ប្រទេសកម្ពុជា ៖ គេចាត់ទុកថា ការប្រកួតកីឡាស៊ីហ្គេមលើកទី៣២ (32nd SEA Games) នៅទីក្រុងភ្នំពេញ គឺជាព្រឹត្តិការណ៍កីឡាដ៏ធំបំផុតរបស់ប្រទេសកម្ពុជា ក្នុងរយៈពេល៦៤ឆ្នាំ ។ មន្ត្រីរៀបចំការប្រកួតកីឡាស៊ីហ្គេមបានព្យាយាមធ្វើយ៉ាងណា ដោះស្រាយផ្ទះស្នាក់របស់កីឡាករបរទេសឱ្យទាន់ពេលវេលា ដែលពួកគេនឹងធ្វើដំណើរមកចូលរួមប្រកួតកីឡាក្នុងប្រទេសរបស់យើង ។

តាមផែនការគ្រោងទុករបស់កម្ពុជា ដែលធ្វើជាម្ចាស់ផ្ទះការប្រកួតកីឡាស៊ីហ្គេម គឺនឹងសាងសង់ផ្ទះស្នាក់នៅឱ្យរួចរាល់នៅចុងខែមីនា ឆ្នាំ២០២៣ និងអាចទទួលឱ្យកីឡាករស្នាក់នៅចាប់ពី៦.០០០នាក់ ទៅ៧.០០០នាក់ ប៉ុន្តែរហូតមកដល់ពេលនេះ ផែនការសាងសង់ផ្ទះស្នាក់នៅមិនអាចសម្រេចតាមផែនការគ្រោងទុកទេ ។ ហេតុនេះ ប្រទេសកម្ពុជាបានសាងសង់ផ្ទះបែប town house ដែលមានកម្ពស់៣ជាន់ត្រៀមទុកទទួលកីឡាករ ក្នុងនោះផ្ទះ១ល្វែងនឹងឱ្យកីឡាករស្នាក់នៅចំនួន១៤នាក់ ហើយមានតម្រៀបគ្រែតាំងពីជាន់ទី១ ឡើងទៅ ។

ទាក់ទងនឹងបញ្ហាផ្ទះស្នាក់នៅនេះ ខាងមន្ត្រីថៃបានសម្តែងការព្រួយបារម្ភ និងលើកឡើងថា រហូតមកដល់ពេលនេះ នៅសល់រយៈពេលត្រឹមតែ៣១ថ្ងៃទៀតប៉ុណ្ណោះ នឹងដល់ថ្ងៃប្រកួតកីឡាស៊ីហ្គេមនៅទីក្រុងភ្នំពេញ ប៉ុន្តែការសាងសង់ផ្ទះស្នាក់នៅមិនទាន់រួចរាល់ ។ លោក Thana Chaiprasit ប្រធានអត្តពលិកប្រទេសថៃ បាននិយាយថា ៖ «ការបារម្ភខ្លាំងរបស់យើង គឺរឿងផ្ទះស្នាក់នៅរបស់កីឡាករ» ។

លោក Thana Chaiprasit បន្តថា ៖ «បើតាមព័ត៌មានចុះផ្សាយ ផ្ទះស្នាក់នៅរបស់កីឡាករមិនទាន់សង់រួចរាល់ទេ ប៉ុន្តែប្រទេសកម្ពុជាក៏បានព្យាយាមសាងសង់វាឱ្យរួចរាល់នៅចុងខែមេសា ឆ្នាំ២០២៣នេះ ។ ដូច្នេះ បើសាងសង់ផ្ទះស្នាក់នៅមិនទាន់ទេ កម្ពុជានឹងនាំកីឡាករទៅស្នាក់នៅក្នុងសណ្ឋាគារជំនួស ប៉ុន្តែខាងថៃនៅតែបារម្ភរឿងការធ្វើដំណើរ ព្រោះវានៅឆ្ងាយពីទីលានប្រកួត ។ ខ្ញុំសង្ឃឹមថា នឹងចំណាយពេលធ្វើដំណើរពីកន្លែងស្នាក់នៅទៅកាន់ទីលានប្រកួតប្រមាណ១ម៉ោងកន្លះ» ។

