ប្រទេសជប៉ុន ៖ សារព័ត៌មាន Kyodo News បានរាយការណ៍នៅថ្ងៃទី២៩ ខែមីនាថា មន្ត្រីខេត្តអូគីណាវ៉ា (ស្ថិតនៅភាគខាងត្បូងប្រទេសជប៉ុន) នឹងកំណត់ចំនួនភ្ញៀវទេសចរមកកម្សាន្តក្នុងខេត្តនេះ មិនឱ្យលើសពីចំនួន១.២០០នាក់ក្នុង១ថ្ងៃ ។ វិធានការនេះ គឺជាផ្នែកមួយនៃវិធានការរបស់រដ្ឋាភិបាលជប៉ុន ដែលការពារមិនឱ្យមានភ្ញៀវទេសចរច្រើនពេក ដែលធ្វើឱ្យប៉ះពាល់ដល់ការរស់នៅរបស់ពលរដ្ឋនៅតំបន់នេះ និងប្រព័ន្ធអេកូឡូស៊ីក្នុងស្រុក ។

ចាប់តាំងពីខែមេសា ឆ្នាំ២០២៣ តទៅ មន្ត្រីខេត្តអូគីណាវ៉ានឹងកំណត់គោលដៅចំនួនភ្ញៀវទេសចរមកកម្សាន្តនៅកោះអ៊ីរីអូមិតិ ស្មើតែ៣៣ម៉ឺននាក់ប៉ុណ្ណោះក្នុង១ឆ្នាំ ។ ជាទូទៅ គេទទួលស្គាល់ថា កោះនេះមានឈ្មោះល្បីល្បាញដោយសារតែវាមានភាពស្រស់ស្អាតតាមធម្មជាតិ និងមានសត្វឆ្មាព្រៃជាច្រើនក្បាលរស់នៅលើកោះទៀតផង ។

នៅមុនពេលការឆ្លងរាតត្បាតនៃជំងឺកូវីដ-១៩ មានប្រជាពលរដ្ឋរស់នៅលើកោះនេះចំនួន២.៤០០នាក់ និងមានភ្ញៀវទេសចរចំនួន៣០ម៉ឺននាក់ក្នុងមួយឆ្នាំៗ ។ ប៉ុន្តែវាធ្វើឱ្យខេត្តនេះជួបបញ្ហាផ្សេងៗដោយសារវិស័យទេសចរណ៍ ដូចជា ពលរដ្ឋខ្វះខាតទឹកប្រើប្រាស់ និងមានគ្រោះថ្នាក់ចរាចរណ៍ទៅលើឆ្មាព្រៃដែលកំពុងជិតផុតពូជ ។ បើតាមទិន្នន័យរបស់មជ្ឈមណ្ឌលអភិរក្សសត្វព្រៃនៅកោះអ៊ីរីអូមិតិ ឱ្យដឹងថា កាលពីឆ្នាំ២០០៨ កន្លងមក ឆ្មាព្រៃរស់នៅលើកោះនេះស្មើប្រមាណ១០០ក្បាល ។

មន្ត្រីខេត្តអូគីណាវ៉ា ក៏បានកំណត់ចំនួនភ្ញៀវទេសចរចូលទស្សនានៅតំបន់បេតិកភណ្ឌពិភពលោកធម្មជាតិចំនួន៥កន្លែងផងដែរ រួមទាំងតំបន់ដែលមានសត្វជិតផុតពូជរស់នៅ ។ ការគ្រប់គ្រងចំនួនភ្ញៀវទេសចរនេះនឹងប្រែប្រួលទៅតាមថ្ងៃនីមួយៗ ហើយរដ្ឋាភិបាលជប៉ុននឹងកំណត់ឱ្យមគ្គុទ្ទេសក៍ទេសចរណ៍ជាអ្នកនាំភ្ញៀវទេសចរចូលទៅកាន់តំបន់កម្សាន្តនានា ៕ ប្រភព ៖ mgronline

