សហរដ្ឋអាមេរិក ៖ ការិយាល័យអាកាសធាតុសហរដ្ឋអាមេរិកបញ្ជាក់ថា កាលពីថ្ងៃទី១៥ ខែមិថុនា កន្លងមក ពលរដ្ឋចំនួន៣៥លាននាក់រស់នៅរដ្ឋចំនួន៣ របស់សហរដ្ឋអាមេរិក ដូចជា រដ្ឋតិចសាស់ រដ្ឋឡុយសេណា និងរដ្ឋផ្លរីដា ត្រូវបានគេជូនដំណឹងអំពីសីតុណ្ហភាពកើនឡើង និងវិធីការពារខ្លួនទប់ទល់នឹងអាកាសធាតុក្តៅ ។ ការិយាល័យអាកាសធាតុអាមេរិកបញ្ជាក់ទៀតថា អាកាសធាតុក្តៅនឹងគ្របដណ្តប់លើរដ្ឋទាំង៣នេះ មួយរយៈពេលទៀត ។

សារព័ត៌មានរ៉យទ័របានចុះផ្សាយដោយយោងតាមអ្នកវិទ្យាសាស្ត្រផ្នែកអាកាសថា អាកាសធាតុក្តៅនៅអាមេរិកបានបង្ហាញពីបម្រែបម្រួលអាកាសធាតុដែលកើតឡើងដោយសារទង្វើរបស់មនុស្ស ក្នុងនោះទីក្រុងមួយចំនួនដូចជា Dallas, Houston និង Austin នៅរដ្ឋតិចសាស់ អាចប្រឈមនឹងអាកាសធាតុក្តៅខ្លាំង ខណៈសីតុណ្ហភាពកើនឡើងដល់៤៦អង្សារសេ ។ ការវាស់សីតុណ្ហភាពនៅតំបន់ភាគខាងត្បូងរបស់រដ្ឋតិចសាស់ បានកើនឡើងដល់៤៤អង្សារសេនៅទីក្រុងហ៊ូស្តុន និង៤២អង្សារសេនៅទីក្រុងហ្គាលស្តុន ។

អាកាសធាតុក្តៅជាមូលហេតុចម្បងនៃការស្លា.ប់របស់ពលរដ្ឋអាមេរិក ហើយអាកាសធាតុក្តៅខ្លាំងបានបណ្តាលឱ្យពលរដ្ឋអាមេរិកកើតជំងឺផ្សេងៗដូចជា រមួលក្រពើ អស់កម្លាំង និងជំងឺដាច់សរសៃឈាមខួរក្បាលដែលបណ្តាលឱ្យស្លា.ប់បាន ។ ហេតុនេះ ការណែនាំអំពីវិធីការពារខ្លួនក្នុងពេលអាកាសធាតុក្តៅ នឹងអាចជួយការពារជីវិតពលរដ្ឋបាន ។

កាលពីឆ្នាំ២០២២ អ្នកស្រាវជ្រាវនៅសាកលវិទ្យាល័យ Harvard និង Washington សហរដ្ឋអាមេរិកបានផ្សព្វផ្សាយលទ្ធផលស្រាវជ្រាវមួយថា ប្រទេសនានានៅទូទាំងពិភពលោក នឹងប្រឈមជាមួយអាកាសធាតុក្តៅជាញឹកញាប់ ដោយសារបម្រែបម្រួលអាកាសធាតុ ។ អ្នកស្រាវជ្រាវលើកឡើងថា នៅឆ្នាំ២០៥០ ប្រទេសជាច្រើននៅតំបន់អាស៊ីនឹងមានអាកាសធាតុក្តៅខ្លាំងទ្វេដង ហើយអាកាសធាតុក្តៅខ្លាំងនៅថ្ងៃអនាគត គឺហួសពីការទ្រាំទ្ររបស់រាងកាយមនុស្ស ៕ ប្រភព ៖ Bangkok biznews

