ប្រទេសថៃ ៖ អាជ្ញាធរទេសចរណ៍ថៃបានលើកឡើងថា មានភ្ញៀវទេសចរថៃ និងបរទេសជាច្រើននាក់ចាប់អារម្មណ៍នាំគ្នាលេងទឹកនៅតាមកន្លែងផ្សេងៗក្នុងថ្ងៃចូលឆ្នាំថ្មី ដែលជាពិធីបុណ្យសំខាន់មួយរបស់ជាតិ បន្ទាប់ពីប្រទេសថៃមិនបានរៀបចំពិធីនេះអស់រយៈពេលជាច្រើនឆ្នាំមកហើយ ដោយសារការឆ្លងរាតត្បាតនៃជំងឺកូវីដ-១៩ ។

គេសង្កេតឃើញថា នៅផ្លូវខាវសាន មានពលរដ្ឋថៃ និងភ្ញៀវទេសចរបរទេសបានចាប់ផ្តើមលេងទឹកតាំងពីថ្ងៃទី១៣ ខែមេសា មកម៉្លេះ ។ ពលរដ្ឋថៃម្នាក់ឈ្មោះ Sudathip Wongsa ដែលបានមកលេងទឹកនៅផ្លូវខាវសាន និយាយថា ខ្លួនសប្បាយរីករាយណាស់ដែលបានមកលេងទឹកក្នុងពេលចូលឆ្នាំម្តងទៀត ហើយសង្ឃឹមថា សេដ្ឋកិច្ចថៃនឹងត្រឡប់មករីកចម្រើនឡើងវិញ ដោយសារតែភ្ញៀវទេសចរបរទេសជាច្រើននាក់នាំគ្នាមកកម្សាន្តនៅប្រទេសថៃ ។ លើសពីនេះ នៅតាមបណ្តាខេត្ត និងទីក្រុងធំៗ គេបានរៀបចំឱ្យពលរដ្ឋលេងទឹកយ៉ាងច្រើនកុះករ មិនចាញ់ទីក្រុងបាងកកឡើយ ។

មន្ត្រីអាជ្ញាធរទេសចរណ៍ថៃ លោក Yuthasak Supasorn បានថ្លែងថា ពិធីបុណ្យសង្ក្រាន្ត គឺជាប្រពៃណីមួយរបស់ថៃដែលល្បីល្បាញនៅទូទាំងពិភពលោក ។ ពិធីបុណ្យសង្ក្រាន្តនេះ គឺជា Soft Power (5F) និងមានការទទួលស្គាល់ពីប្រទេសនានាផងដែរ ។ លើសពីនេះ ពិធីបុណ្យសង្ក្រាន្តស្ថិតនៅក្រោមការពិចារណារបស់អង្គការយូណេស្កូ (UNESCO) ដើម្បីចុះបញ្ជីជាបេតិកភណ្ឌវប្បធម៌អរូបី (Intangible Cultural Heritage) ទី៤ របស់ប្រទេសថៃ ដែលបន្តពីល្ខោនខោលថៃ ម៉ាស្សា និងរបាំ Nora ។

ចំណែកគណៈកម្មការផ្សព្វផ្សាយ និងអភិរក្សបេតិកភណ្ឌថៃធ្លាប់លើកឡើងថា ថៃនឹងបានទទួលការពិចារណាចុះឈ្មោះប្រពៃណីសង្ក្រាននៅអង្គការយូណេស្កូនៅចុងឆ្នាំ២០២៣ នេះ ។ លើសពីនេះ ប្រទេសក៏មានបេតិកភណ្ឌវប្បធម៌អរូបីជាច្រើនទៀត ដែលត្រៀមពិចារណាចុះឈ្មោះជាមួយអង្គការយូណេស្កូផងដែរដូចជា កញ្ឆា ម្ហូបថៃ និងបាយដំណើបស្វាយទុំជាដើម ។

