មន្ត្រីប៉ូលិសក្នុងរដ្ឋ Assam របស់ឥណ្ឌាត្រូវបានស្នើសុំឱ្យប៉ូលីសក្នុងតំបន់បញ្ចុះទម្ងន់ជាចាំបាច់ក្នុងរយៈពេល៣ខែចំពោះមន្រ្តីណាដែលកំពុងដុះក្បាលពោះធំ និងលើសទម្ងន់ខ្លាំង ជៀសវាងបាត់បង់តំណែង។ ខណៈកាលពីប៉ុន្មានសប្តាហ៍មុនប៉ូលិសប្រមាណ៣០០នាក់នៅតំបន់នេះនឹងចូលនិវត្តន៍មុនកំណត់ព្រោះពួកគេជា «អ្នកផឹកស្រា» និងមាន«រូបកាយមិនសមរម្យ»។ នេះបើយោងតាមការចុះផ្សាយរបស់សារព័ត៌មាន BBC នៅថ្ងៃទី១៦ ខែឧសភា ឆ្នាំ២០២៣នេះ។

មន្ត្រីប៉ូលីសរដ្ឋកំពូលមួយរូបបាននិយាយ មន្រ្តីទាំងអស់នឹងត្រូវបាន កំណត់ស្តង់ដារាងកាយចាប់ពីពាក់កណ្តាលខែសីហា ចំពោះមន្ត្រីណាដែលមានរូបរាង “ធាត់” នឹងទុកពេលវេលាដល់ខែវិច្ឆិកា ដើម្បីសម្រកទម្ងន់ ឬអាចចូលនិវត្តន៍ដោយស្ម័គ្រចិត្ត។ ចំណែកមន្ត្រីដែលមានលក្ខខណ្ឌស្របតាមវេជ្ជសាស្រ្តនឹងត្រូវបានលើកលែង។

ប្រមុខរដ្ឋ Assam បាននិយាយទៀតថា កាលពីប៉ុន្មានសប្តាហ៍មុន បុគ្គលិកប៉ូលិសប្រហែល ៣០០នាក់នៅក្នុងរដ្ឋ នឹងត្រូវបានស្នើសុំឱ្យចូលនិវត្តន៍មុនកាលកំណត់ ដោយសារតែពួកគេជា “អ្នកផឹកស្រា” និង “រាងកាយមិនសមរម្យ” ។ លោកបាននិយាយថា ការធ្វើបែបនេះ វាជាផ្នែកមួយនៃសមយុទ្ធមួយដើម្បី «កាត់ឈើងាប់ចេញពីកម្លាំងប៉ូលិស»។

គួរបញ្ជាក់ផងដែរថា ក្នុងឆ្នាំ ២០១៨ មន្រ្តីប៉ូលីសបម្រុងនៅក្នុងរដ្ឋ Karnataka ក៏ត្រូវបានស្នើសុំឱ្យបញ្ចុះទម្ងន់ ឬប្រឈមមុខនឹងការព្យួរការងារផងដែរ។ ការធ្វើបែបនេះដោយសារតែមន្ត្រីជាច្រើនបានស្លាប់ដោយសារ “ជំងឺធាត់” ដូចជាបញ្ហាបេះដូង និងជំងឺទឹកនោមផ្អែមក្នុងរយៈពេល ១៨ ខែកន្លងមកនេះ៕

ប្រទេសថៃ ៖ សារព័ត៌មាន Bloomberg បានវិភាគពីលទ្ធផលការបោះឆ្នោតនៅប្រទេសថៃហើយបញ្ជាក់ថា គណបក្សកាវក្លៃអាចទទួលជ័យជម្នះក្នុងការបោះឆ្នោតបាន ដោយសារតែគណបក្សនេះប្រើយុទ្ធសាស្ត្ររកសំឡេងឆ្នោតតាមបណ្តាញសង្គម TikTok ។ បើទោះជាពេលជាមួយគ្នានេះ គណបក្សនយោបាយធំៗផ្សេងទៀតក៏បានប្រើប្រាស់បណ្តាញសង្គមដើម្បីទំនាក់ទំនងជាមួយអ្នកបោះឆ្នោតឱ្យពួកគេក្តី ប៉ុន្តែគណបក្សកាវក្លៃអាចធ្វើបានយ៉ាងមានប្រសិទ្ធភាព ពោរពេញដោយគំនិតច្នៃប្រឌិត និងអាចទាក់ទាញអ្នកមានសិទ្ធិបោះឆ្នោតជាយុវវ័យ (New Voters) ឱ្យតាមដានគណបក្សកាវក្លៃក្នុងបណ្តាញសង្គម ហើយបោះឆ្នោតគាំទ្រ ។

