ប្រទេសថៃ ៖ កសិករដាំដំណាំស្វាយនៅខេត្តឧទ័យថានី ប្រទេសថៃ បានបង្ហាញពីក្តីអស់សង្ឃឹម ដោយសារតម្លៃស្វាយបានចុះថោកក្នុងរយៈពេល៣០ឆ្នាំ ហើយពួកគេមានបំណងកាប់ដើមស្វាយចោលទាំងអស់ ដើម្បីត្រៀមដាំដំឡូង និងពោតជំនួសវិញ ។ ពួកគេលើកឡើងថា នៅពេលស្វាយចេញផ្លែមក ឈ្មួញឱ្យតម្លៃថោកពេក ហើយមិនរួចថ្លៃចំណាយលើដើមទុនទេ ។

អ៊ំស្រីម្នាក់ឈ្មោះ អាំផៃ ផុងផានិជ អាយុ៦៣ឆ្នាំ ជាកសិករដាំស្វាយនៅឃុំថុងណាង៉ាម ស្រុកឡានសាក់ ខេត្តឧទ័យថានី បាននិយាយថា អ៊ំស្រីមានចម្ការស្វាយចំនួន១០០រ៉ៃ ហើយនៅឆ្នាំ២០២៣ នេះ តម្លៃស្វាយបានធ្លាក់ចុះខ្លាំងណាស់ គឺនៅសល់ត្រឹមតែពី២បាត ទៅ៥បាតប៉ុណ្ណោះក្នុង១គីឡូក្រាម ។ ដូច្នេះ កសិករដាំស្វាយគ្រប់គ្នាត្រូវខាតបង់ដើមទុនយ៉ាងខ្លាំង ហើយពួកគេមិនអាចជួលកម្មករមកបេះស្វាយយកទៅលក់បានទេ ពីព្រោះមិនរួចថ្លៃជួលកម្មករ ។ ហេតុនេះ ទើបពួកគាត់ទុកស្វាយចោលនៅលើដើមតែម្តងទៅ ។

អ៊ំស្រី អាំផៃ បន្តថា គាត់បានប្រកាសឱ្យអ្នកភូមិមកប្រមូលស្វាយនៅលើដើម និងមិនយកប្រាក់ទេ ប៉ុន្តែគាត់ចាំបាច់ត្រូវជួលកម្មករមកប្រមូលស្វាយដែលជ្រុះនៅក្រោមដើមយកទៅបោះចោល ដើម្បីចៀសវាងការឆ្លងជំងឺផ្សេងៗ បន្ទាប់មក អ៊ំស្រីនឹងកាប់ដើមស្វាយចោលខ្លះៗហើយ ។

ដូចគ្នានេះដែរ អ្នកស្រី រុងរ៉ាឌី ផូណូយ អាយុ៥១ឆ្នាំ និយាយថា ផ្លែស្វាយនៅភូមិនេះល្បីល្បាញណាស់ ព្រោះកាលពីមុននេះ គេបាននាំចេញទៅក្រៅប្រទេស និងទទួលបានប្រាក់ចំណូលរាប់លានបាតក្នុង១ឆ្នាំ ប៉ុន្តែពេលនេះ បើគាត់ទុកដើមស្វាយបន្តទៀតឃើញថា វាគ្មានប្រយោជន៍អ្វីទេ ។ ដូច្នេះ ចាំបាច់ត្រូវកាប់ចោលដើម្បីត្រៀមដាំដំណាំផ្សេងជំនួសវិញ ។

ទោះយ៉ាងណា កសិករដាំស្វាយមួយចំនួនបានប្រមូលយកស្វាយទុំដើមមកកែច្នៃធ្វើជាដំណាប់ស្វាយដើម្បីទុកបានយូរ ប៉ុន្តែពួកគេក៏មិនដឹងថា តើអាចលក់ដាច់ឬអត់ ពីព្រោះក្នុងតំបន់នេះសុទ្ធតែនាំគ្នាដាំស្វាយទាំងអស់ ហើយអ្នកភូមិបានធ្វើដំណាប់ស្វាយគ្រប់គ្នា ៕ ប្រភព ៖ PPTV HD 36

