អង្គការសុខភាពពិភពលោកប្រចាំប្រទេសវៀតណាម បានព្រមានប្រឆាំងនឹង Covid19 ដោយលើកឡើងថា វីរុសអូមីក្រុងប្រភេទថ្មី អូមីក្រុង អិចប៊ីប៊ី (Omicron XBB) ដែលរីករាលដាលកាន់តែងាយស្រួល អាចបង្កហានិភ័យខ្ពស់នៃការឆ្លងក្នុងអំឡុងពេលថ្ងៃឈប់សម្រាក នាឱកាសពិធីបុណ្យចូលថ្មី នៅប្រទេសវៀតណាម នាពេលខាងមុខ។

ជាមួយនឹងវត្តមានអូមីក្រុង អិចប៊ីប៊ី ដែលត្រូវបានគេជឿថា មានសមត្ថភាពគេចពីការឆ្លើយតបនៃប្រព័ន្ធភាពស៊ាំ ហើយបានរកឃើញរួចហើយនៅក្នុងទីក្រុងហូជីមិញ និងខេត្ត តៃ និញ (Tay Ninh) ដែលនៅជិតនោះ លោកស្រី អេនជេឡា ប្រាដ (Angela Pratt) តំណាងអង្គការសុខភាពពិភពលោកប្រចាំប្រទេសវៀតណាមបានព្រមានអំពីការកើនឡើងនៃការឆ្លងក្នុងអំឡុងពេលសម្រាកសប្តាហ៍ ចាប់ពីថ្ងៃទី ២០ ខែមករាដល់ ២៦ សម្រាប់បុណ្យចូលឆ្នាំថ្មី។

លោកស្រី អេនជេឡា ប្រាដ ត្រូវបានដកស្រង់សម្តីដែលបាននិយាយ នៅក្នុងរបាយការណ៍របស់អង្គការសុខភាពពិភពលោកថា “ក្នុងរដូវវិស្សមកាលនេះ ពិតណាស់យើងចង់ឱ្យមនុស្សមានភាពសប្បាយរីករាយ និងរីករាយជាមួយពេលវេលាជាមួយមិត្តភក្តិ និងក្រុមគ្រួសារ ប៉ុន្តែយើងក៏ជំរុញឱ្យប្រជាជនមានការប្រុងប្រយ័ត្នផងដែរ ដើម្បីមានសុខភាពល្អ និងសុវត្ថិភាព” ៕

ប្រភព៖ VN Express

បរទេស៖ អូស្ត្រាលីរកឃើញ “ដង្កូវមួយប្រភេទ ” ដែលអាចស៊ី និងបំបែកប្លាស្ទិក ដែលជាការបើកទ្វារថ្មីសម្រាប់ក្ដីសង្ឃឹមក្នុងដំណោះស្រាយចំពោះកាកសំណល់ប្លាស្ទិកលើពិភពលោក។

មានការស្រាវជ្រាវថ្មីមួយពីសាកលវិទ្យាល័យ Queensland  អូស្ត្រាលី បានចង្អុលបង្ហាញអំពីក្ដីសង្ឃឹម ក្រោយពីខ្លួនបានរកឃើញប្រភេទដង្កូវមួយប្រភេទ ឬហៅថា “Superworm” ឬឈ្មោះវិទ្យាសាស្ត្រ Zophobas morio ដែលគេបានចាប់ទុកថាដង្កូវនេះអាចជាវីរបុរសថ្មីមួយ សម្រាប់ការជួយឱ្យភពផែនដីរបស់យើងកម្ចាត់កាកសំណល់ប្លាស្ទិក។

ក្នុងនោះគេបានឱ្យដឹងថាលក្ខណៈពិសេសដែលបានសិក្សាជាយូរមកហើយគឺថាដង្កូវមួយប្រភេទនេះវា មានអង់ស៊ីមជាច្រើននៅក្នុងពោះវៀនដែលអាចរំលាយ អាចហែក និងស៊ីសារធាតុ Polystyrene បានដោយងាយដែលជាប្រភេទប្លាស្ទិក។