ទោះយ៉ាងណា គណបក្សកាវក្លៃ ក៏មិនបានបោះបង់យុទ្ធនាការឃោសនាបោះឆ្នោតដែលធ្លាប់ធ្វើទេ ដូចជា ការបិទ poster នៅតាមផ្លូវ ឬការដើររកសំឡេងឆ្នោតតាមរយៈការគោះទ្វារផ្ទះពលរដ្ឋតាមភូមិ ប៉ុន្តែគណបក្សនេះបានឃោសនាបោះឆ្នោតតាមបណ្តាញសង្គមជាប្រចាំ ជាពិសេស TikTok បានធ្វើឱ្យសំឡេងឈ្នះឆ្នោតក្នុងអនឡាញក្លាយជាសំឡេងឈ្នះឆ្នោតពិតប្រាកដបាន ។ ដូច្នេះ បញ្ជាក់ឱ្យឃើញថា គណបក្សកាវក្លៃបានឃោសនាបោះឆ្នោតតាមអនឡាញល្អជាងគណបក្សផ្សេងទៀត ។

សារព័ត៌មាន Bloomberg ចង្អុលបង្ហាញថា នេះមិនមែនជាលើកដំបូងទេ ដែលបណ្តាញសង្គមដើរតួនាទីសំខាន់ក្នុងការបោះឆ្នោត ប្រទេសជិតខាងដូចជា ម៉ាឡេស៊ី ក៏បានប្រើបណ្តាញសង្គមដូចគ្នាដែរ ក្នុងនោះគណបក្សឥស្លាមម៉ាឡេស៊ីបានប្រើបណ្តាញសង្គមដើម្បីរកសំឡេងឆ្នោត រហូតដល់គណបក្សនេះអាចរកអាសនៈក្នុងសភាបានច្រើនបំផុតក្នុងការបោះឆ្នោតនៅខែវិច្ឆិកា ឆ្នាំ២០២២ ។ ចំណែកប្រទេសហ្វីលីពីន លោក Ferdinand Marcor Jr. បានឈ្នះឆ្នោតជាប្រធានាធិបតី ខណៈលោកទទួលបានសំឡេងដល់៣១លានសំឡេង ដោយសារលោករកសំឡេងឆ្នោតតាម TikTok និង YouTube ។

ចំណែកស្ថិតិក្នុងបណ្តាញសង្គមរបស់គណបក្សកាវក្លៃឃើញថា ពេលជិតដល់ថ្ងៃបោះឆ្នោត គណបក្សនេះមានអ្នកតាមដានកាន់តែច្រើន ។ បញ្ជី TikTok របស់គណបក្សនេះបានកើនឡើងពី៤០ម៉ឺន ដល់២៨០ម៉ឺននាក់ត្រឹមតែរយៈពេល១ខែ ។ ក្រៅពីនេះ នៅមុនថ្ងៃបោះឆ្នោតមិនយូរប៉ុន្មាន មានអ្នកតាមដានបញ្ជី Twitter របស់បេក្ខជននាយករដ្ឋមន្ត្រី គឺលោក Pita Limjaroenrat ដល់ទៅ១លាននាក់ ។

លើសពីនេះ មិនមែនមានតែគណបក្សនយោបាយ និងបេក្ខជននាយករដ្ឋមន្ត្រីនោះទេ ដែលទទួលបានសំឡេងគាំទ្រច្រើនដោយសារការប្រើប្រាស់បណ្តាញសង្គម ប៉ុន្តែបេក្ខជនតំណាងរាស្ត្រដូចជា អ្នកនាង Rakchanok Srinok ក៏ទទួលបានការចាប់អារម្មណ៍ដូចគ្នាដែរ ខណៈវិធីរកសំឡេងឆ្នោតរបស់នាងដែលគេបានស្គាល់ជាច្រើន គឺការប្រើកង់ធ្វើជាយានជំនិះរកសំឡេងឆ្នោត ព្រមទាំងមានផ្ទាំងឃោសនាជាប់ខ្លួនផង ។

