ប្រទេសថៃ៖ នៅខណៈពេលដែលព្រឹត្តិការណ៍ស៊ីហ្គេមលើកទី៣៣ ឆ្នាំ២០២៥ មិនទាន់ប្រកាសបើកជាផ្លូវការផងនោះ ប្រទេសថៃក្នុងតួនាទីជាម្ចាស់ផ្ទះ កំពុងប្រឈមការរិះគន់យ៉ាងខ្លាំងពីសាធារណជននៅក្នុងនិងក្រៅប្រទេស ដោយសារតែការធ្វេសប្រហែសមិនចេះចប់មិនចេះហើយនៅក្នុងការរៀបចំ។

យោងតាមប្រព័ន្ធផ្សព្វផ្សាយក្នុងស្រុកថៃ បាននិយាយថា ប្រជាជនជាច្រើនកំពុងតែនាំគ្នារិះគន់ខ្លាំងចំពោះការងារប្រកបដោយភាពខ្វះចន្លោះរបស់គណៈកម្មាការរៀបចំព្រឹត្តិការណ៍សុីហ្គេមឆ្នាំ២០២៥នេះ ដោយចំណាយអស់ចំណាយអស់រាប់លានដុល្លារហើយនៅតែខ្វះមុខខ្វះក្រោយ សូម្បីតែអំពូលភ្លើងនៃកីឡដ្ឋានក៏ភ្លឺមិនគ្រប់។ ពួកគេចោទសួរដោយត្រង់ថា តើវាជាការសន្សំសំចៃអគ្គិសនីឬមួយយ៉ាងម៉េច?

បន្ថែមលើភាពមិនសូវមានទំនួលខុសត្រូវដូចខាងលើ នៅអំឡុងពេលការប្រកួតវិញ្ញាសាបាល់ទាត់បុរសរវាង U22 វៀតណាម និង U22 ឡាវ កាលពីថ្ងៃទី៣ ខែធ្នូម្សិលមិញ ប្រទេសថៃក៏បានបង្កើតកំហុសដ៏ធំមួយចំនួនទៀត មានតាំងពីការភ្លេចចាក់ភ្លេងជាតិសម្រាប់ប្រទេសទាំងពីរនៅមុនការប្រកួត និងដាក់ឈ្មោះច្រលំប្រទេសជាដើម ដែលតម្រូវគណៈកម្មាធិការរៀបចំការប្រកួតកីឡាស៊ីហ្គេម របស់ប្រទេសថៃក្រោយមកបានចេញលិខិតសុំទោសជាផ្លូវការ ទៅកាន់ប្រទេសវៀតណាម និងឡាវ។

មិនត្រឹមតែប៉ុណ្ណោះ ប្រជាជនថៃនៅក្នុងបណ្ដាញសង្គមបាននាំគ្នាបង្ហាញការមិនពេញយ៉ាងខ្លាំងចំពោះការរៀបចំផ្ទាំងផ្សព្វផ្សាយព្រឹត្តិការណ៍សុីហ្គេមរបស់ប្រទេសខ្លួន ដោយវាមើលទៅសមជាផ្ទាំងផ្សព្វផ្សាយពាណិជ្ជកម្មផលិតផលច្រើនជាង។

ក្រៅពីនេះ ក៏មានការប្រៀបធៀបជាច្រើនផងដែរថា កុំថាឡើយប្រៀបធៀបជាមួយកម្ពុជាដែលជាម្ចាស់ផ្ទះរដូវកាលមុន សូម្បីតែប្រៀបធៀបជាមួយថៃខ្លួនឯងដែលធ្លាប់ធ្វើជាម្ចាស់ផ្ទះកាលពី៣០ឆ្នាំមុនដែលគ្មានបច្ចេកវិទ្យាទំនើប ក៏ល្អប្រសើរជាងនេះដែរ។

ក្នុងន័យនេះ ពលរដ្ឋថៃជាច្រើនបានបង្ហាញការយល់ឃើញរបស់ពួកគេថា បើទោះជាកំហុសបច្ចេកទេសនិងភាពខ្វះខាតទាំងនេះកើតឡើងដោយសារកត្តាគ្រោះធម្មជាតិ និងបញ្ហានយោបាយ ដែលរំខានដល់ការរៀបចំក៏ពិតមែនក្ដី ប៉ុន្តែប្រទេសថៃនៅតែត្រូវអាម៉ាសមុខចំពោះមុខអន្តរជាតិដដែល។

