ប្រទេសហ្វាំងឡង់ត្រៀមចូលជាសមាជិករបស់អង្គការ NATO

ប្រទេសហ្វាំងឡង់ ៖ លោក Jens Stoltenberg លេខាធិការរបស់អង្គការ NATO បានបង្ហាញថា ហ្វាំងឡង់ត្រៀមខ្លួនចូលជាសមាជិកលំដាប់ទី៣១ របស់អង្គការ NATO ជាផ្លូវការនៅថ្ងៃទី៤ ខែមេសា ក្រោយពីប្រទេសនេះទទួលបានការអញ្ជើញឱ្យចូលរួមប្រជុំថ្នាក់រដ្ឋមន្ត្រីការបរទេសក្នុងក្រុមប្រទេស NATO នៅទីក្រុងប្រ៊ុចសែល ប្រទេសបែលហ្សិក ចាប់ពីថ្ងៃទី៤-៥ ខែមេសា ។

លោក Jens Stoltenberg បានសម្តែងនូវការអបអរសាទរ និងទទួលយកប្រទេសហ្វាំងឡង់ចូលជាសមាជិកថ្មីរបស់អង្គការ NATO ដោយលោកបញ្ជាក់ថា ៖ «យើងនឹងយកទង់ជាតិហ្វាំងឡង់ដាក់លើដងទង់នៅការិយាល័យកណ្តាលរបស់ NATO ជាលើកដំបូង ។ ថ្ងៃទី៤ ខែមេសា គឺជាថ្ងៃល្អមួយសម្រាប់ស្ថេរភាពរបស់ហ្វាំងឡង់ និងសមាជិក NATO ទាំងអស់ ហើយប្រទេសស៊ុយអែតនឹងមានសុវត្ថិភាពជាងមុនដោយសារលទ្ធផលនេះ» ។

ដំណើរការដាក់ពាក្យសុំចូលជាសមាជិក NATO របស់ហ្វាំងឡង់មានវឌ្ឍនភាពយ៉ាងខ្លាំង ក្រោយពីរដ្ឋសភាប្រទេសតួកគីបានបោះឆ្នោតផ្តល់សច្ចាប័នលើសំណើសុំនេះ ។ ហ្វាំងឡង់ជាប្រទេសចុងក្រោយ បន្ទាប់ពីត្រូវគេពន្យារពេលអស់ជាច្រើនខែដើម្បីឱ្យហ្វាំងឡង់ និងស៊ុយអែត បង្ហាញការព្យាយាមដោះស្រាយបញ្ហាទាក់ទងនឹងក្រុមឧទ្ទាមឃឺដ តាមការអំពាវនាវរបស់រដ្ឋាភិបាលតួកគី ។ ដូច្នេះ ហ្វាំងឡង់ជាប្រទេសតែមួយប៉ុណ្ណោះដែលរដ្ឋសភាតួកគីបានអនុម័តឱ្យចូលជាសមាជិក NATO ចំណែកស៊ុយអែតត្រូវរង់ចាំបន្តទៀត ។

ប្រទេសហ្វាំងឡង់ រួមទាំងប្រទេសជិតខាងដូចជា ស៊ុយអែត បានប្រកាន់ជំហរកណ្តាល មិនលម្អៀង និងសុំចូលជាសមាជិកថ្មីក្នុងអង្គការ NATO តាំងពីខែឧសភា ឆ្នាំ២០២២ ខណៈមានសង្គ្រាមរវាងរុស្ស៊ី និងអ៊ុយក្រែន ជាកត្តាជំរុញសំខាន់ ។ ហ្វាំងឡង់មានព្រំដែនជាប់ជាមួយប្រទេសរុស្ស៊ី ក្នុងចម្ងាយជាង១.៣៤០គីឡូម៉ែត្រ ហើយរុស្ស៊ីបានបញ្ជូនទ័ពទៅវាយប្រហារអ៊ុយក្រែន គឺបានជំរុញឱ្យហ្វាំងឡង់សុំចូលជាសមាជិកថ្មីរបស់ NATO ដោយសមាជិកថ្មីត្រូវតែមានការអនុម័តយល់ព្រមពីសមាជិកចាស់គ្រប់ប្រទេស ។

ចំណែកអនុរដ្ឋមន្ត្រីក្រសួងការបរទេសរុស្ស៊ី លោក Alexander Grrushko បានចង្អុលបង្ហាញថា ៖ «ក្នុងស្ថានភាពដែលមានកងទ័ព និងអាវុធរបស់សមាជិក NATO ប្រទេសផ្សេងៗបានដឹកជញ្ជូនអាវុធទាំងនេះទៅកាន់ហ្វាំងឡង់ ហើយយើងត្រូវចាត់វិធានការមួយចំនួនដើម្បីធានាថា នឹងគ្មានការគំរាមណាមួយមកលើកងទ័ពរុស្ស៊ី» ។

បើតាមការស្ទង់មតិទៅលើពលរដ្ឋហ្វាំងឡង់បង្ហាញថា មានពលរដ្ឋជិត៨០% បានគាំទ្រការចូលជាសមាជិកថ្មីរបស់ NATO និងកើនឡើងប្រមាណ៣០% ក្រោយពីរដ្ឋសភាតួកគីសម្រេចអនុម័តការស្នើសុំចូលជាសមាជិក NATO របស់ហ្វាំងឡង់ ៕ ប្រភព ៖ The standard

