បណ្តាប្រទេសនៅឈូងសមុទ្រអារ៉ាប់ និងក្រុមហ៊ុនដឹកជញ្ជូនប្រេងអន្តរជាតិកំពុងបារម្ភពីនាវាដែលឆ្លងកាត់ច្រកសមុទ្រ Hormuz គ្មានសុវត្ថិភាព បន្ទាប់ពីអ៊ីរ៉ង់កំណត់ឱ្យនាវាទាំងអស់ត្រូវតែបើកបរមកក្បែរភាគខាងជើងប្រទេសអ៊ីរ៉ង់ និងត្រូវបង់ប្រាក់ឱ្យអ៊ីរ៉ង់ ដើម្បីកុំឱ្យមានការលួ.ចដឹកជញ្ជូនអាវុ.ធក្នុងពេលអនុវត្តបទឈប់បា.ញ់រយៈពេល២សប្តាហ៍ ហើយអ៊ីរ៉ង់នឹងយកប្រាក់នេះទៅជួសជុលហេដ្ឋារចនាសម្ព័ន្ធខូចខាតដោយសារសង្គ្រា.ម ។ ដូចគ្នានេះ ភ្នាក់ងារដែនសមុទ្ររបស់អង្គការសហប្រជាជាតិ (UN) មិនគាំទ្រអ៊ីរ៉ង់ និងចាត់ទុកការយកប្រាក់ពីនាវាឆ្លងកាត់ច្រកសមុទ្រ Hormuz គឺល្មើ.សអនុសញ្ញាអន្តរជាតិ ។

ភ្នាក់ងារដែនសមុទ្ររបស់អង្គការសហប្រជាជាតិ (UN) កាលពីថ្ងៃទី៩ ខែមេសា ឆ្នាំ២០២៦ បានរិះគន់បន្ទាប់ពីអ៊ីរ៉ង់មានបំណងប្រមូលប្រាក់ពីនាវាផ្សេងៗដែលដឹកប្រេងឥន្ធនៈ និងទំនិញឆ្លងកាត់ច្រកសមុទ្រ Hormuz ថា គឺល្មើសអនុសញ្ញាអន្តរជាតិ និងជាការគំរា.មកំហែងសេរីភាពការបើកបរនាវាអន្តរជាតិ ។ ភ្នាក់ងារដែនសមុទ្របញ្ជាក់ថា អ៊ីរ៉ង់នៅជាប់ច្រកសមុទ្រនេះគ្មានសិទ្ធិយកប្រាក់ ឬរារាំងការឆ្លងកាត់របស់នាវាទេ ។

អង្គការដែនសមុទ្រអន្តរជាតិ (IMO) ដែលជាភ្នាក់ងារដែនសមុទ្ររបស់អង្គការសហប្រជាជាតិ (UN) បានចេញសេចក្តីថ្លែងការណ៍មានខ្លឹមសារថា ការយកប្រាក់ពីនាវាឆ្លងកាត់ច្រកសមុទ្រ Hormuz ដែលជាផ្លូវដឹកជញ្ជូនប្រេងឥន្ធនៈ និងទំនិញដ៏សំខាន់ គឺជាការបង្កគ្រោះថ្នាក់ ហើយអ៊ីរ៉ង់មិនគួររារាំងសេរីភាពចរាចរណ៍របស់នាវាទេ ។ អង្គការដែនសមុទ្រអន្តរជាតិបញ្ជាក់ថា គ្មានកិច្ចព្រមព្រៀងអន្តរជាតិណាមួយអនុញ្ញាតឱ្យយកប្រាក់ពីការចរាចរនាវាឆ្លងកាត់ច្រកសមុទ្រអន្តរជាតិទេ វាជាទង្វើបង្កគ្រោះថ្នាក់ ។

