បរទេស៖ អ្នកដំណើររាប់សិបនាក់ត្រូវខកជើងហោះហើរ ក្រោយយន្តហើយមួយគ្រឿងធ្វើដំណើរហោះឡើង ដោយមិនដឹងខ្លួនថាបានភ្លេចភ្ញៀវនៅខាងក្រោមចំនួន៥៥នាក់។

កាលពីពេលថ្មីកន្លងទៅនេះ មានសេចក្ដីរាយការណ៍មួយបានឱ្យដឹងថា អ្នកដំណើរចំនួន ៥០ នាក់ដែលត្រៀមខ្លួនធ្វើដំណើរហោះហើរតាមក្រុមហ៊ុនអាកាសចរដែលមានឈ្មោះថា Go First Airways នៅក្នុងទីក្រុងBengaluru ក្នុងប្រទេសឥណ្ឌា ក្នុងគោលដៅធ្វើដំណើរឆ្ពោះទៅក្រុង Delhi។

ប៉ុន្តែរឿងដ៏ហួសចិត្តក៏បានកើតឡើង នៅពេលដែលជើងហោះហើរ G8 116 បានហោះចេញពីអាកាសយានដ្ឋាន នៅម៉ោង ៦.៣០ នាទីព្រឹក ដោយបានភ្លេចអ្នកដំណើរប្រហែល ៥៥ នាក់ត្រូវបានទុកចោលរហូតត្រូវបានខកខានជើងហោះហើរ។

ជាមួយគ្នានោះអ្នកដំណើរត្រូវបានគេរាយការណ៍ថាបានធ្វើការហោះហើរចាកចេញនៅបួនម៉ោងបន្ទាប់ពីខកខាន នៅម៉ោងប្រហែល ១០ ព្រឹក។

ទោះជាយ៉ាងណាបន្ទាប់ពីបញ្ហានេះបានកើតឡើងនិយតករអាកាសចរណ៍ បានផ្ញើការជូនដំណឹងទៅក្រុមហ៊ុនអាកាសចរណ៍សម្រាប់ “កំហុសមួយនេះ” ។

ក្នុងនោះ Go First ក៏បានធ្វើការសុំទោសចំពោះអ្វីដែលហៅថា “ការត្រួតពិនិត្យមិនបានត្រឹមត្រូវដោយអចេតនា” និងផ្តល់នូវការប៉ះបូវ ជូនអ្នកដំណើរដែលរងផលប៉ះពាល់ដោយការផ្ដល់សំបុត្រធ្វើដំណើរដោយឥតគិតថ្លៃម្នាក់មួយសន្លឹកដើម្បីធ្វើដំណើរគ្រប់ទីកន្លែងនៅក្នុងប្រទេសឥណ្ឌាក្នុងឆ្នាំបន្ទាប់។

បន្ថែមពីនោះសេចក្តីថ្លែងការណ៍បាននិយាយថា នាវិកដែលពាក់ព័ន្ធក្នុងឧប្បត្តិហេតុនេះ ក៏ត្រូវបានដកចេញពីការងារផងដែរ៕ ប្រភព៖ NDTV

អាមេរិក ៖ កាលពីថ្ងៃទី១២ ខែមករា AFP រាយការណ៍ថា មន្ត្រីអាមេរិកបានប្រកាសបញ្ជូនកងម៉ារីនឆ្នេរសមុទ្រទៅប្រចាំនៅប្រទេសជប៉ុន ដើម្បីទប់ទល់នឹងការគំរាមកំហែងពីប្រទេសចិន ដែលកំពុងរីករាលដាលទូទាំងតំបន់អាស៊ី ។

រដ្ឋមន្ត្រីក្រសួងការពារជាតិអាមេរិក លោក ឡយ អូស្ទីន និងលោក Anthony Blinken រដ្ឋមន្ត្រីក្រសួងការបរទេសអាមេរិក បានពិភាក្សាគ្នានៅទីក្រុងវ៉ាស៊ីនតោនជាមួយលោក Hamada Yasudasu រដ្ឋមន្ត្រីការពារជាតិជប៉ុន និងលោក Hayashi Yoshimasa រដ្ឋមន្ត្រីការបរទេសជប៉ុន ។ ភាគីទាំងពីរបានចេញសេចក្តីថ្លែងការណ៍រួមគ្នាថា នឹងពង្រឹងសមត្ថភាពផ្នែកកងទ័ពរបស់ប្រទេសទាំងពីរឱ្យកាន់តែទំនើប ដើម្បីទប់ទល់នឹងការគំរាមកំហែងកាន់តែខ្លាំងឡើងរបស់ចិន ។