មន្ត្រីមកពី ISEAS Yusof-Ishak Institute ជាស្ថាប័នសិក្សាឯករាជ្យនៅប្រទេសសិង្ហបុរីលើកឡើងថា ការប្រើបណ្តាញសង្គម គឺជាវិធីសាស្ត្រថ្មីប្លែកសម្រាប់នយោបាយនៅប្រទេសថៃ ហើយគណបក្សកាវក្លៃអាចប្រើបណ្តាញសង្គមដើម្បីទំនាក់ទំនងយ៉ាងមានប្រសិទ្ធភាព ខណៈគណបក្សនេះអាចទាក់ទងផ្ទាល់ទៅកាន់អ្នកគាំទ្រខ្លួន ។ ជាក់ស្តែង គណបក្សនេះអាចប្រមូលសំឡេងឆ្នោតពីក្រុងបាងកក រហូតដល់៣២អាសនៈពីទាំងអស់ចំនួន៣៣អាសនៈ ។ រីឯ១អាសនៈទៀតបានទៅអ្នកនាង Teerarat Samretwanit មកពីគណបក្សភឿថៃ ដែលបានប្រើបណ្តាញសង្គមដើម្បីទំនាក់ទំនងជាមួយអ្នកគាំទ្រដូចគ្នា ។

ហេតុនេះ ពួកគេបានប្រើប្រាស់បណ្តាញសង្គមធ្វើជាស្ពានតភ្ជាប់រវាងសង្គមខាងក្រៅជាមួយសភាតំណាងរាស្ត្រ ហើយគ្មានគណបក្សណាផ្សេងដែលអាចធ្វើដូចគណបក្សកាវក្លៃទេ ៕ ប្រភព ៖ Bangkok biznews

បារី គឺជាសារធាតុញៀនស្របច្បាប់មួយប្រភេទ ដែលត្រូវបានគេដាក់ចូលក្នុងចរាចរណ៏ទីផ្សារទូទាំងពិភពលោក។ តាំងពីចុងរហូតដល់កន្ទុយ បារីត្រូវបានផ្ទុកនូវសារធាតុគីមីផ្សេងៗគ្នាជាច្រើនប្រភេទ ដែលធ្វើឱ្យប៉ះពា់ដល់សុខភាពរបស់មនុស្ស។ ដូច្នេះហើយតើប្រទេសណាខ្លះដែលមានយុវជន ជក់បារីច្រើនជាងគេ?

១. មីយ៉ាន់ម៉ា (Myanmar) ៖ ប្រទេសនេះមានចំនួន ៤៤.១% នៃប្រជាជនដែលជក់បារីច្រើនជាងគេបំផុតក្នុងឆ្នាំ ២០២៣ ។
២.ទីម័រខាងកើត (East Timor) ៖ មានចំនួន ៣៩.២% នៃប្រជាជនដែលជក់បារីច្រើនជាងគេ បន្ទាប់ពីមីយ៉ាន់ម៉ា។
៣.ឥណ្ឌូនេស៊ី (Indonesia) ៖ មានយុវជនចំនួន ៣៧.៦% នៃប្រជាជនដែលជក់បារីច្រើនជាងគេ។
៤.ឡាវ (Laos) ៖ យុវជននៃប្រទេសឡាវ មានអត្រាជក់បារីប្រមាណ ៣១.៨% ។
៥.វៀតណាម (Vietnam) ៖ វៀតណាមគឺជាប្រទេសមួយដែលមានប្រជាជនជក់បារីប្រមាណ ២៤.៨%។
៦.ហ្វីលីពីន (Philippines) ៖ មានយុវជនចំនួន ២២.៩% នៃប្រជាជនដែលជក់បារីច្រើនជាងគេ។
៧.ម៉ាឡេស៊ី (Malaysia) ៖ យុវជននៃប្រទេសម៉ាឡេស៊ី មានអត្រាជក់បារីប្រមាណ ២២.៥% ។
៨.ថៃ (Thailand) ៖ ថៃគឺជាប្រទេសមួយដែលមានប្រជាជនជក់បារីប្រមាណ ២២.១%។
៩.កម្ពុជា (Cambodia) ៖ ប្រជាជននៃប្រទេសកម្ពុជា មានអត្រានៃការជក់បារីប្រមាណ ២១.១%។
១០.សិង្ហបុរី (Singapore) ៖ សិង្ហបុរីគឺជាប្រទេសមួយដែលមានប្រជាជនជក់បារីប្រមាណ ១៦.៥%។
១១.ព្រុយណេ (Brunei) ៖ ព្រុយណេគឺជាប្រទេសមួយដែលមានប្រជាជនជក់បារីតិចជាងគេក្នុងតំបន់អាស៊ាន ប្រមាណត្រឹមតែ ១៦.១% តែប៉ុណ្ណោះ៕