យ៉ាងណាក៏ដោយ មន្រ្តីនិងគណៈកម្មាធិការរៀបចំការប្រកួតកីឡាស៊ីហ្គេមរបស់ថៃ នៅតែទទូចឲ្យពលរដ្ឋចូលរួមសាទរព្រឹត្តការណ៍នេះឲ្យបានច្រើនកុះករ ដើម្បីចូលរួមលើកមុខមាត់ជាតិឡើងវិញ ជាពិសេសពួកគេស្នើសុំឲ្យប្រជាជនទាំងអស់មានការជឿជាក់ថាអ្វីៗនឹងដំណើរការទៅដោយរលូន ដ្បិតឥឡូវនេះកីឡាសុីហ្គេម នៅមិនទាន់ដល់ថ្ងៃបើកជាផ្លូវការនោះទេ៕

ប្រទេសថៃ ៖ កាលពីថ្ងៃទី៣ ខែធ្នូ ឆ្នាំ២០២៥ ប៉ាតាយ៉ា គឺជាទីក្រុងទេសចរណ៍ដ៏ល្បីនៅប្រទេសថៃ បានគ្របដណ្តប់ដោយធូលីកខ្វក់ PM 2.5 យ៉ាងខ្លាំង រហូតដល់ពិបាកធ្វើដំណើរតាមផ្លូវដោយសារធូលីក្រាស់ និងបណ្តាលឱ្យមានគ្រោះថ្នា.ក់ចរាចរណ៍ជាញឹកញាប់ ។ អាជ្ញាធរប្រកាសអាសន្នពីផលប៉ះពាល់សុខភាពពលរដ្ឋ ជាពិសេស មានជំងឺផ្លូវដង្ហើមធ្ងន់ធ្ងរ ក្រោយពីបរិមាណធូលីកខ្វក់នៅទីក្រុងប៉ាតាយ៉ា កើនឡើងខ្លាំងជាងទីក្រុងបាងកក ។

សារព័ត៌មានថៃបានរាយការណ៍ពីស្ថានការណ៍ធូលីកខ្វក់ PM 2.5 នៅទីក្រុងប៉ាតាយ៉ា ខេត្តឈុនបុរី កាលពីវេលាម៉ោង៩ព្រឹក ថ្ងៃទី៣ ខែធ្នូ គឺធូលីកខ្វក់យ៉ាងក្រាស់បានគ្របដណ្តប់ពាសពេញទីក្រុងប៉ាតាយ៉ារហូតដល់មើលអ្វីមិនច្បាស់ ស្រដៀងនឹងអ័ព្ទគ្របដណ្តប់លើឆ្នេរសមុទ្រ ជាពិសេស មានធូលីកខ្វក់ខ្លាំងនៅឆ្នេរសមុទ្រប៉ាតាយ៉ាខាងត្បូង ។ នាវាដឹកអ្នកដំណើរជាច្រើនគ្រឿងបានបង្កើនការប្រុងប្រយ័ត្ន ខណៈការធ្វើដំណើរតាមផ្លូវជាច្រើនពិបាកខ្លាំង ដោយសារមានធូលីកខ្វក់ក្រាស់មើលមិនឃើញផ្លូវ និងប្រឈមគ្រោះថ្នាក់ចរាចរណ៍ ។

ទិន្នន័យវាស់គុណភាពខ្យល់នៅទីក្រុងប៉ាតាយ៉ា នាវេលាម៉ោង៩ព្រឹក ថ្ងៃទី៣ ខែធ្នូ បង្ហាញថា កម្រិតធូលីកខ្វក់ PM 2.5 កើនឡើងខ្ពស់បំផុតរហូតដល់៨៨.៥មីក្រូក្រាមក្នុង១ម៉ែត្រគូបនៃខ្យល់ ដែលធ្វើឱ្យសន្ទស្សន៍គុណភាពខ្យល់ (AQI) ក្នុង១៧៤តំបន់កើនឡើងដល់កម្រិតគ្រោះថ្នាក់ ។ កំណើនធូលីកខ្វក់នេះធ្វើឱ្យមនុស្សចាស់ អ្នកជំងឺ និងកុមារ ប្រឈមនឹងផលប៉ះពាល់សុខភាពធ្ងន់ធ្ងរ ហើយកម្រិតធូលីកខ្វក់ដែលត្រួតពិនិត្យកាលពីថ្ងៃទី៣ ខែធ្នូ គឺខ្ពស់ជាងកម្រិតធូលីកខ្វក់ជាមធ្យមរបស់អង្គការសុខភាពពិភពលោករហូតដល់១៧.៧ដង ទើបអាជ្ញាធរដាស់តឿនពលរដ្ឋមិនគួរស្ថិតក្រោមកំដៅថ្ងៃយូរ ។