កងម៉ារីនឆ្នេរសមុទ្រនឹងចូលទៅប្រចាំការនៅខេត្តអូគីណាវ៉ារបស់ប្រទេសជប៉ុនក្នុងឆ្នាំ២០២៥ ជំនួសកងវរសេនាតូចកាំភ្លើងធំ ខណៈកងម៉ារីនឆ្នេរសមុទ្រអាចប្រតិបត្តិតួនាទីទាំងផ្នែកជម្លោះនិងដែនអាកាស ស្របពេលប្រទេសចិនកំពុងអភិវឌ្ឍន៍ផ្កាយរណបយ៉ាងឆាប់រហ័សនាប៉ុន្មានឆ្នាំចុងក្រោយនេះ ។

អាមេរិក និងជប៉ុននិយាយថា ការវាយប្រហារផ្នែកអាកាសចាត់ទុកជាការប្រឈមចំពោះសន្តិសុខជាតិនៃប្រទេសសម្ព័ន្ធមិត្តទាំងពីរ ។ យោងតាមមាត្រា ៥ នៃសន្ធិសញ្ញាសន្តិសុខអាមេរិក-ជប៉ុនបញ្ជាក់ថា ការវាយប្រហារប្រទេសណាមួយ មិនថាវាយប្រហារជប៉ុន ឬអាមេរិក គឺចាត់ទុកជាការវាយប្រហារទាំងពីរប្រទេស ។

ជាមួយគ្នានេះ ក្នុងកិច្ចប្រជុំក្រុមប្រទេសឧស្សាហកម្មឈានមុខគេលើពិភពលោក (G7) រួមមាន ប្រទេសកាណាដា បារាំង អាល្លឺម៉ង់ អ៊ីតាលី ជប៉ុន និងអង់គ្លេស លោកនាយករដ្ឋមន្ត្រីជប៉ុន Fumio Kishida បានពិភាក្សាគ្នាពីការជំរុញទំនាក់ទំនងផ្នែកកងទ័ពរបស់ប្រទេសសម្ព័ន្ធមិត្តទាំងអស់ផងដែរ ៕ប្រភព ៖ Khaosod

បរទេស៖ បើតាមរដ្ឋាភិបាលម៉ាឡេស៊ី បានឱ្យដឹងថាប្រទេសខ្លួនអាចនឹងបញ្ឈប់ការនាំចេញប្រេងដូងទៅកាន់សហភាពអឺរ៉ុបទាំងស្រុង ដើម្បីប្រឆាំងនឹងច្បាប់ថ្មីរបស់សហភាពអឺរ៉ុប ដែលនឹងអនុម័តច្បាប់មិននាំចូលផលិតផល “ពាក់ព័ន្ធការកាប់បំផ្លាញព្រៃឈើ។

កាលពីថ្ងៃទី ១២ ខែមករា ឆ្នាំ២០២៣ មានសេចក្ដីរាយការពីសារព័ត៌មាន រ៉យទ័រ បានឱ្យដឹងថាប្រទេសម៉ាឡេស៊ី និងឥណ្ឌូនេស៊ី បាន គំរាមបញ្ឈប់ការនាំចេញប្រេងដូងទៅកាន់សហភាពអឺរ៉ុប ឬ EU បន្ទាប់ពីមានការមិនពេញចិត្តនឹងច្បាប់ថ្មីរបស់សហភាពអឺរ៉ុប ក្នុងការបញ្ឈប់ការនាំចូលទំនិញ និងផលិតផលដែលសហភាពអឺរ៉ុបចាត់ទុកថាជាការកាប់បំផ្លាញព្រៃឈើ។

