រដ្ឋធានីកៀវ៖ ការបំផ្ទុះទំនប់ទឹកដ៏ធំបំផុត ឆ្លងកាន់ដងទន្លេនីប្រូ ធ្វើឲ្យទឹកហូរជន់លិច នៅក្នុងតំបន់សង្គ្រាមទាំងមូល ហើយអាជ្ញាធរក្នុងតំបន់ បានអះអាង ថា មនុស្សរាប់ម៉ឺននាក់ ត្រូវបានជម្លៀសចេញ ក្រោយទឹកជន់លិចទីក្រុងនានារបស់ពួកគេ ខណៈក្រុងកៀវ និង ក្រុងមូស្គូ កំពុងតែចោទប្រកាន់ដាក់គ្នាទៅវិញទៅមក ជាអ្នកនៅពីក្រោយការបំផ្លិចបំផ្លាញទំនប់វារីអគ្គិសនីមួយនេះ

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃពុធ ទី៧ ខែមិថុនា ថា ការវាយប្រហារកម្ទេចសំណង់ នៅចុងខាងត្បូង នៃអាងស្តុកទឹកកាខូវកា (Kakhovka) ដ៏ធំសម្បើម កាលពីថ្ងៃអង្គារ បានធ្វើឲ្យធារទឹក ហូរបុកយ៉ាងខ្លាំង។ សកម្មភាពបែបនេះ រឹតតែបន្ថែមនូវទុក្ខវេទនា កាន់តែធ្ងន់ធ្ងរឡើង ដល់មនុស្សរាប់ពាន់នាក់ ដែលកំពុងតែជាប់នៅក្នុងតំបន់សមរភូមិ នៃសង្រ្គាមរបស់រុស្ស៊ី នាភាគខាងត្បូង នៃប្រទេសអ៊ុយក្រែន។

ជាមួយគ្នានេះដែរ រដ្ឋាភិបាលក្រុងកៀវ បានចោទប្រកាន់ដល់កម្លាំងទាហានរបស់រុស្ស៊ី ជាអ្នកបំផ្ទុះទំនប់វារីអគ្គិសនី និង ស្ថានីយវារីអគ្គិសនី នៅតំបន់ភាគខាងត្បូងរបស់ប្រទេសអ៊ុយក្រែន ដែលស្ថិតក្រោមការកាន់កាប់របស់ក្រុងម៉ូស្គូ នៅក្នុងសង្គ្រាម អស់រយៈពេលជាងមួយឆ្នាំកន្លងមកនេះ។ ចំណែក ក្រុមមន្ត្រីរុស្ស៊ី ក៏បានស្តីបន្ទោសទៅវិញ អំពីការទម្លាក់គ្រាប់បែករបស់អ៊ុយក្រែន ទើបបង្កឲ្យកើតមានគ្រោះមហន្ដរាយ ដល់ទំនប់វារីអគ្គិសនីដ៏ធំមួយនេះ។ បើទោះជាយ៉ាងណា គេនៅតែមិនទាន់ដឹង ថា ភាគីណាមួយជាអ្នកបង្កនោះឡើយ។

លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានបញ្ជាក់ ថា «ការបំផ្លិចបំផ្លាញទំនប់វារីអគ្គិសនីដ៏ធំមួយនេះ កំពុងតែបង្កឲ្យកើតមានគ្រោះមហន្តរាយដ៏ធំបំផុត ដល់បរិស្ថាន ខណៈទំនប់ដ៏ធំបំផុតមួយនេះ ត្រូវបានបង្កើតឡើង ដោយមនុស្ស នៅតំបន់អឺរ៉ុប មានអាយុកាលជាច្រើនទសវត្សរ៍កន្លងមកហើយ»។

លោកប្រធានាធិបតី ហ្សេឡែនស្គី បានថ្លែង នៅក្នុងសុន្ទរកថាជាវីដេអូ ទៅកាន់កិច្ចប្រជុំកំពូលរបស់បណ្តាប្រទេសអឺរ៉ុប នៅក្នុងអង្គការ Bucharest Nine (ប៊ូចារ៉េស ណាញ) ថា «ការបាក់ទំនប់ទឹកដ៏ធំណូវ៉ាកាខូវកា (Nova Kakhovka) មិនអាចកើតឡើង ដោយការបំផ្ទុះ មកពីខាងក្រៅ តាមរយៈការបាញ់ផ្លោងនោះទេ។ ទំនប់នេះ ត្រូវបានកាន់កាប់ ដោយរុស្ស៊ី ហើយពួកគេជាអ្នកបំផ្ទុះបំផ្លាញវា»។