តាមការវាយតម្លៃបឋម មូលហេតុដែលបណ្តាលឱ្យទីក្រុងប៉ាតាយ៉ាមានធូលីកខ្វក់កើនឡើងខ្ពស់ ដោយសារការដុតកាកសំណល់កសិកម្មនៅតំបន់ជុំវិញខេត្តឈុនបុរី យានជំនិះច្រើនបើកបរក្នុងទីក្រុង ជាពិសេស ពេលរដូវកាលទេសចរណ៍សម្បូរយានជំនិះ និងស្ងប់ខ្យល់ ទើបធ្វើឱ្យធូលីកខ្វក់គ្របដណ្តប់ពាសពេញមិនរសាត់ទៅតំបន់ផ្សេង ។ ស្ថានការណ៍ធូលីពេលនេះធ្វើឱ្យប៉ះពាល់សុខភាពទាំងរយៈពេលខ្លី និងវែង ជាពិសេស មនុស្សចាស់ អ្នកជំងឺផ្លូវដង្ហើម-បេះដូង និងកុមារ មានអាការៈក្រហាយភ្នែក ក្អក ពិបាកដកដង្ហើម ណែនទ្រូង ឬជំងឺរ៉ាំរ៉ៃរើឡើងវិញ ។

អាជ្ញាធរ និងគ្រូពេទ្យណែនំាំឱ្យពលរដ្ឋទាំងអស់ពាក់ម៉ាស់ប្រភេទ N95 ឬម៉ាស់ការពារធូលីកខ្វក់គ្រប់ពេលចេញទៅខាងក្រៅ ចៀសវាងធ្វើសកម្មភាពកណ្តាលថ្ងៃ បិទទ្វារ-បង្អួចដើម្បីកាត់បន្ថយការស្រូបធូលី ព្រមទាំងតាមដានព័ត៌មានអាកាសធាតុយ៉ាងដិតដល់ ។

ចំណែកធូលីកខ្វក់នៅទីក្រុងបាងកក ក៏បានកើនឡើងខ្លាំងដែរកាលពីថ្ងៃទី៣ ខែធ្នូ ដែលធ្វើឱ្យប៉ះពាល់សុខភាពពលរដ្ឋរស់នៅ៦២តំបន់ ក្នុងនោះតំបន់បាងរ៉ាក់មានធូលីកខ្វក់ខ្លាំងបំផុត ដែលស្មើរហូតដល់៥៩.៥មីក្រូក្រាមក្នុង១ម៉ែត្រគូបនៃខ្យល់ ។

មជ្ឈមណ្ឌលដោះស្រាយការបំពុលបរិយាកាសនៃក្រសួងធនធានធម្មជាតិ និងបរិស្ថាន បានរាយការណ៍ពីគុណភាពអាកាសធាតុកាលពីថ្ងៃទី៣ ខែធ្នូ ថា ធូលីកខ្វក់ក៏បានកើនឡើងខ្លាំងនៅខេត្តជាច្រើនដែរ រួមមាន ៖ ប៉ាធុមថានី ណុនថាក់បុរី ណាខនប៉ាធុម សមុទ្រសាខន សមុទ្រប្រាកាន ឈៀងរ៉ៃ ឈៀងម៉ៃ ឡាំពូន សុខោទ័យ ពិស្នុលោក និងកាឡាក់ស៊ីន ៕

