ប្រទេសឥណ្ឌា ៖ ហេតុការណ៍មួយបានបង្កការភ្ញាក់ផ្អើលជាខ្លាំងដល់អ្នកដំណើរក្នុងអាកាសយានដ្ឋាននៅប្រទេសឥណ្ឌា ដោយសារភ្នាក់ងារបម្រើការនៅអាកាសយានដ្ឋាននេះបានពិនិត្យសម្ភារៈធ្វើដំណើររបស់ស្ត្រីម្នាក់ ហើយរកឃើញថា មានអ្វីខុសប្រក្រតីលាក់ក្នុងនោះ ។ អ្វីដែលគេពិនិត្យឃើញក្នុងសម្ភារៈនោះ បានធ្វើឱ្យភ្នាក់ងារបម្រើការនៅអាកាសយានដ្ឋានភ្ញាក់ផ្អើលជាខ្លាំង ដោយសារឃើញពស់នៅរស់ចំនួន២២ក្បាល និងបង្កួយ១ក្បាល ត្រូវបានញាត់ចូលក្នុងសម្ភារៈរបស់ស្ត្រីរូបនេះ ។

កាលពីថ្ងៃទី២៨ ខែមេសា កន្លងមក ភ្នាក់ងារបម្រើការនៅអាកាសយានដ្ឋាន Chennai បានបង្ហោះរូបភាពសត្វពស់នៅក្នុងអាកាសយានដ្ឋាន និងបញ្ជាក់ថា មានស្ត្រីម្នាក់បានធ្វើដំណើរមកពីទីក្រុងកូឡាឡាំពួរ ប្រទេសម៉ាឡេស៊ី មកកាន់អាកាសយានដ្ឋាន Chennai តាមជើងហោះហើរ AK13 ។ តាមការពិនិត្យសម្ភារៈរបស់នាងពេលមក check in ឃើញថា មានពស់ចំនួន២២ក្បាល និងបង្កួយ១ក្បាល ក្រោយមក ប៉ូលិសក៏បានឃាត់ខ្លួននាងដើម្បីចាត់ការតាមផ្លូវច្បាប់ ។ នាងនិយាយថា នាងលួចយកពស់ទាំងនេះទៅលក់បន្ត ។

ទោះយ៉ាងណា សារព័ត៌មានក្នុងស្រុកផ្តល់ព័ត៌មានបន្ថែមថា ពស់ និងបង្កួយ ត្រូវបានលាក់ទុកក្នុងប្រអប់ផ្លាស្ទិកពណ៌ស ដាក់ក្នុងឡាំងក្រដាសមួយ ។ នៅពេលគេបើកប្រអប់មើល ក៏ប្រទះឃើញពស់លូនចេញមកក្រៅពេញអាកាសយានដ្ឋាន ហើយភ្នាក់ងារបម្រើការក្នុងអាកាសយានដ្ឋានបានព្យាយាមប្រើឧបករណ៍ចាប់ពស់ទាំងនេះដើម្បីគ្រប់គ្រងស្ថានការណ៍ ។

លោក Abdul Bahai ប្រធានផ្នែកបរិស្ថាននៃអង្គការសហប្រជាជាតិ (UNEP) របស់ប្រទេសឥណ្ឌា និយាយថា តាមទិន្នន័យនៅខែមេសា ឆ្នាំ២០២២ បង្ហាញថា ឥណ្ឌាជាប្រទេសមួយក្នុងចំណោម១០ប្រទេស ដែលបានលួចរត់ពន្ធសត្វព្រៃខុសច្បាប់តាមជើងយន្តហោះ ។ បើតាមទិន្នន័យពី UNEP បង្ហាញថា ចាប់ពីឆ្នាំ២០១១ ដល់ឆ្នាំ២០២០ អាកាសយានដ្ឋានដែលមានការលួចលាក់ដឹកជញ្ជូនសត្វព្រៃច្រើនបំផុត គឺអាកាសយានដ្ឋាន Chennai បន្ទាប់មក អាកាសយានដ្ឋានមុមបៃ និងអាកាសយានដ្ឋានដេលី ៕ ប្រភព ៖ khaosod

