ទោះខំនិយាយយ៉ាងណាក៏នៅតែមិនសមហេតុផល! ក្រោយយោធាថៃប្រកាសក្ដែងៗថា មីនដែលទើបរកឃើញនៅតាមព្រំដែន គឺជាមីនថ្មីដែលទាហានកម្ពុជាលួ.ចចូលមកដាំនៅក្នុងទឹកដីថៃ ពេលនេះស្រាប់តែត្រូវពលរដ្ឋខ្លួនចោ.ទសួរវិញថា ចុះតើពេលនោះទាហានថៃនាំគ្នាបាត់ទៅណា? ហេតុអ្វីបានជាបណ្ដោយឲ្យគេចូលមកបានតាមចិត្តដូច្នេះ?

យោងតាមការចុះផ្សាយរបស់ប្រព័ន្ធផ្សព្វផ្សាយក្នុងស្រុកថៃ កាលពីកន្លងទៅថ្មីៗនេះបានឲ្យដឹងថា កងទ័ពភូមិន្ទថៃបានធ្វើការច្រានចោលការបកស្រាយរបស់កម្ពុជា ថាគ្រាប់មីនដែលទាហានថៃបានដើរជាន់ផ្ទុះដា.ច់ជើងក្នុងពេលកន្លងមកគឺជាសំណល់យុទ្ធភណ្ឌចាស់ ដែលនៅសេសសល់តាមបណ្ដោយព្រំដែន។

ក្នុងនោះទំព័រហ្វេសប៊ុករបស់កងទ័ពភូមិន្ទថៃបានអះអាងថា លទ្ធផលត្រួតពិនិត្យរបស់មន្រ្តី TMAC របស់ថៃបានបង្ហាញថា គ្រាប់ទាំងអស់នោះគឺសុទ្ធសឹងតែជាមីនដែលទើបត្រូវបានគេដាក់ដាំថ្មីៗ។ កងទ័ពថៃថែមបានចោ.ទប្រកាន់ដោយគ្មានភ័ស្តុតាងទៀតថា មីនថ្មីដែលត្រូវបានរកឃើញទាំងនោះ គឺជាស្នាដៃរបស់ទាហានកម្ពុជា ដែលលួ.ចកាត់បន្លាលួសហើយចូលមកបង្កប់ក្នុងទឹកដីថៃ ក្នុងគោលបំណងគំរា.មកំហែងដល់សន្តិសុខ និងសុវត្ថិភាពទាហានថៃដែលដើរល្បាតតាមព្រំដែន។

យ៉ាងណាមិញ ការលើកឡើងដែលថៃគិតថាមានលក្ខណៈសមស្របគ្រប់គ្រាន់ក្នុងការបង្កាច់បង្ខូចកេរ្តិ៍ឈ្មោះរបស់កម្ពុជានេះ មិនសូវទទួលបានការចាប់អារម្មណ៍ខ្លាំងពីអន្តរជាតិប៉ុន្មានឡើយ។ តែផ្ទុយទៅវិញ វាបែរជាត្រូវបានពលរដ្ឋថៃមានការងឿងឆ្ងល់ និងយកវាមកធ្វើជាប្រធានបទសម្រាប់សួរដេញជើងមេបញ្ជារការយោធានៅតាមភូមិសាស្រ្តនីមួយៗថា ប្រសិនបើដូចការអះអាងនេះ ចុះតើក្នុងកំឡុងពេលដែលទាហានខ្មែរទាំងនោះចូលមកធ្វើសកម្មភាពបង្កប់មីន គ្មានទាហានថៃនៅប្រចាំការតាមគោលដៅទេមែនទេ? ហេតុអ្វីបានជាមិនដឹងថាគេចូលមកដាក់មីន?