ប្រទេសថៃ ៖ រដ្ឋាភិបាលថៃកំពុងព្យាយាមសហការជាមួយប្រទេសផ្សេងៗក្នុងតំបន់អាស៊ាន ដើម្បីប្រយុទ្ធប្រឆាំងនឹងការបំពុលបរិយាកាសដោយសារផ្សែងកខ្វក់ឆ្លងកាត់ព្រំដែន ដែលកំពុងកើតឡើងនៅទូទាំងតំបន់ ។

ក្រោយពីកិច្ចប្រជុំរបស់គណៈរដ្ឋមន្ត្រីកាលពីចុងខែមីនា ឆ្នាំ២០២៣ កន្លងមក លោក ប្រាយុទ្ធ ចាន់អូចា នាយករដ្ឋមន្ត្រីថៃបានថ្លែងថា បញ្ហាធូលី និងផ្សែង ចាំបាច់ត្រូវតែដាក់ក្នុងរបៀបវារៈនៅតំបន់អាស៊ានដើម្បីពិភាក្សាគ្នារកដំណោះស្រាយ ។ ចំណែកលោក Don Pramutwinai ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស បានបញ្ជូនលិខិតទៅកាន់ប្រទេសសមាជិកអាស៊ានរួចហើយ ដើម្បីស្នើសុំកិច្ចសហការស្វែងរកដំណោះស្រាយការបំពុលបរិយាកាស ។

លោក Don Pramutwinai បន្ថែមថា ក្រសួងការបរទេសថៃបានទំនាក់ទំនងជាមួយប្រទេសមីយ៉ាន់ម៉ា និងឡាវ ដើម្បីរកវិធីដោះស្រាយបញ្ហាខ្យល់ពុលក្នុងបរិយាកាសដោយសារផ្សែងកខ្វក់ឆ្លងកាត់ព្រំដែនជាប្រចាំក្នុងរយៈពេលប៉ុន្មានកន្លងមកនេះ ។ ដូច្នេះ លោកបានជួបពិភាក្សាជាមួយឯកអគ្គរាជទូតរបស់ប្រទេសទាំងពីរ និងបានជម្រាបឱ្យដឹងពីភាពចាំបាច់ដើម្បីសហការគ្នាកាត់បន្ថយការបំពុលបរិយាកាស ។ លើសពីនេះ ឯកអគ្គរាជទូតថៃប្រចាំប្រទេសមីយ៉ាន់ម៉ា និងឡាវ ក៏បានចូលជួបជាមួយមន្ត្រីរដ្ឋាភិបាល និងពិភាក្សាគ្នាអំពីរឿងនេះផងដែរ ។

រីឯលោក Wijarn Simachaya នាយកវិទ្យាស្ថានបរិស្ថាន និងជាអតីតរដ្ឋលេខាធិការក្រសួងធនធានធម្មជាតិ និងបរិស្ថានថ្លែងថា ការបរាជ័យនៃការគ្រប់គ្រងធូលីកខ្វក់ឆ្លងកាត់ព្រំដែន គឺមួយផ្នែកមកពីមិនអាចបង្ខំអនុវត្តច្បាប់ឱ្យបានហ្មត់ចត់ក្នុងចំណោមប្រទេសអាស៊ាន ។

ចំណែករដ្ឋមន្ត្រីក្រសួងមហាផ្ទៃ លោក Anupong Paochinda បានថ្លែងដែរថា អភិបាលខេត្តនានាមានអំណាចបង្ខំឱ្យប្រើប្រាស់វិធានការផ្សេងៗដើម្បីគ្រប់គ្រងធូលីកខ្វក់ ក្រោមការណែនាំរបស់ក្រសួងធនធានធម្មជាតិ និងបរិស្ថាន ។ ដំណាក់កាលបន្តទៀត គឺសំណូមពរទៅកាន់អ្នកជិះម៉ូតូទាំងអស់ ចៀសវាងការចូលទៅកាន់តំបន់ណាមានផ្សែងក្រាស់ ខណៈផ្សែងចេញពីបំពង់ស៊ីម៉ាំងម៉ូតូ ក៏ជាមូលហេតុសំខាន់ដែលធ្វើឱ្យបរិយាកាសកខ្វក់ដែរ ។

ទោះយ៉ាងណា លោក Anutin Charnvirakul ឧបនាយករដ្ឋមន្ត្រី និងជារដ្ឋមន្ត្រីក្រសួងសុខាភិបាលថ្លែងថា ក្រសួងសុខាភិបាលមានសម្ភារពេទ្យសម្រាប់ផ្តល់ដល់អ្នករស់នៅក្នុងតំបន់មានការបំពុលបរិយាកាស ជាពិសេស ខេត្តនៅភាគខាងជើងប្រទេស ។

