ប្រទេសចិន ៖ វាបានក្លាយជារឿងមួយល្បីល្បាញនៅក្នុងបណ្តាញសង្គមប្រទេសចិន ដោយសារមានកូនក្រមុំម្នាក់ពាក់ខ្សែកធ្វើពីកងដៃមាស រហូតដល់ផុតក្បាលក្នុងថ្ងៃរៀបការរបស់ខ្លួន ។ ភ្ញៀវមកចូលរួមក្នុងពិធីរៀបការរបស់នាង និយាយថា នាងពាក់ខ្សែកច្រើនពេកស្ទើរមើលមិនឃើញក្បាល ប៉ុន្តែនៅពេលដឹងការពិត វាមិនដូចការគិតទេ ។

តាមប្រពៃណីរៀបការក្នុងតំបន់ជាច្រើននៅប្រទេសចិន ក្រុមគ្រួសារខាងស្រីតែងត្រៀមគ្រឿងអលង្ការឱ្យកូនក្រមុំពាក់ក្នុងថ្ងៃរៀបការ ដើម្បីធ្វើឱ្យពិធីរៀបការមើលទៅទាក់ទាញបំផុត ។ កាលពីពេលថ្មីៗនេះ នៅក្នុងបណ្តាញសង្គមចិនបានចែកចាយរូបភាពកូនកំលោះ និងកូនក្រមុំ ១គូ នៅទីក្រុងហ្វូសាន ខេត្តក្វាងទុង ដោយសារពួកគេចាប់អារម្មណ៍នឹងកូនក្រមុំពាក់គ្រឿងអលង្ការរហូតដល់ផុតក្បាលរបស់នាង ។ តាមរូបភាពនេះ កូនក្រមុំបានគ្របដណ្តប់ទៅដោយគ្រឿងអលង្ការពេញរាងកាយទាំងអស់ ហើយផ្ទៃមុខរបស់នាង ក៏ត្រូវបិទជិតដែរ ។ អ្នកលេងបណ្តាញសង្គមជាច្រើននាក់បានសាកសួរពីប្រវត្តិរបស់កូនក្រមុំ និងសង្ស័យថា តើរូបភាពនេះពិតប្រាកដ ឬគ្រាន់តែជាការសម្តែង ?

បើតាមការចុះផ្សាយរបស់សារព័ត៌មានចិនឱ្យដឹងថា ការពិត កូនក្រមុំមានខ្សែក និងកងដៃមាសត្រឹមតែចំនួន៦០ ប៉ុណ្ណោះ រីឯគ្រឿងអលង្ការផ្សេងទៀតជាអំណោយរបស់សាច់ញាតិ ដែលពួកគេបានប្រគល់ឱ្យនាងដើម្បីចូលរួមអបអរសាទរថ្ងៃរៀបការ ។ ចំណែកកូនក្រមុំទទួលស្គាល់ថា ការពាក់គ្រឿងអលង្ការទាំងនេះធ្វើឱ្យនាងនឿយហត់ ។ ក្រោយពីការសម្ភាសន៍កូនក្រមុំត្រូវបានផ្សព្វផ្សាយ អ្នកលេងបណ្តាញសង្គមចិនបានប្រៀបធៀបការរៀបការរបស់នាង គឺដូចគ្នានឹងការរៀបការរបស់កូនស្រីអ្នកមានត្រកូលខ្ពង់ខ្ពស់ម្នាក់នៅប្រទេសចិន ហើយគេសន្និដ្ឋានថា កូនក្រមុំរូបនេះពិតជាមានឋានៈខ្ពង់ខ្ពស់មិនខាន ៕ ប្រភព ៖ khaosod

ថ្មីៗនេះក្រុមហ៊ុន Netflix បានបញ្ចេញTrailer ខ្សែភាពយន្ត Squid Game វគ្គ២  ដែលមានគម្រោងចាក់បញ្ចាំងនៅដើមឆ្នាំ២០២៤ខាងមុខនេះ។