លើសពីនោះ ពួកគេក៏បានបង្ហាញអារម្មណ៍ខកចិត្តចំពោះកម្លាំងការពារជាតិថៃសព្វថ្ងៃផងដែរថា «បើគ្រាន់តែបន្លាលួសក៏ការពារមិនបានផងនោះ តើការពារទឹកដីថៃដែលកម្ពុជាកំពុងកាន់កាប់នោះបានដោយរបៀបណាទៅ? »

សំណួរចាក់ដោត ដែលសម្ដែងពីការបាត់បង់ទំនុកចិត្តរបស់ពលរដ្ឋមកលើកងកម្លាំងថៃដូចខាងលើ បានជំរុញឲ្យមេបញ្ជាការថៃគ្រប់តំបន់ទាំងអស់ ជាពិសេសតំបន់ភូមិភាគទី២ ដែលជាអ្នកប្រកាសថារកឃើញមីន នាំគ្នាបិទមាត់ស្ងាត់ជ្រៀប ព្រោះមិនដឹងបកស្រាយបន្តដូចម្ដេច បានត្រឹមតែអំពាវនាវឲ្យពលរដ្ឋមានជំនឿចិត្តលើទ័ពជួរមុខក្នុងការការពារអធិបតេយ្យភាព ដោយសន្យាថានឹងអនុវត្តភារកិច្ចរបស់ខ្លួនដោយការតាំងចិត្តខ្ពស់បំផុត។

គួរជម្រាបថា បញ្ហាគ្រាប់មីនថ្មីតាមព្រំដែន គឺជាបញ្ហាដែលយោធាថៃតែងប្រឌិតឡើងដើម្បីជាការបង្កើតស្ថានការណ៍បង្កហេតុដាក់កម្ពុជាយ៉ាងពិតប្រាកដ ព្រោះបើគ្រាន់តែគិតឲ្យងាយយល់ ក្នុងករណីមីននោះជាមីនចាស់របស់កម្ពុជា នោះវាបង្ហាញថាទាហានថៃបានដើរល្មើសអធិបតេយ្យចូលទឹកដីកម្ពុជា។ ប៉ុន្តែបើថៃអះអាងថានោះគឺជាមីនថ្មី ដូច្នេះនោះច្បាស់ណាស់ថាវាជាមីនរបស់ថៃខ្លួនឯង ព្រោះគ្មានទាហានកម្ពុជាណាម្នាក់អាចចូលទៅលួចដាក់ក្នុងទឹកដីថៃបានទេ៕

ខេត្តសុងក្លា៖ យោងតាមសេចក្ដីរាយការណ៍តាមប្រព័ន្ធផ្សព្វផ្សាយអំពីស្ថានភាពទឹកជំនន់នៅភាគខាងត្បូងប្រទេសថៃ គិតត្រឹមថ្ងៃទី២៥ ខែវិច្ឆិកា បានបង្ហាញថា មានមនុស្សចាស់រាប់សិបនាក់កំពុងជាប់គាំងនៅលើដំបូលផ្ទះអស់រយៈពេលជាង ៤០ម៉ោងមកហើយ ខណៈមានខ្លះបានដេកចាំរហូតដល់ស្លា.ប់ថែមទៀត ព្រោះគ្មានអ្នកជួយសង្គ្រោះ។

បើតាមការបង្ហោះនៅលើគណនីហ្វេសប៊ុកពលរដ្ឋថៃម្នាក់ឈ្មោះ Kunnay Mam បានឲ្យដឹងថា៖ វាមានរយៈពេល ៤០ ម៉ោងហើយ គ្មាននរណាម្នាក់មកទេ។ នេះជាយប់ទីពីរហើយ ដែលយើងបានដេកលើដំបូលផ្ទះដើម្បីរង់ចាំជំនួយ ដោយបាត់បង់ក្តីសង្ឃឹម។ តាមរយៈការបង្ហោះនោះ គេសង្កេតឃើញថាអ្នកដែលកំពុងរង់ចាំការជួយសង្គ្រោះទាំងនោះ គឺសុទ្ធសឹងតែជាមនុស្សចាស់ជរា ដែលអង្គុយទាំងរងារញ័រញាក់គួរឲ្យសង្វេ.គ។