សេចក្តីថ្លែងការណ៍របស់អង្គការដែនសមុទ្រអន្តរជាតិបញ្ជាក់ដែរថា ប្រទេសជាសមាជិករបស់អង្គការដែនសមុទ្រអន្តរជាតិបានផ្តល់សច្ចាប័នលើអនុសញ្ញាអង្គការសហប្រជាជាតិ ស្តីពីច្បាប់សមុទ្រ ឆ្នាំ១៩៨២ គឺកំណត់ឱ្យការគ្រប់គ្រងច្រកសមុទ្រ Hormuz សម្រាប់ឱ្យនាវាអាចធ្វើចរាចរណ៍ជាអន្តរជាតិ ។ តាមការកំណត់របស់ច្បាប់សមុទ្រ គឺនាវាទាំងអស់មានសិទ្ធិឆ្លងកាត់ច្រកសមុទ្រអន្តរជាតិ ដែលប្រទេសនៅជាប់ច្រកសមុទ្រមិនអាចរារាំង ឬបំបាត់សិទ្ធិឡើយ ។

ការរិះគន់របស់អង្គការដែនសមុទ្រអន្តរជាតិកើតឡើងស្របពេលមានសេចក្តីរាយការណ៍ថា អ៊ីរ៉ង់មានបំណងយកប្រាក់ពីនាវាផ្សេងៗដែលឆ្លងកាត់ច្រកសមុទ្រ Hormuz បន្ទាប់ពីអ៊ីរ៉ង់ព្រមព្រៀងឈប់បាញ់រយៈពេល២សប្តាហ៍ជាមួយអាមេរិកកាលពីថ្ងៃទី៨ ខែមេសា កន្លងមក ។

គួរបញ្ជាក់ថា បន្ទាប់ពីអ៊ីរ៉ង់ព្រមព្រៀងជាមួយអាមេរិកផ្អាកសង្គ្រាមរយៈពេល២សប្តាហ៍ រដ្ឋាភិបាលអ៊ីរ៉ង់បានធ្វើឱ្យពិភពលោកភ្ញាក់ផ្អើលម្តងទៀត ដោយប្រកាសពីគោលនយោបាយប្រមូលប្រាក់ពីនាវាទាំងឡាយដែលឆ្លងកាត់ច្រកសមុទ្រ Hormuz ។ ការប្រមូលប្រាក់នឹងអនុវត្តចំពោះនាវាដែលដឹកប្រេងឥន្ធនៈពេញ ក្នុងគោលបំណងត្រួតពិនិត្យសុវត្ថិភាពការពារកុំឱ្យមានការលួចដឹកជញ្ជូនអាវុធតាមច្រកសមុទ្រក្នុងអំឡុងពេលអនុវត្តបទឈប់បាញ់ និងយកប្រាក់ទៅជួសជុលហេដ្ឋារចនាសម្ព័ន្ធខូចខាតដោយសារសង្គ្រាម ។

អ៊ីរ៉ង់កំណត់ឱ្យនាវាទាំងអស់រាយការណ៍តាមអនឡាយជាមុន ដោយបញ្ជាក់លម្អិតពីចំនួនទំនិញ និងប្រេងឥន្ធនៈក្នុងនាវា ។ ក្រៅពីការប្រមូលប្រាក់ពីនាវាឆ្លងកាត់ច្រកសមុទ្រ Hormuz អ៊ីរ៉ង់ក៏មានគម្រោងឱ្យនាវាទាំងអស់បើកបរមកក្បែរភាគខាងជើងប្រទេសអ៊ីរ៉ង់ផងដែរ ដែលធ្វើឱ្យក្រុមហ៊ុនដឹកជញ្ជូនប្រេងអន្តរជាតិ និងក្រុមប្រទេសនៅឈូងសមុទ្រអារ៉ាប់បារម្ភពីអសុវត្ថិភាពក្នុងការដឹកជញ្ជូនថាមពលតាមច្រកសមុទ្រ ៕