ទំនប់ទឹកដ៏ធំណូវ៉ាកាខូវកានេះ មានកម្ពស់៣០ម៉ែត្រ និង ប្រវែង៣,២គីឡូម៉ែត្រ ហើយវាអាចស្ដុកទឹក ស្មើទៅនឹងប្រហែលទំហំបឹងទឹកប្រៃដ៏ធំ (Great Salt Lake) ស្ថិតក្នុងរដ្ឋយូថា (Utah) របស់សហរដ្ឋអាមេរិក។ សំណង់ទំនប់វារីអគ្គិសនីដ៏មហិមាមួយនេះ ត្រូវបានសាងសង់ឡើង នៅក្នុងឆ្នាំ១៩៥៦ នាសម័យសហភាពសូវៀត ដោយឆ្លងកាត់ដងទន្លេនីប្រូ (Dnipro)។ ទំនប់ទឹកដ៏ធំមួយនេះ ក្លាយជាផ្នែកមួយ សម្រាប់ការផ្គត់ផ្គង់ទឹក ដល់រោងចក្រវារីអគ្គិសនីណូវ៉ាកាខូវកា (Nova Kakhovka)។

ទំបន់ទឹកវារីអគ្គិសនីនេះ តែងតែផ្គត់ផ្គង់ទឹកសាបយ៉ាងសំខាន់ ទៅកាន់ឧបទ្វីបគ្រីមៀ (Crimea) របស់អ៊ុយក្រែន ដែលត្រូវបានរុស្ស៊ី រឹបអូសយក នៅក្នុងឆ្នាំ២០១៤ ហើយវាបានផ្គត់ផ្គង់ទឹកដល់រោងចក្រនុយក្លេអ៊ែរហ្សាប៉ូរីសហ្សា (Zaporizhzhia) ដែលស្ថិតនៅក្រោមការគ្រប់គ្រងរបស់ទាហានរុស្ស៊ី ចាប់តាំងពីសង្គ្រាមបានផ្ទុះឡើង កាលពីថ្ងៃទី២៤ ខែកុម្ភៈ ឆ្នាំ២០២២ រហូតមក។

ស្របគ្នានេះ ការិយាល័យរបស់ប្រធានាធិបតីអ៊ុយក្រែន បានបញ្ជាក់ ថា ប្រេងប្រហែល ១៥០តោន បានហូរចេញពីគ្រឿងចក្ររបស់ទំនប់ទឹកនេះ ហើយថា ប្រេងចំនួន៣០០តោនផ្សេងទៀត នៅតែអាចលេចធ្លាយចេញមកផងដែរ។

លោកស្រី ម៉ារី ស្ទ្រូដឺស (Marie Struthers) នាយកអង្គការអឺរ៉ុបខាងកើត និង អាស៊ីកណ្តាល បានអះអាង ថា «ការចំណាយលើកម្លាំងមនុស្ស និង បរិស្ថាន សម្រាប់ការបំផ្លិចបំផ្លាញទំនប់ណូវ៉ាកាកូវកា នេះ នឹងក្លាយជាគ្រោះមហន្តរាយដ៏ធំមួយ សម្រាប់កិច្ចការមនុស្សធម៌។ ការបំផ្លាញទំនប់ទឹកនេះ កំពុងតែបង្កគ្រោះថ្នាក់យ៉ាងធ្ងន់ធ្ងរដល់អាយុជីវិត សុវត្ថិភាព និង សុខុមាលភាពរបស់មនុស្សរាប់ម៉ឺននាក់»។

ទំនប់ដ៏ធំនេះ តែងតែផ្គត់ផ្គង់ទឹកដល់ដីស្រែចម្ការ នៅតំបន់ភាគខាងត្បូងរបស់ប្រទេសអ៊ុយក្រែន និង ឧបទ្វីបគ្រីមៀ ហើយវាក៏ជាប្រភពផ្គត់ផ្គង់ទឹកដ៏សំខាន់ សម្រាប់រោងចក្រនុយក្លេអ៊ែរហ្សាប៉ូរីសហ្សា (Zaporizhzhia) គ្រប់គ្រងដោយរុស្ស៊ី ផងដែរ។