ដោយឡែក គណនីមួយទៀតឈ្មោះ Pang Natchanun បានបង្ហោះថា៖ បើទោះជាទឹកស្រកចុះបានបន្តិច ប៉ុន្តែយើងនៅតែមិនអាចចាកចេញពីផ្ទះបាន ដោយសារតែទូកសង្រ្គោះ និងឧទ្ធម្ភាគចក្រ មិនអាចចូលមកដល់បាន រីឯបណ្ដាញទាក់ទងក៏ត្រូវបានកាត់ផ្ដាច់ថែមទៀត។ ស្ថានភាពកាន់តែអាក្រ.ក់ជាងម្សិលមិញទៅទៀត ពេលនេះម្នាក់ៗនឿយហត់ អស់កម្លាំង និងឃ្លានខ្លាំងណាស់ ខ្ញុំពិតជាគ្មានពាក្យសម្រាប់បរិយាយអំពីទុក្ខវេទនានេះទេ។

តាមការចុះផ្សាយរបស់ទូរទស្សន៍ Amarin TV ស្ថានភាពទឹកជំនន់ក្នុងស្រុក Hat Yai ខេត្ត Songkhla បានឈានដល់កម្រិតគ្រោះថ្នាក់បំផុត ហើយតាមរយៈរូបថតដែលបង្ហាញដោយមូលនិធិ Tek Tung ភាគខាងត្បូង គេបានឃើញមនុស្សម្នាក់បានដេកស្លា.ប់នៅលើដំបូលផ្ទះរបស់ខ្លួន ខណៈបានរង់ចាំការជួយសង្គ្រោះទាំងអស់សង្ឃឹមអស់រយៈពេលជាច្រើនថ្ងៃ។

គួរជម្រាបថា តួលេខមនុស្សស្លា.ប់ក្នុងគ្រោះទឹកជំនន់ដ៏កា.ចសាហា.វនៅភាគខាងត្បូងប្រទេសថៃ បើគិតត្រឹមថ្ងៃអង្គារទី២៥ខែវិច្ឆិកាឆ្នាំ២០២៥ បានកើនដល់១៣នាក់ហើយ ខណៈក្នុងនោះភាគច្រើនបានស្លា.ប់ដោយសារឆក់ខ្សែភ្លើង។

ជាមួយគ្នានេះ អាជ្ញាធរបានប្រកាសស្រុកទាំង១៦នៅក្នុងខេត្តសុងក្លា (Songkhla) ថាជាតំបន់គ្រោះមហន្តរាយ បន្ទាប់ពីស្រុកហាដយ៉ៃ (Hat Yai) បានកត់ត្រាបរិមាណទឹកភ្លៀងធ្លាក់ខ្លាំងបំផុតក្នុងមួយថ្ងៃមិនធ្លាប់មានក្នុងរយៈពេល ៣០០ឆ្នាំ។ កងទ័ពជើងទឹកភូមិន្ទថៃ (RTN) កំពុងដាក់ពង្រាយនាវា HTMS Chakri Naruebet ដ៏ធំបំផុតរបស់ខ្លួន រួមជាមួយឧទ្ធម្ភាគចក្រចំនួនពីរគ្រឿង និងក្រុមប្រតិបត្តិការពិសេស ដើម្បីគាំទ្រដល់កិច្ចខិតខំប្រឹងប្រែងនៅក្នុងការជួយសង្គ្រោះប្រជាពលរដ្ឋ៕

