ការកើនឡើងដ៏កម្រ! តម្លៃប្រាក់បានកើនឡើងខ្លាំងមិននឹកស្មានដល់ ពោលគឺមានការកើនឡើងដល់ 250% លឿនជាងមាសទៅទៀតក្នុងរយៈពេលប៉ុន្មានសប្តាហ៍ថ្មីៗនេះ ដែលជាការវិវឌ្ឍមិនធម្មតាមួយក្នុងប្រវត្តិសាស្រ្ត និងបានទាក់ទាញចំណាប់អារម្មណ៍របស់វិនិយោគិននៅជុំវិញពិភពលោក។ នេះបើតាមការចុះផ្សាយរបស់ទស្សនាវដ្ដី Forbes នៅដើមសប្ដាហ៍នេះ។

ភាពតានតឹងពាណិជ្ជកម្មរវាងសហរដ្ឋអាមេរិក និងចិនកំពុងកើនឡើងម្តងទៀត បានធ្វើឲ្យទំនុកចិត្តលើប្រាក់ដុល្លារមានការចុះខ្សោយ ខណៈដែលបំណុលរបស់សហរដ្ឋអាមេរិកកើនឡើង ហើយអតិផរណានៅតែខ្ពស់ជាង 2%។ ទន្ទឹមនឹងនេះ មេដឹកនាំនយោបាយរបស់ប្រទេសធំៗមួយចំនួនបានព្រមានថា ស្ថានភាពនេះបានឆ្លុះបញ្ចាំងពីប្រព័ន្ធសកលលោកក្រោយសង្គ្រាមដែលកំពុងរង្គោះរង្គើ។

តាមរបាយការណ៍ខាងលើ តម្លៃប្រាក់នៅពេលនេះស្ថិតក្នុងល្បឿនលឿនបំផុតបើធៀបនឹងការឡើងថ្លៃរបស់មាស ដែលវាបានកើនឡើង 250% ដល់តម្លៃ 110 ដុល្លារក្នុងមួយអោន និយាយឲ្យខ្លីការកើនឡើងតម្លៃរបស់ប្រាក់នៅពេលនេះ គឺខ្ពស់ជាងពេលណាណាទាំងអស់ក្នុងរយៈពេលជិត 14 ឆ្នាំចុងក្រោយមកនេះ។

អ្នកវិភាគកត់សម្គាល់ថា តួនាទីដ៏មានតម្លៃរបស់ប្រាក់នៅពេលនេះ គឺដោយសារតម្រូវការខ្លាំងពីឧស្សាហកម្មដូចជាស្រូបទាញថាមពលព្រះអាទិត្យ, ការផលិតគ្រឿងអេឡិចត្រូនិច និងយានយន្តអគ្គិសនី រួមផ្សំជាមួយនឹងការផ្គត់ផ្គង់ជាសកលដ៏តឹងតែង បានជំរុញឱ្យតម្លៃប្រាក់ឡើងថ្លៃក្នុងល្បឿនលឿនជាងមាស។

ខណៈពេលដែលអ្នកវិភាគមួយចំនួនមើលឃើញពីកន្លែងសម្រាប់ការកើនឡើងបន្ថែមទៀតរបស់ប្រាក់ ពួកគេក៏បានព្រមានដែរថាការកើនឡើងយ៉ាងឆាប់រហ័សនេះ នឹងផ្ដល់ហានិភ័យខ្ពស់ជាងបើប្រៀបធៀបទៅនឹងការកើនឡើងជាមធ្យមរបស់មាស។ នេះមានន័យថា ប្រសិនបើមាសមិនផ្លាស់ប្តូរតម្លៃលើសពី 5,100 ដុល្លារក្នុងមួយអោនទេ នោះប្រាក់នឹងត្រូវធ្លាក់ចុះមកត្រឹមប្រហែល 72 ដុល្លារ តែប្រសិនបើប្រាក់នៅតែស្ថិតនៅ 110 ដុល្លារដូចពេលនេះ នោះមាសនឹងត្រូវកើនឡើងរហូតដល់ 7,700 ដុល្លារក្នុងមួយអោនមិនខាន៕

