សូមប្រុងប្រយ័ត្នល្បិចបោកប្រា.ស់តាមបច្ចេកវិទ្យា! កាលពីថ្ងៃទី១៦ ខែឧសភា ឆ្នាំ២០២៦ សមត្ថកិច្ចសិង្ហបុរីបានប្រកាសអាសន្ន និងបង្ហាញវីដេអូភស្តុតាងអំពីល្បិចបោ.កប្រាស់ដ៏ទំនើបមួយ ដោយជនខិលខូ.ចបានប្រើប្រាស់កម្មវិធី (Deepfake) បង្កើតរូបភាព និងធ្វើសំឡេងក្លែងក្លាយជានាយករដ្ឋមន្ត្រីសិង្ហបុរី លោក Lawrence Wong ចូលរួមកិច្ចប្រជុំក្នុងកម្មវិធី Zoom ហើយធ្វើឱ្យជនរងគ្រោះម្នាក់ផ្ទេរប្រាក់រហូតដល់៤,៩លានដុល្លារសិង្ហបុរី (ប្រហែល៣,៨លានដុល្លារអាមេរិក) ។ រដ្ឋាភិបាលសិង្ហបុរីបញ្ជាក់ថា មិនធ្លាប់ទាក់ទងទៅពលរដ្ឋដើម្បីសុំឱ្យផ្ទេរប្រាក់ តាមរយៈវីដេអូខលឡើយ ។

សមត្ថកិច្ចសិង្ហបុរីបានដាស់តឿនទៅកាន់ពលរដ្ឋបង្កើនការប្រុងប្រយ័ត្នកុំឱ្យចាញ់បោកជនខិលខូច បន្ទាប់ពីប្រើប្រាស់បច្ចេកវិទ្យាសិប្បនិម្មិត (AI) បង្កើតរូបភាព និងធ្វើសំឡេងក្លែងក្លាយជាលោកនាយករដ្ឋមន្ត្រី Lawrence អង្គុយប្រជុំអនឡាញក្នុងកម្មវិធី Zoom និងអញ្ជើញឱ្យជនរងគ្រោះឱ្យចូលរួមប្រជុំ បន្ទាប់មក ក៏ស្នើឱ្យជនរងគ្រោះផ្ទេរប្រាក់បន្ទាន់ដើម្បីដោះស្រាយស្ថានការណ៍អសន្តិសុខនៅច្រកសមុទ្រ Hormuz ។

មុនដំបូង ជនខិលខូចបានក្លែងបន្លំជាលេខាធិការគណៈរដ្ឋមន្ត្រីផ្ញើសារតាមកម្មវិធី WhatsApp ទៅជនរងគ្រោះ ហើយអញ្ជើញជនរងគ្រោះឱ្យចូលរួមប្រជុំបន្ទាន់ និងសម្ងាត់ជាមួយលោកនាយករដ្ឋមន្ត្រី Lawrence ក្នុងកម្មវិធី Zoom ដែលបង្កើតឡើងដោយកម្មវិធី Deepfake ។ ជនរងគ្រោះជឿតាមការបោកប្រាស់ដោយសារមើលឃើញថា កិច្ចប្រជុំនេះក៏មានថ្នាក់ដឹកនាំក្រៅប្រទេសមួយចំនួនចូលរួមផងដែរ ។

វីដេអូភស្តុតាងដែលបង្ហាញដោយសមត្ថកិច្ច គេបានឃើញកិច្ចប្រជុំនេះលើកឡើងពីស្ថានការណ៍នៅច្រកសមុទ្រ Hormuz ដោយមានការចូលរួមពីលោកនាយករដ្ឋមន្ត្រី Lawrence, ប្រធានាធិបតីសិង្ហបុរី លោក Tharman Shanmugaratnam, រដ្ឋមន្ត្រីក្រសួងហិរញ្ញវត្ថុ លោកស្រី Indranee Rajah ព្រមទាំងមន្ត្រីធនាគារកណ្តាលសិង្ហបុរី ។ ក្រៅពីនេះ ក៏មានរដ្ឋមន្ត្រីក្រសួងការបរទេសកាណាដា រួមទាំងមន្ត្រីសំខាន់ៗមកពីប្រទេសជាច្រើនទៀត ដើម្បីឱ្យជនរងគ្រោះជឿជាក់គឺជាកិច្ចប្រជុំអន្តរជាតិ ។

បើតាមសមត្ថកកិច្ច គឺជនរងគ្រោះចូលរួមប្រជុំក្នុងនាមជាតំណាងវិស័យឯកជន ហើយនាយករដ្ឋមន្ត្រីសិង្ហបុរីក្លែងក្លាយបាននិយាយសរុបស្ថានការណ៍ និងអរគុណជនរងគ្រោះដែលបានចូលរួមប្រជុំ បន្ទាប់មក ជនខិលខូចម្នាក់ទៀតក៏ក្លែងខ្លួនជាមេធាវីទាក់ទងទៅជនរងគ្រោះឱ្យផ្ទេរប្រាក់ ។

