ផលិតកម្ម LD Entertainment បានប្រកាសជាផ្លូវការថា ពេជ្រ វត្តីសារ៉ាវឌ្ឍី លំដាប់រងទី៥ Miss Grand International នឹងសម្តែងរួមគ្នាជាមួយតារាប្រុសមីយ៉ាន់ម៉ា Paing Takhon នៅក្នុងខ្សែភាពយន្តមានចំណងជើងថា «ប្រុសល.ក់ខ្លួន» មិនត្រឹមតែប៉ុណ្ណោះតួឯកល្បីឈ្មោះកម្ពុជា លោក ខាត់ វៃហាំង ក៏មានវត្តមានក្នុងខ្សែភាពយន្តនេះដែរ។
កាលពីកន្លងមកនេះ តារាប្រុសដ៏ល្បីរបស់មីយ់ាន់ម៉ា គឺលោក Paing Takhon មានវត្តមាននៅលើទឹកដីកម្ពុជា តាមការអញ្ជើញរបស់ លោក លៀក លីដា ម្ចាស់ផលិតកម្ម LD Picture រួមទាំងតារាជាច្រើនរូបបានបង្ហាញភាពកក់ក្តៅយ៉ាងខ្លាំងដល់តារាប្រុសរូបនេះ។ មិនត្រឹមតែប៉ុណ្ណោះ អ្នកគាំទ្រក៏លួចគិតក្នុងចិត្តថា ការដែលតារាសម្តែង Paing Takhon មកប្រទេសកម្ពុជាប្រាកដជាមានអ្វីពិសេសមិនខាន។
កាន់តែជាក់ច្បាស់នៅល្ងាចថ្ងៃទី១៨ ខែឧសភា LD Entertainment បានបង្ហោះរូបPoster មួយរួមទាំងសំណេរថា «ចេញមកច្បាស់ការហើយ តួឯកស្រីដែលនឹងមកសម្ដែងជាមួយលោក Paing Takhon ដែលជា Miss Grand Cambodia 2022 កញ្ញា Pich Votey Saravody ហើយក្នុងរឿងនេះក៏មានការចូលរួមសម្ដែងដោយលោក Khat Vaihang ដែលជាដៃគូជើងល្អជាមួយលោក Paing Takhon ផងដែរ»។
គួរបញ្ជាក់ថា តារាសម្តែងទាំង៣រូបនឹងត្រូវប៉ះគ្នាយ៉ាងកក្រើកនៅក្នុងរឿង «ប្រុសលក់ខ្លួន» ខណៈ LD ក៏បានឱ្យដឹងទៀតថា លោក Paing Takhon នឹងមកថតរឿងខាងលើនេះនៅថ្ងៃទី២១ ខែឧសភា ឆ្នាំ២០២៣នេះផងដែរ។ មិនត្រឹមតែប៉ុណ្ណោះការប៉ះគ្នារបស់អ្នកទាំងបី កំពុងធ្វើឱ្យមហាជនអ្នកគាំទ្ររំភើប និងភ្ញាក់ផ្អើលយ៉ាងខ្លាំងចង់ទស្សនារឿងនេះឆាប់ៗ៕