ប្រជាពលរដ្ឋដែលធ្វើដំណើរលើស្ពានមុនីវង្សទាំង២ បានបង្ហាញភាពត្អូញត្អែមិនតិចនោះទេ ព្រោះតែមានការកកស្ទះចរាចរណ៍ខ្លាំងពិបាកក្នុងការធ្វើដំណើរ។ យ៉ាងណាមិញ គិតត្រឹមថ្ងៃទី២៩ ខែមីនា នេះ គម្រោងស្ពានខ្សែកាបកោះពេជ្រ-កោះនរា សម្រេចលទ្ឋផលបាន ៦៥% ហើយ នោះមានន័យថាស្ពាននេះនឹងជួយកាត់បន្ថយការកកស្ទះចរាចរណ៍លើស្ពានព្រះមុនីវង្សទាំង២ផងដែរនៅពេលសាងសង់រួច។

ស្ពានខ្សែកាបកោះពេជ្រ-កោះនរា ជាស្ពានភ្ជាប់ចរាចរណ៍កណ្តាលរាជធានីភ្នំពេញទៅមកផ្លូវជាតិលេខ១ បើតាមផែនការ គម្រោងនេះនឹងបញ្ចប់ការសាងសង់នៅចុងឆ្នាំ២០២៣។
គម្រោងស្ពានឆ្លងកាត់ទន្លេ និងតភ្ជាប់ពីក្រុងរណបកោះពេជ្រ និងក្រុងរណបកោះនរាហ៍ បានបើកការដ្ឋានសាងសង់កាលពីថ្ងៃទី២៦ ខែតុលា ឆ្នាំ២០២០ ក្រោមអធិបតីភាពរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។

គួរបញ្ជាក់ថា ស្ពាននេះចំណាយថវិកាចំនួន ៣៨លានដុល្លារអាម៉េរិក ហើយនឹងប្រើប្រាស់រយៈពេលសាងសង់ប្រមាណ ៣៥ខែ មានប្រវែងសរុប ៨២៤ម៉ែត្រ ទទឹង ២៤,៥ ម៉ែត្រ មានបណ្តោយស្ពានបេតុងអារមេ ប្រវែង ៤៨៣ ម៉ែត្រ។ ផ្លូវតភ្ជាប់ក្បាលស្ពានត្រើយខាងកោះពេជ្រ ប្រវែង ២៤៩ម៉ែត្រ ផ្លូវតភ្ជាប់ក្បាលស្ពានកោះនរា ប្រវែង ៩២ម៉ែត្រ៕

ប្រទេសចិន ៖ លោក Ma Ying-jeou អតីតប្រធានាធិបតីតៃវ៉ាន់បានថ្លែងក្នុងអំឡុងពេលលោកធ្វើដំណើរទស្សនកិច្ចមកកាន់ប្រទេសចិន កាលពីថ្ងៃទី២៨ ខែមីនាថា ពលរដ្ឋនៅសងខាងច្រកសមុទ្រតៃវ៉ាន់ គឺជាជនជាតិចិន និងមានជីដូនជីតារួមគ្នា ។

លោក Ma Ying-jeou ធ្លាប់កាន់តំណែងជាប្រធានាធិបតីតៃវ៉ាន់ ចាប់ពីឆ្នាំ២០០៨ ដល់ឆ្នាំ២០១៦ និងជាអតីតមេដឹកនាំតៃវ៉ាន់ដំបូងគេដែលបានធ្វើដំណើរមកប្រទេសចិនក្នុងរយៈពេល៧០ឆ្នាំ ឬចាប់តាំងពីឆ្នាំ១៩៤៩ មក ។ ក្នុងដំណើរទៅគោរពវិញ្ញាណក្ខន្ធលោក ស៊ុន យ៉ាតសេន នៅទីក្រុង Nanjing លោក Ma Ying-jeou ថ្លែងថា ៖ «ពលរដ្ឋនៅសងខាងច្រកសមុទ្រតៃវ៉ាន់ជាជនជាតិចិន ហើយពួកគេទាំងអស់មានជីដូនជីតាជាមួយគ្នា» ។

