សហរដ្ឋអាមេរិក ៖ ប្រធានាធិបតីអាមេរិក លោក ចូ បៃដិន ជឿជាក់ថា សម្ព័ន្ធភាពរវាងអាមេរិកជាមួយចិននឹងល្អប្រសើរឡើងនាពេលឆាប់ៗនេះ ។ លោកបញ្ជាក់ថា ក្រុមប្រទេស G7 ត្រូវតែរួមគ្នាកាត់បន្ថយហានិភ័យចំពោះការគំរាមកំហែងសេដ្ឋកិច្ចពីប្រទេសចិន ប៉ុន្តែមិនមែនឈប់សេពគប់ជាមួយប្រទេសចិនទេ ។

សារព័ត៌មានបរទេសរាយការណ៍ថា លោកប្រធានាធិបតី ចូ បៃដិន បានបញ្ជាក់កាលពីថ្ងៃទី២១ ខែឧសភា ថា ក្រុមប្រទេស G7 បានឯកភាពគ្នាអនុវត្តវិធីសាស្ត្រថ្មីមួយសម្រាប់ប្រទេសចិន ហៅថា ខ្សែសង្វាក់ផ្គត់ផ្គង់ចម្រុះ (diversifying supply chains) ដើម្បីកាត់បន្ថយការពឹងផ្អែកលើប្រទេសតែមួយ ហើយលោកប្រាប់ថា លោកនឹងជជែកជាមួយមេដឹកនាំចិននាពេលឆាប់ៗនេះ ។

លោក ចូ បៃដិន បានថ្លែងក្រោយកិច្ចប្រជុំមេដឹកនាំប្រទេស G7 ថា ៖ «យើងមិនមែនកំពុងស្វែងរកផ្លូវបំបែកខ្លួនពីចិនទេ តែយើងកំពុងរកផ្លូវកាត់បន្ថយហានិភ័យ និងបង្កើនទំនាក់ទំនងជាមួយចិន ។ ក្រុមប្រទេស G7 ត្រូវបង្កើនការសាមគ្គីគ្នាជាងមុន ដើម្បីរួមគ្នាប្រឆាំងនឹងការគំរាមកំហែងផ្នែកសេដ្ឋកិច្ច និងទប់ស្កាត់ហានិភ័យនានាដែលអាចបំផ្លាញការងាររបស់យើង» ។

កាលពីថ្ងៃទី២០ ខែឧសភា កន្លងមក ក្រុមប្រទេស G7 បានបង្ហាញវិធីចូលរួមសេដ្ឋកិច្ចជាមួយចិន គឺកាត់បន្ថយហានិភ័យ ប៉ុន្តែមិនមែនឈប់សេពគប់ជាមួយចិនទេ (de-risk, not decouple) ។ ទោះយ៉ាងណា ការលើកឡើងថា ប្រទេសចិនគំរាមកំហែងសេដ្ឋកិច្ចនេះ បានធ្វើឱ្យស្ថានទូតចិននៅប្រទេសជប៉ុន ចេញមកអំពាវនាវឱ្យក្រុមប្រទេស G7 បញ្ឈប់ការប្រឈមមុខដាក់គ្នា និងការបែងចែក ។

បើទោះជាចិនបង្ហាញអាកប្បកិរិយាមិនពេញចិត្តក្តី ប៉ុន្តែ លោក ចូ បៃដិន លើកឡើងថា សម្ព័ន្ធភាពរវាងអាមេរិកជាមួយចិនបានធ្លាក់ចុះតាំងពីមានហេតុការណ៍បាញ់បាឡុងស៊ើបការណ៍របស់ចិនធ្លាក់កាលពីដើមឆ្នាំ២០២៣ ប៉ុន្តែវានឹងល្អប្រសើរឡើងវិញនាពេលឆាប់ៗនេះ ។