បរទេស៖ ក្រុមហ៊ុន SPACEX របស់សហរដ្ឋអាមេរិក កំពុងធ្វើតេស្តបច្ចេកវិទ្យាដើម្បីជួយពង្រឹងផ្ទៃនៃបន្ទះបាញ់បង្ហោះ Starship ដើម្បីទប់ទល់នឹងថាមពលដ៏ធំសម្បើមនៃការរុញច្រានគ្រាប់រ៉ុក្កែតរបស់ម៉ាស៊ីន Raptor ។
កាលពីថ្ងៃទី ២០ ខែឧសភា បន្ទះបាញ់បង្ហោះដែលមានទីតាំងនៅមូលដ្ឋាន Starbase របស់ SpaceX នៅភាគខាងត្បូងនៃរដ្ឋតិចសាស់ បានរងការខូចខាតយ៉ាងធ្ងន់ធ្ងរក្នុងអំឡុងពេលនៃការហោះហើរសាកល្បងដំបូងរបស់យាន Starship ដែលជារ៉ុក្កែតដ៏មានឥទ្ធិពលបំផុតមិនធ្លាប់មានពីមុនមក។ការហោះហើរសាកល្បងនៅថ្ងៃទី ២០ ខែឧសភា នេះមានបំណងចាប់ផ្តើមដំណាក់កាលខាងលើរបស់ Starship ជុំវិញផែនដី និងចុះចតនៅមហាសមុទ្រប៉ាស៊ីហ្វិក ជិតកោះហាវ៉ៃ។ ទោះជាយ៉ាងណាក៏ដោយ ដំណើរការមិនបានប្រព្រឹត្តទៅដោយរលូនឡើយ។ យានជំនិះពីរជាន់មិនដាច់ពីគ្នាដូចការគ្រោងទុកនោះទេ។
SpaceX កំពុងអភិវឌ្ឍ Starship បន្ថែមទៀត ដើម្បីដឹកអវកាសយានិកទៅឋានព្រះច័ន្ទ និងភពអង្គារ។ NASA ក៏បានជ្រើសរើសយាននេះជាអ្នកចុះចតដំបូងគេដែលនាំមនុស្សទៅឋានព្រះច័ន្ទក្នុងកម្មវិធី Artemis ។

បច្ចុប្បន្ន ក្រុមហ៊ុន SpaceX កំពុងសាងសង់យាន Starship ជាច្រើនគ្រឿងនៅឯរោងចក្រ Starbase របស់ខ្លួន ហើយគ្រោងនឹងដាក់ដំណើរការកំណែបន្ទាប់ក្នុងពេលឆាប់ៗនេះ។ ថ្មីៗនេះលោក Elon Musk បាននិយាយថា ជើងហោះហើររបស់ Starship មួយទៀត អាចប្រព្រឹត្តទៅក្នុងរយៈពេលពីរខែខាងមុខ ប្រសិនបើប្រព័ន្ធការពារដែកបានរួចរាល់ ហើយរដ្ឋបាលអាកាសចរណ៍សហព័ន្ធអាមេរិកផ្តល់ការអនុញ្ញាតសម្រាប់បេសកកម្មនេះ៕ ប្រភព៖vnexpress

គំនូរ គឺជាសិល្បៈមួយប្រភេទដែលចូលរួមបង្ហាញពីវប្បធម៌របស់ជាតិសាសន៍នីមួយៗ គំនូរណាដែលមានតម្លៃខ្ពស់គឺបង្កប់អត្ថន័យជ្រៅ មានអាយុកាលយូរឆ្នាំ ជាគំនូរមានប្រភពនៅតំបន់អឺរ៉ុប ក្រៅពីនោះគឺមានការរចនាបានយ៉ាងស្អាត ឬមិនស្អាត ខណៈគំនូរខ្លះមនុស្សធម្មតាមើលមិនយល់នោះទេ។ ដូច្នេះហើយខាងក្រោមនេះគឺជាគំនូរទាំង ១០ ដែលមានតម្លៃថ្លៃជាងគេលើពិភពលោក៖

១. Salvator Mundi៖ រូបគំនូរព្រះយេស៊ូគ្រិស្ត Salvator Mundi បានដាក់លក់នៅឆ្នាំ ២០១៧ ក្នុងតម្លៃជាង ៤៥០ លានដុល្លា។ វាជាស្នាដៃរបស់វិចិត្រករ Leonardo da Vinci ដែលបានគូរក្នុងឆ្នាំ ១៤៩៩-១៥១០។

២. Interchange៖ គំនូរ Interchange មានតម្លៃ ៣៤៣ លានដុល្លារ ដែលបានដាក់លក់នៅឆ្នាំ ២០១៥ ។ វាជាស្នាដៃរបស់វិចិត្រករ Willem de Kooning ដែលបានគូរក្នុងឆ្នាំ ១៩៥៥ ។

៣. The Card Players៖ គំនូរ The Card Players ឬអ្នកលេងបៀរ មានតម្លៃសរុប៣០១ លានដុល្លារ ក្នុងឆ្នាំ ២០១១។ វាជាស្នាដៃរបស់វិចិត្រករ Paul Cézanne ដែលចំណាយពេលគូរ ១ ឆ្នាំ ចាប់ពីឆ្នាំ ១៨៩២-១៨៩៣ ។