គួរបញ្ជាក់ថា ជនខិលខូលបានកំណត់គោលដៅបោកប្រាស់លើអ្នកជំនួញ ឬបុគ្គលធ្លាប់មានទំនាក់ជាមួយរដ្ឋាភិបាល ហើយវិធីបោកប្រាស់របស់ពួកគេធ្វើឱ្យជនរងគ្រោះឆាប់ជឿជាក់ ។ សមត្ថកិច្ចបានណែនាំពីវិធីសង្កេតវីដេអូបង្កើតដោយបច្ចេកវិទ្យា AI ដូចជា ៖ សំឡេងនិយាយមិនត្រូវគ្នាជាមួយមាត់មនុស្ស និងសង្កេតផ្ទៃខាងក្រោយវីដេអូមានភាពមិនច្បាស់លាស់ ខុសទម្រង់ធម្មតា ដោយសំណូមពរឱ្យពលរដ្ឋប្រុងប្រយ័ត្ន ជាពិសេស ការទាក់ទងតាមអនឡាញ និងវីដេអូខល ដោយសារកម្មវិធី Deepfake អាចបង្កើតវីដេអូដូចបេះបិទ និងពិបាកសង្កេត ។

នាយករដ្ឋមន្ត្រីសិង្ហបុរីបានចេញសេចក្តីប្រកាសព្រមានជាសាធារណៈអំពីសកម្មភាពរបស់ក្រុមឆបោក ថារដ្ឋាភិបាលសិង្ហបុរីមិនធ្លាប់ទាក់ទងទៅពលរដ្ឋដើម្បីសុំឱ្យផ្ទេរប្រាក់, ធ្វើការវិនិយោគ ឬសុំទិន្នន័យធនាគារផ្ទាល់ខ្លួនតាមរយៈវីដេអូខល ឬទូរស័ព្ទឡើយ ៕

សមត្ថកិច្ចខេត្តស្រះកែវមួយក្រុមមានគ្នា៤នាក់ សហការជាមួយជនស៊ីវិលម្នាក់ បានប្រើប្រាស់អំណាចតួនាទីហួសព្រំដែនទៅចាប់ខ្លួនជ.នជាតិចិនចំនួន៥នាក់ដាក់ខ្នោះដៃកាលពីថ្ងៃទី១៦ ខែឧសភា ឆ្នាំ២០២៦ បន្ទាប់មក ក៏នាំទៅបង្ខាំងទុកក្នុងផ្ទះមួយកន្លែងនៅស្រុកវាំងសាំប៊ូន ខេត្តស្រះកែវ ដើម្បីជំរិ.តទារប្រាក់ក្នុងម្នាក់១ម៉ឺនដុល្លារ ជាថ្នូនឹងការដោះលែងឱ្យមានសេរីភាព បន្ទាប់ពីចោទប្រកាន់ឆ្លងដែនចូលប្រទេសថៃខុសច្បាប់ ។ ពេលនេះ ជ.នជាតិចិនទាំង៥នាក់ទទួលបានការជួយសង្គ្រោះ រីឯក្រុមសមត្ថកិច្ចជាជនល្មើ.សត្រូវបានចាប់ខ្លួនរង់ចាំការដាក់ទោ.សតាមច្បាប់ ។

ជនល្មើសជាក្រុមសមត្ថកិច្ចបានបដិសេធមិនទទួលស្គាល់កំហុស ដែលហេតុការណ៍នេះធ្វើឱ្យផ្ទុះការរិះគន់យ៉ាងខ្លាំងពីសំណាក់មហាជន ពីព្រោះកន្លងមក ក៏មានករណីសមត្ថកិច្ចថៃចាប់ជំរិតទារប្រាក់ពីជនបរទេសជាច្រើនលើករួចមកហើយ ។ ស្នងការខេត្តស្រះកែវ ប្រកាសចាត់វិធានការសមត្ថកិច្ចមួយក្រុមនេះទៅតាមផ្លូវច្បាប់ដោយគ្មានការលើកលែង ដើម្បីកុំឱ្យក្លាយជាគំរូអាក្រក់សម្រាប់សមត្ថកិច្ចដទៃទៀត និងកុំឱ្យខូចឈ្មោះសមត្ថកិច្ចថៃ ។ នេះបើតាមការចុះផ្សាយរបស់សារព័ត៌មាន Thairath ។

ហេតុការណ៍ចាប់ខ្លួនជនជាតិចិន៥នាក់ បានកើតឡើងកាលពីថ្ងៃទី១៦ ខែឧសភា ហើយនាថ្ងៃបន្ទាប់ (ថ្ងៃទី១៧ ខែឧសភា) សមត្ថកិច្ចខេត្តស្រះកែវ សហការជាមួយមន្ត្រីស្ថាប័នពាក់ព័ន្ធ ចូលរំដោះជនជាតិចិនទាំង៥នាក់ ដែលត្រូវបានបង្ខាំងទុកក្នុងផ្ទះនៅឃុំវាំងម៉ៃ ស្រុកវាំងសាំប៊ូន បន្ទាប់មក សមត្ថកិច្ចក៏បានចាប់ខ្លួនសមត្ថកិច្ចដូចគ្នាចំនួន៤នាក់ ព្រមទាំងចាប់ជនស៊ីវិលម្នាក់ទៀត ។