ប្រធានាធិបតីចិន លោក Xi Jinping នៅថ្ងៃទី១០ ខែមេសា ឆ្នាំ២០២៦ បានទទួលស្វាគមន៍ដំណើរទស្សនកិច្ចរបស់មេគណបក្សប្រឆាំងដ៏ធំរបស់តៃវ៉ាន់មកកាន់ទីក្រុងប៉េកាំង ដោយលោកបញ្ជាក់ថា ពលរដ្ឋចិននិងតៃវ៉ាន់ គឺសុទ្ធតែជាក្រុមគ្រួសារតែមួយដែលត្រូវការសន្តិភាព ហើយចិនគ្មានថ្ងៃអនុញ្ញាតឱ្យតៃវ៉ាន់ទទួលបានឯករាជ្យឡើយ ខណៈមេគណបក្សប្រឆាំងតៃវ៉ាន់ចង់ឃើញការកាត់បន្ថយភាពតានតឹងនៅតៃវ៉ាន់ ។

មេគណបក្ស Kuomintang (KMT) ដែលជាគណបក្សប្រឆាំងដ៏ធំនៅតៃវ៉ាន់ លោកស្រី Cheng Li-wun បានចូលជួបប្រធានាធិបតីចិននៅសាលប្រជាជនក្នុងទីក្រុងប៉េកាំងនៅថ្ងៃទី១០ ខែមេសា ដែលក្នុងឱកាសនេះ លោក Xi និយាយថា ពលរដ្ឋចិន-តៃវ៉ាន់សុទ្ធតែជាក្រុមគ្រួសារតែមួយ ទំនាក់ទំនងពេលអនាគតស្ថិតក្នុងដៃពលរដ្ឋចិន ។ ពិភពលោកបច្ចុប្បន្ន គ្មានសន្តិភាពពេញលេញទេ គឺសន្តិភាពមានតម្លៃ ។

សេចក្តីថ្លែងការណ៍ផ្សាយក្នុងកញ្ចក់ទូរទស្សន៍របស់តៃវ៉ាន់ លោក Xi ថា ពលរដ្ឋចិន និងតៃវ៉ាន់ គឺជាគ្រួសារតែមួយដែលត្រូវការសន្តិភាព ការអភិវឌ្ឍ ការផ្លាស់ប្តូរ និងសហការ ។ យើងជួបគ្នាថ្ងៃនេះ (ថ្ងៃទី១០ ខែមេសា) ដើម្បីការពារសន្តិភាព និងសន្តិសុខមាតុភូមិរបស់យើងដើម្បីលើកកម្ពស់ទំនាក់ទំនង ជំរុញឱ្យក្មេងជំនាន់ក្រោយមានអនាគតល្អ ។ ចិនរីករាយសហការជាមួយគណបក្សផ្សេងៗ រួមទាំងគណបក្ស Kuomintang ហើយប្រឆាំងការបំបែកខ្លួនរបស់តៃវ៉ាន់ ។

ចិនបដិសេធមិនចរចាជាមួយប្រធានាធិបតីតៃវ៉ាន់ លោក Lai Ching-te ដោយសារមានគោលជំហរទាមទារឯករាជ្យ ហើយរដ្ឋាភិបាលរបស់លោក Lai ប្រាប់ឱ្យលោកស្រី Cheng ប្រាប់ទៅចិនឈប់គំរាមតៃវ៉ាន់ និងឱ្យចិនទទួលស្គាល់រដ្ឋាភិបាលតៃវ៉ាន់ ដែលកាន់តំណែងតាមរយៈការបោះឆ្នោតបែបលទ្ធិប្រជាធិបតេយ្យនៅទីក្រុងតៃប៉ិ ។

លោកស្រី Cheng បានធ្វើដំណើរទស្សនកិច្ចប្រទេសចិន ក្នុងគោលបំណងកាត់បន្ថយស្ថានការណ៍តានតឹង បន្ទាប់ពីចិនដាក់សម្ពាធលើតៃវ៉ាន់ដោយការប្រើប្រាស់កម្លាំងកងទ័ព ដែលចិនអះអាងជាទឹកដីរបស់ខ្លួន ។ លោកស្រីនិយាយទៅកាន់លោក Xi ថា ទំនាក់ទនងរវាងភាគីទាំងពីរជាផលប្រយោជន៍រួមគ្នា និងជាអ្វីដែលពលរដ្ឋទាំងពីរចង់បាន លោកស្រីក៏បានអញ្ជើញលោក Xi បំពេញទស្សនកិច្ចនៅតៃវ៉ាន់ផងដែរ និងចង់ឃើញគ្មានភាពតានតឹងនៅតៃវ៉ាន់ ។