ឥណ្ឌូនេស៊ី បាន​ធ្វើ​ពិធី​ដង្ហែរ​មេដាយ​មាស ស៊ីហ្គេម ក្រោយ​ពេល​ ក្រុម​ជម្រើសជាតិឥណ្ឌូនេស៊ី អាយុក្រោម២២ឆ្នាំ បានក្លាយជាម្ចាស់មេដាយមាស វិញ្ញាសាបាល់ទាត់បុរស នៃព្រឹត្តិការណ៍ស៊ីហ្គេម លើកទី៣២ ឆ្នាំ២០២៣ ក្រោយយកឈ្នះថៃ ក្នុងលទ្ធផល ៥-២

ពិធី​ដង្ហែរ​ស្វាគមន៍ ក្រុមបាល់ទាត់​បុរស​ជម្រើសជាតិឥណ្ឌូនេស៊ី ក្រោយដណ្តើម មេដាយមាស​ស៊ីហ្គេម លើកទី៣២ នៅកម្ពុជា អស់រយៈពេល ៣២ឆ្នាំ។ ពិធីដង្ហែរ​នេះ បានធ្វើដំណើរកំសាន្តក្នុង​ទីក្រុងហ្សាកាតា ដោយ​ចាប់ផ្តើមនៅម៉ោង ០៨:០០ព្រឹក ចេញ​ពីអាគារ Kemenpora និងបញ្ចប់​នៅ ពហុកីឡដ្ឋាន Gelora Bung Karno។

សូមបញ្ជាក់ផងដែរថា នេះគឺជាមេដាយមាសលើកដំបូងរបស់ U-22 ឥណ្ឌូនេស៊ី វិញ្ញាសាបាល់ទាត់បុរស ក្រោយខកខានឈ្នះតាំងពីឆ្នាំ ១៩៩១ មកម្ល៉េះ ពោល​គឺត្រូវរង់​ចាំអស់​រយ:ពេល​៣២ឆ្នាំ​ទើប​បាន​សម្រេច និងជាលើកទី៣ (១៩៨៧, ១៩៩១ និង ២០២៣) ប្រចាំប្រវត្តិសាស្រ្តរបស់ពួកគេ៕

ពលរដ្ឋជាច្រើននាក់ដែលធ្លាប់សម្រាកព្យាបាល នៅមន្ទីរសម្រាកព្យាបាល «មិត្តភាពមណ្ឌលនៃក្តីសង្ឃឹម» ហៅកាត់ថាមន្ទីរពេទ្យ Hope បានស្នើដល់ក្រសួងសុខាភិបាលរកចំណាត់ការផ្សេងក្រៅពីបិទមន្ទីរសម្រាកព្យាបាលនេះ។ ក្នុងនោះ ពលរដ្ឋក៏បានអះអាងថា មន្ទីរពេទ្យខាងលើនេះបានជួយសង្រ្គោះអាយុជីវិតប្រជាជនជាច្រើននាក់។

កាលពីថ្ងៃទី១២ ខែឧសភា ឆ្នាំ២០២៣ ក្រសួងសុខាភិបាលនៃព្រះរាជាណាចក្រកម្ពុជាបានសម្រេចបិទមន្ទីរសម្រាកព្យាបាលឯកជនចំនួន ៣កន្លែង នៅរាជធានីភ្នំពេញ រួមមាន មន្ទីរសម្រាកព្យាបាល មិត្តភាពមណ្ឌលនៃក្តីសង្ឃឹម , មន្ទីរសម្រាកព្យាបាល មិត្តភាពចតុមុខ និង មន្ទីរសម្រាកព្យាបាល មិត្តភាពពោធិ៍ចិនតុង។ ការសម្រេចចិត្តបិទនេះក្រសួងបានបញ្ជាក់ថាមូលហេតុថា មន្ទីរសំរាកព្យាបាលទាំង៣នេះពុំមានវេជ្ជបណ្ឌិត ឈរឈ្មោះជាអ្នកទទួលខុសត្រូវ និងអវត្ដមានប្រចាំការនៅក្នុងមន្ទីរសំរាកព្យាបាល ព្រមទាំងមិនបានផ្ញើរបាយការណ៍អំពី សកម្មភាពព្យាបាលអ្នកជំងឺជាប្រចាំមកនាយកដ្ឋានជំនាញនៃក្រសួងសុខាភិបាល ដែលជាការមិនអនុវត្តតាមច្បាប់ស្តីពីការ គ្រប់គ្រងលើការប្រកបវិជ្ជាជីវៈឯកជនក្នុងវិស័យវេជ្ជសាស្ត្រ អមវេជ្ជសាស្ត្រ និងជំនួយវេជ្ជសាស្ត្រ។