គួរបញ្ជាក់ថា នៅប្រទេសថៃមានអ្នកជំងឺប្រមាណ៤.០០០នាក់ក្នុង១សប្តាហ៍ ដែលបានចូលមកព្យាបាលជំងឺផ្លូវដង្ហើមដោយសារធូលីកខ្វក់ក្នុងបរិយាកាស ។ បើតាមទិន្នន័យរបស់នាយកដ្ឋានត្រួតពិនិត្យការបំពុលបរិស្ថានឃើញថា ខេត្តឈៀងរ៉ៃមានកម្រិតធូលីអាក្រក់បំផុត កាលពីថ្ងៃទី២៨ ខែមីនា កន្លងមក ជាពិសេស នៅស្រុកម៉ែសាយ ៕

ប្រភព ៖ AEC connect

ប្រទេសហ្វាំងឡង់ ៖ គណបក្សសង្គមប្រជាធិបតេយ្យរបស់រដ្ឋាភិបាលប្រទេសហ្វាំងឡង់បានចាញ់ឆ្នោតកាលពីថ្ងៃទី២ ខែមេសា កន្លងមក ទៅឱ្យគណបក្សប្រជែងសំខាន់ ដែលធ្វើឱ្យនាយករដ្ឋមន្ត្រី លោកស្រី Sanna Marin ជាមេដឹកនាំស្រីរបស់ប្រទេសនេះត្រៀមចុះចេញពីតំណែង ។

លទ្ធផលមិនផ្លូវការរបស់ការបោះឆ្នោតសមាជិកសភាតំណាងរាស្ត្រ កាលពីថ្ងៃទី២ ខែមេសា ជាការបោះឆ្នោតសមាជិកសភាថ្មី ដែលមាន២០០កៅអីឃើញថា គណបក្សរួបរួមជាតិ (NCP) ជាគណបក្សសហការជាមួយក្រុមហ៊ុនអាជីវកម្ម បានទទួលកៅអីរហូតដល់៤៨ ស្មើ២០,៨% កើនឡើង១០កៅអីពីការបោះឆ្នោតកាលពីឆ្នាំ២០១៩ ។ បន្ទាប់មក គឺគណបក្ស fins ជាគណបក្សប្រជាធិបតេយ្យស្តាំនិយម ទទួលបាន៤៦កៅអី ស្មើ២០,១% កើនឡើង៧កៅអីពីការបោះឆ្នោតកាលពី៤ឆ្នាំមុន ខណៈគណបក្សសង្គមប្រជាធិបតេយ្យហ្វាំងឡង់ (SPD) ជាគណបក្សកណ្តាលឆ្វេងរបស់នាយករដ្ឋមន្ត្រី លោកស្រី Sanna Marin មេដឹកនាំស្រីបច្ចុប្បន្ន ទទួលបាន៤៣កៅអី ស្មើ១៩,៩% កើនឡើង៣កៅអីពីការបោះឆ្នោតកាលពីឆ្នាំ២០១៩ ។

លោក Petrie Orpo ប្រធានគណបក្សរួបរួមជាតិ (NCP) ថ្លែងថា ពលរដ្ឋបានផ្តល់ភាពយុត្តិធម៌ដល់គណបក្សរបស់លោកក្នុងការដឹកនាំប្រទេសហ្វាំងឡង់ ជាពិសេស ការដោះស្រាយបញ្ហាសេដ្ឋកិច្ច និងគ្រប់គ្រងការចំណាយរបស់រដ្ឋាភិបាល ដើម្បីទប់ស្កាត់បំណុលសាធារណៈកំពុងកើនឡើងជាបន្តបន្ទាប់រហូតដល់ជាង៧០% របស់ផលិតផលក្នុងស្រុកសរុប (GDP) ចាប់តាំងពីលោកស្រី Sanna Marin កាន់តំណែងជានាយករដ្ឋមន្ត្រីកាលពីឆ្នាំ២០១៩ ។ លោក Petrie Orpo នឹងគ្រប់គ្រងតុល្យភាពថាមពល និងសន្តិសុខរបស់ប្រទេសហ្វាំងឡង់ ស្របពេលមានសង្គ្រាមនៅប្រទេសអ៊ុយក្រែន ។

ចំណែកលោកស្រី Sanna Marin មានអាយុ៣៧ឆ្នាំ បានសម្តែងក្តីរីករាយដល់គណបក្សជាប់ឆ្នោត ។ កន្លងមក ភាគីជាច្រើនមើលឃើញថា មេដឹកនាំស្រីបច្ចុប្បន្នរបស់ហ្វាំងឡង់ទទួលបានការនិយមចូលចិត្តពីពលរដ្ឋ និងមានការរាប់អានច្រើនពីប្រទេសនានានៅលើពិភពលោក ។ លោកស្រីបានដឹកនាំប្រទេសទៅរកភាពជឿនលឿន និងអាចដឹកនាំប្រទេសឆ្លងកាត់វិបត្តិការឆ្លងរាតត្បាតនៃជំងឺកូវីដ-១៩ ហើយលោកស្រីនឹងនាំប្រទេសហ្វាំងឡង់ចូលជាសមាជិកអង្គការសន្ធិសញ្ញាអាត្លង់ទិកខាងជើង (NATO) ផងដែរ ។ ទោះយ៉ាងណា លោកស្រី Sanna Marin បានប្រឈមនឹងការរិះគន់យ៉ាងខ្លាំងនៅក្នុងប្រទេសហ្វាំងឡង់ពាក់ព័ន្ធនឹងការងារ និងរឿងផ្ទាល់ខ្លួន ៕ ប្រភព ៖ TNN World

