មន្ទីរពេទ្យមិត្តភាពខ្មែរសូវៀត (ពេទ្យរុស្សី) បានធ្វើការជូនដំណឹងដល់សាធារណជនថា ផ្នែកចក្ខុរោគ នៃមន្ទីរពេទ្យមិត្តភាពខ្មែរ-សូវៀត បានសហការជាមួយកម្មវិធីជាតិសុខភាពភ្នែក និងក្រុមគ្រូពេទ្យមកពីប្រទេសអូស្ត្រាលី នឹងផ្ដល់ជូនការពិនិត្យ និងព្យាបាលជំងឺទឹកដក់ក្នុងភ្នែករយៈពេល៥ថ្ងៃដោយឥតគិតថ្លៃចាប់ពីថ្ងៃទី២២ រហូតដល់ថ្ងៃទី២៦ ខែឧសភា ឆ្នាំ២០២៣។ ការជូនដំណឹងនេះធ្វើឡើងនៅថ្ងៃទី១១ ខែឧសភា ឆ្នាំ២០២៣។

គួរជម្រាបជូនថា តាមការឱ្យដឹងពីមន្ទីរពេទ្យកាល់ម៉ែត ទឹកដក់ក្នុងភ្នែក គឺជាជំងឺមួយក្នុងចំណោមជំងឺភ្នែកដទៃទៀតជាច្រើន ដែលបណ្ដាលឱ្យខូចសរសៃបាតភ្នែក បាត់បង់ដែនគំហើញ និងវិវត្តទៅរកពិការភ្នែកបើយើងមិនបានព្យាបាលត្រឹមត្រូវ និងទាន់ពេល។

ជំងឺនេះបណ្ដាលមកពីការកើនឡើងនៃអាយុ ទឹកនោមផ្អែម ឈាមបាតភ្នែក ស្ត្រីកើតច្រើនជាងបុរស និងការមានរបួសភ្នែក។ ដោយឡែក សម្រាប់រោគសញ្ញាវិញមានដូចជា ឈឺក្បាលខ្លាំង ក្អួតចង្អោរ ឈឺចាប់ក្នុងភ្នែកខ្លាំង គំហើញថយចុះ បាត់បង់ដែនគំហើញ ភ្នែកក្រហម កូនក្រមុំរីក និងសម្ពាធទឹកនៅក្នុងភ្នែកកើនឡើង និងមានរោគសញ្ញាផ្សេងៗទៀត៕

ប្រទេសចិន ៖ វិធានការហាមឃាត់ការនេសាទប្រចាំឆ្នាំរបស់ប្រទេសចិន បានចាប់ផ្តើមអនុវត្តតាំងពីថ្ងៃទី១ ខែឧសភា ឆ្នាំ២០២៣ មកម៉្លេះ ។ ប្រទេសនេះបានហាមឃាត់ការនេសាទនៅសមុទ្រភាគខាងជើង, ភាគខាងកើត និងភាគខាងត្បូង ហើយវិធានការហាមឃាត់នេះបានគ្របដណ្តប់លើសមុទ្របូហៃ, សមុទ្រលឿង, សមុទ្រចិនខាងកើត និងផ្នែកខ្លះរបស់សមុទ្រចិនខាងត្បូង ។ ប្រទេសចិនមានទូកនេសាទប្រមាណ១២ម៉ឺនគ្រឿង និងអ្នកនេសាទជាង១លាននាក់ ។

មន្ត្រីការិយាល័យជលផលនៃក្រសួងកសិកម្ម និងកិច្ចការជនបទ បានថ្លែងថា នៅរដូវផ្ការីក និងរដូវក្តៅ គឺជាអំឡុងពេលនៃការបង្កាត់ពូជ និងការលូតលាស់របស់សត្វរស់នៅក្នុងទឹកសមុទ្រ ។ វិធានការហាមឃាត់ការនេសាទនៅរដូវក្តៅ វានឹងជួយការពារសត្វរស់នៅក្នុងទឹក ក៏ដូចជាជួយស្តារប្រព័ន្ធអេកូឡូស៊ីផងដែរ ។

