សមុទ្រខ្សាច់សូណូរ៉ាន់ (Sonoran) ដែលមានទីតាំងនៅព្រំដែនអាមេរិក និងប្រទេសម៉ិកស៊ិក ដែលមានផ្ទៃភាគច្រើនស្ថិតនៅរដ្ឋអារីហ្សូណា និងរដ្ឋកាលីហ្វ័រញ៉ា សហរដ្ឋអាមេរិក រួមទាំងរដ្ឋសូណូរ៉ា រដ្ឋ Baja California Norte និងរដ្ឋ Baja California Sur របស់ម៉ិកស៊ិក មានព្រិលធ្លាក់ជាលើកដំបូងក្នុងប្រវត្តិសាស្ត្រ កាលពីដើមខែមីនា ឆ្នាំ២០២៣ កន្លងមក ។

មនុស្សជាច្រើនបានស្គាល់ថា សមុទ្រខ្សាច់សូណូរ៉ាន់មានអាកាសធាតុក្តៅបំផុតនៅទ្វីបអាមេរិកខាងជើង គឺមានសីតុណ្ហភាពខ្ពស់ខ្លាំងនៅរដូវក្តៅស្មើប្រមាណ៤០អង្សារសេ ហើយសីតុណ្ហភាពនៅទីនេះ ក៏ធ្លាប់ឡើងខ្ពស់រហូតដល់៤៨អង្សារសេផងដែរ ។

អ្នកឧតុនិយមលើកឡើងថា រូបភាពដែលយើងបានឃើញនេះ គឺជាព្រិលធ្លាក់នៅលើវាលខ្សាច់ដ៏ក្តៅបំផុតនៅអាមេរិកខាងជើង ហើយវាអាចធ្លាក់តែម្តងគត់ក្នុងមួយជំនាន់ជីវិតមនុស្ស ។ ចំណែកអ្នកវិទ្យាសាស្ត្រអធិប្បាយថា ការផ្លាស់ប្តូរអាកាសធាតុដែលកើតឡើងអាចពាក់ព័ន្ធនឹងបាតុភូតធម្មជាតិ La Nina នាពេលចុងក្រោយនេះ ទើបធ្វើឱ្យនៅតំបន់ជុំវិញសមុទ្រខ្សាច់មានសីតុណ្ហភាពធ្លាក់ចុះ ។

អ្នកឧតុនិយមរបស់ National Weather Service សហរដ្ឋអាមេរិកបង្ហាញថា ក្រៅពីមានបាតុភូតធម្មជាតិ La Nina ហើយ គឺមានបាតុភូតខ្យល់ត្រជាក់ភ្លាមៗនៅមហាសមុទ្រប៉ាស៊ីហ្វិក រួមជាមួយខ្យល់ត្រជាក់បក់មកពីទិសខាងត្បូងនៃតំបន់អាកទិក ទើបធ្វើឱ្យមានព្រិលធ្លាក់នៅតំបន់ឆ្នេរសមុទ្រខាងលិច ។

បាតុភូតធម្មជាតិដ៏ប្លែកភ្នែកនេះ វាបានកើតឡើងជាញឹកញាប់ក្នុងរយៈពេលប៉ុន្មានឆ្នាំកន្លងមក ក្រោយពីពិភពលោកប្រឈមនឹងអាកាសធាតុក្តៅ និងបម្រែបម្រួលអាកាសធាតុកាន់តែខ្លាំងក្លាឡើង ។ ដូច្នេះ ប្រទេសទាំងអស់ត្រូវតែសហការគ្នាជួយទប់ស្កាត់ និងដោះស្រាយបញ្ហាគ្រោះធម្មជាតិឱ្យបានឆាប់រហ័សបំផុត ខណៈព្រិលបានធ្លាក់នៅសមុទ្រខ្សាច់ដ៏ក្តៅបំផុត និងតំបន់ជាច្រើនទៀតដែលមិនធ្លាប់មានព្រិលធ្លាក់ ដូចជា រដ្ឋកាលីហ្វ័រញ៉ារបស់អាមេរិក ក៏ជួបហេតុការណ៍ព្រិលធ្លាក់ខ្លាំងផងដែរក្នុងប្រវត្តិសាស្ត្រ ៕ ប្រភព ៖ The standard