ប្រទេសចិន៖ ប្រទេសចិនទើបតែបានបំបែកកំណត់ត្រារបស់ខ្លួនសម្រាប់ចំនួនផ្កាយរណបដែលត្រូវបានបាញ់បង្ហោះដោយរ៉ុក្កែតក្នុងពេលតែមួយជាមួយនឹងការបាញ់បង្ហោះកាលពីថ្ងៃទី ១៥ ខែមិថុនា។
រ៉ុក្កែត Long March 2D បានហោះចេញពីមជ្ឈមណ្ឌលផ្កាយរណប Taiyuan នៅភាគខាងជើងនៃប្រទេសចិន ដោយដាក់ផ្កាយរណបចំនួន ៤១ គ្រាប់ចូលទៅក្នុងគន្លងតារាវិថី។

ផ្កាយរណបតូចៗសរុបចំនួន ៤១ គ្រាប់ត្រូវបានដាក់ចូលទៅក្នុងគន្លងតារាវិថី រួមមានផ្កាយរណប Jilin-1 GF06A0 ចំនួន ៣០ គ្រាប់ ផ្កាយរណប Jilin-1 GF03D ចំនួន ៨ គ្រាប់ ផ្កាយរណប HEGS-1 មួយ និងផ្កាយរណប Jilin-1 PT02A ចំនួនពីរសម្រាប់ក្រុមហ៊ុនផ្កាយរណបទូរគមនាគមន៍របស់ប្រទេសចិន Changguang Satellite (CGST) ។

ការបាញ់បង្ហោះនេះបានបំបែកឯតទគ្គកម្មចាស់របស់ប្រទេសចិនសម្រាប់ចំនួនផ្កាយរណបទាំង ២៦ គ្រាប់ ក្នុងការបាញ់បង្ហោះតែមួយដង ដែលកំណត់ដោយក្រុមហ៊ុនពាណិជ្ជកម្ម CAS Space’s Lijian 1 rocket ប៉ុន្មានថ្ងៃមុននេះ។ ប៉ុន្តែទាំងនេះគឺនៅឆ្ងាយពីកំណត់ត្រាពិភពលោកនៃផ្កាយរណបចំនួន ១៤៣ ដែលកំណត់ដោយបេសកកម្មរបស់អាមេរិក Transporter-1 របស់ SpaceX នៅក្នុងខែមករា ឆ្នាំ ២០២១។

ទោះជាយ៉ាងណាក៏ដោយ ក្រុមហ៊ុនរបស់ចិនក៏មានបំណងដាក់ផ្កាយរណបច្រើនជាង ៣០០ គ្រាប់នៅលើគន្លងនៅឆ្នាំ ២០២៥ ដើម្បីបំបែកកំណត់ត្រារបស់ពិភពលោកផងដែរ។
គួរបញ្ជាក់ដែរថា រ៉ុក្កែត Long March 2D មានកម្ពស់ ៤១ ម៉ែត្រ អាចផ្ទុកទំនិញបាន ១,៣០០ គីឡូក្រាមទៅកាន់គន្លងព្រះអាទិត្យដែលមានកម្ពស់ ៧០០ គីឡូម៉ែត្រ។ បេសកកម្មនេះគឺជាការបាញ់បង្ហោះលើកទី ២៥ ជាមួយនឹងការដឹកជញ្ជូនផ្កាយរណប Jilin-1 របស់ចិន៕ ប្រភព៖vnexpress

ប្រទេសចិន ៖ វាបានក្លាយជារឿងមួយល្បីល្បាញនៅក្នុងបណ្តាញសង្គមប្រទេសចិន ដោយសារមានកូនក្រមុំម្នាក់ពាក់ខ្សែកធ្វើពីកងដៃមាស រហូតដល់ផុតក្បាលក្នុងថ្ងៃរៀបការរបស់ខ្លួន ។ ភ្ញៀវមកចូលរួមក្នុងពិធីរៀបការរបស់នាង និយាយថា នាងពាក់ខ្សែកច្រើនពេកស្ទើរមើលមិនឃើញក្បាល ប៉ុន្តែនៅពេលដឹងការពិត វាមិនដូចការគិតទេ ។