ក្នុងអំឡុងពេលដែលពិភពលោកកំពុងជ្រួលច្របល់និងភ័យខ្លាចចំពោះការរីករាលដាលសារជាថ្មីនៃមេរោក Nipahនៅក្នុងប្រទេសឥណ្ឌា អ្នកស្រាវជ្រាវចិនបានបង្ហាញពីថ្នាំប្រឆាំងមេរោគលេបតាមមាត់មួយប្រភេទដែលមានឥទ្ធិពលប្រឆាំងនឹងមេរោគ Nipah បន្ទាប់ពីថ្នាំនេះធ្លាប់ត្រូវបានគេពិសោធដើម្បីយកទៅប្រើប្រាស់ព្យាបាលជំងឺ Covid-19 កាលពីមុន។

តាមការចេញផ្សាយរបស់ South China Morning Post នៅថ្ងៃទី២៨ ខែមករានេះបានបង្ហាញថា VV116 ដែលជាថ្នាំប្រភេទ nucleoside និងធ្លាប់ត្រូវបានអនុម័តរួចហើយសម្រាប់ការព្យាបាលជំងឺ COVID-19 នៅក្នុងប្រទេសចិន និងអ៊ូសបេគីស្ថាន បានបង្ហាញពីសក្ដានុពលរបស់វានៅក្នុងការរារាំងពូជមេរោគ Nipah យ៉ាងសំខាន់នៅក្នុងការកំណត់មន្ទីរពិសោធន៍ និងបង្កើនអត្រារស់រានមានជីវិតនៅក្នុងការសាកល្បងលើសត្វ។

តាមប្រភពខាងលើ VV116 គឺជាលទ្ធផលដ៏ជោគជ័យសម្រាប់ការព្យាបាល ហើយការស្រាវជ្រាវនេះតំណាងឱ្យការបញ្ជាក់ខាងវិទ្យាសាស្ត្រអំពីលទ្ធភាពព្យាបាលរបស់ VV116 ក្នុងការប្រឆាំងនឹងមេរោគឆ្លងតាមសត្វប្រចៀវ Nipah ដែលអង្គការសុខភាពពិភពលោកបានកំណត់ថាជាការគំរាមកំហែងក្នុងតំបន់អាទិភាពកំពូល។

ការរកឃើញនេះទៀតសោតបានបង្ហាញថា ទាំង VV116 និងទម្រង់សកម្មខាងមេតាបូលីសរបស់វាបានបង្ហាញពីឥទ្ធិពលរារាំងយ៉ាងខ្លាំងប្រឆាំងនឹងពូជមេរោគ Nipah សំខាន់ៗទាំងពីររួមមាន៖ NiV-M និងNiV-B។ នៅក្នុងការពិសោធដោយប្រើសត្វ hamsters ការគ្រប់គ្រងតាមមាត់នៃ VV116 សម្រេចបានអត្រារស់រានមានជីវិត 66.7 ភាគរយ ខណៈសត្វដែលទទួលបានការព្យាបាល ក៏បានបង្ហាញពីការថយចុះយ៉ាងខ្លាំងនៃបន្ទុកវីរុសនៅក្នុងសរីរាង្គសំខាន់ៗ រួមទាំងសួត លំពែង និងខួរក្បាល។

អ្នកជំនាញផ្នែកវេជ្ជសាស្ត្រកត់សម្គាល់ថា ការអនុម័តបទប្បញ្ញត្តិដែលមានស្រាប់របស់ថ្នាំមួយប្រភេទនេះ អាចបង្កើនល្បឿនការដាក់ពង្រាយសក្តានុពលរបស់វាប្រឆាំងនឹងការផ្ទុះឡើងនៃ Nipah នៅក្នុងពេលឆាប់ៗខាងមុខ។ ក្រៅពីការអនុវត្តលើការព្យាបាល អ្នកស្រាវជ្រាវបានណែនាំថា VV116 ក៏អាចបម្រើជាថ្នាំបង្ការសម្រាប់ក្រុមមនុស្សដែលមានហានិភ័យខ្ពស់ រួមទាំងបុគ្គលិកថែទាំសុខភាព បុគ្គលិកមន្ទីរពិសោធន៍ និងសហគមន៍នៅក្នុងតំបន់ដែលមាន Nipah ផ្ទុះឡើងផងដែរ៕