មុនឈានដល់ការចូលរំដោះជនជាតិចិនទាំងនេះ គឺសមត្ថកិច្ចខេត្តស្រះកែវបានទទួលសារពីសមត្ថកិច្ចអន្តោប្រវេសន៍ខេត្តប៉ាធុមថានី ថាមានជនជាតិចិន៥នាក់ផ្ញើសារសុំការជួយសង្គ្រោះជាបន្ទាន់ ពីព្រោះពួកគេត្រូវបានសមត្ថកិច្ចខេត្តស្រះកែវចាប់ខ្លួនឃុំក្នុងផ្ទះ ដើម្បីជំរិតទារប្រាក់ជាថ្នូរនឹងការដោះលែង ។

ចំណែកក្រុមជនជាតិចិនរៀបរាប់ថា សមត្ថកិច្ចថៃទាំងនេះបានចាប់ខ្លួនពួកគេដាក់ខ្នោះដៃ គំរាមកំហែង និងទារប្រាក់ក្នុងម្នាក់ចំនួន១ម៉ឺនដុល្លារ បើមិនឱ្យប្រាក់ នឹងមិនរួចខ្លួនទេ ។ ពួកគេត្រូវចាប់ខ្លួនពីបទឆ្លងដែនចូលប្រទេសថៃខុសច្បាប់ ប៉ុន្តែសមត្ថកិច្ចមិនបញ្ជូនទៅសាកសួរតាមនីតិវិធីច្បាប់ បែរជានាំមកឃុំឃាំងទៅវិញ ។ មុនពេលទទួលបានការជួយសង្គ្រោះ ពួកគេ២នាក់ បានបង្ខំចិត្តផ្ទេរប្រាក់ទៅឱ្យក្រុមសមត្ថកិច្ចរួចហើយ គឺផ្ទេរប្រាក់ក្នុងម្នាក់អស់ចំនួន២ពាន់ដុល្លារ (សរុប៤ពាន់ដុល្លារ) ដោយមានទាំងភស្តុតាងការផ្ទេរ ។

គួរបញ្ជាក់ថា ក្រុមសមត្ថកិច្ចខិលខូចទាំងនេះមកពីអង្គភាពផ្សេងៗគ្នា ប៉ុន្តែសហការគ្នាជាមួយជនស៊ីវិលម្នាក់ទៀតដើម្បីធ្វើសកម្មភាពជាប្រព័ន្ធ ដោយរង់ចាំស្ទាក់ចាប់ក្រុមជនជាតិចិននៅចំណុចដាច់ស្រយាល និងចោទប្រកាន់ឆ្លងដែនចូលប្រទេសថៃតាមច្រកធម្មជាតិនៅខេត្តស្រះកែវ ។

បច្ចុប្បន្ន ជនល្មើសទាំង៥នាក់ (សមត្ថកិច្ច៤នាក់, ជនស៊ីវិលម្នាក់) ត្រូវបានរឹបអូសយកអាវុធ, គ្រាប់កាំភ្លើងមួយចំនួន និងរថយន្ត២គ្រឿង ព្រមទាំងត្រូវឃុំខ្លួនបណ្តោះអាសន្នរង់ចាំការកាត់ទោសពីបទឧក្រិដ្ឋកម្មធ្ងន់ធ្ងរ រួមមាន ៖ ការជំរិតទារប្រាក់ បង្ខំាំងមនុស្សខុសច្បាប់ និងប្រើប្រាស់អំណាចហួសព្រំដែន ៕

ចិនបានផ្អាកនាំចូល និងដាក់ក្រុមហ៊ុនកែច្នៃសាច់មាន់ និងជើងមាន់ថៃ ចំនួន១៧ក្រុមហ៊ុនចូលក្នុង «បញ្ជីខ្មៅ» ដោយសារក្រុមហ៊ុនមិនអនុវត្តតាមស្តង់ដារអនាម័យតឹងរ៉ឹងកំណត់ដោយចិន, លួ.ចនាំចូលសាច់មាន់ និងជើងមាន់ពីប្រទេសផ្សេងដែលចិនហាមឃាត់ (ប្រទេសផ្ទុះជំងឺផ្តាសាយបក្សី) រួចបន្លំជាអាហារថៃនាំចេញទៅចិន, ផលិតកម្មខុសប្រក្រតី និងប្រើប្រាស់ឯកសារ ឬអាជ្ញាប័ណ្ណនាំចេញមិនត្រឹមត្រូវ ដែលការដាក់ក្នុងបញ្ជីខ្មៅនេះធ្វើឱ្យថៃបាត់បង់ចំណូលជាង៣ម៉ឺនលានបាត (ជាង៩១៦លានដុល្លារ) ។ រដ្ឋបាលគយចិន (GACC) បានផ្ញើលិខិតព្រមានចំនួន៤លើក មកកាន់នាយកដ្ឋានបសុសត្វ និងក្រសួងកសិកម្មថៃ ឱ្យត្រួតពិនិត្យដោះស្រាយបញ្ហា ប៉ុន្តែថៃមិនចាប់អារម្មណ៍ និងព្រងើយកន្តើយចំពោះលិខិតព្រមាន ។