ទោះយ៉ាងណា ក្នុងតំបន់អាស៊ាន មិនមែនមានតែប្រទេសថៃមួយទេដែលមានប្រពៃណីសង្ក្រាន្ត និងលេងជះទឹកពេលចូលឆ្នាំថ្មី ប៉ុន្តែប្រទេសកម្ពុជាយើង ឡាវ និងមីយ៉ាន់ម៉ា ក៏បានប្រារព្ធពិធីនេះដូចគ្នាដែរ ប៉ុន្តែបែរជាប្រទេសថៃស្នើសុំអង្គការយូណេស្កូឱ្យចុះបញ្ជីពិធីបុណ្យសង្ក្រាន្តជារបស់ខ្លួនទៅវិញ ៕ ប្រភព ៖ TNN World

ប្រទេសថៃ ៖ កាលពីថ្ងៃទី១៦ ខែមេសា អ្នកនាង Traisulee Traisoranakul អ្នកនាំពាក្យការិយាល័យនាយករដ្ឋមន្ត្រី ថ្លែងថា ពលរដ្ឋថៃដែលបានធ្វើដំណើរទៅចូលរួមកម្សាន្តសប្បាយក្នុងថ្ងៃបុណ្យចូលឆ្នាំថ្មីនៅតាមបណ្តាខេត្ត ពួកគេចាប់ផ្តើមធ្វើដំណើរត្រឡប់មកទីក្រុងបាងកកវិញហើយ និងត្រៀមខ្លួនចូលធ្វើការធម្មតាវិញនៅថ្ងៃទី១៨ ខែមេសា ។ ហេតុនេះ ការធ្វើដំណើរនៅតាមដងផ្លូវនានាមកកាន់ទីក្រុងបាងកកនឹងមានភាពចង្អៀតខ្លាំង ។

លោក ប្រាយុទ្ធ ចាន់អូចា នាយករដ្ឋមន្ត្រី និងរដ្ឋមន្ត្រីក្រសួងការពារជាតិ បានជំរុញឱ្យភ្នាក់ងារពាក់ព័ន្ធដូចជា ក្រសួងមហាផ្ទៃ ក្រសួងគមនាគមន៍ និងភ្នាក់ងារនគរបាលជាតិ ត្រូវរួមគ្នាធ្វើយ៉ាងណា ផ្តល់ភាពងាយស្រួលដល់ការធ្វើដំណើររបស់ពលរដ្ឋ ទាំងអ្នកបើកបររថយន្តផ្ទាល់ខ្លួន និងអ្នកជិះរថយន្តឈ្នួល ។ ចំណែកមន្ត្រីពាក់ព័ន្ធត្រូវអនុវត្តច្បាប់ចរាចរណ៍ឱ្យបានហ្មត់ចត់ដើម្បីផ្តល់សុវត្ថិភាពដល់ពលរដ្ឋទាំងអស់ ។

លោកនាយករដ្ឋមន្ត្រីបានស្នើទៅកាន់ពលរដ្ឋទាំងអស់ឱ្យបើកបរដោយប្រុងប្រយ័ត្នដើម្បីសុវត្ថិភាពខ្លួនឯង និងអ្នកដំណើរផ្សេងទៀត គឺមិនត្រូវបើកបរពេលស្រវឹង និងពេលងងុយគេងទេ ។ បើងងុយគេងក្នុងពេលបើកបរ គួរតែឈប់សម្រាកនៅកន្លែងចាក់ប្រេង ឬកន្លែងចតរថយន្តដែលមន្ត្រីរៀបចំឱ្យ ហើយគួរបើកបរក្នុងល្បឿនដែលច្បាប់បានកំណត់ ។ នៅពេលអ្នកបើកបររថយន្តភាគច្រើនអនុវត្តតាមច្បាប់ចរាចរណ៍ និងមិនប្រមាថពេលបើកបរ គឺនឹងអាចកាត់បន្ថយគ្រោះថ្នាក់ផ្សេងៗនៅតាមដងផ្លូវ ក៏ដូចជាកាត់បន្ថយការស្លាប់ និងការខូចខាតទ្រព្យសម្បត្តិពលរដ្ឋផងដែរ ។