គួរបញ្ជាក់ថា អាមេរិកបានគាំទ្រ និងបញ្ជូនអាវុធឱ្យតៃវ៉ាន់ជាបន្តបន្ទាប់ បើទោះជាគ្មានទំនាក់ទំនងការទូតជាផ្លូវការក្តី ហើយរដ្ឋាភិបាលក្រុងប៉េកាំងអំពាវនាវជាច្រើនលើកឱ្យរដ្ឋាភិបាលក្រុងវ៉ាស៊ីនតោនឈប់បញ្ជូនអាវុធឱ្យតៃវ៉ាន់ ៕

ប្រធានាធិបតីរុស្ស៊ី វ្ល៉ាឌីមៀរ ពូទីន បានប្រកាសបទឈប់បាញ់រយៈពេល៣២ម៉ោង ជាមួយអ៊ុយក្រែនដោយផ្អែកលើ «ហេតុផលមនុស្សធម៌» ខណៈបទឈប់បា.ញ់នេះធ្វើឡើងបន្ទាប់ពីប្រទេសរុស្ស៊ី បានប្រគល់សា.កស.ពទាហានអ៊ុយក្រែន ចំនួន ១,០០០នាក់ ទៅឱ្យអ៊ុយក្រែន ក្នុងអំឡុងពេលនៃពិធីបុណ្យ Easter ។ នេះបើយោងតាមទីភ្នាក់ងារសារព័ត៌មានTASS។

ផ្អែគតាមសេចក្តីប្រកាសពីវិមានក្រឹមឡាំង បទឈប់បា.ញ់បណ្តោះអាសន្នរយៈពេលខ្លី នឹងចាប់អនុវត្តពីម៉ោង ៤ រសៀលថ្ងៃសៅរ៍ទី១១ខែមេសា រហូតដល់ពាក់កណ្តាលអធ្រាត្រថ្ងៃអាទិត្យទី១២ខែមេសាឆ្នាំ ២០២៦ (ពេលវេលានៅរុស្ស៊ី)។ ចលនានេះត្រូវបានចាត់ទុកថាជាកាយវិការមនុស្សធម៌ ដើម្បីអបអរសាទរពិធីបុណ្យ Easter នៃសាសនាគ្រិស្តអូស្សូដក់អាចជួបជុំសាច់ញាតិ និងប្រារព្ធពិធីបុណ្យសាសនាដ៏សំខាន់នេះបានដោយសន្តិវិធី។

ក្នុងពេលជាមួយគ្នានេះ ទីភ្នាក់ងារសារព័ត៌មានអ៊ុយក្រែន RBC បានដកស្រង់សម្តីលោក Shamsail Saraliev ដោយរាយការណ៍ថា រុស្ស៊ីបានប្រគល់សា.កសពទាហានអ៊ុយក្រែន ចំនួន ១,០០០នាក់ ទៅឱ្យអ៊ុយក្រែន ជាថ្នូរនឹងការប្ដូរយកសាកសពទាហានខ្លួនចំនួន ៤១នាក់ ត្រឡប់មកវិញ ។ មន្ត្រីបាននិយាយថា ការផ្លាស់ប្តូរបែបនេះបានក្លាយជារឿងធម្មតាទៅហើយនៃសង្គ្រាម ដែលទោះជាយ៉ាងណាវាបានអនុញ្ញាតឱ្យក្រុមគ្រួសារអស់ចិត្ត និងកំណត់អត្តសញ្ញាណមនុស្សជាទីស្រលាញ់របស់ពួកគេ។