លោកបានយល់ព្រមជាមួយប្រធានាធិបតីចិន លោក ស៊ី ជិនពីង ក្នុងអំឡុងពេលកិច្ចប្រជុំកំពូលក្រុមប្រទេស G7 នៅកោះបាលី ប្រទេសឥណ្ឌូណេស៊ី កាលពីឆ្នាំ២០២២ ថា នឹងបង្កើនទំនាក់ទំនងជាមួយចិន ប៉ុន្តែគ្រប់យ៉ាងបានផ្លាស់ប្តូរក្រោយពីមានហេតុការណ៍បាញ់បាឡុងស៊ើបការណ៍របស់ចិន ។ លោកបញ្ជាក់ថា អាមេរិក និងក្រុមប្រទេស G7 នឹងមិនលក់វត្ថុធាតុដើមដែលធ្វើឱ្យចិនអាចផលិតអាវុធបំផ្លាញគេទេ ហើយការធ្វើបែបនេះមិនមែនជាសត្រូវជាមួយចិនទេ ៕ ប្រភព ៖ Thairath

ប្រទេសថៃ ៖ សារព័ត៌មាននៅប្រទេសថៃចុះផ្សាយថា ខេត្តឈុមផនបានជួបនឹងគ្រោះរាំងស្ងួតធ្ងន់ធ្ងរ និងធ្វើឱ្យដំណាំទុរេនដែលជាដំណាំដ៏សំខាន់សម្រាប់នាំចេញទៅក្រៅប្រទេស ងា.ប់ជាបន្តបន្ទាប់ ដោយសារគ្មានភ្លៀងធ្លាក់អស់រយៈពេល២ខែ ។ កសិករក្នុងខេត្តនេះបាននាំគ្នាដាំទុរេននៅគ្រប់ស្រុកទាំងអស់ ប៉ុន្តែក្នុងចំណោមនោះ នៅស្រុកសៈវីបានរងគ្រោះធ្ងន់ធ្ងរជាងគេ ខណៈប្រឡាយទឹករីងស្ងួត ហើយគ្មានទឹកគ្រប់គ្រាន់សម្រាប់ដំណាំកសិកម្មទេ ។

អ្នកស្រី Penporn Panmanee អាយុ៥៨ឆ្នាំ ជាកសិករដាំទុរេននៅស្រុកសៈវី ខេត្តឈុមផន ជាអ្នករងផលប៉ះពាល់ដោយសារគ្រោះរាំងស្ងួតក្នុងចំណោមអ្នករងផលប៉ះពាល់ទាំងអស់ បាននិយាយថា អ្នកស្រីបានដាំទុរេនពូជម៉ន់ថងនៅលើផ្ទៃដីចំនួន១៦រ៉ៃ ក្នុងនោះមានដើមទុរេនចំនួន៣១០ដើម ។ អ្នកស្រីបន្តថា គាត់បានដាំទុរេនចំនួន២ឆ្នាំហើយ ហើយសង្ឃឹមថា នឹងទទួលប្រាក់ចំណូលនាថ្ងៃអនាគត ប៉ុន្តែវាបានងា.ប់ស្ទើរទាំងអស់ ដោយដើមខ្លះជ្រុះស្លឹកអស់នៅសល់តែមែក ហើយដើមខ្លះទៀតងា.ប់ទាំងស្រុងតែម្តង ។

អ្នកស្រីបន្តថា គ្មានភ្លៀងធ្លាក់អស់២ខែហើយ ថ្ងៃខ្លះ មេឃខ្មៅបម្រុងនឹងមានភ្លៀង ប៉ុន្តែបែរជាភ្លៀងមិនធ្លាក់ ហើយពេលនេះ គាត់លំបាកខ្លាំងណាស់ ដោយសារទុរេនពូជម៉ន់ថងងា.ប់ស្ទើរទាំងអស់ ។ គាត់បានបូមទឹកស្រះមកស្រោចទុរេន១ថ្ងៃម្តង និងស្រោចរយៈពេល១០នាទីនៅពេលល្ងាច ប៉ុន្តែនៅតែមិនគ្រប់គ្រាន់ទៀត ពីព្រោះទឹកក្នុងស្រះរីងស្ងួត ។ ហេតុនេះ គាត់មិនបានស្រោចទឹកទុរេន៣ថ្ងៃ ទើបបណ្តាលឱ្យដើមងា.ប់ ។ គាត់អស់សង្ឃឹមណាស់ ហើយគាត់បានសំណូមពរទៅកាន់មន្ត្រីរដ្ឋាភិបាលឱ្យមកជួយដោះស្រាយទុក្ខលំបាករបស់កសិករផង ។