ប្រទេសថៃ ៖ ទោះជាអ្នកជំនាញបញ្ជាក់ថា គ្រោះរញ្ជួយដីនៅមីយ៉ាន់ម៉ាកាលពីថ្ងៃទី៣ ខែធ្នូ ឆ្នាំ២០២៥ មិនគ្មានឥទ្ធិពលដល់ថៃក្តី ប៉ុន្តែពលរដ្ឋថៃនៅតែបារម្ភខ្លាំងខ្លា.ចវាបង្កមហន្តរា.យយ៉ាងធ្ងន់ធ្ងរដល់ប្រទេសថៃម្តងទៀត ជាពិសេស ទីក្រុងបាងកក ធ្លាប់រងឥទ្ធិពលគ្រោះរញ្ជួយដីពីមីយ៉ាន់ម៉ាកាលពីខែមីនា ឆ្នាំ២០២៥ រហូតដល់រលំអគារកម្ពស់២៩ជាន់ដែលកំពុងសាងសង់នៅតំបន់ចាក់តុចាក់ និងមានកម្លាំងរំញ័រដល់ខេត្តមួយចំនួន ។

គ្រោះរញ្ជួយដីនៅមីយ៉ាន់ម៉ាលើកនេះមិនប៉ះពាល់ថៃក៏ដោយ ប៉ុន្តែថៃបានតាមដានស្ថានការណ៍យ៉ាងដិតដល់ ដោយសារចំណុចកណ្តាលនៃគ្រោះរញ្ជួយដីនេះស្ថិតនៅទីតាំងតែមួយដូចគ្នានឹងគ្រោះរញ្ជួយដីកាលពីថ្ងៃទី២៨ ខែមីនា ឆ្នាំ២០២៥ ដែលបានបំផ្លិចបំផ្លាញអគារ និងវត្តអារ៉ាមនៅមីយ៉ាន់ម៉ា ព្រមទាំងបំផ្លាញអគារ និងធ្វើឱ្យមនុស្សយ៉ាងច្រើនស្លាប់ទីក្រុងបាងកក រហូតដល់ពលរដ្ឋថៃភ័យខ្លាចសម្រុកលក់ផ្ទះ និងខុនដូទៅរស់នៅតាមខេត្ត ។

កាលពីថ្ងៃទី៣ ខែធ្នូ ឆ្នាំ២០២៥ មានគ្រោះរញ្ជួយដីកើតឡើងទីក្រុងម៉ងខេត ប្រទេសមីយ៉ាន់ម៉ា កម្រិត៣.៦រិចទ័រ ជម្រៅ១០គីឡូម៉ែត្រ ហើយនៅថ្ងៃដដែល ក៏មានគ្រោះរញ្ជួយដីនៅភាគខាងជើងកោះស៊ូម៉ាត្រា ប្រទេសឥណ្ឌូណេស៊ីដែរ កម្រិត៤.១រិចទ័រ ជម្រៅ៣១គីឡូម៉ែត្រ ប៉ុន្តែគ្រោះរញ្ជួយដីទាំងពីរនេះគ្មានឥទ្ធិពលដល់ថៃទេ ។ ទោះជាគ្រោះរញ្ជួយដីលើកនេះមិនប៉ះពាល់ថៃប៉ុន្តែពលរដ្ឋថៃបារម្ភពីគ្រោះរញ្ជួយដីនៅមីយ៉ាន់ម៉ាបង្កមហន្តរា.យយ៉ាងធ្ងន់ធ្ងរដល់ប្រទេសថៃដូចកាលពីខែមីនា ឆ្នាំ២០២៥ និងជជែកគ្នាពេញបណ្តាញសង្គមថា តើចំណុចកណ្តាលនៃគ្រោះរញ្ជួយដីនៅមីយ៉ាន់ម៉ាពេលនេះនឹងមានឥទ្ធិពលដល់ថៃឬអត់ ។