ស្ថានភាពនេះកើតឡើងចំពេលមានភាពចម្រូងចម្រាសពីអ្នក បរិស្ថានដែលបានស្តីបន្ទោសឧស្សាហ កម្មប្រេងដូងជាមូលហេតុចម្បងនៃការកាប់បំផ្លាញព្រៃឈើនៅអាស៊ីអាគ្នេយ៍ ទោះបីជាម៉ាឡេស៊ី និងឥណ្ឌូនេស៊ីមានការត្រួតពិនិត្យ និងវិញ្ញាបនបត្រសម្រាប់អ្នកនាំចេញក៏ដោយ។

បញ្ហានេះលោក ហ្វែត ឌីលាស់ យូសូវ (Fadillah Yusof) រដ្ឋមន្ត្រីក្រសួងកសិកម្ម និងផលិតផលកសិកម្មម៉ាឡេស៊ី  បាននិយាយថា មន្ត្រីម៉ាឡេស៊ី និងឥណ្ឌូនេស៊ី នឹងពិភាក្សាអំពីបញ្ហានៃបទប្បញ្ញត្តិថ្មីពីសហភាពអឺរ៉ុប  ដែលមិនទទួលយកផលិតផលដែលគេមើលឃើញថាបំផ្លាញព្រៃឈើ លុះត្រាតែប្រទេសនាំចេញអាចបញ្ជាក់ការចោទប្រកាន់របស់សហភាពអឺរ៉ុបមិនពិត។

ក្នុងនោះរបាយការណ៍ក៏បានបញ្ជាក់ផងដែរថា សហភាពអឺរ៉ុបក៏ស្ថិតក្នុងចំណោមប្រទេសដែលបាននាំចូលប្រេងដូងកំពូលរបស់ពិភពលោកផងដែរ មុនពេលដែលច្បាប់ថ្មីរបស់សហភាពអឺរ៉ុបបានអនុម័តច្បាប់នេះឡើងកាលពីខែធ្នូ ឆ្នាំ ២០២២ កន្លងទៅ រហូតបានបង្កើតឱ្យមានការមិនពេញចិត្តក្នុងចំណោមប្រទេសនាំចេញប្រេងដូងធំជាងគេលើពិភពលោក រួមទាំងម៉ាឡេស៊ី និងឥណ្ឌូនេស៊ីផងដែរ។

ទោះជាយ៉ាងណាអាជ្ញាធរម៉ាឡេស៊ី និងឥណ្ឌូណេស៊ី ធ្លាប់បាននាំពាក្យបណ្ដឹងទៅកាន់អង្គការពាណិជ្ជកម្មពិភពលោក ដោយនិយាយថា ច្បាប់ថ្មីរបស់សហភាពអឺរ៉ុបគឺជាការរើសអើង និងបង្កើតរបាំងពាណិជ្ជកម្មដ៏ធំមួយ។

គួរបញ្ជាក់ផងថាតម្រូវការប្រេងដូងរបស់សហភាពអឺរ៉ុប ត្រូវបានគេរំពឹងថានឹងថយចុះក្នុងរយៈពេល ១០ឆ្នាំខាងមុខ ដោយសារផែនការអភិវឌ្ឍន៍ថាមពលសកលរបស់សហភាពអឺរ៉ុបដែលមានគោលបំណងកាត់បន្ថយការពឹងផ្អែកលើឥន្ធនៈដែលមកពីប្រេងដូង (ដូចជា ចំហេះ) ត្រឹមឆ្នាំ ២០៣០ ដោយសារវាទាក់ទងនឹងការកាប់បំផ្លាញព្រៃឈើ៕ ប្រភព៖ Khaosod

តំណាង កម្មវិធីអភិវឌ្ឍន៍សហប្រជាជាតិ (UNDP) ប្រចាំនៅវៀតណាម លោកស្រី រ៉ាមឡា អាល់ ខាលីឌី (Ramla Al Khalidi) បាននិយាយថា UNDP ត្រៀមខ្លួនរួចជាស្រេចដើម្បីគាំទ្ររដ្ឋាភិបាលវៀតណាម ក្នុងការរៀបចំលម្អិត និងការអនុវត្តផែនការគៀងគរធនធាននៃភាពជាដៃគូផ្លាស់ប្តូរថាមពល ដោយយុត្តិធម៌ (JETP) ក្នុងឆ្នាំ ២០២៣។

