នាយប់នេះ ក្រុមបាល់ទះកម្ពុជា នឹងត្រូវប្រកួតវគ្គផ្តាច់ព្រ័ត្រប៉ះជាមួយនឹងក្រុមខ្លាំងប្រចាំតំបន់អាសុីអាគ្នេយ៍ ឥណ្ឌូនេសុី ដែលពួកគេជាម្ចាស់មេដាយមាស១១សម័យលើវិញ្ញាសាបាល់ទះក្នុងសាលនេះ។
មុននឹងឡើងមកដល់វគ្គផ្តាច់ព័ត្រនេះ ក្រុមបាល់ទះកម្ពុជា បានធ្វើរឿងភ្ញាក់ផ្អើលបំផុតមួយ ដោយបានវាយបកយកឈ្នះថៃ ៣សិតទល់២ ខណៈដែលឥណ្ឌូនេសុីបំបាក់វៀតណាម ៣សិត០។
សូមរំលឹកផងដែរថា កម្ពុជាយើងធ្លាប់បានបរាជ័យ ក្រោមថ្វីដៃឥណ្ឌូនេសុី ៣សិត០ កាលពីវគ្គជម្រុះក្នុងពូលរួចម្តងមកហើយ។ តែយ៉ាងណាមិញនៅក្នុងយប់នេះ តើថាកម្ពុជាអាចសាងប្រវត្តិសាស្ត្រថ្មីបានដែរឬយ៉ាងណា សូមមកចូលរួមទស្សនាឱ្យបានច្រើនកុះករ នៅពហុកីឡដ្ឋានជាអូឡាំពិក វេលាម៉ោង៧ៈ៣០យប់៕