ជាមួយគ្នានោះសម្រាប់សារធាតុ Polystyrene នោះដែលភាគច្រើនវាជាសម្ភារៈដែលត្រូវបានគេប្រើជា ញឹកញាប់ដើម្បីផលិតធុងស្ទីរ៉ូហ្វម មាននៅលើស្រោមពូក ឬក៏វត្ថុផ្លាស្ទិក ដែលទាំងអស់នេះត្រូវចំណាយពេលជាង ៤០០ ឆ្នាំដើម្បីរលួយទាំងស្រុង។

ទោះជាយ៉ាងណាដង្កូវ Superworm គឺជាពពួក Worm beetle ដែលវាត្រូវបានរកឃើញជាទូទៅនៅអាមេរិកកណ្តាល និងនៅតំបន់ខ្លះនៃអាមេរិកខាងត្បូង។

យ៉ាងណាមិញក្រុមអ្នកស្រាវជ្រាវនៅសាកលវិទ្យាល័យ Queensland Fed Foreworms បានយកជាមួយនឹងស្នោ Polystyrene Foam រយៈពេល ៣ សប្តាហ៍ហើយបានរកឃើញថាពពួកដង្កូវនេះ អាចស៊ីស្នោរួចហើយ មានវដ្តជីវិតពេញលេញពួកគេអាចក្លាយជាកូនឆដង្កូវធំធាត់ បានពេញវ័យ នេះមានន័យថាពួកគេអាចស៊ីសារធាតុ Polystyrene ជារបបអាហារធម្មតាដូចជារុក្ខជាតិ។

ប៉ុន្តែទោះជាយ៉ាងណាក៏ដោយ ការផ្លាស់ប្តូររបបអាហារហាក់ដូចជាមានឥទ្ធិពលលើពួកវាខ្លះផងដែរ ដោយដង្កូវដែលបានស៊ីស្នោ ពួកវាមានទម្ងន់តិចជាងដង្កូវនាងដែលស៊ីចំណីធម្មតា និងអតិសុខុមប្រាណដែលមានក្នុងពោះវៀនមានសុខភាពមិនសូវល្អ។

គួរបញ្ជាក់ថាប្រទេស អូស្ត្រាលីកំពុងតែត្រូវលុបចោលប្រភេទស្នោ Polystyrene ដែលជាផ្នែកមួយនៃផែនការជាតិប្លាស្ទិករបស់អូស្ត្រាលី ហើយនឹងលែងអនុញ្ញាតឱ្យមានសារធាតុ Polystyrene ក្នុងកញ្ចប់អាហារ និង ភេសជ្ជៈក្នុងប្រទេស៕ ប្រភព៖ pptvhd36

បរទេស៖ កាលពីថ្ងៃទី ៨ ខែមករា ឆ្នាំ២០២៣ បានឱ្យដឹងថា ឧបករណ៍មួយក្នុងចំណោមឧបករណ៍សម្រាប់ជួយធ្វើការសម្រេចចិត្តឆ្លើយតបបម្រែបម្រួលអាកាសធាតុបន្ទាន់បំផុតនាពេលបច្ចុប្បន្នដែលជាផ្កាយរណប Surface Water and Ocean Topography ឬហៅកាត់ SWOT គេបានបាញ់បង្ហោះកាលពីថ្ងៃទី ១៦ ខែធ្នូ ឆ្នាំ២០២២ កន្លងទៅចូលទៅក្នុងគន្លងផែនដី ពីមូលដ្ឋានកងកម្លាំងអវកាស Vandenberg។

ជាមួយគ្នានោះគេសង្ឃឹមថា ទិន្នន័យដែលប្រមូលបានដោយ SWOT នឹងជួយអ្នកស្រាវជ្រាវ និងអ្នកធ្វើការសម្រេចចិត្តអំពីអាកាសធាតុដែលកំពុងព្រួយបារម្ភនាពេលបច្ចុប្បន្ន។