អង្គការស្បៀងអាហារ និងកសិកម្មនៃអង្គការសហប្រជាជាតិ (FAO) បង្ហាញថា សន្ទស្សន៍តម្លៃម្ហូបអាហារលើពិភពលោកនៅខែមេសា ឆ្នាំ២០២៣ បានកើនឡើងខ្ពស់ជាលើកដំបូង បើធៀបនឹងខែមីនា ។ ការកើនឡើងនៃតម្លៃម្ហូបអាហារនេះ ដោយសារសេដ្ឋកិច្ចពិភពលោកងើបឡើងវិញ ដែលធ្វើឱ្យតម្រូវការម្ហូបអាហារកើនឡើង ។

អង្គការ FAO បង្ហាញថា សន្ទស្សន៍តម្លៃម្ហូបអាហារលើពិភពលោកនៅខែមេសា ឆ្នាំ២០២៣ បានកើនឡើងជាមធ្យមស្មើ១២៧,២ ច្រើនជាងខែមីនា ដែលស្មើត្រឹមតែ១២៦,៩ ប៉ុន្តែវាបានកើនឡើង២០% ពីស្ថិតិខ្ពស់បំផុតកាលពីខែមីនា ឆ្នាំ២០២២ ក្រោយពីប្រទេសរុស្ស៊ីឈ្លានពានអ៊ុយក្រែន ។ សន្ទស្សន៍តម្លៃម្ហូបអាហារលើពិភពលោក បានកើនឡើងនៅខែមេសា ឆ្លុះបញ្ចាំងឱ្យឃើញថា តម្លៃស្ករ សាច់សត្វ និងអង្ករបានកើនឡើង ខណៈតម្លៃទឹកដោះគោ និងប្រេងសណ្តែកធ្លាក់ចុះ ។

ប្រធានសេដ្ឋវិទូរបស់អង្គការ FAO ថ្លែងថា ៖ «ខណៈសេដ្ឋកិច្ចពិភពលោកបានងើបឡើងវិញក្រោយពីបានធ្លាក់ចុះនាពេលកន្លងមក តម្រូវការម្ហូបអាហារបានកើនឡើង និងបណ្តាលឱ្យមានការដាក់សម្ពាធលើតម្លៃម្ហូបអាហារ» ។

សន្ទស្សន៍តម្លៃស្ករនៅខែមេសា បានកើនឡើង១៧,៦% ជាកម្រិតមួយខ្ពស់ចាប់ពីខែតុលា ឆ្នាំ២០១១ ។ អង្គការ FAO ថា ការកើនឡើងនៃសន្ទស្សន៍តម្លៃស្ករ ត្រូវបានគេបារម្ភថា មានបញ្ហាក្នុងផ្នែកផ្គត់ផ្គង់ ក្រោយពីគេព្យាករណ៍ពីផលិតកម្មធ្លាក់ចុះនៅប្រទេសឥណ្ឌា និងចិន រួមទាំងផលិតកម្មរបស់ថៃ និងសហភាពអឺរ៉ុបផងដែរ ដែលធ្លាក់ចុះខុសពីការរំពឹងទុកនាពេលមុននេះ ។

ចំណែកសន្ទស្សន៍តម្លៃសាច់សត្វបានកើនឡើង១,៣% បើធៀបពីមួយខែទៅមួយខែ ខណៈសន្ទស្សន៍តម្លៃទឹកដោះគោស្រស់ធ្លាក់ចុះ១,៧%, សន្ទស្សន៍តម្លៃបន្លែធ្លាក់ចុះ១,៣% និងសន្ទស្សន៍តម្លៃគ្រាប់ធញ្ញជាតិធ្លាក់ចុះ១,៧% ។ ដូច្នេះ តម្លៃគ្រាប់ធញ្ញជាតិទាំងអស់ក្នុងទីផ្សារពិភពលោក ធ្លាក់ចុះច្រើនជាងតម្លៃអង្ករដែលបានកើនឡើង ។

ក្រៅពីនេះ តម្លៃអង្ករកើនឡើង គឺជារឿងគួរឱ្យបារម្ភយ៉ាងខ្លាំង និងត្រូវបន្តសុពលភាពកិច្ចព្រមព្រៀងដឹកជញ្ជូនគ្រាប់ធញ្ញជាតិតាមសមុទ្រខ្មៅជាថ្មី (ជាកិច្ចព្រមព្រៀងដែលអនុញ្ញាតឱ្យអ៊ុយក្រែននាំចេញគ្រាប់ធញ្ញជាតិតាមសមុទ្រខ្មៅ) ដើម្បីចៀសវាងមិនឱ្យតម្លៃស្រូវសាលី និងពោតសម្រាប់ធ្វើចំណីសត្វកើនឡើង ។