រដ្ឋធានីណៃពិដោរ៖ ក្រោយពេលពួកឧត្ដមសេនីយ៍យោធាមីយ៉ាន់ម៉ា បានធ្វើរដ្ឋប្រហារយោធា រហូតធ្វើឲ្យប្រទេសមានចលាចលនោះមក ឥឡូវនេះពួកគេ បានប្រកាសរំលាយចោលគណបក្សនយោបាយជាច្រើន រួមទាំងគណបក្ស NLD របស់លោកស្រី អ៊ោង សាន់ស៊ូជី (Aung San Suu Kyi) ដែលត្រូវបានបណ្ដេញ ចេញពីអំណាច ក្រោមអំពើរដ្ឋប្រហារយោធា កាលពីថ្ងៃទី១ ខែកុម្ភៈ ឆ្នាំ២០២១ ផងដែរ។

សារព័ត៌មាន Channel News Asia បានចេញផ្សាយ កាលពីថ្ងៃអង្គារ ទី២៨ ខែមីនា ថា គណៈកម្មការរៀបចំការបោះឆ្នោត ក្រោមការតាក់តែងឡើង ដោយពួកឧត្ដមសេនីយ៍យោធាមីយ៉ាន់ម៉ា កាលពីថ្ងៃអង្គារ បានប្រកាស ថា គណបក្សសម្ព័ន្ធជាតិដើម្បីលទ្ធិប្រជាធិបតេយ្យ ហៅកាត់ NLD របស់លោកស្រី អ៊ោង សាន់ ស៊ូជី (Aung San Suu Kyi) នឹងត្រូវរំលាយចោល ដោយរួមទាំងគណបក្សនយោបាយជាច្រើនទៀត។ គណបក្សទាំងនោះ បានខកខាន មិនបានចុះឈ្មោះជាថ្មី ក្រោមច្បាប់បោះឆ្នោតថ្មី បានសរសេរឡើង ដោយរបបយោធា។

លោកឧត្ដមសេនីយ៍ មីន អ៊ោងហ្លាង (Min Aung Hlaing) បានដឹកនាំធ្វើរដ្ឋប្រហារ រឹបអូសអំណាចពីរដ្ឋាភិបាលស៊ីវិលរបស់លោកស្រី អ៊ោង សាន់ស៊ូជី កាលពីថ្ងៃទី១ ខែកុម្ភៈ ឆ្នាំ២០២១ ក្រោយពេលពួកយោធា បានចោទប្រកាន់ អំពីការក្លែងបន្លំ នៅក្នុងការបោះឆ្នោតជាតិ នាឆ្នាំ២០២០ រហូតធ្វើឲ្យគណបក្ស NLD របស់លោកស្រី អ៊ោង សាន់ស៊ូជី ឈ្នះឆ្នោតយ៉ាងភ្លូកទឹកភ្លូកដី។ អំពីរដ្ឋប្រហារយោធា បានបញ្ចប់នូវលទ្ធិប្រជាធិបតេយ្យ ទើបនឹងមានអាយុកាល១០ឆ្នាំ នៅមីយ៉ាន់ម៉ា ហើយរុញច្រានប្រទេសអាស៊ានមួយនេះ រហូតធ្លាក់ចូលទៅក្នុងភាពវឹកវរយ៉ាងធ្ងន់ធ្ងរបំផុត។

គណៈកម្មការរៀបចំការបោះឆ្នោត ក្រោមរបបសឹកមីយ៉ាន់ម៉ា កាលពីខែមករា ឆ្នាំ២០២៣ បានផ្តល់ឱកាស រយៈពេលពីរខែ ដល់គណបក្សនយោបាយនានា ដើម្បីចុះឈ្មោះឡើងវិញ ក្រោមច្បាប់បោះឆ្នោតថ្មីដ៏តឹងរឹង សរសេរឡើង ដោយពួកយោធា នៅមុនពេលការបោះឆ្នោតថ្មី ដែលរបបយោធា បានសន្យា ថា នឹងរៀបចំការបោះឆ្នោតឡើង។ ប៉ុន្តែគណបក្សនយោបាយដែលជាគូប្រជែងរបស់ពួកយោធា អះអាង ថា ការបោះឆ្នោតនេះ នឹងមិនប្រព្រឹត្ដទៅដោយសេរី និង យុត្តិធម៌នោះទេ។