លោកស្រី ខាលីឌី (Khalidi ) បាននិយាយ តាមរយៈសេចក្តីថ្លែងការណ៍មួយថា “នេះរួមបញ្ចូលទាំងសេវាជំនួយបច្ចេកទេស ដែលបានបង្ហាញឱ្យឃើញរបស់យើង ដល់រដ្ឋាភិបាលក្នុងគម្រោងផ្លាស់ប្តូរបៃតង / NAMA ដែលអាចជួយវៀតណាមកាត់បន្ថយហានិភ័យ ក្នុងការលើកកម្ពស់ និងពង្រីកការវិនិយោគរបស់វិស័យឯកជននៅក្នុងផែនការប្រមូលធនធាន JETP” នេះជាអ្វីដែលមានក្នុងកិច្ចសម្ភាសន៍ ជាមួយទីភ្នាក់ងារសារព័ត៌មានវៀតណាម។

យោងតាមអ្នកតំណាងរបស់ UNDP រូបនេះដដែល កម្មវិធីអភិវឌ្ឍន៍សហប្រជាជាតិ កំពុងចាប់ផ្តើមការវាយតម្លៃលើផលប៉ះពាល់នៃការផ្លាស់ប្តូរថាមពលធ្យូងថ្ម និងការផ្លាស់ប្តូរថាមពលនៅក្នុងប្រទេសវៀតណាម ហើយកំណត់នូវអ្វីដែលដំណើរការទាំងនេះមានន័យ ជាពិសេស សម្រាប់ប្រទេសវៀតណាម៕

អន្តរជាតិ៖ រដ្ឋមន្ត្រីការបរទេសចិន លោក ឈិន យ៉េង (Qin Gang) ក្នុងដំណើរទស្សនកិច្ចផ្លូវការលើកដំបូងរបស់លោកចាប់តាំងពីទទួលបានការតែងតាំងកាលពីខែមុនបានច្រានចោលការចោទប្រកាន់ថា ប្រាក់ដែលប្រទេសលោកបានផ្តល់កម្ចីទៅឱ្យទ្វីបអាហ្រ្វិក គឺជា «អន្ទាក់បំណុល»។ នេះបើយោងតាមទីភ្នាក់ងារព័ត៌មាន ប្លុំប៊រ (Bloomberg) ។

ការអត្ថាធិប្បាយរបស់លោក Qin គឺជាការឆ្លើយតបទៅនឹងសេចក្តីថ្លែងការណ៍ដែលមន្ត្រីសហរដ្ឋអាមេរិកបានធ្វើម្តងហើយម្តងទៀតដែលរិះគន់ថា ការផ្តល់កម្ចីរបស់ចិននិងក្រុមហ៊ុនរបស់ចិនទៅកាន់ប្រទេសនៅទ្វីបអាហ្វ្រិកខ្វះតម្លាភាព។ រដ្ឋមន្ត្រីក្រសួងរតនាគារសហរដ្ឋអាមេរិកគឺលោក ចេនីត យេលលេន (Janet Yellen) បាននិយាយថា ប្រទេសចិនគឺជាឧបសគ្គដ៏ធំបំផុតចំពោះវឌ្ឍនភាពក្នុងការដោះស្រាយវិបត្តិបំណុល។

តាមរយៈអ្នកបកប្រែនៅក្នុងសុន្ទរកថាមួយដែលថ្លែងនៅក្នុងប្រទេសអេត្យូពីកាលពីថ្ងៃពុធ លោក Qin បានថ្លែងថា៖ «ការចូលរួមចំណែករបស់ប្រទេសចិនគឺជាក់ស្តែងធ្វើឱ្យជីវិតរបស់ប្រជាជនអាហ្រ្វិកកាន់តែប្រសើរឡើង។ យើងមិនទទួលយកការចោទប្រកាន់មិនសមហេតុផលថាជាអន្ទាក់បំណុលនោះទេ»។