ក្នុងរបាយការណ៍ទាក់ទងនឹងការផ្គត់ផ្គង់ និងតម្រូវការគ្រាប់ធញ្ញជាតិ អង្គការ FAO រំពឹងថា ទិន្នផលផលិតស្រូវសាលីលើពិភពលោកក្នុងឆ្នាំ២០២៣ គឺស្មើ៧៨៥លានតោន ដែលទាបជាងទិន្នផលផលិតក្នុងឆ្នាំ២០២២ បន្តិច ប៉ុន្តែវាជាទិន្នផលច្រើនមួយស្ថិតក្នុងចំណាត់ថ្នាក់ទី២ នៃស្ថិតិទិន្នផលស្រូវសាលី ។ ចំណែកការប្រើប្រាស់គ្រាប់ធញ្ញជាតិលើពិភពលោក ចាប់ពីឆ្នាំ២០២២-២០២៣ ស្មើនឹង២.៧៨០លានតោន ៕ ប្រភព ៖ bangkokbiznews

ប្រទេសកម្ពុជា ៖ សារព័ត៌មានប្រទេសថៃបានចុះផ្សាយថា ការដាក់ពិន្ទុក្នុងការប្រកួតកីឡាស៊ីហ្គេមនៅប្រទេសកម្ពុជាមិនយុត្តិធម៌ទេ ដែលបានធ្វើឱ្យកីឡាករថៃចុះចាញ់ ខណៈក្រុមកីឡាករថៃបានត្រៀមខ្លួនហ្វឹកហាត់យ៉ាងខ្លាំង និងត្រៀមខ្លួនអស់រយៈពេលយូរណាស់ ប៉ុន្តែបែរជាមកចុះចាញ់កីឡាករខ្មែរជាម្ចាស់ផ្ទះទៅវិញ ។

កីឡាករថៃឈ្មោះ ផានុវ៉ាត់ ឌីយ៉ាតាម ជាម្ចាស់ពានរង្វាន់ជើងឯកអាស៊ីចុងក្រោយបង្អស់បាននិយាយទាំងស្រក់ទឹកភ្នែក ក្រោយពីរូបគេជាមួយកីឡាករដៃគូម្នាក់ទៀតឈ្មោះ ណាវិន កកែវ បានចាញ់ពិន្ទុកីឡាករខ្មែរ ហើយកីឡាករថៃទាំងពីររូបនេះទទួលបានត្រឹមតែមេដាយប្រាក់ប៉ុណ្ណោះ ហើយកីឡាករខ្មែរជាម្ចាស់ផ្ទះទទួលបានមេដាយមាស ។

កីឡាករ ណាវិន កកែវ និយាយថា ៖ «ខ្ញុំបានប្រឹងប្រែងអស់ពីសមត្ថភាពហើយ ប៉ុន្តែបញ្ហាមកពីគណៈកម្មការដាក់ពិន្ទុ ។ បើទោះជាពេលនេះ វាជាការចូលរួមប្រកួតកីឡាស៊ីហ្គេមលើកដំបូងរបស់ពួកយើង ប៉ុន្តែពួកយើងបានដាក់ក្តីសង្ឃឹមខ្ពស់ណាស់» ។

ចំណែកកីឡាករ ផានុវ៉ាត់ ឌីយ៉ាតាម បាននិយាយទាំងស្រក់ទឹកភ្នែកថា ៖ «កីឡាករដែលចូលរួមប្រកួត យើងដឹងទាំងអស់ព្រោះធ្លាប់ជួបមកអស់ហើយ រួមទាំងកីឡាកររបស់ម្ចាស់ផ្ទះកម្ពុជាផងដែរ ដែលទើបជួបគ្នាក្នុងការប្រកួតដណ្តើមជើងឯកអាស៊ីលើកចុងក្រោយ ។ ដូច្នេះ យើងទទួលបានជ័យជម្នះរាល់លើកក្នុងការប្រកួត ប៉ុន្តែការដាក់ពិន្ទុលើកនេះមិនយុត្តិធម៌ទេ ហើយនឹងធ្វើកីឡាករអស់កម្លាំងចិត្ត ព្រោះយើងបានត្រៀមខ្លួនហ្វឹកហាត់ខ្លាំងក្លា និងប្រើពេលយូរណាស់ ហើយក៏មិនបានត្រឡប់ទៅផ្ទះរកម៉ែ និងមិនបានជួបអ្នកណាឡើយ ។ ខ្ញុំមានអារម្មណ៍ច្របូកច្របល់ណាស់ដែលចាញ់ម្ចាស់ផ្ទះនៅពេលនេះ ប៉ុន្តែយើងត្រូវប្រកួតបន្តទៀត ហើយការប្រកួតកីឡាស៊ីហ្គេមលើកក្រោយ ខ្ញុំនឹងយកឈ្នះវិញជាមិនខាន» ។