បើតាមព័ត៌មានបែកធ្លាយ សម្រាប់រដូវកាលទី២នេះ លោកអ្នកនឹងឃើញការវិលត្រឡប់វិញរបស់តួឯកប្រុសលោក Gi Hun និង Front Man។ ចំណែក​ឯបុរសដែល​ស្ថិតក្នុង​ឯកសណ្ឋាន ជាមួយនឹង​ក្រដាសបត់ (Ddakji) ក៏អាចនឹង​ត្រឡប់មកវិញដូចគ្នា។ អ្វីដែល​កាន់​តែពិសេស​អ្នក​នឹង​បាន​ស្គាល់​មុខមិត្តប្រុសរបស់ Young Hee (តុក្កតាកូនក្រមុំ) ដែល​មាន​ឈ្មោះថា Cheol Su។

លើសពីនេះទៅទៀត អ្នកគាំទ្ររំពឹងខ្ពស់ខ្លាំងថារដូវកាលទី២នេះ នឹងមានភាពរន្ធត់ចិត្ត និងចាប់អារម្មណ៍ខ្លាំងជាមុនទៅទៀត។

នៅក្នុង Trailer នេះ យើងឃើញថាមានតួរអង្គថ្មីៗនេះ ជាច្រើន ដែលអ្នកវិភាគយល់ឃើញថាជាតួ Front Man(បុរសពាក់ឈុតខ្មៅ)។

គួរបញ្ជាក់ផងដែរថា Squid Game រដូវកាលទី១ បានចំណាយពេលរយៈពេល១២ឆ្នាំ ក្នុងការសរសេររឿងមួយនេះឡើង ដែលកាលពីពេលកន្លងទៅរឿងនេះបានផ្ទុះជាខ្លាំងទូទាំងសកលលោក ដោយទទួលបានពានរង្វាន់ធំជាច្រើន៕

ប្រភព៖ economictimes

ប្រទេសចិន ៖ Erenhot គឺជាទីក្រុងដឹកជញ្ជូនទំនិញដ៏សំខាន់របស់ប្រទេសម៉ុងហ្គោលី ដែលស្ថិតនៅភាគខាងជើងប្រទេសចិន ។ ក្នុងរយៈពេល៥ខែដំបូងនៃឆ្នាំ២០២៣ នេះ មានរថភ្លើងដឹកជញ្ជូនទំនិញរវាងប្រទេសចិន និងតំបន់អឺរ៉ុប បានកើនឡើងជាង១៥% ។គេចាត់ទុកថា រថភ្លើង គឺជាមធ្យោបាយដឹកជញ្ជូនទំនិញតាមផ្លូវគោកដ៏សំខាន់មួយដែលងាយស្រួលបំផុត ដោយសារវាអាចតភ្ជាប់តំបន់អឺរ៉ុប និងអាស៊ី ។ ចំណែកប្រទេសម៉ុងហ្គោលី គឺជាតំបន់សំខាន់ក្នុងការពង្រីកផ្លូវដឹកជញ្ជូនទំនិញទៅទិសខាងជើង ។ ចាប់តាំងពីរថភ្លើងដឹកទំនិញរវាងប្រទេសចិន និងអឺរ៉ុប បើកដំណើរការជាលើកដំបូងកាលពីឆ្នាំ២០១៣ មក គេបានដឹកជញ្ជូនទំនិញតាមផ្លូវរថភ្លើងជាង១០លានតោនក្នុង១ឆ្នាំ ។

អនុប្រធានការិយាល័យគយប្រចាំទីក្រុង Erenhot លើកឡើងថា តំបន់នេះមានគុណសម្បត្តិផ្នែកភូមិសាស្ត្រ និងអាចភ្ជាប់គម្រោងខ្សែក្រវ៉ាត់១ ផ្លូវ១ ផងដែរ ។ ក្រុមការងារគយបានកែលម្អវិធានការនានា ដើម្បីឱ្យការដឹកជញ្ជូនទំនិញពីប្រទេសចិនទៅកាន់អឺរ៉ុបកាន់តែងាយស្រួលថែមទៀត ។