ប្រទេសជប៉ុន ៖ ក្រុមហ៊ុនជាច្រើននៅប្រទេសជប៉ុនទាំងក្រុមហ៊ុនធំៗ និងកណ្តាល បានចាប់ផ្តើមអនុវត្តវិធានការឱ្យបុគ្គលិកមកធ្វើការត្រឹម៤ថ្ងៃប៉ុណ្ណោះក្នុង១សប្តាហ៍ ។ ការកាត់បន្ថយថ្ងៃធ្វើការដល់បុគ្គលិក ក្រុមហ៊ុនទាំងនេះសង្ឃឹមថា នឹងជួយឱ្យបុគ្គលិករបស់ពួកគេបានប្រើប្រាស់ជីវិតប្រចាំថ្ងៃប្រកបដោយគុណភាព និងបង្កើនប្រសិទ្ធភាពការងារឱ្យកាន់តែល្អប្រសើរឡើង ។

តាមការស្ទង់មតិទៅលើក្រុមហ៊ុនចំនួន៤.០០០ កាលពីឆ្នាំ២០២២កន្លងមក បង្ហាញថា ៨,៥% របស់ក្រុមហ៊ុននៅទូទាំងប្រទេសជប៉ុន មិនបានបង្ខំឱ្យបុគ្គលិករបស់ពួកគេមកធ្វើការ៥ថ្ងៃក្នុង១សប្តាហ៍ទៀតទេ ។ ជាក់ស្តែង ក្រុមហ៊ុន Microsoft សាខានៅប្រទេសជប៉ុន បានសាកល្បងអនុញ្ញាតឱ្យបុគ្គលិកធ្វើការត្រឹម៤ថ្ងៃក្នុង១សប្តាហ៍ និងសម្រាក៣ថ្ងៃក្នុង១សប្តាហ៍ឃើញថា លទ្ធផលការងាររបស់ពួកគេបានកើនឡើងដល់៤០% ការប្រជុំការងារកាន់តែមានប្រសិទ្ធភាព ហើយបុគ្គលិកក៏សប្បាយចិត្ត និងមានក្តីសុខកាន់តែច្រើន ។

ចំណែកការស្ទង់មតិពីការពេញចិត្តរបស់បុគ្គលិកឃើញថា ៩នាក់ក្នុងចំណោម១០នាក់ ពេញចិត្តនឹងការកាត់បន្ថយថ្ងៃធ្វើការរបស់ខ្លួន ។ វិធានការកាត់បន្ថយថ្ងៃធ្វើការនេះ ក្រៅពីមានប្រយោជន៍ដល់បុគ្គលិកហើយ ការស្ទង់មតិបង្ហាញទៀតថា ការកាត់បន្ថយថ្ងៃធ្វើការបានធ្វើឱ្យក្រុមហ៊ុនផ្សេងៗអាចកាត់បន្ថយការប្រើប្រាស់អគ្គិសនីរហូតដល់២៣% និងកាត់បន្ថយការប្រើប្រាស់ក្រដាសស្នាមរហូតដល់៥៩% ផងដែរ ។

ទោះយ៉ាងណា ការកាត់បន្ថយថ្ងៃធ្វើការនៅសល់ត្រឹមតែ៤ថ្ងៃក្នុង១សប្តាហ៍ គឺមានក្រុមហ៊ុនប្រមាណ២០% បានស្នើសុំកាត់បន្ថយប្រាក់ខែខ្លះរបស់បុគ្គលិក ។ ក្នុងចំណោមក្រុមហ៊ុនទាំងនេះឃើញថា មានបុគ្គលិកអាយុចន្លោះពី២០ឆ្នាំ ទៅ៥០ឆ្នាំ ស្មើ៧៨,៥% សម្រេចចិត្តមិនសម្រាកពីការងារចំនួន៣ថ្ងៃក្នុង១សប្តាហ៍ទេ បើពួកគេទទួលបានប្រាក់ខែធ្លាក់ចុះ ៕ ប្រភព ៖ Mono News

សហរដ្ឋអាមេរិក៖ នៅឆ្នាំ ២០២២ សហរដ្ឋអាមេរិកបាននាំចូលគុជខ្យងចំនួន ៣០,៥ គីឡូក្រាម និងផលិតផលស្រដៀងគ្នាផ្សេងទៀត។ នេះគឺជាទំនិញមួយក្រុមដែលអាជ្ញាធរតៃវ៉ាន់ប្រើប្រាស់ជាឯកសារយោងសម្រាប់ការលក់តែទឹកដោះគោគុជ។ យោងតាមទិន្នន័យរបស់គណៈកម្មការពាណិជ្ជកម្មអន្តរជាតិរបស់សហរដ្ឋអាមេរិក ៦៩% នៃទំនិញទាំងនេះត្រូវបាននាំចូលពីក្រុមហ៊ុនតៃវ៉ាន់។