ជុំវិញការលើកឡើងរបស់កីឡាករថៃនេះ អ្នកលេងបណ្តាញសង្គមខ្មែរបានបញ្ចេញមតិថា ការដាក់ពិន្ទុការប្រកួតកីឡាស៊ីហ្គេមនៅប្រទេសកម្ពុជាមានភាពយុត្តិធម៌បំផុតហើយ ហើយកីឡាករថៃត្រូវតែទទួលស្គាល់ការពិត ។ អ្នកលេងបណ្តាញសង្គមខ្មែរម្នាក់និយាយថា ការប្រកួតមានចាញ់ មានឈ្នះ នៅពេលកម្ពុជាចាញ់ហ្វីលីពីន កម្ពុជាមិនបានស្រែកថា មិនសុក្រិតនោះទេ ។ យើងត្រូវទទួលស្គាល់ពីសមត្ថភាព និងការពិត ហើយសូមឱ្យសារព័ត៌មានថៃសរសេរពីការពិតច្បាស់លាស់នៃការប្រកួតកីឡាស៊ីហ្គេម ដែលកម្ពុជាធ្វើជាម្ចាស់ផ្ទះប្រកបដោយវិជ្ជាជីវៈ និងថ្លៃថ្នូរផង ។ រីឯពលរដ្ឋខ្មែរម្នាក់ទៀតថា រៀនទទួលស្គាល់ការពិតទៅ ពេលឈ្នះ ស្រែកថាយុត្តិធម៌ ហើយពេលចាញ់ ស្រែកថាអយុត្តិធម៌ ។

ដូចគ្នានេះ អ្នកលេងបណ្តាញសង្គមខ្មែរម្នាក់ទៀតថា ជនជាតិសៀម ពេលចាញ់ មិនចេះទទួលយកការពិតទេ ហើយយកលេសមិនចេះអស់មកនិយាយ ។ ប្រជាជនថៃមើលទៅខ្វះការរៀនសូត្រ និងសីលធម៌ក្នុងការរស់នៅណាស់ ព្រោះមើលងាយជាតិសាសន៍ដទៃ ។ ចំណែកពលរដ្ឋខ្មែរម្នាក់ទៀតថា គោលបំណងនៃការបង្កើតការប្រកួតកីឡាស៊ីហ្គេមនេះ គឺដើម្បីបង្កើតនូវចំណងមិត្តភាពរវាងប្រទេសអាស៊ានទាំងអស់ មិនមែនព្យាយាមបង្កើតសត្រូវទេ ហើយសៀមនៅតែជាសៀមមែន ។ ដូចគ្នានេះ ពលរដ្ឋខ្មែរម្នាក់ទៀតថា ទទួលស្គាល់ការពិតខ្លះទៅ ដើម្បីក្លាយជាប្រទេសមួយថ្លៃថ្នូរនៅលើពិភពលោក មិនមែនឃើញសមត្ថភាពគូប្រជែងល្អជាង បែរជាស្រែកថា គេប្រើល្បិច ហើយកុំជ្រុលនិយមហួសព្រំដែនពេក ។