ក្នុងនោះគេដឹងថាផ្កាយយរណប SWOT មានបេសកកម្មវាស់កម្ពស់ទឹកជាង ៩០ភាគរយនៃផ្ទៃផែនដី ដែលជាការស្ទង់កម្រិតទឹករបស់ពិភពលោក។

គុណភាពរបស់វាបានបង្ហាញពីលទ្ធិផលដ៏ខ្ពស់ជាលើកដំបូង ដោយអ្នកស្រាវជ្រាវបានពណ៌នាអំពីមុខងាររបស់ផ្កាយរណបនេះថា វាមានបន្ទះធំមួយនៃបង្គោល និង អង់តែនរបស់វា ហើយបន្ទាប់ពីការ ដំឡើងរួចរាល់ បន្ទះនោះនឹងស្រូបពន្លឺព្រះអាទិត្យដែលផ្តល់ថាមពលដល់ផ្កាយរណបដោយជោគជ័យ។

ហើយបេសកកម្មនៃការត្រួតពិនិត្យរបស់ផ្កាយរណបនឹងប្រើប្រាស់ទិន្នន័យតេឡេម៉ែត្រ និងមានកាមេរ៉ាដែលអាចប្ដូរតាមបំណងបានចំនួន ៤ ដែលថតប្រតិបត្តិការរបស់វា បន្ថែមពីនោះបន្ទះរបស់វានឹងស្រូបពន្លឺព្រះអាទិត្យ និងដំណើរការពេញលេញបន្ទាប់ពីបើកភ្លើងប្រហែល ១០ នាទី ហើយការដំឡើងអង់តែនក៏ទទួលបានជោគជ័យក្នុងរយៈពេលត្រឹមតែ ៤ ថ្ងៃ ដោយដំណើរការការងារទាំងមូលត្រូវបានបញ្ចប់នៅថ្ងៃទី ២២ ខែធ្នូ ឆ្នាំ២០២២កន្លងទៅ។

ជាលទ្ធិផល អង់តែនទាំងពីរនៅលើ ផ្កាយរណប SWOT នោះហើយគឺជាឧបករណ៍ដ៏ទំនើបបំផុតរបស់ Ka-band Radar Interferometer (KaRIn) ដែលត្រូវបានរចនាឡើងដើម្បីវាស់កម្ពស់ទឹកនៅក្នុងទឹកសាប និងមហាសមុទ្ររបស់ផែនដីបានយ៉ាងត្រឹមត្រូវ ដែលមានជម្រៅតិចជាង ២០ គីឡូម៉ែត្រនៃមហាសមុទ្រ និងប្រមូលទិន្នន័យនៅលើបឹងនានា ក៏ដូចជាអាងស្តុកទឹកដែលមានទំហំធំជាង ៦២,៥០០ ម៉ែត្រការ៉េ និងទន្លេដែលមានទទឹងជាង ១០០ ម៉ែត្រផងដែរ។

លើសពីនេះវាអាចវាស់ការប្រែប្រួលនៃកម្រិតទឹក មិនថាបឹង ឬផ្នែកនៃមហាសមុទ្រ ដោយជួយកំណត់អត្រាលំហូរនៃទន្លេ ឬល្បឿននៃទន្លេ ចរន្តទឹកសមុទ្រ ដោយធ្វើការវាស់វែងជាមួយនឹងគុណភាពបង្ហាញភីកសែល ៤ គីឡូម៉ែត្រការ៉េ និងមានភាពត្រឹមត្រូវជាមធ្យម ១.៤ សង់ទីម៉ែត្រ ដូច្នេះវាគឺជាផ្កាយរណបដំបូង និងតែមួយគត់ដែលមានសមត្ថភាពផ្តល់ព័ត៌មានបែបនេះលើដែនដី៕ ប្រភព៖ Thairath