ប្រសិនបើថៃនៅតែគ្មានចំណាត់ការទេនោះ វានឹងប៉ះពាល់ដល់ទំនាក់ទំនងទ្វេភាគីរវាងប្រទេសទាំងពីរ និងប៉ះពាល់ការនាំចេញផលិតផលផ្សេងទៀត ដោយសារចិនបាត់បង់ទំនុកចិត្ត ហើយក្រុមហ៊ុនថៃនឹងត្រូវបង្ខំចិត្តបិទរោងចក្រ ឬកាត់បន្ថយទំហំប្រតិបត្តិការ បណ្តាលឱ្យកម្មករជាច្រើននាក់បាត់បង់ការងារ ។

កន្លងមក មានក្រុមហ៊ុនកែច្នៃសាច់មាន់ និងជើងមាន់ថៃ ចំនួន២២ក្រុមហ៊ុនទទួលបានការអនុញ្ញាតឱ្យនាំចេញទៅចិន ប៉ុន្តែបន្ទាប់ពីចិនប្រកាសដាក់ក្រុមហ៊ុនថៃចំនួន១៧ ក្នុងបញ្ជីខ្មៅ គឺពេលនេះ ថៃមានតែ៥ក្រុមហ៊ុនប៉ុណ្ណោះដែលអាចនាំចេញបាន ។ ចិនរកឃើញសកម្មភាពផលិតជាក់ស្តែងក្នុងរោងចក្ររបស់ក្រុមហ៊ុន មិនស្របនឹងទិន្នន័យចុះបញ្ជីផ្លូវការដែលចេញដោយនាយកដ្ឋានអភិវឌ្ឍន៍បសុសត្វ (DLD) របស់ថៃឡើយ ។ នេះបើតាមការចុះផ្សាយរបស់សារព័ត៌មាន Khaosod នៅថ្ងៃទី១៨ ខែឧសភា ឆ្នាំ២០២៦ ។

នៅថ្ងៃទី១៨ ខែឧសភា អតីតតំណាងរាស្ត្រគណបក្សភឿថៃ លោក Nikhom Boonwiset ឱ្យដឹងថា អាជ្ញាធរចិនបានដាក់ក្រុមហ៊ុនកែច្នៃសាច់មាន់ និងជើងមាន់ថៃ ចំនួន១៧ក្រុមហ៊ុនចូលក្នុង «បញ្ជីខ្មៅ» ក្រោយរកឃើញភាពខុសប្រក្រតីជាច្រើន រួមមាន ៖ មិនអនុវត្តតាមស្តង់ដារអនាម័យតឹងរ៉ឹងកំណត់ដោយចិន, លួ.ចនាំចូលសាច់មាន់ និងជើងមាន់ពីប្រទេសផ្សេងដែលចិនហាមឃាត់ (ដូចជាប្រទេសផ្ទុះជំងឺផ្តាសាយបក្សី) រួចបន្លំជាអាហារថៃនាំចេញទៅចិន, ផលិតកម្មខុសប្រក្រតី និងប្រើប្រាស់ឯកសារ ឬអាជ្ញាប័ណ្ណនាំចេញមិនត្រឹមត្រូវ ។

បើតាមលោក Nikhom ចិនមិនពេញចិត្តយ៉ាងខ្លាំង ដែលថៃលួចនាំចូលសាច់មាន់ និងជើងមាន់ពីប្រទេសផ្សេងដែលចិនហាមឃាត់ (គឺប្រទេសផ្ទុះជំងឺផ្តាសាយបក្សី) រួចហើយ បន្លំជាអាហារថៃនាំចេញទៅចិន ​។ ចិនក៏បញ្ជូនមន្ត្រីរបស់ខ្លួបនមកត្រួតពិនិត្យឃើញថា ចំនួនជើងមាន់ដែលថៃបញ្ជូនទៅនោះ គឺមានបរិមាណច្រើនជាងការផលិតជាក់ស្តែង ទើបចិនដាក់ក្រុមហ៊ុនកែច្នៃសាច់មាន់ និងជើងមាន់ថៃ ចំនួន១៧ក្រុមហ៊ុនក្នុងបញ្ជីខ្មៅតែម្តង ។