នៅរដូវក្តៅឆ្នាំ២០២៣នេះ ក្រសួងកសិកម្ម និងកិច្ចការជនបទបានកែលម្អវិធានការមួយចំនួន ក្នុងនោះក្រសួងអនុញ្ញាតឱ្យទូកនេសាទ និងទូកប្រើប្រាស់ឧបករណ៍បុរាណអាចចាប់ត្រីនៅសមុទ្របានធម្មតា ។

ក្នុងអំឡុងពេលហាមឃាត់ការនេសាទនេះ ការស្វែងរកអាហារតាមសមុទ្រភាគច្រើនជាប្រភេទអាហារក្លាស្សេ និងអាហារសមុទ្រដែលគេចិញ្ចឹម ។ បច្ចុប្បន្ន ការផ្គត់ផ្គង់អាហារសមុទ្រនៅតាមទីផ្សារនៅទូទាំងប្រទេសចិន គឺគ្រប់គ្រាន់ជាមួយនឹងតម្លៃនៅដដែល ៕ ប្រភព ៖ China Face

ប្រទេសថៃ ៖ អនុសេនីយ៍ឯក Sombat Banchamek ឬ បួ ខាវ គឺជាកំពូលកីឡាករប្រដាល់ល្បីល្បាញមួយរូបប្រចាំប្រទេសថៃ បានខឹងសម្បារជាខ្លាំង និងទទួលយកមិនបាន ដោយសារវែបសាយភ្នាល់អនឡាញមួយបានយករូបភាពរបស់ខ្លួនទៅបបួលឱ្យពលរដ្ឋ និងយុវវ័យថៃឱ្យងាកមកលេងភ្នាល់តាមអនឡាញយ៉ាងបើកចំហ ។

បួ ខាវ មានអាយុ៤១ឆ្នាំ ជាកីឡាករប្រដាល់ដែលមានការស្រឡាញ់ចូលចិត្តពីពលរដ្ឋថៃគ្រប់ស្រទាប់ បានត្រៀមខ្លួនដាក់ពាក្យបណ្តឹងវែបសាយភ្នាល់តាមអនឡាយមួយ ដែលយករូបភាពរបស់ខ្លួនទៅផ្សព្វផ្សាយពាណិជ្ជកម្ម ។ បួ ខាវ បញ្ជាក់ថា ខ្លួនបានមិនជាប់ពាក់ព័ន្ធនឹងវែបសាយភ្នាល់ណាមួយទេ ។

អ្នកគាំទ្រ Muay Thai និងជនបរទេសបានស្គាល់ពីកេរ្តិ៍ឈ្មោះរបស់កីឡាករ បួ ខាវ តាំងពីកីឡាកររូបនេះបានទទួលជើងឯក K-1 World MAX ចំនួន២ដង កាលពីឆ្នាំ២០០៤ និងឆ្នាំ២០០៦ ។ លើសពីនេះ រូបគេបានទៅប្រដាល់ក្នុងសង្វៀនប្រដាល់ជាច្រើននៅប្រទេសនានាលើពិភពលោក ហើយបានធ្វើឱ្យវែបសាយភ្នាល់យករូបភាពរបស់កំពូលកីឡាករប្រដាល់រូបនេះទៅផ្សព្វផ្សាយ ក្នុងគោលបំណងទាក់ទាញឱ្យពលរដ្ឋ និងយុវវ័យថៃជឿតាម ហើយងាកមកលេងល្បែងភ្នាល់តាមអនឡាញ ។ ដូច្នេះ គេចាត់ទុកថា ការប្រព្រឹត្តរបស់វែបសាយភ្នាល់នឹងបង្កគ្រោះថ្នាក់ដល់ក្មេងជំនាន់ក្រោយ ក៏ដូចជាប៉ះពាល់ដល់សន្តិសុខជាតិផងដែរ ។

