ប្រទេសថៃ ៖ កាលពីពេលថ្មីៗនេះ TasteAtlas បានប្រកាសថា «នំឆាខ្វៃថៃ» បានជាប់ចំណាត់ថ្នាក់ទី៥ លើពិភពលោក ជាបង្អែមល្អបំផុតនៅតាមផ្លូវ ហើយប្រកាសថា «តែបៃតងថៃ» បានជាប់ចំណាត់ថ្នាក់ទី៧ ជាភេសជ្ជៈគ្មានជាតិអាល់កុល ដែលឆ្ងាញ់បំផុតនៅលើពិភពលោក ។

កាលពីថ្ងៃទី២ ខែមីនា កន្លងមក មន្ត្រីមកពីអគ្គនាយកដ្ឋានសុខាភិបាលថៃ លោកវេជ្ជបណ្ឌិត Suwanchai Wattanayingcharoenchai បានដាស់តឿនទៅកាន់អ្នកនិយមបរិភោគតែបៃតង និងឆាខ្វៃទាំងអស់ថា ឆាខ្វៃចំនួន១០០ក្រាមបានផ្តល់ថាមពលរហូតដល់៤៤១កាឡូរី និងមានជាតិកាបូអ៊ីដ្រាតចំនួន៤០.៥៦ក្រាម ហើយមានជាតិខ្លាញ់២៧.៧៩ក្រាម ។ រីឯឆាខ្វៃមានទំហំកណ្តាល១គូ គឺមានទម្ងន់ប្រមាណ៣០ក្រាម វានឹងផ្តល់ថាមពលប្រមាណ១៣២កាឡូរី, ជាតិកាបូអ៊ីដ្រាត១២ក្រាម និងជាតិខ្លាញ់៨ក្រាម គឺវាអាស្រ័យលើទំហំតូច ឬធំ ។

លោកវេជ្ជបណ្ឌិតរូបនេះបញ្ជាក់ថា ឆាខ្វៃ គឺជានំមួយប្រភេទដែលសម្បូរជាតិកាបូអ៊ីដ្រាត និងជាតិខ្លាញ់ រួមទាំងផ្តល់ថាមពលខ្ពស់ វាសមស្របជាមួយអ្នកដែលត្រូវការបង្កើនថាមពល ប៉ុន្តែវាក៏ផ្ទុកជាតិសូដ្យូមក្នុងម្សៅនំ ឬមានជាតិអំបិលខ្ពស់ផងដែរ ។ ដូច្នេះ វាប៉ះពាល់សុខភាពខ្លាំងណាស់ ជាពិសេស អ្នកមានជំងឺលើសឈាម ។ ក្រៅពីនេះ ឆាខ្វៃភាគច្រើនត្រូវបានអាជីវករយកខ្លាញ់ចៀនឡើងវិញជាច្រើនលើក ហេតុនេះ វាបណ្តាលឱ្យកើតជំងឺមហារីក ។

លោកវេជ្ជបណ្ឌិតបន្តថា ការបរិភោគឆាខ្វៃ ហើយចៀសវាងការធាត់នោះ គួរតែជ្រើសរើសទិញឆាខ្វៃណាដែលគេយកខ្លាញ់ថ្មីមកចៀន ដោយអាចសង្កេតតាមរយៈពណ៌របស់វា ហើយមិនគួរបរិភោគលើសពី២គូក្នុង១ថ្ងៃទេ ហើយបរិភោគវាជាមួយបបរ និងស៊ុតស្ងោរ ដើម្បីឱ្យរាងកាយទទួលបានជាតិប្រូតេអ៊ីន ។ លើសពីនេះ គេអាចបរិភោគវាជាមួយផ្លែឈើដែលមិនផ្អែមខ្លាំងពេក និងជាមួយទឹកសណ្តែកគ្មានជាតិផ្អែម ហើយដាក់សណ្តែកក្រហម ឬគ្រាប់ជីក្នុងទឹកសណ្តែក ដើម្បីបង្កើនជាតិសរសៃ និងកម្ចាត់ជាតិខ្លាញ់ ប៉ុន្តែត្រូវចៀសវាងយកវាទៅជ្រលក់ជាមួយជាតិផ្អែម ។