លោក Ma Ying-jeou ជាសមាជិកជាន់ខ្ពស់របស់គណបក្សគួមីនតាំង បានបន្ថែមទៀតថា ៖ «ខ្ញុំសង្ឃឹមថា សន្តិភាពនឹងកើតមានឡើង ហើយសង្ឃឹមយ៉ាងមុតមាំថា ប្រទេសចិន និងតៃវ៉ាន់ នឹងសហការគ្នាដើម្បីកសាងសន្តិភាព ហើយចៀសវាងការធ្វើសង្គ្រាមជាមួយគ្នា ។ ភាគីទាំងពីរត្រូវតែព្យាយាមធ្វើឱ្យប្រទេសចិនរីកចម្រើន នេះហើយជាការទទួលខុសត្រូវរបស់ជនជាតិចិនទាំងអស់ ដែលមិនអាចចៀសផុត» ។

ការធ្វើដំណើរទស្សនកិច្ចរបស់លោកមកកាន់ប្រទេសចិន ស្របពេលស្ថានការណ៍កំពុងតានតឹងរវាងប្រទេសចិន និងតៃវ៉ាន់ ដោយសារតែចិនព្យាយាមប្រើគ្រប់វិធីសាស្ត្រ មិនថាផ្នែកនយោបាយ ឬកម្លាំងទ័ព ដើម្បីដាក់សម្ពាធឱ្យតៃវ៉ាន់ទទួលស្គាល់អំណាច និងអធិបតេយ្យភាពរបស់ខ្លួន ។

ចំណែកគណបក្ស DPP របស់លោកស្រី Tsai Ing-wen មេដឹកនាំតៃវ៉ាន់បច្ចុប្បន្ន បានលើកជាសំណួរថា ហេតុអ្វីបានជាលោក Ma Ying-jeou ទទូចចង់ទៅប្រទេសចិន ខណៈកាលពីប៉ុន្មានថ្ងៃមុន ប្រទេសហុងឌូរ៉ាសទើបតែប្រកាសផ្តាច់ទំនាក់ទំនងការទូតជាមួយតៃវ៉ាន់ ហើយងាកទៅចងសម្ព័ន្ធភាពជាមួយចិនជំនួសវិញ ? រហូតធ្វើឱ្យបច្ចុប្បន្ននេះ មានប្រទេសត្រឹមតែ១៣ ប៉ុណ្ណោះនៅលើពិភពលោក ដែលភ្ជាប់ទំនាក់ទំនងការទូតជាផ្លូវការ និងទទួលស្គាល់តៃវ៉ាន់ ។

គេសង្កេតឃើញថា មានក្រុមប្រឆាំងមួយចំនួនបានទៅប្រមូលផ្តុំគ្នាធ្វើបាតុកម្មនៅអាកាសយានដ្ឋានតៃប៉ិ ក្នុងថ្ងៃដែលលោក Ma Ying-jeou ចាប់ផ្តើមចេញដំណើរ ដោយសារពួកគេយល់ឃើញថា ការធ្វើដំណើរមកកាន់ប្រទេសចិនរបស់អតីតមេដឹកនាំតៃវ៉ាន់ គឺជាការបង្ហាញឱ្យឃើញថា លោកឈរនៅខាងចិន ៕ ប្រភព ៖ The standard

បរទេស៖ នៅពេលដែលជីវិតរបស់មនុស្សត្រឡប់ទៅធម្មតាវិញបន្ទាប់ពី Covid-១៩ ម៉ាកយីហោជាច្រើនក៏ទទួលបានអត្ថប្រយោជន៍ផងដែរ។ រួមទាំង Red Bull – ភេសជ្ជៈប៉ូវកម្លាំងពេញនិយមបំផុតរបស់ពិភពលោក។ ពួកគេលក់បាន ១១ ពាន់លានកំប៉ុងក្នុងឆ្នាំកន្លងទៅ ដែលនេះបានធ្វើឱ្យគ្រួសាររបស់ក្រុមហ៊ុន Red Bull មានទ្រព្យសម្បត្តិច្រើនជាងគេនៅអាស៊ី។