បួ ខាវ ក្រៅពីមានតួនាទីជាកីឡាករហើយ រូបគេក៏ជាប្រធានដឹកនាំការផ្សព្វផ្សាយសិល្បៈ Muay Thai ទៅដល់កងទ័ពផងដែរ ។ បួ ខាវ ធ្លាប់ជាគ្រូបង្វឹកដល់កងទ័ពអាមេរិកក្នុងកម្មវិធីបណ្តុះបណ្តាល Cobra Gold 2023 រវាងកងទ័ពអាមេរិក និងកងទ័ពថៃ កាលពីដើមឆ្នាំ២០២៣ ហើយ បួ ខាវ ក៏ជាប្រធានគ្រប់គ្រងក្រុមប្រដាល់ជម្រើសជាតិថៃ ក្នុងការប្រកួតកីឡាស៊ីហ្គេម លើកទី៣២ នៅប្រទេសកម្ពុជា ៕

ប្រភព ៖ MGR Sport

ប្រទេសសិង្ហបុរី ៖ ក្រុមយុវជនសិង្ហបុរីកំពុងតែប្រឈមនឹងបញ្ហាការចាយវាយក្នុងជីវភាពប្រចាំថ្ងៃ ខណៈតម្លៃលំនៅឋាន និងខុនដូប្រណីតៗបានកើនឡើងជាបន្តបន្ទាប់ បណ្តាលឱ្យអ្នកនៅលីវភាគច្រើនសម្រេចចិត្តត្រឡប់ទៅរស់នៅស្រុកកំណើតវិញ ពីព្រោះពួកគេគ្មានប្រាក់បង់ឈ្នួលផ្ទះ ។ ចំណែកជនបរទេសរស់នៅប្រទេសសិង្ហបុរី ត្រូវបង់ពន្ធរហូតដល់៦០% និងបន្ថែមការដាក់សម្ពាធលើគណបក្សនយោបាយរបស់រដ្ឋាភិបាលផងដែរ ខណៈរយៈពេល៦ខែទៀតដល់រដូវកាលបោះឆ្នោត ។

ក្រោយពីគណៈរដ្ឋមន្ត្រីសិង្ហបុរីបានសម្រេចដំឡើងពន្ធលើអចលនទ្រព្យម្តងទៀតកាលពីថ្ងៃទី២៧ ខែមេសា កន្លងមក គឺសម្រាប់ជនបរទេសរស់នៅក្នុងប្រទេសនេះត្រូវបង់ពន្ធទ្វេដង ខណៈកាលពីមុន ជនបរទេសត្រូវបង់ពន្ធអលចនទ្រព្យស្មើ៣០% ប៉ុន្តែបច្ចុប្បន្ន ពួកគេត្រូវបង់ពន្ធរហូតដល់៦០% ។ លើសពីនេះ សម្រាប់ពលរដ្ឋសិង្ហបុរីណាដែលត្រូវការទិញផ្ទះទី២ និងផ្ទះទី៣ ក៏ត្រូវបង់ពន្ធលើសមុនប្រមាណ៣%-៥% ផងដែរ ។

លើសពីនេះ ការដំឡើងពន្ធលើអចលនទ្រព្យនៅសិង្ហបុរី មិនបានធ្វើឱ្យអ្នកនៅលីវសប្បាយចិត្តទេ ខណៈតម្លៃអចលនទ្រព្យបានបន្តកើនឡើង ។ អ្នកនៅលីវភាគច្រើនបានសម្រេចចិត្តផ្លាស់ប្តូរទីលំនៅចេញពីទីក្រុង ខណៈអ្នកនៅលីវខ្លះបានត្រឡប់ទៅរស់នៅស្រុកកំណើតវិញ ហើយមួយចំនួនទៀតបានផ្លាស់មករស់នៅទីក្រុងបាងកក ប្រទេសថៃ ។

រឿងនេះបានប៉ះពាល់ដល់រដ្ឋាភិបាល លោក Lee Hsien Loong ផងដែរ ខណៈលោកទទួលបានជ័យជម្នះជាប់ៗគ្នាក្នុងការបោះឆ្នោត ប៉ុន្តែផលប៉ះពាល់នៃសេដ្ឋកិច្ចនាពេលបច្ចុប្បន្នបានបង្កើតស្លាកស្នាមយ៉ាងជ្រៅសម្រាប់ប្រទេសសិង្ហបុរីជំនាន់ថ្មី ។ គេមើលឃើញថា តម្លៃលំនៅឋានបានកើនឡើងអស់រយៈពេល១២ត្រីមាស ហើយគ្មានសញ្ញាធ្លាក់ចុះទេ ។

