ប្រទេសរុស្ស៊ី ៖ ទីភ្នាក់ងារសន្តិសុខកណ្តាលរុស្ស៊ីបានថ្លែងកាលពីថ្ងៃទី៣០ ខែមីនាថា ប្រទេសរុស្ស៊ីបានចាប់ឃុំខ្លួនអ្នកកាសែតរបស់ The Wall Street Journal ជនជាតិអាមេរិកដោយសារសង្ស័យថា ជាភ្នាក់ងារសម្ងាត់មកស៊ើបការណ៍ព័ត៌មានពីរុស្ស៊ី រួចបញ្ជូនទៅឱ្យរដ្ឋាភិបាលអាមេរិក ។ ការចាប់ខ្លួនអ្នកកាសែតអាមេរិកនេះ គេចាត់ទុកថា ជាសកម្មភាពដ៏អាក្រក់បំផុតក្នុងវិស័យសារព័ត៌មាន ចាប់តាំងពីរុស្ស៊ីវាយប្រហារអ៊ុយក្រែនអស់រយៈពេលជាង១ឆ្នាំ ។

សេចក្តីថ្លែងការណ៍ពីទីភ្នាក់ងារសន្តិសុខកណ្តាលរុស្ស៊ីបញ្ជាក់ថា រុស្ស៊ីបានចាប់ខ្លួនលោក Evan Gershkovich អ្នកកាសែតជនជាតិអាមេរិក ហើយរុស្ស៊ីបានបើកការស៊ើបអង្កេតរឿងក្តីព្រហ្មទណ្ឌទៅលើជនសង្ស័យ Evan Gershkovich ពីបទលួចស៊ើបការណ៍ព័ត៌មានសម្ងាត់ ។ ទីភ្នាក់ងារសន្តិសុខកណ្តាលរុស្ស៊ីអះអាងថា អ្នកកាសែតអាមេរិករូបនេះកំពុងប្រមូលព័ត៌មានអំពីរោងចក្រយោធារុស្ស៊ី ដែលរុស្ស៊ីចាត់ទុកថា ជាព័ត៌មានសម្ងាត់របស់ជាតិ ។

ទោះយ៉ាងណា រុស្ស៊ីមិនបានបញ្ជាក់ពីឈ្មោះ ឬទីតាំងរោងចក្រយោធានេះទេ ប៉ុន្តែរុស្ស៊ីនិយាយថា លោក Evan Gershkovich ត្រូវបានគេឃុំខ្លួននៅទីក្រុង Yekaterinburg ខណៈរូបលោកកំពុងព្យាយាមស៊ើបការណ៍ព័ត៌មានសម្ងាត់ ។ ទោះយ៉ាងណា រុស្ស៊ីមិនបានបង្ហាញភស្តុតាងនានាថា អ្នកកាសែតរូបនេះពិតជាធ្វើខុសនោះទេ ។

ទីភ្នាក់ងារសន្តិសុខកណ្តាលរុស្ស៊ីបានបញ្ជាក់ក្នុងសេចក្តីថ្លែងការណ៍ថា អាមេរិកបានបញ្ជូនលោក Evan Gershkovich មកកាន់រុស្ស៊ី ដើម្បីបំពេញការងារជាអ្នកប្រមូលព័ត៌មានសម្ងាត់ពាក់ព័ន្ធនឹងសកម្មភាពយោធារុស្ស៊ី ។

ចាប់តាំងពីរុស្ស៊ីបញ្ជូនកងទ័ពវាយប្រហារអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ រុស្ស៊ីក៏បានបង្កើនការរឹតបន្តឹងច្បាប់ត្រួតពិនិត្យទិន្នន័យរបស់ខ្លួន ។ រីឯសារព័ត៌មានរបស់រុស្ស៊ីឈ្មោះ Kommersant រាយការណ៍ថា លោក Evan Gershkovich ត្រូវបានគេបញ្ជូនទៅកាន់ទីក្រុងមូស្គូ និងជាប់គុកនៅ Lefortovo ជាកន្លែងឃុំឃាំង មុននឹងទីភ្នាក់ងារសន្តិសុខកណ្តាលរុស្ស៊ីកាត់ក្តី ។

សារព័ត៌មាន Reuters បានសួរសំណួរពីការចាប់ខ្លួននេះទៅកាន់សារព័ត៌មានពាក់ព័ន្ធ រួមទាំងស្ថានទូតអាមេរិកប្រចាំទីក្រុងមូស្គូផងដែរ ប៉ុន្តែស្ថាប័នទាំងពីរនេះមិនទាន់បានឆ្លើយតបអ្វីទេ ខណៈប្រភពព័ត៌មានរបស់មន្ត្រីទូតអាមេរិកនិយាយថា ខាងស្ថានទូតមិនបានទទួលព័ត៌មានពីហេតុការណ៍ចាប់ឃុំខ្លួនអ្នកកាសែតអាមេរិកទេ ហើយកំពុងស្នើសុំព័ត៌មានបន្ថែមពីអាជ្ញាធររុស្ស៊ី ។