គួរបញ្ជាក់ថា រដ្ឋបាលគយចិន (GACC) និងសមាគមអ្នកនាំចេញមាន់សាច់របស់ថៃ មិនទាន់បានប្រកាសជាសាធារណៈនូវ «បញ្ជីឈ្មោះផ្លូវការ និងទីតាំងជាក់លាក់» របស់ក្រុមហ៊ុនទាំង១៧ ទេ ដើម្បីការពារផលប៉ះពាល់ផ្នែកអាជីវកម្ម និងកេរ្តិ៍ឈ្មោះរបស់ក្រុមហ៊ុនទាំងនេះ ។

បច្ចុប្បន្ន ចិនបានបង្កើនការត្រួតពិនិត្យស្តង់ដារអនាម័យ និងសុវត្ថិភាពចំណីអាហារយ៉ាងតឹងរ៉ឹងបំផុត ហើយក្រុមហ៊ុនថៃទាំង១៧ មិនបានកែសម្រួលសកម្មភាពផលិតកម្មឱ្យស្របតាមលិខិតព្រមានជាច្រើនលើករបស់ចិនឡើយ ។ ចិនបានអនុវត្តវិធានការច្បាប់ និងស្តង់ដារបច្ចេកទេសកាន់តែខ្ពស់ ដើម្បីចម្រាញ់យកតែក្រុមហ៊ុនណាដែលមិនលួចបន្លំ និងអាហារមានគុណភាពខ្ពស់ប៉ុណ្ណោះ ៕

ប្រជាជន​ម៉ាឡេស៊ី និង​សិង្ហ​បុរី​ បានបង្ហោះសារឌឺដងគ្នា ដោយប្រទេសទាំង២សុទ្ធតែអះអាង​ថា “ទុរេន​ជា​ផ្លែឈើតំណាង​ជាតិ​របស់ពួកគេរៀងៗខ្លួន”។

ពលរដ្ឋសិង្ហបុរី លើកឡើងថាទុរេនជាផ្លែឈើតំណាងជាតិរបស់គេតាំងពីយុរមកហើយ ខណៈម៉ាឡេសុីឆ្លើយតបថា ទុរេនជាង៩៥ភាគរយ នៅលើទីផ្សាររបស់សិង្ហបុរី សុទ្ធតែនាំចូល​​ពី​ចម្ការ​របស់​ម៉ាឡេស៊ី​នៅតំបន់ Johor និង Pahang។

ទុរេនម៉ាឡេស៊ី ត្រូវបានចាត់ទុកជាទុរេនលំដាប់ខ្ពស់បំផុត និងមានប្រជាប្រិយភាពខ្លាំងបំផុតក្នុងប្រទេសសិង្ហបុរី។ម៉ាឡេស៊ី គឺជាអ្នកផ្គត់ផ្គង់ដ៏សំខាន់សម្រាប់ទីផ្សារប្រទេសសិង្ហបុរី ដោយសារប្រទេសទាំងពីរមានរដូវទុរេនប្រហាក់ប្រហែលគ្នា។

គួរបញ្ជាក់ថា ក្រៅពីសិង្ហបុរី និងម៉ាឡេសុី ក៏មានឥណ្ឌូនេសុីផងដែរ ដែលអះអាងថាផ្លែទុរេនជាផ្លែឈើ​តំណាងជាតិ​របស់ពួកគេ៕

តាមពិតជាមនុស្សញៀ..នថ្នាំសោះ! អាជ្ញាធរថៃបានបង្ហាញលទ្ធផលនៃការធ្វើតេស្តទឹកនោមលើបុរសអ្នកបើកបររថភ្លើងដែលពាក់ព័ន្ធក្នុងគ្រោះថ្នាក់បុ.កគ្នាយ៉ាងរន្ធ.ត់រវាងរថភ្លើង និងរថយន្តក្រុង នៅទីក្រុងបាងកក កាលពីថ្ងៃទី១៦ ឧសភា ២០២៦ ដោយរកឃើញថាមានតេស្តវិជ្ជមានសារធាតុញៀ.ន។ នេះបើតាមការចុះផ្សាយរបស់កាសែត Khaosod។

យោងតាមរបាយការណ៍ស៊ើបអង្កេតរបស់ប៉ូលីស ក្រុងបាងកក នាថ្ងៃទី១៧ ខែឧសភា លទ្ធផលពិនិត្យទឹកនោមបឋមរបស់អ្នកបើកបររថភ្លើងវ័យ ៥៦ឆ្នាំ ដែលជាអ្នកបើកបររថភ្លើងដឹកទំនិញ បង្ហាញថាមាន សារធាតុញៀនខុសច្បាប់ (Narcotics) នៅក្នុងខ្លួន។ បច្ចុប្បន្នអ្នកបើកបររូបនេះ ត្រូវបានចោទប្រកាន់ពីបទធ្វេសប្រហែស បណ្តាលឱ្យមានមនុស្សស្លាប់ និងរបួស បន្ទាប់ពីគ្រោះថ្នាក់នេះ បានសម្លា.ប់មនុស្ស ៨នាក់ និងរបួស ៣២នាក់។