បើតាមជនជាតិសិង្ហបុរីម្នាក់ អាយុ២៨ឆ្នាំ ដែលបានផ្តល់ព័ត៌មានមកកាន់សារព័ត៌មាន Bloomberg ថា ៖ «គ្រប់គ្នាដឹងថា សិង្ហបុរី គឺជាប្រទេសមួយដែលងាយស្រួលរស់នៅ ប៉ុន្តែវាគួរឱ្យសោកស្តាយ ដោយសាររដ្ឋាភិបាលគ្មានវិធានការចាត់ការលើតម្លៃផ្ទះជួលកើនឡើងនាពេលនេះ» ។

ទោះយ៉ាងណា គេសង្កេតឃើញថា មូលហេតុចម្បង គឺដោយសារមានកំណើនវិនិយោគិនចិន និងវិនិយោគិនមកពីប្រទេសផ្សេងទៀតនៅសិង្ហបុរី ហើយពួកគេមានតម្រូវការទិញលំនៅឋានកើនឡើង ដូច្នេះ ទើបធ្វើឱ្យតម្លៃផ្ទះជួល និងអាផាតមិន កើនឡើងខ្ពស់ ។ សារព័ត៌មានក្នុងស្រុកផ្សព្វផ្សាយថា តម្លៃផ្ទះជួលនៅសិង្ហបុរីបានកើនខ្ពស់វ៉ាដាច់ទីក្រុងញូវយ៉កទៀតផង ៕ ប្រភព ៖ Bangkok biznews

រដ្ឋធានីកៀវ៖ សង្គ្រាមវាយប្រយុទ្ធគ្នាយ៉ាងសាហាវ រវាងកងទ័ពការពារទឹកដីរបស់អ៊ុយក្រែន និង ទាហានរុស្ស៊ី កំពុងតែបន្ដ ធ្វើឲ្យខូចខាត ស្លាប់ និង របួសរាប់ម៉ឺននាក់ ដល់កម្លាំងយោធាទាំងសងខាង ប៉ុន្ដែចក្រភពអង់គ្លេស បានប្រកាស អំពីការបញ្ជូនមីស៊ីល បាញ់ចម្ងាយឆ្ងាយ ទៅជួយដល់ក្រុងកៀវ ហើយសកម្មភាពបែបនេះ កំពុងតែធ្វើឲ្យក្រុងមូស្គូខឹងសម្បាយ៉ាងខ្លាំង ជាមួយនឹងការគំរាមកំហែងឆ្លើយតប ប្រឆាំងនឹងក្រុងឡុងដ៍វិញ។

សារព័ត៌មានរបស់អង់គ្លេស Sky News បានផ្សាយ កាលពីថ្ងៃព្រហស្បតិ៍ ថា ចក្រភពអង់គ្លេស កាលពីថ្ងៃព្រហស្បតិ៍ បានប្រកាស អំពីការបញ្ជូនមីស៊ីលបាញ់ចម្ងាយឆ្ងាយ ប្រភេទ Storm Shadows (ស្តម សែដដូ) ទៅកាន់ប្រទេសអ៊ុយក្រែន។ សកម្មភាពរបស់ក្រុងឡុងដ៍ កំពុងតែធ្វើឲ្យវិមានក្រឹមឡាំង ព្រមាន អំពីការឆ្លើយតប និង សងសឹកវិញ។

លោក ស៊ាន បែល (Sean Bell) ជាអ្នកវិភាគយោធា បានបញ្ជាក់ ថា អាវុធប្រភេទនេះ មានតម្លៃ ប្រហែល២លានផោន (លុយរបស់អង់គ្លេស) ឬស្មើនឹងប្រហែលជា ២,៥២លានដុល្លារ នៅក្នុង១ដើមៗ។ ប៉ុន្ដែមីស៊ីលទាំងនេះ នឹងត្រូវបញ្ជូនចេញញពីឃ្លាំងស្ដុកទុកចោល ផ្ទេរទៅកាន់ប្រទេសអ៊ុយក្រែន។