តែទឹកដោះគោបានកើតនៅតៃវ៉ាន់ក្នុងទសវត្សរ៍ទី ៨០ ។ ផលិតផលនេះមានវត្តមាននៅសហរដ្ឋអាមេរិកអស់រយៈពេលជាច្រើនឆ្នាំ ប៉ុន្តែត្រូវបានលក់ជាចម្បងនៅក្នុងហាងតូចៗសម្រាប់បម្រើប្រជាជនអាស៊ី។
ក្នុងអំឡុងពេលនៃឆ្នាំ ២០១៩ – ២០២២ ទីក្រុងចំនួន ៧ របស់សហរដ្ឋអាមេរិកបានកត់ត្រាការកើនឡើងជាង ៦០% នៅក្នុងចំនួនហាងតែទឹកដោះគោ។ ទីក្រុងទាំងនេះមាន ទីក្រុង Chicago មានការកើនឡើងដ៏ធំបំផុត បន្ទាប់មកគឺទីក្រុង Philadelphia ។

Kung Fu Tea ដែលជាម៉ាកយីហោដែលបង្កើតឡើងក្នុងទីក្រុងញូវយ៉ក ឥឡូវនេះក៏មានហាងចំនួន ៣៥០ នៅទីនេះផងដែរ។ ពួកគេបានកំណត់គោលដៅប្រាក់ចំណូលចំនួន ២៤០ លានដុល្លារក្នុងឆ្នាំ ២០២៣ រួមទាំងសិទ្ធិផ្តាច់មុខផងដែរ។ បច្ចុប្បន្ននេះគឺជាខ្សែសង្វាក់តែទឹកដោះគោដ៏ធំបំផុតនៅក្នុងសហរដ្ឋអាមេរិក។
រោងចក្រនៅតៃវ៉ាន់កំពុងបង្កើនសមត្ថភាពដើម្បីបើកដំណើរការតែពពុះកាន់តែច្រើន។ លោក Chia-Sheng Chen នាយកក្រុមហ៊ុន Shang Dao Food ដែលជាអ្នកផ្គត់ផ្គង់គ្រឿងផ្សំសម្រាប់តែទឹកដោះគោបាននិយាយថា “តៃវ៉ាន់មានគ្រឿងផ្សំទាំងអស់។

ក្រុមហ៊ុននឹងបើករោងចក្រស្វ័យប្រវត្តិ ១០០% នៅតៃវ៉ាន់នៅខែក្រោយ ដើម្បីបំពេញតម្រូវការ។ លោកChen បាននិយាយថា រោងចក្រនេះនឹងដំណើរការ ២៤/៧ ដែលមានសមត្ថភាពបីដងជាមួយនឹងកម្លាំងពលកម្មត្រឹមតែ ៣០% ប៉ុណ្ណោះ។ លោកបានបន្តថា៖ «យើងសង្ឃឹមថាទីផ្សារអាមេរិកនឹងក្លាយជាជំហានមួយសម្រាប់តែទឹកដោះគោដែលមានប្រជាប្រិយភាពជុំវិញពិភពលោក»៕ ប្រភព៖vnexpress

ប្រទេសចិន ៖ លោក Wang Yi ប្រធានការិយាល័យគណៈកម្មការកិច្ចការបរទេសនៃគណៈកម្មការមជ្ឈិមបក្សកុម្មុយនិស្តចិន បានជួបជាមួយលោក Yoshimasa Hayashi រដ្ឋមន្ត្រីក្រសួងការបរទេសជប៉ុន ដែលបានធ្វើដំណើរមកកាន់ទីក្រុងប៉េកាំង ប្រទេសចិន ។ លោក Yoshimasa Hayashi បានអំពាវនាវឱ្យប្រទេសទាំងពីរបង្កើតទំនាក់ទំនងជាមួយគ្នាស្របតាមយុគសម័យថ្មី ។

លោក Wang Yi ជាសមាជិករបស់គណៈកម្មការអចិន្ត្រៃយ៍នៃនាយកដ្ឋាននយោបាយរបស់គណៈកម្មការមជ្ឈិមបក្សកុម្មុយនិស្តចិនបានថ្លែងថា ទំនាក់ទំនងរវាងប្រទេសចិន និងជប៉ុន ជាទូទៅ មានស្ថេរភាព ប៉ុន្តែនៅពេលខ្លះមានសំឡេងខ្លាំងដាក់គ្នា និងការរំខានដល់គ្នាទៅវិញទៅមក ។ ដូច្នេះ វាមកពីមូលហេតុជប៉ុនមានចេតនាធ្វើតាមគោលនយោបាយមួយ ខណៈចិនគិតថា វាជាគោលនយោបាយមិនត្រឹមត្រូវរបស់អាមេរិក ហើយជប៉ុនបានសហការជាមួយអាមេរិក រួចបំផ្លាញទំនុកចិត្តរបស់ចិន ។ លើសពីនេះ ជប៉ុនបានបង្កបញ្ហាផ្សេងៗដែលពាក់ព័ន្ធនឹងផលប្រយោជន៍របស់ចិនផងដែរ ហើយគោលនយោបាយរបស់ចិនសម្រាប់ជប៉ុននឹងមានស្ថេរភាព ។

