ជាបុគ្គលមានឥទ្ធិពលម្នាក់ដែលចូលរួមផ្សព្វផ្សាយពីវប្បធម៌ខ្មែរនិងបានចេញមុខនិយាយការពិតអំពីការឈ្លានពានរបស់ថៃជារឿយៗតារាម៉ូដែល មាលា តែងតែត្រូវបានអ្នកលេងបណ្តាញសង្គមចូលមកបញ្ចេញមតិយោបល់ដូចជាមនុស្សគ្មានការអប់រំដាក់នាង។ ជាក់ស្តែងថ្មីៗនេះគ្រាន់តែនាង និងពេជ្រ វត្តីសារ៉ាវឌ្ឍី ចូលរួមធ្វើម្ហូបដល់ជនភៀសសឹកស្រាប់តែជនជាតិសៀមចូលមកខម្មិនក្នុងវីដេអូនាងយ៉ាងច្រើនរហូតដល់ មាលា បោះសម្តីឱ្យអ្នកបញ្ចេញមតិយោបល់ទាំងនោះយកពេលទៅសិក្សារៀនសូត្រឡើងវិញ។
មាលា បានចេញវីដេអូមួយដោយបង្ហាញពីការខម្មិនរបស់ជនជាតិថៃ ពោលពាក្យគួរឱ្យស្អប់ខ្ពើមដាក់នាងនិងពេជ្រ វត្តីសារ៉ាវឌ្ឍី ក្នុងពេលចុះជួយធ្វើម្ហូបដល់ជនភៀសសឹកមួយកន្លែងនៅខេត្តសៀមរាបកាលពីពេលថ្មីៗនេះ។ ឃើញការបញ្ចេញមតិមិនសមរម្យគ្មានសីលធម៌ជាមនុស្សបែបនេះរបស់ជនជាតិថៃ មាលា បានឆ្លើយតបទៅវិញថា «ប្រសិនជាបើមានពេលទំនេរច្រើនដើម្បីមកបញ្ចេញមតិរឿងដែលគួរឱ្យស្អប់ខ្ពើមបែបនេះនៅក្រោមវីដេអូរបស់នាង គួរតែប្រើពេលទំនេររបស់ខ្លួនធ្វើអ្វីដែលរីកចម្រើនជាងនេះកុំខ្ជះខ្ជាយពេលវេលា ឬ ប្រហែលជាត្រូវទទួលបានការអប់រំបន្ថែមទៀត»។
មិនត្រឹមតែការធ្វើម្ហូបដល់ជនភៀសសឹកត្រូវបានជនជាតិថៃប្រើសម្តីមិនសមជាមនុស្សប្រើមកបញ្ចេញមតិយោបល់ក្នុងការបង្ហោះរបស់ មាលា ប៉ុណ្ណោះទេប៉ុន្តែជនជាតិថៃមួយចំនួនក៏ក្តៅក្រហាយច្រាលឈាមខ្លាំងនៅពេល នាង និង ពេជ្រ វត្តីសារ៉ាវឌ្ឍី ស្លៀកឈុតស្ត្រីខ្មែរបែបចុងសម័យឧត្តុង្គនៅប្រាសាទអង្គរវត្ត។ 
អ្នកលេងបណ្តាញសង្គមថៃបានចូលមកបញ្ចេញមតិយោបល់យ៉ាងច្រើនដោយប្រើសម្តីមិនខ្មាសមាត់ថាអ្នកទាំងពីរស្លៀកឈុតថៃស្រលាញ់វប្បធម៌ថៃ។ 
ងាកមកអ្នកគាំទ្រកម្ពុជាវិញបានកោតសរសើរ មាលា និង ពេជ្រ វត្តីសារ៉ាវឌ្ឍី ដែលស្លៀកពាក់ប្រពៃណីខ្មែរបែបចុងសម័យឧត្តុង្គនេះថាស្រស់ស្អាតខ្លាំងដូចជារូបចម្លាក់ ស្អាតគ្រប់រូបភាពគ្មានទាស់ចំណុចណាឡើយ៕