គួរបញ្ជាក់ថា ការប្រកួតកីឡាស៊ីហ្គេមលើកទី៣២ នៅទីក្រុងភ្នំពេញ ប្រទេសកម្ពុជា ចាប់ពីថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣ នឹងមានការប្រកួតកីឡាសរុបចំនួន៣៦ប្រភេទ និងដណ្តើមមេដាយមាសចំនួន៦០៨ ។ គេចាត់ទុកថា វាជាចំនួនច្រើនបំផុតនៅក្នុងប្រវត្តិសាស្ត្រកីឡាអាស៊ាន៕ ប្រភព ៖ sanook

ប្រទេសអូស្ត្រាលី ៖ ប្រទេសអូស្ត្រាលីនឹងហាមឃាត់ការប្រើប្រាស់កម្មវិធី TikTok នៅក្នុងឧបករណ៍ទាំងអស់របស់មន្ត្រីរដ្ឋាភិបាល ដោយសារបារម្ភពីសុវត្ថិភាពព័ត៌មានផ្ទាល់ខ្លួន ។ ការហាមឃាត់នេះធ្វើឱ្យអូស្ត្រាលីក្លាយជាប្រទេសចុងក្រោយគេបង្អស់ក្នុងសម្ព័ន្ធមិត្តអាមេរិក ដែលបានហាមឃាត់ការប្រើកម្មវិធីពេញនិយមមួយនេះ ។

ការហាមឃាត់ប្រើប្រាស់ TikTok បង្ហាញឱ្យឃើញពីការបារម្ភរបស់ប្រទេសនានាថា ចិននឹងប្រើប្រាស់កម្មវិធី TikTok របស់ក្រុមហ៊ុន ByteDance ដែលមានការិយាល័យនៅទីក្រុងប៉េកាំង ដើម្បីលួចប្រមូលព័ត៌មានពីអ្នកប្រើប្រាស់ រួចបញ្ជូនទៅឱ្យរដ្ឋាភិបាលចិន ។ លើសពីនេះ គេបារម្ភថា កម្មវិធី TikTok នឹងស្វែងរកផលប្រយោជន៍នយោបាយ និងបំផ្លាញប្រយោជន៍សន្តិសុខជាតិរបស់ប្រទេសលោកខាងលិច ។

ទោះយ៉ាងណា ការហាមឃាត់ការប្រើ TikTok របស់ប្រទេសអូស្ត្រាលី គឺអាចធ្វើឱ្យប៉ះពាល់ដល់ទំនាក់ទំនងការទូតរវាងអូស្ត្រាលី និងចិន ឱ្យត្រឡប់មកតានតឹងម្តងទៀត បន្ទាប់ពីទំនាក់ទំនងការទូតរបស់ប្រទេសទាំងពីរនេះទើបតែបានធូរស្រាល ចាប់ពីនាយករដ្ឋមន្ត្រីអូស្ត្រាលី លោក Anthony Albanese ចូលកាន់តំណែងកាលពីខែឧសភា ឆ្នាំ២០២២ ។

មុននេះ ប្រទេសកាណាដា សហរដ្ឋអាមេរិក អង់គ្លេស និងនូវែលសេឡង់ ដែលជាសមាជិកក្រុម Five Eyes ដូចគ្នានឹងអូស្ត្រាលីដែរ បានប្រកាសហាមប្រើប្រាស់ TikTok ក្នុងឧបករណ៍ទំនាក់ទំនងទាំងអស់របស់រដ្ឋាភិបាល ខណៈបារាំង បែលហ្សិក និងគណៈកម្មការអឺរ៉ុបបានប្រកាសហាមប្រើកម្មវិធីនេះដូចគ្នា ។

ចំណែកនាយកគ្រប់គ្រងទូទៅរបស់ TikTok ប្រចាំប្រទេសអូស្ត្រាលី លើកឡើងថា ខាងក្រុមហ៊ុនពិតជាខកបំណងណាស់ ដែលរដ្ឋាភិបាលអូស្ត្រាលីហាមឃាត់ការប្រើ TikTok នៅលើឧបករណ៍ទំនាក់ទំនងរបស់រដ្ឋាភិបាល ហើយអូស្ត្រាលីគ្មានភស្តុតាងបញ្ជាក់ថា កម្មវិធីនេះមានគ្រោះថ្នាក់ចំពោះសុវត្ថិភាពពលរដ្ឋអូស្ត្រាលីទេ៕ ប្រភព ៖ TNN World