លោក Wang Yi បន្តថា ប្រទេសចិនព្រមសហការធ្វើការជាមួយជប៉ុន ក្នុងឱកាសគម្រប់ខួប៤៥ឆ្នាំនៃការចុះហត្ថលេខាលើសន្ធិសញ្ញាសន្តិភាព និងមិត្តភាពរវាងចិន និងជប៉ុន រហូតដល់បង្កើតទំនាក់ទំនងទ្វេភាគីស្របនឹងស្ថានភាពយុគសម័យថ្មី ។ ប្រទេសចិនសង្ឃឹមថា ជប៉ុននឹងធ្វើតាមការឯកភាពគ្នាដ៏សំខាន់នេះ ខណៈប្រទេសទាំងពីរបានសហការគ្នាយ៉ាងល្អ មិនរំលោភបំពានគ្នាទៅវិញទៅមក រហូតដល់សហការធ្វើការជាមួយគ្នាដើម្បីជំរុញ និងអភិវឌ្ឍន៍សម្ព័ន្ធភាពរវាងប្រទេសទាំងពីរ ។

ចំណែកលោក Yoshimasa Hayashi រដ្ឋមន្ត្រីក្រសួងការបរទេសជប៉ុនថ្លែងថា ប្រទេសជប៉ុននឹងប្តេជ្ញាចិត្តធ្វើការជាមួយចិន ហើយអនុវត្តតាមអ្វីដែលមេដឹកនាំប្រទេសទាំងពីរយល់ស្របជាមួយគ្នា ដើម្បីផលប្រយោជន៍របស់ភាគីទាំងពីរ ៕ ប្រភព ៖ TNN World

ប្រទេសថៃ ៖ កាលពីចុងឆ្នាំ២០២២ កន្លងមក គណៈរដ្ឋមន្ត្រីថៃបានអនុញ្ញាតឱ្យជនបរទេសអាចស្នាក់នៅប្រទេសថៃមិនលើសពី៤៥ថ្ងៃ ដោយមិនគិតថ្លៃទិដ្ឋាការ និងសម្រាប់អ្នកទទួលបានទិដ្ឋាការ Visa on Arrival គឺអាចស្នាក់នៅថៃមិនលើសពី៣០ថ្ងៃ ។ ការអនុញ្ញាតឱ្យស្នាក់នៅប្រទេសថៃបានច្រើនថ្ងៃនេះ មានរយៈពេលត្រឹមតែ៦ខែប៉ុណ្ណោះ គឺគិតចាប់ពីថ្ងៃទី១ ខែតុលា ឆ្នាំ២០២២ រហូតដល់ថ្ងៃទី៣១ ខែមីនា ឆ្នាំ២០២៣ សម្រាប់៥៦ប្រទេស ។

បន្ទាប់ពីស្ថានការណ៍រាតត្បាតនៃជំងឺកូវីដ-១៩ ក្នុងប្រទេសថៃបានធូរស្រាល ហើយដើម្បីជំរុញសេដ្ឋកិច្ចតាមរយៈវិស័យទេសចរណ៍ ក្នុងកិច្ចប្រជុំគណៈរដ្ឋមន្ត្រី កាលពីថ្ងៃទី២០ ខែកញ្ញា ឆ្នាំ២០២២ កន្លងមក គណៈរដ្ឋមន្ត្រីបានអនុម័តសេចក្តីប្រកាសរបស់ក្រសួងមហាផ្ទៃ អំពីការបន្ថែមរយៈពេលស្នាក់នៅប្រទេសថៃដល់ជនបរទេសមួយចំនួនក្នុងករណីពិសេស ។

ការប្រកាសនេះបានបន្ថែមរយៈពេលស្នាក់នៅប្រទេសថៃសម្រាប់ជនបរទេសមួយចំនួនដែលធ្វើដំណើរចូលថៃ ក្នុងរយៈពេលត្រឹមតែ៦ខែប៉ុណ្ណោះ គឺចាប់ពីថ្ងៃទី១ ខែតុលា ឆ្នាំ២០២២ រហូតដល់ថ្ងៃទី៣១ ខែមីនា ឆ្នាំ២០២៣ រួមមាន ៖

១-ជនបរទេសដែលដាក់ពាក្យស្នើសុំទិដ្ឋាការ Visa on Arrival ដែលកាលពីមុន ពួកគេស្នាក់នៅថៃមិនលើសពី១៥ថ្ងៃ គឺអាចស្នាក់នៅមិនលើសពី៣០ថ្ងៃ ។
២-ជនបរទេសកាន់លិខិតឆ្លងដែនរបស់ប្រទេសដែលរដ្ឋាភិបាលប្រទេសនោះបានចុះកិច្ចព្រមព្រៀងជាមួយរដ្ឋាភិបាលថៃ គឺត្រូវបានលើកលែងទិដ្ឋាការ ដែលកាលពីមុន ពួកគេអាចស្នាក់នៅថៃមិនលើសពី៣០ថ្ងៃ គឺអាចស្នាក់នៅមិនលើសពី៤៥ថ្ងៃ ។
៣-ជនបរទេសចូលមកប្រទេសថៃជាបណ្តោះអាសន្ន ដែលទទួលបានការលើកលែងទិដ្ឋាការ ហើយប្រទេសថៃបានចេញវិធានការពន្យារពេលស្នាក់នៅសម្រាប់ជនបរទេស ខណៈកាលពីមុន ពួកគេអាចស្នាក់នៅថៃមិនលើសពី៣០ថ្ងៃ គឺអាចស្នាក់នៅថៃមិនលើសពី៤៥ថ្ងៃ ។