តាំងពីឆ្នាំ២០១១ China Railway Express បានផ្តល់សេវាកម្មដឹកជញ្ជូនទំនិញតាមរថភ្លើងឆ្លងកាត់ព្រំដែនប្រទេសចិន ទៅកាន់ទីក្រុងជាង២០០ ក្នុង២៤ប្រទេសនៅតំបន់អឺរ៉ុប ។ China Railway Express ត្រូវបានគេចាត់ទុកថា បានរួមចំណែកយ៉ាងសំខាន់ក្នុងគម្រោងខ្សែក្រវ៉ាត់១ ផ្លូវ១ ៕ ប្រភព ៖ China Face

ប្រទេសថៃ ៖ ខេត្តប្រាជួបស៊ីរីខាន់ ប្រទេសថៃ បានប្រឈមនឹងគ្រោះរាំងស្ងួតធ្ងន់ធ្ងរ ជាហេតុធ្វើឱ្យដំណាំខ្នុររបស់កសិករខ្វះខាតទឹក និងងា.ប់ជាបន្តបន្ទាប់ ។ កសិករលើកឡើងថា ពួកគេបានរងផលប៉ះពាល់ខ្លាំង ដោយសារគ្មានភ្លៀងធ្លាក់តាំងពីខែមេសា ឆ្នាំ២០២៣ រហូតដល់ខែមិថុនានេះ ហើយទោះជាខែមិថុនា មានភ្លៀងធ្លាក់មកខ្លះៗក្តី ប៉ុន្តែមិនច្រើនទេ និងមិនគ្រប់គ្រាន់សម្រាប់ស្រោចដំណាំឡើយ ។ ប្រាជួបស៊ីរីខាន់ គឺជាខេត្តមួយដែលបានដាំខ្នុរសម្រាប់ការនាំចេញ និងជាដំណាំសេដ្ឋកិច្ចលំដាប់ទី២ បន្ទាប់ពីស្វាយ ។

លោក Samran Ketphet ជាកសិករដាំខ្នុរនិយាយថា លោកបានដាំខ្នុរចំនួន១.២០០ដើម ហើយពេលនេះ លោកលំបាកណាស់ ដោយសារខ្វះទឹកស្រោចដំណាំ ។ លោកបន្តថា ក្នុងចម្ការរបស់លោក ក៏មានអណ្តូងទឹកដែរ ប៉ុន្តែទឹកក្នុងអណ្តូងមិនគ្រប់គ្រាន់សម្រាប់ស្រោចខ្នុរទេ ។ ដូច្នេះ លោកបានស្រោចទឹកពី១ ទៅ២ដងក្នុង១អាទិត្យ ។ លោកថា ខ្នុររបស់លោកបានខូចខាតប្រមាណ៩០% ហើយបើនៅតែគ្មានភ្លៀងធ្លាក់ទៀត លោកគិតថា វានឹងងា.ប់ទាំងអស់ ហើយលោកត្រូវជំពាក់បំណុលគេទៀត ។ ចុងក្រោយ លោកបានសំណូមទៅខាងស្ថាប័ននានាឱ្យជួយផ្តល់ពូជខ្នុរដល់កសិករផង ។

ចំណែកលោក Niyom Nadi ជាកសិករដាំខ្នុរដែរនោះនិយាយថា លោកបានដាំខ្នុរចំនួន៣០០ដើម ហើយក្នុងចម្ការរបស់លោកគ្មានទឹកស្រោចអស់២ខែហើយ ទើបធ្វើឱ្យដើមខ្នុរងា.ប់ជាបន្តបន្ទាប់ប្រមាណ៥០% ។ លោកបន្តថា ទឹកស្រះក្នុងចម្ការមិនគ្រប់គ្រាន់សម្រាប់ស្រោចដំណាំទេ ដោយសារមានគ្រោះរាំងស្ងួតខ្លាំងពេក ហើយលោកមិនដឹងថា យកប្រាក់ពីណាទៅបង់ធនាគារទេ ។