ក្រោយលង់ខ្លួនចូលក្នុងសង្រ្គាមរ៉ាំរ៉ៃជាមួយអ៊ុយក្រែនអស់រយៈពេលជិត៤ឆ្នាំ ឥឡូវនេះប្រទេសរុស្ស៊ីបានប្រកាសស្វែងកម្លាំងបំពេញបន្ថែមឡើងវិញដោយសន្យាថានឹងផ្ដល់ប្រាក់រង្វាន់យ៉ាងច្រើនដល់អ្នកស្ម័គ្រចិត្ត។ មិនតែប៉ុណ្ណោះសម្រាប់អ្នកទោស, ពួកគេនឹងទទួលបានសេរីភាព រីឯជនបរទេសនឹងទទួលបានសញ្ជាតិរុស្ស៊ីភ្លាមៗ ដោយគ្រាន់តែចុះឈ្មោះចូលជាទាហានជួរមុខរបស់រុស្ស៊ីក្នុងពេលនេះ។

យោងតាមការចេញផ្សាយដោយសារព័ត៌មាន ABC News កាលពីថ្ងៃអង្គារម្សិលមិញបានឲ្យដឹងថា រដ្ឋាភិបាលរុស្ស៊ីបានចេញវិធានការលើកទឹកចិត្តជាច្រើនដើម្បីទាក់ទាញកងទ័ពថ្មី ខណៈពេលដែលប្រទេសកំពុងត្រូវការកម្លាំងបន្ថែមជាចាំបាច់។ វិធានការទាំងនេះរួមមានប្រាក់រង្វាន់ច្រើនសន្ធឹកសន្ធាប់ ប្រាក់ខែខ្ពស់ ការលួសបំណុល ការបន្ធូរបន្ថយពន្ធ និងការទទួលបានសញ្ជាតិឆាប់រហ័សចំពោះជនអន្តោរប្រវេសន៍ដែលមកធ្វើការនៅប្រទេសរុស្ស៊ី។

ដោយឡែក សម្រាប់ជនជាតិរុស្ស៊ីជាច្រើន ការចុះឈ្មោះចូលបម្រើកងទ័ពនឹងផ្តល់ឲ្យពួកគេនូវប្រាក់ចំណូលខ្ពស់ជាងប្រាក់ឈ្នួលជាមធ្យម ខណៈពេលដែលសម្រាប់អ្នកទោសវាគឺជាឱកាសដើម្បីគេចផុតពីលក្ខខណ្ឌដ៏លំបាកនៅក្នុងពន្ធនាគារ។

បើតាមសេចក្ដីរាយការណ៍របស់ទីភ្នាក់ងារព័ត៌មានអន្តរជាតិ ការជ្រើសរើសនេះរុស្ស៊ីបានកំណត់គោលដៅកាន់តែខ្លាំងឡើងទៅលើជនបរទេស ទាំងនៅក្នុងប្រទេសរុស្ស៊ី និងនៅបរទេស។ រដ្ឋាភិបាលជាច្រើន រួមទាំងរដ្ឋាភិបាលនេប៉ាល់ ឥណ្ឌា និងអ៊ីរ៉ាក់ បាននិយាយថា ពលរដ្ឋរបស់ពួកគេជាច្រើនត្រូវបានគេបោកបញ្ឆោត ឬជួញដូរឱ្យចូលរួមជាមួយកងទ័ពរុស្ស៊ី ដែលបង្កឱ្យមានការតវ៉ាផ្នែកការទូតយ៉ាងទូលំទូលាយ។

