ប្រធានសមាគមសិល្បករជូនក្រមាដល់ វណ្ណដា និងមិត្តរួមទ្រនំទុកជាអនុស្សាវរីយ៍

ការប្រគំតន្រ្តីសិល្បករខ្មែរពីសំណាក់តារាចម្រៀងរ៉េប វណ្ណដា វណ្ណថាន នរិទ្ធ យូហៃ និងរ៉េត ស៊ូហ្សាណា នៅសាល Salle Pleyel ក្នុងទីក្រុងប៉ារីស ប្រទេសបារាំង ធ្វើឱ្យមហាជនមានការចាប់អារម្មណ៍យ៉ាងខ្លាំង ខណៈកម្មវិធីនេះធ្វើឡើងដើម្បីសប្បុរសធម៌។ មុននឹងការប្រគំតន្រ្តីចាប់ផ្តើមអ្នករៀបចំកម្មវិធីបានបង្ហាញពីទម្រង់សិល្បៈវប្បធម៌ខ្មែរទៀតផងធ្វើឱ្យមានការកោតសរសើរយ៉ាងខ្លាំង។

ក្រោមការចូលរួមពីទស្សនិកជនយ៉ាងច្រើនកុះករនៅឯប្រទេសបារាំងប្រកបដោយភាពជោគជ័យនៃព្រឹត្តិការណ៍ Rise for Khmer លោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករបានជូនក្រមាខ្មែរដល់សិល្បករទាំង៥រូបទុកជាអនុស្សាវរីយ៍។ តាមការបង្ហោះរបស់បណ្តាញសង្គមសមាគមសិល្បករខ្មែរ នៅព្រឹកថ្ងៃទី៤ ខែធ្នូ នេះ បានឱ្យដឹងថា «បន្ទាប់ពីកិច្ចសហប្រតិបត្តិការនៃការប្រគំតន្ត្រី Rise for Khmer ដ៏ជោគជ័យបំផុតនៅលើទឹកដីបារាំង លោកជំទាវអ្នកឧកញ៉ា ម៉ៅ ចំណាន គិតម៉េង បានជួបជជែកពិភាក្សាការងារដ៏មានសារៈសំខាន់ ជាមួយផលិតកម្មបារមី ក្រុមការងារសប្បាយ ហើយបន្ទាប់មកលោកជំទាវអ្នកឧកញ៉ា ក៏បានបំពាក់ក្រមាខ្មែរជូនដល់សិល្បករទាំងអស់ក្នុងនោះមាន វណ្ណដា វណ្ណថាន នរិទ្ធ យ៉ូហៃ និង ស៊ូហ្សាណា ទុកជាអនុស្សាវរីយ៍»។

ការប្រគំតន្រ្តី Rise for Khmer ត្រូវបានចាត់ទុកថាជាពេលវេលានៃការបង្កើត កំណត់ត្រាសិល្បៈ វប្បធម៌ជា ប្រវត្តិសាស្ត្រ បង្ហាញឱ្យឃើញពីសមត្ថភាព និងស្នាដៃកូនខ្មែរក្នុងការកសាងកេរ្តិ៍ឈ្មោះ រួមគ្នាលើឆាកតន្ត្រី អន្តរជាតិ Salle Pleyel ដ៏ល្បីល្បាញនៅប្រទេសបារាំង និង នៅតំបន់អឺរ៉ុបទាំងមូល។ នេះលើសពីការប្រគំតន្ត្រីតែជាសញ្ញានៃភាពរីកចម្រើនរបស់សិល្បៈកម្ពុជារបស់អ្នកជំនាន់ថ្មីក្នុងការពង្រីកសម្លេង និងអត្តសញ្ញាណខ្មែរ។

ការជូនជាក្រមាខ្មែរដល់ វណ្ណដា វណ្ណថាន នរិទ្ធ យូហៃ និងរ៉េត ស៊ូហ្សាណា ទុកជាអនុស្សាវរីយ៍របស់ប្រធានសមាគមសិល្បករបានធ្វើឱ្យអ្នកគាំទ្រជាច្រើនបង្ហាញអារម្មណ៍រំភើបរីករាយចំពោះវត្ថុអនុស្សាវរីយ៍នេះ។ លើសពីនេះទៀតនៅថ្ងៃទី៤ ខែធ្នូ ឆ្នាំ២០២៥ គឺខួបលើកទី ១ ដែលក្រមាខ្មែរបានដាក់បញ្ចូលក្នុងបញ្ជីតំណាងនៃបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូផងដែរ៕