ចំណែកតែបៃតង១កែវ ស្មើបរិមាណ២០០មីល្លីលីត្រ វាផ្តល់ថាមពលប្រមាណ៤៣០កាឡូរី គឺវាអាស្រ័យលើរូបមន្តរបស់តូបលក់តែបៃតងនីមួយៗ ។ តែបៃតងមានជាតិកាបូអ៊ីដ្រាត៦៩ក្រាម ជាតិខ្លាញ់១៥ក្រាម ស្ករ៥៣ក្រាម (ស្មើ១៣ស្លាបព្រាកាហ្វេ) ហើយជាទូទៅ តែបៃតង ត្រូវបានគេតែងដាក់ទឹកដោះគោខាប់ ស្ករស ឬទឹកដោះគោស្រស់ ដើម្បីឱ្យវាមានក្លិនឈ្ងុយ និងរសជាតិឆ្ងាញ់ ។

ជារៀងរាល់ថ្ងៃ រាងកាយរបស់យើងមិនគួរទទួលជាតិស្ករលើសពី៦ស្លាបព្រាកាហ្វេទេ ដូច្នេះ បើបរិភោគតែបៃតងញឹកញាប់ ឬជារៀងរាល់ថ្ងៃ អ្នកបរិភោគនឹងកើតជំងឺផ្សេងៗដូចជា ជំងឺទឹកនោមផ្អែម, ស្ទះសរសៃឈាមខួរក្បាល និងបេះដូង, មហារីក, លើសឈាម, លើសជាតិខ្លាញ់ក្នុងឈាម និងជំងឺធាត់ ជាដើម ។

លោកវេជ្ជបណ្ឌិតបញ្ជាក់ថា ការបរិភោគតែបៃតងសម្រាប់សុខភាព គឺគួរបរិភោគក្នុងបរិមាណជាតិស្ករតិច មិនលើសពី២ស្លាបព្រាកាហ្វេ រួមទាំងជាតិផ្អែមផ្សេងទៀតមិនថា ទឹកដោះគោខាប់ ទឹកឃ្មុំ និងទឹកស៊ីរ៉ូគ្រប់ប្រភេទ គឺមិនលើសពី២ស្លាបព្រាកាហ្វេដូចគ្នា ។ លោកបន្តថា ការបរិភោគនៅពេលព្រឹក គឺល្អសម្រាប់សុខភាព ហើយគួរចៀសវាងអាហារពេលព្រឹកប្រភេទរហ័ស ដែលវាផ្តល់ថាមពលខ្ពស់ខ្លាំងពេក ឬអាហារណាដែលចៀនជាមួយខ្លាញ់ដដែលៗ និងចៀសវាងការបរិភោគឆាខ្វៃជ្រលក់ទឹកដោះគោខាប់ ឬជ្រលក់តែបៃតង ៕
ប្រភព ៖ bangkokbiznews

ប្រទេសអាល្លឺម៉ង់ ៖ សារព័ត៌មានរបស់អាល្លឺម៉ង់ Zeit បានចុះផ្សាយតាមវែបសាយដោយយោងតាមប្រភពព័ត៌មានពីមន្ត្រីរដ្ឋាភិបាលអាល្លឺម៉ង់ថា រដ្ឋាភិបាលមានគម្រោងហាមឃាត់បណ្តាប្រតិបត្តិករទូរគមនាគមន៍ប្រើប្រាស់ឧបករណ៍របស់ក្រុមហ៊ុនចិន ដូចជា Huawei និង ZTE ក្នុងបណ្តាញ 5G ។ ការហាមឃាត់នេះ ក៏រួមបញ្ចូលទាំងឧបករណ៍ដំឡើងផ្សេងៗក្នុងបណ្តាញ 5G ផងដែរ ហើយរដ្ឋាភិបាលបានប្រកាសឱ្យអ្នកប្រើប្រាស់ទាំងអស់ដោះឧបករណ៍ទាំងនេះចេញ ។

ទោះយ៉ាងណា រដ្ឋាភិបាលអាល្លឺម៉ង់មិនទាន់បានបញ្ចេញមតិពាក់ព័ន្ធនឹងរឿងនេះទេ ប៉ុន្តែប្រភពព័ត៌មានពីមន្ត្រីរដ្ឋាភិបាលបញ្ជាក់ថា វាជាការពិត ខណៈប្រទេសអាល្លឺម៉ង់បានសង្កេតពីទំនាក់ទំនងជាមួយចិន ដែលជាគូប្រជែងផ្នែកពាណិជ្ជកម្មដ៏ធំជាមួយអាល្លឺម៉ង់ ។