រីឯលោក Noppadon Benjakul ជាកសិករដាំខ្នុរ និងស្វាយ និយាយថា បច្ចុប្បន្ន មានភ្លៀងធ្លាក់តិចតួច ដែលធ្វើឱ្យប៉ះពាល់ដល់ដំណាំខ្នុរ និងស្វាយ ។ លោកបន្តថា ដំណាំទាំងនេះបានជ្រុះស្លឹកអស់ពីដើម ហើយលោកបានសុំការអន្តរាគមន៍ពីចៅហ្វាយស្រុករួចហើយ ។

មន្ត្រីកសិកម្មបានណែនាំដល់កសិករឱ្យថែទាំដំណាំក្នុងពេលគ្រោះរាំងស្ងួត គឺត្រូវស្វែងរកប្រភពទឹកណាដែលអាចទទួលទឹកភ្លៀងទុកសម្រាប់ប្រើប្រាស់ពេលអាកាសធាតុក្តៅ ហើយកសិករអាចជីកអណ្តូង ឬបូមទឹកពីកន្លែងផ្សេងមកបញ្ចូលក្នុងស្រះរបស់ខ្លួន ។ សម្រាប់កសិករចំនួន៥២នាក់ក្នុងតំបន់នេះ បើខូចខាតដំណាំទាំងស្រុង ពួកគេនឹងទទួលបានប្រាក់ឧបត្ថម្ភផងដែរ ៕

ប្រភព ៖ khaosod

ណូបែល គឺ​ជា​ពាន​រង្វាន់​កិត្តិយស​លំដាប់​ខ្ពស់​មួយ​របស់​ពិភពលោក ដែល​ត្រូវ​ប្រគល់​ជូន​ដល់​បុគ្គល​មាន​ស្នាដៃ​ជារៀងរាល់​ឆ្នាំ។

ពាន​រង្វាន់នេះ ត្រូវបានបែងចែកជា៦​គឺ ពាន​រង្វាន់​ណូបែល​រូបវិទ្យា ពាន​រង្វាន់​ណូបែល​គីមីវិទ្យា ពាន​រង្វាន់​ណូបែល​វេជ្ជសាស្ត្រ ពាន​រង្វាន់​ណូបែល​អក្សរសាស្ត្រ ពាន​រង្វាន់​ណូបែល​សេដ្ឋកិច្ច-វិទ្យាសាស្ត្រ និង​ពាន​រង្វាន់​ណូបែល​សន្តិភាព។

ពានរង្វាន់​ទាំង​អស់​នេះ បង្កើត​ឡើង​ដើម្បី​លើក​ទឹក​ចិត្ត​បុគ្គល​ទាំង​ឡាយ​ដែល​សម្រេច​បាន​ជោគជ័យ​យ៉ាង​ធំធេង ជា​ប្រយោជន៍​ដល់​ជាតិ និងពិភពលោក។ លើសពីនេះទៅទៀត ក៏ដើម្បីលើកកម្ពស់​ការ​ស្រាវជ្រាវ ការ​បង្កើត​ថ្មី ការ​​ជួយ​សង្គម អភិវឌ្ឍ​វិស័យ​អប់រំ ផ្សព្វផ្សាយ​សន្តិភាព និង​កាត់​បន្ថយ​ជម្លោះ​នៅ​លើ​ពិភពលោក​ផង​ដែរ។

ពាន​រង្វាន់​ណូបែល បង្កើត​ឡើង​ក្នុង​ឆ្នាំ​១៨៩៥ ក្រោម​គំនិត​ផ្ដួច​ផ្ដើម​របស់​លោក Alfred Nobel ដែល​ជា​អ្នក​គីមីវិទ្យា និង​វិស្វករ​ជន​ជាតិ​ស៊ុយអែត។ ពាន​រង្វាន់ ​៥​ផ្នែក ត្រូវ​បាន​ប្រគល់​ជូន​​ដំបូង​ក្នុង​ឆ្នាំ​១៩០១ លើក​លែង​តែ​ពាន​រង្វាន់​ណូបែល​សេដ្ឋកិច្ច-វិទ្យាសាស្ត្រ ដែល​ត្រូវ​បាន​បង្កើត​ឡើង​ក្រោយ​គេ​ក្នុង​ឆ្នាំ​១៩៦៨។ ពិធី​ប្រគល់​ពាន​រង្វាន់​ណូបែល​សន្តិភាព ត្រូវ​ប្រារព្ធ​ឡើង​នៅ​រាជធានី Oslo ប្រទេស​ន័រវែស ចំណែក​ឯ​ពាន​រង្វាន់ ៥​ផ្នែក​ទៀត ធ្វើ​ឡើង​នៅ​រាជធានី Stockholm ប្រទេស​ស៊ុយអែត។