ចំណែកសារព័ត៌មានក្រៅប្រទេសផ្សេងទៀតដែលបានតាមដានពីស្ថានការណ៍រុស្ស៊ី ក៏បានធ្វើការគាំទ្រលោក Evan Gershkovich ព្រមទាំងបញ្ជាក់ថា លោកជាអ្នកសារព័ត៌មានអាជីព មិនមែនជាភ្នាក់ងារស៊ើបការណ៍សម្ងាត់ដូចរុស្ស៊ីចោទប្រកាន់ទេ ៕ ប្រភព ៖ The standard

ប្រទេសរុស្ស៊ី ៖ តាមសារព័ត៌មានបង្ហាញថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានអំពាវនាវឱ្យរដ្ឋាភិបាលរុស្ស៊ីព្យាយាមជំរុញសេដ្ឋកិច្ច ខណៈមានការដាក់ទណ្ឌកម្មលើរុស្ស៊ីពីបណ្តាប្រទេសលោកខាងលិចអាចធ្វើឱ្យប៉ះពាល់ដល់សេដ្ឋកិច្ចរុស្ស៊ី ។

លោក ពូទីន ថ្លែងថា យើងចាំបាច់ត្រូវតែផ្តល់ការគាំទ្រ និងបង្កើតភាពរឹងមាំដល់សេដ្ឋកិច្ចរបស់យើង ដោយការបន្ថែមប្រសិទ្ធភាព ហើយត្រូវតែដំណើរការយ៉ាងឆាប់រហ័ស ។ ក្រៅពីនេះ លោក ពូទីន ក៏បានជំរុញឱ្យលើកលែងការរឹតបន្តឹងលើក្រុមហ៊ុននានា ដែលជាឧបសគ្គដល់ការប្រកបអាជីវកម្ម រួមទាំងផ្នែកហិរញ្ញវត្ថុ និង logistics ផងដែរ ។

វិធានការដាក់ទណ្ឌកម្មពីប្រទេសលោកខាងលិច គឺជាសង្គ្រាមសេដ្ឋកិច្ចដែលធ្វើឡើងក្នុងគោលដៅធ្វើឱ្យប្រទេសរុស្ស៊ីឯកោ និងសេដ្ឋកិច្ចរុស្ស៊ីធ្លាក់ចុះ ។ បណ្តាមេដឹកនាំប្រទេសលោកខាងលិចសង្ឃឹមថា ការដាក់ទណ្ឌកម្មនេះនឹងធ្វើឱ្យរដ្ឋាភិបាលរុស្ស៊ីផ្លាស់ប្តូរគំនិតរបស់ខ្លួនក្នុងការធ្វើសង្គ្រាមនៅប្រទេសអ៊ុយក្រែន ។

គួរបញ្ជាក់ថា កាលពីថ្ងៃទី២៣ ខែមីនា កន្លងមក នាយករដ្ឋមន្ត្រីរុស្ស៊ី លោក Mikhail Mishustin បានថ្លែងថា សេដ្ឋកិច្ចរុស្ស៊ីអាចទប់ទល់នឹងការដាក់ទណ្ឌកម្មរបស់ប្រទេសលោកខាងលិចកាលពីឆ្នាំ២០២២ ហើយបច្ចុប្បន្ននេះ សេដ្ឋកិច្ចរុស្ស៊ីបានត្រឡប់មករីកលូតលាស់ឡើងវិញ ហើយលោករំពឹងថា រយៈពេលងើបឡើងវិញនៃសេដ្ឋកិច្ចរុស្ស៊ី នឹងដំណើរការយ៉ាងឆាប់រហ័សនៅឆ្នាំ២០២៤ ៕ ប្រភព ៖ BTimes

រាជធានីគួឡាឡាំពួរ៖ នាយករដ្ឋមន្រ្ដីម៉ាឡេស៊ី ធ្វើដំណើរទៅកាន់ទីក្រុងប៉េកាំង ត្រូវគេរំពឹង ថា នឹងស្វះស្វែងរកចំណងទំនាក់ទំនងសេដ្ឋកិច្ច ឲ្យកាន់តែស៊ីជម្រៅ ជាមួយនឹងមហាយក្សអាស៊ី ហើយបន្ដរក្សាសន្ដិសុខជាមួយមហាអំណាចលោកខាងលិច ក៏ដូចជា ការដោះស្រាយបញ្ហាប្រឈមនឹងនានា នៅក្នុងសមុទ្រចិនខាងត្បូង និង ការពិភាក្សា អំពីបញ្ហាជាច្រើនទៀត ជាមួយនឹងលោក ស៊ី ជិនពីង (Xi Jinping) ប្រធានាធិបតីចិន។

