ប្រទេសវៀតណាម ៖ ទុរេនដែលបានដាំដុះដំបូងនៅប្រទេសវៀតណាម ប្រមាណ៥០០គីឡូក្រាមត្រូវបាននាំចេញពីទីក្រុងហូជីមិញទៅកាន់អាកាសយានដ្ឋានអន្តរជាតិណាននីង វូស៊ូ និងតំបន់ស្វយ័ត Guangxi Zhuang ស្ថិតនៅក្រោមកិច្ចព្រមព្រៀងភាពជាដៃគូសេដ្ឋកិច្ចក្នុងតំបន់ Regional Comprehensive Economic Partnership (RCEP) ។

តាំងពីកិច្ចព្រមព្រៀងភាពជាដៃគូសេដ្ឋកិច្ចក្នុងតំបន់ (RCEP) ចាប់អនុវត្តនៅថ្ងៃទី១ ខែមករា ឆ្នាំ២០២២ ក្វាងស៊ីបានក្លាយជាមជ្ឈមណ្ឌលកណ្តាលនៃកិច្ចសហប្រតិបត្តិការរវាងប្រទេសចិន និងប្រទេសជាសមាជិកកិច្ចព្រមព្រៀង RCEP ក្នុងនោះរួមមាន ១៥ប្រទេសនៅតំបន់អាស៊ីប៉ាស៊ីហ្វិក និង១០ប្រទេសជាសមាជិកអាស៊ាន រួមទាំង៥ប្រទេសជាដៃគូពាណិជ្ជកម្មចម្បង រួមមាន ចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់ ។

មន្ត្រីគយប្រចាំតំបន់បញ្ជាក់ថា ដំណាក់កាលត្រួតពិនិត្យរបស់ការិយាល័យគយធ្វើតាមគោលនយោបាយ «ការពិនិត្យ២ជំហាន» ដើម្បីពិនិត្យមើលថា ទំនិញទាំងអស់ទទួលបានការអនុញ្ញាតឱ្យនាំចូលឬអត់ ហើយទំនិញទទួលបានការអនុញ្ញាតឱ្យលក់ ឬចែកចាយក្នុងតំបន់ដែលគយកំណត់ឬអត់ ។

នាយកផ្នែកទីផ្សាររបស់ក្រុមហ៊ុន Guangxi Haohang E-commerce បានថ្លែងថា ការិយាល័យគយបានធ្វើការប្រកបដោយវិជ្ជាជីវៈ និងយល់ពីលក្ខខណ្ឌនៃការនាំចូល-នាំចេញអាហារស្រស់ ហើយជួយឱ្យដំណាក់កាលត្រួតពិនិត្យងាយស្រួល និងអាចបត់បែនបាន ។

ការិយាល័យគយបានបើកច្រកពិសេសសម្រាប់ការពិនិត្យការនាំចូល-នាំចេញផ្លែឈើ និងផ្តល់សេវាកម្មពេញលេញដើម្បីឱ្យប្រាកដចិត្តថា ទុរេនស្រស់របស់វៀតណាមអាចឆ្លងកាត់ការពិនិត្យរបស់ការិយាល័យគយបានយ៉ាងឆាប់រហ័ស និងរលូនផងដែរ ៕ ប្រភព ៖ agrinewsthai

រាជរដ្ឋាភិបាល​កម្ពុជា បាន​សម្រេច​ផ្តល់​ប្រាក់ឧបត្ថម្ភ ៥ម៉ឺនរៀល​ក្នុងឱកាស​ពិធីបុណ្យចូលឆ្នាំថ្មី​ប្រពៃណី​ជាតិ និង​ ៥ម៉ឺនរៀល​ ក្នុងឱកាស​ពិធីបុណ្យ​ភ្ជុំបិណ្ឌ​ ឆ្នាំ២០២៣ ជូនដល់មន្រ្តី​រាជការស៊ីវិល កងកម្លាំងប្រដាប់អាវុធ។