ដោយឡែកចំពោះការសម្រេច​ផ្ដល់​ជយលាភី​ពាន​រង្វាន់​ណូបែល​ទាំង​៦​នេះ ត្រូវបានបែងចែកជា ៤៖

1. ជ័យលាភី​​ពាន​រង្វាន់​ណូបែល​រូបវិទ្យា ពាន​រង្វាន់​ណូបែល​គីមីវិទ្យា និង​ពាន​រង្វាន់​ណូបែល​សេដ្ឋកិច្ច-វិទ្យាសាស្ត្រ ត្រូវ​សម្រេច​ផ្ដល់​ដោយ រាជបណ្ឌិត​សភា​វិទ្យាសាស្ត្រ​ស៊ុយអែត
2. ​ជ័យ​លាភី​ពាន​រង្វាន់​ណូបែល​វេជ្ជសាស្ត្រ ត្រូវ​សម្រេច​ផ្ដល់​ដោយ សភា​ណូបែល​នៅ​វិទ្យាស្ថាន Karolinska នៃ​ប្រទេស​ស៊ុយអែត
3. ជ័យ​លាភី​ពាន​រង្វាន់​ណូបែល​អក្សរសាស្ត្រ ត្រូវ​សម្រេច​ផ្ដល់​ដោយ បណ្ឌិត​សភា​ស៊ុយអែត
4. ជ័យ​លាភី​ពានរង្វាន់​ណូបែល​សន្តិភាព ត្រូវ​សម្រេច​ដោយ គណៈកម្មការ​ណូបែល​ប្រទេស​ន័រវែស

ប្រភព: Wikipedia 

ប្រទេសសិង្ហបុរី ៖ តាមទិន្នន័យរបស់ក្រុមហ៊ុនអចលនទ្រព្យលំដាប់ពិភពលោក Savills បង្ហាញថា តម្លៃជួលបន្ទប់ស្នាក់នៅក្នុងទីតាំងល្អៗនៅប្រទេសសិង្ហបុរីបានកើនឡើងជាង២៦% នៅឆ្នាំ២០២២ ហើយចំនួននេះខ្ពស់ជាងនៅទីក្រុងឡុងដ៍ ទីក្រុងស៊ីដនី និងទីក្រុងញូវយ៉ក រហូតដល់២ដង ។ ការចំណាយក្នុងការរស់នៅកើនឡើងបានធ្វើឱ្យជនបរទេសធ្វើការនៅសិង្ហបុរីនាំគ្នាផ្លាស់ទីលំនៅទៅប្រទេសម៉ាឡេស៊ីវិញ ដោយសារនៅទីនោះ ការចំណាយផ្សេងៗលើជីវភាពប្រចាំថ្ងៃថោកជាង ។

កាលពីខែមករា ឆ្នាំ២០២៣ រដ្ឋាភិបាលសិង្ហបុរីបានដំឡើងពន្ធទំនិញ និងសេវាកម្មផ្សេងៗ ស្មើ៨% នៅឆ្នាំ២០២៣ និង៩% នៅឆ្នាំ២០២៤ ។ ការដំឡើងពន្ធនេះបានធ្វើឱ្យលោក Benedikt Becker ជាជនបរទេសម្នាក់ធ្លាប់ធ្វើការក្នុងក្រុមហ៊ុនទីផ្សារមួយនៅប្រទេសសិង្ហបុរី បានសម្រេចចិត្តផ្លាស់ទៅរស់នៅប្រទេសផ្សេងទៀតក្នុងតំបន់អាស៊ាន ដែលការចំណាយប្រាក់ក្នុងការរស់នៅតិចជាងសិង្ហបុរី ។ គេសង្កេតឃើញថា ការជួលបន្ទប់រស់នៅ និងតម្លៃទំនិញផ្សេងៗបានកើនឡើងយ៉ាងខ្លាំងនៅសិង្ហបុរី ក្រោយពីសេដ្ឋកិច្ចប្រទេសនេះងើបឡើងវិញ បន្ទាប់ពីការរាតត្បាតនៃជំងឺកូវីដ ។