តាមប្រពៃណីរៀបការក្នុងតំបន់ជាច្រើននៅប្រទេសចិន ក្រុមគ្រួសារខាងស្រីតែងត្រៀមគ្រឿងអលង្ការឱ្យកូនក្រមុំពាក់ក្នុងថ្ងៃរៀបការ ដើម្បីធ្វើឱ្យពិធីរៀបការមើលទៅទាក់ទាញបំផុត ។ កាលពីពេលថ្មីៗនេះ នៅក្នុងបណ្តាញសង្គមចិនបានចែកចាយរូបភាពកូនកំលោះ និងកូនក្រមុំ ១គូ នៅទីក្រុងហ្វូសាន ខេត្តក្វាងទុង ដោយសារពួកគេចាប់អារម្មណ៍នឹងកូនក្រមុំពាក់គ្រឿងអលង្ការរហូតដល់ផុតក្បាលរបស់នាង ។ តាមរូបភាពនេះ កូនក្រមុំបានគ្របដណ្តប់ទៅដោយគ្រឿងអលង្ការពេញរាងកាយទាំងអស់ ហើយផ្ទៃមុខរបស់នាង ក៏ត្រូវបិទជិតដែរ ។ អ្នកលេងបណ្តាញសង្គមជាច្រើននាក់បានសាកសួរពីប្រវត្តិរបស់កូនក្រមុំ និងសង្ស័យថា តើរូបភាពនេះពិតប្រាកដ ឬគ្រាន់តែជាការសម្តែង ?

បើតាមការចុះផ្សាយរបស់សារព័ត៌មានចិនឱ្យដឹងថា ការពិត កូនក្រមុំមានខ្សែក និងកងដៃមាសត្រឹមតែចំនួន៦០ ប៉ុណ្ណោះ រីឯគ្រឿងអលង្ការផ្សេងទៀតជាអំណោយរបស់សាច់ញាតិ ដែលពួកគេបានប្រគល់ឱ្យនាងដើម្បីចូលរួមអបអរសាទរថ្ងៃរៀបការ ។ ចំណែកកូនក្រមុំទទួលស្គាល់ថា ការពាក់គ្រឿងអលង្ការទាំងនេះធ្វើឱ្យនាងនឿយហត់ ។ ក្រោយពីការសម្ភាសន៍កូនក្រមុំត្រូវបានផ្សព្វផ្សាយ អ្នកលេងបណ្តាញសង្គមចិនបានប្រៀបធៀបការរៀបការរបស់នាង គឺដូចគ្នានឹងការរៀបការរបស់កូនស្រីអ្នកមានត្រកូលខ្ពង់ខ្ពស់ម្នាក់នៅប្រទេសចិន ហើយគេសន្និដ្ឋានថា កូនក្រមុំរូបនេះពិតជាមានឋានៈខ្ពង់ខ្ពស់មិនខាន ៕ ប្រភព ៖ khaosod

ថ្មីៗនេះក្រុមហ៊ុន Netflix បានបញ្ចេញTrailer ខ្សែភាពយន្ត Squid Game វគ្គ២  ដែលមានគម្រោងចាក់បញ្ចាំងនៅដើមឆ្នាំ២០២៤ខាងមុខនេះ។

បើតាមព័ត៌មានបែកធ្លាយ សម្រាប់រដូវកាលទី២នេះ លោកអ្នកនឹងឃើញការវិលត្រឡប់វិញរបស់តួឯកប្រុសលោក Gi Hun និង Front Man។ ចំណែក​ឯបុរសដែល​ស្ថិតក្នុង​ឯកសណ្ឋាន ជាមួយនឹង​ក្រដាសបត់ (Ddakji) ក៏អាចនឹង​ត្រឡប់មកវិញដូចគ្នា។ អ្វីដែល​កាន់​តែពិសេស​អ្នក​នឹង​បាន​ស្គាល់​មុខមិត្តប្រុសរបស់ Young Hee (តុក្កតាកូនក្រមុំ) ដែល​មាន​ឈ្មោះថា Cheol Su។

លើសពីនេះទៅទៀត អ្នកគាំទ្ររំពឹងខ្ពស់ខ្លាំងថារដូវកាលទី២នេះ នឹងមានភាពរន្ធត់ចិត្ត និងចាប់អារម្មណ៍ខ្លាំងជាមុនទៅទៀត។