ចំណែកអ្នករិះគន់ក្រុមហ៊ុន Huawei និង ZTE និយាយថា ក្រុមហ៊ុនទាំងពីរនេះមានទំនាក់ទំនងគ្នាយ៉ាងជិតស្និទ្ធជាមួយកងកម្លាំងសន្តិសុខចិន មានន័យថា បណ្តាញទូរស័ព្ទនាពេលអនាគតអាចជាបណ្តាញរាយការណ៍សម្ងាត់ទៅកាន់ប្រទេសចិន ប៉ុន្តែក្រុមហ៊ុន Huawei និង ZTE ព្រមទាំងរដ្ឋាភិបាលចិនបានបដិសេធការចោទប្រកាន់ខាងលើនេះ ហើយអះអាងថា ក្រុមហ៊ុនពាណិជ្ជកម្មរបស់អាល្លឺម៉ង់មិនគាំទ្រចិន ទើបពួកគេប្រឆាំងនឹងក្រុមហ៊ុនចិនបែបនេះ ។ រីឯអ្នកតំណាងក្រុមហ៊ុន Huawei និង ZTE មិនទាន់មានការបញ្ចេញមតិអ្វីឡើយ ។

គួរបញ្ជាក់ថា កាលពីឆ្នាំ២០២១ កន្លងមក ប្រទេសអាល្លឺម៉ង់បានអនុម័តច្បាប់ទាក់ទងនឹងសុវត្ថិភាពផ្នែកបច្ចេកវិទ្យា ដែលធ្វើឱ្យក្រុមហ៊ុនផលិតឧបករណ៍ទូរគមនាគមន៍ត្រូវប្រឈមមុខនឹងឧបសគ្គខ្លាំង ហើយមិនត្រឹមតែប៉ុណ្ណោះ ភ្នាក់ងារសន្តិសុខអ៊ីនធើរណេតរបស់រដ្ឋាភិបាល និងក្រសួងមហាផ្ទៃ បានចំណាយពេលវេលាជាច្រើនខែដើម្បីត្រួតពិនិត្យមើលឧបករណ៍ផ្សេងៗដើម្បីឱ្យប្រាកដចិត្តថា សុវត្ថិភាពរបស់ប្រទេសអាល្លឺម៉ង់នឹងមិនស្ថិតក្នុងគ្រោះថ្នាក់ ដោយសារការលួចយកទិន្នន័យទៅឱ្យប្រទេសចិនទេ ៕ ប្រភព ៖ TNN World

រដ្ឋធានីកៀវ៖ សង្គ្រាមរបស់មេដឹកនាំវិមានក្រឹមឡាំង លោក វ៉្លាឌីមៀ ពូទីន បានអូសបន្លាយពេលអស់រយៈជាង១ឆ្នាំកន្លងមកនេះ ខណៈការវាយប្រយុទ្ធកំពុងតែបន្ដ ហើយទីក្រុងយុទ្ធសាស្រ្ដបាកមូត កំពុងតែក្លាយជាសមរភូមិក្ដៅ វាយប្រយុទ្ធគ្នាយ៉ាងបង្ហូរឈាមរាល់ថ្ងៃ បណ្ដាលឲ្យទាហានរបស់រុស្ស៊ី រងការខូចខាត អស់រាប់ម៉ឺននាក់ នៅលើទីលានវាយប្រយុទ្ធគ្នាមួយនេះ។

បណ្ដាញទូរទស្សន៍របស់ចក្រភពអង់គ្លេស BBC បានចេញផ្សាយ កាលពីព្រឹក ថ្ងៃព្រហស្បតិ៍ ទី៩ ខែមីនា ឆ្នាំ២០២៣ ថា ក្រុមមន្រ្ដីបស្ចិមលោក បានអះអាង ថា ទាហានរុស្ស៊ី ចន្លោះពី២០ ០០០នាក់ ទៅ ៣០ ០០០នាក់ បានស្លាប់ និង រងរបួស នៅក្នុងសមរភូមិបាកមូត ប្រទេសអ៊ុយក្រែន ចាប់តាំងពីសង្គ្រាមបានផ្ទុះឡើង នៅក្នុងរដូវក្ដៅមុន។ លក្ខណៈវីរភាពប្រយុទ្ធ គឺលើសពីគ្រប់សមាមាត្រ ទៅនឹងសារៈសំខាន់ ជាយុទ្ធសាស្ត្ររបស់ទីក្រុងបាកមូត (Bakhmut)។ ប៉ុន្ដែក្រោយការប្រយុទ្ធយ៉ាងសាហាវស៊ីសាច់ហុតឈាមគ្នា អស់រយៈពេលជាង៦ខែកន្លងមកនេះ គឺអនាគតរបស់ទីក្រុងបាកមូត នៅតែស្ថិតក្នុងភាពនៅនឹងថ្កល់ដដែល។