បើទោះបីជាមានការប្រកាសពីបទឈប់បា.ញ់ក៏ដោយ ការប្រយុទ្ធគ្នានៅតែបន្តនៅក្នុងតំបន់ជាច្រើន ហើយទំនុកចិត្តរវាងភាគីទាំងពីរនៅតែមានកម្រិតទាបខ្លាំង។ អ្នកវិភាគព្រមានថា បទឈប់បាញ់រយៈពេលខ្លីដូចនេះ ទំនងជាមិននាំទៅរកសន្តិភាពយូរអង្វែងនោះទេ ជាពិសេសនៅពេលដែលសង្គ្រាមកាន់តែធ្ងន់ធ្ងរឡើង ហើយការយកចិត្តទុកដាក់របស់ពិភពលោកផ្លាស់ប្តូរទៅរកជម្លោះផ្សេងទៀត រួមទាំងមជ្ឈិមបូព៌ាផងដែរ។

សរុបមក បទឈប់បាញ់ផ្តល់នូវការផ្អាកប្រយុទ្ធគ្នាមួយរយៈពេលខ្លី បូកផ្សុំនឹងការវិលត្រឡប់មកវិញនៃសាកសពជាច្រើន គឺជាការរំលឹកដ៏មានឥទ្ធិពលមួយថា សង្គ្រាមនេះនៅមិនទាន់អាចបញ្ចប់នៅឡើយទេ៕

ប៉ុន្មានខែមុនបន់ឲ្យតែទឹកស្រក ពេលនេះស្រកជ្រុលចាប់ផ្ដើមភ័យ! ប្រទេសថៃឥឡូវនេះកំពុងប្រឈមនឹងហានិភ័យនៃវិបត្តិគ្រោះរាំងស្ងួតដែលអាចប៉ះពាល់ដល់ការរស់នៅរបស់មនុស្សរាប់លាននាក់ ព្រោះមានទឹកនៅសល់ដែលអាចប្រើប្រាស់បានត្រឹមតែ ៤៩% ប៉ុណ្ណោះនៅក្នុងអាងស្តុកទឹកទូទាំងប្រទេស ។ នេះបើយោងតាមការចុះផ្សាយរបស់ Khaosod។

យោងតាមការិយាល័យធនធានទឹកជាតិ ជាធម្មតាអាងស្តុកទឹកនៅទូទាំងប្រទេសថៃមានសមត្ថភាពផ្ទុកទឹកបម្រុងសម្រាប់ប្រជាជនប្រើប្រាស់បាន ៦៤% ជារួម ប៉ុន្តែឆ្នាំនេះទឹកដែលអាចប្រើប្រាស់បានមានកម្រិតទាបជាងគួរឱ្យកត់សម្គាល់ ដែលបង្កើនការព្រួយបារម្ភអំពីការផ្គត់ផ្គង់ក្នុងរដូវប្រាំង។ ក្នុងនោះដែរ តំបន់ទំនាបកណ្តាល គឺជាតំបន់ដែលប្រឈមនឹងហានិភ័យខ្លាំងបំផុត ដោយកម្រិតទឹកនៅក្នុងអាងស្តុកបានស្រកចុះមកត្រឹម ៤១% ប៉ុណ្ណោះគិតមកត្រឹមពេលនេះ។

យោងតាមការិយាល័យធនធានទឹកជាតិ ការធ្លាក់ចុះយ៉ាងខ្លាំងនេះត្រូវបានផ្សារភ្ជាប់ទៅនឹងអត្រាភ្លៀងធ្លាក់តិច សីតុណ្ហភាពខ្ពស់លើសធម្មតា និងតម្រូវការទឹកកើនឡើង។ កត្តាទាំងនេះបានជំរុញឲ្យអាងស្តុកទឹកសំខាន់ៗទូទាំងប្រទេសថៃកំពុងស្ថិតនៅក្រោមសម្ពាធ ជាពិសេសនៅពេលដែលរដូវប្រាំងនៅតែបន្ត ហើយកំដៅបន្តកើនឡើងឥតថមថយ។