ទោះយ៉ាងណា គេសង្កេតឃើញថា ប្រទេសថៃ និងពលរដ្ឋថៃតែងបង្កើតបញ្ហាមិនចេះចប់ជាមួយកម្ពុជា ហើយពេលកីឡាករថៃមកប្រកួតកីឡាស៊ីហ្គេមនៅកម្ពុជា ពួកគេតែងថតរូបភាពពីកម្ពុជាយកទៅផ្សព្វផ្សាយទៅកាន់ពិភពលោក និងនិយាយថា កម្ពុជាខ្វះខាតចំណុចនេះ ខ្វះខាតចំណុចនោះ មិនល្អ មិនយុត្តិធម៌ និងគ្មានរបៀបរៀបរយ ។ ប៉ុន្តែចង់សួរថា តើនៅប្រទេសថៃពិតជាល្អគ្រប់ដប់ទាំងអស់ឬ ? ប្រទេសថៃក៏មានលូទឹកស្អុយ គំនរសំរាម និងគ្មានសណ្តាប់ធ្នាប់ច្រើនណាស់ ប៉ុន្តែពេលទៅប្រទេសថៃ ពលរដ្ឋខ្មែរយើងមិនដែលថតទិដ្ឋភាពទាំងនេះមកផ្សព្វផ្សាយទេ ដែលខុសពីចរិតកូនថៃមួយចំនួន ៕

ប្រភព ៖ Siamsport

ប្រទេសកម្ពុជា ៖ សារព័ត៌មានមួយរបស់ប្រទេសថៃបានចុះផ្សាយថា ពិធីបើកការប្រកួតកីឡាស៊ីហ្គេម លើកទី៣២ នៅទីក្រុងភ្នំពេញ ប្រទេសកម្ពុជា មានអ្នកមកចូលរួមទស្សនាយ៉ាងច្រើនកុះករ និងរំលេចឡើងនូវពន្លឺភ្លើងពណ៌ដ៏ស្រស់ស្អាត និងអស្ចារ្យ ។ លើសពីនេះ ប្រទេសកម្ពុជាបានរៀបចំទីលានប្រកួតដ៏ធំទូលាយឱ្យសមនឹងការរង់ចាំធ្វើជាម្ចាស់ផ្ទះប្រកួតកីឡាស៊ីហ្គេមអស់រយៈពេលជាច្រើនឆ្នាំផងដែរ ។

ទោះយ៉ាងណា សារព័ត៌មានថៃចុះផ្សាយទៀតថា មានឪពុកម្តាយខ្លះបណ្តោយឱ្យកូនរបស់ខ្លួនលេងទឹកយ៉ាងសប្បាយរីករាយនៅបរិវេណខាងមុខពហុកីឡដ្ឋានមរតកតេជោ ក្នុងអំឡុងពេលពួកគេមកទស្សនាពិធីបើកការប្រកួតកីឡាស៊ីហ្គេមជាផ្លូវការនេះ ។ សារព័ត៌មានរបស់ថៃបន្តថា ដោយសារតែអាកាសធាតុក្តៅខ្លាំងពេក ទើបធ្វើឱ្យក្មេងៗនាំគ្នាលេងទឹកដើម្បីកាត់បន្ថយកំដៅ ។

ក្រោយពីសារព័ត៌មានថៃចុះផ្សាយបែបនេះ មានអ្នកលេងបណ្តាញសង្គមថៃបញ្ចេញមតិថា ហេតុអ្វីបានជាឪពុកម្តាយពួកគេមិនស្លៀកខោឱ្យកូន ពីព្រោះនៅទីនេះជាទីក្រុង មិនមែននៅតាមស្រុកស្រែទេ ។ ពលរដ្ឋថៃម្នាក់ទៀតថា វាជាការចងចាំក្នុងវ័យកុមារ និងសុំឱ្យការប្រកួតកីឡាស៊ីហ្គេមលើកនេះជាការបំផុសគំនិតឱ្យក្មេងសម័យថ្មីរបស់កម្ពុជាអភិវឌ្ឍន៍បន្តទៀត ។

ដូចគ្នានេះ ពលរដ្ឋថៃម្នាក់ទៀតនិយាយថា វាជារូបភាពមួយដ៏ស្រស់ស្អាតសម្រាប់ការប្រកួតកីឡាស៊ីហ្គេមនៅប្រទេសកម្ពុជា ។ ចំណែកនារីម្នាក់ទៀតថា គួរឱ្យអាណិតណាស់ យូរៗទើបកម្ពុជាបានធ្វើជាម្ចាស់ផ្ទះម្តង អីចឹង ក្មេងៗក៏សប្បាយនឹងការលេងទឹកបែបនេះ ៕ ប្រភព ៖ PPTV HD 36