បើទោះជាគ្មានទិន្នន័យពីការផ្លាស់ប្តូរទីលំនៅរបស់ជនបរទេសចេញពីសិង្ហបុរីជាផ្លូវការ ប៉ុន្តែក្រុមហ៊ុនអន្តរជាតិផ្សេងៗក៏បានចាប់ផ្តើមស្វែងរកបុគ្គលិកពីក្រៅប្រទេសផងដែរ ដើម្បីកាត់បន្ថយការចំណាយប្រាក់របស់ក្រុមហ៊ុន ។ ជនបរទេសមួយចំនួនបានផ្លាស់ទៅរស់នៅប្រទេសម៉ាឡេស៊ី ដែលមានព្រំដែនជាប់សិង្ហបុរី ខណៈពលរដ្ឋម៉ាឡេស៊ីប្រើប្រាស់ភាសាអង់គ្លេស ហើយការចំណាយផ្សេងៗក្នុងការរស់នៅថោកជាង ។

ទោះយ៉ាងណា សិង្ហបុរីនៅតែដើរតួនាទីសំខាន់ក្នុងការទាក់ទាញ CEO របស់ក្រុមហ៊ុនបានចុះបញ្ជីជាច្រើនរស់នៅប្រទេសសិង្ហបុរីបន្តទៀត ព្រោះអាចជិតស្និទ្ធជាមួយវិនិយោគិន និងក្រុមហ៊ុនភាគហ៊ុនឯកជន ។ ក្នុងអំឡុងពេលជនបរទេសបានផ្លាស់ចេញពីសិង្ហបុរី នៅមានជនបរទេសជានាយកគ្រប់គ្រងក្រុមហ៊ុនកម្រិតកំពូលបានចូលមកចាប់ឱកាសវិនិយោគក្នុងគម្រោង Overseas Networks & Expertise Pass (ONE Pass) កាន់តែច្រើន ។ វាជាគម្រោងផ្តល់ទិដ្ឋាការអនុញ្ញាតឱ្យជនបរទេសមានឋានៈខ្ពស់ៗអាចធ្វើការនៅក្រុមហ៊ុនជាច្រើនក្នុងពេលជាមួយគ្នាបាន ។ ម្យ៉ាងទៀត សិង្ហបុរីនៅតែទាក់ទាញវិនិយោគិនពីបណ្តាប្រទេសលោកខាងលិច ព្រោះសិង្ហបុរីមានហេដ្ឋារចនាសម្ព័ន្ធពេញលេញ ។

បើទោះជាជនបរទេសបានផ្លាស់ទីលំនៅចេញពីសិង្ហបុរីក្តី ប៉ុន្តែសិង្ហបុរីនៅតែទទួលចំណាត់ថ្នាក់ទី១ ជាប្រទេសទាក់ទាញអ្នកមានសមត្ថភាពខ្ពស់ៗនៅអាស៊ីមកធ្វើការក្នុងប្រទេសរបស់ខ្លួន ។ នេះតាមការចាត់ចំណាត់ថ្នាក់របស់ INSEAD Global Competitiveness Index 2022 ។ លើសពីនេះ បើតាមលទ្ធផលការស្ទង់មតិរបស់ ECA International 2023 Location Ratings Survey បង្ហាញថា សិង្ហបុរីនៅតែទទួលតំណែងជាប្រទេសគួរឱ្យរស់នៅបំផុតក្នុងតំបន់អាស៊ីអាគ្នេយ៍ សម្រាប់ជនបរទេសធ្វើការនៅក្រៅប្រទេស ៕ ប្រភព ៖ AEC Connect