យោងតាមអនុក្រឹត្យ​ចុះ​ហត្ថលេខាដោយសម្តេចតេជោ ហ៊ុន សែន ឱ្យដឹងថា ការ​បើកផ្តល់​ប្រាក់ឧបត្ថម្ភ​នេះ ត្រូវ​អនុវត្ត​ឱ្យបាន​មុន​ថ្ងៃចូលឆ្នាំថ្មី​ប្រពៃណីជាតិ ពោលគឺ​ក្រសួង​សេដ្ឋកិច្ច​ និង​ហិរញ្ញវត្ថុ និង​ក្រសួង​ស្ថាប័ន​សាម៉ី ត្រូវរៀបចំ​បើកផ្តល់​ជាបុរេប្រទាន​សម្រាប់​ប្រាក់​ឧបត្ថម្ភ​នេះ ដំណាលគ្នា​ជាមួយ​នឹង​ការបើក​ផ្តល់ប្រាក់បៀវត្សប្រចាំខែមេសាតែមួយលើក​ឱ្យបានដល់សាមី​ជន​ម្នាក់ៗយ៉ាងយូរបំផុត​ត្រឹមថ្ងៃទី១៣ ខែមេសា ឆ្នាំ​២០២៣ និង​ប្រាក់​ឧបត្ថម្ភក្នុងឱកាស​បុណ្យភ្ជុំបិណ្ឌដំណាល​គ្នាជាមួយនឹងការបើកផ្តល់ប្រាក់បៀវត្សប្រចាំខែតុលាតែមួយលើក ឱ្យបានដល់សាមីជនម្នាក់ៗ​យ៉ាងយូរបំផុត​ត្រឹមថ្ងៃទី១២ ខែតុលា ឆ្នាំ​២០២៣៕

បរទេស៖ នៅក្នុងសេចក្តីថ្លែងការណ៍ថ្មីមួយ Nokia បាននិយាយថា បណ្តាញ 4G នឹងត្រូវបានដំណើរការពីស្ថានីយអង់តែនមួយ ដែលផ្ទុកនៅខាងក្នុងយាន Nova-C lunar lander ដែលរចនាដោយក្រុមហ៊ុនអាមេរិក Intuitive Machines រួមផ្សំជាមួយនឹងមនុស្សយន្តដែលដើរដោយខ្លួនឯង ដែលដំណើរការដោយថាមពលពន្លឺព្រះអាទិត្យ។ ទូរទស្សន៍ CNBC បានរាយការណ៍ នៅថ្ងៃទី ៣០ ខែមីនាថា ទាំងអស់នឹងត្រូវបានបាញ់បង្ហោះដោយគ្រាប់រ៉ុក្កែត SpaceX នៅចុងឆ្នាំ ២០២៣។ បន្ទាប់ពីចុះចត ការតភ្ជាប់ 4G LTE នឹងត្រូវបានបង្កើតឡើងរវាងអ្នកចុះចត និងយានរុករក។

ប្រព័ន្ធ 4G របស់ Nokia នឹងចុះចតនៅតំបន់ទំនាប Shackleton តាមបណ្តោយគែមខាងត្បូងនៃព្រះច័ន្ទ។ សាជីវកម្មទូរគមនាគមន៍ពហុជាតិហ្វាំងឡង់បានប្តេជ្ញាចិត្តចំពោះ NASA ថាបច្ចេកវិទ្យានេះអាចទប់ទល់នឹងលក្ខខណ្ឌធ្ងន់ធ្ងរនៅក្នុងលំហ។
ផែនការរបស់ NASA គឺប្រើប្រាស់បណ្តាញ 4G នៅក្នុងកម្មវិធី Artemis ដើម្បីបញ្ជូនអវកាសយានិកត្រឡប់ទៅឋានព្រះច័ន្ទជាលើកដំបូង ចាប់តាំងពីបេសកកម្ម Apollo ១៧ នៅឆ្នាំ ១៩៧២។