ជាមួយគ្នានេះដែរ អង្គការឃ្លាំមើលនុយក្លេអ៊ែររបស់អង្គការសហប្រជាជាតិ បានបញ្ជាក់ ថា រោងចក្រថាមពលនុយក្លេអ៊ែរដ៏ធំបំផុតរបស់អឺរ៉ុបមួយនេះ គួរតែមានទឹកគ្រប់គ្រាន់ សម្រាប់ធ្វើឱ្យត្រជាក់ដល់ម៉ាស៊ីនរ៉េអាក់ទ័ររបស់រោងចក្រនុយក្លេអ៊ែរនេះ សម្រាប់រយៈពេលច្រើន ដោយដាច់ដោយឡែកមួយ បើទោះជាមានអាងស្តុកទឹកហូរចេញក៏ដោយ។ បន្ថែមពីនេះ អង្គការមួយនេះ ក៏បានអំពាវនាវឱ្យមានការសង្គ្រោះដល់អាងស្ដុកទឹកផងដែរ៕

ប្រទេសចិន៖ អ្នកវិទ្យាសាស្ត្រចិនបានបង្កើតកោសិកាមនុស្សដំណាក់កាលដំបូងនៅលើស្ថានីយ៍ Thien Cung ដែលជាស្ថានីយអវកាសមួយនៅក្នុងលំហ។ ការពិសោធន៍នេះត្រូវបានធ្វើឡើងបន្ទាប់ពីយានអវកាស Tianzhou ៦ ចូលចតនៅស្ថានីយអវកាស បន្ទាប់មក នាវាដឹកជញ្ជូនមនុស្ស Shenzhou-១៥ បាននាំយកកកោសិកាពីលំហត្រឡប់មកផែនដីវិញនៅថ្ងៃទី ៤ ខែមិថុនា។

យោងតាមអ្នកស្រាវជ្រាវនៅវិទ្យាស្ថានជីវបច្ចេកវិទ្យាកម្រិតខ្ពស់ និងវិទ្យាសាស្ត្រជីវវេជ្ជសាស្ត្រលោក Lei Xiaohua បានមានប្រសាសន៍ថា ការស្រាវជ្រាវកោសិកាដើមនៅក្នុងលំហគឺមានការចាប់អារម្មណ៍យ៉ាងខ្លាំងព្រោះកោសិកា នេះ មានរូបរាងកាយដូចជាមនុស្សទាំងមូល ដែលអាចត្រូវបានប៉ះពាល់ដោយបរិស្ថានមីក្រូទំនាញនៃលំហ។ លោកក៏បានបន្ថែមទៀតថា ក្រុមរបស់គាត់នឹងប្រៀបធៀបកោសិកាដែលកើតក្នុងលំហជាមួយនឹងកោសិកានៅលើផែនដី ដោយព្យាយាមស្វែងរកហ្សែនពិតប្រាកដដែលអាចគ្រប់គ្រងការអភិវឌ្ឍន៍។

នៅក្នុងការពិសោធន៍អ្នកវិទ្យាសាស្ត្របានបង្កើតកោសិកាឈាមនៅក្នុងលំហជាលើកដំបូង ដោយស្រាវជ្រាវឃើញថា កោសិកាដើម pluripotent មានសមត្ថភាពពិសេសអាចអភិវឌ្ឍទៅជាកោសិកាមនុស្សដោយជោគជ័យ។ កោសិកាដើម pluripotent គឺជាធាតុផ្សំសំខាន់នៅក្នុងឱសថ ដែលផ្តោតលើការបង្កើតឡើងវិញនូវជាលិកា និងសរីរាង្គផ្សេងទៀតរបស់មនុស្ស ដើម្បីជួយព្យាបាលសរីរាង្គដើមដែលខូចដោយសារភាពចាស់ ជំងឺ ឬគ្រោះថ្នាក់ជាដើម។