ប្រទេសអេត្យូពី ៖ ភ្នំភ្លើង Hayli Gubbi នៅប្រទេសអេត្យូពី បានផ្ទុះ ឡើងកាលពីចុងសប្តាហ៍ទី៣ ខែវិច្ឆិកា ឆ្នាំ២០២៥ និងជាការផ្ទុះ ជាថ្មីបន្ទាប់ពីស្ងប់ស្ងាត់អស់រយៈពេល១ម៉ឺន២ពាន់ឆ្នាំ ដោយបញ្ចេញផ្សែងផេះខ្មៅយ៉ាងក្រាស់គ្របដណ្តប់លើអេត្យូពី និងប្រទេសជាច្រើន រួមមាន ៖ ឥណ្ឌា ប៉ាគីស្ថាន អូម៉ង់ និងយេម៉ែន ។ បន្ទុះភ្នំភ្លើងនេះបានក្លាយជាឧបសគ្គដល់ការហោះហើររបស់យន្តហោះក្រុមហ៊ុនអាកាសចរណ៍ជាច្រើនត្រូវបង្ខំចិត្តលុបចោលការធ្វើដំណើរភ្លាមៗដោយសារបារម្ភពីគ្រោះថ្នា.ក់ ។

តាមការលើកឡើងរបស់អាជ្ញាធរក្នុងតំបន់ បន្ទុះភ្នំភ្លើង Hayli Gubbi លើកនេះពុំបណ្តាលឱ្យពលរដ្ឋរងរបួស ឬបាត់បង់ជីវិតទេ ប៉ុន្តែវាប៉ះពាល់ដល់កសិដ្ឋានចិញ្ចឹមសត្វ និងវាលស្មៅសម្រាប់សត្វចិញ្ចឹម ។ អ្នកជំនាញភ្នំភ្លើងថា បើទោះជាបន្ទុះភ្នំភ្លើងបានបញ្ចេញផ្សែងផេះគ្របដណ្តប់ពាសពេញអាកាសទាំងអស់ ប៉ុន្តែរហូតមកដល់ថ្ងៃទី២៥ ខែវិច្ឆិកា ឆ្នាំ២០២៥ ពុំទាន់មានការបំពុលបរិស្ថាននៅអេត្យូពីដោយសារផ្សែងផេះទេ ប៉ុន្តែវាអាចប៉ះពាល់ដល់បរិស្ថានខ្លាំងនៅទីក្រុងញូវដេលី ប្រទេសឥណ្ឌា ។

ផលប៉ះពាល់ដោយសារផ្សែងផេះភ្នំភ្លើង Hayli Gubbi បានធ្វើឱ្យជើងហោះហើរជាច្រើនរបស់ក្រុមហ៊ុនអាកាសចរណ៍ទាំងក្នុង និងក្រៅប្រទេសលុបចោល ឬពន្យារពេលការធ្វើដំណើរ ខណៈជើងហោះហើរខ្លះទៀតសម្រេចចិត្តផ្លាស់ប្តូរគោលដៅទៅឥណ្ឌា ។ អាជ្ញាធរគ្រប់គ្រងអាកាសចរណ៍អេត្យូពីបានសុំការសហការពីគ្រប់ក្រុមហ៊ុនអាកាសចរណ៍ឱ្យអនុវត្តតាមការណែនាំយ៉ាងម៉ឺងម៉ាត់ ខណៈឥណ្ឌា និងប៉ាគីស្ថានប្រកាសទៅកាន់ក្រុមហ៊ុនអាកាសចរណ៍នានាឱ្យបង្កើនការប្រុងប្រយ័ត្ន ក្រោយពីផ្សែងផេះភ្នំភ្លើងគ្របដណ្តប់លើអាកាសក្នុងប្រទេសទាំងពីរ ។

ពលរដ្ឋរស់នៅតំបន់អាហ្វារៀបរាប់ថា បន្ទុះភ្នំភ្លើងឮសំឡេងយ៉ាងខ្លាំងស្រដៀងនឹងការគប់គ្រាប់បែក ដែលធ្វើឱ្យមនុស្សជាច្រើនសម្រុកធ្វើដំណើរទៅកាន់វាលខ្សាច់ Danakil ដែលជាតំបន់ទេសចរណ៍ ។ នេះជាការផ្ទុះឡើងជាថ្មីម្តងទៀតរបស់ភ្នំភ្លើងនេះ បន្ទាប់ពីវាស្ងប់ស្ងាត់អស់រយៈពេល១ម៉ឺន២ពាន់ឆ្នាំ ។

