កញ្ញា រឿន ណាត អតីតម្ចាស់ជ័យលាភីបវរកញ្ញាចក្រវាលកម្ពុជា២០១៨ បានទម្លាយមូលហេតុដែលកប់ក្នុងចិត្តជាយូរក្នុងរយៈពេល៥ឆ្នាំមកនេះដែលខ្លួនមិនដែលជាន់ទឹកដីថៃចាប់តាំងពីប្រកួតនៅក្នុងកម្មវិធី Miss Universe ឆ្នាំ២០១៨មក។
ទន្ទឹមនឹងមានការប្រតិកម្មរបស់មហាជនអ្នកលេងបណ្តាញសង្គម ទៅលើបវរកញ្ញាថៃម្នាក់ដែលបានប្រើពាក្យប្រមាថជាតិសាសន៍ខ្មែរ តារាសម្តែង រឿន ណាត អតីតបវរកញ្ញាចក្រវាល បានបង្ហោះសារនៅថ្ងៃទី២៨ ខែមីនានេះថា «វាមិនមែជាលើកទីមួយទេដែលប្រទេសមួយនេះ បានមើលងាយមកកាន់ប្រទេសកម្ពុជា នេះហើយជាមូលហេតុដែលតាំងពីប្រកួតចប់ក្នុងប្រទេសនេះរយៈពេល ៥ឆ្នាំហើយដែលមិនដែលទៅម្តងទៀត ព្រោះកាលពីទៅប្រកួតទទួលបានការមើលងាយខ្លាំង (មិនចេះអៀបអប)»។
គួរបញ្ជាក់ផងដែរថា កញ្ញា រឿន ណាត បានតំណាងប្រទេសកម្ពុជាចូលរួមប្រកួតលើឆាកអន្តរជាតិកម្មវិធី Miss Universe ២០១៨ ដែលរៀបចំឡើងនៅប្រទេសថៃ ដោយអំឡុងពេលប្រកួតអតីតបវរកញ្ញារូបនេះបាននាំយកក្រមាខ្មែរចែកជូនជនបរទេសផងដែរ។ ទោះបីជាកាលនោះរូបនាងពុំទទួលបានជ័យលាភីណាមួយនៅក្នុងកម្មវិធី តែអ្នកគាំទ្រកម្ពុជាបានពោលសរសើរ និងលើកទឹកចិត្តនាងយ៉ាងខ្លាំង៕