មិនមែនតែអ្នកបើករថភ្លើងឡើយ ក្រុមអ្នកស៊ើបអង្កេត ក៏កំពុងពិនិត្យមើល លើការបំពេញការងាររបស់បុគ្គលិកពាក់ព័ន្ធទាំងអស់ រួមមាន បុគ្គលិកផ្លូវដែក និងអ្នកបើកបររថយន្តក្រុង ដើម្បីរកឲ្យឃើញថា ពួកគេមានកំហុសអ្វីខ្លះ ដែលឈានដល់ការកើតមាន សោកនាដកម្មបែបនេះ។

សូមជម្រាបថា ហេតុការណ៍ដ៏រន្ធត់នេះបានកើតឡើងនៅ ចំណុចផ្លូវបំបែកកាត់ផ្លូវរថភ្លើង លើផ្លូវ Asok-Din Daeng ក្បែរស្ថានីយ៍រថភ្លើង Makkasan (Airport Rail Link) ស្ថិតក្នុងខណ្ឌ Ratchathewi កណ្តាល ទីក្រុងបាងកក ប្រទេសថៃ។ ការប៉ះទង្គិចគ្នានេះបានកើតឡើងក្នុងអំឡុងពេលចរាចរណ៍កកស្ទះនៅពេលរសៀល ជាកន្លែងដែលយានយន្តត្រូវបានគេរាយការណ៍ថាបានឈប់ចតនៅជិតរបាំងឆ្លងកាត់ផ្លូវរថភ្លើង។ សាក្សីបានពិពណ៌នាអំពីការឮសំឡេងផ្ទុះយ៉ាងខ្លាំង និងឃើញអណ្តាតភ្លើងឆាបឆេះឡានក្រុងក្នុងរយៈពេលប៉ុន្មានវិនាទីបន្ទាប់ពីការប៉ះទង្គិច។

សោកនាដកម្មនេះបានបញ្ឆេះកំហឹងសាធារណៈជនឡើងវិញលើសុវត្ថិភាពឆ្លងកាត់ផ្លូវដែកនៅក្នុងប្រទេសថៃ ជាកន្លែងដែលស្ថានភាពចរាចរណ៍ដ៏គ្រោះថ្នាក់ និងការអនុវត្តច្បាប់ខ្សោយត្រូវបានរិះគន់ជាយូរមកហើយ។ ខណៈពេលដែលការស៊ើបអង្កេតនៅតែបន្ត ការលាតត្រដាងដ៏គួរឱ្យភ្ញាក់ផ្អើលអំពីការធ្វើតេស្តគ្រឿងញៀ.នវិជ្ជមានរបស់អ្នកបើកបរបានក្លាយជាចំណុចកណ្តាលនៃការយកចិត្តទុកដាក់ជាតិ ដោយវាបានបង្កើនសំណួរជាច្រើនអំពីស្តង់ដារសុវត្ថិភាពផ្លូវដែក និងការទទួលខុសត្រូវរបស់មន្ត្រីដឹកជញ្ជូន៕

ពលរដ្ឋរស់នៅ និងធ្វើការក្នុងអគារខ្ពស់ៗនៅតំបន់ពាណិជ្ជកម្មទីក្រុងបាងកក ប្រទេសថៃ បានទទួលកម្លាំងរំញ័រពីគ្រោះរញ្ជួយដីនៅប្រទេសមីយ៉ាន់ម៉ា នាព្រឹកថ្ងៃចន្ទ ទី១៨ ខែឧសភា ឆ្នាំ២០២៦ មនុស្សភាគច្រើនមានអារម្មណ៍វិលមុខ ញ័រខ្លួន ទើបអាជ្ញាធរប្រញាប់ជម្លៀសចេញពីអគារភ្លាមៗដើម្បីសុវត្ថិភាព ។ បើតាមអាជ្ញាធរថៃ ចំណុចកណ្តាលនៃគ្រោះរញ្ជួយដីបានកើតឡើងនៅក្បែរទីក្រុងយាំងហ្គន ដែលនៅឆ្ងាយពីទីក្រុងបាងកក ប៉ុន្តែដោយសារទីក្រុងបាងកកមានស្រទាប់ដីទន់ជ្រាយ ទើបងាយទទួលរងកម្លាំងរំញ័រខ្លាំង និងពង្រីករលករញ្ជួយដីឱ្យកាន់តែខ្លាំងទៅកាន់អគារខ្ពស់ ។