គោលដៅគឺដើម្បីបង្ហាញថាបណ្តាញរបស់ផែនដីអាចបំពេញតម្រូវការទំនាក់ទំនងនៃបេសកកម្មអវកាសនាពេលអនាគត។ Nokia បានបន្ថែមទៀតថា បណ្តាញ 4G របស់ខ្លួននឹងអនុញ្ញាតឱ្យអវកាសយានិកធ្វើការទំនាក់ទំនងគ្នាទៅវិញទៅមក និងជាមួយមជ្ឈមណ្ឌលបញ្ជា ក៏ដូចជារុករកយានអវកាសពីចម្ងាយក្នុងពេលវេលាជាក់ស្តែង និងចាក់ផ្សាយវីដេអូនិយមន័យខ្ពស់ត្រឡប់ទៅផែនដីវិញ។ ប្រភព៖vnexpress

ប្រទេសជប៉ុន ៖ តាមព័ត៌មានពីមន្ត្រីជប៉ុនបង្ហាញថា សាលារៀនប្រមាណ៤៥០កន្លែងនៅទូទាំងប្រទេសបានបិទទ្វារជាបន្តបន្ទាប់ជារៀងរាល់ឆ្នាំ ហើយចាប់ពីឆ្នាំ២០០២ ដល់ឆ្នាំ២០២០ មានសាលាជិត៩.០០០កន្លែងបានបិទទ្វារជាផ្លូវការ ។ វាជារឿងពិបាកក្នុងការទាក់ទាញឱ្យពលរដ្ឋចំណូលថ្មី ឬពលរដ្ឋមានអាយុតិចមករស់នៅក្នុងតំបន់ឆ្ងាយៗ ដោយសារអត្រាកំណើតធ្លាក់ចុះនៅប្រទេសជប៉ុនលើសពីការរំពឹងទុក ហើយការបិទទ្វារសាលារៀនកើនឡើងយ៉ាងឆាប់រហ័ស ។

នៅភូមិ Ten-ei ស្ថិតនៅលើភ្នំក្នុងខេត្តហ្វូគូស៊ីម៉ា ដែលមានពលរដ្ឋរស់នៅចំនួន៥.០០០នាក់ គឺជាភូមិមួយដែលជួបបញ្ហាការបិទទ្វារសាលារៀន ។ ជាក់ស្តែង អនុវិទ្យាល័យយូម៉ូតូនៅភូមិនេះ មានកូនសិស្សត្រឹមតែ២នាក់ប៉ុណ្ណោះ ។ ពលរដ្ឋរស់នៅក្នុងភូមិបានផ្លាស់ប្តូរទីលំនៅ ស្របពេលអត្រាកំណើតធ្លាក់ចុះ ខណៈពលរដ្ឋមានអាយុច្រើនកាន់តែកើនឡើង ។ នៅពេលគ្មានកូនសិស្សមកចុះឈ្មោះចូលរៀន សាលារៀនដែលបានដំណើរការអស់រយៈពេល៧៦ឆ្នាំក្នុងភូមិនេះ បានបិទទ្វារនៅថ្ងៃទី៣១ ខែមីនា ឆ្នាំ២០២៣ ។

បច្ចុប្បន្ន ភូមិ Ten-ei មានពលរដ្ឋអាយុក្រោម១៨ឆ្នាំត្រឹមតែ១០%ប៉ុណ្ណោះ ។ កាលពីឆ្នាំ១៩៥០ ភូមិនេះធ្លាប់មានពលរដ្ឋរស់នៅជាង១ម៉ឺននាក់ ដែលពួកគេប្រកបរបរកសិកម្ម និងធ្វើការរោងចក្រ ប៉ុន្តែការខ្វះភាពងាយស្រួល ហើយភូមិនេះស្ថិតនៅឆ្ងាយពីគេនោះបានធ្វើឱ្យពលរដ្ឋក្នុងភូមិផ្លាស់ប្តូរទីលំនៅជាបន្តបន្ទាប់ ។

ក្រៅពីនេះ ចំនួនពលរដ្ឋក្នុងភូមិបានធ្លាក់ចុះយ៉ាងឆាប់រហ័ស បន្ទាប់ពីកើតគ្រោះមហន្តរាយរលកយក្សស៊ូណាមិ កាលពីថ្ងៃទី១១ ខែមីនា ឆ្នាំ២០១១ ដែលធ្វើឱ្យរោងចក្រថាមពលនុយក្លេអ៊ែរ Fukushima មានទីតាំងស្ថិតនៅឆ្ងាយពីភូមិ១០០គីឡូម៉ែត្រជួបបញ្ហាការចម្លងរោគវិទ្យុសកម្ម ។