ដោយឡែក បណ្ដាញទូរទស្សន៍របស់រដ្ឋ MRTV បានផ្សាយ ថា នៅក្នុងចំណោមគណបក្ស នយោបាយ ចំនួន៩០ ដែលមានស្រាប់នៅក្នុងបញ្ជីបោះឆ្នោត មានគណបក្សត្រឹមតែ៥០ប៉ុណ្ណោះ បានសុំចុះឈ្មោះឡើងវិញ ក្រោមច្បាប់ថ្មីនេះ។ ចំណែកគណបក្សដែលនៅសល់ទាំងនោះ នឹងត្រូវរំលាយ នៅថ្ងៃពុធនេះ។

លោកស្រី អ៊ោង សាន់ស៊ូជី បានបង្កើតគណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) ក្នុងឆ្នាំ ១៩៨៨ ហើយបានទទួលជ័យជម្នះយ៉ាងធំសម្បើម នៅក្នុងការបោះឆ្នោត កាលពីអំឡុងឆ្នាំ១៩៩០។ ប៉ុន្ដែគណបក្សរបស់លោកស្រី មិនបានគ្រប់គ្រងអំណាចនោះទេ ហើយត្រូវបានលុបចោលជាបន្តបន្ទាប់ ដោយរបបយោធា នាពេលនោះ។

បើទោះជាយ៉ាងណា គណបក្ស NLD នេះ នៅតែបន្ដនូវសេចក្តីប៉ងប្រាថ្នារបស់ខ្លួន សម្រាប់ការនាំលទ្ធិប្រជាធិបតេយ្យ មកកាន់ប្រទេសមីយ៉ាន់ម៉ា ក្រោមការគ្រប់គ្រងរបស់ពួកយោធា ហើយបានទទួលជ័យជម្នះជាថ្មី លើគណបក្សគាំទ្រដោយយោធា នៅក្នុងការបោះឆ្នោត នៅក្នុងឆ្នាំ២០១៥ និង ឆ្នាំ២០២០។ ភាពជាអ្នកដឹកនាំរបស់គណបក្ស NLD ត្រូវបានកាត់ផ្តាច់ ក្រោយអំពើរដ្ឋប្រហារយោធា និង ការបង្រ្កាបយ៉ាងបង្ហូរឈាមរបស់របបយោធា។ បន្ថែមពីលើនេះ អតីតសមាជិកសភាមួយរូបរបស់គណបក្ស NLD ក៏ត្រូវពួកយោធា កាត់ទោសប្រហារជីវិត នៅក្នុងការប្រើប្រាស់ទណ្ឌកម្មដំបូងរបស់ប្រទេសអាស៊ានមួយនេះ នៅក្នុងរយៈពេលជាច្រើនទសវត្សរ៍កន្លងមក៕

តាមសេចក្តីណែនាំ ស្តីពីការពង្រឹងវិធានការបង្ការអគ្គីភ័យ និងការលើកកម្ពស់សុខភាពការងាររបស់កម្មករនិយោជិតនៅតាមសហគ្រាស គ្រឹះស្ថាន ក្រសួងការងារ និងបណ្តុះបណ្តាលវិជ្ជាជីវៈបានដាក់ចេញវិធានការចាំបាច់១២ចំណុច នៅក្នុងរដូវប្រាំងដែលមានកម្តៅកើនឡើងគួរឱ្យកាត់សម្គាល់ដើម្បីបញ្ចៀសហានិភ័យណាមួយ។

ក្រោមការអនុម័តដោយឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ វិធានការ១២ចំណុចនោះរួមមាន៖