ទីភ្នាក់ងារព័ត៌មាន Bloomberg បានរាយការណ៍ដោយដកស្រង់ទិន្នន័យរបស់វិទ្យាស្ថាន ឆាតដឹម ហោស (Chatham House) ដែលជាវិទ្យាស្ថានគោលនយោបាយកិច្ចការអន្តរជាតិដែលមានមូលដ្ឋាននៅទីក្រុងឡុងដ៍ថា ប្រទេសចិនមានចំណែកប្រហែល ១២% នៃបំណុលបរទេសរបស់ទ្វីបអាហ្រ្វិកពោលគឺប្រហែល ៧០០ ពាន់លានដុល្លារ ដោយប្រទេសសំប៊ី និងហ្កាណាបានបរាជ័យកាតព្វកិច្ចបំណុលរបស់ពួកគេ។ ទោះជាយ៉ាងណា ការផ្តល់ប្រាក់កម្ចីរបស់ប្រទេសចិនបានជួយធ្វើឱ្យមានការរីកចម្រើនផ្នែកហេដ្ឋារចនាសម្ព័ន្ធនៅក្នុងប្រទេសជាច្រើននៅទ្វីបអាហ្វ្រិក។

ដោយដកស្រង់ទិន្នន័យរបស់ធនាគារពិភពលោក លោក Qin បាននិយាយថា ស្ថាប័នផ្តល់ប្រាក់កម្ចីអន្តរជាតិផ្តល់កម្ចីចំនួនបីភាគបួននៃបំណុលបរទេសរបស់ទ្វីបអាហ្រ្វិក ហើយគួរតែដើរតួនាទីធំជាងចិនក្នុងការដោះស្រាយបញ្ហាបំណុល។ នេះបើយោងតាមទីភ្នាក់ងារព័ត៌មាន Bloomberg ៕

រដ្ឋធានីកៀវ៖ បើទោះជាក្រុងមូស្គូ បានអះអាង អំពីជោគជ័យរបស់ខ្លួន នឹងជិតដណ្ដើមកាន់កាប់ទីក្រុងសូឡេដា (Soledar) នាភាគខាងកើត ប្រទេសអ៊ុយក្រែន បានទាំងស្រុងយ៉ាងណាក្ដី ប៉ុន្ដែនៅក្នុងរយៈពេល២៤ម៉ោងកន្លងមកនេះ រុស្ស៊ី បានបាត់បង់កម្លាំងទ័ព ជាង១០០នាក់ នៅលើសមរភូមិប្រយុទ្ធគ្នាយ៉ាងសាហាវបំផុត ជាមួយនឹងកងទ័ពការពារទឹកដីរបស់ក្រុងកៀវ។

សារព័ត៌មាន ABC បានចេញផ្សាយ កាលពីព្រឹក ថ្ងៃសុក្រ ទី១៣ ខែមករា ថា រុស្ស៊ី បានបញ្ជាក់ ថា កម្លាំងទាហានរបស់ខ្លួន ជិតនឹងដណ្ដើមកាន់កាប់ទីក្រុងអណ្ដូងរ៉ែអំបិលសូឡេដា នាភាគខាងកើត ប្រទេសអ៊ុយក្រែន។ ការអះអាងរបស់ក្រុងមូស្គូ នឹងបង្ហាញនូវការកត់សម្គាល់ អំពីជ័យជម្នះរបស់មេដឹកនាំវិមានក្រឹមឡាំង។ ប៉ុន្ដែរុស្ស៊ី បានខាតបង់ទាហាន និង ប្រឈមមុខនឹងគ្រោះថ្នាក់ដ៏ធ្ងន់ធ្ងរបំផុត នៅលើសមរភូមិមួយនេះ។