តាមប្រភព Bloomberg គិតត្រឹមថ្ងៃទី ១៤ ខែមីនា ទ្រព្យសម្បត្តិរបស់គ្រួសារ Yoovidhya មានចំនួនជាង ២៧ ពាន់លានដុល្លារ កើនឡើង ៧.៨ ពាន់លានដុល្លារ បើធៀបនឹងខែមករា ឆ្នាំ ២០២២។ ការកើនឡើងនេះបាននាំមុខក្នុងបញ្ជី គ្រួសារដែលមានបំផុតនៅអាស៊ី ។ ទ្រព្យសម្បត្តិរបស់គ្រួសារ Yoovidhya ក៏កំពុងទាក់ទាញការចាប់អារម្មណ៍កាន់តែខ្លាំងនៅក្នុងប្រទេសថៃ។ ពួកគេ និងគ្រួសារ Chearavanont (ដែលជាម្ចាស់ក្រុមហ៊ុន CP Group) និងគ្រួសារ Chirathivat (ដែលជាម្ចាស់ក្រុមហ៊ុន Central Group) មានទ្រព្យសម្បត្តិសរុបជាង ៦៩ ពាន់លានដុល្លារ។ នេះគឺស្មើនឹង ១៤% នៃផលិតផលក្នុងស្រុកសរុបរបស់ប្រទេសថៃក្នុងឆ្នាំ ២០២១។

Chaleo Yoovidhya បានបង្កើត TC Pharmaceutical ក្នុងឆ្នាំ ១៩៥៦ ហើយបានពង្រីកបន្តិចម្តងៗទៅក្នុងទំនិញប្រើប្រាស់។ នៅឆ្នាំ ១៩៧៥ ក្រុមហ៊ុនបានបើកដំណើរការភេសជ្ជៈប៉ូវកម្លាំង Krating Daeng ដែលជាភាសាថៃមានឈ្មោះថា Red Bull ។
ក្នុងអំឡុងពេលធ្វើដំណើរអាជីវកម្មទៅកាន់អាស៊ីក្រោយមក អ្នកជំនួញជនជាតិអូទ្រីស លោក Dietrich Mateschitz បានដឹងអំពីភេសជ្ជៈនេះ នៅពេលដែលគាត់អស់កម្លាំង បន្ទាប់ពីហោះហើររយៈពេលយូរ។ គាត់បានចាប់ដៃគូជាមួយ Chaleo ដើម្បីកែប្រែរូបមន្ត និងផ្សាយពាណិជ្ជកម្ម Red Bull ជាសកលតាំងពីឆ្នាំ ១៩៨៤។ Red Bull ក៏ឧបត្ថម្ភកីឡាផ្សងព្រេងជាច្រើនផងដែរ ដូចជាការឡើងភ្នំ ឬការជ្រមុជទឹកលើច្រាំងថ្មចោទ។

បច្ចុប្បន្ន Red Bull គឺជាក្រុមហ៊ុនឯកជនមួយ ដែលមានមូលដ្ឋាននៅប្រទេសអូទ្រីស និងដំណើរការជាចម្បងដោយម្ចាស់ភាគហ៊ុនជនជាតិភាគតិច។ គ្រួសារ Yoovidhya ក៏ជាម្ចាស់ក្រុមហ៊ុន TCP Group ដែលផលិតភេសជ្ជៈប៉ូវកម្លាំងនៅក្នុងប្រទេសថៃ និងទីផ្សារអាស៊ីផ្សេងទៀត។ ប្រភព៖vnexpress

តាមសេចក្តីជូនដំណឹងរបស់ក្រសួងធនធានទឹក និងឧត្តុនិយម បានឱ្យដឹងថាកាលពីយប់ថ្ងៃទី២៨ ខែមីនា ឆ្នាំ២០២៣ មានភ្លៀងធ្លាក់ លាយឡំជាមួយខ្យល់កន្រ្តាក់បណ្តាលឱ្យផ្ទះរបស់ប្រជាពលរដ្ឋចំនួន១០១ ខ្នងរងការខូចខាត ក្នុងនោះ៧០ខ្នងនៅខេត្តប៉ៃលិន និង៣១ ខ្នងនៅខេត្តត្បូងឃ្មុំ។