១-ត្រួតពិនិត្យ និងជំរុញការអនុវត្តតួនាទីនិងភារកិច្ចរបស់ក្រុមការងារសុវត្ថិភាព និងសុខភាពការងារ ប្រចាំសហគ្រាស គ្រឹះស្ថាន។
២-អប់រំ និងបណ្តុះបណ្តាលកម្មករនិយោជិតឱ្យយល់ដឹងអំពីសញ្ញាការសុវត្ថិភាព របៀបជម្លៀសខ្លួននិងធ្វើលំហាត់សមនៅពេលមានអាសន្ន។
៣-ត្រួតពិនិត្យជាប្រចាំនូវមធ្យោបាយសង្គ្រោះបឋមនិងដំណើរការគិលានដ្ឋានប្រចាំសហគ្រាស។
៤-ផ្តល់ទឹកស្អាត និងមានអនាម័យសម្រាប់បរិភោគឱ្យបានគ្រប់គ្រាន់ដល់កម្មករនិយោជិត។
៥-ត្រួតពិនិត្យ និងធ្វើតេស្តសាកល្បងប្រព័ន្ធ និងឧបករណ៍ការពារអគ្គិភ័យជាប្រចាំ ជាអាទិ៍ បំពង់ ពន្លត់អគ្គិភ័យ ប្រព័ន្ធបាញ់ទឹកដោយស្វ័យប្រវត្តិ ប្រព័ន្ធទុយោបាញ់ទឹកពន្លត់អគ្គិភ័យ កណ្តឹង ប្រកាសអាសន្ន ឧបករណ៍ចាប់ផ្សែង និងភ្លើងបំភ្លឺដោយស្វ័យប្រវត្តិនៅពេលដាច់ចរន្តអគ្គិសនី។
៦-ត្រួតពិនិត្យជាប្រចាំនូវច្រកអាសន្នដែលអាចជម្លៀសខ្លួនចេញដោយសុវត្ថិភាព គ្មានឧបសគ្គ មិនដាក់សម្ភារបាំង មិនចាក់សោរ និងមានភ្លើងបំភ្លឺដោយស្វ័យប្រវត្តិនៅពេលដាច់ចរន្តអគ្គិសនី។
៧-រៀបចំឱ្យមានផែនការឆ្លើយតបគ្រាអាសន្ន ចំពោះសហគ្រាស គ្រឹះស្ថានដែលប្រើប្រាស់សារ ធាតុងាយឆាបឆេះនិងរក្សាទុកដាក់សារធាតុទាំងនោះឱ្យនៅដាច់ដោយឡែកពីអគារធ្វើការ ឬអគារផលិតកម្ម។
៨-បង្កើនការត្រួតពិនិត្យជាប្រចាំនូវបណ្តាញផ្គត់ផ្គង់ចរន្តអគ្គិសនី ដែលជាមូលហេតុឱ្យមានអគ្គិភ័យ កើតឡើងជាយថាហេតុនៅកន្លែងធ្វើការ។
៩-ត្រួតពិនិត្យនិងថែទាំជាប្រចាំនូវប្រព័ន្ធបញ្ចេញបញ្ចូលខ្យល់នៅតាមអគារធ្វើការ និងបើកឱ្យ ដំណើរការឱ្យបានយ៉ាងហោច ១ម៉ោង មុនពេលអនុញ្ញាតឱ្យកម្មករនិយោជិតចូលធ្វើការ។
១០-បើកបង្អួច ទ្វារទាំងអស់ ឬបន្ថែមកង្ហារបញ្ចេញខ្យល់ ឬបឺតខ្យល់ចេញ ក្នុងអគារផលិតកម្មនៅ ពេលអាកាសធាតុកើនកំដៅ និងរៀបចំទុកដាក់សម្ភារនិងវត្ថុធាតុដើមឱ្យមានសណ្តាប់ធ្នាប់ និង សុវត្ថិភាពកុំឱ្យបាំងប្រភពខ្យល់ចេញចូល។
១១-ត្រួតពិនិត្យនិងចាត់វិធានការចាំបាច់ដើម្បីឆ្លើយតបទៅនឹងការសាយភាយនៃសារធាតុគ្រោះថ្នាក់
ដល់កម្មករនិយោជិត ដែលបណ្ដាលមកពីការប្រើប្រាស់សារធាតុពុល ថ្នាំសម្លាប់សត្វល្អិតពី ខាងក្រៅបរិវេណនៃសហគ្រាស គ្រឹះស្ថាន។
១២- ត្រួតពិនិត្យជាប្រចាំនូវការប្រើប្រាស់ឡចំហាយទៅតាមលក្ខណៈបច្ចេកទេស និងសុវត្ថិភាព ព្រមទាំងមានលិខិតអនុញ្ញាតពីក្រសួងស្ថាប័នជំនាញ ចំពោះសហគ្រាស គ្រឹះស្ថានដែលប្រើប្រាស់ឡចំហាយ។