កាលឆ្នាំ២០២៤ ទីភ្នាក់ងារស៊ើបអង្កេតសហព័ន្ធរបស់ឥណ្ឌាបាននិយាយថា ខ្លួនបានបំបែកបណ្តាញមួយដែលបានទាក់ទាញពលរដ្ឋរបស់ខ្លួនយ៉ាងហោចណាស់៣៥ នាក់ទៅកាន់ប្រទេសរុស្ស៊ីក្រោមលេសនៃការងារ។ បុរសទាំងនោះត្រូវបានបណ្តុះបណ្តាលសម្រាប់ការប្រយុទ្ធ និងដាក់ពង្រាយទៅកាន់អ៊ុយក្រែនប្រឆាំងនឹងឆន្ទៈរបស់ពួកគេដោយមានអ្នកខ្លះ រងរបួសយ៉ាងធ្ងន់ធ្ងរ។ ចំណែកមន្ត្រីអ៊ីរ៉ាក់និយាយថា ពលរដ្ឋរបស់ខ្លួនប្រហែល ៥,០០០ នាក់បានចូលរួមជាមួយយោធារុស្ស៊ី រួមជាមួយនឹងចំនួនមិនបានបញ្ជាក់ដែលកំពុងប្រយុទ្ធជាមួយកងកម្លាំងអ៊ុយក្រែន។

ជនជាតិអ៊ីរ៉ាក់មួយចំនួនដែលមិនស្គាល់អត្តសញ្ញាណត្រូវបានសម្លាប់ ឬបាត់ខ្លួន ខណៈពេលកំពុងប្រយុទ្ធនៅអ៊ុយក្រែន។ គ្រួសារមួយចំនួនបានរាយការណ៍ថា សាច់ញាតិត្រូវបានល្បួងឱ្យទៅប្រទេសរុស្ស៊ីក្រោមលេសបោកប្រាស់ ហើយត្រូវបានបង្ខំឱ្យចុះឈ្មោះ។ ក្នុងករណីផ្សេងទៀត ជនជាតិអ៊ីរ៉ាក់បានចូលរួមដោយស្ម័គ្រចិត្តដើម្បីទទួលបានប្រាក់ខែ និងសញ្ជាតិរុស្ស៊ី៕

ចប់ហើយមិនដឹងថាបានចែកចាយដល់ណាខ្លះទេ! ប៉ូលីសវៀតណាមទើបបានរកឃើញសាច់ខ្យងឆ្កឹះហើយស្រាប់ចំនួន 3,000តោន ត្រាំនៅក្នុងទឹកដាក់សារធាតុគីមីបម្រុងយកទៅលក់បន្តនៅក្នុងទីផ្សារ ដោយម្ចាស់ទីតាំងសារភាពថាបានធ្វើបែបនេះ 5ឆ្នាំមកហើយ។ នេះបើតាមការចុះផ្សាយរបស់ VNExpress។

ប៉ូលីសផ្នែកស៊ើបអង្កេតវៀតណាមកាលពីថ្ងៃអង្គារបានប្រកាសពីការចាប់ និងឃុំខ្លួនលោក Huynh Van Truong អាយុ 47 ឆ្នាំ មកពីទីក្រុង Can Tho ភាគខាងត្បូងប្រទេសវៀតណាម ម្ចាស់រោងចក្រកែច្នែសាច់ខ្យងមួយកន្លែង ដែលកំពុងត្រូវបានចោទប្រកាន់ពីបទរំលោ.ភលើបទប្បញ្ញត្តិសុវត្ថិភាពចំណីអាហារ។

នៅពេលត្រួតពិនិត្យនៅរោងចក្រកែច្នៃចំណីអាហារដែលគ្មានផ្លាកសញ្ញាមួយកន្លែងក្នុងសង្កាត់ Binh Dong មន្ត្រីជំនាញបានរកឃើញសាច់ខ្យងស្រែកែច្នៃជាងបីតោន ដែលត្រាំនៅក្នុងល្បាយទឹកសូដ្យូមស៊ីលីត ឬគេស្គាល់ជាទូទៅថាជា”កញ្ចក់រាវ” ដែលមិនមានសុវត្ថិភាពក្នុងប្រើប្រាស់លើម្ហូបអាហារទេ។

ក្នុងអំឡុងពេលសួរចម្លើយត្រូវបានក្រោយចាប់ខ្លួន លោក Truong បានសារភាពថា ខ្លួនពិតជាធ្វើការលាយផ្សុំសារធាតុគីមីនៅក្នុងទឹកដើម្បីដាក់ត្រាំសាច់ខ្យងពិតមែន ហើយបានធ្វើបែបនេះចាប់តាំងពីឆ្នាំ 2021 មកម្ល៉េះក្នុងបំណងធ្វើឱ្យសាច់ខ្យងមានពណ៌ភ្លឺរលោង ផ្តល់ឱ្យវានូវរូបរាងទាក់ទាញ និងមើលឃើញថានៅស្រស់ល្អ ព្រមទាំងជួយឲ្យសាច់មានសភាពស្រួយច្រប់បើទោះជាទុកយូរថ្ងៃហើយក៏ដោយ។