សហរដ្ឋអាមេរិក ៖ លោក ដូណាល់ ត្រាំ (Donald Trump) ត្រូវបានប៉ូលិសចាប់ឃុំខ្លួនជាផ្លូវការមុនពេលលោកឡើងតុលាការនៅ Manhattan ដើម្បីស្តាប់ការចោទប្រកាន់ក្នុងករណីផ្តល់ប្រាក់ទៅឱ្យតារាភាពយន្តសិចម្នាក់ដើម្បីបំបិទមាត់ពីទំនាក់ទំនងរវាងនាង និងលោក ត្រាំ ។ ប៉ុន្តែលោក ត្រាំ មិនព្រមសារភាពកំហុសលើការចោទប្រកាន់ទាំងអស់ឡើយ ។

កាលពីថ្ងៃទី៤ ខែមេសា លោក ត្រាំ អតីតប្រធានាធិបតីអាមេរិកបានធ្វើដំណើរមកដល់ការិយាល័យព្រះអយ្យការ មុននឹងត្រូវប៉ូលិសចាប់ឃុំខ្លួន បន្ទាប់មក ប៉ូលិសបាននាំខ្លួនលោកទៅកាន់តុលាការព្រហ្មទណ្ឌ Manhattan ។ ការឡើងតុលាការនេះ គឺពាក់ព័ន្ធនឹងការចោទប្រកាន់ថា លោកបានផ្តល់ប្រាក់ទៅឱ្យតារាសិចម្នាក់ដើម្បីបំបិទមាត់មិនឱ្យនាងនិយាយពីទំនាក់ទំនងស៊ីជម្រៅរវាងនាង និងលោក ត្រាំ ។

ការឡើងតុលាការដើម្បីស្តាប់ការចោទប្រកាន់នេះ លោក ត្រាំ មិនត្រូវបានគេដាក់ខ្នោះដៃទេ ហើយចៅក្រមបានធ្វើការចោទប្រកាន់លើលោកចំនួន៣៤រឿង ប៉ុន្តែលោក ត្រាំ មិនព្រមសារភាពកំហុសក្នុងការចោទប្រកាន់ទាំងអស់ទេ ។

លោក ត្រាំ បានក្លាយជាអតីតប្រធានាធិបតីអាមេរិកដំបូងគេក្នុងប្រវត្តិសាស្ត្រ ដែលបានឡើងតុលាការក្នុងនាមជាចុងចោទដើម្បីស្តាប់ការចោទប្រកាន់ថា លោកបានឱ្យមេធាវីផ្ទាល់ខ្លួនផ្តល់ប្រាក់ទៅឱ្យតារាភាពយន្តសិចម្នាក់ឈ្មោះ Stormy Daniels ចំនួន១៣ម៉ឺនដុល្លារអាមេរិក ដើម្បីបំបិទមាត់កុំឱ្យនាងនិយាយពីទំនាក់ទំនងផ្លូវភេទរបស់នាងជាមួយលោក ត្រាំ មុនការបោះឆ្នោតជ្រើសរើសប្រធានាធិបតីអាមេរិកកាលពីឆ្នាំ២០១៦ ដែលពេលនោះ លោក ត្រាំ ទទួលបានជ័យជម្នះ ។

ក្រុមអ្នកច្បាប់របស់លោក ត្រាំ និយាយថា លោកនឹងត្រៀមរៀបចំសំណុំរឿងនៅតុលាការ ហើយលោកមានគម្រោងត្រឡប់ទៅកាន់ផ្ទះលំហែរកាយ Mar-a-Lago នៅរដ្ឋផ្លរីដា បន្ទាប់ពីលោកឡើងតុលាការរួចរាល់ ៕ ប្រភព ៖ thairath

រដ្ឋធានីវ៉ាស៊ីនតោន៖ សហរដ្ឋអាមេរិក បានដាក់ពង្រាយកងយន្ដហោះទម្លាក់គ្រាប់បែកយុទ្ធសាស្រ្ដ ចំនួន៤គ្រឿង រួមជាមួយនឹងកងទ័ពអាកាសជាច្រើននាក់ ទៅកាន់តំបន់ប៉ាស៊ីហ្វិក ស្របពេលចិន បានបញ្ចេញនាវាមុជទឹក ទៅកាន់សមុទ្រ ហើយសកម្មភាពយោធាបែបនេះហាក់បីដូចជា ក្រុងវ៉ាស៊ីនតោន កំពុងតែត្រៀមលក្ខណៈ ទប់ទល់នឹងសកម្មភាពណាមួយរបស់ក្រុងប៉េកាំង។