អ្នកនាង Traisulee Traisoranakul ថ្លែងបន្តថា លោកនាយករដ្ឋមន្ត្រី ក៏បារម្ភពីសុខភាពរបស់ពលរដ្ឋផងដែរក្រោយពេលបុណ្យចូលឆ្នាំថ្មី ខណៈពួកគេបានជួបជុំគ្នា និងធ្វើកម្មវិធីជាក្រុមមានគ្នាច្រើននាក់ ហើយនាយកដ្ឋានគ្រប់គ្រងជំងឺ និងក្រសួងសុខាភិបាលប៉ាន់ស្មានថា ក្រោយពេលចូលឆ្នាំ នឹងមានអ្នកឆ្លងជំងឺកូវីដច្រើន ។ ដូច្នេះ មុនពេលពួកគេត្រឡប់មកធ្វើការធម្មតាវិញ សូមឱ្យអនុវត្តតាមការណែនាំរបស់នាយកដ្ឋានគ្រប់គ្រងជំងឺ គឺត្រូវសង្កេតអាការៈរបស់ខ្លួនយ៉ាងតិច៧ថ្ងៃ ហើយចៀសវាងទាក់ទង ឬនៅជិតមនុស្សចាស់ និងអ្នកជំងឺរ៉ាំរ៉ៃ ។ បើមានអាការៈគ្រុនក្តៅ ឈឺក និងហៀរសំបោរ គួរតែពិនិត្យតាម ATK ហើយបើលទ្ធផលវិជ្ជមាន ត្រូវទៅពិគ្រោះយោបល់ជាមួយគ្រូពេទ្យ និងព្យាបាលខ្លួន ដើម្បីការពារមិនឱ្យជំងឺនេះឆ្លងរាលដាលនៅកន្លែងធ្វើការ ប៉ុន្តែបើគ្មានអាការៈអ្វីប្លែក មិនចាំបាច់ពិនិត្យតាម ATK ទេ ។

ប្រទេសថៃរំពឹងថា ចំនួនអ្នកឆ្លងជំងឺកូវីដនឹងកើនឡើងក្រោយពេលចូលឆ្នាំ ហើយក្រសួងសុខាភិបាលបានត្រៀមរួចជាស្រេចដូចជា ថ្នាំ គ្រែអ្នកជំងឺ និងឧបករណ៍ផ្សេងៗ ដែលអាចទទួលព្យាបាលអ្នកជំងឺបានគ្រប់គ្រាន់ និងមិនលើសពីសមត្ថភាពរបស់មន្ទីរពេទ្យ៕

ប្រភព ៖ The standard

ប្រទេសព័រទុយហ្គាល់ ៖ លោក Paul Wilkinson អាយុ៦៥ឆ្នាំ បានធ្វើដំណើរចេញពីទីក្រុង Faro ប្រទេសព័រទុយហ្គាល់ ទៅកាន់ទីក្រុង Belfast ប្រទេសអៀរឡង់ តាមជើងយន្តហោះលេខ Jet 2 ។ អ្វីដែលចម្លែក គឺក្នុងយន្តហោះនេះមានអ្នកដំណើរតែម្នាក់ប៉ុណ្ណោះ គឺលោក Paul Wilkinson ព្រមទាំងអ្នកបម្រើការនៅលើយន្តហោះ ។

ពេលឡើងលើយន្តហោះដំបូង លោក Paul Wilkinson មានការចម្លែកចិត្តជាខ្លាំង ហើយលោកគិតថា យន្តហោះនេះចេញដំណើរយឺតយ៉ាវ ឬត្រូវបានអ្នកដំណើរលុបចោលការធ្វើដំណើររបស់ពួកគេ ពីព្រោះគ្មានអ្នកដំណើរផ្សេងទៀតមកតម្រង់ជួរដើម្បីពិនិត្យសំបុត្រឡើងជិះយន្តហោះទេ ។ ក្រោយមក អ្នកបម្រើការលើយន្តហោះដើរមកប្រាប់ថា ថ្ងៃនេះ លោក Paul Wilkinson គឺជាអ្នកដំណើរវីអាយភី ហើយលោក Paul Wilkinson អាចធ្វើដំណើរតាមយន្តហោះនេះ ដូចគ្នានឹងការជិះយន្តហោះផ្ទាល់ខ្លួនដែរ ។