គួរជម្រាបថា ល្បាយសូដ្យូមស៊ីលីត គឺជាសារធាតុគីមីដែលភាគច្រើនត្រូវបានប្រើប្រាស់ក្នុងវិស័យសំណង់ ដូចជាការលាយចូលជាមួយស៊ីម៉ង់ត៍ឬកំបោរដើម្បីឲ្យវាតោងស្អិតជាប់ជញ្ជាំង និងបើពីលើថ្នាំកូតលើផ្ទៃដើម្បីបង្កើតភាពស ភ្លឺរលោង និងបង្កើនការការពារផ្ទៃ។ អ្វីដែលសំខាន់សារធាតុនេះ ត្រូវបានហាមឃាត់មិនឱ្យប្រើប្រាស់ក្នុងម្ហូបអាហារឡើយ ដោយការល្មើសហើយនៅតែប្រើប្រាស់វាក្នុងរបៀបនេះ គឺជាការរំលោ.ភលើបទប្បញ្ញត្តិសុវត្ថិភាពចំណីអាហារ។

បច្ចុប្បន្នអាជ្ញាធរវៀតណាមកំពុងបើកការស៊ើបអង្កេតលើអ្នកដែលពាក់ព័ន្ធនឹងការចែកចាយខ្យងត្រាំគីមី និងផ្គត់ផ្គង់សារធាតុគីមីខុសច្បាប់មកឲ្យម្ចាស់ទីតាំងរោងចក្រខាងលើនេះ ដើម្បីផ្តន្ទានទោស។ អាស្រ័យហេតុនេះសូមបងប្អូនមានការប្រុងប្រយ័ត្ន ព្រោះសាច់ខ្យងប្រភេទនេះក៏ឃើញមានដាក់លក់នៅតាមទីផ្សារក្នុងប្រទេសកម្ពុជាយើងដែរ៕

ប្រទេសកេនយ៉ា ៖ សកម្មជនបរិស្ថានម្នាក់នៅប្រទេសកេនយ៉ា បានបំបែកកំណត់ត្រាពិភពលោក (Guinness World Records) បន្ទាប់ពីឈរឱបដើមឈើដោយមិនឈប់សម្រាកសោះរយៈពេល៧២ម៉ោង ដើម្បីបង្ហាញទៅកាន់មនុស្សទូទាំងពិភពលោក ឱ្យចេះស្រឡាញ់ និងថែទាំបរិស្ថានលើផែនដីប្រកបដោយនិរន្តរភាព ។

តាមការចុះផ្សាយរបស់សារព័ត៌មានបរទេសកាលពីខែធ្នូ ឆ្នាំ២០២៥ សកម្មជនបរិស្ថានម្នាក់នៅប្រទេសកេនយ៉ា (Kenya) បានបំបែកកំណត់ត្រាពិភពលោក (Guinness World Records) បន្ទាប់ពីឈរឱបដើមឈើដោយមិនឈប់សម្រាកសោះរយៈពេល៧២ម៉ោង ដើម្បីអំពាវនាវទៅកាន់មនុស្សលើពិភពលោកឱ្យយល់ដឹងពីសារៈសំខាន់នៃការអភិរក្សធម្មជាតិ និងបរិស្ថានជុំវិញខ្លួន ។

សកម្មជនបរិស្ថានកេនយ៉ាដែលបំបែកកំណត់ត្រាពិភពលោក គឺអ្នកនាង Truphena Muthoni អាយុ២២ឆ្នាំ ត្រូវបាន Guinness World Records កត់ត្រាជាបុគ្គលឈរឱបដើមឈើរយៈពេលយូរបំផុត ។ នាងយកឈ្នះអ្នកបំបែកកំណត់ត្រាពិភពលោកចាស់ឈ្មោះ Frederick Boakye នៅប្រទេសហ្គាណា ដែលបានឈរឱបដើមឈើត្រឹមតែរយៈពេល៥០ម៉ោង ២នាទី និង២៨វិនាទី ។