លោក ប៉ាវឡូ គីរីឡែនកូ (Pavlo Kyrylenko) អភិបាលខេត្តដូណែតស្ក៍ (Donetsk) របស់អ៊ុយក្រែន បានបញ្ជាក់ នៅក្នុងការធ្វើអត្ថាធិប្បាយ នៅតាមបណ្ដាញទូរទស្សន៍ ថា នៅក្នុងរយៈពេល២៤ម៉ោងកន្លងមកនេះ កងទ័ពការពារទឹកដីរបស់អ៊ុយក្រែន បានសម្លាប់ទាហានរុស្ស៊ី នៅលើសមរភូមិប្រយុទ្ធដ៏សាហាវ នៅក្នុងទីក្រុងសូឡេដា នាភាគខាងកើត ប្រទេស។ ទាហានរុស្ស៊ី បានដើរ នៅលើសាកសពយោធារបស់ពួកគេ ខណៈទីក្រុងមួយនេះ បានរងនូវការបាញ់ផ្លោងបំផ្លិចបំផ្លាញយ៉ាងខ្លាំង។ទាហានរុស្ស៊ី កំពុងតែប្រើប្រាស់កាំភ្លើងត្បាល់ និង គ្រាប់រ៉ុក្កែត បាញ់ផ្លោងទម្លាក់ ស្រោចទៅលើទីក្រុងសូឡេដា នៅក្នុងការវាយប្រយុទ្ធគ្នាឥតឈប់ឈរ ដើម្បីទម្លុះទម្លាយខ្សែត្រៀមការពារដ៏រឹងមាំរបស់កងទ័ពការពារទឹកដីអ៊ុយក្រែន។ បច្ចុប្បន្ន ទាហានរុស្ស៊ី កំពុងតែខិតខំប្រឹងប្រែងស្ដារស្ថានការណ៍បាក់ទ័ពជាញឹកញាប់ ដើម្បីធ្វើឲ្យវិមានក្រឹមឡាំង មានក្ដីសង្ឃឹមឡើងវិញ ថា នឹងទទួលបានជ័យជម្នះយ៉ាងឆាប់រហ័ស នៅក្នុងសង្គ្រាមដ៏ឃោរឃៅ អស់រយៈពេលជិត១១ខែកន្លងមកនេះ។

លោកអភិបាលខេត្តដូណែតស្ក៍ (Donetsk) របស់អ៊ុយក្រែន បានសង្កត់ធ្ងន់ ថា «ជនស៊ីវិលរស់នៅក្នុងទីក្រុង នាភាគខាងកើត ប្រទេស កំពុងតែព្យាយាម រស់រានមានជីវិត ស្របពេលមានការបង្ហូរឈាមកាន់តែខ្លាំងឡើង រវាងកងទ័ព នៃប្រទេសទាំង២ ខណៈទាហានរុស្ស៊ី កំពុងតែបង្កើននូវការវាយប្រហារកាន់តែខ្លាំង»។

លោក ឌីមីទ្រី ប៉េស្កូវ (Dmitry Peskov) អ្នកនាំពាក្យ វិមានក្រឹមឡាំង បានកោតសរសើរដល់កម្លាំងទាហានរុស្ស៊ី អំពីសកម្មភាពមិនគិតតែ អំពីខ្លួនឯង និង មានភាពក្លាហាន ហើយគាត់ ថែមទាំងអះអាងទៀត ថា ក្រុងមូស្គូ កំពុងតែជួយដល់ពួកគេឆ្ពោះទៅមុខ នៅក្នុងទីក្រុងសូឡេដា។ ការងារដ៏ធ្ងន់ធ្ងរបំផុត កំពុងតែធ្វើ នៅក្នុងទីក្រុងមួយនេះ។

លោក យ៉ែវហ្គេនី ប៊្រីហ្គូហ្ស៊ីន (Yevgeny Prigozhin) ប្រធានក្រុមហ៊ុនទាហានស៊ីឈ្មួលរបស់រុស្ស៊ី Wagner Group (វ៉េគណឺរ ហ្គ្រូប) ដែលជាមនុស្សជំនិតបំផុតមួយរូបរបស់ប្រធានាធិបតី លោក វ៉្លាឌីមៀ ពូទីន (Vladimir Putin) កាលពីថ្ងៃពុធ បានជំរុញឲ្យដណ្ដើម កាន់កាប់ទីក្រុងសូឡេដា។ ប៉ុន្ដែទាហានរបស់ក្រុមហ៊ុនស៊ីឈ្នួលមួយនេះ ក៏បានរងការបាត់បង់យ៉ាងច្រើនផងដែរ។