សារ័ត៌មាន Al Jazeera បានចេញផ្សាយ កាលពីព្រឹក ថ្ងៃព្រហស្បតិ៍ ទី៣០ ខែមីនា ឆ្នាំ២០២៣ ថា ក្រុមអ្នកវិភាគ បានអះអាង ថា លោក អានវ៉ា អ៊ីប្រាហ៊ីម (Anwar Ibrahim) នាយករដ្ឋមន្រ្ដីម៉ាឡេស៊ី ត្រូវបានគេរំពឹង ថា នឹងស្វែងរកនូវទំនាក់ទំនងសេដ្ឋកិច្ច ឲ្យកាន់តែស៊ីជម្រៅ ជាមួយដៃគូពាណិជ្ជកម្មដ៏ធំបំផុត នៃប្រទេសរបស់គាត់ និង ការដោះស្រាយបញ្ហាដ៏រសើប ដូចជា បញ្ហាសមុទ្រចិនខាងត្បូង នៅក្នុងអំឡុងពេលដំណើរទស្សនកិច្ចជាលើកដំបូងរបស់គាត់ ទៅកាន់ប្រទេសចិន ក្នុងឋានៈជាប្រមុខរដ្ឋាភិបាល។

លោកនាយករដ្ឋមន្រ្ដីម៉ាឡេស៊ី បានទៅដល់រដ្ឋធានីប៉េកាំង កាលពីថ្ងៃពុធ ហើយគាត់មានគម្រោងជួបជាមួយនឹងលោក ហ្សាវ ឡេជី (Zhao Leji) ប្រធានសភាជាតិរបស់ប្រជាជន និង នាយកប្រតិបត្ដិរបស់ក្រុមហ៊ុនសាងសង់គមនាគមន៍ចិន ដែលជាក្រុមហ៊ុនម៉ៅការលើគម្រោងតភ្ជាប់ផ្លូវដែកឆ្នេរសមុទ្រខាងកើតរបស់ម៉ាឡេស៊ី។ លោក អានវ៉ា ក៏នឹងជួបលោក ស៊ី ជិនពីង ប្រធានាធិបតីចិន នៅថ្ងៃសុក្រ នៅក្នុងដំណើរទស្សនកិច្ចរបស់គាត់ រយៈពេល៤ថ្ងៃ នៅក្នុងប្រទេសមហាយក្សអាស៊ីមួយនេះ។ ក្រៅពីនេះ លោកនាយករដ្ឋមន្រ្ដី អានវ៉ា ក៏នឹងចរចាជាមួយមេដឹកនាំពាណិជ្ជកម្មរបស់ចិន និង លោក លី គាង (Li Qiang) នាយករដ្ឋមន្រ្ដីចិន។

លោក ហ្សាមប្រ៊ី អាប់ឌូល កាឌា (Zambry Abdul Kadir) រដ្ឋមន្ត្រីការបរទេសម៉ាឡេស៊ី បានបញ្ជាក់ កាលពីថ្ងៃពុធ ថា លោកនាយករដ្ឋមន្រ្ដី អានវ៉ា នឹងបើកកិច្ចពិភាក្សាជាមួយនឹងប្រធានាធិបតីចិន ហើយគេរំពឹង ថា នឹងផ្តោតទៅលើវិធានការជាក់ស្តែង អាចអនុវត្ត នៅក្នុងវិស័យពាណិជ្ជកម្ម កិច្ចសហប្រតិបត្តិការនយោបាយ ការទប់ស្កាត់នឹងអំពើពុករលួយ និង បញ្ហាជាច្រើនទៀត។

លោក អានវ៉ា បានជាប់ឆ្នោត ក្លាយជានាយករដ្ឋមន្រ្ដីទី១០របស់ម៉ាឡេស៊ី នៅក្នុងខែវិច្ឆិកា ឆ្នាំ២០២២ ហើយគាត់កំពុងតែធ្វើឲ្យដំណើរទស្សនកិច្ចរបស់គាត់ ប្រឆាំងនឹងការនៅពីក្រោយឆាកសង្គ្រាមពាណិជ្ជកម្ម និង បច្ចេកវិទ្យា រវាងសហរដ្ឋអាមេរិក និង ចិន ដែលកំពុងតែតានតឹងឡើង។ បញ្ហានេះ ធ្វើឲ្យមានភាពស្មុគស្មាញយ៉ាងខ្លាំង ដល់កិច្ចខិតខំប្រឹងប្រែងរបស់ប្រទេសម៉ាឡេស៊ី នៅក្នុងការរក្សាទំនាក់ទំនងជាវិជ្ជមាន ជាមួយនឹងប្រទេសមហាអំណាចសេដ្ឋកិច្ចកំពូលទាំង២របស់ពិភពលោក។