យោងតាមរបាយការណ៍របស់ Skymet Weather ដែលជាភ្នាក់ងារអាកាសធាតុឯកជន គឺវាពិបាកណាស់ក្នុងការកម្ចាត់ផ្សែងផេះភ្នំភ្លើងដែលគ្របដណ្តប់ពាសពេញអាកាស ប៉ុន្តែនាយកដ្ឋានឧតុនិយមឥណ្ឌាព្យាករថា ផ្សែងផេះភ្នំភ្លើងនឹងបម្លាស់ទីយ៉ាងឆាប់រហ័សទៅកាន់ភាគខាងកើត រួចហើយវានឹងគ្របដណ្តប់លើប្រទេសចិន ។

គួរបញ្ជាក់ថា ភ្នំភ្លើង Hayli Gubbi នៅឆ្ងាយពីទីក្រុងអាឌីសអាបាបា ប្រទេសអេត្យូពី ប្រមាណ៨០០គីឡូម៉ែត្រ និងជាភ្នំភ្លើងស្ថិតនៅភាគខាងត្បូងបំផុតនៃជួរភ្នំអរតា អាឡេ ដែលជាខ្សែក្រវ៉ាត់ភ្នំភ្លើងក្នុងតំបន់អាហ្វារបស់អេត្យូពី ។ ភ្នំភ្លើងនេះមានកម្ពស់៥០០ម៉ែត្រ ស្ថិតនៅតំបន់ភ្នំភ្លើងសកម្ម និងស្ថិតក្នុងចំណុចសំបកផែនដីប៉ះទង្គិចគ្នា ៕

ប្រទេសចិន ៖ តាមការចុះផ្សាយរបស់សារព័ត៌មានបរទេសនៅថ្ងៃទី២៦ ខែវិច្ឆិកា ឆ្នាំ២០២៥ មនុស្សយន្តចិនអាចដើរបានចម្ងាយរហូតដល់ជាង១០០គីឡូម៉ែត្រក្នុង១ថ្ងៃដោយពុំឈប់តាមផ្លូវ រហូតដល់បំបែកកំណត់ត្រាពិភពលោក Guinness World Records គឺជាមនុស្សយន្តដើរឆ្ងាយបំផុត ។ នេះបង្ហាញពីបច្ចេកវិទ្យាកាន់តែទំនើបខ្លាំងឡើងរបស់ក្រុមហ៊ុនផលិតមនុស្សយន្តនៅប្រទេសចិន និងអាចអភិវឌ្ឍន៍បច្ចេកវិទ្យាខ្លាំងជាងនេះសម្រាប់ប្រកួតប្រជែងជាមួយមនុស្សយន្តផលិតដោយក្រុមហ៊ុនផ្សេងៗលើពិភពលោក ។

ក្រុមហ៊ុនបច្ចេកវិទ្យាចិនឈ្មោះ AgiBot បានល្បីល្បាញលើពិភពលោក បន្ទាប់ពីក្រុមហ៊ុននេះផលិតមនុស្សយន្ត A2 អាចដើរបានចម្ងាយរហូតដល់១០៦គីឡូម៉ែត្រក្នុង១ថ្ងៃ ដោយចាប់ផ្តើមធ្វើដំណើរចាកចេញពីបឹងជិនជី ខេត្តជៀនស៊ូ ទៅកាន់ទីក្រុងសៀងហៃដោយជោគជ័យដោយពុំឈប់តាមផ្លូវ ។ នេះជាការបំបែកកំណត់ត្រាថ្មីក្នុង Guinness World Records សម្រាប់មនុស្សយន្តដើរឆ្ងាយបំផុត ។