យោងតាមលោក Cang Huaixing អ្នកស្រាវជ្រាវទទួលបន្ទុកផ្នែកពិសោធន៍វិទ្យាសាស្ត្រនៅស្ថានីយ៍ Tiangong បានឱ្យដឹងថា បរិយាកាសក្នុងលំហមានទំនាញតិចតួចបំផុត និងមានវិទ្យុសកម្មខ្ពស់។ របៀបធ្វើដំណើរ ការរស់រានមានជីវិត និងការសម្រាលកូនក្នុងបរិយាកាសបែបនេះ គឺជាកិច្ចការស្រាវជ្រាវចម្បងរបស់យើង ហើយគោលបំណងដ៏ធំ នៃការបង្កើតកោសិកាមនុស្សដំបូងនៅក្នុងលំហ គឺដើម្បីស្វែងរកភពថ្មីមួយទៀតដែលសមរម្យសម្រាប់ជីវិត៕ ប្រភព៖vnexpress

ប្រទេសសិង្ហបុរី ៖ ភ្នាក់ងារបរិស្ថានជាតិសហការជាមួយការិយាល័យម្ហូបអាហារសិង្ហបុរី បានចេញគោលការណ៍ថ្មីមួយកំណត់ថា អ្នកដែលទៅបរិភោគអាហារនៅតាមភោជនីយដ្ឋានផ្សេងៗនៅទូទាំងប្រទេសសិង្ហបុរី ហើយមិនព្រមយកចាន និងថាសម្ហូបអាហារទៅដាក់នៅចំណុចដើមវិញទេ ពួកគេអាចប្រឈមនឹងការពិន័យជាប្រាក់ចំនួន៣០០ដុល្លារសិង្ហបុរី ។

នៅក្រោមគោលការណ៍ថ្មីនេះ បើគេរកឃើញថា អ្នកណាម្នាក់ធ្វើខុសជាលើកដំបូង គេនឹងដាស់តឿនជាលាយលក្ខណ៍អក្សរ ហើយបើអ្នកនោះធ្វើខុសជាលើកទី២ នឹងត្រូវបានគេពិន័យជាទឹកប្រាក់ចំនួន៣០០ដុល្លារសិង្ហបុរី ឬទាំងជាប់ពន្ធនាគារ ទាំងពិន័យ ។ ទោះយ៉ាងណា គោលការណ៍ថ្មីនេះនឹងលើកលែងចំពោះមនុស្សចាស់ ក្មេងតូច និងជនពិការ ដោយសារពួកគេមិនអាចជួយខ្លួនឯងបាន ប៉ុន្តែប្រសិនបើពួកគេមកបរិភោគអាហារជាមួយក្រុមគ្រួសារនោះ គឺក្រុមគ្រួសារត្រូវតែជួយប្រមូលចាន និងថាសអាហារចេញពីលើតុ បើមិនដូច្នោះទេ ពួកគេនឹងត្រូវបានគេពិន័យដូចគ្នា ។

ចំណែកភោជនីយដ្ឋាននានាមានតួនាទីសម្អាតតុម្ហូបអាហារ ឬជួយប្រមូលចានអាហាររបស់អតិថិជនដែលច្បាប់បានលើកលែង ដូចជា មនុស្សចាស់ ក្មេងតូច និងជនពិការ ។ គេបង្កើតគោលការណ៍នេះឡើងក្នុងគោលបំណងឱ្យពលរដ្ឋសិង្ហបុរីមានរបៀបរបបក្នុងការរស់នៅ ដោយសារមួយរយៈចុងក្រោយនេះ គេសង្កេតឃើញថា អតិថិជនភាគច្រើនដែលមកបរិភោគអាហារនៅតាមភោជនីយដ្ឋាន មិនចាប់អារម្មណ៍ក្នុងការប្រមូលចាន ឬថាសអាហាររបស់ខ្លួនទេ បើទោះជាភោជនីយដ្ឋានមួយចំនួនមានសេវាកម្មមនុស្សយន្តជួយប្រមូលចានទុកដាក់ក្តី ។ ហេតុនេះ ទើបប្រទេសសិង្ហបុរីចេញគោលការណ៍នេះ ដើម្បីបង្ខំឱ្យអតិថិជនទាំងនោះអនុវត្តតាម ៕ ប្រភព ៖ Mono News