ផលប៉ះពាល់ត្រូវបានគេមើលឃើញយ៉ាងទូលំទូលាយ ដោយមន្ត្រីបាននិយាយថា គ្រោះរាំងស្ងួតអាចប៉ះពាល់ដល់វិស័យកសិកម្ម ការផ្គត់ផ្គង់ទឹកស្អាត និងការផលិតអគ្គិសនី ជាពិសេសនៅតំបន់ជនបទដែលពឹងផ្អែកយ៉ាងខ្លាំងលើការទទួលបានទឹកជាប្រចាំ។ បច្ចុប្បន្នកសិករកំពុងត្រូវបានជំរុញឱ្យប្រើប្រាស់ទឹកដោយសន្សំសំចៃ និងកែសម្រួលផែនការដំណាំដើម្បីជៀសវាងការខាតបង់ធ្ងន់ធ្ងរ។

ជាមួយគ្នានេះ អ្នកជំនាញបានព្រមានថា ស្ថានភាពនេះឆ្លុះបញ្ចាំងពីនិន្នាការតំបន់ធំជាង ដោយសារការប្រែប្រួលអាកាសធាតុ និងអាកាសធាតុអាក្រក់ធ្វើឱ្យគ្រោះរាំងស្ងួតកាន់តែកើតមានញឹកញាប់ និងកាន់តែខ្លាំងឡើងនៅទូទាំងអាស៊ីអាគ្នេយ៍។ ដូច្នេះប្រសិនបើលក្ខខណ្ឌមិនប្រសើរឡើងក្នុងពេលឆាប់ៗនេះទេ ប្រទេសថៃអាចប្រឈមមុខនឹងរដូវប្រាំងដ៏លំបាកបំផុតមួយ ក្រោយខានកើតមានអស់រយៈពេលជាច្រើនឆ្នាំ៕

វិទ្យាស្ថាន Milken របស់អាមេរិកបានចាត់ចំណាត់ថ្នាក់ម៉ាឡេស៊ីស្ថិតក្នុងលំដាប់ទី១ ជាប្រទេសទាក់ទាញការវិនិយោគបំផុតនៅអាស៊ីអាគ្នេយ៍ក្នុងឆ្នាំ២០២៦ ដោយការវាយតម្លៃលើកត្តាចំនួន៥ គឺម៉ាឡេស៊ីមានភាពលេចធ្លាជាងប្រទេសនានា ។ លើសពីនេះ ម៉ាឡេស៊ីបានជាប់ចំណាត់ថ្នាក់ទី២៣ ជាប្រទេសទាក់ទាញការវិនិយោគលើពិភពលោក ដោយប្រធានវិទ្យាស្ថាន Milken ថា ប្រទេសផ្សេងៗក៏ទាក់ទាញការវិនិយោគដែរ ប៉ុន្តែក្រុមវិនិយោគិនពិចារណាយ៉ាងលម្អិតមុននឹងសម្រេចចិត្តវិនិយោគនៅប្រទេសណាមួយ ។

យោងតាមរបាយការណ៍សន្ទស្សន៍ឱកាសវិនិយោគសកល (GOI) ប្រចាំឆ្នាំ២០២៦ របស់វិទ្យាស្ថានអាមេរិក Milken គឺម៉ាឡេស៊ីបានជាប់ចំណាត់ថ្នាក់ទី១ ជាប្រទេសទាក់ទាញការវិនិយោគបំផុតនៅតំបន់អាស៊ីអាគ្នេយ៍ បើប្រៀបធៀបនឹងប្រទេសផ្សេងៗដែលទាក់ទាញការវិនិយោគក្នុងតំបន់ ខណៈការចំណាត់ថ្នាក់លើពិភពលោកវិញ ម៉ាឡេស៊ីស្ថិតក្នុងលំដាប់លេខរៀងទី២៣ ។

វាជាចំណាត់ថ្នាក់ល្អបំផុត បើប្រៀបធៀបនឹងប្រទេសមានសេដ្ឋកិច្ចរីកចម្រើនផ្សេងទៀតក្នុងតំបន់អាស៊ីអាគ្នេយ៍ដែលបានទាក់ទាញការវិនិយោគដូចគ្នា ហើយការជាប់ចំណាត់ថ្នាក់នេះដោយសារម៉ាឡេស៊ីមានសេដ្ឋកិច្ចរឹងមាំ និងស្ថាប័ននានាមានគុណភាព ។ នេះបើតាមការចុះផ្សាយរបស់សារព័ត៌មានបរទេសនៅថ្ងៃទី១០ ខែមេសា ឆ្នាំ២០២៦ ។