៤. Nafea Faa Ipoipo៖ គំនូរ Nafea Faa Ipoipo មានតម្លៃសរុប ២៤០ លានដុល្លារ ក្នុងឆ្នាំ ២០១៤ ។ វាជាស្នាដៃរបស់វិចិត្រករ Paul Gauguin នៅអំឡុងឆ្នាំ ១៨៩២ ។

៥. Number 17A៖ គំនូរ Number 17A មានតម្លៃសរុប ២២៩ លានដុល្លារ ក្នុងឆ្នាំ២០១៥។ វាជាស្នាដៃរបស់វិចិត្រករ Jackson Pollock នៅអំឡុងឆ្នាំ ១៩៤៨ ។

៦.The Standard-Bearer៖ គំនូរនេះត្រូវបានដាក់លក់ក្នុងឆ្នាំ ២០២២ ដែលមានតម្លៃ ១៩៨ លានដុល្លារ។ វាជាស្នាដៃរបស់វិចិត្រករ Rembrandt នៅអំឡុងឆ្នាំ ១៦៣៦ ។

៧.Shot Sage Blue Marilyn៖ គំនូរ Shot Sage Blue Marilyn មានតម្លៃ ១៩៥ ដុល្លារ។ វាជាស្នាដៃរបស់វិចិត្រករ Andy Warhol ក្នុងឆ្នាំ ២០២២ ។

៨. Violet, Green and Red៖ គំនូរនេះត្រូវបានដាក់លក់ក្នុងឆ្នាំ ២០១៤ ដែលមានតម្លៃ ១៨៦ លានដុល្លារ។ វាជាស្នាដៃរបស់វិចិត្រករ Mark Rothko នៅអំឡុងឆ្នាំ ១៩៥១ ។

៩. Portraits of Maerten Soolmans and Oopjen Coppit៖ រូបគំនូរអាពាហ៍ពិពាហ៍មួយគូរបស់ Marten Soolmans និង Oopjen Coppit ត្រូវបានដាក់លក់ក្នុងតម្លៃ ១៨០ លានដុល្លារ។ វាជាស្នាដៃរបស់វិចិត្រករ Rembrandt van Rijn ដែលបានគូរក្នុងអំឡុងឆ្នាំ ១៦៣៤។

១០. Water Serpents II by Gustav Klimt៖ គំនូរនេះត្រូវបានដាក់លក់ក្នុងឆ្នាំ ២០១៥ ដែលមានតម្លៃ ១៧០ លានដុល្លារ។ វាជាស្នាដៃរបស់វិចិត្រករ Gustav Klimt នៅអំឡុងឆ្នាំ ១៩០៧ ៕

ប្រទេសចិន ៖ បុរសម្នាក់ឈ្មោះ Wang Mo Feng ឬឈ្មោះ Hey Sanqian ជាអាយដលដ៏ល្បីល្បាញម្នាក់នៅក្នុងបណ្តាញសង្គម និងរស់នៅទីក្រុង Lianyungang ខេត្ត Jiangsu ស្ថិតនៅភាគឦសានប្រទេសចិន បានស្លា.ប់បា.ត់ប.ង់ជីវិ.តភ្លាមៗ ក្រោយពីរូបគេផឹកស្រាក្នុងបរិមាណច្រើនហួសកម្រិត ដើម្បីទាក់ទាញចំណាប់អារម្មណ៍ពីអ្នកទស្សនា ។

បើតាមការចុះផ្សាយរបស់សារព័ត៌មានចិនបញ្ជាក់ថា បុរសឈ្មោះ Hey Sanqian បានធ្វើការ Live ផ្ទាល់ កាលពីល្ងាចថ្ងៃទី១៥ ខែឧសភា កន្លងមក ។ ក្នុងការ Live ផ្ទាល់នេះ បុរសខាងលើបានចាក់ស្រាចំនួន៣ដបទៅក្នុងពែងដ៏ធំមួយ ហើយរូបគេក៏លើកពែងស្រានេះផឹករហូតទាល់តែអស់យ៉ាងងាយស្រួល ។ ក្រោយមក រូបគេក៏បានបើកដបស្រាទី៤ និងយកមកផឹកបន្តទៀត ហើយគ្មានអាការៈខុសប្លែកអ្វីឡើយ មិនថាក្អួតចង្អោរ ឬក៏ស្រវឹងបាត់បង់ស្មារតី ។