ទន្ទឹមនឹងការដាក់ចេញនូវវិធានការសំខាន់ៗខាងលើនេះ ក្នុងករណីម្ចាស់ ឬនាយកសហគ្រាស គ្រឹះស្ថានមិនអនុវត្តតាមការណែនាំរបស់ក្រសួងការងារ នឹងត្រូវទទួលការពិន័យតាមច្បាប់ជាធរមាន៕

ប្រទេសថៃ ៖ កាលពីថ្ងៃទី២៨ ខែមីនា កន្លងមក ប៉ូលិសនៅខេត្តកំផែងពេជ្រ ប្រទេសថៃ បានចាប់ខ្លួនបុរសរោគចិត្តម្នាក់ឈ្មោះ អូផាស អាយុ២៧ឆ្នាំ ពីបទលួចខោអាវក្នុងស្រីៗរាប់រយទៅព្យួរនៅគុម្ពឫស្សីក្បែរផ្លូវ ។ អ្នកភូមិរស់នៅក្បែរនោះមានការងឿងឆ្ងល់ថា តើបុរសនេះលួចខោអាវក្នុងស្រីៗមកធ្វើអ្វី ។

តាមការសាកសួររបស់ប៉ូលិសទៅកាន់បុរសឈ្មោះ អូផាស ឱ្យដឹងថា ខ្លួនបានដើរលួចខោអាវក្នុងស្រីៗនៅតាមភូមិនានាដើម្បីយកមកបំបាត់ចំណង់ ព្រោះនៅពេលរូបគេផឹកស្រាស្រវឹង គេតែងតែមានតម្រូវការផ្លូវភេទខ្លាំង ។ បុរសរូបនេះបន្តថា គេបានយកខោអាវក្នុងស្រីៗមកស្រូបរហូតដល់អស់ក្លិន រួចក៏យកទៅព្យួរនៅគុម្ពឫស្សីក្បែរផ្លូវ ហើយចំពោះខោអាវក្នុងណាដែលទើបលួចបានថ្មីៗ គេយកមកស្រូបក្លិនបន្តទៀត ។

ក្រុមប៉ូលិសបានពិនិត្យមើលភស្តុតាង និងរឹបអូសខោអាវក្នុងទាំងនេះ បន្ទាប់មកចាប់ខ្លួនបុរសឈ្មោះ អូផាស ដើម្បីចាត់វិធានការបន្តតាមផ្លូវច្បាប់ ។ ចំណែកអ្នកភូមិរស់នៅក្បែរៗនោះបានមករកមើលខោអាវក្នុងទាំងនេះឃើញថា ជារបស់ពួកគេដែលប្រើប្រាស់រួចហើយ ។

នៅថ្ងៃដដែលនេះដែរ មានជនរងគ្រោះចំនួន៦នាក់បញ្ជាក់ថា ខោអាវក្នុងដែលពួកគេបាត់នោះ គឺនៅទីនេះទាំងអស់ ។ ដូច្នេះ ប៉ូលិសបានជូនដំណឹងទៅកាន់ពលរដ្ឋក្នុងភូមិថា បើអ្នកណាម្នាក់ធ្លាប់ត្រូវគេលួចខោអាវក្នុងបែបនេះ ពួកគេអាចមកប្តឹងបុរសខាងលើពីបទលួចទ្រព្យសម្បត្តិក្នុងលំនៅឋាននៅពេលយប់ ៕ ប្រភព ៖ khaosod

ប្រទេសវៀតណាម ៖ លោក Choi Joo Ho នាយកក្រុមហ៊ុន Samsung Vietnam Complex លើកឡើងថា ក្រុមហ៊ុននឹងមិនផ្លាស់ប្តូរទីតាំងផលិតទូរស័ព្ទស្មាតហ្វូនចេញពីប្រទេសវៀតណាមទៅកាន់ឥណ្ឌាទេ ។

តាមការចុះផ្សាយរបស់សារព័ត៌មាន The Korea Herald ឱ្យដឹងថា Samsung Electronics បានសម្រេចចិត្តផ្លាស់ប្តូរទីតាំងផលិតទំនិញរបស់ក្រុមហ៊ុនទៅកាន់ប្រទេសឥណ្ឌា រួមទាំងទូរស័ព្ទស្មាតហ្វូនដែលផលិតនៅវៀតណាមផងដែរ ហើយព័ត៌មាននេះបញ្ជាក់ទៀតថា ការផ្លាស់ប្តូរទីតាំងផលិត គឺដើម្បីកាត់បន្ថយផលប៉ះពាល់ដោយសារសង្គ្រាមពាណិជ្ជកម្មរវាងអាមេរិក និងចិន ព្រមទាំងចូលទៅកាន់ទីផ្សារធំលំដាប់ទី៥ លើពិភពលោក គឺប្រទេសឥណ្ឌា ។