ទស្សនាវដ្ដី Air Force បានចេញផ្សាយ កាលពីថ្ងៃអង្គារ ទី៤ ខែមេសា ឆ្នាំ២០២២ ថា មន្ទីរបញ្ចកោណ បានបញ្ជូនយន្ដហោះទម្លាក់គ្រាប់បែកយុទ្ធសាស្រ្ដ ប្រភេទ B-52 ចំនួន៤គ្រឿង និង កងទ័ពអាកាស ជាង២០០នាក់ ចេញពីមូលដ្ឋានកងទ័ពអាកាសបាកស្ដេល (Barksdale) ស្ថិតក្នុងរដ្ឋលូស៊ាណា (Louisiana) នាភាគអាគ្នេយ៍ សហរដ្ឋអាមេរិក ទៅកាន់មូលដ្ឋានកងទ័ពអាកាសអានឌ័រសេន (Andersen) របស់ខ្លួន នៅលើកោះហ្គាំ (Guam) ស្ថិតក្នុងតំបន់ប៉ាស៊ីហ្វិក កាលពីថ្ងៃទី៣០ ខែមីនា។ សកម្មភាពយោធារបស់ក្រុងវ៉ាស៊ីនតោន កំពុងតែបង្ហាញ អំពីការចាប់ផ្តើមការដាក់ពង្រាយកងយន្ដហោះទម្លាក់គ្រាប់បែកយុទ្ធសាស្រ្ដចុងក្រោយបង្អស់ នៅក្នុងតំបន់ឥណ្ឌូ-ប៉ាស៊ីហ្វិក។

កងទ័ពអាកាសរបស់សហរដ្ឋអាមេរិក ប្រចាំនៅតំបន់ប៉ាស៊ីហ្វិក បានប្រកាស នៅក្នុងការចេញផ្សាយព័ត៌មានមួយ ថា យន្តហោះទម្លាក់គ្រាប់បែកយុទ្ធសាស្រ្ដ B-52 អាចហោះហើរ ចម្ងាយជាង ១៤ ០០០គីឡូម៉ែត្រ នៅក្នុងល្បឿន ១០៤៧គីឡូម៉ែត្រក្នុង១ម៉ោង ហើយកងទ័ពអាកាសទាំងនោះ នឹងក្លាយជាផ្នែកមួយ សម្រាប់ក្រុមបេសកកម្មយន្ដហោះទម្លាក់គ្រាប់បែកទី៩៦។ ចំណែកការដាក់ពង្រាយយន្ដហោះទម្លាក់គ្រាប់បែក B-52 នេះ នឹងធ្វើឲ្យកងទ័ពអាកាសទាំងនោះ ចូលរួម នៅក្នុងសមយុទ្ធហ្វឹកហ្វឺន និង បំពេញបេសកកម្ម រួមជាមួយនឹងសេវាកម្មផ្សេងៗទៀត រួមជាមួយសម្ពន្ធមិត្ត និង ដៃគូ។

លោកវរសេនីយ៍ វ៉ានេសសា វីលខក់ (Vanessa Wilcox) មេបញ្ជាការកងវរសេនាតូចយន្ដហោះទម្លាក់គ្រាប់បែកទី៩៦ បានបញ្ជាក់ នៅក្នុងសេចក្ដីថ្លែងការណ៍មួយ ថា «កម្លាំងការងាររបស់យន្ដហោះទម្លាក់គ្រាប់បែក ហើយជាពិសេសយន្តហោះ B-52 នៅក្នុងតំបន់ឥណ្ឌូ-ប៉ាស៊ីហ្វិក មិនត្រឹមតែជំរុញឲ្យកម្លាំងកងទ័ពអាកាសរបស់យើង ពង្រឹងនូវជំនាញបច្ចេកទេស និង មានជំនាញលើប្រព័ន្ធអាវុធដ៏ទំនើបប៉ុណ្ណោះទេ ប៉ុន្តែសកម្មភាពនេះ ក៏ជាការផ្ញើសារដ៏សំខាន់មួយទៅកាន់គូប្រជែងរបស់យើង ផងដែរ។ បេសកកម្មនេះ បង្ហាញ អំពីការត្រៀមខ្លួនជាប់ជានិច្ច និង ការប្តេជ្ញាចិត្តយ៉ាងម៉ឺងម៉ាត់របស់យើង ការការពារដល់សម្ពន្ធមិត្តរបស់យើង នៅក្នុងតំបន់ ដើម្បីធានានូវសេរីភាព សម្រាប់សកម្មភាព ទាំងបច្ចុប្បន្ន និង អនាគត ក៏ដូចជា ការធានានូវស្ថិរភាព នៅក្នុងតំបន់ថែមទៀតផង»។