ក្រុមមន្រ្ដីលោកខាងលិច បានបញ្ជាក់ ថា ថ្វីបើទីក្រុងបាកមូត បានធ្លាក់ទៅក្រោមការកាន់កាប់របស់រុស្ស៊ី យ៉ាងណាក៏ដោយ ក៏អ្វីៗនៅតែអាចត្រូវការ តាមពេលវេលា ហើយរដ្ឋាភិបាលក្រុងម៉ូស្គូ នឹងទទួលបានលទ្ធផលតិចតួច ប៉ុន្ដែរុស្ស៊ី បានបាត់បង់យ៉ាងធ្ងន់ធ្ងរបំផុត។ ដោយឡែក ប្រជាជនរស់នៅទីក្រុងបាកមូត ប្រហែលជា៩០ភាគរយ បានរត់ភៀសខ្លួន ចេញពីទីក្រុងមួយនេះ ចាប់តាំងពីមានការវាយប្រយុទ្ធគ្នាយ៉ាងសាហាវ រហូតមក។

មន្រ្ដីអ៊ុយក្រែនម្នាក់ បានបញ្ជាក់ ថា សមរភូមិបាកមូត (Bakhmut) ក្លាយជាឱកាសពិសេសមួយ សម្រាប់ការសម្លាប់ទាហានរុស្ស៊ី កាន់តែច្រើនឡើង។

នៅក្នុងការថ្លែងទៅកាន់កិច្ចប្រជុំមួយរបស់ក្រសួងការពារជាតិ ហើយត្រូវបានបង្ហោះតាមបណ្ដាញសង្គមតេឡេក្រាម លោក ស៊ើរហ្គេ សយហ្គូ (Sergei Shoigu) រដ្ឋមន្រ្ដី ក្រសួងការពារជាតិរុស្ស៊ី បានបញ្ជាក់ ថា ត្រឹមតែខែកុម្ភៈប៉ុណ្ណោះ អ៊ុយក្រែន បានបាត់បង់កងទ័ព ចំនួន ១១ ០០០នាក់។ ប៉ុន្ដែលោករដ្ឋមន្រ្ដី មិនបានលាតត្រដាងនូវការពិត អំពីចំនួនទាហានរបស់រុស្ស៊ី បានបាត់បង់ជីវិត នៅក្នុងសង្គ្រាម អស់រយៈពេល៣៧៩ថ្ងៃ មកនេះ គិតត្រឹមថ្ងៃទី៩ ខែមីនា។

បើទោះជាក្រុមមន្ត្រីលោកខាងលិច បានបដិសេធតួលេខ ត្រូវបានលើកឡើង កាលពីថ្ងៃអង្គារ ដោយរដ្ឋមន្ត្រី ក្រសួងការពារជាតិរុស្ស៊ី យ៉ាងក៏ដោយ ក៏អ៊ុយក្រែន បានបង់កងទ័ពយ៉ាងធ្ងន់ធ្ងរផងដែរ។

រហូតមកដល់ពេលនេះ អ៊ុយក្រែន បាន និង កំពុងតែទទួលបានគ្រឿងយុទ្ធោបករណ៍ថ្មីជាច្រើន ជាបន្ដបន្ទាប់ មកពីលោកខាងលិច រួមទាំងរថក្រោះ រថពាសដែក និង គ្រឿងសឹកផ្សេងៗទៀត ព្រមទាំងដាក់ចេញនូវផែនការ សម្រាប់ការវាយលុករបស់ក្រុងកៀវ អាចនឹងកើតឡើង នៅដើម ខែឧសភា។