ក្នុងសេចក្តីជូនដំណឹង ផ្ទះប្រជាពលរដ្ឋចំនួន ២១ខ្នង ស្មើនឹង ២១គ្រួសារ ស្ថិតនៅភូមិខ្សាច់ប្រឆេះក្រោម ឃុំក្រូចឆ្មារ ស្រុកក្រូចឆ្មារ ខេត្តត្បូងឃ្មុំ រងការខូចខាត ដោយ២០ខ្នងរបើកដំបូលបន្តិចបន្តួច និង១ខ្នងខូចខាតទាំងស្រុង។ ចំណែក នៅស្រុកមេមត់ ផ្ទះប្រជាពលរដ្ឋចំនួន១០ខ្នងស្មើនឹង ១០ គ្រួសារ រងប៉ះពាល់ដូចគ្នាក្នុងនោះរួមមាន ភូមិឆ្ងរជើង ឃុំដារ ខូចខាត ០២ខ្នង ,ភូមិជាំទ្រៀង ឃុំត្រមូង ខូចខាត ០៥ខ្នង និង ភូមិមុខក្រាស ឃុំមេមត់ ខូចខាត ០៣ខ្នង។ ហេតុការណ៍ខាងលើនេះមិនបង្កឱ្យមានគ្រោះថ្នាក់ដល់ជីវិតមនុស្សនិងសត្វឡើយ។

ដោយឡែក តាមទ័ន្នន័យបឋមបានឱ្យដឹងទៀតថា លំនៅដ្ឋានប្រជាពលរដ្ឋចំនួន៧០ខ្នង ស្ថិតក្នុងឃុំមួយចំនួន នៃស្រុកសាលាក្រៅ និងសង្កាត់មួយចំនួន នៃក្រុងប៉ៃលិន ក៏រងផលប៉ះពាល់ផងដែរ។

គួរជម្រាបជូនថា ក្រសួងធនធានទឹកនិងឧត្តុនិយមបានចេញសេចក្តីជូនដំណឹងថា កម្ពុជានឹងមានភ្លៀងលាយឡំទៅដោយផ្គរ រន្ទះ និងខ្យល់កន្រ្ទាក់ចាប់ពីថ្ងៃទី២៩ មីនា ដល់ថ្ងៃទី៤ ខែមេសា៕

បរទេស៖ នៅពេលដែលជិតឈានដល់ការចាប់ដៃគូជាមួយក្រុមហ៊ុន Nike មូលធននីយកម្មទីផ្សាររបស់ Adidas ឥឡូវនេះគឺត្រឹមតែមួយភាគប្រាំពីរប៉ុណ្ណោះនៃគូប្រជែងរបស់ខ្លួន ហើយកំពុងបាត់បង់កាន់តែខ្លាំងឡើងចំពោះម៉ាកយីហោក្នុងស្រុកនៅប្រទេសចិន។

បច្ចុប្បន្ន Adidas ត្រូវបានគេប្រដូចទៅនឹងអត្តពលិកដែលបង្ហាញសញ្ញាថាអស់ដង្ហើម។ ប្រាក់ចំណូលរបស់ពួកគេមិនផ្លាស់ប្តូរនៅក្នុងត្រីមាសទី ៤ នៃឆ្នាំ ២០២២ ធៀបនឹងរយៈពេលដូចគ្នាក្នុងឆ្នាំ ២០២១។ ក្រុមហ៊ុនក៏បានខាតបង់ចំនួន ៧២៤ លានអឺរ៉ូផងដែរនៅក្នុងរយៈពេលនេះ។