ប៉ុន្តែនៅព្រឹកថ្ងៃទី១៦ ខែឧសភា គ្មានអ្នកណាម្នាក់អាចទាក់ទង Hey Sanqian បានទេ ។ គេរាយការណ៍ថា មានមនុស្សស្និទ្ធនឹងបុរសនេះជាច្រើននាក់ព្យាយាមទំនាក់ទំនងទៅកាន់បុរសអាយដលរូបនេះ ប៉ុន្តែទាក់ទងមិនបានសោះ ។ ដូច្នេះ ពួកគេក៏បានមកដល់ផ្ទះរបស់បុរសអាយដល ស្រាប់តែប្រទះឃើញរូបគេស្លា.ប់នៅក្នុងបន្ទប់បាត់ទៅហើយ ។

លោក ចាវ ជាម្ចាស់ភោជនីយដ្ឋាន និងជាមិត្តភក្តិរបស់ Hey Sanqian បានធ្វើដំណើរមកចូលរួមពិធីបុណ្យសព កាលពីថ្ងៃទី២០ ខែឧសភា និយាយថា លោកបានបង្ហោះវីដេអូនៅពេលលោកផឹកស៊ី និងហូបអីជុំគ្នាជាមួយ Hey Sanqian ជាញឹកញាប់ ។ លោកថា ៖ «ខ្ញុំមានអារម្មណ៍តក់ស្លុតយ៉ាងខ្លាំងសម្រាប់ការស្លា.ប់របស់មិត្តភក្តិ ហើយខ្ញុំជាមិត្តល្អជាមួយគេ ។ ខ្ញុំមិនគិតថា គេស្លាប់ដោយសារផឹកស្រាសោះ ព្រោះគេជាមនុស្សល្អ និងស្មោះត្រង់ ហើយខ្ញុំបានដឹងដំណឹងថាគេស្លាប់ កាលពីយប់ថ្ងៃទី១៩ ខែឧសភា ។ ដូច្នេះ ខ្ញុំក៏ធ្វើដំណើរមកស្រុកកំណើតដើម្បីជួបគេជាលើកចុងក្រោយ» ។

ចំណែកអ្នកលេងបណ្តាញសង្គមនៅប្រទេសចិននិយាយថា បើយោងតាមច្បាប់ គឺមិនអនុញ្ញាតឱ្យមានការផឹកភេសជ្ជៈមានជាតិអាល់កុលក្នុងអំឡុងពេល Live ផ្ទាល់ទេ ។ កន្លងមក គណនីបណ្តាញសង្គមរបស់ Hey Sanqian ត្រូវគេដាក់កំណត់ក្នុងការប្រើប្រាស់ ដោយសារបានប្រើខុសពីគោលការណ៍ច្បាប់ ប៉ុន្តែទោះមានការដាក់កំណត់ក្តី ប៉ុន្តែ Hey Sanqian បានផ្លាស់ប្តូរគណនី និងផឹកស្រាបន្តទៀត ៕ ប្រភព ៖ khaosod

ប្រទេសថៃ ៖ កាលពីថ្ងៃទី២២ ខែឧសភា នៅសណ្ឋាគារ CONRAD BANGKOK លោក Chuwit Kamolvisit ជាអតីតអ្នកនយោបាយម្នាក់បានធ្វើដំណើរមកចូលរួមសង្កេតការណ៍ការចុះហត្ថលេខាលើកិច្ចព្រមព្រៀងរួមគ្នា (MOU) របស់គណបក្សនយោបាយនានាដើម្បីបង្កើតរដ្ឋាភិបាល ។ លោកបានក្រោកឈរឡើងនិយាយថា ថ្ងៃនេះ (ថ្ងៃទី២២ ខែឧសភា) លោកមកទីនេះក្នុងឋានៈជាពលរដ្ឋម្នាក់ ខណៈកាលពី៩ឆ្នាំមុន លោកជាអ្នកនយោបាយ ហើយពេលមានការធ្វើរដ្ឋប្រហារនៅប្រទេសថៃ គ្មានអ្នកណាឈឺចាប់ដូចលោកទេ ។