គ្រោះរញ្ជួយដីកម្រិត៥.៣រិចទ័រ មានជម្រៅរហូតដល់៣៥គីឡូម៉ែត្រ បានកើតឡើងនៅភាគខាងត្បូងប្រទេសមីយ៉ាន់ម៉ា ក្បែរទីក្រុងយាំងហ្គន នាព្រឹកថ្ងៃចន្ទ ទី១៨ ខែឧសភា ដែលបណ្តាលឱ្យតំបន់ជាច្រើនរបស់មីយ៉ាន់ម៉ាមានកម្លាំងរំញ័រយ៉ាងខ្លាំង ហើយអ្នកនៅលើអគារខ្ពស់ៗក្នុងទីក្រុងបាងកក ប្រទេសថៃ ក៏ទទួលបានកម្លាំងរំញ័រដែរ ។ នេះបើតាមការចុះផ្សាយរបស់សារព័ត៌មាន Khaosod ។

តាមសេចក្តីរាយការណ៍របស់មជ្ឈមណ្ឌលរញ្ជួយដីអឺរ៉ុប និងមេឌីទែរ៉ាណេ (European-Mediterranean Seismological Centre: EMSC) គឺគ្រោះរញ្ជួយដីនេះបានកើតឡើងកាលពីវេលាម៉ោង៨ និង៥នាទីព្រឹក ថ្ងៃទី១៨ ខែឧសភា មានម្រៅជ្រៅរហូតដល់៣៥គីឡូម៉ែត្រ ដែលចាត់ទុកជាគ្រោះរញ្ជួយដីកម្រិតមធ្យម ប៉ុន្តែជម្រៅរបស់វានឹងប្រែប្រួលបន្តបន្ទាប់ទៀត ។

ពលរដ្ឋរស់នៅទីក្រុងយាំងហ្គន ដែលជាមជ្ឈមណ្ឌលពាណិជ្ជកម្មដ៏សំខាន់របស់ប្រទេសមីយ៉ាន់ម៉ា ទទួលបានកម្លាំងរំញ័រយ៉ាងខ្លាំងពីគ្រោះរញ្ជួយដី ប៉ុន្តែមិនទាន់មានសេចក្តីរាយការណ៍លម្អិតអំពីការខូចខាតធ្ងន់ធ្ងរ ឬគ្រោះថ្នាក់ដល់ជីវិតមនុស្សនៅឡើយទេ ។

ចំណែកអ្នកនៅលើអគារខ្ពស់ៗនៅទីក្រុងបាងកក មានអារម្មណ៍ញ័រ អំពូលភ្លើងរង្គើ ជាពិសេស អ្នករស់នៅ និងធ្វើការលើអគារខ្ពស់ៗក្នុងតំបន់ដនមឿង, ផាយ៉ាថៃ, បារ៉ាក់, ហួងក្វាង, ប៉ាធុមប៉ាន់, ឃ្លងតើយ និងចាក់តុចាក់ ដែលធ្វើឱ្យមនុស្សម្នាប្រញាប់ជម្លៀសចេញពីអគារភ្លាមដើម្បីសុវត្ថិភាព ។

ពលរដ្ឋថៃបានតំបន់ផ្សេងៗបាននិយាយដូចៗគ្នាពីកម្លាំងរំញ័រដោយសារគ្រោះរញ្ជួយដីនៅមីយ៉ាន់ម៉ា ដូចជា ៖ អ្នកនៅអគារខ្ពស់នៅតំបន់ជាច្រើនក្នុងទីក្រុងបាងកក មានអារម្មណ៍ញ័ររហូតដល់២លើក ជាពិសេស អគារការិយាល័យប្រឆាំងការលាងលុយកខ្វក់ មានកម្លាំងរំញ័រខ្លាំងជាងគេ ខណៈអ្នកនៅលើអគារខ្ពស់នៅខេត្តឈៀងម៉ៃ ក៏ទទួលអារម្មណ៍រំញ័រដែរនៅព្រឹកនេះ ។

ហេតុការណ៍នេះធ្វើឱ្យពលរដ្ឋក្រុងបាងកកបារម្ភជាថ្មី ដោយសារទីក្រុងបាងកកធ្លាប់មានប្រវត្តិសោកនាដកម្មបាក់រលំអគារយ៉ាងធ្ងន់ធ្ងរកាលពីខែមីនា ឆ្នាំ២០២៥ បន្ទាប់ពីកើតគ្រោះរញ្ជួយដីនៅប្រទេសមីយ៉ាន់ម៉ា ដោយបានបំផ្លាញអគារកម្ពស់៣០ជាន់នៅតំបន់ចាក់តុចាក់ ឱ្យបាក់រលំទាំងស្រុងបណ្តាលឱ្យមនុស្សស្លាប់ និងរងរបួសជាច្រើននាក់ នាពេលនោះ ៕

ផ្ទុះការពិភាក្សាពេញអិនធើណេត! វីដេអូខ្លីមួយរបស់ប្រធានាធិបតីអាមេរិក Donald Trump ដែលហាក់ដូចជាកំពុងទទួលទានស្រាពីកែវក្នុងអំឡុងពេលពិធីជប់លៀងជាមួយប្រធានាធិបតីចិន លោក Xi Jinping បានរីករាលដាលពាសពេញអ៊ីនធឺណិត ដោយលើកឡើងនូវសំណួរដ៏គួរឱ្យភ្ញាក់ផ្អើលមួយថា តើលោក Trump សុខចិត្តបំពានច្បាប់ «មិនទទួលទានគ្រឿងស្រវឹង» ពេញមួយជីវិតរបស់ខ្លួនដើម្បីផ្ដល់កិត្តិយសឲ្យចិនមែនទេ?