បើយោងទៅតាមប្រភព The Economist Adidas កាលពីថ្ងៃទី ២១ ខែមីនា ក្រុមហ៊ុន Nike បានរាយការណ៍ពីប្រាក់ចំណូលចំនួន ១២ ពាន់លានដុល្លារសម្រាប់ត្រីមាសសារពើពន្ធដែលបានបញ្ចប់នៅថ្ងៃទី ២៨ ខែកុម្ភៈ កើនឡើងជាង ១៤% ពីមួយឆ្នាំទៅមួយឆ្នាំ និងទ្វេដងនៃ Adidas ។
ទន្ទឹមនឹងនេះ មូលធននីយកម្មរបស់ Adidas បានធ្លាក់ចុះមកនៅត្រឹម ២៥ ពាន់លានអឺរ៉ូ ដែលជាមួយភាគប្រាំពីររបស់ក្រុមហ៊ុន Nike ។ វិនិយោគិនសព្វថ្ងៃនេះហាក់ដូចជាមានជំនឿកាន់តែច្រើនទៅលើ Puma ដែលជាគូប្រជែងរបស់ Adidas ។

ដូច្នេះ តើអ្វីទៅជាមូលហេតុដែលក្រុមហ៊ុន Adidas អស់ដង្ហើមជាបណ្តើរៗ? មានកត្តាមួយចំនួនដែលហួសពីការគ្រប់គ្រងរបស់ពួកគេ ដែលធ្វើឲ្យពួកគេធ្លាក់ក្នុងគុណវិបត្តិ។ ទីមួយគឺថាអតិផរណាជំរុញឱ្យតម្លៃខ្សែសង្វាក់ផ្គត់ផ្គង់កើនឡើង។ លើសពីនេះ ពួកគេក៏ត្រូវបញ្ឈប់សកម្មភាពអាជីវកម្មទ្រង់ទ្រាយធំនៅក្នុងប្រទេសរុស្ស៊ីផងដែរ បន្ទាប់ពីជម្លោះអ៊ុយក្រែនបានផ្ទុះឡើងនៅក្នុងខែកុម្ភៈ ឆ្នាំ ២០២២។ នៅខែតុលា ឆ្នាំ ២០២២ Adidas ត្រូវកាត់ផ្តាច់ភាពជាដៃគូជាមួយតារាល្បីៗជាច្រើននាក់។
កាលពីឆ្នាំមុន ការលក់របស់ Adidas នៅក្នុងទីផ្សារនេះបានធ្លាក់ចុះ ៣៦%។ ហេតុផលគឺការទប់ស្កាត់យ៉ាងតឹងរ៉ឹងដោយសារតែជំងឺរាតត្បាត និងមានបញ្ហាជាច្រើនទៀត ដែលហេតុនេះហើយធ្វើឱ្យក្រុមហ៊ុន Adidas មានការធ្លាក់ចុះយ៉ាងខ្លាំងបើធៀបនិងក្រុមហ៊ុន Nike។

ដូច្នេះហើយក្រុមហ៊ុន Nike នៅតែជាម៉ាកសម្លៀកបំពាក់កីឡាដែលលក់ដាច់បំផុតរបស់ប្រទេសចិន បានសម្របខ្លួនទៅនឹងចំណង់ចំណូលចិត្តក្នុងស្រុក។ ជាពិសេសនៅក្នុងបរិបទដែលមនុស្សកាន់តែចាប់អារម្មណ៍លើកីឡាបាល់បោះ។

នាយកប្រតិបត្តិ Gulden ហៅឆ្នាំ ២០២៣ ជា “ឆ្នាំផ្លាស់ប្តូរ” ជួយកសាងអាជីវកម្មដែលរកបានប្រាក់ចំណេញឡើងវិញ ដោយរំពឹងថានឹងទទួលបានប្រាក់ចំណេញនៅឆ្នាំ ២០២៤ ។ គាត់គ្រោងនឹងកាត់បន្ថយភាគលាភ កាត់បន្ថយការបញ្ចុះតម្លៃលើកញ្ចប់ដែលមិនទាន់លក់ ជួសជុលទំនាក់ទំនងជាមួយអ្នកលក់រាយ និងវិនិយោគបន្ថែមលើផលិតផល និងម៉ាកយីហោ Adidas។
វាគឺជាការចាប់ផ្តើមថ្មីមួយ ប៉ុន្តែប្រសិនបើ Adidas ពិតជាចង់តាមទាន់ Nike មែននោះ គឺវាអាចនឹងត្រូវចំណាយពេលយូរ។ ប្រភព៖vnexpress