ការធ្វើដំណើររបស់លោក Paul Wilkinson គឺត្រូវចំណាយពេល៣ម៉ោង ។ ក្នុងអំឡុងពេលធ្វើដំណើរ អ្នកបម្រើការនៅលើយន្តហោះហៅលោក Paul Wilkinson ថា ព្រះអង្គម្ចាស់ Paul ហើយពួកគេបានផ្តល់សេវាកម្មនានាល្អឥតខ្ចោះចំពោះលោក សូម្បីតែវ៉ាលិសក្តី គឺមានតែវ៉ាលីសរបស់លោក Paul Wilkinson មួយប៉ុណ្ណោះនៅកន្លែងទទួលវ៉ាលីស ។ លើសពីនេះ អ្នកបម្រើការលើយន្តហោះបានថតរូបជាមួយលោកដើម្បីទុកជាអនុស្សាវរីយ៍ផងដែរ ។

លោក Paul Wilkinson និយាយថា វាគឺជាបទពិសោធន៍ថ្មីមួយក្នុងការធ្វើដំណើរតាមយន្តហោះរបស់លោកលើកនេះ ក្រោយពីលោកបានធ្វើដំណើរកម្សាន្ត និងវាយកូនហ្គោលនៅប្រទេសព័រទុយហ្គាល់ ៕ ប្រភព ៖ WorldForum

ប្រទេសចិន៖ ឧស្សាហកម្មអចលនទ្រព្យដែលមានប្រហែល ២៥% នៃផលិតផលក្នុងស្រុកសរុបរបស់ប្រទេសចិនកំពុងងើបឡើងវិញបន្ទាប់ពីទីក្រុងប៉េកាំងបានលុបចោលគោលនយោបាយប្រឆាំងការរីករាលដាលដ៏តឹងរ៉ឹង។
ទីក្រុងធំៗចំនួន ៥៥ ក្នុងចំណោមទីក្រុងចំនួន ៧០ ដែលតាមដានដោយរដ្ឋាភិបាលបានឃើញតម្លៃផ្ទះកើនឡើងក្នុងខែកុម្ភៈ បើធៀបនឹងខែធ្នូ។ ការស្ទង់មតិចុងក្រោយដោយធនាគារកណ្តាលរបស់ប្រទេសបង្ហាញពីភាគរយនៃគ្រួសារដែលមានផែនការទិញផ្ទះនៅត្រីមាសក្រោយបានកើនឡើងដល់ ១៧.៥% ដែលជាការកើនឡើងគួរឱ្យកត់សម្គាល់ជាលើកដំបូងក្នុងរយៈពេលបីឆ្នាំ។

Sunac China Holdings ដែលជាក្រុមហ៊ុនមានបញ្ហានាពេលថ្មីៗនេះ បានសម្រេចផែនការរៀបចំរចនាសម្ព័ន្ធឡើងវិញរបស់ខ្លួន ខណៈដែលក្រុមហ៊ុនបានឃើញការកើនឡើងការលក់បន្ទាប់ពីការធ្លាក់ចុះមួយឆ្នាំ។ ទីក្រុងប៉េកាំងបានជួយអ្នកសាងសង់ចាប់ផ្តើមគម្រោងឡើងវិញ ដើម្បីផ្តល់ផ្ទះដល់អតិថិជន និងចូលរួមក្នុងការធ្វើពហិការលើការទូទាត់ប្រាក់កម្ចី។
ការងើបឡើងវិញនៃទីផ្សារធ្វើឱ្យយល់បានសម្រាប់អ្នកអភិវឌ្ឍន៍អចលនទ្រព្យនៅពេលវាឈានចូលរដូវកាលរកប្រាក់ចំណូលឆ្នាំ ២០២២ ក្រុមហ៊ុនអចលនទ្រព្យចំនួន ២១ ក្នុងចំណោម ៦៥ ក្រុមហ៊ុនដែលបានចុះបញ្ជីនៅហុងកុងបានកត់ត្រាការខាតបង់ ហើយ ១៣ ក្រុមហ៊ុនទៀតបានរាយការណ៍ថាការខាតបង់។