នៅក្នុង Trailer នេះ យើងឃើញថាមានតួរអង្គថ្មីៗនេះ ជាច្រើន ដែលអ្នកវិភាគយល់ឃើញថាជាតួ Front Man(បុរសពាក់ឈុតខ្មៅ)។

គួរបញ្ជាក់ផងដែរថា Squid Game រដូវកាលទី១ បានចំណាយពេលរយៈពេល១២ឆ្នាំ ក្នុងការសរសេររឿងមួយនេះឡើង ដែលកាលពីពេលកន្លងទៅរឿងនេះបានផ្ទុះជាខ្លាំងទូទាំងសកលលោក ដោយទទួលបានពានរង្វាន់ធំជាច្រើន៕

ប្រភព៖ economictimes

ប្រទេសចិន ៖ Erenhot គឺជាទីក្រុងដឹកជញ្ជូនទំនិញដ៏សំខាន់របស់ប្រទេសម៉ុងហ្គោលី ដែលស្ថិតនៅភាគខាងជើងប្រទេសចិន ។ ក្នុងរយៈពេល៥ខែដំបូងនៃឆ្នាំ២០២៣ នេះ មានរថភ្លើងដឹកជញ្ជូនទំនិញរវាងប្រទេសចិន និងតំបន់អឺរ៉ុប បានកើនឡើងជាង១៥% ។គេចាត់ទុកថា រថភ្លើង គឺជាមធ្យោបាយដឹកជញ្ជូនទំនិញតាមផ្លូវគោកដ៏សំខាន់មួយដែលងាយស្រួលបំផុត ដោយសារវាអាចតភ្ជាប់តំបន់អឺរ៉ុប និងអាស៊ី ។ ចំណែកប្រទេសម៉ុងហ្គោលី គឺជាតំបន់សំខាន់ក្នុងការពង្រីកផ្លូវដឹកជញ្ជូនទំនិញទៅទិសខាងជើង ។ ចាប់តាំងពីរថភ្លើងដឹកទំនិញរវាងប្រទេសចិន និងអឺរ៉ុប បើកដំណើរការជាលើកដំបូងកាលពីឆ្នាំ២០១៣ មក គេបានដឹកជញ្ជូនទំនិញតាមផ្លូវរថភ្លើងជាង១០លានតោនក្នុង១ឆ្នាំ ។

អនុប្រធានការិយាល័យគយប្រចាំទីក្រុង Erenhot លើកឡើងថា តំបន់នេះមានគុណសម្បត្តិផ្នែកភូមិសាស្ត្រ និងអាចភ្ជាប់គម្រោងខ្សែក្រវ៉ាត់១ ផ្លូវ១ ផងដែរ ។ ក្រុមការងារគយបានកែលម្អវិធានការនានា ដើម្បីឱ្យការដឹកជញ្ជូនទំនិញពីប្រទេសចិនទៅកាន់អឺរ៉ុបកាន់តែងាយស្រួលថែមទៀត ។

តាំងពីឆ្នាំ២០១១ China Railway Express បានផ្តល់សេវាកម្មដឹកជញ្ជូនទំនិញតាមរថភ្លើងឆ្លងកាត់ព្រំដែនប្រទេសចិន ទៅកាន់ទីក្រុងជាង២០០ ក្នុង២៤ប្រទេសនៅតំបន់អឺរ៉ុប ។ China Railway Express ត្រូវបានគេចាត់ទុកថា បានរួមចំណែកយ៉ាងសំខាន់ក្នុងគម្រោងខ្សែក្រវ៉ាត់១ ផ្លូវ១ ៕ ប្រភព ៖ China Face