យោងតាមវីដេអូដែលកំពុងមានការជជែកដេញដោលយ៉ាងខ្លាំងនៅលើបណ្តាញសង្គម លោក ដូណាល់ត្រាំ ត្រូវបានគេប្រទះឃើញថាបានលើកកែវស្រា (ដែលមើលទៅដូចជាស្រាសំប៉ាញ) ដើម្បីធ្វើពិធីជល់កែវជូនពរ ទៅតាមទំនៀមទម្លាប់ការទូតជាមួយលោក ស៊ី ជិនពីង នៅក្នុងសាលមហោស្រពប្រជាជន។ សកម្មភាពដែលបង្កឱ្យមានការភ្ញាក់ផ្អើលបំផុត និងជាចំណុចស្នូលនៃការវែកញែក គឺលោក ត្រាំ បានលើកកែវនោះមកអឹបនឹងមាត់ ហាក់ដូចជាលោកបានក្រេបស្រានោះបន្តិច។ សកម្មភាពនេះធ្វើឱ្យអ្នកទស្សនាវីដេអូជាច្រើនគិតថា លោកបានលេបភេសជ្ជៈនោះ បើទោះបីជាមិនមានការបញ្ជាក់ច្បាស់ថាលោកបានលេបវា ឬគ្រាន់តែធ្វើជាកាយវិការតាមពិធីការក៏ដោយ។

សូមជម្រាបថា អស់រយៈពេលជាច្រើនទសវត្សរ៍មកហើយ លោក Trump បានអះអាងជាសាធារណៈថា លោកមិនដែលផឹកស្រាទេ ដោយតែងតែពន្យល់ថាការសម្រេចចិត្តនេះត្រូវបានជះឥទ្ធិពលដោយការស្លា.ប់របស់បងប្រុសរបស់គាត់ គឺលោក Fred Trump Jr. ដែលបានបោះបង់ខ្លួនឯងចោលដោយតែការញៀនស្រា។ មុនពេលលាចាកលោក លោក Fred តែងតែដាស់តឿនលោក ត្រាំ ម្តងហើយម្តងទៀតថា៖ «កុំប៉ះពាល់គ្រឿងស្រវឹងឱ្យសោះ»។

ដោយសារតែប្រវត្តិនោះហើយ ក្រោយមកសូម្បីតែការទទួលទានតិចតួចបំផុតក្នុងអំឡុងពេលអាហារពេលល្ងាចការទូតក៏បានក្លាយជាព័ត៌មានសំខាន់ភ្លាមៗ។ អ្នកប្រើប្រាស់អ៊ីនធឺណិតមួយចំនួនបានពិពណ៌នាអំពីពេលវេលានេះថាជាកាយវិការនិមិត្តរូបនៃការគោរពចំពោះលោក Xi និងប្រពៃណីចិន ដែលការអបអរសាទរជាផ្លូវការត្រូវបានចាត់ទុកថាសំខាន់ក្នុងអំឡុងពេលព្រឹត្តិការណ៍រដ្ឋ។

ទោះជាយ៉ាងណាក៏ដោយ នៅតែមិនទាន់មានភស្តុតាងណាមួយដែលបង្ហាញថាភេសជ្ជៈដែលលោក ត្រាំ បានក្រេបនោះពិតជាមានជាតិអាល់កុលមែនឬអត់ទេ។ អតីតទីប្រឹក្សាលោក Trump លោក Bruce LeVell បានឆ្លើយតបយ៉ាងរហ័សតាមអ៊ីនធឺណិត ដោយនិយាយថាភេសជ្ជៈនេះ “មិនមែនជាគ្រឿងស្រវឹង” ហើយទទូចថាលោក Trump នៅតែមិនផឹក។ ជាមួយគ្នានេះ ខាងសេតវិមានក៏នៅមិនទាន់បានចេញសេចក្តីថ្លែងការណ៍ជាផ្លូវការណាមួយដែលបញ្ជាក់ពីអ្វីដែលនៅក្នុងកែវនោះដែរ។

សរុបសេចក្តីមក ទោះបីជាវីដេអូដែលកំពុងត្រូវបានផ្សព្វផ្សាយនោះមើលទៅដូចជាលោកកំពុងក្រេបស្រាក៏ដោយ ក៏ភស្តុតាង និងការបកស្រាយពីមន្ត្រីជុំវិញខ្លួនបង្ហាញថា វាគ្រាន់តែជាកាយវិការការទូត ដោយប្រើប្រាស់ភេសជ្ជៈគ្មានជាតិអាកុលតែប៉ុណ្ណោះ៕