូលការិយាល័យរបស់នាយករដ្ឋមន្ត្រីបារាំង ដើម្បីតវ៉ាប្រឆាំងនឹងអាកាសធាតុក្តៅក្នុងប្រទេសនេះ ខណៈរដ្ឋាភិបាលមិនអាចកែលម្អគុណភាពខ្យល់នៅក្នុងទីក្រុងនានាតាមការសន្យា ។

អ្នកតវ៉ានឹងអាកាសធាតុក្តៅទាំង២នាក់បានបាញ់ថ្នាំពណ៌ដាក់ទ្វារចូលការិយាល័យនាយករដ្ឋមន្ត្រីបារាំង កាលពីថ្ងៃទី៤ ខែមករា កន្លងមក ដើម្បីប្រឆាំងនឹងក្រុមការងារអាកាសធាតុ Derniere Renovation ឬហៅថា Last Renovation ដែលបង្កើតឡើងដោយរដ្ឋាភិបាល ។ អ្នកទាំងពីរបានពាក់អាវយឺតសរសេរលើអាវថា អ្នកណាខុស ក្រោយមកពួកគេត្រូវបានប៉ូលិសចាប់ខ្លួន ។

នៅក្នុងសេចក្តីថ្លែងការណ៍មួយថា រដ្ឋាភិបាលបរាជ័យក្នុងការធ្វើតាមការប្តេជ្ញាចិត្តជួយដោះស្រាយការផ្លាស់ប្តូរអាកាសធាតុក្នុងប្រទេសបារាំង ។ ទោះជាយ៉ាងណា នៅមិនទាន់មានប្រតិកម្មអ្វីពីការិយាល័យនាយករដ្ឋមន្ត្រី Elizabeth Bourne ទេ ។

គួរបញ្ជាក់ថា កាលពីឆ្នាំ២០២២ តុលាការកំពូលរបស់បារាំង បានបញ្ជាឱ្យរដ្ឋាភិបាលបង់ប្រាក់ការផាកពិន័យចំនួន១០លានយូរ៉ូដល់ទៅ២លើក ដោយសាររដ្ឋាភិបាលមិនអាចកែលម្អគុណភាពខ្យល់ក្នុងទីក្រុងធំៗ ហើយនៅឆ្នាំ២០២១ ក៏ធ្លាប់មានការពិន័យប្រាក់១០លានយូរ៉ូដែរក្រោមហេតុផលដូចគ្នា ។

កាលពីឆ្នាំ២០១៧ តុលាការកំពូលនេះក៏បានបញ្ជាឱ្យរដ្ឋាភិបាលបារាំងកាត់បន្ថយកម្រិតនីដ្រូហ្សែន ឌីអុកស៊ីក និងលម្អងធូលីនៅតាមខេត្តជាង២០ តាមស្តង់ដារអឺរ៉ុប ៕

ប្រភព ៖ TNN World

រៀតណាម៖ ក្រុមប្រឹក្សាវៀតណាម បានរាយការណ៍កាលពីថ្ងៃទី៦ ខែមករា ឆ្នាំ២០២៣ ស្តីពីវឌ្ឍនភាពនៃកិច្ចប្រជុំសភានីតិប្បញ្ញត្តិជាតិពិសេសរបស់វៀតណាម ដោយក្នុងកិច្ចប្រជុំនេះ សភា រួមទាំងនាយករដ្ឋមន្ត្រី Pham Minh Ching បានបណ្ដេញ ឧបនាយករដ្ឋមន្ត្រីពីររូប គឺលោក វ៉ូ ដុក ដាម(Vu Duc Dam) និង លោក ហ្វាម បិង មិង(Pham Binh Minh) ដោយមិនបញ្ជាក់ពីមូលហេតុ។