សារព័ត៌មាន Reuters រាយការណ៍ថា អត្រាកំណើតធ្លាក់ចុះ គឺជាបញ្ហាក្នុងតំបន់នៅអាស៊ី ខណៈការចាយវាយលើការចិញ្ចឹមកូនបានធ្វើឱ្យអត្រាកំណើតនៅប្រទេសជិតខាងដូចជា កូរ៉េខាងត្បូង និងចិនធ្លាក់ចុះផងដែរ ប៉ុន្តែនៅជប៉ុនមានសភាពធ្ងន់ធ្ងរជាងគេ ។ អត្រាកំណើតនៅជប៉ុនបានធ្លាក់ចុះនៅក្រោម៨០ម៉ឺននាក់នៅឆ្នាំ២០២២ ហើយវាជាការធ្លាក់ចុះដែលមិនធ្លាប់ជួបពីមុនមក និងលឿនជាងរដ្ឋាភិបាលរំពឹងទុករយៈពេល៨ឆ្នាំទៅទៀត ។

ចំណែកនាយករដ្ឋមន្ត្រីជប៉ុន លោក Fumio Kishida បានសន្យាថា នឹងប្រើប្រាស់វិធានការថ្មីដើម្បីបង្កើនអត្រាកំណើត រួមទាំងបង្កើនថវិកាទ្វេដងសម្រាប់គោលនយោបាយទាក់ទងនឹងកុមារផងដែរ ។ លើសពីនេះ លោក Fumio Kishida ក៏បានផ្តោតសំខាន់លើការថែរក្សាបរិស្ថានអប់រំ ប៉ុន្តែរហូតមកដល់បច្ចុប្បន្ន គោលនយោបាយនេះជួយបានតែបន្តិចបន្តួចប៉ុណ្ណោះ ៕ ប្រភព ៖ TNN World

ប្រទេសអ៊ីតាលី ៖ ស្ថាប័នការពារទិន្នន័យរបស់ប្រទេសអ៊ីតាលីបានប្រកាសហាមឃាត់ការប្រើប្រាស់កម្មវិធី ChatGPT គឺជាបញ្ញាសិប្បនិមិត្តទំនើបចុងក្រោយបង្អស់ ដែលកំពុងទទួលបានការពេញនិយមយ៉ាងខ្លាំង និងមានអ្នកប្រើប្រាស់កម្មវិធីនេះចំនួនជាង២៥លាននាក់នៅទូទាំងពិភពលោក ។

កម្មវិធីបញ្ញាសិប្បនិមិត្តទំនើបនេះមានសមត្ថភាពជាច្រើនផ្នែកដូចជា វាអាចឆ្លើយតបគ្រប់សំណួរទាំងអស់បានយ៉ាងច្បាស់លាស់ ក្នុងករណីអ្នកប្រើប្រាស់កម្មវិធីនេះសួរសំណួរទៅកាន់វា ហើយវាអាចស្វែងរកទិន្នន័យ អត្ថបទ និងការស្រាវជ្រាវផ្សេងៗ ដែលកម្មវិធីនានារកមិនឃើញ ។ លើសពីនេះ វាអាចជួយពិនិត្យមើលអត្ថបទ ឬលេខកូដរបស់កុំព្យូទ័រផ្សេងៗ រហូតដល់ការបញ្ចេញគំនិតក្នុងផ្នែកអាជីវកម្មទៀតផង ។

ប្រទេសអ៊ីតាលីបានហាមឃាត់ការប្រើប្រាស់បច្ចេកវិទ្យាបញ្ញាសិប្បនិមិត្តទំនើបនេះ ដោយស្ថាប័នការពារទិន្នន័យអ៊ីតាលីលើកហេតុផលថា ប្រព័ន្ធដែលបង្កើតឡើងដោយក្រុមហ៊ុន Microsoft បានលួចយកទិន្នន័យផ្ទាល់ខ្លួនរបស់អ្នកប្រើប្រាស់ដោយគ្មានការអនុញ្ញាត ហើយយកទិន្នន័យទាំងនេះទៅអភិវឌ្ឍន៍ដើម្បីបង្កើតចម្លើយរបស់បញ្ញាសិប្បនិម្មិត្ត ។