បច្ចុប្បន្ន យន្ដហោះទម្លាក់គ្រាប់បែករបស់សហរដ្ឋអាមេរិក កំពុងតែបំពេញបេសកកម្មយ៉ាងសកម្ម នៅក្នុងតំបន់ឥណ្ឌូ-ប៉ាស៊ីហ្វិក ចាប់តាំងពីដើម ឆ្នាំ២០២៣ រហូតមក ជាពិសេស នៅជុំវិញឧបទ្វីបកូរ៉េ។ បេសកកម្មនេះ ជាផ្នែកមួយ នៃការប្តេជ្ញាចិត្តរបស់មន្ទីរបញ្ចកោណ នៅក្នុងការពង្រីកនូវការធ្វើសមយុទ្ធយោធា និង បង្កើនកិច្ចសហប្រតិបត្តិការជាមួយប្រទេសកូរ៉េខាងត្បូង ដើម្បីឆ្លើយតបទៅនឹងការបាញ់មីស៊ីល ការបាញ់សាកល្បងមីស៊ីលផ្លោង និង ការគំរាមកំហែងជាហូរហែ មកពីកូរ៉េខាងជើង។ ជាមួយគ្នានេះ កងយន្ដហោះទម្លាក់គ្រាប់បែក B-1 របស់សហរដ្ឋអាមេរិក ក៏បានហោះធ្វើសមយុទ្ធរួមគ្នាជាមួយនឹងយន្ដហោះប្រយុទ្ធរបស់កូរ៉េខាងត្បូង កាលពីដើមខែកុម្ភៈ ខណៈយន្ដហោះទម្លាក់គ្រាប់បែក B-52 បានហោះជាមួយនឹងយន្ដហោះរបស់ប្រទេសអាស៊ីបូព៌ាមួយនេះ កាលពីដើមខែមីនា។

មន្រ្ដីជាន់ខ្ពស់របស់សហរដ្ឋអាមេរិក បានលើកឡើង កាលពីខែមីនា ថា មន្ទីរបញ្ចកោណ នឹងបញ្ជូនយន្ដហោះទំនើបៗ ចេញពីតំបន់មជ្ឈិមបូព៌ា យកទៅដាក់ពង្រាយ នៅក្នុងតំបន់អឺរ៉ុប និង ប៉ាស៊ីហ្វិក ។ សកម្មភាពរបស់សហរដ្ឋអាមេរិក បង្ហាញពីត្រៀមខ្លួនទុកជាមុន សម្រាប់ការប្រឈមមុខដាក់គ្នាជាមួយនឹងរុស្ស៊ី និង ចិន នៅពេលណាមួយ ដែលអាចនឹងកើតឡើង ជាយថាហេតុ។

សារព័ត៌មាន Channel News Asia បានចេញផ្សាយ កាលពីថ្ងៃអង្គារ ទី៤ ខែមេសា ថា របាយការណ៍របស់មន្រ្ដីបញ្ចកោណ បានរាយការណ៍ ថា ចិន បានរក្សាវត្ដមាននាវាមុជទឹក បំពាក់ដោយមីស៊ីលបាល្លីស្ទីកនុយក្លេអ៊ែរ ជាលើកដំបូង យ៉ាងតិចចំនួន១គ្រឿង នៅក្នុងសមុទ្រ។ សកម្មភាពបែបនេះ គឺក្រុងប៉េកាំង ចង់បន្ថែមសម្ពាធ ទៅលើសហរដ្ឋអាមេរិក និង សម្ពន្ធមិត្តរបស់ក្រុងវ៉ាស៊ីនតោន ខណៈលោកខាងលិច ព្យាយាមទប់ទល់នឹងកម្លាំងយោធារបស់ក្រុងប៉េកាំង កំពុងតែកើនឡើងយ៉ាងឆាប់រហ័ស។