ប៉ុន្តែទោះជាយ៉ាងណាក៏ដោយចំណាត់ការនេះបានកើតឡើង ខណៈរដ្ឋាភិបាលវៀតណាមបង្កើនការបង្ក្រាបអំពើពុករលួយក្នុងប្រទេស  ជាលទ្ធផលមន្ត្រីរដ្ឋាភិបាល និងពាណិជ្ជកររាប់រយនាក់ត្រូវបានចាប់ខ្លួន និងកាត់ទោស បូករួមទាំងលោក Vu Duc Dam និង Pham Binh Minh បន្ទាប់ពីមានការរៀបចំចំនួនសមាជិកក្រុមប្រឹក្សាដើម្បីបោះឆ្នោតគាំទ្រការដកដំណែងនេះ ក្នុងចំណោម ប្រតិភូចំនួន ៤៨៤ រូបដែលបានបោះឆ្នោតមាន ៤៧៦ រូបបានអនុម័តលើការបណ្តេញចេញ និង ៨ នាក់មិនបានបោះឆ្នោត។ នេះបើយោងតាម ចំនួនសរុបដែល ផ្តល់ដោយរដ្ឋសភា។

ជាមួយគ្នានោះផងដែរប្រភពដដែលបានបញ្ជាក់ថា កាលពីពេលថ្មីៗនេះ ប៉ូលីសបានធ្វើការចាប់ខ្លួនជំនួយការរបស់លោក Vu Duc Dam ដោយចោទប្រកាន់ពីបទរំលោភអំណាច ព្រមទាំងជាប់ពាក់ព័ន្ធនឹងអំពើពុករលួយនៅក្រុមហ៊ុន Viet A Technology JSC ដែលជាក្រុមហ៊ុនផលិតឧបករណ៍ធ្វើតេស្តរកជំងឺកូវីដ-១៩។

ទន្ទឹមនឹងនោះនៅក្នុងខែកញ្ញា ឆ្នាំ២០២២កន្លងទៅ អាជ្ញាធរក៏បានចាប់ខ្លួន លោក វៀន ក្វាង លិន(Nguyen Quang Linh) ដែលជាជំនួយការរបស់លោក Pham Binh Minh និង លោក វៀន ថាន ហៃ (Nguyen Than Hai)ដែលជាប្រធាននាយកដ្ឋានកិច្ចការបរទេសរបស់ប្រទេសវៀតណាម ដោយចោទប្រកាន់ពីការទទួលសំណូក ខណៈពេលដែលលោករៀបចំជើងហោះហើរធ្វើមាតុភូមិនិវត្តន៍សម្រាប់ជនជាតិស៊ីវិលវៀតណាមនៅបរទេសអំឡុងពេលមានជំងឺកូវីដ-១៩រាតត្បាតខ្លាំង។

គួររំលឹកផងដែរថា កាលពីឆ្នាំមុន អាជ្ញាធរវៀតណាមបានផ្តួចផ្តើមការស៊ើបអង្កេតឧក្រិដ្ឋកម្មលើបុគ្គលយ៉ាងហោចណាស់ ៤,៦៤៦នាក់ ជាមួយនឹង ២,៤៧៤ ករណីសម្រាប់ការរំលោភបំពានដែលត្រូវបានចោទប្រកាន់ពាក់ព័ន្ធនឹងអំពើពុករលួយ ការរំលោភបំពានអំណាច និងកំហុសផ្នែកសេដ្ឋកិច្ច។ ហើយ ចាប់តាំងពីដើមឆ្នាំ ២០២១ មក ការិយាល័យនយោបាយ និងគណបក្សបានដាក់វិន័យលើមន្ត្រីយ៉ាងតិចចំនួន ៦៧ នាក់ ក្រោមការគ្រប់គ្រងរបស់ការិយាល័យនយោបាយ និងលេខាធិការដ្ឋាន រួមទាំងរដ្ឋមន្ត្រី និងអតីតរដ្ឋមន្ត្រីចំនួន ៥ រូប រួមទាំងប្រធានខេត្តចំនួន ១៣ រូប និងអតីតប្រធាន និងមន្ត្រីថ្នាក់ក្រោមចំនួន ២០ នាក់ផងដែរ៕ ប្រភព៖ Khaosod