ជាមួយគ្នានេះ OpenAI ជាក្រុមហ៊ុនផលិតកម្មវិធី ChatGPT ក៏បានចេញសេចក្តីថ្លែងការណ៍បញ្ឈប់ការផ្តល់សេវាកម្មរបស់ខ្លួននៅប្រទេសអ៊ីតាលីដូចគ្នាដែរ ។ ក្រុមហ៊ុនមានរយៈពេល២០ថ្ងៃក្នុងការដោះស្រាយការចោទប្រកាន់នេះ បើមិនដូច្នោះទេ ក្រុមហ៊ុននឹងត្រូវគេពិន័យជាប្រាក់ចំនួន២០លានយូរ៉ូ ៕ ប្រភព ៖ ????ono News

ប្រទេសកម្ពុជាបានជាប់ក្នុង «បញ្ជីប្រផេះ» នៃក្រុមប្រទេសមានហានិភ័យខាងលាងលុយកខ្វក់ រយៈពេល ៤ឆ្នាំជាប់ៗគ្នា ចាប់តាំងពីឆ្នាំ២០១៩ មក ខណៈនៅថ្ងៃទី២៤ ខែកុម្ភៈ ឆ្នាំ ឆ្នាំ២០២៣ អង្គការឃ្លាំមើលការលាងលុយ និង ឧក្រិដ្ឋកម្មហិរញ្ញវត្ថុអន្តរជាតិ Financial Action Task Force (FATF) បានសម្រេចចិត្តដកកម្ពុជាចេញពីបញ្ជីនេះហើយ។

ការសម្រេចដកកម្ពុជាចេញពី «បញ្ជីប្រផេះ» នៃក្រុមប្រទេសដែលមានហានិភ័យខាងលាងលុយកខ្វក់នេះ បានធ្វើឡើងនៅក្នុង មហាសន្និបាត FATF នៅថ្ងៃទី២៤ ខែកុម្ភៈ ឆ្នាំ២០២៣ នៅទីក្រុងប៉ារីស ប្រទេសបារាំង និងត្រូវបានរៀបចំសន្និសីទកាសែត ប្រកាសជាផ្លូវការ នៅម៉ោង១០យប់ ម៉ោងនៅប្រទេសកម្ពុជា។ ការប្រកាសដកចេញនេះ បានធ្វើឡើងបន្ទាប់ពីមាន សេចក្តីសម្រេចចិត្តរបស់ក្រុមការងារ ICRG របស់ FATF ក្នុងការដកកម្ពុជាពីបញ្ជីប្រផេះ នាថ្ងៃទី២០ ខែកុម្ភៈ ឆ្នាំ២០២៣។

គួរបញ្ជាក់ថា កាលពីខែកក្កដា ឆ្នាំ២០២០ កម្ពុជាក៏បានចេញច្បាប់ ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្មផងដែរ។ ច្បាប់នេះមានគោលបំណងធានាប្រឆាំងការសម្អាតប្រាក់និងហិរញ្ញប្បទានភេរវកម្ម ដោយកំណត់អំពី វិធានការត្រួតពិនិត្យ បង្ការ ទប់ស្កាត់ បង្ក្រាប និងលុបបំបាត់ការសម្អាតប្រាក់និងហិរញ្ញប្បទានភេរវកម្ម។

ជាមួយគ្នានេះនេះ ក្រោយពីអង្គការឃ្លាំមើលការលាងលុយ និង ឧក្រិដ្ឋកម្មហិរញ្ញវត្ថុអន្តរជាតិ FATF ដកកម្ពុជាចេញពី «បញ្ជីប្រផេះ» គឺជាសមិទ្ធផលមួយ ដែលនឹងរួមចំណែក ដល់ការបង្កើនជំនឿទុកចិត្តពីសំណាក់វិនិយោគគិន មកលើបរិយាកាសវិនិយោគ ក៏ដូចជាការធ្វើពាណិជ្ជកម្ម នៅប្រទេសកម្ពុជា៕