អ្នកវិភាគយោធា ដដែលនេះ បានបន្ថែម ថា «ចក្រភពអង់គ្លេស បានទិញមីស៊ីល Storm Shadow ចំនួន ១ ០០០ដើម ហើយបានប្រើប្រាស់អស់ ប្រហែលតែ ៩៨ដើម។ ជាការពិតណាស់ មីស៊ីលទាំងនេះ មានអាយុកាល២៥ឆ្នាំមកហើយ។ ដូច្នេះចក្រភពអង់គ្លេស កំពុងស្វះស្វែង ធ្វើឲ្យកាន់តែទំនើបជាងនេះបន្ថែមទៀត ប៉ុន្ដែគ្រាន់តែមិនបានធ្វើទាំង៩០២ដើមនោះទេ។ យើងពិតជាមានបន្ទុកមួយ សម្រាប់ការបោះចោល ឬ ប្រើប្រាស់មីស៊ីលទាំងនេះ»។

លោក បែន វ៉ាល់ឡេស (Ben Wallace) រដ្ឋមន្រ្ដី ក្រសួងការពារជាតិចក្រភពអង់គ្លេស បានបញ្ជាក់ ថា រដ្ឋាភិបាលក្រុងឡុងដ៍ នឹងបញ្ជូនមីស៊ីលបាញ់ចម្ងាយឆ្ងាយ ទៅកាន់ប្រទេសអ៊ុយក្រែន ព្រោះក្រុងកៀវ កំពុងតែអំពាវនាវ ស្នើសុំអាវុធប្រភេទនេះ។ ប៉ុន្ដែសហរដ្ឋអាមេរិក និង បណ្ដាប្រទេសដទៃទៀត នឹងមិនមានចេតនា ផ្គត់ផ្គង់អាវុធបែបនេះ ដោយសារតែមានការព្រួយបារម្ភ ពីការវាយប្រហារ ចូលទៅលើទឹកដីរបស់រុស្ស៊ី នាំឲ្យកើតជម្លោះ កាន់តែរីករាលដាល់ធំឡើង បន្ថែមទៀត។

ការប្រកាសរបស់ចក្រភពអង់គ្លេស បានកើតឡើង ក្រោយពេលសហរដ្ឋអាមេរិក កាលពីថ្ងៃអង្គារ (វេលានៅក្នុងរដ្ឋធានីវ៉ាស៊ីនតោន) បានប្រកាសជាផ្លូវការ អំពីកញ្ចប់ជំនួយយោធាថ្មី មានទំហំទឹកប្រាក់ ១ ២០០លានដុល្លារ សម្រាប់ប្រទេសអ៊ុយក្រែន។ ជំនួយមានទឹកប្រាក់ដ៏មហាសាលនោះ បានរាប់បញ្ចូលទាំងប្រព័ន្ធការពារដែនអាកាស គ្រាប់កាំភ្លើងធំ និង មីស៊ីលប្រឆាំងនឹងដ្រូន សេវារូបភាពផ្កាយរណប រួមទាំងមូលនិធិបណ្ដុះបណ្ដាលដល់យោធាផងដែរ។

ក្រសួងការពារជាតិអាមេរិក បានបញ្ជាក់ ថា «ទាហានរុស្ស៉ី បានបាញ់មីស៊ីល មកលើអ៊ុយក្រែន ខណៈកងទ័ពរបស់ប្រទេសនេះកំពុងតែសម្របខ្លួន បាញ់ទម្លាក់មីស៊ីលទាំងនោះ…។ ចំណែកកញ្ចប់ជំនួយយោធាថ្មីនេះ ក៏នឹងមានបញ្ចូលនូវមីស៊ីលបាញ់ទម្លាក់យន្ដហោះដ្រូនផងដែរ»៕