តាមរបាយការណ៍សន្ទស្សន៍ឱកាសវិនិយោគសកល (GOI) ប្រចាំឆ្នាំ២០២៦ របស់វិទ្យាស្ថាន Milken គឺម៉ាឡេស៊ីលេចធ្លោជាងបណ្តាប្រទេសក្នុងតំបន់ រួមទាំងដំណើរការល្អក្នុងផ្នែកហិរញ្ញវត្ថុ និងអាជីវកម្ម ។ ការចាត់ចំណាត់ថ្នាក់ប្រទេសទាក់ទាញការវិនិយោគបំផុតនៅអាស៊ីអាគ្នេយ៍ និងពិភពលោក បានវាយតម្លៃលើកត្តាចំនួន៥ រួមមាន ៖ ការយល់ដឹងពីអាជីវកម្ម, មូលដ្ឋានគ្រឹះសេដ្ឋកិច្ច, ការគ្រប់គ្រងហិរញ្ញវត្ថុ, ក្របខ័ណ្ឌស្ថាប័ន និងស្តង់ដារ-គោលនយោបាយអន្តរជាតិ ។

របាយការណ៍នេះបញ្ជាក់ថា ប្រទេសចំនួន៦ ក្នុងតំបន់អាស៊ីអាគ្នេយ៍បានទាក់ទាញទឹកប្រាក់ការវិនិយោគពីក្រៅប្រទេសសរុបស្មើ៨.២% ចាប់ពីឆ្នាំ២០២១ ដល់ឆ្នាំ២០២៤ ហើយការវិយោគផ្ទាល់ពីបរទេស (FDI) ស្មើជាង៧០% នៃការវិនិយោគសរុប ។

ចំណែកវៀតណាមជាប់ចំណាត់ថ្នាក់ទី២ គឺជាប្រទេសទាក់ទាញការវិនិយោគបំផុតនៅអាស៊ីអាគ្នេយ៍ក្នុងឆ្នាំ២០២៦ និងជាប់ចំណាត់ថ្នាក់ទី៣៩ លើពិភពលោក ដោយសារកំណើនផលិតផលក្នុងស្រុកសរុប (GDP) របស់វៀតណាមកើនឡើងខ្ពស់រហូតដល់៦.៥% កាលពីឆ្នាំ២០២៥ ព្រមទាំងមានលក្ខខណ្ឌពាណិជ្ជកម្មអំណោយផល និងអត្រាអតិផរណាទាប ។

លោក Matthew Aleshi ប្រធានផ្នែកភូមិសាស្ត្រសេដ្ឋកិច្ចរបស់វិទ្យាស្ថាន Milken ដែលបានចូលរួមចាត់ចំណាត់ថ្នាក់ថា សេដ្ឋកិច្ចរីកចម្រើនរបស់ប្រទេសនានាក្នុងតំបន់អាស៊ីអាគ្នេយ៍បានទាក់ទាញការវិនិយោគដូចគ្នា ប៉ុន្តែវិនិយោគិនចាប់ផ្តើមពិចារណាយ៉ាងលម្អិតមុននឹងសម្រេចចិត្តវិនិយោគនៅប្រទេសណាមួយ ។ យើងមើលឃើញប្រាក់វិនិយោគហូរចូលប្រទេសទើបមានសេដ្ឋកិច្ចរីកចម្រើនថ្មីៗជាបន្តបន្ទាប់ ក្នុងនោះប្រទេសនៅអាស៊ីអាគ្នេយ៍ទទួលបានប្រយោជន៍ច្រើន បច្ចុប្បន្ន ក្រុមប្រទេសអាចរក្សាស្ថិរភាពសេដ្ឋកិច្ច និងបង្កើនការអភិវឌ្ឍប្រព័ន្ធហិរញ្ញវត្ថុ នឹងមានឱកាសទាក់ទាញការវិនិយោគយូរអង្វែង ៕