ទីក្រុងប៊្រុចសែល៖ ក្រុងប៉េកាំង បានដាក់ចេញនូវគម្រោងដ៏ធំបំផុតមួយ «ខ្សែក្រវាត់មួយផ្លូវមួយ» ដោយសារចិនចង់តភ្ជាប់ ពីតំបន់អាស៊ីខាងលិច និង ពិភពអឺរ៉ុប ហើយឥឡូវនេះ សហភាព កំពុងតែសម្លឹងមើល អំពីគម្រោងរបស់ខ្លួន «ច្រកទ្វារពិភពលោក» ដើម្បីផ្លាស់ប្ដូរនូវគម្រោងគំនិតផ្ដួចផ្ដើមនេះ។

សារព័ត៌មាន The Eurasia Times បានចេញផ្សាយ កាលពីថ្ងៃចន្ទ ទី៩ ខែមករា ថា គំនិតផ្ដួចផ្ដើមខ្សែក្រវាត់មួយផ្លូវមួយ (BRI) ជាគម្រោងដ៏ធំបំផុតមួយរបស់ចិន ដោយសារក្រុងប៉េកាំង ចង់តភ្ជាប់ ពីប្រទេសចិន ទៅកាន់តំបន់អាស៊ីខាងលិច និង អឺរ៉ុប។ ចិន បានពង្រីកនូវការឃោសនា តាមប្រព័ន្ធផ្សព្វផ្សាយយ៉ាងច្រើន ដល់គំនិតផ្តួចផ្តើមនេះ ហើយថែមទាំងបានប្រកាស ថា ក្រុងប៉េកាំង នឹងចូលរួមផ្ដល់ចំណែកផ្នែកហិរញ្ញប្បទានដ៏សំខាន់ នៅក្នុងគម្រោងនេះ។

ក្រុងប៉េកាំង បានព្យាយាមបញ្ចុះបញ្ចូលប្រទេសនៅតំបន់អឺរ៉ាស៊ី និង អឺរ៉ុប ថា ប្រទេសទាំងនោះ នឹងទទួលបានអត្ថប្រយោជន៍យ៉ាងច្រើន អំពីគម្រោងនេះ។ ក្នុងន័យមួយ គឺក្រុងប៉េកាំង ចង់ធ្វើឲ្យផ្លូវសូត្របុរាណរស់ឡើងវិញ ដែលនៅតែជាផ្លូវពាណិជ្ជកម្មដ៏សំខាន់ រវាងតំបន់បូព៌ា និង តំបន់បស្ចិម នៅក្នុងពិភពបុរណ។

ទោះជាយ៉ាងណា បណ្តាប្រទេសនៅអឺរ៉ុប បានរក្សានូវភាពស្ងៀមស្ងាត់ មិនបង្ហាញប្រតិកម្មរបស់ពួកគេ ចំពោះគម្រោងនេះឡើយ។ ករណីនេះ ប្រហែលជាបណ្ដាប្រទេសទាំងនោះ នឹងរង់ចាំមើលផលប៉ះពាល់ អំពីគម្រោងដ៏ធំនេះ ហើយក៏ប្រហែលជាបណ្តាប្រទេសនៅអឺរ៉ុប កំពុងតែរង់ចាំបង្កើតនូវការឯកភាពគ្នា ហើយក៏មិនមានប្រតិកម្មជាលក្ខណៈបុគ្គលនោះដែរ។

នៅទីបំផុត សហភាពអឺរ៉ុប បានឈានដល់ការបង្កើតគម្រោង«ច្រកទ្វារពិភពលោក»។ បើគេនិយាយត្រឡប់ ទៅខែធ្នូ ឆ្នាំ២០២១ ប្រធានគណៈកម្មការអឺរ៉ុប លោកស្រី Ursula von der Leyen បានប្រកាស ដោយទំនុកចិត្ត នៅក្នុងការប្រមូលផ្តុំគ្នា នៅទីក្រុងប្រ៊ុចសែល ថា ការជំរុញលើហេដ្ឋារចនាសម្ព័ន្ធថ្មីរបស់សហភាពអឺរ៉ុប នឹងក្លាយជាជម្រើសដ៏ពិតប្រាកដមួយ ទប់ទល់នឹងគំនិតផ្តួចផ្តើមខ្សែក្រវាត់មួយផ្លូវមួយរបស់ចិន។