ទោះយ៉ាងណា លោក Choi Joo Ho បានបដិសេធនឹងព័ត៌មានចុះផ្សាយនេះក្នុងកិច្ចប្រជុំជាមួយមន្ត្រីនៅខេត្ត Thai Nguyen ប្រទេសវៀតណាម ។ កិច្ចប្រជុំនេះរៀបចំឡើងនៅក្នុងរោងចក្ររបស់ Samsung Electronics ដោយលោក Choi Joo Ho ថ្លែងថា ទំនិញភាគច្រើនដែលក្រុមហ៊ុនផលិតនៅឥណ្ឌា គឺសម្រាប់លក់ក្នុងទីផ្សារប្រទេសឥណ្ឌា និងបាននាំចេញទំនិញបន្តិចបន្តួចប៉ុណ្ណោះទៅកាន់ទីផ្សារអាហ្វ្រិក ។ ចំណែកទូរស័ព្ទដៃជាច្រើនប្រភេទត្រូវបានផលិតនៅប្រទេសវៀតណាម និងនាំចេញទៅកាន់១២៨ប្រទេសនៅទូទាំងពិភពលោក ។ ដូច្នេះ ការផលិតរបស់ Samsung Electronics Vietnam នឹងមិនទទួលផលប៉ះពាល់ពីការផលិតនៅឥណ្ឌាទេ ។

ក្រៅពីនេះ លោក Choi Joo Ho បន្ថែមថា ក្រុមហ៊ុនបានចុះកិច្ចសន្យាវិនិយោគរយៈពេលវែងនៅខេត្ត Thai Nguyen ហើយកាលពីពេលថ្មីៗនេះ ក្រុមហ៊ុនក៏បានបន្ថែមប្រាក់វិនិយោគជិត១,២ពាន់លានដុល្លារអាមេរិកក្នុងរោងចក្រ Samsung Electro-Mechanics Vietnam ផងដែរ ដែលធ្វើឱ្យប្រាក់វិនិយោគរបស់ Samsung នៅក្នុងខេត្តនេះសរុបស្មើ៧,៥ពាន់លានដុល្លារអាមេរិក ។

តាមរបាយការណ៍របស់សវនករហិរញ្ញវត្ថុបញ្ជាក់ថា Samsung មានប្រាក់ចំណូលសរុបនៅឆ្នាំ២០២២ ស្មើ២,៣៤សែនលានដុល្លារអាមេរិក កើនឡើង៨% ពីឆ្នាំ២០២១ ។ រោងចក្រចំនួន៤កន្លែងនៅវៀតណាមទទួលបានប្រាក់ចំណូល៣០% នៃប្រាក់ចំណូលសរុបរបស់ក្រុមហ៊ុន ហើយបង្កើតប្រាក់ចំណេញរហូតដល់៤,៦ពាន់លានដុល្លារអាមេរិកផងដែរ ។

បច្ចុប្បន្ន Samsung Electronics Vietnam Thai Nguyen (SEVT) គឺជារោងចក្រផលិតទូរស័ព្ទស្មាតហ្វូនរបស់ Samsung ដ៏ធំបំផុតនៅលើពិភពលោក ដែលបានបង្កើតប្រាក់ចំណូលច្រើនបំផុតស្មើ២,៨ម៉ឺនលានដុល្លារអាមេរិក កើនឡើង១៣% ពីឆ្នាំ២០២១ ។ Samsung បានវិនិយោគប្រាក់នៅប្រទេសវៀតណាមចំនួន១,៨ម៉ឺនលានដុល្លារអាមេរិក ហើយក្រុមហ៊ុនក៏មានគម្រោងបន្ថែមប្រាក់វិនិយោគចំនួន២ម៉ឺនលានដុល្លារអាមេរិកទៀតផង ៕ ប្រភព ៖ AEC Connect