អ្នកស្រីបន្ថែមថា ជារៀងរាល់ឆ្នាំ មានភ្លៀងសិប្បនិម្មិត ប៉ុន្តែនៅឆ្នាំ២០២៣ នេះ គ្មានភ្លៀងសិប្បនិម្មិតទេ នៅស្រុករបស់គាត់ ។ គាត់បានចំណាយដើមទុនទិញឧបករណ៍ផ្សេងៗសម្រាប់ដាំដំណាំទុរេននៅលើផ្ទៃដីចំនួន១៦រ៉ៃ និងអស់ទឹកប្រាក់ចំនួន១,៥លានបាត ប៉ុន្តែពេលនេះ គាត់ខាតបង់អស់ហើយ ។

អ្នកស្រី Penporn Panmanee បានរៀបរាប់ទាំងទឹកភ្នែកថា អ្នកស្រីបានដាំទុរេនតែម្នាក់ឯងនៅលើផ្ទៃដីដ៏ធំ គឺអ្នកស្រីនឿយហត់ណាស់ទៅហើយ ហើយត្រូវមកជួបនឹងបញ្ហាគ្រោះរាំងស្ងួត គ្មានទឹកប្រើប្រាស់ទៀត វាបានធ្វើឱ្យក្តីសុបិនរបស់អ្នកស្រីរលាយអស់ គឺរយៈពេល២ឆ្នាំទៀតនឹងទទួលបានទិន្នផលទុរេនលក់យកប្រាក់ ។ ចុងក្រោយ លោកស្រីបានត្រឹមតែឈរមើលទុរេនដែលបានដាំដោយផ្ទាល់ដៃ ងា.ប់ជាបន្តបន្ទាប់នៅចំពោះមុខ ៕ ប្រភព ៖ Mono News

បច្ចុប្បន្ន ប្រទេសនានាស្ថិតក្នុងតំបន់អឺរ៉ុបភាគខាងត្បូងបានប្រឈមនឹងគ្រោះរាំងស្ងួតធ្ងន់ធ្ងរ ហើយរដ្ឋាភិបាលប្រទេសទាំងនេះបានចាត់វិធានការកំណត់ការប្រើប្រាស់ទឹករបស់ពលរដ្ឋដែលរស់នៅក្នុងតំបន់រាំងស្ងួត ។ លើសពីនេះ នៅប្រទេសខ្លះបានប្រើប្រាស់រថយន្តដឹកទឹកដើម្បីចែកចាយទៅឱ្យពលរដ្ឋរស់នៅក្នុងតំបន់មានគ្រោះរាំងស្ងួតធ្ងន់ធ្ងរផងដែរ ដូចជា ប្រទេសបារាំង អេស្ប៉ាញ និងព័រទុយហ្គាល់ ។

ប្រទេសបារាំងបានប្រកាសថា គ្រោះរាំងស្ងួតដែលកើតឡើងនេះ គឺខ្លាំងក្លាបំផុតនៅប្រទេសបារាំង បើគិតចាប់ពីឆ្នាំ១៩៥៩ មក ។ ចំណែកប្រទេសអេស្ប៉ាញ រដ្ឋាភិបាលប្រទេសនេះបានរៀបចំរថយន្តដឹកទឹកចែកចាយឱ្យពលរដ្ឋរស់នៅតំបន់រាំងស្ងួតទៀតផង ។ រីឯប្រទេសព័រទុយហ្គាល់វិញ គេសង្កេតឃើញថា ផ្ទៃដីប្រមាណ៩០% កំពុងតែប្រឈមនឹងបញ្ហាគ្រោះរាំងស្ងួត និងធ្ងន់ធ្ងរជាងកាលពីឆ្នាំ២០២២ រហូតដល់៥ដងឯណោះ ។

គណៈកម្មការសហភាពអឺរ៉ុបបានតាមដានស្ថានការណ៍គ្រោះរាំងស្ងួតនេះយ៉ាងដិតដល់ផងដែរ ខណៈគេបារម្ភថា គ្រោះរាំងស្ងួតនឹងធ្វើឱ្យប៉ះពាល់ដល់ទិន្នផលដំណាំកសិកម្មកាន់តែខ្លាំង ក៏ដូចជាជីវភាពរបស់ពលរដ្ឋ ។