ភាពជោគជ័យនេះ មិនមែនជាលើកដំបូងរបស់អ្នកនាង Muthoni ទេ ពីព្រោះកាលពីខែកុម្ភៈ ឆ្នាំ២០២៥ នាងធ្លាប់បានបំបែកកំណត់ត្រាពិភពលោកម្តងហើយ ដោយឈរឱបដើមឈើមិនឈប់សម្រាកសោះរយៈពេល៤៨ម៉ោង ដែលនេះជាការបំបែកកំណត់ត្រាពិភពលោក រហូតដល់២លើក ។

អ្នកនាង Muthoni ថា ការឈរឱបដើមឈើ លើកទី១ ហាក់ងាយស្រួល ប៉ុន្តែមានអត្ថន័យបំផុត ដើម្បីបង្ហាញទៅកាន់មនុស្សទាំងអស់ឱ្យមានទំនាក់ទំនងជិតស្និទ្ធជាមួយបរិស្ថាន និងអភិរក្សបរិស្ថាន ។ រីឯការឈរឱបដើមឈើ លើកទី២ កាន់តែមានអត្ថន័យជ្រាលជ្រៅជាងមុនបង្ហាញពីការយកចិត្តទុកដាក់ចំពោះផែនដី មិនមែនគ្រាន់តែបណ្តោះអាសន្នទេ ប៉ុន្តែទាមទារការអត់ធ្មត់ និងអនុវត្តជាក់ស្តែង ។ ពិភពលោកត្រូវការលើសពីនេះ លើសការឈរឱបដើមឈើរយៈពេល៧២ម៉ោង គឺត្រូវការឱ្យមនុស្សយកចិត្តទុកដាក់ និងទទួលខុសត្រូវចំពោះបរិស្ថានឱ្យបានយូរអង្វែង ។

ការឈរឱបដើមឈើរបស់សកម្មជនបរិស្ថានកេនយ៉ា មិនត្រឹមតែជាការបំបែកកំណត់ត្រាពិភពលោកថ្មីនោះទេ ប៉ុន្តែវាជាការបំផុសគំនិតឱ្យមនុស្សលើពិភពលោក ងាកមកយកចិត្តទុកដាក់លើបញ្ហាអាកាសធាតុ និងបន្តការពារធម្មជាតិ ៕

ក្រុមហ៊ុនទឹកដោះគោធំជាងគេទាំងបីរបស់ពិភពលោក គឺ Nestlé, Danone និង Lactalis បានប្រកាសពីការប្រមូលផលិតផលម្សៅទឹកដោះគោសម្រាប់ទារកមួយចំនួនជាសកល បន្ទាប់ពីមានរឿងអាស្រូ.វទារក២នាក់ ត្រូវបានបំពុលដោយសារធាតុ cereulide បណ្ដាលឲ្យបាត់បង់ជីវិត ហើយប្រទេសបារាំងកំពុងធ្វើការស៊ើបអង្កេត។

យោងតាមការចេញផ្សាយរបស់ទីភ្នាក់ងារ Reuters និងសារព័ត៌មានធំៗរបស់អឺរ៉ុបជាច្រើនបានបង្ហាញថា ការប្រមូលយកផលិតផលចូលស្តុកវិញនេះ ប៉ះពាល់ដល់ផលិតផលដែលលក់នៅទូទាំងប្រទេសជាច្រើននៅទូទាំងពិភពលោក ដែលជំរុញឱ្យមានការជូនដំណឹងអំពីសុវត្ថិភាពចំណីអាហារ និងការស៊ើបអង្កេតដោយអាជ្ញាធរសុខាភិបាលនៅអឺរ៉ុប អាស៊ី និងតំបន់ផ្សេងៗទៀត។