ការសម្រេចចិត្តរបស់ក្រសួងសុខាភិបាលក្នុងការបិទ មន្ទីរសម្រាកព្យាបាល មិត្តភាពមណ្ឌលនៃក្តីសង្ឃឹម ពលរដ្ឋជាច្រើនដែលមានគ្រួសារនិងធ្លាប់សម្រាកព្យាបាលនៅមន្ទីរពេទ្យនេះ បានស្នើដល់ក្រសួងមានចំណាត់ការផ្សេងក្រៅពីបិទមន្ទីរពេទ្យនេះ។

ពលរដ្ឋ បានលើកឡើងស្រដៀងៗគ្នាថា «មន្ទីរពេទ្យ Hope ទាំងគ្រូពេទ្យ ទាំងបុគ្គលិក ទាំងសេវាកម្មគឺល្អណាស់ ធ្លាប់ព្យាបាលប្រជាពលរដ្ឋជាច្រើនឱ្យជាសះស្បើយ ព្រមទាំងមានតម្លៃសមរម្យ អាចឱ្យអ្នកមកតាមពីបណ្តាខេត្តសម្រាកព្យាបាលបាន។ ជាមួយគ្នានេះ ពលរដ្ឋក៏បានស្នើដល់ក្រសួងសុខាភិបាលអាចរកចំណាត់ការផ្សេងទៅលើមន្ទីរពេទ្យនេះជាមួយគុណសម្បត្តិដែលធ្លាប់ជួយសង្គ្រោះអាយុជីវិតប្រជាជននាពេលកន្លងមក ជៀសវាងការបិទមន្ទីរពេទ្យនេះមិនឱ្យដំណើរការ»៕

លោក Elon Musk ជាមហាសេដ្ឋី និង CEO របស់ក្រុមហ៊ុន Tesla បានលើកឡើងថា លោកបារម្ភពីការងារកូនៗរបស់លោកទាំង៨នាក់នាថ្ងៃអនាគត ដែលអាចប្រឈមនឹងការប្រកួតប្រជែងពីបញ្ញាសិប្បនិម្មិត (AI) ហើយវានឹងធ្វើឱ្យទីផ្សារការងារផ្លាស់ប្តូរនៅលើពិភពលោក ។ លោកបាននិយាយទៅកាន់សារព័ត៌មាន CNBC កាលពីថ្ងៃទី១៦ ខែឧសភា កន្លងមកថា ៖ «តើយើងនឹងរកតម្លៃខ្លួនយើងដោយរបៀបណា ហើយយើងនឹងស្វែងរកអត្ថន័យជីវិតរបៀបណា បើ AI អាចបំពេញការងាររបស់យើងបានល្អជាងយើងធ្វើទៅទៀត» ។

លោកបន្តថា ខ្លួនលោកក៏មិនទាន់ប្រាកដចិត្តថា តើមនុស្សជំនាន់ក្រោយនឹងកាន់តែពិបាករកតម្លៃឱ្យខ្លួនឯងដែរឬអត់ ? ខណៈនៅលើពិភពលោកនេះ បច្ចេកវិទ្យា AI អាចធ្វើការងារបានទាំងអស់ជំនួសមនុស្ស ។ ទោះយ៉ាងណា ពាក្យណែនាំដែលលោក Elon Musk ចង់ណែនាំទៅកាន់កូនៗរបស់លោកនោះ គឺព្យាយាមធ្វើប្រយោជន៍ដល់សង្គមឱ្យបានច្រើនបំផុត និងពិនិត្យឡើងវិញនូវភាពសំខាន់នៃតុល្យភាពរវាងជីវិត និងការងារ ។