លោកស្រី ប្រធានគណៈកម្មការអឺរ៉ុប បានបញ្ជាក់ ថា «យើងអាចធ្វើបាន ហើយបណ្តាប្រទេសនានាជាច្រើន បានឆ្លងកាត់បទពិសោធន៍របស់ពួកគេ។ ចំណែកគម្រោងច្រកទ្វារពិភពលោក ដែលជាការចំណាយដ៏ធំផងដែរ ហើយគម្រោងនេះ នឹងប្រមូលប្រាក់ រហូតដល់៣១៨ពាន់លានដុល្លារ នៅក្នុងឆ្នាំ២០២៧ សម្រាប់គម្រោងហេដ្ឋារចនាសម្ព័ន្ធដ៏ទំនើប នៅខាងក្រៅសហភាពអឺរ៉ុប»។

ដោយឡែក គំនិតផ្ដួចផ្ដើមខ្សែក្រវាត់មួយផ្លូវមួយរបស់ក្រុងប៉េកាំង គឺជាគម្រោង មានទឹកប្រាក់ ប្រហែល១ពាន់ពាន់លានដុល្លារ ដើម្បីតភ្ជាប់ពីប្រទេសចិន ទៅកាន់ពិភពលោក ក្រោមការចោទប្រកាន់យ៉ាងខ្លាំង អំពី «ការដាក់អន្ទាក់បំណុលការទូត»។ ជំងឺរាតត្បាត បានកើតឡើង នៅក្នុងប្រទេសចិន និង រាតត្បាតនៅលើពិភពលោក ហើយកំពុងតែរាតត្បាតម្តងទៀត នៅតាមតំបន់មួយចំនួន នៃប្រទេសចិន បានបង្ខំឱ្យមានការផ្អាកការងារ លើគម្រោងនានា ទោះបីមានការប្រកាសឱ្យដំណើរការឡើងវិញ ខណៈដំណើរការសេដ្ឋកិច្ច វិលទៅរកភាពប្រក្រតី។

ផ្ទុយពីនេះ សហភាពអឺរ៉ុប និង សហរដ្ឋអាមេរិក កំពុងតែផ្តោតទៅលើច្រកទ្វារពិភពលោក នឹងផ្តល់នូវគំរូផ្សេងគ្នា ដោយផ្អែកលើបទដ្ឋានប្រជាធិបតេយ្យ តម្លាភាពនៃការផ្តល់មូលនិធិ និងគោលបំណង ប្រកបដោយនិរន្តរភាព។ ប៉ុន្ដែអស់រយៈពេលជាងមួយឆ្នាំបានកន្លងផុតទៅ ហើយ គម្រោងនេះនៅតែមិនឃើញមានសកម្មភាព នៅក្នុងកម្រិតផ្លូវការនៅឡើយ។ អ្នកសង្កេតការណ៍ មានការងឿងឆ្ងល់ ថាតើការប្រកាសដែលធ្វើឡើង ដោយលោកស្រី ប្រធាន នឹងក្លាយទៅជាការពិត ហើយថាតើសុបិនដ៏ធំ នៃការភ្ជាប់អឺរ៉ុប ជាមួយតំបន់បូព៌ា នឹងក្លាយជាការពិត ឬយ៉ាងណា? នៅទីក្រុងប្រ៊ុចសែល មានភាពច្របូកច្របល់យ៉ាងខ្លាំង នៅក្នុងចំណោមសមាជិកទាំងអស់។

សវនាការ នៅក្នុងសភាអឺរ៉ុប កាលពីខែមុន សមាជិកសភា បានទាមទារឱ្យបង្ហាញព័ត៌មានលម្អិត អំពីគម្រោងនោះ។ ចំពោះការងឿងឆ្ងល់របស់ពួកគេ ពួកគេបានប្រាប់ ថា គ្មានប្រាក់ ជាង៣០០ពាន់លានដុល្លារ នឹងកើតឡើងថ្មីនោះទេ។