ការព្រួយបារម្ភនេះផ្តោតលើ cereulide ដែលជាជាតិពុលដែលភ្ជាប់ទៅនឹងបាក់តេរី Bacillus cereus ដែលអាចបណ្តាលឱ្យទារកក្អួត និងមានរោគសញ្ញានៃជំងឺក្រពះពោះវៀនផ្សេងទៀត។ ខណៈពេលដែលក្រុមហ៊ុនទាំងនោះនិយាយថា មិនមានការបំពុលណាមួយត្រូវបានបញ្ជាក់នោះទេ និយតករបានរាយការណ៍ថា ជាតិពុលទាំងនោះទំនងជាបានចូលទៅក្នុងខ្សែសង្វាក់ផ្គត់ផ្គង់នៅក្នុងគ្រឿងផ្សំឆៅដែលបានប្រើក្នុងការផលិតម្សៅទឹកដោះគោបាត់ទៅហើយ។ ដើម្បីជាការប្រុងប្រយ័ត្ន ទំនិញរាប់លានត្រូវបានដកចេញពីធ្នើរតាំងលក់នៅទូទាំងពិភពលោក។

ទីភ្នាក់ងារចំណីអាហារសិង្ហបុរីបានបញ្ជាឱ្យប្រមូលផលិតផលទឹកដោះគោ Dumex Dulac 1 ដែលមានប្រភពដើមនៅប្រទេសថៃរបស់ក្រុមហ៊ុន Danone និងផលិតផលទឹកដោះគោ NAN HA1 SupremePro ដែលមានប្រភពដើមនៅប្រទេសស្វីសរបស់ក្រុមហ៊ុន Nestlé បន្ទាប់ពីរកឃើញសារធាតុ cereulide ខណៈដែលក្រុមហ៊ុន Lactalis បានប្រកាសកាលពីថ្ងៃពុធថា អង្គភាពអាហារូបត្ថម្ភរបស់ខ្លួនបានប្រមូលផលិតផលទឹកដោះគោម្សៅសម្រាប់ទារកមួយចំនួននៅក្នុងប្រទេសចំនួន 18 ដោយសារតែមានវត្តមានសារធាតុ cereulide នៅក្នុងគ្រឿងផ្សំដែលមានប្រភពមកពីអ្នកផ្គត់ផ្គង់។

ការប្រមូលផលិតផលនេះ បានជះឥទ្ធិពលយ៉ាងខ្លាំងដល់សេដ្ឋកិច្ច ខណៈអ្នកវិភាគឧស្សាហកម្មប៉ាន់ប្រមាណថា ការខាតបង់រួមគ្នាសម្រាប់ក្រុមហ៊ុនទាំងបីអាចមានលើសពី 1 ពាន់លានដុល្លារ ដោយសារតែការផលិតត្រូវបានបញ្ឈប់ ផលិតផលត្រូវបានបំផ្លាញ និងខ្សែសង្វាក់ផ្គត់ផ្គង់ត្រូវបានរំខាន។ មិនតែប៉ុណ្ណោះភាគហ៊ុននៅក្នុងក្រុមហ៊ុនមួយចំនួនបានធ្លាក់ចុះជាគំហុក បន្ទាប់ពីការប្រកាសទាំងនេះ ដែលបង្ហាញពីការព្រួយបារម្ភរបស់វិនិយោគិនលើសុវត្ថិភាពចំណីអាហារ និងទំនុកចិត្តលើម៉ាកយីហោ។

ឥឡូវនេះអាជ្ញាធរសុខាភិបាលនៅតាមបណ្ដារប្រទេសជាច្រើនកំពុងជំរុញឱ្យឪពុកម្តាយ និងអ្នកថែទាំកុមារពិនិត្យមើលលេខបាច់ និងជៀសវាងការប្រើប្រាស់ផលិតផលដែលគេកំពុងប្រមូលចូលស្តុកវិញ។ ក្រុមហ៊ុនដែលពាក់ព័ន្ធបានធ្វើការសុំទោស និងបាននិយាយថា ពួកគេកំពុងសហការយ៉ាងពេញលេញជាមួយនិយតករ ខណៈការត្រួតពិនិត្យសុវត្ថិភាពត្រូវបានពង្រឹង។ ការស៊ើបអង្កេតកំពុងបន្តដើម្បីកំណត់ពីរបៀបដែលការបំពុលបានកើតឡើង និងដើម្បីការពារឧប្បត្តិហេតុស្រដៀងគ្នានេះនាពេលអនាគត៕