អគ្គសេនាធិការ កងទ័ពអ៊ុយក្រែន បានបង្ហោះនៅលើបណ្ដាញសង្គម កាលពីថ្ងៃទី៧ ខែមីនា ឆ្នាំ២០២៣ ថា នៅក្នុងរយៈពេល២៤ម៉ោងកន្លងមកនេះ រុស្ស៊ី បានបាត់បង់ទាហានរបស់ខ្លួន នៅលើសមរភូមិ ចំនួន ១ ០៦០នាក់។ ជាមួយនឹងចំនួនទាហានស្លាប់ថ្មីនេះ បានធ្វើឲ្យក្រុងមូស្គូ បាត់បង់កងទ័ព កើនឡើង ដល់ ១៥៤ ៨៣០នាក់ គិតចាប់តាំងពីការផ្ទុះសង្គ្រាម នៅលើទឹកដីរបស់អ៊ុយក្រែន ពីថ្ងៃទី២៤ ខែកុម្ភៈ ឆ្នាំ២០២២ រហូតដល់ថ្ងៃទី៧ ខែមីនា ឆ្នាំ២០២៣។

ដោយឡែក គ្រឿងចម្បាំងទំនើបៗរបស់រុស្ស៊ី ដែលត្រូវបានកងទ័ពអ៊ុយក្រែន វាយប្រហារកម្ទេចចោលនោះ រួមមាន យន្ដហោះចម្បាំង ចំនួន ៣០៣គ្រឿង, ឧទ្ធម្ភាគចក្រ ចំនួន ២៨៩គ្រឿង,នាវាចម្បាំងតូចធំ ចំនួន១៨គ្រឿង, រថក្រោះ ចំនួន ៣ ៤៣២គ្រឿង, រថពាសដែក ចំនួន ៦ ៧១៤គ្រឿង, រថយន្ដយោធាគ្រប់ប្រភេទ ចំនួន ៥ ៣២៣គ្រឿង, ប្រព័ន្ធកាំភ្លើងធំ ២ ៤៥៦គ្រឿង, ប្រព័ន្ធបាញ់គ្រាប់រ៉ុក្កែត ចំនួន ៤៨៨គ្រឿង, ប្រព័ន្ធការពារដែនអាកាស ចំនួន២៥៣គ្រឿង និង គ្រឿងសឹកជាច្រើនប្រភេទ រាប់រយគ្រឿងផ្សេងទៀត៕

បុរសជនជាតិថៃម្នាក់ត្រូវបានកាត់ទោសឲ្យជាប់ពន្ធនាគាររយៈពេល ២ឆ្នាំ កាលពីថ្ងៃ អង្គារ ពីបទ លក់ប្រតិទិនដែលមានរូបសត្វទាពណ៌លឿង ដែលតុលាកាបានចោទប្រកាន់ថា មានបំណងចំអកដល់់ព្រះមហាក្សត្ររបស់ប្រទេស ដែលទង្វើនេះអាចត្រូវបានចាត់ទុកថាជាការប្រមាថព្រះមហាក្សត្រ។

ជនជាប់ចោទមានឈ្មោះថា Narathorn Chotmankongsin មានអាយុ ២៦ឆ្នាំ ត្រូវបានកាត់បន្ថយទោសមកនៅត្រឹម ២ឆ្នាំ ដោយសារគាតយល់ព្រមសហការជាមួយតុលាការ ខណៈតុលាការបានប្រកាសថា រូបភាពចំនួន៦ ក្នុងប្រតិទិន ត្រូវបានធ្វើឡើងដើម្បីចំអកព្រះមហាក្សត្រ។

លោកត្រូវបានតុលារការ ចោទប្រកាន់ ពីបទប្រមាថព្រះមហាក្សត្ររបស់ប្រទេសថៃ ដែលត្រូវជាប់ពន្ធនាគារពី ៣ ទៅ ១៥ឆ្នាំ ចំពោះជនណាដែលបង្ខូចព្រះកិត្តិនាម ប្រមាថ ដល់ខ្សែរាជវង្សថៃ។

ជុំវិញនឹងករណីនេះ អង្គការឃ្លាំមើលសិទ្ធិមនុស្ស ក៏បានចេញសេចក្ដីថ្លែងការណ៍មួយដោយស្នើឱ្យអាជ្ញាធរថៃ បញ្ឈប់ការកាត់ទោស និង ដោះលែងបុរសនោះជាបន្ទាន់។ ប៉ុន្ដែមិនទាន់មានការឆ្លើយតបអ្វីពីភាគីថៃចំពោះសេចក្ដីថ្លែងការណ៍នេះទេ។

សូមជម្រាបផងដែរថា ចាប់តាំងពីខែ វិច្ឆិកា ឆ្នាំ២០២១មក មនុស្សយ៉ាងហោចណាស់ ២៣៣នាក់ ត្រូវបានចោទប្រកាន់ពីបទ ប្រមាថព្រះមហាក្សត្រ៕

ប្រភព៖ BBC