អ្នកនាំពាក្យការិយាល័យនាយករដ្ឋមន្ត្រី អ្នកនាង Traisulee Traisoranakul បានថ្លែងនៅពេលនោះថា ការប្រកាសរបស់ក្រសួងមហាផ្ទៃនេះ ក្រោយពីបានធ្វើកិច្ចប្រជុំគណៈកម្មការគ្រប់គ្រងស្ថានការណ៍ជំងឺកូវីដ កាលពីថ្ងៃទី១៩ ខែសីហា ឆ្នាំ២០២២ ដែលអនុម័តឱ្យក្រសួងមហាផ្ទៃចាត់វិធានការពន្យារពេលស្នាក់នៅរបស់ជនបរទេស ដែលបានធ្វើដំណើរចូលមកប្រទេសថៃ ។ ការពន្យារពេលស្នាក់នៅសម្រាប់ជនបរទេស គឺក្នុងគោលបំណងជំរុញឱ្យភ្ញៀវទេសចរបរទេសមកកម្សាន្តនៅប្រទេសថៃកាន់តែច្រើន និងបង្កើនការចាយវាយផ្សេងៗក្នុងអំឡុងពេលពួកគេស្នាក់នៅទីនេះ ហើយវាក៏ជាការជំរុញកំណើនសេដ្ឋកិច្ចដោយសារវិស័យទេសចរណ៍ និងដោះស្រាយផលប៉ះពាល់ដោយសារជំងឺកូវីដផងដែរ ។

គួរបញ្ជាក់ថា ការអនុញ្ញាតឱ្យស្នាក់នៅប្រទេសថៃរយៈពេលច្រើនថ្ងៃសម្រាប់ពលរដ្ឋមកពី៥៦ប្រទេស បានផុតកំណត់នៅត្រឹមថ្ងៃទី៣១ ខែមីនា ឆ្នាំ២០២៣ ។ ដូច្នេះ ការចេញ-ចូលស្នាក់នៅប្រទេសថៃនឹងអនុវត្តតាមធម្មតាវិញ ៕ ប្រភព ៖ workpointtoday

កីឡាករប្រដាល់ដ៏ល្បីប្រចាំប្រទេសភូមា Dave Leduc ត្រូវបានអជ្ញាធរប្រទេសថៃហាមមិនឱ្យចូលប្រទេសគេទៀតនោះទេ ដោយរូបគេនឹងត្រូវចាប់ខ្លួន ប្រសិនបើហ៊ានឈានជើងចូលទឹកដីថៃ។

កីឡាកររូបនេះ បានបកស្រាយនៅលើបណ្តាញទំនាក់សង្គមថា៖ “សួស្តីអ្នកទាំងអស់គ្នា ខ្ញុំមិនបាននិយាយលេងសើចទេ នៅពេលដែលខ្ញុំបាននិយាយថា ខ្ញុំត្រូវបានគេហាមមិនឱ្យចូលប្រទេសថៃ! ហាហាហា

ដឹង​អត់​ថា​នេះ​អាក្រក់​ប៉ុណ្ណា? ខ្ញុំមិនដឹងថាអត្តពលិក ឬមនុស្សផ្សេងទៀតនៅក្នុងពិភពលោកដែលបានរំខានដល់ឧស្សាហកម្មមួយយ៉ាងខ្លាំងដោយហេតុថាពួកគេត្រូវបានហាមឃាត់ដោយប្រទេសទាំងមូលនោះទេ។ ឆ្កួតហើយ! បើ​ខ្ញុំ​ទៅ​ថៃ គេ​នឹង​ចាប់​ខ្ញុំ​ដាក់​គុក ដោយសារតែ​ខ្ញុំ​ជា​មនុស្ស​តែ​ម្នាក់​គត់​ក្នុង​ពិភពលោក​ដែល​មានរឿងរញ៉េរញៃ​ដើម្បី​ហៅ​ថៃ​ពី​រឿង​ឃោសនា​ក្លែងក្លាយ​របស់គេ។ រឿងនិទាននិយាយអំពី ណៃ ខាណុំទុម (Nai Khanomtom) មិនត្រឹមតែជារឿងស្រមើស្រមៃដោយគ្មានការពិតក្នុងប្រវត្តិសាស្ត្រប៉ុណ្ណោះទេ ប៉ុន្តែវាភាគច្រើនជារឿងមិនគោរពដល់ប្រវត្តិសាស្រ្ត Lethwei មីយ៉ាន់ម៉ា ហើយវានៅតែត្រូវបានប្រជាជនថៃប្រារព្ធជារៀងរាល់ឆ្នាំ!