ក្រុមអ្នកវិភាគរបស់លោកខាលិច បានអះអាង ថា ការវាយតម្លៃយោធារបស់ចិន បង្ហាញ ថា នាវាមុជទឹក បំពាក់ដោយមីស៊ីលបាល្លីស្ទីក ប្រភេទ Jin-class ចំនួន៦គ្រឿង កំពុងតែប្រតិបត្តិការល្បាត ចេញពីកោះហៃណាន (Hainan) ចូលទៅក្នុងសមុទ្រចិនខាងត្បូង។ នាវាមុជទឹកទាំងនោះ បំពាក់ទៅដោយមីស៊ីលផ្លោងថ្មី អាចបាញ់រយៈចម្ងាយឆ្ងាយ ហើយវាមានសមត្ថភាព អាចវាយប្រហារដល់ទ្វីបអាមេរិក។

ក្រោមកតិកាសញ្ញាសន្ដិសុខត្រីភាគី ហៅកាត់ AUKUS (អូឃើស) រវាង សហរដ្ឋអាមេរិក ចក្រភពអង់គ្លេស និង អូស្រ្ដាលី បង្ហាញ ថា អូស្ត្រាលី នឹងមាននាវាមុជទឹក ដើរដោយថាមពលនុយក្លេអ៊ែរ ជាលើកដំបូងរបស់ខ្លួន នៅក្នុងរយៈពេលពីរទសវត្សរ៍ខាងមុខ យ៉ាងណាក៏ដោយ ក៏ការល្បាត នៃនាវាមុជទឹករបស់ចិន បំពាក់ដោយមីស៊ីលផ្លោង នៅក្នុងសមុទ្រចិនខាងត្បូង សម្បូរទៅដោយធនធាន នឹងបង្កើតជាបញ្ហាស្មុគស្មាញដល់សហរដ្ឋអាមេរិក និង សម្ពន្ធមិត្តរបស់ក្រុងវ៉ាស៊ីនតោន។ សកម្មភាពទាំងនេះ ប្រៀបបីដូចជា ការបង្កើននូវការដាក់ពង្រាយនូវទ្រព្យសម្បត្ដិការពារជាតិ តាមបែបសម័យសង្គ្រាមត្រជាក់។

លោកឧត្តមសេនីយ៍ អេនតូនី ខូតតុន (Anthony Cotton) មេបញ្ជាការ នៃទីបញ្ជាការយុទ្ធសាស្ត្រអាមេរិក បានប្រាប់ដល់សវនាការរបស់សភា កាលពីខែមីនា ថា បច្ចុប្បន្ន នាវាមុជទឹករបស់ចិន បានបំពាក់ ដោយមីស៊ីលជំនាន់ទី៣ ប្រភេទ JL-3។ មីស៊ីលប្រភេទនេះ អាចបាញ់ នៅក្នុងចម្ងាយ ១០ ០០០គីឡូម៉ែត្រ ហើយវាអាចបំពាក់ក្បាលគ្រាប់នុយក្លេអ៊ែរ និង អាចវាយប្រហារ ចេញពីចិន ទៅដល់សហរដ្ឋអាមេរិក ថែមទៀតផង។

លោក ធីមូធី រ៉ៃ (Timothy Wright) អ្នកវិភាគវិស័យការពារជាតិ នៃវិទ្យាស្ថានសិក្សាយុទ្ធសាស្រ្ដអន្ដរជាតិ នៅទីក្រុងឡុងដ៍ ចក្រភពអង់គ្លេស បានបញ្ជាក់ ថា កងទ័ពអាមេរិក ប្រហែលជាអាចទប់ទល់នឹងស្ថានភាព នៅពេលនេះបាន។ ប៉ុន្តែសហរដ្ឋអាមេរិក នឹងត្រូវប្រតិបត្ដិការទ្រព្យសម្បត្តិការពារជាតិបន្ថែមទៀត នៅក្នុងរយៈពេល១០ទៅ១៥ឆ្នាំខាងមុខ ខណៈនាវាមុទឹកបំបាំងកាយ ប្រភេទType-096 ចាប់ផ្តើមប្រតិបត្ដិការ។ ដោយឡែក ការពង្រីកកម្លាំងនុយក្លេអ៊ែរយ៉ាងរហ័សរបស់ប្រទេសចិន មានន័យថា អ្នកយុទ្ធសាស្រ្តរបស់សហរដ្ឋអាមេរិក ត្រូវតែប្រឈមមុខ ជាមួយនឹងសត្រូវមហាអំណាចនុយក្លេអ៊ែរ ចំនួន២ជាលើកដំបូង រួមជាមួយនឹងរុស្ស៊ី ផងដែរ៕