មនុស្សយន្តចិនអាចដើរឆ្ងាយដោយសារប្រព័ន្ធបច្ចេកវិទ្យាពិសេសផលិតឡើងដោយក្រុមហ៊ុន AgiBot ទើបធ្វើឱ្យវាផ្លាស់ប្តូរថ្មដោយខ្លួនឯងក្នុងអំឡុងពេលធ្វើដំណើរ ។ ក្រុមហ៊ុន AgiBot បញ្ជាក់ថា មនុស្សយន្តនេះគោរពច្បាប់ចរាចរណ៍គ្រប់ប្រភេទ និងដើរលើផ្លូវខុសៗគ្នា ទាំងផ្លូវកៅស៊ូ ផ្លូវរាបស្មើ ឬឡើងស្ពាន ដែលនេះបញ្ជាក់ពីមនុស្សយន្តមានសមត្ថភាពដើរតាមតំបន់នានាជាក់ស្តែង ។

ពេលដល់គោលដៅ វានិយាយទៅកាន់អ្នកសារព័ត៌មានស៊ីនហួរថា ៖ «ការដើរនេះជាបទពិសោធន៍មិនអាចបំភ្លេចបាន និងត្រូវការស្បែកជើងថ្មី» ដែលការនិយាយនេះធ្វើឱ្យវាទទួលបានការចាប់អារម្មណ៍ខ្លាំងពីមហាជន ។ ភាពជោគជ័យនេះមិនត្រឹមតែទាក់ទាញការចាប់អារម្មណ៍ប៉ុណ្ណោះទេ ប៉ុន្តែបង្ហាញពីការរីកចម្រើននៃបច្ចេកវិទ្យាមនុស្សយន្ត និងថាមពលថ្ម ដែលអាចឱ្យវាដើរមិនឈប់ឈរ ហើយថ្ងៃអនាគត វានឹងមានតួនាទីសំខាន់ក្នុងការងារដឹកជញ្ជូន ត្រួតពិនិត្យ ឬជួយសង្គ្រោះជីវិតមនុស្សនៅកន្លែងគ្រោះថ្នាក់ ព្រមទាំងបង្កើនប្រសិទ្ធភាពការងារច្រើនផ្នែក ។

ការដើរផ្លូវឆ្ងាយរបស់មនុស្សយន្ត A2 មិនត្រឹមតែបានបំបែកកំណត់ត្រាពិភពលោកប៉ុណ្ណោះទេ ប៉ុន្តែការរីកចម្រើនរបស់បច្ចេកវិទ្យាមនុស្សយន្តអាចប្រើប្រាស់ជាប្រយោជន៍ក្នុងជីវិតប្រចាំថ្ងៃ និងឧស្សាហកម្ម ។ អនុប្រធានក្រុមហ៊ុន AgiBot និយាយថា ការធ្វើដំណើរក្នុងចម្ងាយផ្លូវឆ្ងាយនេះពិបាកណាស់សម្រាប់មនុស្សធម្មតា ប៉ុន្តែមនុស្សយន្តអាចធ្វើបាន ។ នេះបញ្ជាក់ពីបច្ចេកវិទ្យាខ្ពស់របស់មនុស្សយន្តក្នុងផ្នែកពាណិជ្ជកម្ម ដោយសារវាអាចដើរតាមផ្លូវចង្អៀត និងដឹងពីពេលវេលាយប់-ថ្ងៃ ។

គួរបញ្ជាក់ថា កាលពីខែមេសាកន្លងមក មនុស្សយន្ត Tien Kung Ultra ផលិតដោយក្រុមហ៊ុននៅទីក្រុងប៉េកាំង បានរត់ប្រណាំងម៉ារ៉ាថនក្នុងចម្ងាយ២១គីឡូម៉ែត្រ ចំណាយពេលត្រឹមតែ២ម៉ោងនិង៤០នាទី ៕