អ្នកឧតុនិយមលើកឡើងថា តំបន់អឺរ៉ុបភាគខាងត្បូង មិនមែនជាតំបន់តែមួយដែលបានប្រឈមនឹងគ្រោះរាំងស្ងួតធ្ងន់ធ្ងរនោះទេ ប៉ុន្តែនៅតំបន់ Horn របស់ទ្វីបអាហ្វ្រិក ក៏កំពុងជួបនឹងបញ្ហាគ្រោះរាំងស្ងួតធ្ងន់ធ្ងរដូចគ្នាដែរ ។ លើសពីនេះ គ្រោះរាំងស្ងួតបានគំរាមកំហែងនៅតំបន់ខ្លះរបស់អាមេរិកឡាទីន ជាពិសេស ប្រទេសអាហ្សង់ទីន ។ គ្រោះរាំងស្ងួតនេះជាលទ្ធផលបង្ហាញថា នាពេលបច្ចុប្បន្ន អាកាសធាតុបានប្រែប្រួលខ្លាំង ហើយវានឹងមានវិបត្តិបរិស្ថានធ្ងន់ធ្ងរ និងកាន់តែយូរអង្វែងថែមទៀត ៕ ប្រភព ៖ Mono News

វៀតណាម៖ នាព្រឹកថ្ងៃទី ២០ ខែឧសភា នៅទីក្រុងហ៊ីរ៉ូស៊ីម៉ា ក្នុងកម្មវិធីការងារនៅប្រទេសជប៉ុន ឯកឧត្តមរដ្ឋមន្ត្រីវៀតណាមលោក Pham Minh Chinh បានជួបសន្ទនាជាមួយថ្នាក់ដឹកនាំនៃក្រុមហ៊ុន AEON Group និងគណៈប្រតិភូនៃអាជីវកម្មនៅតំបន់ភាគកណ្តាលខាងត្បូងនៃប្រទេសជប៉ុន។
ក្នុងជំនួបជាមួយលោក Akio Yoshida ប្រធានប្រតិបត្តិនៃ AEON Group និងឯកឧត្តមរដ្ឋមន្ត្រី Pham Minh Chinh បានវាយតម្លៃខ្ពស់ចំពោះការរួមចំណែកជាវិជ្ជមាន និងមានប្រសិទ្ធភាពរបស់ AEON ក្នុងការអភិវឌ្ឍន៍វិស័យលក់រាយ និងនាំចេញនៅវៀតណាម។

ឯកឧត្តមរដ្ឋមន្ត្រី Pham Minh Chinh បានស្នើឱ្យ AEON Group ជ្រើសរើសប្រទេសវៀតណាមជាមូលដ្ឋានអាជីវកម្មរបស់ខ្លួននៅក្នុងពិភពលោក។ លោក Akio Yoshida ប្រធានប្រតិបត្តិនៃ AEON Group បានមានប្រសាសន៍ថា រហូតមកដល់ពេលនេះ វៀតណាមគឺជាប្រទេសដែលរកចំណូលបានច្រើនជាងគេសម្រាប់ AEON នៅលើពិភពលោក ដែលមានទឹកប្រាក់ជាង ១.១៨ ពាន់លានដុល្លារអាមេរិក។ បច្ចុប្បន្ន AEON មានមជ្ឈមណ្ឌលពាណិជ្ជកម្មចំនួន ៦ នៅក្នុងខេត្ត និងទីក្រុងធំៗនៃប្រទេសវៀតណាម ដូចជា ហាណូយ ហូជីមិញ ហាយផុង ធៀន ហឿ…។ យល់ស្របនឹងការអត្ថាធិប្បាយរបស់ឯកឧត្តមរដ្ឋមន្ត្រី Pham Minh Chinh នាពេលខាងមុខក្រុមហ៊ុន AEON នឹងអភិវឌ្ឍមជ្ឈមណ្ឌលពាណិជ្ជកម្មប្រហែល ២០ ទៀតនៅវៀតណាម ដោយផ្តោតលើអាជីវកម្មផ្សារទំនើប និងការកម្សាន្ត។ ក្រៅពីនេះ ក្រុមហ៊ុន AEON ក៏បានពង្រីកការនាំចូលទំនិញវៀតណាមសម្រាប់ការចែកចាយនៅមជ្ឈមណ្ឌលពាណិជ្ជកម្មជាង២ម៉ឺនកន្លែងក្នុងប្រទេសជប៉ុនផងដែរ។ អ៊ីអន ក៏នឹងផ្តល់អាហារូបករណ៍ជួយវៀតណាមក្នុងការបណ្តុះបណ្តាលធនធានមនុស្សផងដែរ។