បរទេស៖ សហរដ្ឋអាមេរិកបានបង្កើនកម្រិតប្រកាសអាសន្នសម្រាប់ភ្នំភ្លើង Kilauea នៃរដ្ឋហាវ៉ៃ ដាក់ជាតំបន់ក្រហម បន្ទាប់ពីមានការផ្ទុះឡើងជាលើកទីបីចាប់តាំងពីចុងឆ្នាំ ២០១៨មកម្លេះ។

នាថ្ងៃទី ៦ ខែមករា ឆ្នាំ២០២៣ ទីភ្នាក់ងារសារព័ត៌មានបរទេសបានរាយការណ៍ពីទីក្រុងហូណូលូលូ សហរដ្ឋអាមេរិក ថាទីភ្នាក់ងារស្ទាបស្ទង់ភូមិសាស្ត្រអាមេរិក (USGS) បានរាយការណ៍អំពីភ្នំភ្លើង Kilauea មានកម្ពស់ ១.២៤៧ ម៉ែត្រ ស្ថិតនៅក្នុងទីក្រុង Puu រដ្ឋ Ohio ភាគអាគ្នេយ៍នៃកោះហាវ៉ៃ ដែលជាកោះធំជាងគេក្នុងចំណោមកោះទាំងប្រាំបីនៅក្នុងរដ្ឋហាវ៉ៃ ដោយមានការផ្ទុះដ៏ខ្លាំងក្លាម្ដងទៀត ចាប់តាំងពីថ្ងៃព្រហស្បតិ៍ម្សិលមិញ ក្រោយពីភ្នំនេះមានការផ្ទុះឡើងជាលើកទី៤ចាប់តាំងពីឆ្នាំ ២០១៨មកម្លេះ។

បន្ថែមពីនោះ ទីភ្នាក់ងារស្ទាបស្ទង់ភូមិសាស្ត្រអាមេរិក បានបង្កើនការជូនដំណឹងអំពីការផ្ទុះភ្នំភ្លើង Kilauea នេះដោយបានដាក់ជាតំបន់ “ក្រហម” ដែលជាការកត់សម្គាល់នៃការផ្ទុះលើកទី៤របស់ភ្នំភ្លើងដ៏ធំមួយនេះ ក្នុងរយៈពេលជាច្រើន ឆ្នាំ ចាប់តាំងពីខែធ្នូ ឆ្នាំ ២០២០ និងផ្ទុះម្ដងទៀតក្នុងខែតុលា ឆ្នាំ ២០២១។

គួរបញ្ជាក់ផងដែរថាកាលពីពាក់កណ្តាលឆ្នាំ ២០១៨ ភ្នំភ្លើង Kilauea បានផ្ទុះឡើងយ៉ាងខ្លាំង កំអែរជាច្រើនគីឡូម៉ែត្រ បានហៀរចេញមកក្រៅ ខូចខាតផ្ទះប្រជាពលរដ្ឋ និងតំបន់កសិកម្មដ៏ច្រើន  និងមនុស្សជាង ១០,០០០ នាក់ត្រូវបានជម្លៀសចេញនៅពេលនោះ ខណៈដែលអាជ្ញាធរហាវ៉ៃប៉ាន់ស្មានការខូចខាត ដែលបានកើតឡើងចំពោះឧស្សាហកម្មទេសចរណ៍ ពីការផ្ទុះភ្នំភ្លើង Kilauea នាពេលនោះ ដែលមានរយៈពេលជាច្រើនខែក្នុងតម្លៃប្រហែល ៣ លានដុល្លារអាមេរិក៕ ប្រភព៖ Dailynews

ប្រទេសអូស្ត្រាលី ៖ អូស្ត្រាលីបានបង្ហើបកាលពីថ្ងៃទី៥ ខែមករាថា ខ្លួនត្រៀមទិញប្រព័ន្ធរ៉ុក្កែតបាញ់បង្ហោះ HIMARS មានរូបរាងដូចគ្នានឹងគ្រឿងដែលបញ្ជូនទៅប្រទេសអ៊ុយក្រែនសម្រាប់តទល់ជាមួយរុស្ស៊ី ។ អូស្ត្រាលីសង្ឃឹមថា នឹងយកវាមកប្រចាំការនៅក្នុងប្រទេសឆ្នាំ២០២៦-២០២៧ ខាងមុខនេះ ។