ប្រទេសថៃ ៖ នៅថ្ងៃទី២៩ ខែមីនា ភ្ញៀវទេសចរដែលទៅកម្សាន្តនៅឆ្នេរសមុទ្រ Yong Ling ស្ថិតក្នុងតំបន់ឧទ្យានជាតិ Hat Chao Mai ស្រុកកាន់តាំង ខេត្តត្រាង ប្រទេសថៃ នឹងប្លែកភ្នែក ហើយភ្ញាក់ផ្អើលជាមួយហ្វូងក្តាមរាប់លានក្បាលដែលបានឡើងមករកចំណីនៅលើឆ្នេរសមុទ្រ ។ គេឃើញថា ហ្វូងក្តាមទាំងនេះបានប្រមូលផ្តុំគ្នានៅលើឆ្នេរក្នុងប្រវែងរាប់រយម៉ែត្រ និងមានពណ៌ទឹកក្រូច ។

ទឹកសមុទ្របានស្រកចុះខ្លាំងនៅពេលព្រឹក និងពេលល្ងាច ហេតុនេះ ទើបហ្វូងក្តាមកាន់តែមានចំនួនច្រើនឡើង ព្រោះនៅតំបន់នេះគ្មានសត្វស្លាបមករំខាន ព្រមទាំងមានចំណីអាហារសម្បូរបែបនៅតាមឆ្នេរសមុទ្រសម្រាប់សត្វក្តាមផងដែរ ។ ការសម្រុកមកកាន់ឆ្នេររបស់ហ្វូងក្តាមបានក្លាយជារូបភាពមួយគួរឱ្យចាប់អារម្មណ៍សម្រាប់ភ្ញៀវទេសចរទាំងអស់ដែលមកកម្សាន្តនៅឆ្នេរនេះ ។

គេសង្កេតឃើញថា ហ្វូងក្តាមមិនសូវខ្លាចភ្ញៀវទេសចរប៉ុន្មានទេ ព្រោះពួកគេអាចចាប់វាលេងបាន ហើយហ្វូងក្តាមទាំងនេះបានដើរស៊ីចំណីនៅតាមឆ្នេរជាជួរៗ ។ ភ្ញៀវទេសចរអាចឃើញហ្វូងក្តាមពេញមួយឆ្នាំតែម្តង ជាពិសេស នៅពេលទឹកសមុទ្រស្រកចុះ គឺហ្វូងក្តាមនឹងឡើងមកលើឆ្នេរកាន់តែច្រើន ។ ពលរដ្ឋនៅតំបន់នេះនិយាយថា វាជាទិដ្ឋភាពស្រស់ស្អាតដ៏អស្ចារ្យមួយបែបធម្មជាតិរបស់ខេត្តត្រាង ។

លោក Kanphasit Damrongsitthinon មគ្គុទេសក៍ទេសចរណ៍របស់សមាគមធុរកិច្ចទេសចរណ៍ខេត្តត្រាង លើកឡើងថា យើងនឹងបានឃើញហ្វូងទាហានក្តាមនៅពេលទឹកសមុទ្រស្រកចុះខ្លាំង ពេលនោះ ហ្វូងក្តាមនឹងឡើងមកលើឆ្នេរដើម្បីរកស៊ីខ្មោចត្រី ប៉ុន្តែបើទឹកសមុទ្រឡើងចុះធម្មតា យើងមិនសូវឃើញវាប៉ុន្មានទេ ។

លោក Kanphasit បន្តថា បើទឹកសមុទ្រស្រកចុះ យើងនឹងបានឃើញហ្វូងក្តាមជាច្រើនឡើងមកលើឆ្នេរ ហើយវាបានបង្ហាញនូវភាពទាក់ភ្នែកចម្លែកអារម្មណ៍ បើអ្នកណាបានមកលេងឆ្នេរសមុទ្រ Yong Ling ។ លើសពីនេះ ភ្ញៀវទេសចរអាចនាំកូនៗពួកគេមកលេងនៅទីនេះបាន ព្រោះគ្មានសត្វស្លាបរំខានក្តាមទេ ពីព្រោះមានមនុស្សច្រើន ៕ ប្រភព ៖ khaosod