លោក ផាសាកន ផាន់ណុន អ្នកជំនាញមកពីមជ្ឈមណ្ឌលជាតិរញ្ជួយដីនិយាយថា ទោះជាគ្រោះរញ្ជួយដីពេលនេះកើតឡើងនៅទីតាំងតែមួយដូចគ្នានឹងគ្រោះរញ្ជួយដីកាលពីថ្ងៃទី២៨ ខែមីនា ប៉ុន្តែវាស្ថិតនៅឆ្ងាយពីគ្នាប្រមាណ២០០គីឡូម៉ែត្រ មិនប៉ះពាល់ថៃទេ ប៉ុន្តែបើវាមានកម្រិតចាប់ពី៧រិចទ័រ ទៅ៨រិចទ័រ គឺនឹងប៉ះពាល់ធ្ងន់ធ្ងរដល់ថៃដូចពេលកន្លងមក ។ ទោះយ៉ាងណា វាមានកម្លាំងរំញ័រកាលពី១ថ្ងៃ ទៅ២ថ្ងៃកន្លងមក ដែលថៃគួរតាមដានស្ថានការណ៍គ្រោះរញ្ជួយដីយ៉ាងដិតដល់ ។

គ្រោះរញ្ជួយដីកាលពីខែមីនា ឆ្នាំ២០២៥ បង្ហាញពីទីតាំងកើតរញ្ជួយដីកំពុងប្រមូលផ្តុំថាមពលបន្ថែម ហើយអ្នកជំនាញថៃស្រាវជ្រាវថា តើវាអាចមានឥទ្ធិពលដល់ថៃនាថ្ងៃអនាគតដែរឬទេ ។ បើតាមអ្នកជំនាញ គឺរញ្ជួយដីជាគ្រោះធម្មជាតិដែលមនុស្សមិនអាចគ្រប់គ្រងបាន ទោះជាអាចព្យាករណ៍ថាវានឹងកើតឡើងក្តី ប៉ុន្តែមិនអាចប្រាប់ពីពេលវេលាច្បាស់លាស់ឡើយ បើពលរដ្ឋថៃបារម្ភខ្លាំងពេកនឹងប៉ះពាល់ផ្លូវចិត្ត ។ ពលរដ្ឋគួរតាមដានព័ត៌មានរញ្ជួយដីពីស្ថាប័នពាក់ព័ន្ធ និងត្រៀមការពារលំនៅឋានរបស់ខ្លួន បើសំណង់មិនរឹងមាំ គួរជួសជុលឱ្យរឹងមាំដើម្បីកុំឱ្យខូចខាតដោយសាររញ្ជួយដី ។

គួរបញ្ជាក់ថា កាលពីថ្ងៃទី២៨ ខែមីនា ឆ្នាំ២០២៥ គ្រោះរញ្ជួយដីដ៏ធ្ងន់ធ្ងរបានកើតឡើងនៅមីយ៉ាន់ម៉ា កម្រិត៨.២រិចទ័រ ជម្រៅ១០គីឡូម៉ែត្រ និងមានឥទ្ធិពលដល់ទីក្រុងបាងកក និងខេត្តមួយចំនួនរបស់ថៃ ដែលហេតុការណ៍ពេលនោះបណ្តាលឱ្យមនុស្សស្លា.ប់ រងរបួស និងបាត់ខ្លួនជាច្រើននាក់ ដោយសាររលំអគារកម្ពស់២៩ជាន់កំពុងសាងសង់នៅតំបន់ចាក់តុចាក់ ។ បន្ទាប់មក អគារជាច្រើននៅទីក្រុងបាងកកបានរង្គើ និងមានស្នាមប្រេះជាបន្តបន្ទាប់ ដែលពលរដ្ឋថៃមិនទាន់ភ្លេចហេតុការណ៍ពេលនោះនៅឡើយទេ ។

រញ្ជួយដី គឺជាគ្រោះធម្មជាតិកើតឡើងនៅប្រទេសថៃ បន្ទាប់ពីទឹកជំនន់ បាក់ដី និងខ្យល់ព្យុះ ដែលបំផ្លាញសេដ្ឋកិច្ចថៃយ៉ាងធ្ងន់ធ្ងរ ដូចជា គ្រោះរញ្ជួយដីកាលពីខែមីនា ឆ្នាំ២០២៥ បានបំផ្លាញអគារជាច្រើននៅទីក្រុងបាងកក និងបណ្តាខេត្តជុំវិញ ។ ហេតុការណ៍នេះធ្វើឱ្យពលរដ្ឋថៃបារម្ភយ៉ាងខ្លាំងពីការខូចខាត ជាពិសេស ការរស់នៅក្នុងអគារខុនដូខ្ពស់ៗ រហូតដល់សម្រេចចិត្តលក់ផ្ទះនៅទីក្រុងបាងកក ទៅរស់នៅតាមបណ្តាខេត្តវិញ ៕