វៀតណាម និងជប៉ុនកំពុងប្រារព្ធខួបលើកទី ៥០ នៃការបង្កើតទំនាក់ទំនងការទូត រវាងប្រទេសទាំងពីរស្ថិតក្នុងដំណាក់កាលល្អបំផុតមិន ដោយឈរលើមូលដ្ឋាននៃទំនាក់ទំនងដៃគូយុទ្ធសាស្ត្រទូលំទូលាយ និងជាប្រពៃណី។ កន្លងទៅ ថ្មីៗនេះ ចំនួនប្រជាជនវៀតណាមនៅក្នុងប្រទេសជប៉ុនបានកើនឡើងយ៉ាងឆាប់រហ័ស ដែលឥឡូវនេះឈានដល់ជិត ៥០០,០០០ នាក់។ ឯកឧត្តមរដ្ឋមន្ត្រីបានស្នើថា អង្គភាពអាជីវកម្មនៅតំបន់ភាគកណ្តាល និងភាគខាងត្បូងនៃប្រទេសជប៉ុន បន្តសម្របសម្រួលយ៉ាងជិតស្និទ្ធជាមួយស្ថានទូតវៀតណាមប្រចាំនៅជប៉ុន ស្ថានអគ្គកុងស៊ុលវៀតណាមប្រចាំនៅ Fukuoka និងក្រសួង ស្ថាប័នពាក់ព័ន្ធ ដើម្បីអនុវត្តឱ្យបានឆាប់នូវគំនិតនៃកិច្ចសហប្រតិបត្តិការ និងវិនិយោគ រួមចំណែក។ ដើម្បីជំរុញភាពជាដៃគូយុទ្ធសាស្ត្រទូលំទូលាយរវាងប្រទេសទាំងពីរឱ្យកាន់តែស៊ីជម្រៅ ជាក់ស្តែង និងមានប្រសិទ្ធភាព៕ ប្រភព៖cafef.com

ប្រទេសថៃ ៖ នាយកដ្ឋានពាណិជ្ជកម្មផ្ទៃក្នុងបានចាប់ខ្លួនអាជីវករវៀតណាមលក់ទុរេនម្នាក់នៅខេត្តណុនថៈបុរី ទៅឱ្យប៉ូលិសចាត់វិធានការតាមផ្លូវច្បាប់ ខណៈអាជីវកររូបនេះបានលក់ទុរេនឱ្យអតិថិជនដោយបន្លំភ្នែកជញ្ជីង គឺបានលួចបន្ថែមទម្ងន់ទុរេនកន្លះគីឡូ ហើយឱ្យអ្នកទិញបង់ប្រាក់ឱ្យខ្លួនបន្ថែមទៀតចំនួន៧៥បាត ។

មន្ត្រីប៉ូលិសនិយាយថា កាលពីឆ្នាំ២០២២ ប៉ូលិសបានចាប់ខ្លួនជនបរទេសចំនួន៧នាក់ពីបទកែច្នៃជញ្ជីងថ្លឹងឱ្យជាប់ពន្ធនាគាររយៈពេល២ឆ្នាំ និងពិន័យជាប្រាក់បន្ថែមទៀត ។ ប៉ូលិសបានចាត់កងកម្លាំងឱ្យពិនិត្យមើលភាពខុសប្រក្រតីនៅតាមផ្សារនានា ព្រមទាំងសុំការសហការពីផ្សារផងដែរឱ្យជួយតាមដានការលក់បន្លំភ្នែកជញ្ជីង ដើម្បីការពារអ្នកទិញកុំឱ្យគេដើរខ្សែលើ ។