CEO ដ៏ល្បីឈ្មោះរបស់ក្រុមហ៊ុន Tesla បន្ថែមថា ពាក្យណែនាំដំបូងរបស់លោកមិនមែនជារឿងថ្មីប្លែកទេ ព្រោះលោកគិតថា មនុស្សចាំបាច់ត្រូវស្វែងរកអ្វីដែលខ្លួនស្រឡាញ់ និងចាប់អារម្មណ៍ ហើយព្យាយាមធ្វើរឿងនោះឱ្យកើតជាប្រយោជន៍ដល់សង្គមឱ្យច្រើនបំផុត ។

ចំណែកពាក្យណែនាំទី២ លោក Elon Musk បង្ហាញថា បច្ចុប្បន្ន លោកបានប្រើពេលវេលា៦ម៉ោងក្នុង១ថ្ងៃលើការគេង និងធ្វើការ៧ថ្ងៃក្នុង១សប្តាហ៍ ហើយលោកគ្មានថ្ងៃឈប់សម្រាកទេ ។ លោកបន្តថា ក្នុង១ឆ្នាំ លោកឈប់សម្រាកពីការងារពី២ ទៅ៣ថ្ងៃប៉ុណ្ណោះ ដូច្នេះ ការធ្វើការបែបនេះធ្វើឱ្យលោកសួរមកកាន់ខ្លួនឯងថា តើវាសមដែរឬទេ ? ខណៈមានការងារជាច្រើនដែលលោកអាចប្រើប្រាស់ AI ឱ្យធ្វើជំនួសបាន ។

លោកលើកឡើងថា ៖ «ខ្ញុំធ្វើការទាំងថ្ងៃទាំងយប់ ដើម្បីបង្កើតក្រុមហ៊ុនផ្សេងៗឡើងមក ។ ប៉ុន្តែខ្ញុំក៏សួរខ្លួនឯងដូចគ្នាថា តើវាត្រឹមត្រូវដែរឬទេ ដែលខ្ញុំត្រូវធ្វើការងារ ហើយលះបង់ពេលវេលាជាមួយមិត្តភក្តិ និងគ្រួសារ ខណៈ AI អាចធ្វើការជាច្រើនជំនួសខ្ញុំបាន ហើយខ្ញុំក៏មិនប្រាកដចិត្តខ្លួនឯងដែរ» ។

បច្ចុប្បន្ន លោក Elon Musk ក៏មានតួនាទីជានាយកគ្រប់គ្រងជាន់ខ្ពស់ក្នុងក្រុមហ៊ុនជាច្រើនទៀត ដូចជា Tesla, SpaceX, Twitter, Neuralink និង The Boring Company ។ ដូច្នេះ វាគ្មានអី្វចម្លែកទេ ដែលលោកត្រូវធ្វើការរហូតស្ទើរគ្មានពេលឈប់សម្រាក ។

សាស្ត្រាចារ្យផ្នែកហិរញ្ញវត្ថុមកពី Northwestern University’s Kellogg School of Management បានវិភាគថា ពិភពលោកនាថ្ងៃអនាគត ការងារផ្នែករដ្ឋបាល និងការងារក្នុងការិយាល័យនឹងប្រឈមខ្លាំង ដោយសារគេអាចយក AI មកធ្វើការជំនួសមនុស្ស រីឯការងារផ្នែកឌីសាញ និង software engineer ក៏ប្រឈមដូចគ្នាដែរ ។ លើសពីនេះ បើទោះជាការងារត្រូវប្រើប្រាស់ជំនាញមនុស្សជាចម្បង ដូចជា អ្នកព្យាបាលជំងឺផ្លូវចិត្ត, ការងារសំណង់ និងការងារទំនាក់ទំនង ក៏ត្រូវបានគេយក AI មកជួយធ្វើការក្នុងផ្នែកទាំងនេះផងដែរ ៕ ប្រភព ៖ The standard wealth