លោកបន្តថា ក្នុងនាមលោកជាពលរដ្ឋថៃម្នាក់ លោកសូមគាំទ្រមេដឹកនាំគណបក្សកាវក្លៃ ប៉ុន្តែខ្លាចថា នឹងមានអំណាចផ្សេងទៀតដែលធ្វើឱ្យលោក Pita Limjaroenrat មិនអាចធ្វើជានាយករដ្ឋមន្ត្រីប្រទេសថៃ ។ បើគណបក្សនយោបាយទាំងពីរ គឺគណបក្សកាវក្លៃ និងគណបក្សភឿថៃសហការគ្នា មិនថាក្នុងឋានៈអ្វីទេ ពលរដ្ឋដូចជារូបលោកក៏មិនបាច់រង់ចាំដែរ ។ លោកសូមនិយាយឱ្យច្បាស់ថា នឹងមានអំណាចផ្សេងមករារាំង ហើយធ្វើឱ្យលោក Pita Limjaroenrat មិនអាចបង្កើតរដ្ឋាភិបាលបានទេ ប៉ុន្តែនៅពេលលោកមានគោលជំហរ គឺអំណាចផ្សេងដែលនិយាយនេះជាលក្ខខណ្ឌផ្ទាល់របស់លោកខ្លួនឯង ។

លោក Chuwit Kamolvisit លើកឡើងថា ការចុះហត្ថលេខាលើកិច្ចព្រមព្រៀងរួមគ្នារបស់គណបក្សនយោបាយនានា វាគ្រាន់តែជាការកត់ត្រាឈ្វេងយល់ពីគ្នាប៉ុណ្ណោះ ប៉ុន្តែនៅមិនទាន់ក្លាយជាការពិតទេ ។ លោកសូមឱ្យប្រយ័ត្នចំពោះលក្ខខណ្ឌទាំងពីរនេះ គឺនៅពេលមុន និងក្រោយពេលលោក Pita Limjaroenrat ក្លាយជានាយករដ្ឋមន្ត្រីប្រទេសថៃ ។

លោកបាននិយាយពាក់ព័ន្ធនឹងកញ្ឆាថា រដ្ឋាភិបាលត្រូវដាក់កញ្ឆាឱ្យក្លាយជាថ្នាំញៀនវិញ និងបិទហាងលក់កញ្ឆាទាំងអស់ ។ កន្លងមក ប្រទេសថៃចាត់ទុកថា កញ្ឆាស្ថិតក្នុងផ្នែកវេជ្ជសាស្ត្រ គឺត្រូវឱ្យគ្រូពេទ្យជាអ្នកប្រាប់ ប៉ុន្តែតើឱ្យគ្រូពេទ្យទៅដើរប្រាប់ហាងលក់កញ្ឆាយ៉ាងម៉េចទៅ ។ ហេតុនេះ បើមេដឹកនាំគណបក្សកាវក្លៃធ្វើមិនបានទេ លោកនឹងធ្វើបាតុកម្មប្រឆាំងនឹងរដ្ឋាភិបាល ។

ចុងក្រោយ លោក Chuwit Kamolvisit ក៏បានសម្តែងការអបអរជាមួយភាពជោគជ័យក្នុងថ្ងៃទី២២ ខែឧសភា ផងដែរ ហើយលោកនិយាយថា លោកមកនេះដើម្បីផ្តល់កម្លាំងចិត្តក្នុងឋានៈជាពលរដ្ឋម្នាក់ និងសូមឱ្យលោក Pita Limjaroenrat រក្សានូវលទ្ធិប្រជាធិបតេយ្យនៅប្រទេសថៃ ហើយកុំបង្កើតលក្ខខណ្ឌឈានដល់ការធ្វើរដ្ឋប្រហារ ។

ចំណែកលោក Pita Limjaroenrat ជាបេក្ខជននាយករដ្ឋមន្ត្រី និងមេដឹកនាំគណបក្សកាវក្លៃបានឆ្លើយតបថា លោកនឹងដឹកនាំប្រទេសថៃឈានទៅថ្ងៃអនាគតប្រកបដោយការអភិវឌ្ឍល្អប្រសើរជាងបច្ចុប្បន្ន ។ ចំណែករឿងកញ្ឆា លោកត្រូវតែជជែកគ្នា ព្រោះក្នុងរយៈពេល២-៣ឆ្នាំកន្លងមកនេះ ប្រទេសថៃបានចាត់ទុកការប្រើប្រាស់កញ្ឆាជារឿងស្របច្បាប់បង្កឱ្យមានផលវិបាកជាច្រើន ដូចជា មានហាងលក់កញ្ឆានៅក្បែរសាលារៀន និងនៅតាមទីសាធារណៈ ។ ដូច្នេះ លោកនឹងដោះស្រាយបញ្ហានេះ ហើយត្រូវមានការចូលរួមពីពលរដ្ឋផងដែរ ។ បច្ចុប្បន្ន យើងត្រូវយកកញ្ឆាមកធ្វើជាគ្រឿងញៀនវិញ ហើយលោកសន្យាថា នឹងធ្វើឱ្យបានល្អបំផុត ៕

ប្រភព ៖ The standard