ប្រទេសកូរ៉េខាងត្បូង ៖ ក្រសួងពាណិជ្ជកម្មរបស់កូរ៉េខាងត្បូងបានបង្ហាញទិន្នន័យពាណិជ្ជកម្មរបស់ខ្លួនថា ការនាំចេញទំនិញរបស់កូរ៉េខាងត្បូងនៅខែមីនា ឆ្នាំ២០២៣ បានធ្លាក់ចុះរយៈពេល៦ខែជាប់ៗគ្នា ដោយសាររងផលប៉ះពាល់ពីសេដ្ឋកិច្ចពិភពលោកជាប់គាំង និងវិស័យ semiconductor បានធ្លាក់ចុះជាបន្តបន្ទាប់ ។ ប៉ុន្តែការនាំចេញទំនិញនេះមិនបានធ្លាក់ចុះខ្លាំងក្លាទេ ។

កូរ៉េខាងត្បូងជាប្រទេសមានសេដ្ឋកិច្ចធំស្ថិតក្នុងចំណាត់ថ្នាក់ទី៤ នៅតំបន់អាស៊ី ដែលបាននាំចេញទំនិញនៅខែមីនា ឆ្នាំ២០២៣ ស្មើទឹកប្រាក់ចំនួន៥៥.១២០លានដុល្លារអាមេរិក ធ្លាក់ចុះ១៣,៦% បើធៀបនឹងដើមឆ្នាំ២០២៣ ហើយបើធៀបនឹងខែកុម្ភៈវិញ បានធ្លាក់ចុះ៧,៥% ។ គេចាត់ទុកថា វាជាការនាំចេញទំនិញធ្លាក់ចុះរយៈពេលយូរបំផុត តាំងពីខែសីហា ឆ្នាំ២០២០ មក ។

កូរ៉េខាងត្បូង គឺជាប្រទេសនាំចេញទំនិញធំមួយដែលបានបង្ហាញទិន្នន័យពាណិជ្ជកម្មជារៀងរាល់ខែ ដូចជា chip រហូតដល់រថយន្ត និងនាវា ។ ក្រៅពីនេះ ការនាំចេញទំនិញទៅកាន់ប្រទេសចិនក្នុងខែមីនា ឆ្នាំ២០២៣ បានធ្លាក់ចុះ៣៣,៤% ដែលជាការធ្លាក់ចុះរយៈពេល១០ខែជាប់ៗគ្នា និងចាត់ទុកជាហេតុការណ៍អាក្រក់បំផុតចាប់តាំងពីខែមករា ឆ្នាំ២០០៩ ។ ប៉ុន្តែការនាំចេញទំនិញពីកូរ៉េខាងត្បូងទៅកាន់អាមេរិកបានកើនឡើង១,៦% ខណៈការនាំចេញទំនិញទៅសហភាពអឺរ៉ុបធ្លាក់ចុះ១,២% ។

ចំណែកការនាំចេញ semiconductor បានធ្លាក់ចុះ៣៤,៥% អស់រយៈពេល៨ខែជាប់ៗគ្នា ប៉ុន្តែការនាំចេញរថយន្តបែរជាកើនឡើងលើសលើសស្មើ៦៤,២% ។ ទោះយ៉ាងណា បើទោះជាការនាំចូលទំនិញនៅខែមីនា ឆ្នាំ២០២៣ របស់កូរ៉េខាងត្បូងបានធ្លាក់ចុះ៦,៤% ស្មើទឹកប្រាក់៥៩.៧៥០លានដុល្លារអាមេរិក ប៉ុន្តែក៏នៅតែធ្វើឱ្យកូរ៉េខាងត្បូងមានឱនភាពពាណិជ្ជកម្មនៅខែមីនា ស្មើទឹកប្រាក់៤.៦២០លានដុល្លារអាមេរិក ដែលគេចាត់ទុកថា វាជាឱនភាពពាណិជ្ជកម្មរយៈពេល១៣ខែជាប់ៗគ្នា ៕ ប្រភព ៖ TNN World