លោក Vincent Grimaud នាយកស្តីទី នៃនាយកដ្ឋានរបស់គណៈកម្មការ សម្រាប់ភាពជាដៃគូអន្តរជាតិ បាននិយាយថា «Global Gateway» មិននាំមកនូវមធ្យោបាយហិរញ្ញវត្ថុថ្មីនោះទេ ព្រោះវាមិនមានប្រាក់បន្ថែម នៅពេលគម្រោងនេះ ឈានចូលមកដល់កម្រិតរបស់សហភាពអឺរ៉ុប។

ជប៉ុន កាលពីពេលថ្មីៗនេះ បានសន្យាផ្តល់ជំនួយ និង បណ្ដាក់ទុនវិនិយោគ មានទំហំទឹកប្រាក់ រហូតដល់៣០ពាន់លានដុល្លារអាមេរិក សម្រាប់ទ្វីបអាហ្វ្រិក ដើម្បីប្រឆាំងនឹងឥទ្ធិពលរបស់ចិន។ ប៉ុន្តែសហភាពអឺរ៉ុប ប្រៀបបីដូចជា កំពុងតែចាប់ផ្ដើម។

ការផ្ដួចផ្ដើមគំនិតខ្សែក្រវាត់មួយផ្លូវមួយរបស់ចិន គឺជាការបង្ហាញតែប្រទេសមួយ ខណៈគម្រោង«ច្រកទ្វារពិភពលោក»របស់អឺរ៉ុប បង្កើតឡើងដោយប្រទេសជាច្រើន ដោយមានគោលដៅទៅលើមនុស្ស នៅក្នុងតំបន់ ពាក់ព័ន្ធនឹងការប្រឆាំងនឹងចិន៕

ាណាដា លោក Justin Trudeau បានទៅចូលរួមក្នុងពិធីរំលឹកខួប៣ឆ្នាំ ករណីយន្តហោះដឹកអ្នកដំណើរអ៊ុយក្រែនត្រូវបានកងទ័ពអ៊ីរ៉ង់បាញ់ធ្លាក់ ។ ពិធីរំលឹកខួបនេះរៀបចំឡើងក្នុងបរិវេណកន្លែងអនុស្សាវរីយ៍នៅក្រុង Toronto របស់កាណាដា កាលពីថ្ងៃទី៨ ខែមករា ។ លោក Trudeau បានសន្យាជាមួយគ្រួសារអ្នកស្លាប់ថា រដ្ឋាភិបាលអ៊ីរ៉ង់ត្រូវទទួលខុសត្រូវរឿងនេះ ។

កាលពីថ្ងៃទី២៨ ខែធ្នូ ឆ្នាំ២០២២ ប្រទេសកាណាដា អង់គ្លេស ស៊ុយអែត និងអ៊ុយក្រែន ដែលជាប្រទេសមានពលរដ្ឋស្លាប់ក្នុងហេតុការណ៍ខាងលើ បានអំពាវនាវឱ្យអ៊ីរ៉ង់ធ្វើតាមការទាមទាររបស់ពួកគេ ដើម្បីដោះស្រាយជម្លោះ ទទួលខុសត្រូវ និងសងសំណងដល់គ្រួសារអ្នកស្លាប់ ។

គួរបញ្ជាក់ថា កាលពីថ្ងៃទី៨ ខែមករា ឆ្នាំ២០២០ កន្លងមក យន្តហោះដឹកអ្នកដំណើរ “Ukraine International Airlines” ជើងហោះហើរ PS-752 ត្រូវបានកងទ័ពអ៊ីរ៉ង់បាញ់ធ្លាក់នៅជិតទីក្រុង Tehran ប្រទេសអ៊ីរ៉ង់ ដែលធ្វើឱ្យអ្នកដំណើរស្លាប់ចំនួន១៧៦នាក់ ហើយអ៊ីរ៉ង់អះអាងថា បណ្តាលមកពីប្រព័ន្ធរ៉ាដាមានបញ្ហា ដែលឱ្យគេយល់ខុសថា យន្តហោះនោះជាគ្រឿងគ្រោះថ្នាក់ ៕

ប្រភព ៖ TNN World