ប្រទេសថៃ ៖ កាលពីថ្ងៃទី១៨ ខែឧសភា លោក Pita Limjaroenrat មេដឹកនាំគណបក្សកាវក្លៃ និងជាអនាគតនាយករដ្ឋមន្ត្រីទី៣០ របស់ប្រទេសថៃ បានឡើងជិះរថយន្តហែរក្បួនដើម្បីអរគុណដល់ពលរដ្ឋនៅខេត្តណុនថៈបុរី ដែលបានបោះឆ្នោតគាំទ្រគណបក្សលោក ។ គេសង្កេតឃើញមានសិស្ស-និស្សិត ពលរដ្ឋ និងអ្នកគាំទ្រគណបក្សកាវក្លៃជាច្រើននាក់បានមករង់ចាំផ្តល់កម្លាំងចិត្ត និងគាំទ្រការដង្ហែក្បួនរថយន្តរបស់មេដឹកនាំគណបក្សនេះ ។

លោក Pita Limjaroenrat មេដឹកនាំគណបក្សកាវក្លៃបានណែនាំខ្លួនទៅកាន់ពលរដ្ឋថា លោកនឹងធ្វើជានាយករដ្ឋមន្ត្រីប្រទេសថៃ ហើយក៏សូមអរគុណរាល់ការបោះឆ្នោតគាំទ្រពីពលរដ្ឋ និងការផ្តល់ទំនុកចិត្តដល់គណបក្សកាវក្លៃឱ្យដឹកនាំប្រទេសថៃបន្តពីរដ្ឋាភិបាលយោធា ។ លោកបន្តថា លោកនឹងមិនធ្វើឱ្យពលរដ្ឋទាំងអស់ខកចិត្តដាច់ខាត ហើយលោកនឹងមិនឈប់ធ្វើការទេ ប៉ុន្តែលោកនឹងតាំងចិត្តធ្វើការឱ្យអស់ពីសមត្ថភាព ។

លោក Pita Limjaroenrat បន្តថា លោកសប្បាយចិត្តណាស់ដែលពលរដ្ឋមិនភ្លេចគ្នា ហើយលោកបញ្ជាក់ថា មុនពេលបោះឆ្នោត លោកបានសន្យាបែបណា គឺក្រោយបោះឆ្នោត លោកត្រូវតែធ្វើបែបនោះ ។ លើសពីនេះ លោកនឹងមានទំនាក់ទំនងជាប់ជានិច្ចជាមួយពលរដ្ឋ ដើម្បីឱ្យដឹងពីការងាររបស់រដ្ឋាភិបាលធ្វើដល់ណាហើយ និងអរគុណដល់អ្នកទាំងអស់គ្នាដែលមកទទួលស្វាគមន៍លោកយ៉ាងកក់ក្តៅ ។

មេដឹកនាំគណបក្សកាវក្លៃបន្ថែមថា លោកនឹងព្យាយាមចុះតាមតំបន់ទាំងអស់ ប៉ុន្តែក៏អាស្រ័យលើពេលវេលាធ្វើការរបស់លោកផងដែរ ហើយលោកមិនទាន់បានចុះទៅខេត្តឆ្ងាយៗទេ ។ ទោះយ៉ាងណា គណបក្សកាវក្លៃបានបញ្ជាក់ពីគោលជំហររបស់ខ្លួនទៅកាន់ពលរដ្ឋថា គណបក្សត្រូវតែធ្វើវិសោធនកម្មច្បាប់ព្រហ្មទណ្ឌ មាត្រា១១២ បើទោះជាមានបញ្ហាមួយចំនួន ហើយគណបក្សខ្លះមិនឯកភាពក៏ដោយ ។

ចំណែកការធ្វើកិច្ចព្រមព្រៀងរួមគ្នាជាមួយគណបក្សផ្សេងៗ (MOU) លោក Pita Limjaroenrat បញ្ជាក់ថា លោកកំពុងធ្វើការយ៉ាងលម្អិត និងផ្តោតលើនយោបាយល្អ ជីវភាពរស់នៅល្អប្រសើរ និងមានអនាគត ។ រីឯការជជែកជាមួយគណបក្សនយោបាយផ្សេងៗ គណបក្សកាវក្លៃបានប្រគល់តួនាទីឱ្យកញ្ញា Sirikanya Tansakul អនុប្រធានគណបក្សកាវក្លៃ គឺជាអ្នកទំនាក់ទំនង និងទទួលមតិពីគណបក្សផ្សេងៗដើម្បីឱ្យការគ្រប់គ្រងជាក្រុមមានប្រសិទ្ធភាព ៕

ប្រភព ៖ News show