ប្រទេសថៃ ៖ វិស័យឯកជនបារម្ភពីសេដ្ឋកិច្ចថៃកាន់តែធ្លាក់ចុះខ្លាំងនៅឆ្នាំ២០២៦ បណ្តាលមកពីអាមេរិកផ្អាកចរចាពន្ធទំនិញជាមួយថៃតាំងពីខែវិច្ឆិកា ឆ្នាំ២០២៥ រហូតដល់រដ្ឋាភិបាលថៃគោរពកិច្ចព្រមព្រៀងសន្តិភាពជាមួយកម្ពុជាឡើងវិញ ។ នាយករដ្ឋមន្ត្រីថៃបានប្រកាសផ្អាកកិច្ចព្រមព្រៀងសន្តិភាពជាឯកតោភាគី បន្ទាប់ពីប្រឌិតរឿងចោទប្រកាន់កម្ពុជាបង្កប់មីនថ្មីដើម្បីយកលេសបង្កសង្គ្រា.ម និងទាត់ចោលកិច្ចព្រមព្រៀងសន្តិភាពដែលចុះហត្ថលេខានៅទីក្រុងគូឡាឡាំពួរ ក្រោមវត្តមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ។

កាលពីថ្ងៃទី៣ ខែធ្នូ វិស័យឯកជនបង្ហាញក្តីបារម្ភពីសេដ្ឋកិច្ចថៃកាន់តែធ្លាក់ចុះខ្លាំងនៅឆ្នាំ២០២៦ ដោយសារអាមេរិកផ្អាកចរចាពន្ធទំនិញដោយសារថៃផ្អាកកិច្ចព្រមព្រៀងសន្តិភាពជាមួយកម្ពុជា ដែលធ្វើឱ្យសេដ្ឋកិច្ចថៃគ្មានភាពប្រាកដប្រជា ថែមទាំងមានទឹកជំនន់វាយប្រហារនៅភាគខាងត្បូងបំផ្លាញថវិកាជាតិអស់រាប់សែនលានបាត ។ ក្រៅពីនេះ វិស័យឯកជនអំពាវនាវឱ្យធនាគារជាតិរបស់ថៃគ្រប់គ្រងតម្លៃប្រាក់បាតដែលកំពុងកើនឡើងប៉ះពាល់ដល់ការនាំចេញទំនិញ និងវិស័យទេសចរណ៍ ។

លោក គ្រៀងគ្រៃ ធៀនុគូន ប្រធានឧស្សាហកម្មថៃនិយាយថា វិស័យឯកជនមកពី៣ស្ថាប័ន បានវាយតម្លៃសេដ្ឋកិច្ចថៃនៅឆ្នាំ២០២៦ នឹងកើនឡើងក្រោម២% ដោយសារអាមេរិកផ្អាកចរចាពន្ធទំនិញ និងការប្រកួតប្រជែងជាមួយទំនិញនាំចូលកាន់តែច្រើន ។ វានឹងប៉ះពាល់ការផលិតទំនិញ ការជួលកម្លាំងពលកម្ម និងកម្លាំងទិញ ដែលទាមទារឱ្យមានកិច្ចសហការរវាងរដ្ឋាភិបាល និងវិស័យឯកជនដើម្បីដោះស្រាយបញ្ហារយៈពេលខ្លី ជាពិសេស ស្តារសេដ្ឋកិច្ចឡើងវិញក្រោយទឹកជំនន់ រួមទាំងការរៀបចំសេដ្ឋកិច្ចតាមរយៈគម្រោង Reinvent Thailand បង្កើនសក្តានុពលអាជីវកម្ម ក៏ដូចជាលើកកម្ពស់ទំនិញផលិតក្នុងស្រុក ។