លោក Chakra Yodmanee អគ្គនាយករងនៃអគ្គនាយកដ្ឋានពាណិជ្ជកម្មផ្ទៃក្នុងលើកឡើងថា នាយកដ្ឋានបានចាត់មន្ត្រីឱ្យចុះតាមតំបន់ផ្សេងៗដើម្បីពិនិត្យមើលឈ្មួញលក់ទុរេននៅខេត្តណុនថៈបុរី ឃើញថា ឈ្មួញបានកែច្នៃជញ្ជីងថ្លឹង និងយកចេញនូវសញ្ញាសម្គាល់រូបគ្រុឌដែលចេញដោយនាយកដ្ឋាន ។ នាយកដ្ឋានបានចាប់ខ្លួនឈ្មួញវៀតណាមម្នាក់ទៅឱ្យប៉ូលិស ដោយសារគេបានកែច្នៃជញ្ជីងថ្លឹងទំនិញឱ្យធ្ងន់ជាងទម្ងន់ពិត ។

លោក Chakra Yodmanee បន្តថា ករណីនេះជាការដើរខ្សែលើអ្នកទិញ នាយកដ្ឋានមិនអាចទទួលយកបានទេ ព្រោះបច្ចុប្បន្ន មានផ្លែឈើច្រើនបានលក់នៅលើទីផ្សារ ហើយអ្នកទិញនិយមទិញទៅទទួលទាន ជាពិសេស ទុរេន ។ អាជីវករវៀតណាមរូបនេះបានលក់ទុរេនឱ្យអតិថិជន គឺធ្ងន់ជាងទម្ងន់ដើមចំនួនកន្លះគីឡូ ស្មើនឹងប្រាក់៧៥បាត ហើយចំនួនប្រាក់នេះមិនច្រើនទេ ប៉ុន្តែបើអាជីវករធ្វើបែបនេះច្រើនលើករាល់ថ្ងៃនោះ នឹងមានអតិថិជនជាច្រើននាក់ត្រូវគេដើរខ្សែលើ ។

លោកបន្ថែមថា នេះជាករណីដំបូងហើយដែលខាងនាយកដ្ឋានចាប់បានឈ្មួញវៀតណាម ។ កាលពីឆ្នាំ២០២២ នាយកដ្ឋានចាប់បានឈ្មួញខិលខូចចំនួន១៤នាក់ ក្នុងនោះមានជនបរទេស៧នាក់ដែលពួកគេបានកែច្នៃជញ្ជីងថ្លឹង ហើយតុលាការបានកាត់ក្តីឱ្យពួកគេជាប់គុក២ឆ្នាំ ហើយពេលចេញពីគុកវិញនឹងបណ្តេញពួកគេចេញពីប្រទេសថៃ ។

លោកបន្ថែមទៀតថា លោកបានសុំការសហការជាមួយអ្នកគ្រប់គ្រងផ្សារផ្សេងៗឱ្យជួយតាមដាន និងពិនិត្យជញ្ជីងថ្លឹងទាំងអស់ក្នុងផ្សារ ហើយបើរកឃើញថា អ្នកណាម្នាក់បន្លំភ្នែកជញ្ជីង សូមឱ្យខាងផ្សារលុបចោលកិច្ចសន្យាជួល ឬមិនយល់ព្រមឱ្យឈ្មួញនោះលក់ទំនិញក្នុងផ្សារបន្តទៀត ។ លើសពីនេះ សូមឱ្យខាងផ្សារមានជញ្ជីងថ្លឹងទំនិញរួមមួយ ដើម្បីឱ្យពលរដ្ឋអាចយកទំនិញដែលពួកគេទិញទៅថ្លឹងលើជញ្ជីងរួមនេះ សម្រាប់ពិនិត្យទម្ងន់ទំនិញត្រឹមត្រូវ ។

ចំណែកពលរដ្ឋមកទិញទំនិញនៅផ្សារ សូមនាំគ្នាសង្កេតលើជញ្ជីងថ្លឹងត្រូវចាប់ផ្តើមពីលេខសូន្យ ហើយមើលជញ្ជីងនោះថា តើមានស្ទិកគ័រពិនិត្យជញ្ជីងពីនាយកដ្ឋានឬអត់ ដែលនាយកដ្ឋានបានចេញស្ទិកគ័រពិនិត្យជញ្ជីងពណ៌ត្នោតសម្រាប់ឆ្នាំ២០២៣ ។ បើពលរដ្ឋសង្កេតឃើញថា ទំនិញមិនគ្រប់គីឡូ គឺអាចប្តឹងមកខាងនាយកដ្ឋានបាន ៕

ប្រភព ៖ agrinews thai