លោក Pat Conroy នាយករដ្ឋមន្ត្រីក្រសួងការពារជាតិអូស្ត្រាលី បានថ្លែងទៅកាន់សារព័ត៌មាន ABC ថា ដោយឃើញពីប្រសិទ្ធភាពរបស់ប្រព័ន្ធរ៉ុក្កែតបាញ់បង្ហោះ HIMARS របស់អាមេរិកបញ្ជូនឱ្យប្រទេសអ៊ុយក្រែនតទល់ជាមួយការឈ្លានពានរបស់រុស្ស៊ី ទើបធ្វើឱ្យលោកសម្រេចចិត្តបញ្ជាទិញវាមកប្រចាំការនៅក្នុងប្រទេស ។ រដ្ឋាភិបាលអូស្ត្រាលីបានសម្រេចចិត្តទិញប្រព័ន្ធរ៉ុក្កែតបាញ់បង្ហោះ HIMARS ពីអាមេរិកយ៉ាងរហ័ស ដោយរំពឹងថា ប្រព័ន្ធនេះនឹងអាចការពារប្រទេសអូស្ត្រាលីពីការវាយលុក ។

ទោះយ៉ាងណា ក្រសួងការពារជាតិអូស្ត្រាលីមិនបានប្រាប់ពីតម្លៃវាទេ គ្រាន់តែបង្ហើបថា អូស្ត្រាលីនឹងចំណាយប្រាក់ប្រមាណពី១.០០០-២.០០០លានដុល្លារអូស្ត្រាលី រីឯអាវុធផ្សេងទៀតមាន កាំជ្រួចវាយប្រហាររបស់កងទ័ពជើងទឹកន័រវេស ដែលនឹងយកមកដាក់លើនាវាពិឃាត និងនាវាចម្បាំងតាំងពីឆ្នាំ២០២៤តទៅ ។ ប្រព័ន្ធរ៉ុក្កែតនេះអាចបាញ់បានចម្ងាយពី៣០ ទៅ៣០០គីឡូម៉ែត្រ និងបាញ់បានឆ្ងាយដល់៥០០គីឡូម៉ែត្រ ។

អ្នកសារព័ត៌មានសួរថា តើអូស្ត្រាលីគិតយ៉ាងណា ខណៈ HIMARS នឹងត្រូវឈរជើងក្នុងតំបន់ប៉ាស៊ីហ្វិក ហើយប្រទេសចិនកំពុងតែរីកចម្រើនជាបន្តបន្ទាប់ផ្នែកកងទ័ព និងការទូត ? លោកនាយករដ្ឋមន្ត្រីថ្លែងថា ប្រព័ន្ធនេះអាចផ្លាស់ទីបានយ៉ាងងាយស្រួល ហើយអាចដឹកជញ្ជូនទៅទីណាក៏ដែរក្នុងពិភពលោក ៕

ប្រភព ៖ TNN World

បរទេស៖ មហាជនជាច្រើនបានធ្វើការរិះគន់ព្រះអង្គ Harry ក្រោយពីព្រះអង្គបានធ្វើការសារភាពថាកាលពីអតីតកាលគាត់បានប្រើប្រាស់ថ្នាំកូកាអ៊ីន និងធ្លាប់បានឈ្លោះប្រកែកគ្នាម្តងហើយម្តងទៀតជាមួយគ្រួសារ។

ព្រះអង្គម្ចាស់ Harry ជាបុត្រារបស់ព្រះអង្គ Charles III ដែលកំពុងតែគ្រប់គ្រោងសោយរាជ្យនាពេលបច្ចុប្បន្ន។