ប្រទេសចិន ក្លាយជាដៃគូពាណិជ្ជកម្មដ៏ធំបំផុតរបស់ម៉ាឡេស៊ី នៅក្នុងរយៈពេល១៤ឆ្នាំជាប់ៗគ្នា ជាមួយនឹងទំហំពាណិជ្ជកម្មទ្វេភាគី កើនឡើង រហូតដល់២០៣,៦ពាន់លានដុល្លារ នៅក្នុងឆ្នាំ២០២២។ ប៉ុន្តែទោះជាយ៉ាងណា ក្រុងគួឡាឡាំពួរ ក៏នៅតែរក្សាទំនាក់ទំនងសេដ្ឋកិច្ច និងសន្តិសុខយ៉ាងជិតស្និទ្ធ ជាមួយសហរដ្ឋអាមេរិក ខណៈទំហំពាណិជ្ជកម្ម នៃប្រទេសទាំង២ កើនដល់ដល់៧២,៩ពាន់លានដុល្លារ កាលពីឆ្នាំមុន។

ម៉ាឡេស៊ី ក្លាយជាប្រទេសនាំចេញ Semiconductor ដ៏ធំបំផុតលំដាប់លេខ៦ នៅលើពិភពលោក ដោយមានទំហំ៦,៣ភាគរយ នៃចំនួនសរុបបន្ទះឈីបរបស់ពិភពលោក។ បន្ទះឈីបនេះ ក្លាយជាសមាសធាតុដ៏សំខាន់បំផុត សម្រាប់គ្រឿងអេឡិចត្រូនិកប្រើប្រាស់ប្រចាំថ្ងៃ ហើយវាក៏ក្លាយជាគោលដៅដ៏សំខាន់ សម្រាប់ការទណ្ឌកម្មរបស់សហរដ្ឋអាមេរិក ដោយមានបំណង ពន្យឺតដល់ការរីកចម្រើន លើវិស័យបច្ចេកវិទ្យារបស់ចិន ផងដែរ។

លោក ហ៊ូ ឈីវ ភីង (Hoo Chiew Ping) សាស្ត្រាចារ្យផ្នែកទំនាក់ទំនងអន្តរជាតិ នៃសាកលវិទ្យាល័យជាតិម៉ាឡេស៊ី បានបញ្ជាក់ ថា កិច្ចសហប្រតិបត្តិការបែបនេះ នឹងមិនប៉ះពាល់ដល់ទំនាក់ទំនងទ្វេភាគីខាងនយោបាយនោះឡើយ។ ប៉ុន្ដែប្រសិនបើម៉ាឡេស៊ី មានបំណងចង់ជំរុញកិច្ចសហប្រតិបត្តិការ ជាមួយប្រទេសចិន ជាពិសេស នៅក្នុងវិស័យបច្ចេកវិទ្យានោះ ក្រុងគួឡាឡាំពួរ នឹងមានការចាំបាច់ ត្រូវតែពិចារណា អំពីលទ្ធភាព នៃសម្ពាធរបស់សហរដ្ឋអាមេរិក ហើយត្រូវតែស្វែងរកខ្សែបន្ទាត់ដ៏ពិសេសមួយ សម្រាប់ជំរុញកិច្ចសហប្រតិបត្តិការបច្ចេកវិទ្យា ដើម្បីផលប្រយោជន៍ជាតិ ព្រោះវានៅតែអាចបញ្ចុះបញ្ចូល ទាំងសហរដ្ឋអាមេរិក និងចិន បាន។

លោក ង៉ូវ ចូវប៊ីង (Ngeow Chow Bing) នាយកវិទ្យាស្ថានសិក្សាពីចិន នៃសាកលវិទ្យាល័យ Malaya បានអះអាង ថា ការដាក់ទណ្ឌកម្មបន្ថែមទៀតរបស់សហរដ្ឋអាមេរិក អាចនឹងប៉ះពាល់ដល់ក្រុមហ៊ុនមួយចំនួនរបស់ម៉ាឡេស៊ី ដែលបង្កើតជាខ្សែសង្វាក់ផ្គត់ផ្គង់ ដល់ប្រទេសចិន៕