បន្ទាប់ពីហៅរឿងទាំងនេះជាការកុហក ប្រធានការិយាល័យគណៈកម្មការកីឡាប្រដាល់ថៃបានបង្ហើបថា “គាត់នឹងប្តឹងលោក Dave Ledak ពីបទប្រមាថកិត្តិយស និងសេចក្តីថ្លៃថ្នូររបស់ Muay Thai ដែលមិនធ្លាប់មានពីមុនមក”។ គាត់និយាយត្រូវ ដោយសារវាមិនដែលកើតឡើងពីមុនមកទេ ព្រោះមនុស្សខ្លាចខ្លាំងពេក មិនហ៊ាននិយាយការពិត ព្រោះតែរបបរាជានិយមជិះជាន់។ បើ​អ្នក​ធ្វើ​ដំណើរ ឬ​ពលរដ្ឋ​ថៃ​ហ៊ាន​ចោទ​សួរ​ប្រវត្តិសាស្ត្រ ឬ​បញ្ចេញ​មតិ​ផ្ទុយ​នឹង​រដ្ឋាភិបាល នោះ​នឹង​គេនឹងជាប់​គុក។ ប្រជាជនថៃជាច្រើនបានទាក់ទងមកខ្ញុំ ហើយប្រាប់ខ្ញុំថាពួកគេរស់នៅក្នុងភាពភ័យខ្លាច។ក្រសួង​វប្បធម៌​ថៃ​ក៏​បាន​ដាក់​បញ្ចូល​ក្នុង​បញ្ជី​ខ្មៅ​ដែល​ហាម​មិន​ឲ្យ​លោក Dave Ledak ចូល​ប្រទេស​ថៃ​ផង​ដែរ។

អ្វីដែលគួរឱ្យអស់សំណើចនោះគឺពួកគេបានធ្វើការហាមឃាត់ក្រោមឈ្មោះ “Ledak” មិនមែន Leduc ទេ ដូច្នេះប្រហែលជាខ្ញុំនឹងអាចចូលទៅអន្តោប្រវេសន៍ដោយគ្មានមន្រ្តីណាស្គាល់ខ្ញុំនោះទេ? ហាហា

វាច្បាស់ណាស់ថា ប្រទេសថៃនៅតែឆ្កួត ពួកគេបានចាញ់សង្រ្គាមភូមា-សៀម ឆ្នាំ 1767 ដោយភូមាបានបំផ្លាញរាជធានី ដូច្នេះពួកគេត្រូវតែបង្កើតរឿងក្លែងក្លាយដើម្បីឱ្យពួកគេមានអារម្មណ៍ធូរស្រាល។ ប៉ុន្តែ​តើ​អ្នក​ឃើញ​មី​យ៉ាន់​ម៉ា​អបអរ​ជ័យជម្នះ​ទេ? អត់ទេ។ រឿង “ណៃ ខាណុំទុម (Nai Khanomtom)” នាំយើងត្រឡប់ទៅសម័យសង្រ្គាម ការសម្លាប់ និងការរំលោភ។ សូម​ឈប់​នឹក​ឃើញ​គ្រា​ដ៏​អាក្រក់​ទាំង​នេះ។

ប្រសិនបើប្រទេសថៃពិតជាយកចិត្តទុកដាក់ចំពោះការគោរពប្រទេសជិតខាងរបស់ពួកគេ មីយ៉ាន់ម៉ា និងកម្ពុជា ខ្ញុំកំពុងជំរុញឱ្យក្រសួងវប្បធម៌ថៃ និងគណៈកម្មការកីឡាថៃ លុបចោលការលើកឡើង និងការប្រារព្ធពិធីអំពីតួអង្គប្រឌិត «ណៃ ខាណុំទុម (Nai Khanomtom) » ក្នុងអំឡុងពេលប្រារព្ធទិវាជាតិ Muaythai ។ ចូរយើងឈប់ប្រារព្ធរឿងប្រឌិត។ពុំមានរឿងរ៉ាវនិយាយពី ណៃ ខាណុំទុម (Nai Khanomtom) នៅក្នុងឯកសារ ឬប្រភពប្រវត្តិសាស្ត្រណាមួយឡើយ រហូតដល់មុនសង្គ្រាមលោកលើកទីពីរ នៅពេលដែលស្ថាប័នវប្បធម៌ថៃចាប់ផ្តើមសរសេរប្រវត្តិសាស្ត្រឡើងវិញ។

យូរៗទៅតាមរយៈសៀវភៅ ភាពយន្ត រឿង រឿងនេះត្រូវបានផ្សព្វផ្សាយជាផ្នែកនៃប្រវត្តិសាស្ត្រប្រទេសថៃ។ និយាយឱ្យខ្លី រឿងមិនពិត ហើយបិតារបស់ Muay Thai គឺជាករណីមួយក្នុងចំណោមករណីជាច្រើនស្តីពីការកសាងវប្បធម៌នៃប្រវត្តិសាស្រ្តផ្ទាល់ខ្លួនរបស់គាត់”។

ខ្លឹមសារនៃការបង្ហោះនេះ ត្រូវបាន Dave Leduc បង្ហោះនៅលើបណ្តាញសង្គមភ្លាមៗ បន្ទាប់ពីសារព័ត៌មានថៃជាច្រើន បានចុះផ្សាយអំពីកីឡាកររូបនេះត្រូវបានដាក់ចូលបញ្ជីខ្មែរនៃសហព័ន្ធប្រដាល់ថៃ ហើយថែមទាំងនៅក្នុងបញ្ជីខ្មៅរបស់រដ្ឋាភិបាលថៃផងដែរ។

សូមជម្រាបជូនផងដែរថា Dave Leduc ត្រូវបានគេរំពឹងថានឹងត្រូវជួបកីឡាករគុនខ្មែរ ព្រំ សំណាង ឆាប់ៗនេះផងដែរ៕

ប្រភព៖ Dave Leduc