ប្រទេសថៃ ៖ ខេត្តប្រាជួបស៊ីរីខាន់ ប្រទេសថៃ បានប្រឈមនឹងគ្រោះរាំងស្ងួតធ្ងន់ធ្ងរ ជាហេតុធ្វើឱ្យដំណាំខ្នុររបស់កសិករខ្វះខាតទឹក និងងា.ប់ជាបន្តបន្ទាប់ ។ កសិករលើកឡើងថា ពួកគេបានរងផលប៉ះពាល់ខ្លាំង ដោយសារគ្មានភ្លៀងធ្លាក់តាំងពីខែមេសា ឆ្នាំ២០២៣ រហូតដល់ខែមិថុនានេះ ហើយទោះជាខែមិថុនា មានភ្លៀងធ្លាក់មកខ្លះៗក្តី ប៉ុន្តែមិនច្រើនទេ និងមិនគ្រប់គ្រាន់សម្រាប់ស្រោចដំណាំឡើយ ។ ប្រាជួបស៊ីរីខាន់ គឺជាខេត្តមួយដែលបានដាំខ្នុរសម្រាប់ការនាំចេញ និងជាដំណាំសេដ្ឋកិច្ចលំដាប់ទី២ បន្ទាប់ពីស្វាយ ។

លោក Samran Ketphet ជាកសិករដាំខ្នុរនិយាយថា លោកបានដាំខ្នុរចំនួន១.២០០ដើម ហើយពេលនេះ លោកលំបាកណាស់ ដោយសារខ្វះទឹកស្រោចដំណាំ ។ លោកបន្តថា ក្នុងចម្ការរបស់លោក ក៏មានអណ្តូងទឹកដែរ ប៉ុន្តែទឹកក្នុងអណ្តូងមិនគ្រប់គ្រាន់សម្រាប់ស្រោចខ្នុរទេ ។ ដូច្នេះ លោកបានស្រោចទឹកពី១ ទៅ២ដងក្នុង១អាទិត្យ ។ លោកថា ខ្នុររបស់លោកបានខូចខាតប្រមាណ៩០% ហើយបើនៅតែគ្មានភ្លៀងធ្លាក់ទៀត លោកគិតថា វានឹងងា.ប់ទាំងអស់ ហើយលោកត្រូវជំពាក់បំណុលគេទៀត ។ ចុងក្រោយ លោកបានសំណូមទៅខាងស្ថាប័ននានាឱ្យជួយផ្តល់ពូជខ្នុរដល់កសិករផង ។

ចំណែកលោក Niyom Nadi ជាកសិករដាំខ្នុរដែរនោះនិយាយថា លោកបានដាំខ្នុរចំនួន៣០០ដើម ហើយក្នុងចម្ការរបស់លោកគ្មានទឹកស្រោចអស់២ខែហើយ ទើបធ្វើឱ្យដើមខ្នុរងា.ប់ជាបន្តបន្ទាប់ប្រមាណ៥០% ។ លោកបន្តថា ទឹកស្រះក្នុងចម្ការមិនគ្រប់គ្រាន់សម្រាប់ស្រោចដំណាំទេ ដោយសារមានគ្រោះរាំងស្ងួតខ្លាំងពេក ហើយលោកមិនដឹងថា យកប្រាក់ពីណាទៅបង់ធនាគារទេ ។

រីឯលោក Noppadon Benjakul ជាកសិករដាំខ្នុរ និងស្វាយ និយាយថា បច្ចុប្បន្ន មានភ្លៀងធ្លាក់តិចតួច ដែលធ្វើឱ្យប៉ះពាល់ដល់ដំណាំខ្នុរ និងស្វាយ ។ លោកបន្តថា ដំណាំទាំងនេះបានជ្រុះស្លឹកអស់ពីដើម ហើយលោកបានសុំការអន្តរាគមន៍ពីចៅហ្វាយស្រុករួចហើយ ។

មន្ត្រីកសិកម្មបានណែនាំដល់កសិករឱ្យថែទាំដំណាំក្នុងពេលគ្រោះរាំងស្ងួត គឺត្រូវស្វែងរកប្រភពទឹកណាដែលអាចទទួលទឹកភ្លៀងទុកសម្រាប់ប្រើប្រាស់ពេលអាកាសធាតុក្តៅ ហើយកសិករអាចជីកអណ្តូង ឬបូមទឹកពីកន្លែងផ្សេងមកបញ្ចូលក្នុងស្រះរបស់ខ្លួន ។ សម្រាប់កសិករចំនួន៥២នាក់ក្នុងតំបន់នេះ បើខូចខាតដំណាំទាំងស្រុង ពួកគេនឹងទទួលបានប្រាក់ឧបត្ថម្ភផងដែរ ៕

ប្រភព ៖ khaosod