ជាមួយគ្នានេះ លោកស្រី ហានណា ម៉ាល់យ៉ា (Hanna Malyar) អនុរដ្ឋមន្រ្ដីក្រសួងការពារជាតិអ៊ុយក្រែន បានបញ្ជាក់ នៅក្នុងសន្និសីទសារព័ត៌មាន កាលពីថ្ងៃព្រហស្បតិ៍ ថា «កម្លាំងសត្រូវបានបន្ដវាយប្រហារយ៉ាងខ្លាំង ប៉ុន្ដែរុស្ស៊ី បានបាត់បង់កម្លាំងទាហានយ៉ាងច្រើន ហើយពួកគេនឹងមិនទទួលបានជោគជ័យនោះឡើយ»៕

ប្រទេសចិន ៖ កាលពីថ្ងៃទី១២ ខែមករា ការកក់សំបុត្រយន្តហោះតាមបណ្តាញអ៊ីនធើរណេតរបស់ចិនទាំងចេញពីប្រទេស និងចូលប្រទេសបានកើនឡើងជាបន្តបន្ទាប់ ក្រោយពីចិនប្រកាសបើកប្រទេស និងបន្ធូរបន្ថយវិធានការជំងឺកូវីដកាលពីថ្ងៃទី៨ ខែមករា កន្លងមក ។

Tongcheng Travel ក្រុមហ៊ុនផ្តល់សេវាកម្មទេសចរណ៍អនឡាញឱ្យដឹងថា ចំនួនការកក់សំបុត្រយន្តហោះចេញ-ចូលប្រទេសចិនបានស្ទុះងើបឡើងវិញ ក្រោយចិនបិទប្រទេសអស់រយៈពេល៣ឆ្នាំដោយសារជំងឺកូវីដ ។ ជើងហោះហើរចូលប្រទេសចិន រួមមាន Shanghai Nanjing Guangzhou Chengdu និង Nanning រីឯជើងហោះហើរទៅក្រៅប្រទេស គឺស្មើ៥៣ប្រទេសនិងតំបន់ ។

តាមទិន្នន័យពី Trip.com Group បង្ហាញថា ជើងហោះហើរមកពីតំបន់ម៉ាកាវរបស់ចិន ហុងកុង បាងកក សិង្ហបុរី និងភ្នំពេញ បានទទួលការពេញនិយមយ៉ាងខ្លាំងសម្រាប់អ្នកដំណើរចិន គិតចាប់ពីថ្ងៃទី២៧ ខែធ្នូ ឆ្នាំ២០២២ ។ ក្នុងនោះការហោះហើររបស់ក្រុមហ៊ុន Spring Airlines ពីព្រលានយន្តហោះ Shanghai Pu Dong ទៅកាន់ហុងកុង ម៉ាកាវ តូក្យូ និងភូកេត ក្នុងចន្លោះពីថ្ងៃទី២-៨ ខែមករា បានកើនឡើងស្មើដើម ។

ប្រធានវិទ្យាស្ថានស្រាវជ្រាវទេសចរណ៍ចិនថ្លែងថា ទីផ្សារទេសចរណ៍ចេញក្រៅប្រទេស និងចូលប្រទេសរបស់ចិនបានងើបឡើងវិញជាបន្តបន្ទាប់នៅដើមឆ្នាំ២០២៣នេះ ។ ភ្ញៀវទេសចរចូលចិត្តទៅកម្សន្តនៅក្រុមប្រទេសដំបូងដូចជា ជប៉ុន កូរ៉េខាងត្បូង ថៃ ហុងកុង ម៉ាកាវ បន្ទាប់មកទៅអាស៊ីខាងលិច និងអឺរ៉ុប ។

Shen Jia Ni អ្នកស្រាវជ្រាវជាន់ខ្ពស់នៃវិទ្យាស្ថានស្រាវជ្រាវ Ctrip Research Institute សម្លឹងឃើញថា ការជឿជាក់ក្នុងការធ្វើដំណើររបស់ភ្ញៀវទេសចរចិននឹងងើបឡើងវិញយ៉ាងឆាប់រហ័ស ខណៈមានការកែសម្រួលវិធានការទប់ស្កាត់ជំងឺកូវីដ និងនយោបាយធ្វើដំណើរចេញ-ចូលប្រទេសរបស់ចិន ៕

ប្រភព ៖ The Reporters