វិស័យឯកជនមើលឃើញថា ទឹកជំនន់នៅភាគខាងត្បូងបានសម្លាប់ជីវិតមនុស្សរាប់រយនាក់ បំផ្លាញទ្រព្យសម្បត្តិ ផ្ទះសម្បែង និងអាជីវកម្មយ៉ាងច្រើន ដែលទំហំការខូចខាតប្រហាក់ប្រហែលនឹងការខូចខាតដោយសាររលកយក្សស៊ូណាមិកាលពីឆ្នាំ២០០៤ និងបំផ្លាញថវិកាជាតិអស់រាប់សែនលានបាត ។ ហេតុនេះ រដ្ឋាភិបាលគួរតែពន្លឿនការជួយសង្គ្រោះពលរដ្ឋរងផលប៉ះពាល់ដោយសារទឹកជំនន់ដើម្បីសម្រាលទុក្ខលំបាក ព្រមទាំងកំណត់វិធានការជួសជុលផ្ទះសម្បែង រោងចក្រ និងអាជីវកម្មឱ្យដំណើរការដូចដើមវិញយ៉ាងឆាប់បំផុត ។

ក្រៅពីនេះ វិស័យឯកជនបារម្ភពីតម្លៃប្រាក់បាតកើនឡើងក្នុងរយៈពេល៧ខែកន្លងមក ដែលប៉ះពាល់ដល់ការនាំចេញទំនិញទៅក្រៅប្រទេស បើធៀបនឹងគូប្រជែងដូចជា វៀតណាម គឺតម្លៃប្រាក់ដុងធ្លាក់ចុះ៣% ហើយតម្លៃប្រាក់បាតកើនឡើងក៏ប៉ះពាល់វិស័យទេសចរណ៍ផងដែរ ។ វិស័យឯកជនសំណូមពរឱ្យធនាគារជាតិរបស់ថៃគ្រប់គ្រងតម្លៃប្រាក់បាត ដោយយកគំរូតាមវៀតណាម ថាតើវៀតណាមធ្វើដូចម្តេចទើបតម្លៃប្រាក់ឌុងធ្លាក់ចុះ ។

ចំណែកលោក ផាយុង ស្រ៊ីវ៉ានិជ ប្រធានធនាគារក្រុងថៃ (KTB) និងជាប្រធានសមាគមធនាគារថៃនិយាយថា ត្រូវទទួលស្គាល់សេដ្ឋកិច្ចថៃកាន់តែធ្លាក់ចុះខ្លាំងនៅឆ្នាំ២០២៦ បើតាមការប៉ាន់ស្មាន គឺផលិតផលក្នុងស្រុកសរុប (GDP) ឆ្នាំ២០២៦ នឹងកើនឡើងត្រឹមតែប្រមាណពី១.៥% ទៅ១.៨% ប៉ុណ្ណោះ ដោយសារភាពមិនប្រាកដប្រជា ហើយនេះមិនរាប់បញ្ចូលទាំងការខូចខាតដោយសារទឹកជំនន់នៅភាគខាងត្បូងទេ ។ ហេតុនេះ រដ្ឋាភិបាលថៃចាំបាច់ត្រូវកំណត់វិធានការស្តារសេដ្ឋកិច្ចឡើងវិញ ។

គួរបញ្ជាក់ថា តាំងពីអាមេរិកផ្អាកចរចាពន្ធទំនិញដោយសាររដ្ឋាភិបាលថៃមិនគោរពកិច្ចព្រមព្រៀងសន្តិភាពបានធ្វើឱ្យសេដ្ឋកិច្ចថៃធ្លាក់ក្នុងភាពមិនប្រាកដប្រជា ដោយសារថៃធ្លាប់ពឹងផ្អែកលើទីផ្សារអាមេរិកខ្លាំង ។ រហូតមកដល់ដើមខែធ្នូ ឆ្នាំ២០២៥ នាយករដ្ឋមន្ត្រីថៃមិនអាចស្វែងរកទីផ្សារថ្មីសម្រាប់លក់ទំនិញជំនួសទីផ្សារអាមេរិកនៅឡើយទេ ស្របពេលទឹកជំនន់វាយប្រហារនៅភាគខាងត្បូង កាន់តែធ្វើឱ្យសេដ្ឋកិច្ចថៃដាំក្បាលចុះ ខណៈពាណិជ្ជកម្មរវាងថៃ-ចិន គឺថៃនាំចេញទំនិញទៅចិនក្នុងបរិមាណតិចតួច ប៉ុន្តែថៃនាំចូលទំនិញពីចិនវិញក្នុងបរិមាណច្រើន ៕