ដោយសារទីផ្សារមានភាពប្រសើរឡើង ក្រុមហ៊ុនអចលនទ្រព្យឥឡូវនេះអាចចរចាជាមួយអ្នកវិនិយោគលើការសងបំណុលបានប្រសើរជាងមុន។ ទោះជាយ៉ាងណា អ្នកវិនិយោគនៅតែមានការព្រួយបារម្ភ កាលពីខែមុន ក្រុមហ៊ុន Sino-Ocean Group Holding បានពន្យារពេលការទូទាត់ការប្រាក់សញ្ញាប័ណ្ណដោយមិនបានរំពឹងទុកដើម្បី “រក្សាទុកសាច់ប្រាក់” ។ ទោះបីជាការសម្រេចចិត្តត្រូវបានលុបចោលប៉ុន្មានថ្ងៃក្រោយមកក៏ដោយ វាក៏ជាការដាស់តឿនមួយដែលថាវិបត្តិបំណុលរបស់ក្រុមហ៊ុនអចលនទ្រព្យមិនទាន់ចប់នោះទេ៕ ប្រភព៖vnexpress

កម្មវិធី ChatGPT និង Bard គឺជាកម្មវិធីទំនើបមួយដែលធ្វើឱ្យយើងដឹងថា បច្ចេកវិទ្យា AI មានសមត្ថភាពកម្រិតណា ។ ទោះយ៉ាងណា បច្ចេកវិទ្យាទាំងឡាយអាចត្រូវគេយកទៅប្រើប្រាស់ក្នុងផ្លូវមិនល្អ ហើយបច្ចេកវិទ្យា AI ក៏ដូចគ្នាដែរ ។

ក្រុមហ៊ុនផ្នែកការពារសន្តិសុខអ៊ីនធើរណេត Home Security Heroes បានផ្សព្វផ្សាយលទ្ធផលនៃការសិក្សាមួយទាក់ទងនឹងការប្រើប្រាស់បច្ចេកវិទ្យា AI ដើម្បីស្វែងរកពាក្យសម្ងាត់ តាមរយៈឧបករណ៍ថ្មីមួយឈ្មោះថា PassGAN (password generative adversarial network) ដោយគេប្រើប្រាស់ AI ជាអ្នកស្វែងរក ។

អ្នកស្រាវជ្រាវបានប្រើប្រាស់ PassGAN ដើម្បីស្វែងរកពាក្យសម្ងាត់ជាង១៥លាន ហើយលទ្ធផលឃើញថា លេខសម្ងាត់ទូទៅជាង៥១% គឺគេអាចរកឃើញដោយប្រើពេលមិនដល់១នាទី ហើយ៦៥% គេបានប្រើពេលក្រោម១ម៉ោង ខណៈ៧១% គេប្រើពេលស្វែងរកតិចជាង១ថ្ងៃ និង៨១%ទៀត គេប្រើពេលស្វែងរកពាក្យសម្ងាត់រយៈពេលក្រោម១ខែ ។

តាមទិន្នន័យឱ្យដឹងថា សម្រាប់លេខសម្ងាត់តិចជាង៦តួអក្សរ គឺគេអាចស្វែងរកឃើញយ៉ាងឆាប់រហ័ស ប៉ុន្តែបើលេខសម្ងាត់នោះមាន១៨តួអក្សរ ហើយក្នុងនោះមានអក្សរធំផង និងអក្សរតូចផងលាយឡំគ្នា គឺគេប្រើពេលយូរណាស់ក្នុងការស្វែងរកលេខសម្ងាត់ ។

នៅថ្ងៃអនាគត គេនឹងប្រើប្រាស់បច្ចេកវិទ្យានេះកាន់តែច្រើនដើម្បីស្វែងរកលេខសម្ងាត់របស់អ្នកណាម្នាក់ បើទោះជាវាពិបាកបន្តិចក្តី ។ ដូច្នេះ យើងគួរតែដាក់លេខសម្ងាត់ណាឱ្យមានភាពស្មុគស្មាញដើម្បីឱ្យបច្ចេកវិទ្យា AI ពិបាកស្វែងរក ៕ ប្រភព ៖ Beartai