ជាមួយគ្នានោះ កាលពីពេលថ្មីៗកន្លងទៅនេះ មានរឿងរ៉ាងដ៏គួរឱ្យចាប់អារម្មណ៍ និងភ្ញាក់ផ្អើលជាខ្លាំងក្រោយពីក្នុងរាជវង្សអង់គ្លេស នៅពេលដែលព្រះអង្គម្ចាស់ Harry បានធ្វើការបង្ហាញព័ត៌មានពីបទពិសោធន៍ផ្ទាល់ខ្លួនតាមរយៈការសរសេរសៀវភៅ “Spare” ដែលបានបង្ហាញថាព្រះអង្គធ្លាប់បានប្រើប្រាស់គ្រឿងញៀនក្នុងវ័យជំទង់ និងការឈ្លោះប្រកែកគ្នា ព្រមទាំងប្រយុទ្ធគ្នារវាងបងប្អូនបង្កើត បន្ទាប់ពីបងប្រុសបានស្តីបន្ទោសថាព្រះអង្គមានអាកប្បកិរិយា “ឈ្លើយ”។

ទោះជាយ៉ាងណាព្រះអង្គម្ចាស់ Harry បានបង្ហាញព័ត៌មានជាច្រើននៅក្នុងសៀវភៅ Spare អំពីបទពិសោធន៍ផ្ទាល់ខ្លួន និងការចងចាំរបស់គាត់ ដែលកំពុងក្លាយជាប្រធានបទនៃការរិះគន់សាធារណៈ បន្ទាប់ពីសៀវភៅនេះត្រូវបានចេញផ្សាយនៅក្នុងប្រទេសអេស្ប៉ាញ។

ព្រះអង្គម្ចាស់ Harry បានសារភាពថាបានទ្រង់បានប្រើប្រាស់គ្រឿងញៀននៅពេលព្រះអង្គនៅជាសិស្សនៅសាលា Eton  ក្នុងវ័យ ១៧ព្រះវស្សា ហើយគាត់ក៏បានសារភាពថាបានប្រើប្រាស់គ្រឿងញៀនជាច្រើនឆ្នាំមកហើយ ដែលថ្នាំមួយចំនួនពីមុនរួមមាន កូកាអ៊ីន កញ្ឆា និង ‘ផ្សិតមួយប្រភេទដែលមានឥទ្ធិពល hallucinogenic និងធ្វើឱ្យអ្នកប្រើប្រាស់ស្រវឹង។

ការប្រព្រឹត្តិទង្វើទាំអស់នេះ ព្រះអង្គបានអះអាងថាធ្វើដើម្បី “សម្រាប់ការសប្បាយ” និង “សម្រាប់ការព្យាបាល” ពីព្រោះទាំងនេះបានផ្តល់ឱ្យទ្រងនូវពន្លឺនៃ “សេចក្តីពិត” នៅក្នុងពិភពលោកដែលគាត់រស់នៅ។

នៅក្នុងសៀវភៅចុងក្រោយបង្អស់ ព្រះអង្គម្ចាស់ Harry បានពិពណ៌នាអំពីការជក់បារីជាច្រើនដង។រួមទាំងអារម្មណ៍ដែលស្ទើរតែមិនអាចអត់បាន។

ពិតណាស់វាបានក្លាយជារឿងអាស្រូវ ក្នុងប្រព័ន្ធផ្សព្វផ្សាយដ៏ពេញនិយមលើបណ្ដាញសង្គមសម្រាប់បទពិសោធដែលទ្រង់ធ្លាប់ប្រព្រឹត្តិកន្លងមក។

គួរបញ្ជាក់ផងដែរថាសៀវភៅ Spare ដែលជាសៀវភៅមាន ៤១៦ ទំព័រដែលបោះពុម្ពដោយ Penguin Random House គ្រោងនឹងចេញលក់នៅក្នុងហាងលក់សៀវភៅជាផ្លូវការនៅថ្ងៃទី ១០ ខែមករា ឆ្នាំ២០២៣ ខាងមុខនេះហើយ៕ ប្រភព៖ Dailynews