ប្រទេសម៉ាឡេស៊ី ៖ កាលពីថ្ងៃទី៣ ខែមេសា រដ្ឋសភាម៉ាឡេស៊ីបានបោះឆ្នោតអនុម័តធ្វើកំណែទម្រង់ច្បាប់ជាទ្រង់ទ្រាយធំមួយ ដោយសម្រេចលុបចោលទោសប្រហារជីវិត កាត់បន្ថយកំហុសដែលត្រូវជាប់ទោសប្រហារជីវិត និងលុបចោលទោសជាប់ពន្ធនាគារអស់មួយជីវិតផងដែរ ។ តាំងពីឆ្នាំ២០១៨ ម៉ាឡេស៊ីធ្លាប់បានផ្អាកទោសប្រហារជីវិត និងសន្យាជាលើកដំបូងថា នឹងលុបចោលទោសប្រហារជីវិតទាំងស្រុង ។

ទោះយ៉ាងណា មុននេះ រដ្ឋាភិបាលម៉ាឡេស៊ីបានប្រឈមមុខនឹងការដាក់សម្ពាធនយោបាយពីភាគីមួយចំនួន និងបរាជ័យក្នុងការលុបចោលទោសប្រហារជីវិតរយៈពេល១ឆ្នាំក្រោយមក ។ ម៉ាឡេស៊ីប្រកាសថា នឹងមានទោសប្រហារជីវិតដូចមុន ប៉ុន្តែអនុញ្ញាតឱ្យតុលាការដាក់ទណ្ឌកម្មផ្សេងទៀតតាមសិទ្ធិរបស់តុលាការ ។

នៅក្រោមការធ្វើវិសោធនកម្មច្បាប់ចុងក្រោយបង្អស់នេះ គឺគ្មានការកាត់ទោសប្រហារជីវិតទេ ប៉ុន្តែមានការវាយដំ និងដាក់ពន្ធនាគារចាប់ពី៣០ឆ្នាំ ទៅ៤០ឆ្នាំ ហើយច្បាប់របស់ម៉ាឡេស៊ីបានកំណត់ការជាប់ពន្ធនាគារអស់មួយជីវិតមកស្មើនឹងរយៈពេល៣០ឆ្នាំ ។ កាលពីមុន ទោសប្រហារជីវិតនៅម៉ាឡេស៊ីនឹងបង្ខំឱ្យប្រើប្រាស់ជាមួយជនល្មើសក្នុងបទឧក្រិដ្ឋកម្មធ្ងន់ធ្ងរដូចជា ការប្រាស់ប្រើថ្នាំញៀន ឃាតកម្ម ភេរវកម្ម ការចាប់ពង្រត់ និងការគ្រប់គ្រងអាវុធគ្មានការអនុញ្ញាត ។

តាមទិន្នន័យរបស់ក្រសួងយុត្តិធម៌បញ្ជាក់ថា បច្ចុប្បន្ន មានអ្នកទោសរង់ចាំការប្រហារជីវិតចំនួន១.៣០០នាក់នៅទូទាំងប្រទេស ក្នុងនោះមានទាំងជនជាតិម៉ាឡេស៊ី និងជនបរទេសផងដែរ ហើយភាគច្រើនជាជនជាប់ចោទក្នុងបទការជួញដូរគ្រឿងញៀន និងឃាតកម្ម ។ នៅពេលរដ្ឋសភាអនុម័តច្បាប់ថ្មី អ្នកទោសទាំងអស់អាចស្នើសុំឱ្យតុលាការពិចារណាពិនិត្យមើលសាលក្រមឡើងវិញបាន ៕ ប្រភព ៖ TNN World